དྲག་བསྐུལ་ཀླུ་བདུད་ཁྲོས་པའི་ང་རོ།

འོད་ཟེར་ཅན་མའི་ཐུགས་སྒྲུབ་ལས༔ དྲག་བསྐུལ་ཀླུ་བདུད་ཁྲོས་པའི་ང་རོ་བཞུགས༔

རྒྱལ་ཡུམ་དཔའ་མོ་འོད་ཟེར་ཅན་ལ་འདུད༔ དེ་ཡི་སྒྲུབ་པ་ཟབ་མོ་ཉམས་བླང་སྐབས༔ ལོག་འདྲེན་སྒྲོལ་ཕྱིར་ཐུགས་དམ་རྒྱུད་བསྐུལ་ཕྱིར༔ དམར་གྱི་གཏོར་མ་དགྲ་བགེགས་བཀུག་བྱས་ནས༔ མི་མཐུན་བཟློག་ཕྱིར་དྲག་པོའི་དབྱངས་རོལ་བཅས༔ རྔམ་པའི་ང་རོ་དང་བཅས་འདི་སྐད་དོ༔ ཧཱུྃ་བྷྱོ༔ སྐྱེ་མེད་ཆོས་དབྱིངས་རྣམ་དག་ཕོ་བྲང་ནས༔ ཀུན་བཟང་ཆོས་སྐུ་སྐྱེ་འགག་འདུས་མ་བྱས༔ སྤྱན་འདྲེན་ཐུགས་དམ་རྒྱུད་བསྐུལ་མི་འཚལ་ཏེ༔ ལོག་འདྲེན་འདུལ་ཕྱིར་དྲག་པོའི་ལས་ལ་བསྐུལ༔ སྐུ་ནི་གར་དགུའི་ཉམས་ལྡན་སྲིན་མོའི་གཟུགས༔ གསུང་ནི་དྲག་ཤུལ་རྡོ་རྗེའི་གད་མོ་དགོད༔ ཐུགས་ནི་ཞི་བ་ཆེན་པོར་གཡོ་མེད་ཀྱང་༔ དགྲ་གདོན་ཆམ་ལ་དབབ་ཕྱིར་དབྱིངས་ནས་བཞེངས༔ གདོད་ནས་སེམས་ཉིད་བདེ་གཤེགས་སྙིང་པོའི་གཤིས༔ བདེ་སྡུག་མཚན་འཛིན་སྤྲོས་པའི་མཐའ་བྲལ་ཀྱང་༔ མ་རིག་གསུམ་གྱིས་མཚན་མར་འཛིན་པ་ཡི༔ དགྲ་གདོན་གཡུལ་ངོ་ཟློག་ཕྱིར་དྲག་ཏུ་བསྐུལ༔ ཁྱད་པར་ཕན་བདེའི་འབྱུང་གནས་རྒྱལ་བའི་བསྟན༔ སྙིང་ནས་དམོད་ཅིང་ཐབས་ཀྱིས་བསྣུབ་ལ་བརྩོན༔ བཤད་སྒྲུབ་གཞི་འཛིན་བླ་མར་གཤེ་ཞིང་སྡང་༔ དམ་ཉམས་ཞིང་བཅུ་སྒྲོལ་བའི་དུས་ལ་བབས༔ སྐྱེ་རྒུ་ཡོངས་ཀྱི་སྲོག་དང་ལོངས་སྤྱོད་ལ༔ གནོད་ཅིང་འཚེ་བར་བྱེད་པའི་དམ་སྲིའི་རིགས༔ ཇག་ཆོམ་རྐུན་པོའི་བརྫུ་རུ་ཞུགས་པ་ཡི༔ མ་རབས་སྡིག་སྤྱོད་འདུལ་བའི་དུས་ལ་བབས༔ ཡང་དགོས་རྩོད་ལྡན་སྙིགས་མའི་སྐྱེ་བོ་རྣམས༔ དངོས་སུ་ཕྲོག་ཅིང་ལྐོག་ཏུ་ནོར་རྫས་རྐུ༔ ཆོས་དང་རྒྱབ་འགལ་སྲོག་གཅོད་མི་དགེའི་རིགས༔ རྟག་ཏུ་བརྩོན་རྣམས་དྲག་པོས་ཚར་ཆོད་ཅིག༔ ཧཱུྃ་བྷྱོ༔ ཤར་ཕྱོགས་རྡོ་རྗེ་འབར་བའི་དུར་ཁྲོད་ནས༔ མེ་ལོང་ཡེ་ཤེས་ལྷ་མོ་འོད་ཟེར་ཅན༔ ཞེ་སྡང་མེ་ལྟར་འབར་བའི་དགྲ་བགེགས་རྣམས༔ བྱམས་པ་ཆེན་པོའི་དབྱིངས་སུ་ཚར་ཆོད་ཅིག༔ ལྷོ་ཕྱོགས་རིན་ཆེན་འབར་བའི་དུར་ཁྲོད་ནས༔ མཉམ་ཉིད་ཡེ་ཤེས་ལྷ་མོ་འོད་ཟེར་ཅན༔ ང་རྒྱལ་རི་ལྟར་སྙིལ་བའི་དགྲ་བགེགས་རྣམས༔ བཏང་སྙོམས་ཆེན་པོའི་ཀློང་དུ་སྤ་བཀོང་ཤིག༔ ནུབ་ཕྱོགས་པདྨ་འབར་བའི་དུར་ཁྲོད་ནས༔ སོར་རྟོག་ཡེ་ཤེས་ལྷ་མོ་འོད་ཟེར་ཅན༔ འདོད་ཆགས་ཆུ་ལྟར་འཁྲུགས་པའི་དགྲ་བགེགས་རྣམས༔ ཆགས་བྲལ་ཆེན་པོའི་ངང་དུ་ཟིལ་གནོན་ཅིག༔ བྱང་ཕྱོགས་རྒྱ་གྲམ་འབར་བའི་དུར་ཁྲོད་ནས༔ བྱ་གྲུབ་ཡེ་ཤེས་ལྷ་མོ་འོད་ཟེར་ཅན༔ ཕྲག་དོག་རླུང་ལྟར་འཚུབས་པའི་དགྲ་བགེགས་རྣམས༔ སྙིང་རྗེ་ཆེན་པོའི་སྟོབས་ཀྱིས་རྡུལ་དུ་རློགས༔ དབུས་ཕྱོགས་འོད་ཟེར་འབར་བའི་དུར་ཁྲོད་ནས༔ ཆོས་དབྱིངས་ཡེ་ཤེས་ལྷ་མོ་འོད་ཟེར་ཅན༔ གཏི་མུག་མུན་ལྟར་གཏིབས་པའི་དགྲ་བགེགས་རྣམས༔ འོད་གསལ་བདེ་ཆེན་ཀློང་དུ་འཇོམས་པར་མཛོད༔ རྒྱ་གར་མྱ་ངན་མེད་པའི་སྐྱེད་ཚལ་ནས༔ སྤྲུལ་པའི་ལྷ་མོ་ཉི་ཟླའི་འོད་ཟེར་ཅན༔ ཐུགས་བསྐྱེད་དམ་བཅའི་སྟོབས་ཀྱིས་ཆེར་ཁྲོས་ནས༔ དགྲ་རྐུན་དབང་པོའི་སྒོ་རྣམས་རབ་སྡོམས་ཤིག༔ ཧཱུྃ་ཧྲཱིཿ དྲག་མོ་འོད་ཟེར་ཅན་གྱི་སྒྱུ་འཕྲུལ་ལས༔ རྒྱལ་ཀུན་དགྱེས་པ་བསྐྱེད་པའི་ལྷ་མོ་བརྒྱད༔ ཟག་མེད་ཡེ་ཤེས་ཀློང་ནས་སྐུར་བཞེངས་ཏེ༔ ཟག་བཅས་ལོག་རྟོག་དབང་ཤེས་རྒྱུན་ཆོད་ཅིག༔ མ་རིག་དབང་གིས་གཟུགས་ལ་ཞེན་པའི་དགྲ༔ དེ་ཡི་རྒྱུད་ལས་སྡུག་བསྔལ་བསྐྱེད་པའི་འདྲེ༔ སྣང་སྟོང་བདེ་བ་ཆེན་པོའི་མཚོན་ཆ་ཡིས༔ ལོག་རྟོག་མིག་ཤེས་འཁྲུལ་བའི་སྐྱེ་རྒྱུན་ཆོམས༔ ཀུན་བརྟགས་དབང་གིས་སྒྲ་ལ་ཞེན་པའི་དགྲ༔ དེ་ཡི་རྒྱུ་ལས་སྡུག་བསྔལ་བསྐྱེད་པའི་འདྲེ༔ གྲག་སྟོང་ཡེ་ཤེས་རོལ་པའི་མཚོན་རྣོན་པོས༔ འཁྲུལ་རྟོག་སྒྲ་འཛིན་དབང་པོ་རྩད་ནས་ཆོད༔ ཉོན་ཡིད་དབང་གིས་དྲི་ལ་ཞེན་པའི་དགྲ༔ དེ་ཡི་རྒྱུ་ལས་སྡུག་བསྔལ་བསྐྱེད་པའི་འདྲེ༔ ཚོར་སྟོང་ཟག་མེད་གནམ་ལྕགས་ཞུན་མའི་མེས༔ ཉིང་འཁྲུལ་ཚང་ཚིང་འཁྲིགས་པའི་ནགས་ཚལ་སྲེག༔ སྐྱེ་མཆེད་དབང་གིས་རོ་ལ་ཆགས་པའི་དགྲ༔ དེ་ཡི་རྒྱུ་ལས་སྡུག་བསྔལ་བསྐྱེད་པའི་འདྲེ༔ མྱོང་སྟོང་ཞེན་མེད་མཐའ་བྲལ་མཚོན་ཆ་ཡིས༔ གཞན་ཡང་དགྲ་འདྲེ་ལོག་སྨྲའི་ཞེན་ཐག་ཆོད༔ སྲེད་ལེན་དབང་གིས་རེག་བྱར་ཞེན་པའི་དགྲ༔ དེ་ཡི་རྒྱུ་ལས་སྡུག་བསྔལ་བསྐྱེད་པའི་འདྲེ༔ རིག་སྟོང་ཟག་མེད་བདེ་བའི་མཚོན་ཆ་ཡིས༔ ལུགས་འབྱུང་རྟེན་འབྲེལ་སྐྱེ་བའི་འཁོར་རྒྱུན་ཆོད༔ མེད་ལ་ཡོད་འཛིན་རྟག་ཆད་སྣང་བའི་དགྲ༔ ཡོད་མེད་མཐའ་ཞེན་སྡུག་བསྔལ་ཀུན་འབྱུང་འདྲེ༔ བདག་མེད་རྟོགས་པའི་ཤེས་རབ་མཚོན་ཆ་ཡིས༔ འཁྲུལ་མེད་རང་བྱུང་ཡེ་ཤེས་ཀློང་དུ་སྒྲོལ༔ ཧཱུྃ་བྷྱོ༔ དགོངས་སུ་གསོལ་ལོ་རྩ་གསུམ་དམ་ཅན་ཚོགས༔ གསན་དུ་གསོལ་ལོ་འཕགས་མ་འོད་ཟེར་ཅན༔ ཐུགས་དམ་བསྐུལ་ལོ་དམ་ཅན་དྲེགས་པའི་སྡེ༔ དབྱིངས་ནས་བཞེངས་ཤིག་དགྲ་འདྲེའི་གཤེད་དུ་ཆས༔ དམ་ཅན་ཕོ་རྒྱུད་ཚོགས་རྣམས་གཡས་ནས་ཆས༔ དགྲ་བོའི་ཕོ་རྒྱུད་མ་ལུས་གྲི་རུ་སོད༔ སྲུང་མ་མོ་རྒྱུད་ཚོགས་རྣམས་གཡོན་ནས་ཆས༔ དགྲ་བོའི་མོ་རྒྱུད་མ་ལུས་མངལ་ནས་སྐོམ༔ ཡུལ་ལྷ་དྲག་རྩལ་ཅན་རྣམས་རྒྱབ་ནས་ཆས༔ དགྲ་བོའི་ལྷ་སྲུང་རང་གཤེད་རང་ལ་ཕོབ༔ བདག་གི་ཚེ་རབས་སྲུང་མ་མདུན་ནས་ཆས༔ དགྲ་རྐུན་ཇག་ཆོམ་ལུས་སྲོག་སོ་སོར་ཕྲོལ༔ ཁྱད་པར་སྔ་དགྲ་བརྡར་བའི་དམ་ཉམས་ཀྱི༔ མགོ་བོ་ཆོད་ལ་དོན་སྙིང་རྔམ་ཟས་གྱིས༔ ཕྱི་དགྲ་ཡིད་ལ་བརྣག་པའི་ལོག་འདྲེན་གྱི༔ བསམ་ངན་རླུང་ལ་བསྐུར་བའི་དབང་པོ་སྣུབས༔ ད་ལྟ་ལག་ཏུ་ལེན་པའི་དགྲ་རྐུན་གྱི༔ མིག་དབང་སྐུད་པས་ཚེམས་ལ་ཚ་གྲང་གི༔ ནད་ཡམས་ཆར་དུ་ཕོབ་ལ་མི་ནོར་རློགས༔ མདོར་ན་ལོག་སྦྱོར་ཤོམ་པའི་དགྲ་འདྲེ་ལ༔ མངོན་སྤྱོད་དྲག་པོའི་ཕྲིན་ལས་མི་ཟད་པས༔ གནམ་ལྕགས་ཐོག་མདས་བྲག་རུལ་བཤིག་པ་ལྟར༔ ད་ལྟ་སྐད་ཅིག་བརླག་པའི་ཕྲིན་ལས་མཛོད༔ ཅེས་བརྗོད་དམར་གཏོར་དགྲ་བགེགས་ཀྱི༔ ཤ་ཁྲག་རུས་པར་དམིགས་ཏེ་ཕུལ༔ ས་མ་ཡཱ༔ རྒྱ་རྒྱ་རྒྱ༔ ཡེ་ཤེས་ཌཱཀྐིའི་བརྡ་རིས་མཆོག༔ རིག་པ་དབྱིངས་ཀྱི་སྒྲོམ་དུ་སྦས༔ དུས་བབས་པདྨའི་ཐུགས་རྗེའི་མཐུས༔ ལས་སྐལ་ལྡན་པས་བསྐུལ་བའི་ངོར༔ སྐལ་ལྡན་ལུང་རིག་གླིང་པས་སྤེལ༔ གུ་ཧྱ༔