བསྒྲལ་ལས་ཐོག་མདའ་དམར་པོ།

འོད་ཟེར་ཅན་མའི་ཐུགས་སྒྲུབ་ལས༔ བསྒྲལ་ལས་ཐོག་མདའ་དམར་པོ་བཞུགས༔

རྒྱལ་ཡུམ་དཔའ་མོའི་ཞབས་ལ་འདུད༔ འཕགས་མ་འོད་ཟེར་ཅན་མ་ཡི༔ ཡང་ཟབ་ཐུགས་ཀྱི་སྒྲུབ་པ་ཡི༔ ཆ་ལག་སྒྲོལ་ལས་ཐོག་མདའ་སྟོན༔ ས་མ་ཡཱ༔ རབ་ཏུ་དབེན་ཅིང་རྩུབ་པའི་གནས༔ གཅན་གཟན་མི་རྒོད་རྒྱུ་བའི་སར༔ མི་བསད་ས་ལ་དུག་ཁྲག་གིས༔ ཆག་ཆག་གདབ་པའི་ཐིག་བརྒྱད་གདབ༔ མ་ཏྲཾ་ལྟོ་བར་གྲུ་གསུམ་དཀྱིལ༔ མཱུཾ་མཐར་གཡས་གཡོན་ཧཱུྃ་བྷྱོ་དང་༔ མདུན་རྒྱབ་ཕཊ་ཛ་བྲིས་པའི་མཐར༔ དུར་ཁྲོད་རྡོ་ར་མེ་རིས་བསྐོར༔ དབུས་སུ་བྲུབ་ཁུང་བང་རིམ་གསུམ༔ དེ་ནས་དགྲ་འདྲེའི་ལིངྒ་ནི༔ ཟག་རྫས་བྱུག་ཤིང་ཚོན་སྐུད་དཀྲིས༔ རྩང་མཚེ་ཡུངས་དང་མཚོན་ཆས་བསྐོར༔ དེ་སྟེང་མཉྫུ་ཁྲིའུའི་ཁར༔ ལྕགས་སམ་མཚན་ངན་ཐོད་པ་རུ༔ འབྲུ་ནག་ཁྲག་ཆང་གིས་སྦགས་པས༔ དམར་གཏོར་གཙོ་འཁོར་བཅོ་བརྒྱད་པ༔ ཉི་ཟླའི་ཞགས་པ་མེ་རིས་བརྒྱན༔ ཤ་ཁྲག་སྙིང་དང་ལིང་གས་བརྒྱན༔ རྩང་མཚེ་དུག་གི་ལོ་མས་སྤྲས༔ རྩེ་མོར་སྲིད་པའི་བྱ་ཁྱུང་གཟུགས༔ དར་ནག་གདུགས་ཀྱི་གུར་ཡང་ཕུབ༔ རྣལ་འབྱོར་ལྷ་སྔགས་ཏིང་འཛིན་གསལ༔ རྩ་གསུམ་སྲུང་མ་ཡུལ་ལྷ་ལ༔ གསེར་སྐྱེམས་ཕུལ་ནས་གཟུ་དཔང་ནི༔ ཧོ༔ དགོངས་ཤིག་རྩ་ བརྒྱུད་བླ་མ་གཟུ་དང་དཔང་༔ དང་པོ་སྨིན་བྱེད་དབང་གི་དཀྱིལ་འཁོར་བསྟན༔ བར་དུ་གྲོལ་བྱེད་གདམས་པས་ལམ་ལ་བཙུད༔ ཐ་མ་གྲུབ་འབྲས་རེ་བའི་སློབ་བུ་ཡི༔ བསླབ་པའི་ཁྲིམས་རལ་རྡོ་རྗེ་མཆེད་ལ་བརྙས༔ ཕ་མ་འགྲོ་ལ་ལོག་སྦྱོར་སྡིག་རྒྱུན་སྤེལ༔ དམ་ལོག་འདི་ལ་བཀའ་ཆད་མ་བྱུང་ན༔ རྩ་གསུམ་སྲུང་མའི་ནུས་མཐུ་གང་དུ་ཐལ༔ གསོན་ཅིག་ཡི་དམ་སྒྲུབ་སྡེ་ཆེན་པོ་བརྒྱད༔ དང་པོར་བླ་མ་བསྟེན་ནས་གདམས་ཁྲིད་ཞུས༔ བར་དུ་དམན་པའི་ས་བཟུང་བསྙེན་བསྒྲུབ་བྱས༔ ད་ལྟ་བསྟན་འགྲོར་ཕན་འདོད་རྣལ་འབྱོར་ལ༔ གྲོང་ཕལ་སྐྱེ་བོས་བརྙས་ཤིང་རྐུ་ཕྲོག་བཅོམ༔ མ་ཉེས་ཁ་ཡོག་སྲོག་ལ་རྒོལ་བའི་ཚེ༔ དམ་ཅན་སྲུང་མས་ནུས་རྩལ་མ་ཕྱུང་ན༔ བསྙེན་སྒྲུབ་བརྩོན་པས་བྱས་པ་དོན་མེད་དམ༔ གཟུ་དཔང་དྲང་ཤན་མཛོད་ཅིག་མཁའ་འགྲོའི་ཚོགས༔ མ་སྲིང་རྒྱ་མཚོར་བློ་སེམས་རྩེ་གཅིག་གཏད༔ དབང་བའི་གནས་སམ་རྣལ་འབྱོར་གར་སྡོད་དུ༔ ཚོགས་གཏོར་མཆོད་པ་དུས་སུ་ཕུལ་ལགས་ཀྱང་༔ ལས་ངན་ཁྱིམ་པས་བརྙས་ཤིང་གཤེ་སྐུར་བཏབ༔ མགོ་ལ་ཏིལ་བརྡུང་ལྐོག་ཏུ་འབུ་བཞིན་འབུག༔ བསམ་སྦྱོར་ལོག་པས་སྡོད་དུ་མི་སྟེར་བ༔ འདི་ལ་མཐོང་ཆོས་བཀའ་ཆད་མི་འབེབ་ན༔ རྣལ་འབྱོར་སྒྲུབ་ལ་བརྩོན་པ་ཆུད་རེ་གཟན༔ དམ་ཚིག་གཉན་ལ་འདུས་ཤིག་བསྟན་སྲུང་ཚོགས༔ ཚེ་སྔོན་དགེ་འབྲས་ལས་བྱུང་ལོངས་སྤྱོད་ལྡན༔ མི་ཆོས་གཙང་མས་ཕ་མ་རྒན་རབ་བཀུར༔ གཉེན་ལ་བརྩེ་གདུང་གྲོགས་ལ་ཁྲེལ་མ་བཅུག༔ ཀུན་ལ་ཕན་སེམས་ཡོངས་ཀྱི་ངོ་བསྲུང་ཀྱང་༔ དམ་ཉམས་སྐྱེ་བོས་ནོར་རྫས་རྐུ་ཕྲོག་བྱས༔ བྱམས་ཤིང་དྲིན་གྱིས་བསྐྱངས་པའི་གཉེན་གྱིས་སྡང་༔ བརྩེ་གདུང་ཡིད་ལ་མཛའ་བའི་གྲོགས་ཀྱིས་བསླུས༔ མཐོ་བར་སླེབ་དོགས་རང་མཉམ་དགྲ་རུ་ལངས༔ དམ་ཅན་རྒྱ་མཚོས་དེ་རིང་དཔང་མཛོད་ལ༔ སྡང་དགྲ་ལས་ངན་དམ་ཉམས་ཞིང་བཅུའི་རིགས༔ དེ་རིང་སྒྲོལ་བའི་ལས་ལ་ཐུགས་མ་གཡེལ༔ ཧཱུྃ་བྷྱོ༔ དགོངས་ཤིག་དཔའ་མོ་འོད་ཟེར་ཅན་མ་དགོངས༔ གསོན་ཅིག་གསང་སྔགས་རིག་སྔགས་གཟུངས་སྔགས་ལྷ༔ གཟུ་དཔང་མཛོད་ཅིག་རྩ་གསུམ་སྲུང་མའི་ཚོགས༔ དེ་རིང་དགྲ་བོ་དམ་ཉམས་ལས་ངན་གྱིས༔ བདག་དང་རེ་ལྟོས་སྦྱིན་བདག་དད་ལྡན་ལ༔ སྔ་དགྲ་བྱས་ཤིང་ཕྱི་དགྲ་བསམ་ངན་འཆང་༔ ད་ལྟ་དངོས་སུ་སྡང་བའི་དགྲ་བོ་དང་༔ ཚེ་ལ་རྐུ་ཞིང་སྲོག་ལ་འཇབ་པ་དང་༔ ནོར་ལ་གོད་ཁ་མི་ལ་བྱེ་བྲལ་བཏང་༔ མི་འདོད་སྣ་འདྲེན་བགེགས་དང་དམ་སྲིའི་རིགས༔ ད་ལྟ་སྐད་ཅིག་སྒྲོལ་བའི་ཤུགས་ཕྱུངས་ཤིག༔ དེ་ནས་བྲུབ་ཁུང་བསྐྱེད་པ་ནི༔ ཐོག་མར་མདུན་བསྐྱེད་གསལ་གདབ་ནི༔ མདུན་བསྐྱེད་དཀྱིལ་འཁོར་རྟེན་དང་བརྟེན་པར་བཅས༔ སྟོང་པའི་ངང་ལས་མཱུཾཿཡིག་གསེར་ཞུན་མདོག༔ དེ་ལས་འོད་འཕྲོས་སྐུ་གསུམ་ཞིང་ཁམས་ཀྱི༔ རྒྱལ་ཀུན་བྱིན་རླབས་ནུས་མཐུ་ཚུར་བསྡུས་ཤིང་༔ འོད་ཟེར་མར་འཕྲོས་བསྟན་འགྲོར་གནོད་པ་ཡི༔ ཞིང་བཅུའི་དགྲ་བགེགས་ཚེ་བསོད་དཔལ་འབྱོར་བསྡུས༔ ཡོངས་གྱུར་འཇིགས་རུང་དུར་ཁྲོད་བརྒྱད་ཀྱི་དབུས༔ ཐོད་མཁར་གྲུ་གསུམ་གནམ་ལྕགས་འབར་བའི་ཏོག༔ མི་རོའི་རྒྱལ་མཚན་ཞིང་ལྤགས་སྟག་གཟིག་འཕན༔ ཉི་ཟླའི་མཐོངས་ཁང་རབ་རྔམ་མེ་འབར་དཀྱིལ༔ འོད་ཟེར་རྩིབས་བཞི་རྩིབས་བརྒྱད་དེ་དབུས་སུ༔ སྣ་ཚོགས་པད་ཉི་དགྲ་བགེགས་ཕོ་མོའི་ཁྲི༔ ཁ་སྦུབ་གན་རྐྱལ་བསྣོལ་མར་བརྫིས་པའི་སྟེང་༔ རང་རིག་ཡི་གེ་མཱུཾཿཡིག་འོད་ཞུ་བ༔ ཕྱོགས་བཅུའི་ཁྲོ་རྒྱལ་ཡུམ་གཅིག་འོད་ཟེར་ཅན༔ ཞལ་གསུམ་ཕྱག་དྲུག་ཞབས་བཞི་འདོར་སྟབས་བགྲད༔ གཡས་ཞལ་དཀར་བཞད་གཡོན་ཞལ་དམར་ལ་ཁྲོ༔ དབུས་ཞལ་གསེར་མདོག་ཉི་མའི་འོད་སྟོང་འབར༔ ཕྱག་གཡས་དང་པོས་ཉི་ཟླའི་ཞགས་པ་དང་༔ གཡོན་གྱི་དང་པོས་རྩེ་གསུམ་བར་བ་གཉིས༔ གྲི་ཐོད་ཐ་གཉིས་རལ་གྲི་ཁབ་སྐུད་བསྣམས༔ དུར་ཁྲོད་ཆས་བརྒྱད་འཇིགས་པའི་ཆ་ལུགས་རྫོགས༔ སྤྱི་བོར་བྱ་ཁྱུང་གནམ་ལྕགས་སྤུ་གྲིའི་སྒྲོ༔ རྭ་བར་རིགས་བདག་རིན་འབྱུང་ལོངས་སྐུའི་ཆས༔ ཕྱོགས་བཞིར་རིགས་བཞིའི་ལྷ་མོ་འོད་ཟེར་ཅན༔ རབ་ཁྲོས་ཕྱོགས་མདོག་ཕྱག་མཚན་གཡས་རིམ་བཞིན༔ རི་རབ་མེ་དཔུང་ཁྲག་མཚོ་བསྐལ་པའི་རླུང་༔ གཡོན་རྣམས་ལས་བཞིའི་ཕུར་འདྲིལ་ཁྲོ་མོའི་ཆས༔ རྩིབས་བརྒྱད་མཆོད་པའི་ཕྱག་རྒྱ་ཆེན་མོ་བརྒྱད༔ དགྲ་བྱེད་བགེགས་ཀྱི་གཉེན་པོར་ཆེར་ཁྲོས་པ༔ གཡས་རྣམས་རལ་གྲི་དགྲ་སྟྭ་རྩེ་གསུམ་དང་༔ མེ་དཔུང་རི་རབ་ཐོད་དབྱུག་མདུང་ཐུང་དང་༔ རྡོ་རྗེ་རྩེ་ལྔ་གཡོན་རྣམས་ཐོད་ཁྲག་བསྣམས༔ ཞབས་རྣམས་དོར་སྟབས་འཇིགས་རུང་དུར་ཁྲོད་ཆས༔ སྒོ་བཞིར་འགུགས་འཆིང་སྡོམ་མྱོས་སྒོ་མ་བཞི༔ དཀར་སེར་དམར་ལྗང་རབ་འཇིགས་ཁྲོ་མོའི་ཆས༔ གཡས་རྣམས་ལྕགས་ཀྱུ་ཞགས་པ་ལྕགས་སྒྲོག་དྲིལ༔ གཡོན་རྣམས་ལས་བཞིའི་བྱ་ཁྱུང་སྤྲོ་བསྡུ་བྱེད༔ གནས་གསུམ་སྐུ་གསུང་ཐུགས་ཀྱི་ཡིག་འབྲུས་མཚན༔ དེ་ལས་འོད་འཕྲོས་འོག་མིན་གནས་མཆོག་དང་༔ ཁྱད་པར་མྱ་ངན་མེད་པའི་སྐྱེད་ཚལ་ནས༔ རྒྱལ་ཡུམ་དཔའ་མོ་འོད་ཟེར་ཅན་མ་ཡི༔ ལྷ་ཚོགས་སྤྲུལ་པ་ཡང་སྤྲུལ་འཁོར་དང་བཅས༔ མཁའ་ལ་ཆར་སྤྲིན་དྲག་པོ་འཁྲུགས་པ་ལྟར༔ སྡང་མིག་གློག་ཞགས་རྔམ་པའི་འབྲུག་སྒྲ་བཅས༔ སྐད་ཅིག་ཙམ་གྱིས་མདུན་མཁར་བྱོན་པར་གྱུར༔ དེ་ནས་བརྟན་པར་བཞུགས་གསོལ་ནི༔ ཧཱུྃ༔ རང་བཞིན་དབྱིངས་ནས་བྱོན་པའི་ཡེ་ཤེས་ལྷ༔ བློས་བྱས་དམིགས་པས་བསྐྱེད་པའི་དམ་ཚིག་པ༔ སྒྲུབ་རྫས་རྟེན་དང་གཉིས་སུ་མེད་པ་རུ༔ དབྱིངས་ཉིད་མཉམ་པ་ཆེན་པོར་ཏིཥྛ་ལྷན༔ བཛྲ་ས་མ་ཡཱ་ཏིཥྛ་ཧོ༔ དེ་ནས་གུས་ཕྱག་འཚལ་བ་ནི༔ ཧཱུྃ༔ སྐྱེ་མེད་ཆོས་སྐུ་བརྡལ་ཁྱབ་ཀློང་ཡངས་ལས༔ འགགས་མེད་ལོངས་སྐུ་ཞི་ཁྲོ་རབ་འབྱམས་ཤར༔ གང་འདུལ་དགྲ་བགེགས་གཤེད་དུ་ཆེར་ཁྲོས་པ༔ དཔའ་བརྟུལ་ཁྲོ་མོའི་ཉམས་བརྒྱ་འབར་ལ་འདུད༔ ན་མོ་པུ་རུ་ཤ་ཡ་ཧོ༔ དེ་ནས་མཆོད་པ་འབུལ་བ་ནི༔ ཧཱུྃ༔ ཞིང་བཅུ་བསྒྲལ་བའི་ཕུང་ཁམས་ལས་བྱུང་བའི༔ ཁྲག་གི་ཡོན་ཆབ་རྦ་ཀློང་ཆལ་ཆིལ་འཁྲུགས༔ དབང་པོ་རྣམ་ལྔའི་མེ་ཏོག་རྔམས་ཤིང་འཇིགས༔ བམ་རོ་བསྲེགས་པའི་དྲི་ངད་སྤྲིན་ལྟར་འཁྲིགས༔ ཚིལ་ཆེན་བཞུས་པའི་སྒྲོན་མེ་ཉི་ལྟར་འབར༔ ཁྲག་མཁྲིས་དུག་དང་སྦྱར་བའི་དྲི་ཆབ་སྦྲེངས༔ དུག་གསུམ་ཤ་ཁྲག་རུས་པ་ལྷུན་པོར་སྤུངས༔ ཐོད་རྔ་གསང་བའི་རྔེའུ་ཆུང་རྐང་གླིང་སྒྲ༔ དུར་ཁྲོད་གནས་སུ་སྲིན་པོའི་ཉེར་སྤྱོད་རྫས༔ རང་བཞིན་ཟག་མེད་ཡེ་ཤེས་བདུད་རྩིའི་སྤྲིན༔ གཤིན་རྗེ་གཤེད་པོའི་སྒྲོལ་ཡུམ་འོད་ཟེར་ཅན༔ ལས་བཞིའི་ཁྲོ་མོ་སྤྲུལ་འཁོར་བཅས་ལ་འབུལ༔ ཨོཾ་ཨཱརྱ་མ་རི་ཙྱཻ་མ་ཧཱ་ཤ་མ་ཤ་ན་ས་པཱ་རི་ཝ་ར་ཨརྒྷཾ་སོགས་ནས་ཤཔྟ་ཨ་མྲྀ་ཏ་པུ་ཙ་མེ་གྷ་ས་མཱུ་ཏྲ་སྥ་ར་ཎ་ས་མ་ཡཱ་ཨཱ་ཧཱུྃ༔ དེ་ནས་བསྟོད་པ་བྱ་བ་ནི༔ ཧཱུྃ༔ རྣམ་ཐར་སྒོ་གསུམ་སྤྲོས་པ་མེད་པའི་མཁར༔ ལོག་རྟོག་ཞིང་བཅུའི་དགྲ་བགེགས་སྒྲོལ་བའི་ལྷ༔ ཐུགས་ཉིད་ཞི་བ་སྙིང་རྗེའི་ངང་ཉིད་ལས༔ རབ་ཁྲོས་ཞེ་སྡང་མེ་དཔུང་འབར་ལ་བསྟོད༔ ལོག་རྟོག་འཁྲུལ་བའི་ངག་སྒྲིབ་མ་ལུས་པ༔ བརྗོད་མེད་ནཱ་དའི་དབྱིངས་སུ་རྒྱས་འདེབས་ཕྱིར༔ ཧཱུྃ་ཕཊ་བྷྱོ་ཟློག་གད་རྒྱངས་ཆེར་སྒྲོགས་པས༔ བསྟན་འགྲོ་སྤྱི་དགྲའི་ཀླད་པ་འགེམས་ལ་བསྟོད༔ དགྲ་ལས་རྣམ་པར་རྒྱལ་བའི་ཏིང་འཛིན་མཐུས༔ གང་གི་མཚན་ཙམ་ཐོས་སམ་དྲན་པས་ཀྱང་༔ ཕ་རོལ་རྒོལ་བའི་ནུས་སྟོབས་འཇོམས་མཛད་པ༔ མི་ཟད་ཡོན་ཏན་མ་ལུས་རྫོགས་ལ་བསྟོད༔ བསྐལ་མང་ཐུགས་བསྐྱེད་སྨོན་ལམ་མཐུས་བསྐྱེད་པའི༔ མཚན་དཔེའི་ཡོན་ཏན་བལྟ་བས་མི་ངོམ་ཡང་༔ ཞེ་སྡང་ཅན་ལ་བཟོད་དཀའི་འཇིགས་གཟུགས་སྟོན༔ དཔའ་གཏུམ་ཁྲོ་མོ་འོད་ཟེར་ཅན་མར་བསྟོད༔ ལས་བཞིའི་ཕྲིན་ལས་འཁོར་གྱི་ཚུལ་དུ་སྟོན༔ དགྲ་བགེགས་ས་ཡིས་གནོན་དང་ཆུ་ལ་བསྐྱོན༔ མེ་ཡིས་བསྲེག་དང་རླུང་གིས་གཡེངས་ཤིང་གཏོར༔ དབྱེ་བསད་བསྐྲད་རྨོངས་ལས་རྣམས་གྲུབ་ལ་བསྟོད༔ དེ་ནས་དྲག་པོའི་འཛབ་དམིགས་ནི༔ བདག་མདུན་གཙོ་མོའི་ཐུགས་ཀ་རུ༔ གནམ་ལྕགས་འཁོར་ལོ་རྩིབས་དྲུག་པའི༔ ལྟེ་བར་ཉི་མའི་དཀྱིལ་འཁོར་སྟེང་༔ མཱུཾཿཡིག་གསེར་མདོག་འོད་སྟོང་འབར༔ རྩིབས་དྲུག་སྔགས་འབྲུ་གཡོན་དུ་འཁོར༔ འོད་ཟེར་མེ་ཏོག་མཚོན་ཆའི་ཆར༔ གང་དམིགས་དགྲ་འདྲེའི་སྟེང་དུ་བབས༔ ལོག་འདྲེན་བྱད་མ་རྨིང་མེད་བརླགས༔ བདག་ཕུར་འབེབས་གསུམ་གྲུབ་མཐའ་གཅིག༔ སྟོང་ཆེན་ཡུམ་གྱི་ངང་དུ་བསམ༔ ཨོཾ་མ་རི་ཙྱཻ་སྭཱ་ཧཱ༔ ཞེས་དང་སྔགས་ཤམ་འདི་ཡང་བཏགས༔ དགྲ་བགེགས་བྱད་མ་ཇག་ཆོམ་རྐུན་པོའི་ལུས་ངག་ཡིད་གསུམ་མཱ་ར་རྦད༔ བྷྱོ་ཟློག་སོད་སྟྭཾ་བྷ་ཡ་ནན༔ ཞེས་བཏགས་བརྒྱ་ཉེར་གཅིག་བཟླ༔ ༈ མདུན་དཀྱིལ་རྒྱལ་ཡུམ་དྲག་མོ་འོད་ཟེར་ཅན༔ ལས་བཞིའི་དཔའ་མོ་སྤྲུལ་འཁོར་དང་བཅས་གསལ༔ དེ་འོག་གྲུ་གསུམ་དམར་ནག་བྱད་མའི་རྫོངས༔ ཕྱི་ནས་ཞེ་སྡང་མེ་ལྕེ་ལྷབ་ལྷབ་འབར༔ ནང་ནས་འདོད་ཆགས་ཁྲག་མཚོ་སིར་སིར་ཁོལ༔ བར་དུ་གཏི་མུག་མུན་ནག་ཐིབ་ཐིབ་འཐིབས༔ ཁ་ཁྱེར་ཤ་ཟན་བྱ་ཆེན་ལྷབ་ལྷབ་ལྡིང་༔ སྐེད་པར་གཅན་གཟན་ཕོ་མོ་ངར་ངར་འཐབ༔ རྩ་བར་སྦལ་སྦྲུལ་སྡོམ་སྡིག་ཉིལ་ཉིལ་འཐབ༔ དེ་སྟེང་གཡས་སུ་དཔའ་བོ་ཕོ་ཚོགས་འགྱིང་༔ གཡོན་དུ་དཔའ་མོ་མོ་ཚོགས་ཆེམ་ཆེམ་འཁྲབ༔ ཁ་དོག་མཐིལ་ཡངས་གཏིང་ཟབ་འཇིགས་རུང་ནང་༔ ནྲྀ་དང་ཏྲི་ཡིག་དུད་ཁ་ཡོངས་གྱུར་ལས༔ གང་དམིགས་དགྲ་བགེགས་དེ་ཉིད་ཉམ་ཐག་གཟུགས༔ མིག་ནས་མཆི་མ་འཛགས་ཤིང་འོ་དོད་འབོད༔ རྐང་ལག་ལྕགས་བསྡམས་སྐྲ་གཟེངས་མྱ་ངན་ལྡན༔ སྙིང་གའི་ཏྲིའམ་ནྲྀ་ལས་འོད་ནག་འཕྲོས༔ གནོད་བྱེད་མ་ལུས་འདུས་པའི་ངོ་བོར་བསམ༔ དེ་ནས་དགུག་གཞུག་དྲག་ཏུ་བྱ་བ་ནི༔ བདག་མདུན་ཐུགས་ལས་འོད་ཟེར་དམར་ནག་འཕྲོས༔ དེ་ལས་འགུགས་བྱེད་ཕོ་ཉ་རྡུལ་ལྟར་འཚུབས༔ བསྟན་འགྲོའི་གནོད་བྱེད་སྤྱི་དགྲ་དགོས་དགྲ་དང་༔ ཁྱད་པར་བདག་ལ་དངོས་སུ་གཤེ་ཞིང་སྡང་༔ ནོར་རྫས་ཕྲོག་ཅིང་བརྡུང་བརྡེག་སྨ་དབབ་བྱེད༔ ལྐོག་ནས་བསམ་ངན་རྐུ་ཤོམ་ཟས་དུག་སྦྱོར༔ མི་ཁ་སྒྲོ་སྐུར་གཏམ་ངན་ཕྱོགས་སུ་བཀྲམ༔ གསོད་ཤོམ་མཐུ་བྱད་ཁ་རྗེ་དབང་ཐང་ལ༔ གནོད་ཅིང་ལེགས་པའི་ལམ་ལ་བར་གཅོད་པའི༔ དགྲ་བགེགས་དམ་སྲི་འབྱུང་པོའི་བླ་ཚེ་སྲོག༔ ལྕགས་ཀྱུས་བཀུག་ཅིང་ཞགས་པས་རབ་ཏུ་བཅིངས༔ ལྕགས་སྒྲོག་གིས་བསྡམས་དྲིལ་བུས་མྱོས་བྱས་ཏེ༔ རང་དབང་མེད་པར་ཉེས་ཅན་བཙོན་ཁྲིད་ལྟར༔ མདུན་དུ་གྲུ་གསུམ་དགྲ་བགེགས་གཟུགས་ལ་བསྟིམས༔ དེ་ནས་དཀོན་མཆོག་བདེན་སྟོབས་ཀྱིས༔ འགུགས་པའི་རིམ་པ་འདི་བཞིན་བྱ༔ ན་མོ༔ རྩ་བརྒྱུད་རིག་འཛིན་བླ་མ་ཡབ་སྲས་དང་༔ བསླུ་མེད་དཀོན་མཆོག་རིན་ཆེན་རྣམ་པ་གསུམ༔ ཡི་དམ་རྒྱུད་སྡེ་བཞི་དྲུག་དཀྱིལ་འཁོར་ལྷ༔ གནས་གསུམ་དཔའ་བོ་མཁའ་འགྲོ་ཆོས་སྐྱོང་དང་༔ ཁྱད་པར་དུས་གསུམ་ཁྲོ་རྒྱལ་ཀུན་གྱི་ཡུམ༔ གཞན་གྱིས་མི་ཐུབ་ལྷ་མོ་འོད་ཟེར་ཅན༔ མ་ལུས་འཁོར་དང་བཅས་པའི་བདེན་སྟོབས་ཀྱིས༔ སངས་རྒྱས་བསྟན་དགྲ་སེམས་ཅན་སྤྱི་ཡི་དགྲ༔ རྣལ་འབྱོར་བདག་ཅག་ལྟོས་བཅས་ཐམས་ཅད་ལ༔ སྔ་དགྲ་ལག་བརྡར་གནོད་འཚེའི་སྣ་འདྲེན་བྱས༔ ཕྱི་དགྲ་ཡིད་ལ་དམིགས་ཤིང་གྲོས་ངན་ཤོམ༔ ད་དགྲ་དངོས་སུ་རྐུ་ཕྲོག་སྲོག་ལ་རྒོལ༔ ཚེ་བསོད་སྟོབས་འབྱོར་ཟ་ཐང་དཔལ་ཁ་ཕྲོག༔ གནས་སྐབས་བདེ་སྐྱིད་མཐར་ཐུག་ཐར་ལམ་འགོག༔ མདོར་ན་ཡིད་ལ་དམིགས་པའི་དགྲ་བགེགས་ཀྱི༔ བླ་ཚེ་རྣམ་ཤེས་སྲོག་དབུགས་དང་བཅས་པ༔ གླིང་བཞི་གླིང་ཕྲན་སྟོང་གསུམ་འཇིག་རྟེན་ཁམས༔ རི་རྩེ་མཚོ་གཏིང་ཉི་ཟླ་སྤྲིན་གྱི་གསེབ༔ ཆོས་བོན་སྲུང་མའི་སྐྱབས་འོག་གར་ཡོད་ཀྱང་༔ གཟུགས་ལ་བྲིས་ཤིང་ཡིད་ལ་དམིགས་པའི་རྟེན༔ གྲུ་གསུམ་སྣོད་དུ་བཅུག་པའི་ལིང་ག་ལ༔ སྐད་ཅིག་རང་དབང་མེད་པར་འདིར་ཁུག་ཅིག༔ ཅེས་པ་ལན་གྲངས་མང་དུ་བརྗོད༔ དེ་མཐར་འགུགས་སྔགས་ཅི་མང་ནི༔ གསང་སྔགས་ལས་སྦྱོར་སྤྱི་དང་བསྟུན༔ དེ་ནས་ཕྱག་རྒྱ་རྣམ་པ་བཞིས༔ རྒྱས་གདབ་དམིགས་བཟླས་འདི་ཡང་བྱ༔ ཧཱུྃ་ཧཱུྃ༔ དཀོན་མཆོག་བདེན་མཐུས་བཀུག་པའི་དགྲ་བགེགས་རྣམས༔ ཛཿཡིག་ལས་སྐྱེས་ཕོ་ཉ་ལྕགས་ཀྱུ་ཅན༔ གྲངས་མེད་འཕྲོས་པས་ལྕགས་ཀྱུས་སྙིང་ནས་བཟུང་༔ དམ་ཉམས་དགྲ་བགེགས་རང་དབང་མེད་པར་བཀུག༔ དམིགས་རྟེན་གཟུགས་དང་དབྱེར་མེད་གཅིག་ཏུ་གྱུར༔ ཧཱུྃ་ཡིག་ལས་བྱུང་ཕོ་ཉ་ཞགས་པ་ཅན༔ བདག་མདུན་ཐུགས་ལས་གྲངས་མེད་འཕྲོས་པ་ཡིས༔ ཞགས་པ་ནག་པོས་ཡན་ལག་རབ་ཏུ་བསྡོམ༔ དམིགས་རྟེན་གཟུགས་དང་ཐ་དད་མེད་པར་གྱུར༔ བཾཿཡིག་ལས་སྐྱེས་ཕོ་ཉ་ལྕགས་སྒྲོག་ཅན༔ རྡུལ་ལྟར་འཚུབས་པས་རྐང་ལག་ལྕགས་སུ་བཅུག༔ དམིགས་པའི་གཟུགས་དང་དབྱེ་བ་མེད་པ་རུ༔ རབ་ཏུ་བསྡམས་པས་རང་དབང་མེད་པར་གྱུར༔ ཧོ་ལས་བྱུང་བའི་ཕོ་ཉ་དྲིལ་བུ་ཅན༔ གྲངས་མེད་འཕྲོས་པས་དགྲ་བགེགས་གང་ཡིན་གྱི༔ ཡིད་མྱོས་དྲན་པ་སྟོར་ཏེ་དབང་མེད་པར༔ གཟུགས་དང་དབྱེར་མེད་མཉམ་པ་ཉིད་དུ་གྱུར༔ རྩ་བའི་སྔགས་ཀྱི་ཤམ་བུ་རུ༔ བཛྲ་ཨང་ཀུ་ཤ་ཡ་ཛ༔ རཏྣ་པ་ཤ་ཧཱུྃ༔ པདྨ་སྥོ་ཌ་བཾ༔ ཀརྨ་གྷནྡྷེ་ཧོ༔ དེ་ནས་ལྷ་དང་དབྱེ་བ་ནི༔ གུ་གུལ་བདུག་ཅིང་བྱ་འུག་སྒྲོས༔ དབྱེ་རྒྱ་དང་བཅས་འདི་སྐད་དོ༔ ཧཱུྃ༔ དམ་ཉམས་ཞིང་བཅུ་ཚང་བའི་དགྲ་བགེགས་འདིས༔ མི་ཆོས་གཙང་མ་ཁྲེལ་དང་ངོ་ཚ་ཉམས༔ ལྷ་དང་བླ་མ་མཁན་སློབ་ཁྱད་དུ་གསོད༔ དེ་ཕྱིར་དཀར་ཕྱོགས་སྐྱོང་བའི་ལྷ་དང་དབྱེ༔ ཕ་ལ་བརྙས་ཤིང་མནའ་ཆད་རིང་དུ་བོར༔ ཕོ་ལྷ་གཉན་པོའི་ཚོགས་དང་རིང་དུ་དབྱེ༔ མ་ལ་བརྡེགས་ཤིང་བུད་མེད་སྡུག་ལ་གཏད༔ མ་ལྷ་མཛངས་མའི་ཚོགས་དང་རྒྱང་རིང་དབྱེ༔ བསང་དང་མཆོད་རྫས་མནའ་སྡིག་མི་གཙང་མནོལ༔ ཡུལ་ལྷ་རྒྱབ་རྟེན་ཚོགས་དང་སོ་སོར་ཕྱེ༔ དམ་ཉམས་མགོན་སྐྱབས་ཀུན་དང་བྲལ་བར་གྱུར༔ གལ་ཏེ་སྡིག་ཅན་འདི་ཡི་སྐྱབས་མཛད་ན༔ ཡེ་ཤེས་ལྷ་རྣམས་ཐུགས་དམ་དབྱིངས་སུ་ཉམས༔ འཇིག་རྟེན་ལྷ་རྣམས་རྒྱལ་བའི་བཀའ་ཆད་དང་༔ ལུས་སེམས་རྡུལ་དུ་བརླག་པར་གདོན་མི་ཟ༔ རྩ་བའི་སྔགས་ཀྱི་ཤམ་བུ་རུ༔ དགྲ་བགེགས་ལ་འགོ་བའི་ལྷ་ཐམས་ཅད་པྲ་ཝེ་ཤ་ཡ་ཕཊ༔ ཨུ་ཙུ་ཏ་ཡ་ཕཊ༔ དེ་ནས་སླར་ཡང་གཟུགས་བརྙན་ལ༔ དབབ་ཅིང་དམིགས་པས་རྒྱས་འདེབས་ནི༔ ཧཱུྃ་ཧཱུྃ༔ རབ་འཇིགས་དུར་ཁྲོད་ཆེན་པོའི་གནས་བརྒྱད་ནས༔ དཔའ་བོ་མཁའ་འགྲོ་དམ་ཅན་རྒྱ་མཚོའི་ཚོགས༔ ཐུགས་དམ་མ་གཡེལ་དྲག་པོའི་ལས་ལ་བྱོན༔ བསྟན་འགྲོའི་གཤེད་མ་དམ་ཉམས་སྡིག་ཅན་འདི༔ ཤར་ལྷོ་ནུབ་བྱང་ཕྱོགས་མཚམས་སྟེང་འོག་ཏུ༔ འགོ་བའི་ལྷ་དང་བཅས་ཏེ་བྲོས་པ་ན༔ རིགས་ལྔའི་མཁའ་འགྲོ་མཚམས་ཀྱི་ཤུགས་འགྲོ་དང་༔ སྟེང་འོག་མཁའ་སྤྱོད་ས་སྤྱོད་མཁའ་འགྲོའི་ཚོགས༔ ཕྱོགས་མཚམས་སྟེང་འོག་ཕྱོགས་སྐྱོང་འཁོར་དང་བཅས༔ དགྲ་བགེགས་བྲོས་ལམ་ཆོད་ལ་གཟུགས་ལ་ཕོབ༔ དབྱེར་མེད་རོ་གཅིག་ཨ་བེ་ཤ་ཡ་ཨ༔ ཞེས་པས་གཟུགས་ལིང་ག་ལ་བརྟན་པར་བསམ༔ དེ་ནས་བྱད་དུ་གཞུག་པ་ནི༔ ལིང་ག་བྱད་ཐག་སྔོ་དམར་དཀྲིས༔ ཧཱུྃ༔ ཞིང་བཅུ་ཚང་བའི་དགྲ་བགེགས་དམ་སྲི་འདི༔ དཀར་པོ་ལྷ་ཡི་བྱད་དུ་བཅུག་སྟེ་རྨུག༔ དམར་པོ་བཙན་གྱི་བྱད་དུ་བཅུག་སྟེ་བསྡམས༔ ཁྲ་བོ་གཟའ་ཡི་བྱད་དུ་བཅུག་སྟེ་རྨུགས༔ ནག་པོ་བདུད་ཀྱི་བྱད་དུ་བཅུག་སྟེ་མྱོས༔ འཆི་བདག་གཤིན་རྗེའི་བྱད་དུ་བཅུག་སྟེ་གསོད༔ རྩ་བའི་སྔགས་ཀྱི་ཤམ་བུ་རུ༔ དགྲ་བགེགས་དམ་ཉམས་སྡེ་བརྒྱད་དྲེགས་པ་རྣམས་ཀྱི་བྱད་དུ་ཆུག་ཅིག༔ ལུས་ངག་ཡིད་གསུམ་ཆིངས་ཤིག་སྡོམས་ཤིག་མཱ་ར་ཡ་ཕཊ་ཕཊ༔ དེ་ནས་ལྷ་དང་སྲུང་མའི་མདུན༔ དགྲ་བོའི་ཉེས་པ་ཆེར་བསྒྲགས་པ༔ ཧཱུྃ༔ དཔལ་ཆེན་སྒྲུབ་པ་སྡེ་བརྒྱད་ལྷ་ཚོགས་དང་༔ ཁྱད་པར་འོད་ཟེར་ཅན་མ་སྙན་གསོན་ཅིག༔ བསྒྲལ་བའི་ཞིང་གྱུར་དམ་ཉམས་ལས་ངན་འདིས༔ གཉིས་འཛིན་བག་ཆགས་དྲག་པོས་རྒྱུད་བསྐུལ་ཏེ༔ དང་པོ་རྒྱལ་བའི་བསྟན་པ་གཉན་པོ་བཤིག༔ བར་དུ་སྡིག་བཅུ་མཚམས་མེད་ལས་ལ་བརྩོན༔ ཐ་མ་ངན་སོང་འཁོར་བའི་གཏིང་རྡོ་བྱས༔ དེ་ཕྱིར་འདི་ཉིད་སྙིང་རྗེའི་ཡུལ་གྱུར་ཀྱང་༔ གདུག་པ་ཅན་རྣམས་ཞི་བས་མི་འདུལ་ཕྱིར༔ སྟོང་ཉིད་མེ་ལོང་ཡེ་ཤེས་རང་རྩལ་ལས༔ ཞེ་སྡང་དྲག་པོས་སྒྲོལ་བའི་དུས་ལ་བབས༔ ཞེས་བརྗོད་རབ་གཏུམ་དྲག་པོ་བསམ༔ བསྟན་འགྲོའི་དོན་དུ་འབད་པར་བྱ༔ དེ་ནས་རྫས་ཀྱི་ཕུར་པ་ལ༔ རཀྟ་བྱུགས་ཤིང་ཡུངས་ཐུན་བརྡེག༔ གུ་གུལ་དུད་པས་བདུག་བྱས་ནས༔ སྔགས་དང་དམིགས་པ་འདི་བཞིན་བྱ༔ ཧཱུྃ༔ མཚན་མ་རྫས་ཀྱི་ཕུར་པ་མངོན་སྤྱོད་ལས༔ དྲག་པོ་སྒྲོལ་བའི་ཕོ་ཉར་མངག་པའི་ཕྱིར༔ གུ་གུལ་བདུག་པས་བགེགས་བསྐྲད་བྱིན་ཆེན་དབབ༔ ཡུངས་ཐུན་གྱིས་བརྡེག་དཔའ་བོའི་ངར་ཡང་བསྐྱེད༔ དམར་ཆེན་བྱུགས་པས་བཟོད་དཀའི་གཟི་མདངས་འབར༔ ལོག་འདྲེན་སྒྲོལ་བའི་སྟོབས་ནུས་ལྡན་པར་གྱུར༔ ཨོཾ་བཛྲ་ཀཱི་ལི་ཀཱི་ལ་ཡ་དགྲ་བགེགས་འབྱུང་པོའི་སྲོག་ལ་མཱ་ར་ཡ༔ ཞེས་པ་ལན་གསུམ་སྐབས་དང་བསྟུན༔ སྤྲོ་ན་སྔགས་རིམ་གཞན་ལྟར་བྱ༔ དེ་ནས་ཕུར་བུ་ལྷར་བསྐྱེད་ནི༔ གསལ་བ་གསུམ་གྱི་ཏིང་འཛིན་གནད༔ རང་ཉིད་ལྷ་མོ་འོད་ཟེར་ཅན༔ ཞལ་གསུམ་ཕྱག་དྲུག་ཞབས་བཞི་པ༔ ཕྱག་དྲུག་ཞི་རྒྱས་དབང་དྲག་དང་༔ སྲུང་ཟློག་ཕུར་པ་དུང་གསེར་ཟངས༔ གནམ་ལྕགས་སེང་ལྡེང་སྐྱེར་ཕུར་འདྲིལ༔ རབ་ཏུ་ཁྲོས་པའི་ང་རྒྱལ་བསྐྱེད༔ ལིང་ག་དམ་ཉམས་དམིགས་པའི་དགྲ༔ ཉམ་ཐག་སྐྱབས་དང་བྲལ་བར་བསམ༔ ཕུར་བུ་རྒྱལ་བ་ཐམས་ཅད་ཀྱི༔ མངོན་སྤྱོད་ལས་ལ་རབ་བསྔགས་པའི༔ རྡོ་རྗེ་གཞོན་ནུ་དངོས་སུ་བསྒོམས༔ དམིགས་པའི་སྤྱི་ཆིང་ཟབ་མོ་འོ༔ ས་མ་ཡཱ༔ བསྒྲལ་གནད་རྫོང་འཕྲང་སྲོག་གསུམ་སྟེ༔ འདི་ལྟར་འཁོར་འདས་གཉིས་བསྡུས་ཆོས༔ ཀུན་ཀྱང་མ་སྐྱེས་བློ་ལས་འདས༔ སྒྲོལ་བྱེད་བསྒྲལ་ཡུལ་སྒྲོལ་བའི་ལས༔ བདག་ཕུར་འབེན་གསུམ་གྲུབ་མཐའ་གཅིག༔ ཡོད་མེད་རྟག་ཆད་གཉིས་སུ་མེད༔ དེ་ལྟར་རྟོགས་པའི་ལྟ་བ་ནི༔ བློ་ལས་འདས་པ་ལྟ་བའི་རྫོང་༔ རྒྱུ་དུས་སྙིང་རྗེ་ཆེན་པོ་ཡིས༔ བསྟན་དང་འགྲོ་བའི་དོན་ཆེད་དུ༔ བསྟན་དགྲ་སྒྲོལ་བར་དམ་བཅས་པ༔ རང་རིག་བྱང་ཆུབ་སེམས་ཀྱི་རྩལ༔ ཡེངས་མེད་གོམས་པར་བྱས་པ་ཉིད༔ ཞེ་སྡང་བརྣག་པའི་ངར་བཏབ་ཀྱང་༔ བདེན་གཉིས་ཟུང་འཇུག་སྒོམ་པའི་འཕྲང་༔ མངོན་སྤྱོད་གསང་སྔགས་ལས་ཀྱི་མཐའ༔ གསོད་པ་ཤན་པའི་ཚུལ་བཟུང་ཡང་༔ གསོ་བ་རྒྱལ་བའི་སྲས་ཉིད་དུ༔ གསེར་འགྱུར་རྩི་ཡིས་ལྕགས་ཐེབས་བཞིན༔ བསྟན་སྲོག་བཟུང་བ་སྤྱོད་པའི་སྲོག༔ དེ་ལྟར་ལྡན་པའི་བསྒྲལ་ལས་ལ༔ སྡིག་སྐྱོན་དྲི་མས་མ་གོས་ཤིང་༔ འཚེངས་པ་གསུམ་དང་འབྲེལ་བའོ༔ དེ་ནས་རང་སེམས་སྟོང་པའི་ངང་༔ ཆོས་དབྱིངས་ཕུར་བུའི་རང་མདངས་ལས༔ ཚད་མེད་སྙིང་རྗེའི་ཕུར་པ་ཤར༔ དེ་ཉིད་མཚན་མ་རྫས་ཕུར་ལ༔ བརྟེན་ནས་དོན་གཉིས་འབྱུང་བའི་ཕྱིར༔ ཟབ་མོ་སྔགས་ཀྱིས་སྦྱང་བ་ནི༔ ཨོཾ་མ་ཧཱ་ཤུ་ནྱ་ཏ་ཛྙཱ་ན་བཛྲ་སྭ་བྷ་ཝ་ཨཏྨ་ཀོ྅་ཧཾ༔ སྟོང་ཉིད་ངང་ལས་རང་གི་སོར་མོ་བཅུར༔ ཟླ་ཉིའི་སྟེང་དུ་འབྲུ་བཅུ་ཡོངས་གྱུར་ལས༔ རིགས་ལྔ་ཡབ་ཡུམ་བཅུར་གྱུར་བདེ་སྟོང་ངང་༔ མཉམ་སྦྱོར་སྲས་མཆོག་བཛྲ་ཀཱི་ལ་ཡ༔ སྐུ་སྟོད་ཁྲོ་བོ་སྲིན་པོ་ཁྲོས་པའི་གཟུགས༔ སྐུ་སྨད་ལྕགས་ཕུར་ཟུར་གསུམ་རྣོ་བའི་དབལ༔ ཡེ་ཤེས་མེ་ཡི་ཚྭ་ཚྭ་འཕྲོ་བར་བསམ༔ དེ་ནས་མངོན་སྤྱོད་ལས་སྒྲུབ་ཅིང༔ ཁམས་གསུམ་འཁོར་བར་མི་ལྡོག་ཅིང་༔ སྐུ་གསུམ་དབྱིངས་རྒྱས་འདེབས་པའི་ཕྱིར༔ ཕུར་བུར་དབང་བསྐུར་བྱ་བ་ནི༔ ཕུར་བུའི་དཔྲལ་བར་ཟླ་དང་ཨོཾ་དཀར་པོ༔ མགྲིན་པར་འདབ་བརྒྱད་སྟེང་དུ་ཨཱཿ་དམར་པོ༔ ཐུགས་ཀར་ཉི་མའི་སྟེང་དུ་ཧཱུྃ་སྔོན་པོ༔ བདེ་གཤེགས་ཀུན་གྱི་སྐུ་གསུང་ཐུགས་བདག་ཉིད༔ དེ་ལས་དཀར་དམར་མཐིང་ཀའི་འོད་ཟེར་འཕྲོས༔ རྒྱལ་ཀུན་གསང་བ་གསུམ་གྱི་བྱིན་རླབས་བསྡུས༔ ཕུར་བུར་ཐིམ་པས་སྲས་མཆོག་ཀཱི་ལ་ཡ༔ སྐུ་ལུས་འགྱིང་བས་ཁམས་གསུམ་ཟིལ་གནོན་ཅིང་༔ གསུང་སྔགས་བསྒྲགས་པས་སྲིད་གསུམ་དབང་དུ་སྡུད༔ ཐུགས་ཀྱི་དགོངས་པས་དུག་གསུམ་དབྱིངས་སྒྲོལ་བའི༔ མངོན་སྤྱོད་ལས་ལ་ཐོགས་པ་མེད་པར་གྱུར༔ དེ་ནས་ཕུར་བུ་དགྲ་གཟུགས་ཀྱི༔ སྙིང་གི་དཀར་ནག་མཚམས་སུ་བཏབ༔ བདག་ཉིད་དཔའ་མོ་འོད་ཟེར་ཅན་མ་ཡིས༔ ཕུར་བུ་དགྲ་བོའི་སྙིང་གར་བཏབ་པའི་ཚེ༔ ཚེ་སྲོག་ངོ་བོ་རྣྲི་ཡིག་ལྗང་ཁུ་དེ༔ ཕུར་རྩེར་བླངས་ཏེ་བདག་ཉིད་ཁྲོས་མ་ཡི༔ ཐུགས་ཀའི་ས་བོན་ལ་ཐིམ་རང་ཉིད་ཀྱི༔ ཚེ་ཡི་གསོས་སུ་གྱུར་ཏེ་ཚེ་བསོད་རྒྱས༔ བསྟན་འགྲོའི་གསོས་སུ་ཡུན་རིང་འཚོ་བར་གྱུར༔ ཅེས་བསམ་དེ་ནི་ཚེ་ལུང་ཞེས་བྱ་རྣལ་འབྱོར་ཚེ་ཡི་སྒྲུབ་པ་ཟབ་མོ་འོ༔ དེ་ནས་ཁྲུས་ལུང་ཟབ་མོའི་དགོངས་པ་ནི༔ ཟབ་ལས་ཆེས་ཟབ་དམིགས་གནད་འདི་བཞིན་ནོ༔ བདག་ཉིད་འཕགས་མའི་གནས་གསུམ་འབྲུ་གསུམ་དང་༔ ཕུར་བུའི་གནས་གསུམ་ཡིག་འབྲུའི་འོད་ཟེར་གྱིས༔ དགྲ་བོའི་ལུས་ངག་ཡིད་གསུམ་མི་དགེ་བཅུས༔ བསགས་པའི་ལས་ངན་སྡིག་སྒྲིབ་མ་ལུས་བཀྲུས༔ དེ་ཡི་རྣམ་ཤེས་ཨཱཿཡིག་དཀར་པོར་གྱུར༔ ཕུར་རྩེར་ཡེ་ཤེས་ལྔ་ཡི་འོད་འཕྲོས་པས༔ ཁབ་ལེན་རྡོ་ཡིས་ལྕགས་ཕྱེ་བླངས་པ་ལྟར༔ འུབ་བསྡུས་དབྱིངས་ཡུམ་ཀུན་ཏུ་བཟང་མོ་ཡི༔ མཁའ་རུ་འཕངས་པས་རྡོ་རྗེ་སེམས་དཔའི་སྐུ༔ གཞན་དོན་མཐར་ཕྱིན་རྒྱལ་བའི་སྲས་སུ་གྱུར༔ ཐབས་ཤེས་ཟུང་འཇུག་ཡི་གེ་ཕཊ་དྲག་པོས༔ དབྱིངས་སུ་བསྟིམས་ལ་ཡུམ་དོན་མཉམ་པར་བཞག༔ དེས་ནི་ཞིང་བཅུའི་ལས་ངན་རྒྱུན་བཅད་ནས༔ སྨིན་གྲོལ་གདམས་པས་རྒྱུད་སྦྱངས་སྨིན་སློབ་དང་༔ ཁྱད་མེད་དོན་གཉིས་འགྲུབ་པའི་མན་ངག་གོ༔ དེ་ནས་འབྱུང་བཞིའི་ཐུན་བཞི་ལས༔ དགྲ་བགེགས་འབྱུང་ལྔ་བཤིག་པའི་ཕྱིར༔ ཐོག་མར་རི་རབ་གཟུགས་བརྡེག་ལ༔ ཧཱུྃ༔ ང་ནི་རྡོ་རྗེ་མཁའ་འགྲོ་འོད་ཟེར་ཅན༔ འབྱུང་བ་ས་ཡི་ཁམས་ལ་དབང་བསྒྱུར་བས༔ ཡུམ་ཆེན་སངས་རྒྱས་སྤྱན་དང་གཉིས་སུ་མེད༔ ཞིང་བཅུའི་ཤ་དང་འབྱུང་བ་སར་འཛིན་པ༔ དམིགས་མེད་ཆོས་ཀྱི་དབྱིངས་སུ་རྡུལ་དུ་རློགས༔ རྩ་སྔགས་ཤམ་བུར་ལས་སྦྱོར་གདགས༔ ཁྲག་མཚོ་ཆུ་ཡི་ཟོར་བརྡེག་ལ༔ ཧཱུྃ༔ ང་ནི་རིན་ཆེན་མཁའ་འགྲོ་འོད་ཟེར་ཅན༔ འབྱུང་བ་ཆུ་ཡི་ཁམས་ལ་དབང་བསྒྱུར་བས༔ ཡུམ་ཆེན་མཱ་མ་ཀཱི་དང་གཉིས་སུ་མེད༔ ཞིང་བཅུའི་ཁྲག་དང་འབྱུང་བ་ཆུར་འཛིན་པ༔ དམིགས་མེད་ཆོས་ཀྱི་དབྱིངས་སུ་རྡུལ་དུ་རློགས༔ རྩ་སྔགས་ཤམ་བུར་ལས་སྦྱོར་གདགས༔ མེ་འབར་སྲེག་བྱེད་ཐུན་བརྡེག་ལ༔ ཧཱུྃ༔ ང་ནི་པདྨ་མཁའ་འགྲོ་འོད་ཟེར་ཅན༔ འབྱུང་བ་མེ་ཡི་ཁམས་ལ་དབང་བསྒྱུར་བས༔ ཡུམ་ཆེན་གོས་དཀར་མོ་དང་གཉིས་སུ་མེད༔ ཞིང་བཅུའི་དྲོད་དང་འབྱུང་བ་མེར་འཛིན་པ༔ དམིགས་མེད་ཆོས་ཀྱི་དབྱིངས་སུ་རྡུལ་དུ་རློགས༔ རྩ་སྔགས་ཤམ་བུར་ལས་སྦྱོར་གདགས༔ རླུང་གཡབ་རེ་བས་གཟུགས་བརྡེག་ལ༔ ཧཱུྃ༔ ང་ནི་ལས་ཀྱི་ཁྲོ་མོ་འོད་ཟེར་ཅན༔ འབྱུང་བ་རླུང་གི་ཁམས་ལ་དབང་བསྒྱུར་བས༔ ཡུམ་ཆེན་དམ་ཚིག་སྒྲོལ་དང་གཉིས་སུ་མེད༔ ཞིང་བཅུའི་དབུགས་དང་འབྱུང་བ་རླུང་འཛིན་པ༔ དམིགས་མེད་ཆོས་ཀྱི་དབྱིངས་སུ་རྡུལ་དུ་རློགས༔ རྩ་སྔགས་ཤམ་བུར་ལས་སྦྱོར་གདགས༔ དེ་ནས་ཐུན་སྣོད་གྲུ་གསུམ་དུ༔ འཇིགས་རུང་དུག་གི་མེ་ཏོག་དང་༔ གུ་གུལ་སྦྱར་སྤོས་རོ་ཞུན་མེ༔ ཁྲག་ཆབ་དུག་གི་བཤོས་ཟུར་གསུམ༔ ཐོད་རྔ་འཁྲོལ་ཞིང་ཚིག་དང་བསྟུན༔ མཆོད་པའི་ཕྱག་རྒྱ་ཆེན་པོ་བརྒྱད༔ ཁྲོས་པས་དགྲ་བགེགས་ཚོགས་བརྒྱད་ཀྱི༔ དབང་ཡུལ་འབྲེལ་ཐག་བཅད་པར་བསམ༔ རང་རང་ཐུན་རྫས་གཟུགས་ལ་བརྡེག༔ ཧཱུྃ༔ འཇིགས་རུང་མི་བསྲུན་ཁྲོ་མོ་བརྒྱད་པོ་ཡིས༔ དགྲ་བགེགས་རྣམ་ཤེས་འབྲེལ་བ་རྒྱུན་ཆོད་ཕྱིར༔ དུག་གི་མེ་ཏོག་མིག་ལ་བྲབ་པ་ཡིས༔ ལོག་རྟོག་འཁྲུལ་བའི་མི་ཤེས་རྒྱུན་ཆོད་ཅིག༔ རྩ་སྔགས་ཤམ་བུར་ལས་སྦྱོར་གདགས༔ གུ་གུལ་རོ་སྲེག་དུད་པ་སྣར་བདུག་པས༔ གཉིས་རྟོག་དྲི་འཛིན་ཤེས་པ་དབྱིངས་སུ་ཆོམས༔ ཞུན་ཆེན་སྦྱར་བའི་མེ་ལྕེས་ལུས་བསྲེགས་པས༔ མ་རིག་ལུས་ངན་ཤེས་པ་ཐལ་བར་ཐོངས༔ དམར་ཆེན་ཁྲག་ཆབ་འཁྲུགས་པས་རབ་བརྡེག་པས༔ སྡུག་བསྔལ་ཉོན་ཡིད་ཤེས་པ་རྡུལ་དུ་རློགས༔ དུག་ཟས་ཁྲག་གིས་སྦྲུས་པ་ཁར་བླུགས་པས༔ སྡིག་སྤྱོད་རོ་འཛིན་ཤེས་པ་རྩད་ནས་ཆོད༔ རཱུ་ཏྲ་ཕོ་མོའི་ཐོད་རྔའི་སྒྲ་བསྒྲགས་པས༔ འཁོར་རྩ་སྒྲ་འཛིན་དབང་ཤེས་རྒྱུན་ཐག་ཆོད༔ རྟོག་བྲལ་ནམ་མཁའི་སྒོང་ཟོར་སྙིང་བརྡེག་པས༔ ཀུན་གཞི་འཁྲུལ་བའི་བག་ཆགས་དྲུང་ནས་ཕྱུང་༔ རྩ་སྔགས་ཤམ་བུར་ལས་སྦྱོར་གདགས༔ དེ་ནས་ཕུར་བུ་གནས་དྲུག་ཏུ༔ བཏབ་སྟེ་ཚིག་དོན་ཡིད་ལ་བསམ༔ ཧཱུྃ༔ བདག་ཉིད་དཔའ་མོ་འོད་ཟེར་ཅན་མ་ཡི༔ ཕྱག་གཡས་དང་པོས་དངུལ་གྱི་ཕུར་པ་གདེངས༔ དགྲ་བགེགས་སྤྱི་བོའི་གཙུག་ཏུ་བཏབ་པ་ཡིས༔ ལས་ངན་སྒྲིབ་གཉིས་བག་ཆགས་ཞི་བར་མཛད༔ ཞི་མཛད་ཀི་ལ་ཡཱ་ཡི་ཕྲིན་ལས་མཛོད༔ ཕྱག་གཡོན་དང་པོས་གསེར་ཕུར་གྲུ་བཞི་གདེངས༔ དགྲ་བགེགས་དཔྲལ་བའི་དཀྱིལ་དུ་བཏབ་པ་ཡིས༔ ལས་ངན་རྒྱུན་བཅད་ཡོན་ཏན་རྒྱས་པར་མཛད༔ རྒྱས་མཛད་ཀཱི་ལ་ཡ་ཡི་ཕྲིན་ལས་མཛོད༔ ཕྱག་གཡས་བར་བས་ཟངས་ཕུར་ཟླ་གམ་འདྲིལ༔ དགྲ་བགེགས་སྙིང་གི་དཀྱིལ་དུ་གདབ་པ་ཡིས༔ ལས་སྒྲིབ་ཆོས་ཀྱི་དབྱིངས་སུ་དབང་སྡུད་མཛད༔ དབང་མཛད་ཀཱི་ལ་ཡ་ཡི་ཕྲིན་ལས་མཛོད༔ ཕྱག་གཡོན་བར་བས་ལྕགས་ཕུར་ཟུར་གསུམ་འདྲིལ༔ དགྲ་བགེགས་མགྲིན་པའི་རྩ་ལ་བཏབ་པ་ཡིས༔ ཁམས་གསུམ་རྒྱུད་འབྲེལ་ངག་སྒྲིབ་དབྱིངས་སུ་སྒྲོལ༔ སྒྲོལ་མཛད་ཀཱི་ལ་ཡ་ཡི་ཕྲིན་ལས་མཛོད༔ ཕྱག་གཡས་ཐ་མས་སེང་ལྡེང་ཕུར་པ་འདྲིལ༔ དགྲ་བགེགས་ལྟེ་བའི་རྩ་ལ་བཏབ་པ་ཡིས༔ སྲིད་གསུམ་རྩད་གཅོད་རྣལ་འབྱོར་སྒོ་གསུམ་སྲུངས༔ སྲུང་མཛད་ཀཱི་ལ་ཡ་ཡི་ཕྲིན་ལས་མཛོད༔ ཕྱག་གཡོན་ཐ་མས་དུག་ཤིང་ཕུར་པ་འདྲིལ༔ དགྲ་བགེགས་གསང་བའི་གནས་སུ་བཏབ་པ་ཡིས༔ རྟེན་འབྲེལ་ལུགས་འབྱུང་ཆོས་ཀྱི་དབྱིངས་སུ་ཟློག༔ བཟློག་མཛད་ཀཱི་ལ་ཡ་ཡི་ཕྲིན་ལས་མཛོད༔ སྤྲོ་ན་རང་རང་ཚིག་མཚམས་སུ༔ རྩ་སྔགས་ཤམ་བུར་ལས་སྦྱོར་སྔགས༔ མེ་དཔུང་མར་གྲགས་སོ་ལྔ་བ༔ གདགས་ཤིང་རྫས་ཕུར་སོ་སོར་བཅའ༔ བསྡུས་ན་ཀུན་གྱི་མཇུག་ཏུ་གཅིག༔ དེ་ནས་ལིང་ག་མཚོན་གྱིས་གཏུབས༔ མཁས་པས་རྐང་པ་གཡོན་ནས་བརྩམས༔ ཧཱུྃ་ཧཱུྃ༔ རབ་འཇིགས་དུར་ཁྲོད་ཆེན་པོའི་གནས་བརྒྱད་ནས༔ ཤ་ཟ་མཁའ་འགྲོ་གིང་ཆེན་སྤྲུལ་བར་བཅས༔ རི་རབ་རྡུལ་བརླག་རྒྱ་མཚོ་ཧུབ་ཀྱིས་རྔུབ༔ བཟོད་དཀའ་ཕྱག་མཚན་མཚོན་ཆའི་ཆར་ཕོབ་ལ༔ དགྲ་བགེགས་གཟུགས་ཕུང་ཐལ་བའི་རྡུལ་དུ་རློགས༔ རྩ་སྔགས་ལས་སྦྱོར་སྔགས་ཤམ་དུ༔ དགྲ་བགེགས་དམ་སྲི་ལོག་འདྲེན་འབྱུང་པོ་ཐམས་ཅད་ཀྱི་སྲོག་ལ་མ་ར་ཡ་རྦད༔ དེ་ནས་ལིང་རོར་བདུད་རྩི་བྲན༔ གཏོར་མ་འབུལ་ཞིང་དམིགས་པ་ནི༔ ལྷ་མོ་འོད་ཟེར་ཅན་མ་ཡི༔ ལྷ་ཚོགས་གཙོ་འཁོར་དྲག་ཏུ་ཁྲོས༔ གནམ་ས་ལྟ་བུའི་ཞལ་གདངས་པས༔ དགྲ་བགེགས་ལོག་འདྲེན་ཐམས་ཅད་ཀྱི༔ ཤ་རུས་ཆེམ་ཆེམ་གསོལ་བར་བསམ༔ ཧཱུྃ༔ དོན་དམ་ཆོས་དབྱིངས་སྐྱེ་མེད་ཞལ་ཕྱེས་ཤིག༔ ཀུན་བཟང་འཁྲུལ་བའི་བག་ཆགས་དབྱིངས་སུ་བསྟབས༔ རྩ་བརྒྱུད་རིག་འཛིན་བླ་མ་ཞལ་ཕྱེས་ཤིག༔ ཉམས་ཆག་རྟོག་སྒྲིབ་ཀ་དག་ཀློང་དུ་བསྟབས༔ ཡི་དམ་དཀྱིལ་འཁོར་ལྷ་ཚོགས་ཞལ་ཕྱེས་ཤིག༔ བཟང་ངན་བླང་དོར་མཉམ་ཉིད་དབྱིངས་སུ་བསྟབས༔ མ་སྲིང་ཌཱཀྐི་རྒྱ་མཚོ་ཞལ་ཕྱེས་ཤིག༔ སྡུག་བསྔལ་འཁྲུལ་རྟོག་བདེ་ཆེན་དབྱིངས་སུ་བསྟབས༔ ཁྱད་པར་རྒྱལ་ཡུམ་དཔའ་མོ་མ་རི་ཙྱཻ༔ གཙོ་འཁོར་སྤྲུལ་བ་དམ་ཅན་རྒྱ་མཚོའི་ཚོགས༔ འཇིགས་རུང་གནམ་ས་ལྟ་བུའི་ཞལ་གདངས་ལ༔ རྣོ་དབལ་སྤུ་གྲི་ལྟ་བུའི་མཆེ་བ་གཙིགས༔ བཟོད་དཀའ་ཐོག་མདའ་ལྟ་བུའི་ལྗགས་བསྐྱངས་ནས༔ སྟོང་ཁམས་ཡངས་པ་ལྟ་བུའི་མགྲིན་པ་རུ༔ དགྲ་བགེགས་དམ་སྲི་ལོག་འདྲེན་བསྒྲལ་བ་ཡི༔ ཤ་ཁྲག་རུས་པ་དབང་པོ་ནང་རོལ་བཅས༔ ལྷག་མ་མེད་པར་རོལ་ཅིག་ཁ་རཾ་ཁཱ་ཧི༔ ཁམས་གསུམ་འཁོར་བར་སྐྱེ་བའི་རྒྱུན་ཆོད་ལ༔ འཁྲུལ་མེད་ཆོས་ཀྱི་དབྱིངས་སུ་རྒྱས་ཐོབ་ཅིག༔ རྩ་སྔགས་ཤམ་བུར་༔ མ་ཧཱ་མཾ་ས་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་ཙིཏྟ་ཁཱ་ཧི༔ མ་ཧཱ་གོ་རོ་ཙ་ན་ཁཱ་ཧི༔ མ་ཧཱ་ཀེཾ་ནི་རི་ཏི་ལ་ཁཱ་ཧི༔ ཞེས་བརྗོད་དབྱིངས་སུ་མཉམ་པར་བཞག༔ ས་མ་ཡཱ༔ བསྒྲལ་ལས་གནམ་ལྕགས་ཐོག་མདའ་འདིས༔ གང་དམིགས་དགྲ་བགེགས་མ་ལུས་པ༔ རྡུལ་དུ་བརླག་པར་གདོན་མི་ཟ༔ གང་བབས་ཐོ་ཅོར་བརྩམ་མི་བྱ༔ བཀའ་སྲུང་དབྱིངས་ཀྱི་མ་མོ་དང་༔ གཏེར་སྲུང་དུད་སོལ་ལྷ་མོ་ཡིས༔ ཆུད་མི་ཟ་བར་སྲུངས་ཤིག་རྒྱ༔ མཚོ་རྒྱལ་སྤྲུལ་པའི་གང་ཟག་གིས༔ རིག་པ་དབྱིངས་ཀྱི་སྒྲོམ་བུ་རུ༔ བདག་ཉིད་རྒྱལ་དབང་པདྨ་ཡིས༔ དགོངས་པའི་དབྱིངས་ཀྱི་རྒྱས་བཏབ་པ༔ དུས་བབས་ལས་སྐལ་ལྡན་ལ་སྣང་༔ ཐེ་ཚོམ་ཅན་ལ་ཕག་ཏུ་སྦོས༔ དད་ཅན་ཆོས་ཀྱི་སྐལ་བར་ཤོག༔ གུ་ཧྱ༔ བདག་འདྲ་སྤྲང་བན་དགེ་སྦྱོང་བྷུ་སུ་ཀུ་བ་སྐལ་ལྡན་ལུང་རིག་གླིང་པར་འབོད་པས་རང་བྱུང་པདྨ་ཡབ་ཡུམ་རྡོ་གྲུབ་ལག་ན་རྡོ་རྗེ་དག་པའི་སྣང་ངོར་ཡང་ཡང་མཇལ་ཏེ་ཟབ་མོ་གཏེར་ལ་དབང་བར་འཁྲུལ་མེད་ཀྱི་ལུང་བྱང་བསྩལ་པ་ལ་ངེས་པ་རྙེད་དེ་དམ་ཚིག་ཟོལ་ཟོག་མེད་པའི་དཔའ་གདེང་དང་ལྡན་པས་བྲིས་པའི་དགེ་བས་བསྟན་དགྲ་མ་ལུས་དབྱིངས་སུ་བསྒྲལ་ནས་དུས་གསུམ་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག༔ འདི་དག་སྣང་དུ་བབས་པ་ཡོད་ཀྱང་དཀོར་འབྱམས་ལེ་ལོའི་དབང་གིས་ཕྱི་བཤོལ་དུ་ལུས་པ་ལྷོ་བྲག་མར་པ་ལོ་ཙཱའི་སྲས་ཀྱི་ཐུ་བོ་དར་མ་དབང་ཕྱུག་ཏུ་གྲགས་པའི་རྣམ་རོལ་ཡིན་ནམ་སྙམ་པའི་སྤྲུལ་པའི་སྐུ་ཐུབ་བསྟན་འོད་ཟེར་ནས་གསང་ཆེན་ཌཀྐིའི་ཚོགས་ཀུན་མགྲོན་དུ་འབོད་པའི་རྫས་ཀྱི་མཆོག་ཏུ་གྲགས་པ་མཚན་ལྡན་ཐོད་པའི་ཌ་མ་རུ་དང་ལྷ་རྫས་དར་དཀར་སྲིད་དུ་རིང་བ་བཅས་བཀས་བསྐུལ་བའི་ངོ་མ་ཆོག་པ་དང་༔ དད་ལྡན་མི་དབང་དཔའ་བོའི་རིགས་ལས་བྱུང་བའི་སྦྱིན་བདག་གིས་བསྐུལ་ངོར་གྲུབ་དབང་རྫོགས་ཆེན་པའི་སློབ་འབངས་ཐ་ཤལ་པས་སུག་བྲིས་བགྱིས་པ་དགེའོ། །སརྦ་མངྒ་ལམ།།