བཟློག་པ་གཉིས་འཐུང་མཚོན་འཁོར།

འོད་ཟེར་ཅན་མའི་ཐུགས་སྒྲུབ་ལས༔ བཟློག་པ་གཉིས་འཐུང་མཚོན་འཁོར་བཞུགས༔

གདོད་མའི་སྟོང་ཆེན་ཆོས་དབྱིངས་ཡུམ་གྱི་མཁར༔ སྐྱེ་མེད་རང་བྱུང་འགྲོ་ངོར་གང་འདུལ་གཟུགས༔ ཚད་མེད་སྙིང་རྗེས་ཆེར་ཁྲོས་ཞིང་བཅུའི་གཤེད༔ གཙོ་འཁོར་སྤྲུལ་པར་བཅས་ལ་ཕྱག་འཚལ་བསྟོད༔ རྒྱལ་བའི་བསྟན་པ་ཆེས་ཆེར་ཉམས་པའི་མཐུས༔ སེམས་ཅན་བདེ་སྐྱིད་མར་འགྲིབ་སྡུག་བསྔལ་མནར༔ དེ་ཚེ་འགྲོ་རྣམས་མི་དགེ་བཅུ་ལ་སྤྱོད༔ ཁྱད་པར་དུས་རྒྱུན་ཉེས་མེད་རི་དྭགས་གསོད༔ ལོངས་སྤྱོད་ལྡན་རྣམས་སྙིང་གི་ཚེར་མར་མཐོང་༔ རང་ཉིད་ཕོངས་ལས་གཞན་འབྱོར་སྡུག་བསྔལ་བྱེད༔ དེ་ཚེ་ལྷ་ཀླུ་དཀར་ཕྱོགས་གཞི་བདག་འཁྲུགས༔ སྲོག་ཆགས་མི་སྡུག་བཙས་པ་ལྷག་ཆད་དང་༔ སྐར་མ་རྟགས་ཅན་ས་རལ་བྲག་སྙིལ་དང་༔ ཁྱད་པར་རྒྱ་འདྲེ་སྤུན་དགུ་སྙིང་ཞུགས་པས༔ བན་བོན་དམ་ལོག་རྒྱ་འདྲེ་སྲུང་མར་གྱུར༔ མཐུ་བྱད་ལས་བརྩོན་ཆོས་མཛད་གློ་བུར་འཆི༔ ཁྲིམས་རལ་བཙུན་གཟུགས་ས་སྟེང་ཐུབ་བསྟན་བཤིག༔ ཕ་བུ་ཡིན་ཀྱང་གསོད་ལ་ཐེ་མི་ཚོམ༔ དྲིན་གྱིས་བསྐྱངས་པའི་རྡོ་རྗེ་སློབ་དཔོན་གྱིས༔ ཅུང་ཟད་ཙམ་གྱིས་བཀྱོན་ཡང་དེ་མ་ཐག༔ དམ་ལོག་སློབ་བུས་ངོས་ལྐོག་གཤེ་ཞིང་བརྡེག༔ དེ་འདྲའི་དུས་ངན་བརྗོད་པར་མི་རུང་བས༔ འགྲོ་རྣམས་ཅི་བྱ་ངོས་མི་ཟིན་པའི་ཚེ༔ པདྨ་བདག་དང་ཡེ་ཤེས་མཚོ་རྒྱལ་དང་༔ བཻ་རོ་ཆོས་རྒྱལ་ལ་སོགས་རྗེ་འབངས་ཀྱི༔ སྤྲུལ་བ་ཡང་སྤྲུལ་ནམ་མཁའི་སྐར་ལྟར་བཀྲ༔ ལ་ལ་མི་དཔོན་ལ་ལ་བླ་ཆེན་ཚུལ༔ ལ་ལ་བྱ་བྲལ་ལ་ལ་འཁྲུལ་ཞིག་དང་༔ ལ་ལ་གཏེར་ཆེན་འགའ་ཞིག་གཏེར་ཕྲན་འདོན༔ ཕལ་ཆེར་རིག་གནས་མཁན་དང་ཕྲིན་སྒྲུབ་ཀྱི༔ ཕྱག་བཞེས་བསྟན་རྒྱུན་སྤེལ་དང་ཁྱད་པར་དུ༔ ཐོས་བསམ་འཆད་རྩོད་རྩོམ་དང་སྒྲུབ་ལ་བརྩོན༔ སྣ་ཚོགས་གཟུགས་ཀྱིས་བསྟན་འགྲོའི་རྒུད་པ་སེལ༔ སེམས་ཅན་བདེ་སྐྱིད་གོང་འཕེལ་མཛད་པ་དགོངས༔ ཡང་དགོས་བསྟན་ཞབས་གཟུགས་བརྙན་གྱིས་འཛིན་ཚེ༔ མཚོ་རྒྱལ་བདག་ཉིད་སྤྲུལ་བ་མང་དུ་འབྱུང་༔ པད་འབྱུང་ཐུགས་རྗེས་རྗེས་བཟུང་མཐའ་མིའི་རིགས༔ ཤེས་ཆུང་བློ་མང་གཏད་མེད་བྱིས་པའི་ཚུལ༔ ཚིག་རྩུབ་སེམས་དཀར་གཞན་གྱིས་བསྒྱུར་བར་སླ༔ རྒྱལ་གྱི་མིང་ཅན་པདྨ་བདག་ལ་མོས༔ འཕགས་མ་སྒྲོལ་མ་རྟག་པར་ཡིད་ལ་བཅངས༔ ལྷ་སྲས་སྤྲུལ་བའི་བླ་མས་དུས་ཀུན་སྐྱོངས༔ དེ་ལ་བྱང་ཁམས་དངོས་གཏེར་དབང་བའམ༔ ཡང་ན་རང་བྱུང་དགོངས་པའི་ཀློང་རྡོལ་ནས༔ མཁའ་འགྲོའི་བརྡ་རིས་སྙིང་ལ་བརྗེད་མེད་འཆར༔ ཕྱི་ནང་གསང་བའི་ཟབ་ཆོས་མི་འབྱུང་བས༔ འཕགས་མ་གཞན་གྱིས་མི་ཐུབ་འོད་ཟེར་ཅན༔ དེ་ཡི་སྒྲུབ་ཐབས་དྲག་པོ་མངོན་སྤྱོད་ལས༔ ཟློག་པའི་རིམ་པ་འདི་ཡིས་གང་དམིགས་ཟློག༔ ས་མ་ཡཱ༔ རྒྱ་རྒྱ་རྒྱ༔ དེ་ཡང་འཇིགས་རུང་དུར་ཁྲོད་གནས་སོགས་སུ༔ སྐྱང་ནུལ་དཀྱིལ་འཁོར་གནས་དང་འཚམས་པ་རུ༔ མ་ཏྲཾ་སྔོ་སྐྱའི་གཟུགས་བྲིས་ལྟོ་བ་རུ༔ རྩིབས་བཞི་མཚམས་བརྒྱད་རྡོ་ར་མེ་རིས་བསྐོར༔ ཁྲི་འུར་ལྕགས་སྣོད་ནང་དུ་དམར་གྱི་གཏོར༔ ལྷ་གྲངས་ཞུན་མེ་མཚེ་ཡུངས་རྒྱུ་མ་དང་༔ ནང་རོལ་སྣ་ཚོགས་རྩང་ཕུར་ཉེར་བརྒྱད་བསྐོར༔ དར་མཐིང་གུར་ཕུབ་སྲིད་པའི་ཁྱུང་གཟུགས་བཀོད༔ མི་རྐང་གླིང་བུ་འབུད་ཅིང་དར་ཤིང་བརྡབ༔ ཚིལ་ཆེན་བདུག་ལ་རྔ་བརྡུང་དྲག་རོལ་བཅས༔ སྔགས་པས་གོས་ནག་རལ་བསིག་རྔམ་སྒྲ་ཡིས༔ ཧཱུྃ་བྷྱོ༔ རྣམ་ཐར་གསུམ་ལྡན་རྡོ་རྗེ་བཙུན་མོའི་དབྱིངས༔ བསམ་བརྗོད་བློ་ལས་འདས་པའི་དཀྱིལ་འཁོར་ནས༔ རྒྱལ་ཡུམ་དཔའ་མོ་རྡོ་རྗེ་བདག་མེད་མ༔ གཞན་གྱིས་མི་ཐུབ་ཁྲོ་མོ་འོད་ཟེར་ཅན༔ དམིགས་མེད་ཆོས་སྐུ་ཞི་བའི་ངང་ཉིད་ལས༔ གདུལ་བྱ་མི་བསྲུན་གཞན་སྣང་འདུལ་བའི་ཕྱིར༔ ཚད་མེད་སྙིང་རྗེས་ཤུགས་ཀྱིས་ཆེར་ཁྲོས་པ༔ དེ་རིང་བཟློག་བསྒྱུར་དྲག་པོའི་ལས་མཛོད་ཅིག༔ ཧཱུྃ་བྷྱོ༔ གྲུ་གསུམ་མཐིང་ནག་ཟླ་གམ་གསུམ་ལྡན་དབུས༔ ཆགས་བྲལ་པད་ཉི་དགྲ་བགེགས་བསྣོལ་བའི་སྟེང་༔ བདུད་ཀྱི་བདུད་ཆེན་ལྷ་ཡི་ཡང་ལྷ་གཙོ༔ ཞལ་གསུམ་ཕྱག་དྲུག་ཞབས་བཞི་འདོར་སྟབས་བགྲད༔ རྩ་ཞལ་གསེར་མདོག་ཉི་མའི་འོད་སྟོང་འབར༔ འདོད་ཁམས་ལྷ་སྲིན་སྡེ་བརྒྱད་ཟིལ་གྱིས་གནོན༔ འདོད་ཆགས་རྒྱུ་རྐྱེན་ལས་བསྐྱེད་སྡུག་བསྔལ་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ གཡས་ཀྱི་ཞལ་དཀར་ཞི་འཛུམ་བཞད་པ་ཡིས༔ གཟུགས་ཁམས་ལྷ་སྲིན་འབྱུང་པོ་དབང་དུ་སྡུད༔ ཞེ་སྡང་རྒྱུ་རྐྱེན་ལས་བསྐྱེད་སྡུག་བསྔལ་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ གཡོན་ཞལ་དམར་པོ་སྒེག་ཅིང་ཆགས་པའི་ཉམས༔ གཟུགས་མེད་ཁམས་ཀྱི་བག་ཆགས་དྲུང་ནས་འབྱིན༔ ལྷན་སྐྱེས་གཏི་མུག་གིས་བསྐྱེད་སྡུག་བསྔལ་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཕྱག་གཡས་དང་པོ་བསིལ་བྱེད་ཟླ་དཀྱིལ་གདེངས༔ རང་དོན་ཉན་རང་ཞི་མཐའ་སྟོངས་པར་མཛོད༔ ཁྱབ་པ་འདུ་བྱེད་བག་ཆགས་ཤེས་སྒྲིབ་བཅས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཕྱག་གཡོན་དང་པོ་ཉི་མའི་ཚ་ཟེར་འབར༔ དུག་ལྔའི་མེ་ཡི་ཚ་ངར་འཁོར་རྒྱུན་གཅོད༔ སྲིད་གསུམ་བག་ཆགས་རྒྱུ་རྐྱེན་འབྲས་བུར་བཅས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ གཡས་ཀྱི་བར་བས་གྲི་གུག་མཁའ་ལ་གདེངས༔ རྟེན་འབྲེལ་ལུགས་འབྱུང་འཁོར་བའི་སྐྱེ་རྒྱུན་གཅོད༔ སྲིད་པར་སྐྱེ་བའི་མྱ་ངན་སྡུག་བསྔལ་བཅས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཕྱག་གཡོན་བར་བས་དུང་ཁྲག་ཐུགས་ཀར་འཛིན༔ མ་མོ་མཁའ་འགྲོའི་བཀའ་ཆད་རིམས་ནད་འཇོམས༔ ཁྲག་ནད་དམར་ཡམས་གློ་བུར་འཚེ་བའི་གཤེད༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཐ་མ་གཉིས་ན་ཁབ་སྐུད་བརྒྱུས་ཏེ་བསྣམས༔ བསྟན་འགྲོར་གནོད་པའི་གྲོས་ངན་ཁ་མིག་ཚེམས༔ མི་ཁ་གྱོད་སྣ་གླེང་བརྗོད་གཏམ་ངན་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཞབས་བཞི་བརྐྱང་བསྐུམ་དོར་སྟབས་དྲག་པོར་བགྲད༔ བདུད་བཞི་དམ་སྲིའི་སྤྱི་ནས་གནོན་པར་བྱེད༔ མཐའ་བཞིའི་དམག་དཔུང་བསམ་སྦྱོར་གཡོ་འཁྲུག་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ དབུ་སྐྲ་ཁམ་སེར་སྲིད་རྩེར་མེ་ལྟར་འབར༔ གཟའ་དང་རྒྱུ་སྐར་མ་ལུས་བྲན་དུ་ཁོལ༔ གཟའ་བརྒྱད་དལ་ཡམས་རྒྱུ་སྐར་འཁྲུགས་པའི་ནད༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ སྐུ་སྟོད་གླང་ཆེན་ཀོ་རློན་ཁྲག་འཛག་གསོལ༔ གཏི་མུག་རྨོངས་པའི་བག་ཆགས་རྨིང་མེད་བརླགས༔ རྨོངས་བྱེད་བདུད་ཀྱིས་འཐིབས་ནད་བྱིང་རྨུགས་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ སྐུ་སྐེད་མི་ལྤགས་གཡང་གཞི་དཀྲིས་ཤིང་འགྱིང་༔ འདོད་ཆགས་གཡེངས་པའི་འཁྲུལ་རྟོག་དྲུངས་ནས་འབྱིན༔ ཆགས་བྱེད་བཙན་གྱི་གློ་བུར་གྲི་འཐབ་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ སྐུ་སྨད་ང་རྒྱལ་གཟིག་ཤམ་ལྷུབ་གྱོན་མཛད༔ རྒྱལ་འགོང་སྲོག་བདག་མ་ལུས་སྤ་ཟིལ་བཀོང་༔པེ་ཧར་དཀར་ནག་ཁྲ་གསུམ་གནོད་པ་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཞི་རྒྱན་དར་དང་མེ་ཏོག་གསེར་གདུབ་སྤྲས༔ ལྷ་ཀླུ་གནོད་སྦྱིན་བུ་མོ་ལས་ལ་འགྱེད༔ སྣང་སྲིད་མོ་རྒྱུད་གཡེན་སྦྱོར་དམོད་བྱང་ཀུན༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ སྦྲུལ་ཆུན་ལྔ་དང་བྱུག་རྫས་གསུམ་གྱིས་བྱུགས༔ ཀླུ་རིགས་ལྔ་དང་མཁའ་འགྲོ་ཟིལ་གྱིས་གནོན༔ མཛེ་ནད་སྣ་དགུ་ཡན་ལག་ཞ་གྲུམ་ནད༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཧཱུྃ༔ འཁོར་གྱི་འོད་ཟེར་ཅན་མ་ལས་བཞིའི་མདོག༔ དགྲ་བགེགས་གནོན་ཕྱིར་རི་རབ་གྲུ་བཞི་བསྣམས༔ ས་བདག་ལྷ་སྲིན་འབྱུང་པོ་དབང་དུ་སྡུད༔ ས་ལས་བསྐྱེད་པའི་འདྲེ་སྲིན་སྡུག་བསྔལ་རིགས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ དགྲ་བགེགས་རྦ་ལ་བསྐྱོན་ཕྱིར་ཆུ་རྒྱུན་འབྲུབ༔ ཆུ་གནས་ལྷ་སྲིན་འབྱུང་པོ་དབང་དུ་སྡུད༔ ཆུ་ཡིས་བསྐྱེད་པའི་ཀླུ་སྲིན་གཉན་ནད་རིགས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ དགྲ་བགེགས་དབྱིངས་སུ་སྲེག་བྱེད་མེ་དཔུང་འབར༔ མེ་ལས་བསྐྲུན་པའི་སྣང་སྲིད་ལྷ་འདྲེའི་ཚོགས༔ དབང་བསྡུས་ཟིལ་གནོན་བྲན་དང་ཕོ་ཉར་འགྱེད༔ མེ་གནས་ལྷ་སྲིན་འབྱུང་པོའི་བྱད་ཕུར་སོགས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ དགྲ་གདོན་རྨང་མེད་བརླག་ཕྱིར་འཐོར་རླུང་འཚུབས༔ རླུང་ལས་བསྐྱེད་པའི་ལྷ་སྲིན་འབྱུང་པོའི་ཚོགས༔ དབང་དུ་བསྡུས་ཤིང་བྲན་དང་ཕོ་ཉར་འགྱེད༔ གཏོར་བྱེད་རླུང་ལྷའི་གདོན་དང་བྱད་ཕུར་རྣམས༔ དགྲ་གདོན་དམ་སྲི་བྱད་མའི་སྟེང་དུ་ཟློག༔ ཧཱུྃ་བྷྱོ༔ སྔོན་ཚེ་བདེ་གཤེགས་མཚོན་ཆའི་རྒྱལ་པོའི་སྡེའི༔ སྤྱན་སྔར་ཐུགས་བསྐྱེད་དམ་བཅའ་མཐར་ཕྱིན་པའི༔ རྒྱལ་ཡུམ་དཔའ་མོ་འོད་ཟེར་ཅན་མ་ཡི༔ སྐུ་གསུང་ཐུགས་ཡོན་ཕྲིན་ལས་རྣམ་པ་ལྔའི༔ སྤྲུལ་བ་ཡང་སྤྲུལ་རིག་སྔགས་ལྷ་མོའི་ཚོགས༔ བསམ་གྱིས་མི་ཁྱབ་ཉི་ཟེར་རྡུལ་ལྟར་འཚུབ༔ ཀུན་ཀྱང་སྐུ་ནི་འཇིགས་རུང་གར་དགུའི་ཉམས༔ ཧཱུྃ་ཕཊ་བྷྱོ་ཟློག་དྲག་ཤུལ་རྡོ་རྗེའི་གསུང་༔ སྐྱེ་མེད་ཀློང་ནས་བྱམས་བརྩེའི་ཐུགས་མངའ་བ༔ བསྟན་འགྲོའི་དོན་དུ་མི་མངོན་དབྱིངས་ནས་བསྐུལ༔ མི་མཐུན་ཕྱོགས་ཀུན་བཟློག་པའི་ཕྲིན་ལས་མཛོད༔ རྣལ་འབྱོར་བདག་ཅག་ཡོན་མཆོད་འཁོར་བཅས་ལ༔ སྟེང་གི་ཕྱོགས་ནས་ཚངས་པ་བརྒྱ་བྱིན་སོགས༔ ལྷ་གདོན་ཕོ་མོས་གདུག་རྩུབ་སྟོན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ འོག་གི་ཕྱོགས་ནས་དགའ་བོ་འཇོག་པོ་སོགས༔ ཀླུ་རིགས་རྣམ་བཞིས་གདུག་རྩུབ་སྟོན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ཤར་གྱི་ཕྱོགས་ནས་དྲི་ཟ་ཕོ་མོ་ཡིས༔ ནད་དང་སྡུག་བསྔལ་ལྟས་ངན་གཏོང་བ་དང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ལྷོ་ཡི་ཕྱོགས་ནས་གཤིན་རྗེ་ཕོ་མོ་ཡིས༔ ནད་དང་སྡུག་བསྔལ་ལྟས་ངན་གཏོང་བ་དང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ནུབ་ཀྱི་ཕྱོགས་ནས་ཆུ་བདག་ཕོ་མོ་ཡིས༔ ནད་དང་སྡུག་བསྔལ་ལྟས་ངན་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ བྱང་གི་ཕྱོགས་ནས་རླུང་ལྷ་ཕོ་མོ་ཡིས༔ ནད་དང་སྡུག་བསྔལ་ལྟས་ངན་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ཤར་ལྷོའི་མཚམས་ནས་མེ་ལྷའི་གདོན་ཚོགས་ཀྱིས༔ མི་ཕྱུགས་དལ་ཡམས་ཐན་ལྟས་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ལྷོ་ནུབ་སྲིན་པོ་ཕོ་མོའི་གདོན་ཚོགས་ཀྱིས༔ མི་ཕྱུགས་དལ་ཡམས་ཐན་ལྟས་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ནུབ་བྱང་མཚམས་ནས་རླུང་ལྷའི་གདོན་ཚོགས་ཀྱིས༔ མི་ཕྱུགས་དལ་ཡམས་ཐན་ལྟས་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ བྱང་ཤར་དབང་ལྡན་ཕོ་མོའི་གདོན་ཚོགས་ཀྱིས༔ མི་ཕྱུགས་དལ་ཡམས་ཐན་ལྟས་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ཁྲིམས་ལྡན་བཙུན་པས་ཆོས་ཟོར་འཕེན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ དམ་ལྡན་སྔགས་པས་ཐུན་ཟོར་འཕེན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ནུས་ལྡན་བོན་པོས་བཙོ་ཟོར་འཕེན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ཞེ་སྡང་མེ་ལྟར་འབར་བའི་སྐྱེ་བོ་ཡིས༔ བསམ་ངན་དམོད་ཚིག་མདའ་ཟོར་འཕེན་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ འདོད་ཆགས་ཆུ་ལྟར་འཁྲུགས་པའི་ཡུགས་ས་མོས༔ བསམ་ངན་དམོད་ཚིག་དུལ་ཟོར་རྡེབ་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ང་རྒྱལ་བྲག་ལྟར་གཟེང་བའི་སྔགས་བཙུན་གྱིས༔ བསམ་ངན་དམོད་ཚིག་ཟོར་སྣ་བརྡེག་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ ཕྲག་དོག་ཁྱི་ལྟར་ཟུག་པའི་བྲན་ཁོལ་གྱིས༔ བསམ་ངན་དམོད་ཚིག་གྲོས་ངན་གཤོམ་པ་ཡང་༔ དགྲ་གདོན་ཆོམ་རྐུན་དམ་སྲིའི་སྟེང་དུ་ཟློག༔ གཏི་མུག་མུན་ལྟར་གཏིབས་པའི་གདོན་ཚོགས་ཀྱིས༔ བསམ་ངན་དམོད་ཚིག་གོད་ཁ་གཏོང་བ་ཡང་༔ དགྲ་གདོན་ཆོམ་རྐུན་དམ་སྲིིའི་སྟེང་དུ་ཟློག༔ ཧཱུྃ་བྷྱོ༔ ཕན་བདེའི་འབྱུང་ནས་རྒྱལ་བའི་བསྟན་པ་ལ༔ དངོས་སམ་བརྒྱུད་ནས་བསམ་ངན་སྦྱོར་རྩུབ་ཀྱིས༔ ལོག་པར་ཤོམ་པའི་བདུད་དང་དམ་སྲིའི་རིགས༔ དེ་རིང་མངོན་སྤྱོད་དྲག་པོའི་ཕྲིན་ལས་ཀྱིས༔ བཟློག་གོ་ལྷ་སྔགས་ནུས་པའི་མཐུ་ཡིས་ཟློག༔ བསྒྱུར་རོ་དམར་ཆེན་གཏོར་ཟོར་འདི་ཡིས་བསྒྱུར༔ ཡངས་པའི་རྒྱལ་ཁམས་ཆོས་དང་མཐུན་པ་ཡི༔ ཁྲིམས་ཀྱིས་བསྐྱངས་ཤིང་བསྟན་ལ་གུས་མཆོད་པའི༔ ཆོས་ལྡན་རྒྱལ་པོའི་ཆོས་སྲིད་རྒྱལ་ཁྲིམས་ལ༔ དངོས་སམ་བརྒྱུད་ནས་བསམ་ངན་སྦྱོར་རྩུབ་ཀྱིས༔ ལོག་པར་ཤོམ་པའི་བདུད་དང་དམ་སྲིའི་རིགས༔ དེ་རིང་མངོན་སྤྱོད་དྲག་པོའི་ཕྲིན་ལས་ཀྱིས༔ བཟློག་གོ་ལྷ་སྔགས་ནུས་པའི་མཐུ་ཡིས་ཟློག༔ བསྒྱུར་རོ་དམར་ཆེན་གཏོར་ཟོར་འདི་ཡིས་བསྒྱུར༔ དགེ་བཅུའི་ཆོས་ལ་མོས་ཤིང་དཀོན་མཆོག་གསུམ༔ རྟག་ཏུ་བླ་མར་ཁུར་བའི་སྦྱིན་བདག་ལ༔ དངོས་སམ་བརྒྱུད་ནས་བསམ་ངན་སྦྱོར་རྩུབ་ཀྱིས༔ ལོག་པར་ཤོམ་པའི་བདུད་དང་དམ་སྲིའི་རིགས༔ དེ་རིང་མངོན་སྤྱོད་དྲག་པོའི་ཕྲིན་ལས་ཀྱིས༔ བཟློག་གོ་ལྷ་སྔགས་ནུས་པའི་མཐུ་ཡིས་ཟློག༔ ལོག་པར་ཤོམ་པའི་ནུས་པའི་མཐུ་ཡིས་ཟློག༔ བསྒྱུར་རོ་དམར་ཆེན་གཏོར་ཟོར་འདི་ཡིས་བསྒྱུར༔ རྟེན་གསུམ་མཇལ་ཞིང་སྒོ་གསུམ་དཀའ་སྤྱད་ཀྱིས༔ རྟག་ཏུ་ཆོས་འདོད་ཉམ་ཆུང་རྣལ་འབྱོར་ལ༔ ལུས་ཀྱིས་བརྡེག་ཅིང་ངག་གིས་ཡ་ག་བསྒྲགས༔ སེམས་ཀྱིས་བསམ་ངན་དངོས་སུ་ནོར་རྫས་འཕྲོག༔ ལྐོག་ནས་འཇབ་ཅིང་གྲོས་ངན་སྦྱོར་རྩུབ་གཤོམ༔ སྡང་བྱེད་དགྲ་བོ་ལས་ངན་སྡིག་ཅན་རྣམས༔ བཟློག་གོ་ལྷ་སྔགས་ནུས་པའི་མཐུ་ཡིས་ཟློག༔ བསྒྱུར་རོ་དམར་ཆེན་གཏོར་ཟོར་འདི་ཡིས་བསྒྱུར༔ རྨང་མེད་རྩད་ནས་བརླག་པའི་ཕྲིན་ལས་མཛོད༔ གཞན་ཡང་རྣལ་འབྱོར་བདག་ཅག་འཁོར་བཅས་ལ༔དམག་ཇག་གྲོས་ངན་གཤོམ་པའི་དམག་དཔོན་དང་༔ངན་སེམས་འདུན་པ་གཅིག་དྲིལ་དམག་མི་རྣམས༔ རྩ་གསུམ་སྲུང་མ་དམ་ཅན་རྒྱ་མཚོ་དང་༔ ཁྱད་པར་འཕགས་མ་འོད་ཟེར་ཅན་མ་ཡི༔ སྐུ་གསུང་ཐུགས་ཡོན་ཕྲིན་ལས་ནུས་མཐུ་དང་༔ ཆོས་ཉིད་རྣམ་དག་ཆོས་ཅན་རྟེན་འབྲེལ་མཐུས༔ ལྟ་བྱེད་མིག་ལ་རྣོ་དབལ་མདའ་ཟོར་རྒྱོབ༔ ལོག་རྟོག་འཁྲུལ་བའི་མིག་ཤེས་དབྱིངས་སུ་ཟློག༔ མ་རིག་འཁྲུལ་བའི་སྐྱེ་རྒྱུན་རྩད་ནས་ཆོད༔ ཉན་པའི་རྣ་བར་ཡུངས་དཀར་ཐུན་ཟོར་རྡེག༔ གཉིས་འཛིན་འཁྲུལ་བའི་དགྲ་ཀུན་སྟོང་པར་ཟློག༔ སྲིད་པའི་རྩ་བ་བདག་ལྟ་དྲུངས་ནས་ཕྱུང་༔ སྣོམ་པའི་སྣ་ལ་དམར་ཆེན་གཏོར་ཟོར་རྒྱོབ༔ ཀུན་བརྟགས་འཁྲུལ་བའི་དྲི་འཛིན་དབྱིངས་སུ་ཟློག༔ དངོས་མེད་བདག་ཏུ་འཛིན་པའི་བག་ཆགས་ཕྱུང་༔ སྨྲ་བའི་ལྕེ་ལ་རྣོ་བའི་མཚོན་ཟོར་རྒྱོབ༔ མི་དགེའི་འབྲེལ་རྒྱུན་རོ་འཛིན་རྩད་ནས་ཆོད༔ རྒོལ་ངན་ལོག་སྨྲའི་ཚོགས་ཀུན་དབྱིངས་སུ་ཟློག༔ ལས་རླུང་འཁྲུལ་བའི་བག་ཆགས་དྲུངས་ནས་ཕྱུང་༔ བདག་འཛིན་ལུས་ཀྱི་རྟེན་ཕུར་རྩད་ནས་ཆོད༔ བག་ཆགས་ཀུན་གཞིའི་ཁང་རུལ་རྨིང་ནས་འགྱེལ༔ དངོས་འཛིན་ཡིད་ཀྱི་རྣམ་ཤེས་དབྱིངས་སུ་གཏོར༔ ཆགས་སྡང་ཉོན་ཡིད་འབྲེལ་ཐག་རྩད་ནས་ཆོད༔ ལོག་ཤེས་སྒོ་ལྔའི་འཛིན་ཞེན་རྨིང་མེད་ཐོངས༔ མདོར་ན་སྔོན་ལས་འཕྲལ་རྐྱེན་ལས་གྱུར་པའི༔ གཟུགས་ཅན་དགྲ་བོ་གཟུགས་མེད་གདོན་དང་བགེགས༔ འབྱུང་བའི་གཡོ་འཁྲུག་ཐན་དང་ལྟས་ངན་སོགས༔ སྲིད་དང་ཞི་བའི་ལེགས་ཚོགས་སྒྲུབ་པ་ལ༔ བར་དུ་གཅོད་པའི་མི་མཐུན་ཕྱོགས་རྣམས་ཀུན༔ བཟློག་ཅིང་བསྒྱུར་བའི་ཕྲིན་ལས་མཛད་དུ་གསོལ༔ ཅེས་བརྗོད་ལྟ་བའི་གདེངས་ལྡན་ན༔ ཐལ་མོ་རྡེབ་ཅིང་དམོད་ཚིག་བརྗོད༔ རྩ་བའི་སྔགས་ལ་དྲག་པོའི་སྔགས༔ མེ་དཔུང་འབར་བའི་རྣོ་སོ་གདགས༔ ཧཱུྃ་ཕཊ་བྷྱོ་ཟློག་མཐའ་རྟེན་བཅས༔ རྣལ་འབྱོར་རིགས་པས་འཕྲུལ་ཤེས་བྱ༔ ས་མ་ཡཱ༔ དེ་ལྟར་བཟློག་བསྒྱུར་ཟབ་མོ་འདི༔ ཐེ་ཚོམ་མེད་པའི་རྣལ་འབྱོར་བས༔ གཞུང་བཞིན་བསྙེན་སྒྲུབ་སྔོན་སོང་ནས༔ ལས་སྦྱོར་ཚུལ་འདི་བརྩམས་པ་ན༔ སྟོབས་ལྡན་རྒྱལ་པོ་དགྲར་ལངས་ཀྱང་༔ བཟློག་པར་མི་འགྱུར་ཡོད་རེ་ཀན༔ དེ་བཞིན་གཟུགས་མེད་གདོན་གྱི་རིགས༔ གང་དང་གང་ལ་བརྩམས་པ་ཀུན༔ རྩི་སྦུར་མེ་ལྕེ་འཕྲད་པ་བཞིན༔ བརླག་པར་མི་འགྱུར་གང་ཡང་མེད༔ རང་བྱུང་པདྨའི་བྱིན་རླབས་ལས༔ མཚོ་རྒྱལ་དགོངས་པའི་གསང་མཛོད་ལས༔ ཕྱི་སྒྲུབ་ཆོས་སྡེའི་ཆ་རྐྱེན་དུ༔ བཟོ་བཅོས་མེད་པར་ཕབ་པ་འདིས༔ བསྟན་དང་འགྲོ་ལ་གནོད་པ་ཡི༔ དགྲ་གདོན་དམ་སྲིའི་རིགས་གྱུར་ཀུན༔ གནམ་ལྕགས་མཚོན་ཆས་བྲག་རི་བཞིན༔ རྨིང་མེད་བརླག་པའི་རྒྱུར་གྱུར་ཅིག༔ ཅེས་སྔོན་ལས་བག་ཆགས་བཟང་པོའི་དུས་སུ་སད་པའི་སྐལ་ལྡན་ལུང་རིག་གླིང་པས་རང་བྱུང་རིག་པའི་སྒྲོམ་ནས་བཏོན་ཏེ་སྨྲས་པ༔ ཟབ་ཆོས་ལ་དབང་བར་ལུང་བྱང་ལས་བྱུང་བའི་དགེ་སྦྱོང་གཞན་ཕན་མིང་གིས་བྲིས་པ་དུས་གསུམ་ཀུན་ཏུ་དགེ་ཞིང་བཀྲ་ཤིས་པར་གྱུར་ཅིག༔ དགེའོ། །དགེའོ། །དགེའོ། །