རྗེ་བཙུན་སྒྲོལ་མའི་ཆོ་ག་རྡོ་རྗེའི་གོ་ཆ།

དམ་ཆོས་ཡང་ཟབ་པདྨའི་ཐུགས་ཐིག་ལས༔ རྗེ་བཙུན་སྒྲོལ་མའི་ཆོ་ག་རྡོ་རྗེའི་གོ་ཆ་ཞེས་བྱ་བ་བཞུགས༔

ཤེས་རབ་དབྱིངས་ཀྱི་ལྷ་ལ་འདུད༔ དུས་གསུམ་རྒྱལ་དང་དེ་ཡི་སྲས༔ མ་ལུས་བསྐྱེད་ཡུམ་འཕགས་མ་དང་༔ བདག་ཉིད་ཆེན་པོ་ཨོ་རྒྱན་རྗེ༔ པོ་ཊ་ལ་ཡི་ཕོ་བྲང་དུ༔ བཀའ་བགྲོས་འགྲོ་རྣམས་སྡུག་བསྔལ་ལས༔ སྐྱོབ་ཕྱིར་རྒྱུད་དང་མན་ངག་སོགས༔ སྒྲུབ་ཐབས་རྗེས་གནང་མཐའ་ཡས་བརྩམས༔ ཁྱད་པར་ས་ཧོར་རྒྱལ་ཁམས་སུ༔ མི་མོའི་ཚུལ་བཟུང་མནྡྷ་ར༔ གསང་བ་ཤེས་རབ་བླ་མ་རུ༔ བསྟེན་ནས་འཕགས་ཡུལ་འགྲོ་བ་རྣམས༔ ཡང་དག་ལམ་བཀོད་བསྟན་པ་བསྐྱངས༔ དེ་ཉིད་ཕྱི་ནང་གསང་གསུམ་དུ༔ སྒྲུབ་པའི་ཐབས་ལ་དཔག་མེད་ཀྱང་༔ ཀུན་འདུས་སྒྲོལ་མའི་གདམས་པ་ནི༔ སྐལ་ལྡན་འགའ་ཡི་སྤྱོད་ཡུལ་ལས༔ ཕལ་ལ་སྣང་བར་མི་འགྱུར་བས༔ གསང་བར་སྤྱད་ན་གེགས་ཞི་ཞིང་༔ ལེགས་ཚོགས་འཕེལ་བར་གདོན་མི་ཟ༔ ས་མ་ཡཱ༔ དང་པོ་བསྙེན་ཅིང་བར་དུ་བསྒྲུབ༔ ཐ་མར་ལས་ལ་སྦྱོར་བ་དང་༔ གསུམ་ལས་དང་པོ་འཕགས་མ་ལྷར༔ བསྙེན་པའི་ཐབས་ལ་སྦྱོར་དངོས་རྗེས༔ ཉེར་གཅིག་གྲངས་སུ་བསྟན་པ་ལ༔ སྦྱོར་བ་བདུན་ཏེ་དང་པོ་ནི༔ གནས་དུས་ཡོ་བྱད་གྲོགས་ལ་སོགས༔ འཚེ་བ་མེད་ཅིང་དཀར་ཕྱོགས་ཀྱི༔ དགའ་བ་དང་ནི་རྒྱལ་གྱི་དུས༔ ཕུར་བུ་རྒྱལ་སོགས་འཛོམས་ན་མཆོག༔ མིན་ཀྱང་ཉམས་དགའ་སྤྲོ་བར་འབྱུང་༔ རོལ་མོ་དང་ནི་མཆོད་པའི་རྫས༔ དཀྱིལ་འཁོར་གྲུ་བཞི་འཇམ་ལེགས་སྟེང་༔ ཚོམ་བུ་ལྗང་གུ་ཉེར་གཅིག་གི༔ དབུས་སུ་བུམ་པ་ཏཱཾ་གྱིས་མཚན༔ ཉེར་ལྔའི་བཅུད་ལྡན་གཙང་ཆུས་བཀང་༔ སྐུ་རྟེན་འབྲས་བུ་ཅན་གྱི་ཤིང་༔ ཁ་རྒྱན་དེ་མདུན་འབྲུ་དཀར་ཕྱེ༔ གཙང་མར་བཤོས་ཟླུམ་ཉི་ཤུ་གཅིག༔ མཛེས་པའི་རྒྱན་ལྡན་དེ་ཡི་ཤར༔ དབྱངས་གསལ་ཡི་གེ་ཟུང་འབྲེལ་དང་༔ ལྷོ་རུ་ཅོད་པཎ་ཉི་ཟླས་མཚན༔ ཆུ་ལྷར་ལྕགས་ཀྱུ་དར་དམར་ཅན༔ བྱང་དུ་གཏེར་བུམ་ནོར་བུས་སྤྲས༔ མཐའ་བསྐོར་ཉེར་སྤྱོད་མཆོད་པས་བསྐོར༔ བདེ་བའི་སྟན་ལ་བག་ཕེབས་ནས༔ འཁོར་བའི་སྡུག་བསྔལ་མཐའ་དག་ལས༔ བདག་དང་འགྲོ་རྣམས་སྐྱབས་པའི་ཕྱིར༔ མདུན་མཁར་འཕགས་མ་རྒྱལ་བ་དང་༔ སྲས་བཅས་སྐྱབས་ཀྱི་ཡུལ་དུ་དམིགས༔ དང་པོ་ངག་ནས་འདི་བཞིན་བརྗོད༔ ན་མོ༔ བསླུ་མེད་གཏན་གྱི་སྐྱབས་གནས་རྫོགས་སངས་རྒྱས༔ རྣམ་གྲོལ་ལམ་གྱི་ཤིང་རྟ་དམ་པའི་ཆོས༔ ཡང་དག་ལམ་གྱི་དེད་དཔོན་འཕགས་པའི་སྡེ༔ ཀུན་འདུས་རྗེ་བཙུན་འཕགས་མ་སྒྲོལ་མ་ལ༔ དུས་འདི་ནས་བཟུང་བྱང་ཆུབ་མ་ཐོབ་བར༔ བདག་དང་འགྲོ་རྣམས་གུས་པས་སྐྱབས་སུ་མཆི༔ བརྩེ་བ་ཆེན་པོས་རྗེས་སུ་བཟུང་དུ་གསོལ༔ ལན་གསུམ། གཉིས་པ་བྱང་ཆུབ་སེམས་བསྐྱེད་ནི༔ མ་ལུས་འགྲོ་རྣམས་འཁོར་མཚོ་ལས་བསྒྲལ་ནས༔ འཕགས་མའི་གོ་འཕང་མཆོག་ལ་འགོད་བྱའི་ཕྱིར༔ སྨོན་འཇུག་བྱང་ཆུབ་སེམས་དང་རབ་འགྲོགས་པས༔ སེམས་ཅན་མ་བསྒྲལ་བསྒྲལ་དང་མ་གྲོལ་གྲོལ༔ དབུགས་དབྱུང་མྱ་ངན་འདས་ལ་འགོད་པར་བགྱི༔ དེ་མཐུས་བདག་དང་འགྲོ་རྣམས་འཇིགས་བརྒྱད་ལས༔ མྱུར་གྲོལ་གཏན་གྱི་བདེ་ལ་འགོད་པར་ཤོག༔ ལན་གསུམ། གསུམ་པ་ཚོགས་བསག་རིམ་པ་ནི༔ སྐྱབས་གནས་ཀུན་འདུས་འཕགས་མའི་ལྷ་ཚོགས་ལ༔ བདག་ལུས་རྡུལ་གྱི་གྲངས་མཉམ་རབ་སྤྲུལ་ནས༔ ལུས་ངག་ཡིད་གསུམ་གུས་པས་ཕྱག་འཚལ་ཞིང་༔ དངོས་སུ་འབྱོར་དང་ཡིད་ཀྱིས་སྤྲུལ་པ་ཡི༔ ཕྱི་ནང་གསང་བའི་མཆོད་པ་རྒྱ་མཚོས་མཆོད༔ ཐོག་མ་མེད་ནས་བཅས་དང་རང་བཞིན་གྱི༔ ཉེས་པའི་ཚོགས་ཀུན་སྟོབས་བཞིའི་གཉེན་པོས་བཤགས༔ མཐའ་ཡས་འཕགས་པ་རྣམས་དང་སོ་སྐྱེ་ཡི༔ དགེ་ཚོགས་མ་ལུས་ཀུན་ལ་རྗེས་ཡི་རང་༔ དབང་པོ་ཁམས་དང་བསམ་པའི་ཁྱད་པར་བཞིན༔ ཐེག་གསུམ་ཆོས་ཀྱི་འཁོར་ལོ་བསྐོར་བར་བསྐུལ༔ མཐའ་ཡས་འགྲོ་རྣམས་མྱང་འདས་མ་ཐོབ་བར༔ རྟག་པར་འགྲོ་བའི་དོན་དུ་བཞུགས་གསོལ་འདེབས༔ བདག་གཞན་དུས་གསུམ་བསགས་པའི་རྣམ་དཀར་དགེ༔ མཐའ་ཡས་འགྲོ་རྣམས་བྱང་ཆུབ་ཐོབ་ཕྱིར་བསྔོ༔ ལན་གསུམ། བཞི་པ་བགེགས་ལ་བཀའ་བསྒོ་བ་ནི༔ ཧཱུྃ༔ དུས་གསུམ་རྟོག་པས་མ་བསླད་ཆོས་ཀྱི་དབྱིངས༔ ཇི་བཞིན་མ་རྟོགས་གློ་བུར་འཁྲུལ་བའི་འདྲེ༔ གནས་སྐབས་མཐར་ཐུག་ཐར་ལམ་བར་ཆད་བགེགས༔ ལྷ་སྔགས་ཏིང་འཛིན་དམིགས་པའི་འཕྲུལ་འཁོར་གྱིས༔ གླིང་བཞིའི་ཕ་མཐར་དམིགས་མེད་ཀློང་ཡངས་སུ༔ སླར་ལ་མ་ལྡོག་གདོད་མའི་གཤིས་སུ་བསྐྲད༔ ཤེས་རབ་ཡུམ་གྱི་མཁའ་ལས་མ་འདའ་བར༔ རང་བཞིན་མི་གནས་ཆོས་སྐུའི་དབྱིངས་སུ་དེངས༔ ཧཱུྃ་བཞིའི་སྔགས་བརྗོད་འཕགས་མའི་ཐུགས་ཀ་ནས༔ ཁྲོ་མཚོན་མེ་དཔུང་སྤྲོས་པས་བགེགས་ཚོགས་བསྐྲད༔ ལྔ་པ་སྲུང་བའི་གོ་ཆས་གཏམས་པ་ནི༔ ཧཱུྃ༔ བདག་གཞན་སྒོ་གསུམ་ལྷ་སྔགས་ཏིང་ངེ་འཛིན༔ རང་བཞིན་ཡོངས་གྲུབ་སྲུང་བའི་འཁོར་ལོ་ཆེ༔ མཚོན་བྱེད་ཆོས་བདུན་ལྡན་པ་རྡོ་རྗེའི་གུར༔ ཁྲོ་བོ་ཁྲོ་མོ་མེ་དཔུང་མཚོན་ཆའི་ཆར༔ སྣང་སྲིད་མ་ལུས་རྒྱལ་བའི་ཞིང་དུ་གྱུར༔ ཐ་མལ་རྟོག་པས་མི་ཤིགས་དེ་བཞིན་ཉིད༔ ཀུན་བརྟགས་གདོན་གྱིས་ནམ་ཡང་གླགས་མི་རྙེད༔ བཛྲ་རཀྵ་རཀྵ་བྷྲུཾ༔ དྲུག་པ་བྱིན་འབེབས་མཆོད་རྫས་བྱིན་བརླབ་ནི༔ ཧཱུྃ༔ ཆོས་དབྱིངས་སྤྲོས་པ་བྲལ་བའི་ཕོ་བྲང་ནས༔ མཐའ་བརྒྱད་སྤྲོས་པས་མ་གོས་ཆོས་ཀྱི་སྐུ༔ ཀུན་བཟང་ཤེས་རབ་ཕར་ཕྱིན་དབྱིངས་ཀྱི་ཡུམ༔ སྒྲུབ་པོའི་ཡིད་ལ་ཐུགས་ཀྱི་བྱིན་ཕོབ་ཅིག༔ ངེས་པ་ལྔ་ལྡན་གཙང་བདེ་རྟག་པའི་ཞིང་༔ ཕུན་སུམ་ཚོགས་པ་ལོངས་སྐུའི་ཕོ་བྲང་ནས༔ རིགས་ལྔ་ཡབ་ཡུམ་སེམས་དཔའ་སེམས་མར་བཅས༔ སྒྲུབ་པོའི་ངག་ལ་གསུང་གི་བྱིན་ཕོབ་ཅིག༔ སྟོང་གསུམ་མི་མཇེད་གང་འདུལ་སྤྲུལ་པའི་གནས༔ མ་ངེས་སྣ་ཚོགས་གདུལ་བྱའི་ཞིང་ཁམས་ནས༔ ཐུབ་དབང་བསྐལ་བཟང་འདྲེན་པ་སྟོང་རྩའི་ཚོགས༔ སྒྲུབ་པོའི་ལུས་ལ་སྐུ་ཡི་བྱིན་ཕོབ་ཅིག༔ ཁྱད་པར་འཛམ་གླིང་བྱེ་བ་ཕྲག་བརྒྱ་རུ༔ པོ་ཊ་ལ་སོགས་དཔག་མེད་སྤྲུལ་ཞིང་ནས༔ སྒྲོལ་མ་ལ་སོགས་ཐུགས་རྗེའི་མངའ་བདག་རྣམས༔ གནས་འདིར་བྱིན་ཕོབ་མཆོད་པའི་རྫས་རྣམས་ཀུན༔ ཟག་མེད་བདུད་རྩིའི་རྣམ་པར་བསྒྱུར་ནས་ཀྱང་༔ མཆོག་ཐུན་དངོས་གྲུབ་དུས་འདིར་ཐོབ་པར་མཛོད༔ ཨོཾ་ཨཱརྱ་ཏཱ་རེ་ཛྙཱ་ན་བཛྲ་ཨ་བེ་ཤ་ཡ་ཨ་ཨཱ༔ ཨོཾ་བཛྲ་ཨརྒྷཾ་སོགས་ནས་ཤཔྟ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སརྦ་པཱུ་ཛ་ཧོ༔ ས་མ་ཡཱ༔ དེ་ཡན་ཆད་སྔོན་འགྲོའི་ལས་རིམ་བདུན་གྱིས་རྫོགས༔ གཉིས་པ་དངོས་གཞི་རྣམ་གྲངས་བདུན་དག་ལས༔ དང་པོ་ལྷ་ཡི་བསྐྱེད་རིམ་བསྐྱེད་པ་ལ༔ ཁམས་གསུམ་བག་ཆགས་སྦྱོང་ཕྱིར་ཏིང་འཛིན་གསུམ༔ མངལ་སྐྱེས་སྦྱོང་བ་མངོན་བྱང་ལྔ་ཡིས་བསྟན༔ ཨཱཿ གདོད་ནས་མ་སྐྱེས་ཆོས་དབྱིངས་སྟོང་པ་ཉིད༔ མ་རྟོགས་འགྲོ་ལ་བརྩེ་བའི་སྙིང་རྗེའི་གདངས༔ ཟུང་འཇུག་རིག་པ་མཁའ་ལས་འཇའ་ཚོན་བཞིན༔ རྒྱུ་ཡི་ཡི་གེ་ཏཱཾ་ཡིག་ལྗང་གུར་གྱུར༔ དེ་ལས་ཨེ་ཡཾ་རཾ་བཾ་ལཾ་འཕྲོས་པས༔ མཁའ་རླུང་མེ་ཆུ་རིན་ཆེན་ས་གཞི་བརྡལ༔ བྷྲུཾ་ལས་སྤྲུལ་པའི་ཕོ་བྲང་པོ་ཊ་ལ༔ དབང་སྔོན་ལས་གྲུབ་རིན་ཆེན་རི་རབ་དབུས༔ གྲུ་བཞི་སྒོ་བཞི་ཕྱོགས་བཞི་ཤེལ་དང་གསེར༔ པད་རག་མརྒད་ལས་གྲུབ་ལྟ་ན་སྡུག༔ ངོ་མཚར་རྨད་བྱུང་རྟ་བབས་འདོད་སྣམ་དང་༔ ཕ་གུ་དྲ་བ་དྲྭ་ཕྱེད་གདུགས་ཏོག་མཛེས༔ ཆོས་འཁོར་ནོར་བུའི་རྒྱན་ཕྲེང་ཡིད་དུ་འོང་༔ དབུས་སུ་སྣ་ཚོགས་འདབ་བཞི་དེའི་ཕྱི་རོལ༔ འདབ་བརྒྱད་ཉིས་རིམ་པད་ཉི་ཟླ་བའི་གདན༔ དབུས་སུ་ཉི་ཟླ་ཨུཏྤལ་ཏཱཾ་ཡིག་མཚན༔ འཕྲོ་འདུས་ཡོངས་གྱུར་འགྲོ་བ་མ་ལུས་པ༔ སྲིད་ཞིའི་མཐའ་ལས་སྒྲོལ་མཛད་རྗེ་བཙུན་མ༔ སེང་ལྡིང་ནགས་ཀྱི་སྒྲོལ་མ་མརྒད་མདོག༔ ཕྱག་གཡས་མཆོག་སྦྱིན་ཕྱག་རྒྱ་པུས་སྟེང་སླེབ༔ ཕྱག་གཡོན་དཀོན་མཆོག་གསུམ་མཚོན་སྐྱབས་སྦྱིན་རྒྱ༔ ཐུགས་ཀར་མཚན་པའི་ཕྱག་གཉིས་ཨུཏྤལ་སྟེང་༔ ཐེག་གསུམ་འདྲེན་པ་ཆོས་ཀྱི་འཁོར་ལོས་མཚན༔ ཞབས་གཉིས་གཡས་བརྐྱང་གཡོན་བསྐུམ་རིན་པོ་ཆེའི༔ དབུ་རྒྱན་སྙན་ཆ་དོ་ཤལ་རྒྱན་ཕྲེང་དང་༔ ཁ་དོག་ལྔ་ལྡན་པཉྩ་ལི་ཀའི་གོས༔ ཞལ་འཛུམ་བརྩེ་བའི་སྤྱན་དཀྱུས་འགྲོ་ལ་གཟིགས༔ ཐུགས་ལས་ཏཱཾ་ཡིག་ཕྱོགས་མདོག་སྤྲོས་པ་ལས༔ ཤར་དུ་གཏི་མུག་གླང་པོའི་འཇིགས་པ་ལས༔ སྐྱོབ་མཛད་ཞི་བའི་སྒྲོལ་མ་དབྱངས་ཅན་ལྷ༔ དཀར་གསལ་སྟོན་ཟླའི་མདོག་ཅན་མཛེས་འཛུམ་ཞལ༔ ཕྱག་གཉིས་བཻཌཱུར་རྒྱུད་མང་ཞབས་ཕྱེད་དཀྱིལ༔ ལྷ་ཡི་གོས་དང་རིན་ཆེན་རྒྱན་ཆས་སྤུད༔ ལྷོ་རུ་ལྟས་ངན་རྐུན་པོའི་འཇིགས་པ་ལས༔ སྐྱོབ་མཛད་རྒྱས་པའི་སྒྲོལ་མ་འོད་ཟེར་ཅན༔ ཁྲོ་འཛུམ་ཕྱག་གཉིས་ཉི་ཟླའི་ཞགས་པ་བསྣམས༔ འདོར་སྟབས་དར་དང་རུས་པའི་རྒྱན་གྱིས་སྤྲས༔ ནུབ་ཏུ་འདོད་ཆགས་ཆུ་བོའི་འཇིགས་པ་ལས༔ སྐྱོབ་མཛད་དབང་གི་སྒྲོལ་མ་རཱ་གའི་མདོག༔ ཆགས་པའི་ཉམས་ཅན་ཕྱག་བཞིའི་རྩ་ཕྱག་གིས༔ ཨུཏྤལ་མདའ་གཞུ་འགེངས་ཤིང་དེ་འོག་གཉིས༔ ལྕགས་ཀྱུ་ཞགས་པས་ཁམས་གསུམ་བླ་ཡིད་འགུགས༔ འདོར་སྟབས་སྟག་ཤམ་ཨུཏྤལ་རྒྱན་ཕྲེང་མཛེས༔ བྱང་དུ་སེར་སྣ་ལྕགས་སྒྲོག་འཇིགས་པ་ལས༔ སྐྱོབ་མཛད་དབུལ་འདྲེ་ཚར་གཅོད་རྗེ་བཙུན་མ༔ ནོར་རྒྱུན་ལྗང་མོ་ཕྱག་གཡས་མཆོག་སྦྱིན་གྱིས༔ འབྲས་ཀྱི་སྙེ་མ་གཡོན་པས་ནེའུ་ལེ་བསྣམས༔ ནོར་བུའི་རྒྱན་ཆ་དར་སྣའི་ན་བཟའ་མཛེས༔ ཕྱེད་སྐྱིལ་གཏེར་བུམ་ནོར་སྐྱུགས་ཁྲི་ལ་བཞུགས༔ ཕྱི་རོལ་འདབ་བརྒྱད་ནང་མའི་ཤར་ཕྱོགས་སུ༔ ཞེ་སྡང་མེ་ཡི་འཇིགས་པ་ལས་སྒྲོལ་བའི༔ བྱམས་པ་ཚད་མེད་མྱུར་མ་དཔའ་མོ་ནི༔ དམར་གསལ་ཁྲོ་འཛུམ་ཕྱག་གཡས་མཆོག་སྦྱིན་རྒྱ༔ སྤྲིན་ལས་ཆར་འབེབས་གཡོན་པའི་སྐྱབས་སྦྱིན་གྱིས༔ ཨུཏྤལ་གཡས་འཁྱིལ་དུང་དཀར་མཚན་པ་བསྣམས༔ ལྷོ་རུ་ང་རྒྱལ་སེང་གེའི་འཇིགས་པ་ལས༔ སྐྱོབ་མཛད་འཕགས་མ་ཚད་མེད་སྙིང་རྗེའི་ལྷ༔ བསོད་ནམས་དཔལ་སྟེར་གསེར་མདོག་ཞི་འཛུམ་བརྗིད༔ ཕྱག་གཡས་མཆོག་སྦྱིན་འཆི་མེད་ཤིང་འབྲས་དང་༔ གཡོན་པས་སྐྱབས་སྦྱིན་ཨུཏྤལ་ཚེ་བུམ་བསྣམས༔ ནུབ་ཏུ་ཐེ་ཚོམ་ཤ་ཟའི་འཇིགས་པ་ལས༔ སྒྲོལ་མཛད་དགའ་བ་བརྒྱད་ལྡན་རྗེ་བཙུན་མ༔ འཇིག་རྟེན་གསུམ་རྒྱལ་དམར་མོ་ཕྱག་གཡས་ཀྱིས༔ རིན་ཆེན་རྒྱན་ཕྲེང་གཡོན་པས་ཨུཏྤལ་སྟེང་༔ སྣ་ཚོགས་དར་གྱི་རྒྱལ་མཚན་ལྷབ་ལྷུབ་གཡོ༔ བྱང་དུ་ཕྲག་དོག་སྦྲུལ་གྱི་འཇིགས་པ་ལས༔ སྐྱོབ་མཛད་བཏང་སྙོམས་ཚད་མེད་རྗེ་བཙུན་མ༔ གཞན་ལས་རྣམ་རྒྱལ་དཔའ་མོ་ཁྲོ་འཛུམ་བཞད༔ གཡས་པས་མཆོག་སྦྱིན་རིན་ཆེན་ཞགས་པ་འཛིན༔ གཡོན་པའི་ཨུཏྤལ་བདུད་རྩིའི་ཟ་མ་ཏོག༔ ཤར་ལྷོ་མི་འཇིགས་སྦྱིན་མཛད་རྗེ་བཙུན་མ༔ རྡོ་རྗེ་སྡེར་མོ་དགྲ་དཔུང་འཇོམས་མཛད་པ༔ བསྐལ་པའི་མེ་དབུས་དམར་ནག་ཁྲོས་པའི་ཉམས༔ ཕྱག་བཞིའི་རྩ་ཕྱག་རྡོ་རྗེ་ཐོ་བ་དང་༔ འོག་མས་དགྲ་སྟྭ་ཕུར་བུས་ལོག་འདྲེན་གཞོམ༔ འདོར་སྟབས་སྟག་ཤམ་རུས་རྒྱན་དར་དཔྱངས་འཕྱོ༔ ལྷོ་ནུབ་སྙན་པས་དབུགས་འབྱིན་རྗེ་བཙུན་མ༔ གཞན་མི་རྒྱལ་བ་སེར་ནག་བརྗིད་པའི་ཞལ༔ ཕྱག་བཞིའི་དང་པོས་དུང་དང་རྒྱུད་མང་སྦྲེངས༔ འོག་མས་འོད་ཕྲེང་རྡོ་རྗེ་རྩེ་དགུ་གདེངས༔ བརྐྱང་བསྐུམ་ཞབས་གཉིས་ལོག་འདྲེན་གཡུལ་ངོར་བརྫིས༔ ནུབ་བྱང་འགྲོ་བའི་དོན་ལ་མཐུན་འཇུག་པའི༔ འཇིགས་བྱེད་ཆེན་མོ་དམར་གསལ་ཆགས་པའི་ཉམས༔ ཞལ་གདངས་སྤྱན་བགྲད་མཆེ་བའི་མྱུ་གུ་གཙིགས༔ ཕྱག་བཞིའི་དང་པོས་ཕུར་བུ་རལ་གྲི་དང་༔ འོག་མས་མདའ་གཞུ་འདོར་སྟབས་ཁྲོ་མོའི་ཆས༔ བྱང་ཤར་རྒྱལ་སྲས་སྤྱོད་པ་མཐར་ཕྱིན་པའི༔ རྒྱལ་མཚན་རྩེ་མོ་གཞན་གྱིས་མི་ཐུབ་མ༔ ཕྱག་བཞིའི་རྒྱལ་མཚན་རལ་གྲི་འཁོར་ལོ་ཞགས༔ ལྗང་ནག་ཁྲོ་མོ་དར་དཔྱངས་སྟག་ཤམ་གསོལ༔ ཞབས་གཉིས་འདོར་སྟབས་དཔའ་བའི་ཉམས་ཀྱིས་བཞུགས༔ ཕྱོགས་བཞིའི་འཕགས་མ་རྟ་བབས་སྐྱིལ་ཀྲུང་དང་༔ རིན་ཆེན་དར་སྣ་ལོངས་སྐུའི་རྒྱན་ཆས་སྤྲས༔ དེ་ཡི་ཕྱི་རིམ་འདབ་བརྒྱད་གདན་གྱི་སྟེང་༔ ཤར་དུ་དབུལ་བའི་འཇིགས་སྐྱོབ་རྗེ་བཙུན་མ༔ བུ་དཔལ་སྤེལ་མཛད་བཀྲ་ཤིས་དོན་བྱེད་མ༔ སེར་མོ་ཕྱག་གཡས་མཆོག་སྦྱིན་བིལ་བ་དང་༔ གཡོན་པས་སྐྱབས་སྦྱིན་ཨུཏྤལ་དཔལ་བེའུ་མཚན༔ ཟླ་བའི་དབུ་རྒྱན་དར་དང་རིན་ཆེན་རྒྱན༔ ལྷོ་རུ་ཀླུ་ཡི་ནད་སེལ་རྗེ་བཙུན་མ༔ རྨ་བྱ་ཆེན་མོ་མརྒད་ལྗང་གུའི་མདོག༔ ཕྱག་གཉིས་གཡས་པས་མཆོག་སྦྱིན་རྨ་བྱའི་སྒྲོ༔ གཡོན་པས་ཨུཏྤལ་སྨན་གྱི་བུམ་པ་བསྣམས༔ ནུབ་ཏུ་རྒྱལ་པོའི་ཆད་པ་ལས་སྐྱོབ་པའི༔ གཙུག་ཏོར་མི་ཕམ་རྒྱལ་མོ་མཆོག་སྦྱིན་གཡས༔ གདུགས་དཀར་གྱིས་མཚན་ཨུཏྤལ་སྡོང་བུ་གཡོན༔ དཀར་གསལ་བཞད་པའི་ཉམས་ཅན་བྱད་ཕུར་འཇོམས༔ བྱང་དུ་གཉེན་དང་བྲལ་བའི་འཇིགས་སྐྱོབ་པའི༔ སྒྲོལ་མ་སོ་སོར་འབྲང་མ་བཙོ་མའི་མདོག༔ གཡས་པས་མཆོག་སྦྱིན་གཡོན་པས་སྐྱབས་སྦྱིན་རྒྱས༔ ཨུཏྤལ་ལ་གནས་རལ་གྲི་གླེགས་བམ་འཛིན༔ ཤར་ལྷོ་འདོད་དོན་ཉམས་པས་ཕོངས་པ་རྣམས༔ དགའ་བས་དབུགས་འབྱིན་རབ་ཏུ་ཞི་བ་མོ༔ དཀར་དམར་མདངས་ལྡན་ཕྱག་བཞིའི་དང་པོ་གཉིས༔ ནོར་བུས་གང་བའི་བུམ་པ་ནེ་འུ་ལེ༔ འོག་མས་མཆོག་སྦྱིན་སྙེ་མ་གཡོན་སྐྱབས་སྦྱིན༔ བཞེངས་སྟབས་ལྷ་ཀླུ་མི་ཡི་ནོར་བུས་བརྒྱན༔ ལྷོ་ནུབ་གནམ་ལྕགས་འབེབས་པའི་འཇིགས་པ་ལས༔ སྐྱོབ་མཛད་སྟོང་ཆེན་རབ་འཇོམས་དཀར་གསལ་འཛུམ༔ ཕྱག་བཞིས་ས་དཀྱིལ་ཆུ་མེ་རླུང་ཞགས་བསྣམས༔ ཞབས་གཉིས་སྐྱིལ་ཀྲུང་དར་གོས་རིན་ཆེན་བརྒྱན༔ ནུབ་བྱང་གདོན་གྱི་འཇིགས་ལས་སྒྲོལ་མཛད་མ༔ བསིལ་བའི་ཚལ་ཆེན་དམར་གསལ་ཞི་ཁྲོའི་ཉམས༔ ཕྱག་བཞིའི་དང་པོས་རྔ་ཡབ་སྤྱི་བླུགས་དང་༔ འོག་མས་ཨུཏྤལ་པདྨའི་ཕྲེང་བ་བསྣམས༔ ཞབས་གཉིས་ཕྱེད་སྐྱིལ་ལོངས་སྐུ་ཞི་བའི་ཆས༔ བྱང་ཤར་ཚེ་སྲོག་སྤེལ་མཛད་འཕགས་མ་ནི༔ གསང་སྔགས་རྗེས་འཛིན་ལྗང་གསལ་ཞི་འཛུམ་བཞད༔ ཕྱག་བཞིའི་དང་པོས་དུང་དང་འཆི་མེད་བུམ༔ འོག་མས་རྒྱན་ཕྲེང་སྐྱབས་སྦྱིན་ཕྱག་རྒྱ་མཛད༔ཞབས་གཉིས་བཞེངས་སྟབས་དར་དང་རིན་ཆེན་སྤྲས༔ སྒོ་བཞིར་ཚངས་མ་ལེགས་བརྗོད་དཔལ་མོ་དང་༔ རི་སྐྱེས་དབང་མོ་ཀུན་ཀྱང་བཞེངས་སྟབས་ཅན༔ དཀར་སེར་དམར་ལྗང་འཆི་མེད་བུ་མོ་ནི༔ འཇོ་སྒེག་མཛེས་པ་དར་སྣའི་ན་བཟའ་དང་༔ རིན་ཐང་བྲལ་བའི་ནོར་བུའི་རྒྱན་ཆ་བརྗིད༔ འཕགས་མའི་རྣམ་འཕྲུལ་ཞི་རྒྱས་དབང་དྲག་གི༔ ལས་བཞིའི་ཕྲིན་ལས་སྒྲུབ་ལ་ཐོགས་པ་མེད༔ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཡི༔ ཕྱག་མཚན་གཡོན་རྣམས་པདྨའི་ཕྲེང་བ་འཛིན༔ སྟེང་གི་མཁའ་ལ་བསྐལ་བཟང་འདྲེན་པ་སྟོང་༔ བླ་མ་ཡི་དམ་མཁའ་འགྲོ་ཆོས་སྐྱོང་ཚོགས༔ རྩ་གསུམ་ལྷ་ཚོགས་སྤྲིན་ཕུང་གཏིབས་བཞིན་བཞུགས༔ འཕགས་མའི་ཐུགས་ལས་འོད་ཟེར་དབང་གཞུ་ལྟར༔ འཕྲོས་པས་རང་བཞིན་གནས་ནས་རིགས་ལྔའི་ལྷ༔ སྤྱན་དྲངས་དེ་དག་རྣམས་ཀྱི་ཐུགས་ཀ་ནས༔ ཡུམ་རྣམས་བྱོན་ཏེ་བུམ་པས་དབང་བསྐུར་བས༔ ཆུ་ལྷག་ཡར་ལུད་གཙོ་མོར་སྣང་མཐའ་དང་༔ གཞན་བཞིར་རྣམ་སྣང་རིན་འབྱུང་རྡོ་རྗེ་སེམས༔ དོན་གྲུབ་འཁོར་རྣམས་གཙོ་མོས་དབུ་བརྒྱན་གྱུར༔ སླར་ཡང་གཙོ་འཁོར་ཀུན་གྱི་གནས་གསུམ་དུ༔ ཨོཾ་དཀར་ཨཱཿ་དམར་ཧཱུྃ་མཐིང་གསལ་བ་ལས༔ འོད་ཟེར་འཕྲོས་པས་ཕྱོགས་བཅུའི་རྒྱལ་བ་ཀུན༔ འཕགས་མའི་རྣམ་པར་སྤྱན་དྲངས་ས་མ་ཛཿ གཉིས་པ་སྤྱན་འདྲེན་གུས་པའི་བློས༔ རོལ་མོ་འཁྲོལ་ཞིང་དྲི་ཞིམ་སྤོས་དུད་གཏོང་༔ སྙན་པའི་དབྱངས་ཀྱིས་ཐུགས་རྒྱུད་བསྐུལ་བ་ནི༔ ཧཱུྃ་ཧྲཱིཿ སྤྲོས་བྲལ་ཆོས་དབྱིངས་དག་པའི་ཕོ་བྲང་ནས༔ དུག་གསུམ་རྟོག་པས་མ་བསླད་དབྱིངས་ཀྱི་ཡུམ༔ ཁྱད་ཆོས་དྲུག་ལྡན་ཀུན་བཟང་ཆོས་ཀྱི་སྐུ༔ སྤྱན་འདྲེན་གཤེགས་སུ་གསོལ་བར་མི་དམིགས་ཀྱང་༔ རང་གདངས་ས་བཅུའི་སེམས་དཔའི་ཤེས་བྱའི་སྒྲིབ༔ དག་སྦྱངས་ཡོན་ཏན་མཐའ་རུ་ཕྱིན་པའི་ཕྱིར༔ ཕྱི་གསལ་ལོངས་སྤྱོད་རྫོགས་སྐུ་རིགས་ལྔའི་ཡུམ༔ མཚན་དཔེ་འགགས་མེད་ལྔ་ལྡན་ཀློང་ནས་བཞེངས༔ ཐུགས་རྗེའི་རང་རྩལ་འགགས་པ་མེད་པ་ལས༔ པོ་ཊ་ལ་དང་བདེ་ལྡན་རྔ་ཡབ་གླིང་༔ མ་ངེས་སྣ་ཚོགས་སྤྲུལ་པའི་ཞིང་ཁམས་ནས༔ དུས་གསུམ་རྒྱལ་བ་ཀུན་གྱི་ཕྲིན་ལས་མ༔ འཇིགས་ཚོགས་ཀུན་ལས་སྐྱོབ་མཛད་རྗེ་བཙུན་མཆོག༔ སྒྲོལ་མ་དཔའ་མོ་སྤྲུལ་དང་ཡང་སྤྲུལ་བཅས༔ ཐོགས་པ་མེད་པར་གནས་འདིར་གཤེགས་སུ་གསོལ༔ སྙིགས་དུས་འགྲོ་བ་ནད་མཚོན་མུ་གེས་མནར༔ ཉམ་ཐག་ཆོས་ཕོངས་ལས་ཀྱི་སྡུག་བསྔལ་སྒྲུབ༔ རྒྱུ་འབྲས་མི་དགེར་སྤྱོད་རྣམས་མངོན་མཐོ་དང་༔ ངེས་ལེགས་ཐར་ལམ་མཆོག་ལ་འགོད་པའི་ཕྱིར༔ བརྩེ་ཆེན་ཐུགས་རྗེ་ཆེན་པོས་ཉེར་བསྐུལ་ནས༔ འདིར་གཤེགས་སྒྲུབ་པོའི་སྒོ་གསུམ་བྱིན་གྱིས་རློབས༔ མཆོག་ཐུན་དངོས་གྲུབ་དུས་འདིར་བསྩལ་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་རེ་ཛྙཱ་ན་བཛྲ་ས་མ་ཡཱ་ཛཿཧཱུྃ་བཾ་ཧོ༔ ཨ་བེ་ཤ་ཡ་ཕེཾ་ཕེཾ ༔ ཞེས་བརྗོད་འབུད་དཀྲོལ་རོལ་མོས་ཐུགས་རྒྱུད་བསྐུལ༔ གསུམ་པ་དམ་ཡེ་དབྱེར་མེད་བརྟན་བཞུགས་ནི༔ ཀུན་བརྟགས་འཁྲུལ་བ་གཞན་དབང་བསྐྱེད་རིམ་དང་༔ ཡོངས་གྲུབ་གདོད་མའི་དབྱིངས་སུ་རྒྱས་འདེབས་ཕྱིར༔ ཧཱུྃ་ཧྲཱིཿ ཀུན་བརྟགས་ལས་ཉོན་འཁྲུལ་བའི་བག་ཆགས་རྣམས༔ གཞན་དབང་ལྷ་སྔགས་ཏིང་འཛིན་རོལ་པ་རུ༔ རྒྱས་བཏབ་ཡོངས་གྲུབ་མི་གནས་མྱང་འདས་ཀྱི༔ ཆོས་དབྱིངས་རང་ཞལ་མངོན་དུ་འགྱུར་བའི་ཕྱིར༔ དང་པོ་བསྐྱེད་ནས་བར་དུ་བསྙེན་ཅིང་སྒྲུབ༔ རང་བྱུང་རང་ཤར་ཡེ་གྲུབ་དབྱིངས་ཀྱི་ལྷ༔ ཐུགས་རྗེས་འགྲོ་ཀུན་གནས་སྐབས་འཇིགས་བརྒྱད་དང་༔ མཐར་ཐུག་འཁོར་བ་མཐའ་དག་སྡུག་བསྔལ་ལས༔ བསྒྲལ་ནས་ཡང་དག་དོན་ལ་འགོད་པའི་ཕྱིར༔ དམ་ཡེ་དབྱེར་མེད་བརྟན་པར་བཞུགས་སུ་གསོལ༔ ཨོཾ་ཨཱརྱ་ཏཱ་རེ་ཛྙཱ་ན་བཛྲ་ས་མ་ཡཱ་ཏིཥྛ་ལྷན༔ བཞི་པ་རང་ལས་མི་གཞན་སྤྲུལ་པའི་ལྷར༔ ཡེ་དག་མཉམ་ཉིད་ཆེན་པོར་གུས་བྲལ་ཀྱང་༔ གནས་སྐབས་ལམ་གྱི་ཚོགས་རྫོགས་སྒྲིབ་སྦྱང་ཕྱིར༔ སྤྲུལ་པའི་ལྷ་མོས་བརྡ་ཕྱག་གསོལ་བ་ནི༔ ཨོཾ་ན་མཿཨཱརྱ་ཏཱ་རེ་སརྦ་སིདྡྷི་ཧཱུྃ༔ ཧཱུྃ་ཧྲཱིཿ རང་ལས་ཤར་བའི་རྗེ་བཙུན་འཕགས་མའི་ལྷ༔ ཐུགས་རྗེ་ཚད་མེད་མཁྱེན་གཉིས་ཡོན་ཏན་རྫོགས༔ ནུས་པའི་སྟོབས་ཀྱིས་བདུད་དང་ལོག་འདྲེན་འདུལ༔ དྲན་པ་ཙམ་གྱིས་སྲིད་ཞིའི་ལེགས་ཚོགས་ཀུན༔ ཐོགས་མེད་སྩོལ་མཛད་རྒྱལ་དང་དེ་སྲས་ཀུན༔ གཅིག་ཏུ་འདུས་པ་ཡི་དམ་ལྷག་པའི་ལྷར༔ བདག་གཞན་སེམས་ཅན་དཔག་ཡས་ལུས་སྤྲུལ་ནས༔ སྒོ་གསུམ་གུས་པས་རྟག་པར་ཕྱག་འཚལ་ལོ༔ ཐོག་མེད་ནས་གོམས་བདག་ལྟའི་ང་རྒྱལ་སྒྲིབ༔ ཡོངས་དག་འཕགས་མའི་གསང་གསུམ་མངོན་གྱུར་ཤོག༔ ན་མོ་པུ་རུ་ཤ་ཡ་ཨ་ཏི་པུ་ཧོ༔ པྲ་ཏིཙྪ་ཧོ༔ ལྔ་པ་མཆོད་པའི་བྱེ་བྲག་མཐའ་ཡས་པ༔ དངོས་སུ་འབྱོར་དང་ཡིད་ཀྱིས་སྤྲུལ་པ་ནི༔ སེམས་མ་ཀུན་ཏུ་བཟང་མོའི་རྣམ་རོལ་གྱིས༔ ཐུགས་རྗེའི་མངའ་བདག་ལྷ་ཚོགས་མཆོད་པའིི་ཕྱིར༔ ཧཱུྃ་ཧྲཱིཿ མཆོད་འོས་ཕྱི་ནང་སྣོད་བཅུད་དངོས་པོའི་ཚོགས༔ དངོས་སུ་འབྱོར་དང་ཡིད་ཀྱིས་ལེགས་སྤྲུལ་པ༔ ཡེ་དག་མཉམ་པ་ཉིད་དུ་ཕྱམ་བརྡལ་ནས༔ མཁྱེན་བརྩེ་ནུས་ལྡན་འཕགས་མའི་ལྷ་ལ་འབུལ༔ ཧཱུྃ་ཧྲཱིཿ གཟུགས་ཀྱི་བྱེ་བྲག་བཟང་ངན་ཅི་མཆིས་པ༔ མཛེས་སྡུག་གཟུགས་ཀྱི་ལྷ་མོ་དཀར་མཛེས་འཛུམ༔ གྲངས་མེད་སྤྲུལ་པའི་ཕྱག་མཚན་མེ་ཏོག་ཚོགས༔ ཐུགས་རྗེའི་མངའ་བདག་འཕགས་མའི་སྤྱན་ལ་འབུལ༔ མཉེས་ནས་བདག་ཅག་མིག་ཤེས་འཁྲུལ་བའི་ཚོགས༔ གནས་དག་མེ་ལོང་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་པུཥྤེ་པྲ་ཏིཙྪ་པཱུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཧཱུྃ་ཧྲཱིཿ སྙན་དང་མི་སྙན་སྒྲ་ཡི་བྱེ་བྲག་ཀུན༔ སྙན་འཇེབས་དབྱངས་ལྡན་སྒྲ་ཡི་ལྷ་མོ་སྔོ༔ གྲངས་མེད་སྤྲུལ་པས་སྒྲ་སྙན་རྒྱུད་མང་སྦྲེངས༔ ཚད་མེད་མཁྱེན་ལྡན་འཕགས་མའི་སྙན་ལ་འབུལ༔ བདག་གཞན་སྒྲར་འཛིན་ལོག་ཞུགས་འཁྲུལ་བའི་སྐྱོན༔ གནས་དག་མཉམ་ཉིད་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་ཤཔྟ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཧཱུྃ་ཧྲཱིཿ ལྷན་སྐྱེས་སྦྱར་བྱུང་དྲིི་ཡི་བྱེ་བྲག་ཀུན༔ མཆོད་པའི་ལྷ་མོ་སེར་མོ་བདུག་སྤོས་མ༔ གྲངས་མེད་སྤྲུལ་པས་དྲི་ཞིམ་སྤྲིན་ལྟར་གཏིབས༔ བཏང་སྙོམས་མཐའ་བྲལ་དཔའ་མོའི་ཤངས་ལ་འབུལ༔ བཞེས་ནས་བདག་གཞན་ལོག་རྟོག་དྲིར་འཛིན་པ༔ གནས་དག་སོར་རྟོག་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་དྷུཔྤེ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཧཱུྃ་ཧྲཱིཿ མངར་རྩུབ་སྣ་ཚོགས་རོ་ཡི་བྱེ་བྲག་ཀུན༔ སྤྲུལ་པའི་ལྷ་མོ་དམར་གསལ་ཞལ་ཟས་ཐོགས༔ གྲངས་མེད་སྤྲུལ་པས་རོ་བརྒྱའི་བཟའ་བཏུང་རིགས༔ ཞེན་བྲལ་ཐུགས་བརྩེ་འཕགས་མའི་ལྗགས་ལ་འབུལ༔ རོ་འཛིན་ཡུལ་ལ་ཆགས་པའི་འཁྲུལ་སྣང་རིགས༔ གནས་དག་བྱ་གྲུབ་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་ནཻ་ཝི་དྱ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཧཱུྃ་ཧྲཱིཿ འཇམ་མཉེན་རྩུབ་རེག་རེག་བྱའི་བྱེ་བྲག་ཀུན༔ མཆོད་པའི་ལྷ་མོ་ལྗང་གསལ་ན་བཟའ་སྒྲོན༔ རྟོག་བྲལ་གསལ་སྟོང་འཕགས་མའི་སྐུ་ལུས་ལ༔ གྲངས་མེད་སྤྲུལ་པས་གསོལ་ཞིང་མཉེས་མཛད་ནས༔ བདག་གཞན་རེག་བྱར་ཞེན་པ་གནས་དག་ནས༔ སྟོང་ཉིད་གཞི་ཡི་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་སྤཪྴེ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ ཧཱུྃ་ཧྲཱིཿ དངོས་སུ་སྣང་དང་ཡིད་ལ་ཤར་བའི་ཆོས༔ བདེ་ཆེན་ཕྱག་རྒྱ་མཐིང་གསལ་གླེགས་བམ་བསྣམས༔ གྲངས་མེད་སྤྲུལ་པས་གར་གྱིས་བརྡ་ཆོས་སྟོན༔ འགྲོ་བའི་སྐྱབས་མཆོག་འཕགས་མའི་ཐུགས་ལ་འབུལ༔ མཉེས་ནས་བདག་གཞན་འཁྲུལ་བའི་གཟུང་འཛིན་སྒྲིབ༔ གནས་དག་ཆོས་དབྱིངས་ཡེ་ཤེས་མངོན་གྱུར་ཤོག༔ ཨོཾ་སརྦ་ཏ་ཐཱ་ག་ཏ་བཛྲ་དྷརྨ་དྷརྟུ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ༔ གཞན་ཡང་མཆོད་པའི་བྱེ་བྲག་འབུལ་བ་ནི༔ གསང་སྔགས་ནང་མཆོད་དཀར་དམར་ཐིག་ལེ་དང་༔ རྩ་ཁམས་རླུང་གི་རྟོག་པ་གནས་འགྱུར་ཕྱིར༔ སྨན་རཀ་གཏོར་གསུམ་སྦྱོར་སྒྲོལ་གསང་མཆོད་རྫས༔ ཡིད་ཀྱིས་དམིགས་ཤིང་སྙན་པའི་དབྱངས་ཀྱིས་འབུལ༔ ཧཱུྃ་ཧྲཱིཿ རང་བྱུང་གདོད་ནས་དག་པའི་ཀ་པཱ་ལར༔ འཁྲུལ་རྟོག་དབྱིངས་སྦྱངས་ཉོན་མོངས་བདུད་བཞིའི་རྩི༔ རྩ་བརྒྱད་ཡན་ལག་སྟོང་སྦྱར་ཨ་མྲྀ་ཏ༔ ཐུགས་རྗེས་སྐྱོང་མཛད་འཕགས་མའི་ཚོགས་ལ་འབུལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ ཧཱུྃ་ཧྲཱིཿ ཀུན་ཏུ་བཟང་པོ་འབྲལ་མེད་དབྱིངས་ཀྱི་ཡུམ༔ ཕྱི་གསལ་ལོངས་སྤྱོད་རྫོགས་སྐུ་རིགས་ལྔའི་གཙོ༔ ཐུགས་རྗེས་རྗེས་ཆགས་སྤྲུལ་སྐུ་རྗེ་བཙུན་མར༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྒྱལ་ཀུན་འདུས་ཞལ་པདྨ་སཾ་བྷ་ཝ༔ ཟབ་མོ་ལྟ་བའི་སྲོལ་འབྱེད་ནཱ་གརྫུ༔ བྱམས་བརྩེ་ཚད་མེད་ཙན་དྲ་གོ་མིའི་ཞབས༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ འཇིགས་བརྒྱད་མཐར་མཛད་ཉི་མ་སྦས་པ་དང་༔ དབུ་མའི་སྲོལ་འཛིན་ཀུན་མཁྱེན་སྒྲོལ་མགོན་རྗེ༔ ཤེས་རབ་གཞལ་དཀའ་ས་ཆེན་ཀུན་དགའ་བཟང་༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བརྒྱུད་པ་ཀུན་འདུས་ཀློང་ཆེན་རབ་འབྱམས་པ༔ མཁྱེན་བརྩེའི་འོད་ཟེར་གྲུབ་དབང་བླ་མ་དང་༔ སྔོན་སྦྱངས་ལས་སད་སྐལ་ལྡན་ལུང་རིག་གླིང་༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ པདྨའི་ཞལ་སློབ་ཇོ་མོ་མཚོ་རྒྱལ་ལས༔ སྙན་བརྒྱུད་ཐོབ་ནས་སྨོན་ལམ་དབང་བསྐུར་རྫོགས༔ སེལ་མེད་བརྒྱུད་པ་དཀྱིལ་འཁོར་འཁོར་ལོའི་ལྷར༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ རྫོགས་ཆེན་སྲུང་མ་མ་མོ་རལ་གཅིག་མ༔ དེ་ཡི་བཀའ་སྡོད་དཔལ་ལྡན་དུད་སོལ་མ༔ དཀར་ཕྱོགས་སྐྱོང་བའི་ཡུལ་གཞི་གཏེར་བདག་ལ༔ སྨན་མཆོད་འབུལ་ལོ་མཐུ་དབང་དངོས་གྲུབ་སྩོལ༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཁ་རཾ་ཁཱ་ཧི༔ བདུད་རྩི་སྨན་ལ་དངོས་གྲུབ་སྤྱི་ལྟར་ལེན༔ སརྦ་པཉྩ་ཀཱ་ཡ་ཝཀྐ་ཙིཏྟ་སིདྡྷི་ཧཱུྃ༔ རཀྟ་ཆགས་བྲལ་རྟོག་མེད་དབྱིངས་ཀྱི་རྫས༔ ཇི་བཞིན་འབུལ་བའི་དམིགས་འདོན་འདི་བཞིན་ནོ༔ ཧཱུྃ་ཧྲཱིཿ འཁོར་བར་བདག་ཏུ་ལྟ་བའི་ཆགས་པ་ཆེ༔ མཚོན་བྱེད་རྩི་བཅུད་རྒྱུ་རྐྱེན་སིནྡྷུ་ར༔ རྟོག་བྲལ་དབྱིངས་སུ་རོལ་མཛད་རྗེ་བཙུན་མ༔ རྩ་གསུམ་དཀྱིལ་འཁོར་ལྷ་ཚོགས་རྣམས་ལ་འབུལ༔ མ་ཧཱ་རཀྟ་ཁཱ་ཧི༔ གཏོར་མ་འདོད་ཡོན་མཆོད་པའི་ལྷ་མོ་ཡིས༔ སྲས་བཅས་རྒྱལ་ཡུམ་དགྱེས་པ་བསྐྱེད་ཕྱིར་འབུལ༔ ཧཱུྃ་ཧྲཱིཿ གདོད་ནས་གྲུབ་པ་རྡོ་རྗེ་ལུས་ཀྱི་སྣོད༔ རྩ་རླུང་ཀུན་རྫོབ་དོན་དམ་བྱང་ཆུབ་སེམས༔ དག་སྦྱངས་བསྒྱུར་མཚོན་རིན་ཆེན་སྣོད་ཡངས་པར༔ རྩི་སྨན་སྣ་ཚོགས་སྦྱར་བའི་གཏོར་མ་འདི༔ འཇིགས་པ་ཀུན་སྒྲོལ་འཕགས་མའི་ལྷ་ལ་འབུལ༔ མ་ཧཱ་བྷ་ལིང་ཏ་ཁཱ་ཧི༔ ཚོགས་དྲུག་དཔའ་བོ་དགྱེས་པ་བསྐྱེད་པའི་ཡུམ༔ ཡུལ་དྲུག་སྟོང་གསལ་བདེ་ཆེན་ཕྱག་རྒྱ་ཆེར༔ སྦྱར་བས་དངོས་འཛིན་འཁྲུལ་སྣང་དབྱིངས་དག་ནས༔ སྡུག་བསྔལ་རྟོག་པ་གཉིས་འཛིན་དགྲ་བགེགས་ཚོགས༔ རང་བྱུང་ཆོས་དབྱིངས་ཀློང་དུ་བསྒྲལ་ནས་ཀྱང་༔འཕགས་མའི་གསང་གསུམ་བདེན་པ་མངོན་གྱུར་ཤོག༔ མ་ཧཱ་མུ་ཏྲ་ཏ་ན་ག་ཎ་སརྦ་པཱུ་ཙ་ཧོ༔ དྲུག་པ་གསང་སྔགས་ཡོན་ཏན་རྗེས་དྲན་པས༔ སྙན་པའི་དབྱངས་ཀྱིས་བསྟོད་པ་བྱ་བ་ནི༔ ཨོཾ༔ བསྔགས་པར་འོས་པ་དུས་གསུམ་རྒྱལ་བའི་ཡུམ༔ གྲངས་མེད་བསྐལ་པར་བྱ་དཀའི་སྤྱོད་པ་ཡིས༔ གཞན་དོན་མཛད་པས་ཉོན་ཤེས་མཐའ་དག་སྤངས༔ ཤེས་བྱ་མ་ལུས་མཁྱེན་པའི་རྟོགས་པ་མཆོག༔ མངོན་གྱུར་འཕགས་མ་སྒྲོལ་མ་དཔའ་མོར་བསྟོད༔ མཚན་བཟང་སུམ་ཅུས་སྒེག་པའི་ལང་ཚོ་ལ༔ དཔེ་བྱད་བརྒྱད་ཅུའི་ཕྲ་ཞིབ་ཡིད་འཕྲོག་སྐུ༔ མརྒད་ལྗང་གུའི་མདོག་འཛིན་ལྷ་ཡི་གོས༔ དར་དཔྱངས་ཅོད་པཎ་རིན་ཆེན་རྒྱན་ཆས་བརྗིད༔ མཆོག་སྦྱིན་ཕྱག་རྒྱས་དབུལ་བའི་སྡུག་བསྔལ་སེལ༔ སྐྱབས་སྦྱིན་འཇིགས་པ་མཐའ་དག་ལས་སྐྱོབས་ཞེས༔ དབུགས་དབྱུང་མཛད་པའི་བརྡ་དོན་རྟ་བབས་ཀྱི༔ སྐྱིལ་ཀྲུང་སྲིད་ཞིའི་མཐའ་ལས་སྒྲོལ་ལ་བསྟོད༔ གསུང་དབྱངས་དྲུག་ཅུས་ཐེག་ཆེན་ཆོས་ཀྱི་སྒྲ༔ བདག་མེད་དབྱིངས་སུ་སྒྲོག་ལ་དཔའ་བའི་ཉམས༔ ལྷ་ཀླུ་མི་ཡི་རིག་འཛིན་རྒྱལ་བའི་སྲས༔ ཀུན་ཀྱང་ས་ལམ་དཔལ་ཡོན་རྫོགས་མཛད་པ༔ ཐོས་པས་སྲིད་པའི་སྡུག་བསྔལ་ལས་གྲོལ་ནས༔ ཞི་བར་ཞེན་པ་ཉན་རང་འགོག་པ་ལས༔ དབུགས་དབྱུང་མཛད་པ་མཆོག་གི་དབང་མོར་བསྟོད༔ ཤེས་རབ་ཆེན་པོས་སྲིད་པའི་མཐའ་ལས་གྲོལ༔ སྙིང་རྗེ་ཆེན་པོས་ཞི་ལ་མི་གནས་པར༔ དམིགས་པ་མེད་ཀྱང་རྟག་ཁྱབ་ལྷུན་གྲུབ་ཀྱི༔ ཐུགས་རྗེ་ཚད་མེད་ཤེས་བྱ་མ་ལུས་མཁྱེན༔ ནུས་པའི་སྟོབས་ཀྱིས་ལོག་འདྲེན་བདུད་སྡེའི་དཔུང་༔ འཇོམས་མཛད་དཔའ་མོ་ཞི་མ་མཆོག་ལ་བསྟོད༔ ཐུགས་ཀྱི་རིགས་ལས་བྱུང་བ་སྣང་མཐའ་ཡས༔ འབྲལ་མེད་བླ་མའི་ངོ་བོར་རྟག་བཞུགས་ཤིང་༔ གཏི་མུག་འཇོམས་མཛད་དབྱངས་ཅན་སྐུ་ཡི་ལྷ༔ ཡོན་ཏན་ཕྲིན་ལས་ཐུགས་ཀྱི་རིགས་མཆོག་གི༔ གཙོ་འཁོར་སྤྲུལ་པ་བསྐལ་བཟང་འདྲེན་པ་སྟོང་༔ རྩ་གསུམ་སྲུང་མ་རང་སྣང་རིག་པའི་ལྷ༔ གང་འདུལ་འགྲོ་བའི་མགོན་དུ་གྱུར་ལ་བསྟོད༔ བདུན་པ་བསྙེན་པའི་ལས་རིམ་བསྟན་པ་ནི༔ བསྙེན་དང་སྒྲུབ་པ་ལས་ལ་སྦྱོར་བ་འོ༔ བསྙེན་པ། བདག་གི་ཐུགས་ཀར་པད་ཟླའི་སྟེང་༔ བདག་ཉིད་འཕགས་མའི་ཐུགས་ཀར་ཞེས་མཆན་ འཕགས་མཆོག་ཐུགས་བརྩེའི་མངའ་བདག་དཀར་གསལ་འཛུམ༔ མཁའ་སྤྱོད་དབང་མོ་བཞེངས་སྟབས་ཕྱག་གཉིས་པ༔ མཆོག་སྦྱིན་གཡོན་པས་ཨུཏྤལ་ཐུགས་ཀར་འཛིན༔ དེ་ཡི་ཐུགས་ཀར་འདབ་དྲུག་ཏཱཾཿཡིག་མཚན༔ ཏཱཾ་གྱི་ཁོག་པར་ཧྲཱིཿཡིག་གསལ་ལ་འཚེར༔ དགོངས་པ་འདི་བཞིན་ཡིན་སྣང་མཆན། མཐའ་བསྐོར་སྔགས་ཕྲེང་འོད་ལྔའི་ཁ་དོག་ཅན༔ གཡོན་དུ་འཁོར་བའི་འོད་ཀྱིས་འཕགས་པ་མཆོད༔ འགྲོ་བའི་སྒྲིབ་སྦྱངས་སྣང་སྲིད་ལྷའི་དཀྱིལ་འཁོར༔ དག་པ་རབ་འབྱམས་ངང་ནས་རྩ་སྔགས་བསྙེན༔ ཨོཾ་མ་ཎི་པདྨེ་ཧཱུྃ་ཧྲཱིཿ ཞེས་དང་འཕགས་མའི་ཡང་སྙིང་འདི་ལྟར་རོ༔ ཨོཾ་ཨཱརྱ་ཏཱ་རེ་ཏུཏྟ་རེ་ཏུ་རེ་སྭཱ་ཧཱ༔ གོང་བསྙེན་འབུམ་ཕྲག་སྔོན་སོང་ནས༔ ཡང་སྙིང་འབྲུ་འབུམ་གྲངས་ཀྱི་བསྙེན༔ དུས་བསྙེན་བདུན་ཕྲག་ཉི་ཤུ་གཅིག༔ མཚན་མའི་བསྙེན་པ་རྟགས་མཐོང་ངོ་༔ རྟགས་ནི་བུད་མེད་གཞོན་མཛེས་གཟུགས༔ ཟས་བྱིན་དགྱེས་ཚུལ་རྨི་ལམ་ལ༔ ཐ་མ་ཡིན་ཏེ་ཉམས་སྣང་དུ༔ འཕགས་མའི་ཡོན་ཏན་རྗེས་དྲན་པ༔ ཆོས་འདིར་ངེས་འདྲོང་དབང་པོ་འབྲིང་༔ རབ་རྣམས་བརྗོད་མེད་དབྱིངས་ཀྱི་དོན༔ ཤེས་རབ་ཕར་ཕྱིན་སྟོང་ཉིད་ཡུམ༔ འཕགས་མ་དངོས་མཐོང་རྗེས་འཛིན་ཅིང་༔ ལུང་སྟོན་བྱིན་རླབས་ཚོགས་ཆེན་དབང་བསྐུར་རྫོགས༔ དད་ཅན་གདམས་པ་འདིར་བརྩོན་ན༔ བསླུ་མེད་འཕགས་མའི་ཞལ་བཞེས་པའི༔ ཐ་ཚིག་ཡིན་ནོ་ས་མ་ཡཱ༔ བསྒྲུབ་པ་ལ་རང་ཉིད་ཅེས་མཆན། རྗེ་བཙུན་འཕགས་མའི་ཐུགས་ཀ་རུ༔ སྒྲོལ་མ་ལྗང་གུ་རང་འདྲ་དེའི་ཐུགས་ཀར༔ ཨུཏྤལ་སྔོན་པོ་འདབ་མ་བཅུ་དྲུག་པའི༔ ལྟེ་བར་ཟླ་སྟེང་ཏཱཾཿཡིག་དེའི་ཕྱི་རོལ༔ སྔགས་ཕྲེང་མུ་ཏིག་ལྗང་མཛེས་བསྟར་འདྲ་བ༔ རྩེ་གཅིིིིིག་ཡིད་ངོར་བསྒོམས་ཏེ་བཟླས་པ་བྱ༔ ཨོཾ་ཨཱརྱ་ཏཱ་རེ་ཏུཏྟཱ་རེ་ཏུ་རེ་དཱ་ན་ཏྲ་ཡ་སྭཱ་ཧཱ༔ བཅུ་དྲུག་སྔགས་འབྲུ་འཁོར་བའི་འོད་ཟེར་གྱིས༔ བདག་གཞན་སྒོ་གསུམ་སྒྲིབ་སྦྱངས་ཚོགས་ཆེན་རྫོགས༔ རྒྱལ་ཡུམ་དཔའ་མོའི་གསང་གསུམ་མངོན་གྱུར་བསམ༔ དེ་ཡང་འབྲུ་འབུམ་གཙོ་མོ་འཁོར་རྣམས་ལ༔ ཁྲི་ཕྲག་རེ་རེ༔ དཱ་ན་ཏྲ་ཡ་བསྒྱུར༔ པྲཛྙཱ་ཧྲཱིཾ་ཧྲཱིཾ་མ་རི་ཙྱཻ་ཞེས་དང་༔ ཀུ་རུ་ཀུལླེ་བཱ་སུ་དྷ་རི་བརྗོད༔ འཁོར་གཞན་རྣམས་ལ་རང་མཚན་སྔགས་དང་སྦྱར༔ དེ་ཚུལ་གབ་ཐིག་ལས་ནི་བྱུང་བཞིན་ནོ༔ ལས་སྦྱོར་ཞི་བ་གཙོ་དང་དེ་བཞིན་དུ༔ གཞན་གསུམ་ལ་ཡང་དམིགས་པའི་ཁ་བསྒྱུར་ནི༔ གཙོ་མོའི་ཐུགས་ནས་འོད་ཟེར་འཕྲོས་པ་ཡིས༔ དབྱངས་ཅན་ལྷ་མོའི་ཐུགས་ཀར་ཕོག་པ་ལས༔ འོད་ཟེར་དཀར་པོ་ཟླ་བ་ཞུན་མ་ལྟར༔ འཕྲོས་པས་འགྲོ་དྲུག་སྒྲིབ་པ་མ་ལུས་དང་༔ ཁྱད་པར་གཏི་མུག་རྨོངས་པའི་གཞན་དབང་གིས༔ ཤེས་བྱར་རྨོངས་པའི་སྡིག་ཀུན་བྱང་བར་མོས༔ ཨོཾ་ཨཱརྱ་ཏཱ་རེ་ཏུཏྟཱ་རེ་ཏུ་རེ་པྲ་ཛྙཱ་ཧྲཱིཾ་ཧྲཱིཾ་ཤིནྟཾ་ཀུ་རུ་ཡེ་སྭཱ་ཧཱ༔ གཙོ་མོའི་ཐུགས་ནས་གསེར་མདོག་འོད་འཕྲོས་པས༔ འོད་ཟེར་ཅན་མའི་ཐུགས་ཀར་ཕོག་པ་ལས༔ བཙོ་མའི་མདངས་ཕྲོག་འོད་ཟེར་སྣ་ཚོགས་འཕྲོས༔ བདག་གཞན་ཚེ་བསོད་དཔལ་རྒྱས་ཁྱད་པར་དུ༔ ལྟ་བ་ངན་པས་བསླུས་པ་ལས་གྲོལ་ནས༔ ཆོམ་རྐུན་མཐའ་དག་ཉི་ཟླའི་ཞགས་པ་ཡིས༔ བཅིངས་ཤིང་མིག་སྒྲིབ་དཔལ་འབྱོར་རང་ལ་བསྡུས༔ ཞེས་བསམ་རྩ་སྔགས་དེ་མཐར་མ་རི་ཙྱཻ༔ པུཥྚིཾ་ཀུ་རུ་དེ་བཞིན་དབང་གི་ལྷར༔ འོད་ཟེར་གཙོ་མོ་ལས་འཕྲོས་ཕོག་པའི་མོད༔ རིག་བྱེད་ལྷ་མོས་བརྟན་གཡོའི་དངོས་པོ་དང་༔ མཁས་བཙུན་གྲྭ་སློབ་རྒྱལ་བློན་བཙུན་མོ་དམངས༔ ཕལ་པ་གང་དམིགས་འོད་དམར་ཕྲེང་བ་ཡིས༔ དབང་དུ་བསྡུས་ཤིང་བདག་ལ་འདུད་པར་དམིགས༔ རྩ་སྔགས་ཀུ་རུ་ཀུལླེ་དེ་བཞིན་དུ༔ པཱ་ཤཾ་ཀུ་རུ་དྲག་པོས་དབུལ་འདྲེ་རྣམས༔ ཚར་གཅོད་ནོར་སྒྲུབ་དམིགས་པ་འདི་ལྟར་རོ༔ འཕགས་མའི་ཐུགས་ལས་འོད་ལྗང་ནོར་རྒྱུན་མར༔ ཕོག་པས་དེ་ཡི་ཐུགས་ལས་འོད་ཟེར་ནི༔ དབང་སྔོན་ཞགས་པའི་རྗེས་འགྲོའི་དབུལ་འདྲེའི་ཚོགས༔ མཐར་བསྐྲད་ལྷ་ཀླུ་མི་ཡི་ནོར་བཅུད་བསྡུས༔ བདག་ལ་ཐིམ་པས་མངའ་ཐང་འབྱོར་པ་རྒྱས༔ བསོད་ནམས་ལས་ལ་འདུན་པས་དོན་གཉིས་པོ༔ མྱུར་དུ་འགྲུབ་བསམ་རྩ་སྔགས་ཤམ་བུ་རུ༔ བཱ་སུ་དྷཱ་རི་མ་ར་ཡ་ཕཊ་བསྙེན་༔ དངོས་གཞིའི་ལས་རིམ་བདུན་གྱིས་ལེགས་ཚོགས་འགྲུབ༔ ས་མ་ཡཱ༔ རྗེས་རིམ་བདུན་ལས་དང་པོ་ཚོགས་བསགས་རྫས༔ རིན་ཆེན་སྣོད་དུ་དཀར་དམར་ཕྱི་ཡི་རྫས༔ ཤ་ཆང་སྒོག་རིགས་སྣ་ཚོགས་ནང་གི་རྫས༔ བྱང་སེམས་རྣམ་གཉིས་དྲི་ལྡན་གསང་བའི་རྫས༔ གང་ཟག་དབང་པོའི་རིམ་པས་བསགས་པའམ༔ ཡང་ན་ཕྱི་ནང་རྫས་བསགས་རོལ་མོ་དཀྲོལ༔ སྔགས་ཀྱིས་བྱིན་བརླབས་ཆུ་གཙང་ནང་མཆོད་བྲན༔ ཨོཾ་ཨཱཿཧཱུྃ༔སྭཱ་ཧཱ༔ ཧཱུྃ་ཧྲཱིཿ སྣང་སྲིད་འདོད་ཡོན་ལོངས་སྤྱོད་ཚོགས་ཀྱི་རྫས༔ མ་ཚང་མེད་པ་ལྷ་སྔགས་ཏིང་འཛིན་མཐུས༔ བྱིན་གྱིས་བརླབ་ཕྱིར་རང་ཉིད་འཕགས་མ་ཡི༔ ཐུགས་ལས་འཕྲོས་པའི་རིགས་ལྔའི་ས་བོན་ནི༔ ཁ་དོག་ལྔ་ལྡན་ཚོགས་ཀྱི་ཡོ་བྱད་ལ༔ ཕོག་པས་དཀྱིལ་འཁོར་ལྷ་ཚོགས་ཐམས་ཅད་ཀྱི༔ དབང་པོ་དྲུག་ལ་ཞེན་པ་མི་མངའ་ཡང་༔ ཟག་མེད་བདེ་སྟོང་བསྐྱེད་ནུས་ལྡན་པར་གྱུར༔ ཨོཾ་ཨཱཿཧཱུྃ་སྭཱ་ཧཱ༔ སརྦ་པཱུ་ཛ་མེ་གྷ་སྥ་ར་ཎ་ས་མ་ཡེ་སྭཱ་ཧཱ༔ གཉིས་པ་ཚོགས་ཀྱི་ཡོ་བྱད་འབུལ་བ་ལ༔ མཆོད་བཤགས་བསྒྲལ་གསུམ་དང་པོ་རྫས་ཀྱི་མཆོག༔ སློབ་བུས་བཏེགས་ཏེ་སྨན་ཕུད་དང་བཅས་ཏེ༔ ཧཱུྃ་ཧྲཱིཿ དུས་གསུམ་རྒྱལ་ཀུན་འཕགས་མའི་ལྷ་ཚོགས་ལ༔ ཕྱི་ནང་གསང་བའི་རྫས་མཆོག་མ་ལུས་པ༔ ཟག་མེད་བདུད་རྩིར་བསྒྱུར་ནས་འབུལ་ལགས་ན༔ བརྩེ་ཆེན་ཐུགས་ཀྱིས་ཉེ་བར་བཞེས་སུ་གསོལ༔ སྣང་སྲིད་སྣོད་བཅུད་དབྱིངས་གཅིག་རོལ་པ་ལ༔ བཟང་ངན་གཉིས་འཛིན་བླང་དོར་བྲལ་བའི་ཐུགས༔ རྗེ་བཙུན་འཕགས་མ་བྱམས་བརྩེའི་སྟོབས་མངའ་བས༔ བཞེས་ཤིང་བདག་ལ་བྱིན་གྱིས་བརླབ་ཏུ་གསོལ༔ གུ་རུ་དྷེ་ཝ་ཌཀྐཱི་ཨཱརྱ་ཏཱ་རེ་གྷ་ན་ཙཀྲ་པཱུ་ཛ་ཁཱ་ཧི༔ བཤགས་པ་བྱ་ཞིང་ཕྱིན་ཆད་སྡོམ་སེམས་བློས༔ ཚོགས་རྫས་བར་བ་མཆོད་པ་འདི་སྐད་དོ༔ ཧཱུྃ་ཧྲཱིཿ ངོ་མཚར་རྨད་བྱུང་ཆོས་དབྱིངས་རིག་པའི་གཤིས༔ ཡེ་ནས་ཀ་དག་བརྗོད་བྲལ་རྒྱལ་བའི་ཁམས༔ གློ་བུར་འཁྲུལ་བས་བསླད་ནས་ད་ལྟའི་བར༔ རིགས་དྲུག་གནས་སུ་འཁྱམས་ཤིང་སྐྱེ་ཤིར་བརྒྱུད༔ ཁྱད་པར་བདག་ཅག་ཉོན་མོངས་ལས་ཀྱི་མཐུས༔ སོ་ཐར་བྱང་སེམས་རིག་འཛིན་སྡོམ་པ་རྣམས༔ མི་ཤེས་མ་གུས་བག་མེད་ཉོན་མོངས་མང་༔ ཉམས་དང་འགལ་དང་འདས་དང་རལ་བ་སོགས༔ མནར་མེད་དམྱལ་བ་ཆེན་པོའི་རྒྱུ་བསགས་པ༔ ཐམས་ཅད་མ་ལུས་སྙིང་ནས་བཤགས་པར་བགྱི༔ ཐུགས་རྗེ་ཆེ་ལྡན་འཕགས་མའི་ལྷ་ཚོགས་ཀྱིས༔ བྱང་ཞིང་དག་ནས་ཚངས་པར་མཛད་པ་དང་༔ གཞན་ཡང་སྡོམ་པ་གསུམ་ལ་ཞུགས་སོ་ཅོག༔ ཉམས་ཆག་ཉེས་པས་མནར་བ་ཅི་མཆིས་པ༔ ཐམས་ཅད་མ་ལུས་བདག་གིས་བཤགས་བགྱིས་ན༔ ཚངས་པ་མཆོག་གི་དབུགས་དབྱུང་མཛད་དུ་གསོལ༔ ཅེས་དང་བཤགས་ཚིག་གཞན་ཅི་རིགས་དང་༔ ཡི་གེ་བརྒྱ་པ་ཅི་ནུས་བཟླ་བར་བྱ༔ ཚོགས་རྫས་ཐ་མ་དགྲ་བགེགས་འགུགས་ཤིང་བསྟིམས༔ མཚོན་གྱིས་གཏུབ་ཚུལ་ངག་ནས་འདི་བཞིན་བརྗོད༔ ཧཱུྃ་ཧྲཱིཿ ཀུན་བརྟགས་འཁྲུལ་བར་སྣང་བའི་དགྲ་དང་བགེགས༔ གཞན་དབང་ལས་ཉོན་འཁྲུལ་བས་དང་དུ་བླངས༔ སྡང་ཞེན་བག་ཆགས་ངན་སོང་ཞིང་བཅུའི་རིགས༔ ཡོངས་གྲུབ་འཕགས་པའི་ལྷ་ཚོགས་ཐུགས་རྗེས་བསྒྲལ༔ ཤ་ཁྲག་དྭངས་མ་བདུད་རྩིའིི་རང་བཞིན་ལ༔ དགྱེས་རོལ་རྣམ་ཤེས་གདོད་མའི་གཤིས་སུ་བསྟིམས༔ སརྦ་ཤ་ཏྲུཾ་མ་ ར་ཡ་ཕཊ༔ ཅེས་བརྗོད་བདག་ཕུར་འབེན ་གསུམ་སྐྱེ་མེད་དོན༔ རྟོགས་པས་བདག་སྒྲོལ་ཐུགས་རྗེས་གཞན་སྒྲོལ་བ༔ ཡང་དག་གསང་བ་དོན་གྱི་མན་ངག་གོ༔ དེ་ནས་རྣལ་འབྱོར་ཚོགས་ལ་རོལ་བ་ནི༔ སློབ་བུས་ཐབས་ཤེས་བཟའ་བཏུང་བསྣོལ་ཏེ་བཟུང༔ རྡོ་རྗེ་སློབ་དཔོན་འདུས་པའི་ཚོགས་རྣམས་ལ༔ ཚིག་འདིས་འབུལ་ཞིང་བརྡ་དོན་རྟོགས་པར་བྱ༔ ཧོ༔ སྐྱེ་མེད་སྣོད་དུ་འགགས་མེད་ཚོགས་ཀྱི་རྫས༔ ཐབས་ཤེས་རྫས་མཆོག་དབང་བཞིའི་བརྡ་དང་དོན༔ སྣང་སྟོང་གསལ་སྟོང་བདེ་སྟོང་རིག་སྟོང་ངང༔ ཆགས་པར་སྣང་ཡང་དེ་ཉིད་ངོ་བོས་དབེན༔ སྟོང་པར་སྣང་ཡང་ཡུལ་དྲུག་རྟེན་འབྲེལ་མཐུ༔ གཉིས་ཀ་མ་ཡིན་སྨྲ་བསམ་བརྗོད་ལས་འདས༔ དེ་དོན་རྟོགས་ཕྱིར་རྣལ་འབྱོར་དཔའ་བོའི་མཆོག༔ དགྱེས་བཞིན་རོལ་བས་ལམ་གྱི་ཚོགས་རྫོགས་ཤོག༔ ཅེས་དང་བླ་མས་དུས་གསུམ་ཡེ་གྲོལ་བརྡར༔ པད་སྐོར་རྩེ་གསུམ་ཕྱག་རྒྱ་དང་བཅས་པས༔ བླངས་ཤིང་མཉམ་ཉིད་རྟོགས་པའི་གདེང་ལྡན་བཞིན༔ ཧོ༔ ངོ་མཚར་ཆེན་པོ་གསང་ཆེན་དཀྱིལ་འཁོར་འདིར༔ ཟས་གོས་གནས་མལ་འཚོ་བའི་ཡོ་བྱད་རྣམས༔ སྐྱེ་བ་མེད་ལས་སྣང་འདི་སུ་ཡིས་དགག༔ གནས་པ་མེད་ཀྱང་བརྟགས་ན་རིག་པའི་རྩལ༔ བླང་དོར་གཉིས་ཀས་འཁྲུལ་གྲོལ་མཐའ་རུ་ལྷུང་༔ དེ་ཕྱིར་བཟང་ངན་བླང་དོར་བྲལ་བའི་བློས༔ མཉམ་པ་ཆེན་པོའི་ངང་དུ་རོལ་བར་བྱ༔ ཞེས་བརྗོད་གསུམ་པ་ལྷག་མ་བསྔོ་བ་ནི༔ ཁ་ཕྲུ་གདབ་ཅིང་ལྷག་མགྲོན་ཕེཾ་གྱིས་བཀུག༔ བདུད་རྩིར་འབྲུ་གསུམ་སྔགས་ཀྱིས་བརླབས་ཤིང་འབུལ༔ ཧཱུྃ་ཧྲཱིཿ ཚོགས་ཀྱི་ལྷག་མ་སྡུད་པའི་ཕྲ་མེན་མ༔ དཀར་སེར་དམར་ལྗང་ཤུགས་འགྲོ་མཁའ་ལ་སྤྱོད༔ རྣལ་འབྱོར་བསྲུང་ཞིང་སྒྲུབ་པོའི་བར་ཆད་སོལ༔ ཅི་བཅོལ་ལས་སྒྲུབ་འཕགས་མའི་བཀའ་འཁོར་སྐྱོང་༔ འདིར་གཤེགས་ཞལ་ཟས་ཚོགས་ཀྱི་ལྷག་མ་ལོངས༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་ཨུཥྩི་ཊ་བྷ་ལིང་ཏ་ཁཱ་ཧི༔ བཞི་པ་ཆད་མདོའི་ཐ་ཚིག་བསྒྲགས་པ་ནི༔ ཧཱུྃ་ཧྲཱིཿ སྔོན་ཚེ་འདས་དུས་བསྐལ་པའི་ཐོག་མ་ལ༔ རིགས་ལྔའི་སངས་རྒྱས་བྱང་སེམས་ཉན་རང་དང་༔ ལྷ་དང་དྲང་སྲོང་རིག་འཛིན་སྤྲུལ་པའི་འཁོར༔ དཔག་མེད་འགྲོ་བའི་དོན་ལ་བྱོན་པའི་ཚེ༔ དེ་དག་ཀུན་གྱི་འགྲོ་རྣམས་སྲིད་མཚོ་ལས༔ སྒྲོལ་ཕྱིར་ཕྲིན་ལས་ལྷ་མོ་མྱུར་དཔའ་མོས༔ དམ་བཅའ་ཞལ་བཞེས་ཇི་ལྟར་མཛད་པ་བཞིན༔ ཉོན་མོངས་སེམས་ཅན་དབྱིངས་སུ་གྲོལ་བར་མཛོད༔ དེ་འོག་བར་གྱི་བསྐལ་པ་བར་མ་ལ༔ དེ་བཞིན་གཤེགས་པ་རྔ་སྒྲའི་བསྟན་པ་ལ༔ རྒྱལ་པོའི་བུ་མོ་ཛྙཱ་ན་ཙནྡྲར་གྱུར༔ བྱང་ཆུབ་མཆོག་ཏུ་ཐུགས་བསྐྱེད་དམ་བཅས་ནས༔ བུད་མེད་གཟུགས་ཀྱིས་རྟག་པར་མཐའ་ཡས་འགྲོ༔ འཇིགས་བརྒྱད་སྐྱོབ་ཅིང་མཐར་ཐུག་འཁོར་བ་ལས༔ སྒྲོལ་བའི་དམ་བཅའ་མཐའ་རུ་མ་ཕྱིན་བར༔ རྣམ་མཁྱེན་གོ་འཕང་མངོན་དུ་མི་བྱ་ཞིང་༔ ཐུགས་བསྐྱེད་མཛད་ཚེ་ཚངས་པ་ལྷ་ཀླུ་དང་༔ མི་འམ་ཅི་དང་གནོད་སྦྱིན་དབང་པོ་ཡིས༔ མ་འོངས་འགྲོ་རྣམས་འཕགས་མའི་མཚན་ཙམ་ཞིག༔ འཛིན་པའི་སེམས་ཅན་བསྲུང་ཞིང་བསྐྱབ་བོ་ཞེས༔ ཇི་ལྟར་དམ་བཅའ་མཛད་པ་དེ་བཞིན་དུ༔ དམ་རྫས་བརྒྱན་པའི་མཆོད་གཏོར་འདི་བཞེས་ལ༔ ཆོས་མཛད་སྤྱི་དང་འཕགས་མ་ལྷག་པའི་ལྷ༔ བརྟེན་པའི་རྣལ་འབྱོར་ཉེར་འཚེ་མ་ལུས་ལས༔ བསྲུང་སྐྱོབ་ས་ལམ་མཐའ་རུ་ཕྱིན་བར་དུ༔ མ་ཡིས་བུ་བཞིན་བྱམས་བརྩེས་སྐྱོང་བར་མཛོད༔ དེ་འོག་རྩོད་ལྡན་ཚེ་ལོ་བརྒྱ་པའི་དུས༔ བདེ་གཤེགས་དོན་ཀུན་གྲུབ་པ་ཤཱཀྱའི་ཏོག༔ མངོན་པར་སངས་རྒྱས་ཕོ་བྲང་པོ་ཊ་ལར༔ སྤྱན་གཟིགས་ལ་སོགས་ཉེ་བའི་སྲས་བརྒྱད་དང་༔ ཉན་ཐོས་རང་རྒྱལ་སྤྲུལ་པའི་འཁོར་རྣམས་དང་༔ སྤྲུལ་པའི་དྲང་སྲོང་རིག་འཛིན་ཚོགས་རྣམས་ལ༔ སྒྲོལ་མ་མངོན་འབྱུང་ལ་སོགས་འཕགས་མའི་རྒྱུད༔ གསུངས་ནས་སྤྲུལ་བསྒྱུར་བདུད་སྡེ་བཏུལ་བའི་ཚེ༔ ལྷ་ཀླུའི་དབང་པོ་ཕྱི་ནང་སྲུང་མའི་ཚོགས༔ ཆོས་མཛད་ཡོངས་ཀྱི་བར་ཆད་བསལ་བ་དང་༔ ལེགས་ཚོགས་འདོད་དགུ་སྒྲུབ་པར་མཛད་དོ་ཞེས༔ ཇི་ལྟར་ཞལ་བཞེས་དམ་བཅའ་མཛད་པ་བཞིན༔ མཆོད་གཏོར་བཞེས་ལ་ཕྱི་ནང་བར་ཆད་སོལ༔ དེ་རྗེས་བོད་ཡུལ་གངས་ཅན་ཆོས་རྒྱལ་རྗེ༔ ཚངས་པའི་མེ་ཏོག་སྔོན་ལས་འཕྲོ་སད་ནས༔ ཐུབ་དབང་ཞལ་སྐྱིན་པདྨ་སཾ་བྷ་ཝ༔ བོད་ཡུལ་མུན་པའི་སྨག་ཏུ་སྤྱན་དྲངས་ཚེ༔ རྗེ་འབངས་སྤྱི་དང་ཇོ་མོ་མཁར་ཆེན་བཟར༔ ཟབ་ཆོས་གདམས་པ་མ་ལུས་ཐམས་ཅད་དང་༔ ཁྱད་པར་སྒྲོལ་མ་ཕྱི་ནང་གསང་གསུམ་གྱི༔ གདམས་པ་དཔག་ཏུ་མེད་པས་སྨིན་མཛད་ཚེ༔ དངོས་དང་ཐུགས་གཏེར་སྨོན་ལམ་ཟབ་མོའི་མཐུས༔ མ་འོངས་མཚོ་རྒྱལ་སྤྲུལ་པ་ཉེར་གཅིག་གིས༔ གཏེར་ཆོས་སྤེལ་ཞིང་འགྲོ་དོན་དཔག་མེད་མཛད༔ དེ་ཚེ་འགྲོ་བ་མཆོག་དམན་གྲངས་མེད་པས༔ དད་གུས་བསྙེན་ལ་བར་ཆད་བསྲུང་ངོ་ཞེས༔ སྲུང་མ་སྤྱི་དང་བྱེ་བྲག་དབྱངས་ཅན་ལྷ༔ དྲག་མོར་སྤྲུལ་པ་དཔལ་ལྡན་དུད་སོལ་མས༔ ཇི་ལྟར་ཞལ་བཞེས་དམ་བཅའ་མ་གཡེལ་བར༔ ཕྱི་ནང་རྐྱེན་སོལ་ལེགས་དགུའི་དཔལ་འཕེལ་མཛོད༔ དེ་འོག་ཆེར་སྙིགས་མུན་བསྐལ་ནད་མཚོན་དང་༔ མུ་གེས་གདུང་བས་འགྲོ་རྣམས་ཉམ་ཐག་ཚེ༔ རང་སྣང་དག་པ་དཔལ་རི་པདྨ་འོད༔ ཁྱད་པར་གཡུ་ལོ་བཀོད་པའི་གནས་མཆོག་ཏུ༔ ཨོ་རྒྱན་རྗེ་དང་དཔའ་མོ་སྒྲོལ་མ་ཡུམ༔ ཉམས་ཀྱི་སྣང་བ་དངོས་སུ་ཞལ་མཇལ་ཞིིང་༔ འཕགས་མའི་སྤྲུལ་པ་མཁའ་འགྲོ་མཚོ་རྒྱལ་མས༔ བརྡ་སྟོན་ལུང་བསྟན་རྗེས་གནང་བྱིན་རླབས་མཐུ༔ ཐོབ་བཞིན་ལུང་རིག་གླིང་པ་འགྲོ་འདུལ་རྩལ༔ ཐོགས་མེད་སྤོབས་པས་ཟབ་ཆོས་སྤེལ་བ་དང་༔ སྐལ་ལྡན་ཐར་པའི་ལམ་དུ་འགོད་པ་ལ༔ ཕྱི་ནང་གསང་བའི་རྐྱེན་རྣམས་བཟློག་པ་དང་༔ ཉམས་རྟོགས་དགེ་བའི་ཡོན་ཏན་སྤེལ་བའི་གྲོགས༔ སྲུང་མ་སྤྱི་དང་ཡང་དགོས་དུད་སོལ་མས༔ སྔོན་ཚེ་ཞལ་བཞེས་ཇི་ལྟར་ཡོད་པ་དང་༔ ད་ལྟ་སློབ་དཔོན་ཆེན་པོས་བཀའ་བསྒོས་བཞིན༔ མཆོད་གཏོར་བཞེས་ལ་ཕྲིན་ལས་རྣམ་བཞི་སྒྲུབས༔ ཨ་ཡ་མ་དུ་རུ་ཙ་ཤ་ན་རེ་མ་ཏི་མ་ཧཱ་བྷ་ལིང་ཏ་ཁཱ་ཧི༔ ལྔ་པ་བསྟན་མ་སྐྱོང་ཞིང་ཕྲིན་ལས་བཅོལ༔ རོལ་མོ་བརྡུང་ཞིང་སྙན་པའི་དབྱངས་ཀྱིས་བརྗོད༔ ཧཱུྃ་ཧྲཱིཿ དུས་སྦྱོར་བཅུ་གཉིས་རླུང་གི་འཇུག་པ་ཀུན༔ སྒྲ་གཅན་དབྱིངས་སུ་ནུབ་པའི་རྟེན་འབྲེལ་གཟུགས༔ བསྟན་སྐྱོང་དབང་མོ་གནོད་སྦྱིིན་བདུད་དང་སྨན༔ དཀར་སེར་དམར་ལྗང་ཞོན་པ་ཕྱག་མཚན་སོགས༔ མ་ངེས་སྤྲུལ་བསྒྱུར་སྣ་ཚོགས་ཅིར་ཡང་སྟོན༔ འཁོར་བཅས་དར་གོས་སིལ་སྙན་གླུ་དང་བཅས༔ འདིར་སྤྱོན་རྟག་ཆད་ལྟ་བ་དབུ་མར་ཟློག༔ བདེན་དོན་བཅུ་གཉིས་མྱང་འདས་མངོན་གྱུར་མཛོད༔ མ་མ་ཧྲིང་ཧྲིང་བ་ལིང་ཏ་ཁཱ་ཧི༔ དྲུག་པ་བསྡུ་རིམ་ལའང་རྣམ་བཞི་སྟེ༔ མཆོད་བསྟོད་བཤགས་པ་དམ་ཚིག་ཡེ་ཤེས་པ༔ རྟེན་ལ་བསྟིམས་སམ་གཤེགས་གསོལ་བྱ་བ་འོ༔ དང་པོ་མཆོད་པ་ཉེར་སྤྱོད་སྨན་རཀ་སོགས༔ བྱིན་བརླབས་བྱས་ནས་ཚིག་འདིས་འབུལ་བར་བྱ༔ ཧཱུྃ་ཧྲཱིཿ ཕྱི་ནང་སྣོད་བཅུད་མཆོད་པའི་ཡོ་བྱད་རྫས༔ མེ་ཏོག་བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་གཟུགས་སྒྲ་དྲི་རོ་རེག༔ རྩ་བརྒྱད་སྟོང་སྦྱར་འཆི་མེད་བདུད་རྩི་སྨན༔ ཉོན་མོངས་ཆགས་བྲལ་རཀྟ་དམར་གྱི་རྫས༔ དམ་རྫས་གཏོར་མ་གསང་བའི་ལོངས་སྤྱོད་བཅས༔ མཁྱེན་བརྩེ་ནུས་ལྡན་འཕགས་མའི་ལྷ་ལ་འབུལ༔ བཞེས་ནས་བདག་སོགས་ཐུགས་རྗེས་བསྐྱབ་ཏུ་གསོལ༔ ཨོཾ་བཛྲ་ཨརྒྷཾ༴སོགས་ཤཔྟ་ཨ་མྲྀ་ཏ་རཀྟ་བྷ་ལིང་ཏ་མ་ཧཱ་སརྦ་པཱུ་ཛ་སྥ་ར་ཎ་ས་མ་ཡེ་ཨཱཿཧཱུྃ༔ བསྟོད་པ་བྱ་བ་ལུས་ངག་དངས་བའི་བློས༔ ཧཱུྃ་ཧྲཱིཿ སྔོན་ཚེ་དམ་བཅའ་ཐུགས་བསྐྱེད་སྨོན་ལམ་དང་༔ རླབས་ཆེན་སྤྱོད་པས་འགྲོ་རྣམས་སྲིད་མཚོ་ལས༔ སྒྲོལ་མཛད་རྗེ་བཙུན་འཕགས་མ་ཐུགས་རྗེའི་བདག༔ དབྱངས་ཅན་ལྷ་མོས་གཏི་མུག་མུན་པ་སེལ༔ འོད་ཟེར་ཅན་མས་དགྲ་རྐུན་འཇིགས་ལས་སྐྱོབ༔ རིག་བྱེད་ལྷ་མོས་སྣང་སྲིད་དབང་དུ་སྡུད༔ ནོར་གྱི་བདག་མོས་ལོངས་སྤྱོད་དཔལ་འབྱོར་སྤེལ༔ གཞན་ཡང་དཔའ་མོའི་སྤྲུལ་པ་ཉི་ཤུ་གཅིག༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ ཅེས་དང་ནོངས་པ་བཤགས་པ་རང་གཞན་གྱི༔ སྡིག་པ་སྟོབས་བཞིས་བཤགས་ཕྱིར་ཡི་གེ་བརྒྱ༔ ཉེར་གཅིག་བདུན་ནམ་གསུམ་སོགས་སྐབས་བསྟུན་ལ༔ རྗེ་བཙུན་འཕགས་མ་ཐུགས་རྗེའི་མངའ་བདག་ཉིད༔ བརྩེ་ཆེན་ཐུགས་རྗེས་བདག་ལ་དགོངས་སུ་གསོལ༔ བདག་ནི་ཚེ་རབས་འཁོར་བ་ཐོག་མེད་ནས༔ རང་ངོ་མ་ཤེས་སྲིད་གསུམ་འཁོར་བར་འཁྱམས༔ ལས་ཉོན་བག་ཆགས་ཞགས་པས་བཅིངས་པ་ཡིས༔ དགེ་བཅུ་སྤངས་ཤིང་སྡོམ་པ་གསུམ་དང་འགལ༔ ཐམས་ཅད་མ་ལུས་འཕགས་མའི་སྤྱན་སྔ་རུ༔ སྙིང་ནས་བཤགས་ཤིང་མི་བགྱིད་དམ་བཅའ་བཟུང་༔ དག་ཚངས་ཆེན་པོའི་དངོས་གྲུབ་བསྩལ་དུ་གསོལ༔ ཅེས་བརྗོད་དེ་རྗེས་དངོས་གྲུབ་ལེན་པ་ནི༔ ཨོཾ་མཚན་དཔེ་ཡོངས་རྫོགས་རྗེ་བཙུན་འཕགས་མའི་སྐུ༔ མི་འགྱུར་མི་ཤིགས་གཞོམ་བྲལ་ཆོས་ཀྱི་དབྱིངས༔ མ་འགགས་རང་གསལ་ལོངས་སྤྱོད་རྫོགས་པའི་དཔལ༔ མི་གཙང་སྒྱུ་མའི་ལུས་ལ་བྱིན་གྱིས་རློབས༔ དྭངས་མ་ལྔ་ལྡན་སྐུ་ཡི་དངོས་གྲུབ་སྩོལ༔ ཡན་ལག་དྲུག་ཅུ་ཚངས་པ་དབྱངས་ཀྱི་སྒྲ༔ གསུང་གཅིག་ཉིད་ཀྱང་ལྷ་ཀླུ་མི་སོགས་ཀྱི༔ རང་རང་སྐད་དུ་ཟབ་རྒྱས་ཆོས་སྟོན་པ༔ ལས་རླུང་ཐ་མལ་ངག་ལ་བྱིན་གྱིས་རློབས༔ བརྗོད་པ་དོན་ལྡན་གསུང་གི་དངོས་གྲུབ་སྩོལ༔ དམིགས་མེད་མཁྱེན་དང་བརྩེ་བ་ཚད་ལས་འདས༔ ཐུགས་ཀྱི་གསང་བ་ཡོན་ཏན་ཕ་མཐའ་ཡས༔ ཡེ་ཤེས་ལྔ་ལྡན་མ་འདྲེས་ཡོངས་རྫོགས་ཐུགས༔ འཁྲུལ་རྟོག་བག་ཆགས་ཀུན་གཞིར་བྱིན་གྱིས་རློབས༔ ཡང་དག་ཟབ་ཞི་ཐུགས་ཀྱི་དངོས་གྲུབ་སྩོལ༔ སྒྲུབ་རྫས་གནས་གསུམ་གཏུགས་སམ་ཏིང་འཛིན་དབང་༔ བློ་འདས་ལྟ་བའི་ངང་ནས་བླང་བར་བྱ༔ བདུན་པ་བསྔོ་སྨོན་བཀྲ་ཤིས་བྱ་བ་ནི༔ དང་པོ་རང་གཞན་དུས་གསུམ་དགེ་བའི་ཚོགས༔ བྱས་དང་བྱེད་འགྱུར་བསྔོ་བར་བྱ་བའི་ཡུལ༔ ཕྱོགས་རིས་སྤངས་ནས་མཐའ་ཡས་འགྲོ་བ་ཀུན༔ སྲིད་ཞིར་མ་ཡིན་རྣམ་མཁྱེན་གོ་འཕང་མཆོག༔ ཐོབ་ཕྱིར་དམིགས་མེད་བསྔོ་བའི་རྩིས་ཟིན་པས༔ ཧཱུྃ་ཧྲཱིཿ བདག་གཞན་དུས་གསུམ་བསགས་པའི་དགེ་བ་རྣམས༔ ཐོག་མེད་དུས་ནས་དྲིན་གྱིས་བསྐྱངས་པའི་མ༔ མ་ལུས་སངས་རྒྱས་གོ་འཕང་ཐོབ་པ་དང་༔ དང་པོའི་གཞི་ལས་འཕོ་འགྱུར་མེད་བཞིན་དུ༔ དུ་མ་རོ་གཅིག་སྤྲུལ་བསྒྱུར་མཐའ་ཡས་པས༔ བདག་གཞན་མཉམ་ཉིད་ངང་དུ་གནས་ཕྱིར་བསྔོ༔ བྱང་ཆུབ་སྙིང་པོ་དེ་ཉིད་མ་ཐོབ་བར༔ བདག་གི་ཚེ་རབས་ཀུན་ཏུ་དཀོན་མཆོག་གསུམ༔ སྐྱབས་ཀྱི་དམ་པ་མཆོག་ཏུ་འཛིན་པ་དང་༔ སྨོན་འཇུག་བྱང་ཆུབ་སེམས་དང་མི་འབྲལ་ཞིང་༔ ཡི་དམ་ལྷ་མཆོག་འཕགས་མ་སྒྲོལ་མ་དང་༔ སྐད་ཅིག་ཙམ་ཡང་འབྲལ་བ་མེད་བཞིན་དུ༔ ལུང་བསྟན་དབུགས་དབྱུང་རྗེས་སུ་འཛིན་ཕྱིར་བསྔོ༔ དེ་མཐུས་བདག་གི་ལུས་ངག་ཡིད་གསུམ་པོས༔ སེམས་ཅན་ཀུན་ལ་རྟག་ཏུ་ཕན་པ་དང་༔ བདེ་ལེགས་ཀུན་གྱི་འབྱུང་གནས་རྒྱལ་བའི་བསྟན༔ ཚུལ་བཞིན་འཛིན་ལ་སྐྱོ་ངལ་མེད་པར་ཤོག༔ སྨོན་ལམ་གཞན་ཡང་ཅི་རིགས་བརྗོད་པར་བྱ༔ བཀྲ་ཤིས་བརྗོད་ཕྱིར་མདུན་མཁར་རྒྱལ་ཀུན་གྱིས༔ མེ་ཏོག་འཐོར་ནས་བདག་གཞན་འགྲོ་ཀུན་ལ༔ བརྩེ་བའི་ཐུགས་ཀྱིས་ཤིས་པ་གསུང་བ་ཡི༔ རྗེས་ཟློས་བདག་གིས་བྱེད་པ་མོས་བཞིན་དུ༔ ཧཱུྃ་ཧྲཱིཿ མཐའ་བརྒྱད་སྤྲོས་པས་མ་གོས་ཆོས་ཀྱི་སྐུ༔ ཤེས་རབ་ཕ་རོལ་ཕྱིན་མའི་བཀྲ་ཤིས་ཤོག༔ ལོངས་སྤྱོད་རྫོགས་སྐུ་ངེས་པ་ལྔ་དང་ལྡན༔ རིགས་ལྔ་རྒྱལ་བ་རྒྱ་མཚོའི་བཀྲ་ཤིས་ཤོག༔ གང་འདུལ་སྤྲུལ་ཞིང་སྟོང་གསུམ་རབ་འབྱམས་ནས༔ ཐུབ་དབང་འདྲེན་པ་སྟོང་རྩའི་བཀྲ་ཤིས་ཤོག༔ དཔལ་རི་པདྨ་འོད་ཀྱི་ཕོ་བྲང་ནས༔ རང་བྱུང་པདྨ་རྒྱལ་པོའི་བཀྲ་ཤིས་ཤོག༔ བཅུ་དྲུག་དགའ་བཞིས་སྒེག་པའི་གཞལ་ཡས་ནས༔ རྒྱལ་ཡུམ་མཁར་ཆེན་མཚོ་རྒྱལ་བཀྲ་ཤིས་ཤོག༔ འཁོར་བ་ལས་སྒྲོལ་དུས་གསུམ་རྒྱལ་བའི་ཡུམ༔ སེང་ལྡིང་ནགས་ཀྱི་སྒྲོལ་མའི་བཀྲ་ཤིས་ཤོག༔ མེ་ཆུ་གཅན་གཟན་ལ་སོགས་འཇིགས་ཀུན་སྐྱོབ༔ སྤྲུལ་པ་བཅུ་ཕྲག་གཉིས་ཀྱི་བཀྲ་ཤིས་ཤོག༔ དཔལ་མོ་ལེགས་བརྗོད་ཨུ་མ་ཡིད་འཕྲོག་མ༔ འཆི་མེད་བུ་མོ་བཞི་ཡི་བཀྲ་ཤིས་ཤོག༔ རྒྱལ་བསྟན་མི་ནུབ་དར་ཞིང་རྒྱས་པ་དང་༔ བསྟན་འཛིན་ཞབས་པད་བརྟན་པའི་བཀྲ་ཤིས་ཤོག༔ ཡུལ་ཁམས་ཀུན་ཏུ་མི་ཕྱུགས་ནད་རིམས་ཞི༔ ལོ་ལེགས་དཔལ་འབྱོར་རྒྱས་པའི་བཀྲ་ཤིས་ཤོག༔ རང་སྣང་དབང་འདུས་གཞན་སྣང་ཟིལ་གྱིས་གནོན༔ བར་ཆད་གཡུལ་ལས་རྒྱལ་བའི་བཀྲ་ཤིས་ཤོག༔ མཐར་ཐུག་འགྲོ་ཀུན་གདོད་མའི་གཞི་ལ་གྲོལ༔ དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག༔ ཅེས་བརྗོད་རྟག་ཏུ་གཞན་དོན་བྱེད་ལ་བརྩོན༔ དེ་ལྟར་འཕགས་མ་སྒྲོལ་མའི་ཆོ་ག་འདི༔ དབྱངས་ཅན་སྤྲུལ་པ་ཡེ་ཤེས་མཚོ་རྒྱལ་ལ༔ རང་བྱུང་སྤྲུལ་སྐུ་པདྨ་རྒྱལ་པོས་གདམས༔ ཚིག་དོན་གནས་ལ་རྟོག་གེས་བཅོས་མི་རུང་༔ མ་འོངས་མཚོ་རྒྱལ་སྤྲུལ་པ་ཉི་ཤུ་གཅིག༔ ཤར་ལྷོ་ནུབ་བྱང་ཕྱོགས་མཚམས་ཀུན་ཏུ་འབྱུང་༔ ལས་ཅན་སྐྱེས་བུ་གསང་སྨེས་སྤྲས་པ་ཞིག༔ བྱའམ་ཁྱི་ཡི་ལོ་བ་རྒྱལ་གྱི་མིང་༔ དེ་ལ་ཚིག་རིས་དབྱིངས་ལས་འཇའ་ཚོན་ལྟར༔ ཐོགས་པ་མེད་པར་ཤར་བ་བྱིན་རླབས་མྱུར༔ ལས་དང་ལྡན་པ་རྣམས་ཀྱི་དོན་དུ་ལོངས༔ བྱིན་རླབས་བཀའ་དང་དགོངས་གཏེར་སྙན་བརྒྱུད་རྫོགས༔ ལྷ་དང་བླ་མས་རྗེས་སུ་གནང་བ་བྱིན༔ ཉམས་སུ་བླང་བས་འདིའམ་ཕྱི་མ་དང་༔ བར་མ་དོ་རུ་འཕགས་མས་རྗེས་སུ་འཛིན༔ དེ་ཕྱིར་སྙིང་གི་དྭངས་མ་མཆོག་ཏུ་ཟུངས༔ ས་མ་ཡཱ༔ རྒྱ་རྒྱ་རྒྱ༔ ཞེས་པའང་བདག་འདྲ་སྤྲང་བན་ལུང་རིག་གླིང་པ་རྩལ་གྱིས་འཕགས་མའི་བྱིན་རླབས་སྙིང་ལ་སིམ་པའི་དགའ་བ་དང་བཅས་པས་དག་པར་ཕབ་པ་དུས་ཀུན་ཏུ་དགེ་བར་གྱུར་ཅིག །དགེའོ། །དགེའོ། །དགེའོ།