རིག་བྱེད་ལྷ་མོའི་དབང་སྡུད་ལས་ཚོགས་བཅུ་པ།

རིག་བྱེད་ལྷ་མོའི་ཐུགས་ཀྱི་སྒྲུབ་པ་ལས༔ དབང་སྡུད་ལས་ཚོགས་བཅུ་པ་བཞུགས་སོ༔

རྒྱལ་ཀུན་ཡུམ་མཆོག་གོས་དཀར་མོ༔ རིག་བྱེད་ལྷ་མོའི་སྐུར་བསྟན་ནས༔ སྐྱེ་རྒུ་མཐའ་དག་དབང་བསྒྱུར་བའི༔ འཕགས་མ་མཆོག་གི་ཞབས་ལ་འདུད༔ དེ་ཡི་དབང་ཐོབ་དམ་ཚིག་ལྡན༔ བསྙེན་སྒྲུབ་ཐེམས་པའི་རྣལ་འབྱོར་པས༔ གང་འདོད་དབང་གི་ཕྲིན་ལས་བརྩམས༔ ས་མ་ཡཱ༔ དང་པོ་མདའ་དར་སྣ་ལྔ་ལ༔ བརྟེན་ནས་ཡུལ་ལྷ་དབང་སྡུད་ཐབས༔ གཙང་མའི་མདའ་ལ་དར་ཚོན་བཏགས༔ ཡུངས་ཐུན་བརྡེག་ཅིང་གུ་གུལ་བདུག༔ སྒྲུབ་པའི་རྟེན་དུ་མཆོད་གྲལ་བཤམས༔ དང་པོ་ཕྲིན་ལས་གཞུང་བཞིན་ལ༔ སྒྲུབ་པའི་རྗེས་སུ་ལས་སྦྱོར་སྐབས༔ རང་ཉིད་རིག་བྱེད་ལྷ་མོ་ཡི༔ ཐུགས་ཀའི་སྔགས་ཕྲེང་གཡོན་བསྐོར་ཚུལ༔ ཤུགས་དྲག་ཇོ་འཁོར་མྱུར་བསྐྱོད་བཞིན༔ སྔགས་ལས་འོད་ཟེར་ལྕགས་ཀྱུའི་དབྱིབས༔ མཚལ་ལྟར་དམར་བའི་གཟི་བྱིན་གྱིས༔ ཡུལ་དེའི་གཞི་བདག་ཆེ་ཕྲ་ཀུན༔ ཇི་ལྟར་རྗེ་ཡིས་འབངས་བཀུག་ལྟར༔ དད་གུས་ཆགས་སེམས་གདུང་བའི་བློས༔ བདག་ཉིད་རིག་བྱེད་དབང་མོ་ལ༔ བླ་མ་རྒྱལ་པོ་ཕ་མ་དང་༔ མཛའ་གྲོགས་ཇི་བཞིན་བཏུད་གྱུར་པས༔ རིགས་བདག་རྟ་མགྲིན་རྒྱལ་པོ་ཡིས༔ ཕྱིན་ཆད་དམ་ལས་མི་འདའ་བའི༔ པདྨའི་ཕྲེང་བ་གཙུག་ཏུ་བཞག༔ རིག་བྱེད་གསང་བའི་མེ་ཏོག་ནས༔ བྱང་སེམས་བདུད་རྩི་དམར་པོ་ཡིས༔ ཁྲུས་བྱས་སྙིང་གར་ཐིམ་གྱུར་པས༔ ཇི་སྲིད་བདག་གཞན་བྱང་ཆུབ་བར༔ ཕན་གྲོགས་བྱེད་པར་ཁས་བླངས་བསམ༔ རྩ་སྔགས་ཡིག་འབྲུ་བརྒྱད་པའི་གཤམ༔ བྷུ་མི་པ་ཏི་ལོ་ཀ་པ་ལ་ཛ་ཛ༔ ཨ་ཀརྴ་ཡ་ཁུག་ཁུག༔ ཡུལ་ལྷ་ཆྒཻ་མོ་ཞེས་བྱ་བ་བདག་གི་གྲོགས་སུ་ཁུག་ཁུག༔ དུང་དུང་༔ སློང་སློང་༔ ཛུ་ཛུ་པ་ཤཾ་ཀུ་རུ་སྭཱ་ཧཱ༔ སྟོང་རྩ་བཟླས་པས་རྨི་ལམ་དུ༔ རྟ་པ་ཆེ་བཟང་བཙུན་པ་དང་༔ བུད་མེད་མཛེས་མ་འདུས་སོགས་འབྱུང་༔ མདའ་དར་གཡབ་ཅིང་འགུག་པ་བྱ༔ ས་མ་ཡཱ༔ ཡུལ་ལྷ་དབང་སྡུད་དྲེགས་པའི་སྙིང་སྒུལ་ཞེས་བྱ་བ་ ས་མ་ཡཱ༔ བླ་མ་དབང་དུ་སྡུད་པའི་ཐབས༔ རྡོར་དྲིལ་རབ་གནས་ལྡན་པ་གཅིག༔ བླ་མ་དྲེགས་སྙེམས་ཆེ་བཙན་གྱི༔ སྲོག་འཁོར་བླ་རྡོ་ཡིན་པར་དམིགས༔ རྒྱུན་དུ་སྒྲུབ་ཚེ་མཆོད་པའི་གྲལ༔ རང་གིས་བརྡུང་དཀྲོལ་བྱས་པའི་སྒྲས༔ གང་དམིགས་དེ་ཉིད་དབང་བསྡུས་བསམ༔ བསྙེན་སྐབས་དམིགས་པའི་ཁ་བསྒྱུར་ནི༔ བདག་ཉིད་རིག་བྱེད་ལྷ་མོའི་ཐུགས་སྲོག་མཐར༔ ཧྲཱིཿཡིག་དམར་པོ་རང་སྒྲ་སྒྲོགས་པ་ལས༔ བར་མ་ཆད་པར་ཧྲཱིཿདམར་རྒྱུན་བྱུང་སྟེ༔ གང་དམིགས་བླ་མ་དྲེགས་སྙེམས་དེ་ཉིད་ཀྱི༔ སྙིང་གར་ཕོག་པས་ཁབ་ལེན་ལྕགས་བསྒུལ་ལྟར༔ དད་མོས་མཐུན་སྡེབ་གདུང་བའི་བློ་དང་བཅས༔ ལུས་ཀྱིས་ཐལ་སྦྱར་ངག་གིས་བསྟོད་དབྱངས་སྒྲོགས༔ བརྟན་པ་བྲལ་ཏེ་བདག་གི་དབང་འདུས་བསམ༔ རྩ་སྔགས་འབྲུ་བརྒྱད་ཤམ་བུ་རུ༔ གུ་རུ་ཆྒཻ་མོའི་ལུས་སྒུལ༔ ངག་སྒུལ༔ ཡིད་དཀྲུགས༔ ཙིཏྟ་ཨ་པ་ར་ཁུག་ཁུག༔ སྡུས་སྡུས༔ དུང་དུང་༔ རཏྣ་དྷ་ར་སིདྡྷི་པ་ཤཾ་ཀུ་རུ་སྭཱ་ཧཱ༔ གུ་རུ་ཆྒཻ་མོ་བདག་གི་གྲོགས་སུ་འདུས་འདུས༔ བློ་ཡེང༔ སྣང་བ་བསྒྱུར༔ སྤ་བཀོང་༔ སིདྡྷི་ཕ་ལ་སྐྱོལ་སྐྱོལ༔ དྲིལ་བུ་སྒྲོགས་ཤིང་དུས་རྒྱུན་དུ༔ རང་གི་བྲན་ནམ་གྲོགས་པོའམ༔ སྦྱིན་བདག་ཚུལ་དུ་འདུད་པར་བསམ༔ ས་མ་ཡཱ༔ བླ་མ་དབང་སྡུད་ཁེངས་དྲེགས་ཟིལ་གནོན་ཞེས་བྱ་བ་ས་མ་ཡཱ༔ ཆོས་འཁོར་རི་ཁྲོད་ལ་སོགས་པར༔ བཙུན་པ་ཕལ་པ་དབང་སྡུད་ན༔ བཙུན་པ་བཟང་ངན་འདྲེས་མ་ཡི༔ ལུས་རྡུལ་གོས་དུམ་དར་གྱིས་དྲིལ༔ ལྷུང་བཟེད་ནང་བཅུག་དགེ་འདུན་ཀུན༔ འདུ་བའི་སྲོག་གི་འཁོར་ལོ་བསམ༔ བསྙེན་སྐབས་དམིགས་པའི་འཕྲོ་འདུ་ནི༔ རང་ཉིད་དབང་གི་ལྷ་མོའི་ཐུགས་སྲོག་ལས༔ འཇམ་དཔལ་དབྱངས་སོགས་ལྷ་སྐུའི་འཕྲོ་འདུ་དང་༔ ཐེག་པ་ཆེ་ཆུང་ཆོས་ཀྱི་ཆར་བབས་པས༔ ཕྱོགས་བཅུའི་དགེ་འདུན་སྦྲང་རྩིར་བུང་བ་བཞིན༔ བར་མཚམས་མེད་པར་བདག་གི་མདུན་དུ་འོང་༔ དད་མོས་ཐལ་སྦྱར་ལྷ་མོའི་ཕྱག་མཚན་མདས༔ ཕོག་པས་བདག་ལ་བླ་མ་མཁན་སློབ་དང་༔ སློབ་དཔོན་ཚུལ་དུ་གུས་འདུད་འབྲལ་མེད་བསམ༔ རྩ་སྔགས་ཤམ་བུར་འདི་བཏགས་བསྙེན༔ སང་ག་སརྦ་སིདྡྷི་པ་ཤཾ་ཀུ་རུ༔ ཡུལ་ཆྒཻ་མོ་ཞེས་བྱ་བའི་བཙུན་པ་ཐམས་ཅད་དུང་དུང་༔ ཁུག་ཁུག༔ སློང་སློང་༔ བློ་ཡེང་ཡེང༔ སྣང་བ་སྒྱུར་སྒྱུར༔ སརྦ་སངྒ་པ་ཤངྐུ་རུ་སྭཱ་ཧཱ༔ རྨི་ལམ་གྲུབ་པའི་རྟགས་བྱུང་ན༔ གོས་དུམ་དབང་གི་སྦྱིན་བསྲེག་བྱ༔ ས་མ་ཡཱ༔ བཙུན་པ་དབང་སྡུད་འཕགས་ཚོགས་སྤྲིན་སྡུད་ཅེས་བྱ་བ་ ཕོ་རྒྱུད་རྒྱལ་བློན་འབངས་ཕལ་པ༔ དབང་སྡུད་དམིགས་པའི་ཁ་བསྒྱུར་ནི༔ རང་ཉིད་རིག་བྱེད་དབང་གི་ལྷ་མོར་བསྒོམས༔ མདུན་དུ་གང་དམིགས་དེ་ཉིད་ཐལ་སྦྱར་ཚུལ༔ སྙིང་གར་ཨུཏྤལ་དམར་པོ་སྐྱེས་མ་ཁད༔ དེ་ཡི་མིང་ཡིག་ཁ་དོག་དཀར་པོ་ནི༔ བཀྲག་མདངས་འོད་དང་གཟི་བརྗིད་ལྡན་པར་བསམ༔ བདག་ཉིད་དབང་གི་ལྷ་མོའི་ཕྱག་མཚན་མདའ༔ ཨུཏྤལ་དམར་པོའི་སྦུབས་ནས་རང་སྲོག་སྔགས༔ བུང་བ་དམར་པོ་སྔགས་སྒྲ་འུར་འུར་སྒྲོགས༔ རྣ་བ་གཡོན་ཞུགས་དེ་ཡི་མིང་ཡིག་ནི༔ ཡིག་འབྲུ་རེ་རེ་བཞིན་དུ་ཚུར་བླངས་ནས༔ སྣ་བུག་གཡས་ནས་བདག་གི་གསང་བར་ཞུགས༔ ཐུགས་ཀའི་སྔགས་ལ་ཕོག་པས་བདག་དབང་འདུས༔ དེ་ཡི་མིང་ཡིག་ཟད་ཅིང་སྙིང་ག་རུ༔ ཨུཏྤལ་སྐམ་ནས་འགྱེལ་ལ་ཁད་པ་ཡི༔ སྙིང་གར་བདག་གི་ཐུགས་ཀའི་འོད་དམར་པོས༔ ཕོག་པས་ཐལ་སྦྱར་ཆགས་སེམས་གུས་པའི་བློས༔ བདག་ལ་དད་ཅིང་བྲན་དུ་ཁས་བླངས་བསམ༔ རྩ་སྔགས་ཤམ་བུར་འདི་བཏགས་བསྙེན༔ རཱ་ཛ་ཆྒཻ་མོ་ཞེས་བྱ་བའི་སྲོག་དུང་དུང་༔ སྙིང་རྩ་སྒུལ་སྒུལ༔ བདག་གི་དབང་དུ་དུང་དུང་༔ བྲན་དུ་སྡུས་སྡུས༔ བློ་ཡེང་ཡེང༔ སྣང་བ་སྒྱུར་སྒྱུར༔ སིདྡྷི་ཕ་ལ་སྐྱོལ་སྐྱོལ༔ ཅེས་པའང་སྲོག་སྔགས་སྟོང་རྩ་བཟླས༔ བསོད་ནམས་ཅན་གྱི་གང་ཟག་དེ༔ གལ་ཏེ་དབང་དུ་མ་འདུས་ན༔ བསྙེན་པ་བསྐྱལ་ཞིང་སྦྱིན་བསྲེག་བྱ༔ ཕལ་པའི་དམངས་ལ་སྨོས་ཅི་དགོས༔ ས་མ་ཡཱ༔ ཕོ་རྒྱུད་དབང་སྡུད་བུང་བས་བཅུད་སྡུད་ཅེས་བྱ་བ་ ས་མ་ཡཱ༔ མོ་རྒྱུད་དབང་དུ་སྡུད་འདོད་ན༔ རང་ཉིད་ལྷ་མོའི་ཐུགས་ཀ་ནས༔ འོད་འཕྲོས་དབང་ཕྱུག་ཆེན་པོ་བསྐུལ༔ ལིང་ག་དམར་པོ་གྱེན་བསྒྲེང་བའི༔ སྦུབས་ནས་བྱང་སེམས་དཀར་པོ་དང་༔ འོད་དམར་ལྕགས་ཀྱུ་འབར་བ་ཡིས༔ གསང་བར་ཕོག་པས་བློ་རྨོངས་ཏེ༔ འདོད་པས་མྱོས་ཏེ་བདག་ཉིད་ཀྱི༔ དབང་དུ་འདུས་ཏེ་བྲན་བཀོལ་བསམ༔ རྩ་སྔགས་ཤམ་བུར་འདི་བཏགས་བསྙེན༔ བུ་མོ་ཆྒཻ་མོ་ཞེས་བྱ་བའི་བློ་ཡེངས་སུ་ཆུག་ཅིག༔ བདག་གི་བྲན་དུ་ཁོལ་ཅིག༔ སྣང་བ་སྒུལ་སྒུལ༔ ཛ་ཛ་ཛུ་ཛུ་སློང་སློང་ནཱ་རི་སརྦ་པ་ཤཾ་ཀུ་རུ་ཧཱུྃ་ཧཱུྃ༔ སྟོང་བཟླས་དབང་འདུས་བྲན་དུ་འགྱུར༔ བུད་མེད་དབང་སྡུད་འདོད་པའི་ལྕགས་ཀྱུ་ཞེས་བྱ་བ་འཚོ་བའི་ཟས་སྣ་དབང་སྡུད་ན༔ རང་ཉིད་ལྷ་མོའི་ཐུགས་ཀའི་འོད་དམར་གྱིས༔ འཇིག་རྟེན་ཁམས་ཀྱི་ཟས་ལྷ་དབང་དུ་བསྡུས༔ བདག་གི་སློང་ཕོར་རཏྣའི་གཞོང་པ་རུ༔ དཀར་དམར་ཤ་ཁྲག་ཇ་ཆང་སྐྱེམས་ལ་སོགས༔ བདག་ལ་ཕུལ་བས་བཟའ་བཏུང་གང་འདོད་ཀུན༔ དུས་ཀུན་བར་མེད་འདུས་པས་གནས་སྐབས་སུ༔ བཀྲེས་སྐོམ་དབུལ་བའི་གདུང་བ་སེལ་བར་བསམ༔ ཁམ་ཟས་སློང་ཕོར་སྔགས་བཏབ་གར་ཕྱིན་ཀྱང་༔ ཅི་འདོད་བཟའ་བཏུང་འབྱུང་བར་ཐེ་ཚོམ་མེད༔ རྩ་སྔགས་ཤམ་བུར་འདི་ཉིད་བཏགས༔ ན་ན་ཁ་དྷེ་ཟས་ཀྱི་འདུ་བ་སརྦ་པ་ཤཾ་ཀུ་རུ་སྭཱ་ཧཱ༔ ཟས་དབང་དུ་སྡུད་པའི་མན་ངག་སྦྱིན་བདག་ལག་བསྒུལ་ཞེས་བྱ་བ་ ནོར་ཕྱུགས་དབང་དུ་བྱ་བ་ལ༔ གང་འདོད་སྤུ་སྣ་མཛོད་དུ་སྦ༔ སེམས་ཅན་རང་རང་གཡང་སྐར་ལ༔ བབས་ཚེ་ལས་སྦྱོར་རྩ་སྔགས་ཤམ༔ རཏྣ་དྷ་ར་ཨ་ཤྭ་ཀ་ཧསྟི་ཀ་དྷ་དི་པ་ལ་སྡུས་སྡུས་སརྦ་པ་ཤཾ་ཀུ་རུ་སྭཱ་ཧཱ༔ ཞེས་པ་སྟོང་རྩ་ཙམ་ཞིག་བཟླ༔ རྨི་ལམ་ཕྱུགས་ཀྱི་ཚོགས་འདུ་ཞིང་༔ འོ་ཞོ་བཏུང་སོགས་རྟགས་བྱུང་ཚེ༔ དངོས་གྲུབ་བླང་ཞིང་དམིགས་མེད་བཞག༔ ས་མ་ཡཱ༔ ནོར་ཕྱུགས་དབང་དུ་སྡུད་པའི་གདམས་པ་གནོད་སྦྱིན་དཀོར་མཛོད་ ནོར་སྒྲུབ་དམིགས་པའི་གབ་ཡིག་ནི༔ རང་ཉིད་དབང་གི་ལྷ་མོའི་ཐུགས་ཀ་ནས༔ འོད་དམར་བྱང་ཕྱོགས་ལྕང་ལོ་ཅན་དུ་འཕྲོས༔ གནོད་སྦྱིན་ཆེན་པོ་ངལ་བསོའི་བུ་ལ་ཕོག༔ གཉེན་ལ་ནོར་གྱིས་ཉམས་གསོས་སྤྲད་པ་ལྟར༔ རྟ་དང་བ་གླང་ནོར་ཕྱུགས་ཆེ་འབྲིང་ཆུང་༔ བདག་གི་ཕྱུགས་ལྷས་སྟོངས་པ་གང་བར་བསམ༔ འདྲེ་སྲིན་དབང་དུ་བསྡུ་འདོད་ན༔ ཕ་ཝཾ་ལོང་བུ་ཟུར་དྲུག་པ༔ ཏྲི་དྲུག་གྲི་ཁྲག་གིས་བྲིས་ཏེ༔ ཡུལ་དེའི་འདྲེ་སྲིན་ཐམས་ཅད་བཀུག༔ རང་དབང་མེད་པར་ཚུར་འདུས་ནས༔ བླ་རྡོའི་ཏྲི་དང་དབྱེར་མེད་བསམ༔ རང་ཉིད་ཀུ་རུ་ཀུལླེ་ཡི༔ ཐུགས་ལས་ཕྱག་རྒྱའི་ལྷ་མོ་བཞི༔ སྤྲོས་ཏེ་སྒོ་གསུམ་འགུགས་འཆིང་བསྡམས༔ མྱོས་ཏེ་བྲན་དུ་ཁས་བླངས་བསམ༔ རྩ་སྔགས་ཤམ་བུར་འདི་ཡང་བཟླ༔ ཏྲི་ཨཀྵ་ཡ་ཨ་ཀར་ཤ་ཡ་ཁུག་ཁུག་དུང་དུང་སྡུས་སྡུས་ཛ་ཧཱུྃ་བཾ་ཧོཿ དངོས་ཉམས་རྨི་ལམ་འདྲེ་གཟུགས་སྟོན༔ མི་སྙན་སྒྲ་འབྱིན་དྲི་ངན་མནམས༔ གང་བྱུང་རོ་སྙོམས་ངང་དུ་བཞག༔ རང་ཉིད་རྟ་མཆོག་རྒྱལ་པོར་བསམ༔ སྐུ་རགས་མི་ལྤགས་མདུད་པའི་ནང་༔ འདྲེ་སྲིན་བླ་རྡོ་བཙོན་དུ་བཟུང་༔ རྡོ་རྗེའི་མཁར་དུ་ཚུད་པ་ཡིས༔ གཡོ་མེད་བསམ་ལ་བསྟན་དགྲ་ལ༔ ཆོ་འཕྲུལ་ཐོངས་ཞེས་སྐབས་སུ་རྦད༔ ནང་ནུབ་བསང་གསུར་ལུས་སྦྱིན་སོགས༔ མ་བུའི་ཚུལ་དུ་ཚིམས་པར་བསྔོ༔ གཏོང་ཚེ་དམ་བཞག་མནའ་ཐོ་གདབ༔ འདྲེ་སྲིན་དབང་སྡུད་ཤ་རུལ་སྦྲང་བུ་ཞེས་བྱ་བ་ ལྟ་ལོག་ཁྲོ་གཏུམ་དབང་བསྡུ་ན༔ ཞེ་སྡང་སྦྲུལ་གྱི་པགས་པ་དང་༔ ཤོག་གུ་གཙང་མ་ལེགས་པར་སྦྱར༔ ཡུལ་དེའི་བདག་ལ་སྐུར་འབེབས་དང་༔ རྟག་ཏུ་སྡང་བའི་མི་ཕོ་མོ༔ སྔགས་བཙུན་ལ་སོགས་མིང་མཐའ་རུ༔ བདག་གི་དབང་དུ་ཁུག་ཅེས་འབྲི༔ མལ་འོག་སྟན་གྱི་འོག་ཏུ་སྦ༔ རྩ་སྔགས་ཤམ་བུར་འདི་ཉིད་བཏགས༔ ན་ར་ན་རཱི་སཾ་གྷ་མ་ན་མེ་ཏྲི་ཛ་ཛ༔ རང་ཉིད་ལྷ་མོའི་གནས་ལྔ་ལས༔ བྱམས་པའི་འོད་ཟེར་དཀར་དམར་མཐིང་༔ སེར་ལྗང་ཁོ་ཡི་གནས་ལྔར་ཕོག༔ ལྷན་སྐྱེས་ལྷ་ཡིས་བློ་སེམས་བསྐུལ༔ ཁོ་ཡང་བདག་ལ་བྱམས་སེམས་ཀྱིས༔ ཅི་སྨྲས་ཉན་ཅིང་བསྟོད་བསྔགས་བརྗོད༔ ཐལ་སྦྱར་ཆགས་སེམས་མོས་ལྡན་པས༔ རྟག་ཏུ་ཕན་གྲོགས་བྱེད་པར་བསམ༔ སྡང་སེམས་ཅན་རྣམས་དབང་སྡུད་བྱམས་པའི་ཟུར་མིག་ཅེས་བྱ་བ་ བསོད་ནམས་དབང་དུ་སྡུད་འདོད་ན༔ སྔོན་དུ་མཆོག་གསུམ་ཡུལ་རྣམས་ལ༔ མཆོད་འབུལ་དམན་ལ་སྦྱིན་པ་གཏོང་༔ སྐབས་སུ་ཞག་བདུན་བསྙེན་ཁ་གསོ༔ ལས་སྦྱོར་དམིགས་པའི་འཕྲོ་འདུ་ནི༔ རང་ཉིད་དབང་གི་ལྷ་མོའི་ཐུགས་ཀ་ནས༔ འོད་ཟེར་སྣ་ལྔའི་རྩེ་ལ་སྒེག་མོ་སོགས༔ མཆོད་པའི་ལྷ་མོས་མཆོད་རྫས་དཔག་མེད་ཐོགས༔ ཁ་བ་བུ་ཡུག་འཚུབ་ལྟར་ཕྱོགས་བཅུར་འཕྲོས༔ རབ་འབྱམས་ཞིང་གི་རྒྱལ་ཀུན་མཆོད་པས་མཉེས༔ སྐུ་གསུང་ཐུགས་ཀྱི་དངོས་གྲུབ་ཨོཾ་ཨཱཿཧཱུྃ༔ དཀར་དམར་མཐིང་ག་ལྷ་རྫས་དཔག་མེད་དང་༔ ཡིག་འབྲུ་ཕྱག་མཚན་སྣ་ཚོགས་ཆར་ལྟར་བབས༔ བདག་ལ་ཐིམ་པས་རྒྱལ་བ་སྲས་བཅས་ཀྱི༔ མཐའ་ཡས་བསོད་ནམས་སྟོབས་ལ་དབང་བར་འགྱུར༔ རྩ་སྔགས་ཤམ་དུ་འདི་ཉིད་བཏགས༔ མ་ཧཱ་སརྦ་ཛ་ཡ་ཛི་ན་པུ་ཏྲ་པུཎྱཻ་པ་ཤངྐུ་རུ་སིདྡྷི་ཧཱུྃ༔ སླར་ཡང་ཐུགས་ལས་འོད་དམར་འཕྲོས་པ་ཡི༔ རྩེ་ལས་ལྷ་མོ་ཞལ་གཅིག་ཕྱག་གཉིས་མ༔ ལྕགས་ཀྱུ་ཞགས་པ་ཐོགས་པ་སྐུ་མདོག་དམར༔ རྒྱལ་བློན་བཙུན་མོ་བན་བོན་རིག་གནས་མཁན༔ ཀུན་གྱི་སྙིང་ག་གསང་བའི་གནས་རྣམས་ནས༔ ལྕགས་ཀྱུས་བཟུང་སྟེ་རང་གི་མདུན་ཉིད་དུ༔ ཐལ་སྦྱར་ཆགས་པའི་སེམས་ཀྱིས་འཁོད་པ་ལ༔ བདག་གི་ཕྱག་མཚན་ཨུཏྤལ་མདས་གཟིར་བས༔ དེ་ཀུན་ཚེ་བསོད་དཔལ་འབྱོར་མ་ལུས་པ༔ ཨ་ཏྲི་ནྲྀ་གསུམ་འོད་ཀྱི་གོང་བུ་སེར༔ བདག་ལ་ཕུལ་བས་བདག་གི་གསང་བ་ནས༔ གྱེན་དྲངས་ཐུགས་ཀར་ཐིམ་པས་བསོད་ནམས་ཅན༔ ཀུན་དང་བདག་ཉིད་མཉམ་པའི་མདངས་ལྡན་བསམ༔ རྩ་སྔགས་ཤམ་བུར་སྟོང་རྩ་བཟླ༔ མ་ཧཱ་རཱ་ཛ་ར་ཛཱི་པནྚི་ཏ་ཛྭ་ཀི་སུ་སྟྲི་༼སུ་ཧྲིཏ྄་༽པུཎྱཻ་སརྦ་པ་ཤཾ་ཀུ་རུ་ཧཱུྃ་བྷྲུཾ་སྭཱ་ཧཱ༔ རྨི་ལམ་ཉི་ཟླ་ཤར་བ་དང་༔ གཞན་གྱིས་བཀུར་དང་ཁྲི་ལ་འདུག༔ དགེ་བའི་རྟགས་མཚན་གང་བྱུང་ཡང་༔ དགག་སྒྲུབ་མེད་པར་རོ་སྙོམས་བཞག༔ བསོད་ནམས་འོད་ཟེར་དབང་སྡུད་ཐབས་མཁས་འོད་ཟེར་ཞེས་བྱ་བ་ ས་མ་ཡཱ༔ ཨེ་མ་ལྷ་མོ་རིག་བྱེད་མའི༔ དབང་སྡུད་ལས་ཚོགས་བཅུ་པ་འདི༔ ནཱ་གརྫུ་ནའི་ཐུགས་བརྒྱུད་ནས༔ པདྨ་ཐོད་ཕྲེང་རྩལ་ལ་གདམས༔ མཁའ་འགྲོའི་སྙིང་སྒྲོམ་དམར་པོར་སྦོས༔ དུས་བབས་བསྟན་འགྲོའི་དོན་ཆེད་དུ༔ དབང་གི་འགྲོ་དོན་མཐར་ཕྱིན་ཤོག༔ ས་མ་ཡཱ༔ རྒྱ་རྒྱ་རྒྱ༔ ཆོས་ལ་དབང་བའི་སྐལ་ལྡན་གཞན་ལ་ཕན་པས་བསྐུལ་ཞིང་བདག་འདྲ་ཤཱཀྱའི་དགེ་སྦྱོང་ལུང་རིག་གླིང་པས་མཉམ་བཞག་སྤྲོས་པ་ཀུན་བྲལ་དབྱིངས་ཀྱི་སྒྲོམ་ནས་བཏོན་ཏེ་དབེན་གནས་བདེ་ཆེན་པདྨོའི་ཚལ་ནས་བྲིས་པ་དགེ་བར་གྱུར་ཅིག །