ལྷ་མོ་རིག་བྱེད་མའི་ལོ་རྒྱུས་མགོ་སྤྲུལ་གྱིས་བྲིས་པ།
༄༅། ལྷ་མོ་རིག་བྱེད་མའི་ལོ་རྒྱུས་ནི། སྤྱིར་རྒྱུད་སྡེ་བཞི་ཀ་ནས་འདིའི་ལྷ་སྔགས་མང་དུ་གསུངས་ཤིང་། ཁྱད་པར་དཔལ་ཀྱཻ་རྡོ་རྗེའི་རྩ་བའི་རྒྱུད་བརྟག་པ་གཉིས་པ་ལས། ཧྲཱིཿལས་བྱུང་བའི་ལྷ་མོ་ནི། །ཁ་ཏོག་དམར་ཞིང་ཕྱག་བཞི་མ། །མདའ་དང་གཞུ་ཡི་ལག་པ་མ། །ཨུཏྤ་ལ་དང་ལྕགས་ཀྱུ་འཛིན། །འདི་ནི་བསྒོམ་པ་ཙམ་གྱིས་ནི། །འཇིག་རྟེན་གསུམ་པོ་དབང་དུ་བྱེད། །ཅེས་སོགས་ཀྱིས་ས་བོན་སྐུ་མདོག་ཕྱག་མཚན་སྔགས་དང་བཅས་པ་རྒྱས་པར་གསུངས་པ་བཞིན་བླ་མེད་ཀྱི་རྒྱུད་ཀྱི་ཁོངས་སུ་གཏོགས་པ་ཡིན། དེ་ལའང་བཀའ་གཏེར་གཉིས་ལས། བཀའ་མ་ནི། སྔོན་རྒྱལ་པོ་ལྷན་སྐྱེས་རོལ་པ་ཞེས་བྱ་བ་ལོངས་སྤྱོད་དང་མངའ་ཐང་བསམ་གྱིས་མི་ཁྱབ་པ་མངའ་ཞིང་། བཙུན་མོ་སྲས་དང་བྲན་འཁོར་མང་དུ་ཡོད་པ་ཞིག་ལ་བཙུན་མོ་སྣང་ཆེན་མ་བྱ་བ་ཞིག་ཡོད་པ་དེའི་དྲུང་དུ་རྒྱལ་པོ་ཡུན་རིང་དུ་མ་འཁོར་བས་བཙུན་མོ་དེས་གཡོག་མོ་ཞིག་ལ་རྒྱལ་པོ་དབང་དུ་བྱེད་པའི་རིག་པ་ཚོལ་ཅིག་ཅེས་སྨྲས་པས། གཡོག་མོ་དེས་སྤྱིར་ཚོང་འདུས་རྣམས་སུ་དྲིས་ཤིང་། བྱེ་བྲག་ཏུ་སྐུད་པ་འཚོང་བའི་ཚོང་འདུས་ཤིག་ཏུ་ཕྱིན་ཏེ་དྲིས་པ་ན། དེ་དག་གི་ནང་ནས་བུད་མེད་སྨུག་ནག་ཤིན་ཏུ་མཛེས་པ་ཞིག་པ་ན་རེ། རྒྱལ་པོ་དབང་དུ་བྱ་བའི་ཐབས་ང་ལ་ཡོད་པ་ཡིན་ཟེར། གཡོག་མོས་དེའི་ཞབས་ལ་གཏུགས་ཏེ་རྗེས་སུ་བཟུང་བར་གསོལ་བ་བཏབ་པས། དེའི་ཞལ་ནས་གང་དབང་དུ་བྱ་བ་དེ་ལ་འདི་བྱིན་ཅིག་ཅེས་ཁ་ཟས་ཀྱི་ཁྱད་པར་ཞིག་གནང་བ་ཁྱེར་ཏེ་བཙུན་མོ་སྣང་ཆེན་མ་ལ་རྒྱུ་མཚན་བརྗོད་ཅིང་གཏད་པ་ན། བཙུན་མོའི་བསམ་པར་འདི་རྒྱལ་པོ་ལ་བྱིན་ན་མི་ལེགས་པ་འབྱུང་སྲིད་སྙམ་ནས། ཁ་ཟས་དེ་བཤུལ་ཐག་མི་རིང་བའི་མཚོ་ཞིག་གི་ནང་དུ་འཕངས་བས། དེར་ཀླུའི་རྒྱལ་པོ་དེ་དབང་དུ་འདུས་ཏེ། དགུང་རེ་བཞིན་བཙུན་མོ་དེའི་དྲུང་དུ་འོང་ཞིང་དགའ་མགུར་བརྩེ་བས། མི་རིང་བ་ཞིག་ན་བཙུན་མོ་ལ་མངལ་ཆགས་པར་གྱུར་ཏོ། རྒྱལ་པོའི་བསམ་པར། ང་དེའི་དྲུང་དུ་མ་ཕྱིན་པས་སྐྱེས་པ་གཞན་དང་འགྲོགས་སོ་སྙམས་ནས་ཆད་པ་གཅོད་པར་བརྩམས་པ་ན། བཙུན་མོས་སྔར་གྱི་ཚུལ་རྣམས་རྒྱལ་པོ་ལ་བསྙད་པས། རྒྱལ་པོ་ན་རེ། བརྟགས་ཤིང་དཔྱད་པར་བྱའོ་ཟེར་ནས། གཡོག་མོ་དེ་སྐུད་འཚོང་གི་གནས་སུ་བལྟར་བཏང་བས། སྔར་གྱི་བུད་མེད་སྨུག་ནག་མཛེས་མ་དེ་བཞུགས་འདུག་པ་རྒྱལ་པོ་ལ་ཞུས་པས། རྒྱལ་པོ་དགྱེས་ནས་ཆད་པས་གཅོད་པ་བཏང་སྟེ་རྗེ་བཙུན་རིག་བྱེད་མ་ཡིན་པར་ཤེས་ནས་ཕོ་བྲང་དུ་གདན་དྲངས་ནས་ཞབས་ལ་གཏུགས། རྗེས་སུ་བཟུང་བར་གསོལ་བ་བཏབ་པ་བཞིན་བྱིན་གྱིས་བརླབས་པས་རྒྱལ་པོས་མི་རིང་བར་དངོས་གྲུབ་ཐོབ་ནས་གྲུབ་ཐོབ་ལྷན་སྐྱེས་རོལ་བ་ཞེས་བྱ་བར་གྲགས་ཤིང་། འདིའི་རྩ་བའི་སྒྲུབ་ཐབས་ཀྱང་མཛད། དེ་ནས་རིམ་པར་རྡོ་རྗེ་གདན་པ་ཆེ་ཆུང་། བ་རི་ལོཙྪ་བ། བླ་མ་ས་སྐྱ་བ་ཆེན་པོ་སོགས་ནས་བརྒྱུད་པ་ཡིན། གཏེར་མ་ལ་མང་དུ་ཡོད་པ་ལས། འདིར་གྲུབ་པའི་སློབ་དཔོན་ཆེན་པོ་པདྨ་འབྱུང་གནས་ཀྱིས་ཀུ་རུ་ཀུལླེའི་སྒྲུབ་ཐབས་ལས་ཚོགས་དང་བཅས་པ་དཔག་ཏུ་མེད་པ་མཛད་ནས་ཕྱི་འབྱུང་ལྔའི་དབྱིངས་དང་། ནང་རིག་པའི་ཀློང་རྣམས་སུ་གཏེར་དུ་སྦས་པ་ལས། མཁར་ཆེན་ཡེ་ཤེས་མཚོ་རྒྱལ་གྱི་སྤྲུལ་པ་འགྲོ་འདུལ་ལུང་རིག་གླིང་པ་རྩལ་གྱིས་ཐུགས་རྒྱུད་དགོངས་པའི་ཀློང་སྒྲོམ་ནས་བཏོན་པའི་ཟབ་ཆོས་དབང་གི་རྒྱལ་པོའི་མཛོད་ལས་བྱུང་བའི་ལྷ་མོ་ཀུ་ཀུལླེའི་རྗེས་སུ་གནང་བ་བསྩལ་བའི་སྐབས་སུ་བབས་པ་ཡིན། ། ཞེས་སོགས་བརྗོད། མགོ་སྤྲུལ་བས་སོ།།