རྗེས་གནང་འཆིང་བྱེད་ནོར་བུའི་ཞགས་པ།
རིག་བྱེད་ཐུགས་སྒྲུབ་ཡིད་འགུགས་ལྕགས་ཀྱུ་ལས༔ རྗེས་གནང་འཆིང་བྱེད་ནོར་བུའི་ཞགས་པ་ཞེས་བྱ་བ་བཞུགས༔
དབང་གི་ལྷ་མོ་རིག་བྱེད་མ༔ རིགས་བདག་གོས་དཀར་ཡུམ་ལ་འདུད༔ དེ་ཡི་སྒྲུབ་ཐབས་རྩ་བའི་ཆོས༔ རྗེས་གནང་འདི་བཞིན་ཉམས་སུ་ལོངས༔ ས་མ་ཡཱ༔ རྒྱ་རྒྱ་རྒྱ༔ འདི་ལ་སྦྱོར་བ་དངོས་གཞི་རྗེས༔ དབེན་པར་དབང་གི་མཎྜལ་ལ༔ དབང་གཏོར་དམར་པོ་རྒྱན་ལྡན་དང་༔ ཟངས་བུམ་ཉེར་ལྔས་བཀང་བ་ལ༔ དར་དམར་མགུལ་ཆིངས་སྐུ་རྟེན་གཟུགས༔ བྱུ་རུའི་ཙནྡན་དམར་པོ་ཡི༔ བགྲང་ཕྲེང་ཐུགས་རྟེན་མེ་ལོང་ལ༔ ལི་ཁྲིའི་དགའ་འཁྱིལ་ཧྲཱིཿམཚན་འབྲི༔ ཨ་ནྲྀ་ཏྲི་གསུམ་དཀར་སེར་ནག༔ ཚོན་གྱིས་བྱུགས་དང་བཀྲ་ཤིས་རྟགས༔ སྨན་རཀ་ཉེར་སྤྱོད་མཐའ་ནས་བསྐོར༔ བདག་མདུན་རྫས་རྣམས་ལྷ་རུ་བསྐྱེད༔ ཁྱད་པར་བུམ་ལྷ་རིག་བྱེད་མར༔ ཡང་ཡང་གསལ་ཞིང་བཟླས་པ་བྱ༔མཆོད་བསྟོད་བྱ་ཞིང་སྒྲུབ་པའི་རྫས༔ གནས་གསུམ་གཏུགས་ཤིང་དངོས་གྲུབ་བླངས༔ སྲོད་ལ་སློབ་མས་མཎྜལ་འབུལ༔ ཡི་གེ་བརྒྱ་པས་ཁྲུས་ནས་ཕྱུང་༔ བསེ་རག་བགེགས་ལ་བླ་གླུད་གཏོང་༔ ཧཱུྃ་བཞིའི་སྔགས་ཀྱིས་ཕ་མཐར་བསྐྲད༔ སྲུང་འཁོར་བསྒོམས་ཤིང་བུམ་པ་ནི༔ ལྷར་བསྒོམས་སྐུ་ཡི་རྗེས་གནང་སྦྱིན༔ ཧྲཱིཿ བུམ་པ་བདེ་ཆེན་ལྷ་ཡི་ཞིང་ཁམས་སུ༔ ནང་བཅུད་དབང་ལྷ་དམར་པོའི་སྐུ་རུ་གསལ༔ དབང་ལ་མོས་པའི་སྐལ་ལྡན་སློབ་མ་ལ༔ དབང་འགྲུབ་སྐུ་ཡི་རྗེས་གནང་ཐོབ་པར་ཤོག༔ རྩ་སྔགས་ཤམ་དུ༔ ཀཱ་ཡ་ཨ་བྷི་ཥིཉྩ་ཨོཾ༔ བགྲང་ཕྲེང་བཟླས་ལུང་མགྲིན་པར་སྦྱིན༔ ཧྲཱིཿ སྔགས་ཀྱི་ཡིག་འབྲུ་དབང་གི་ཕྲེང་བར་བསྡུས༔ རང་སྒྲ་དང་བཅས་རིག་བྱེད་ལྷ་མོའི་གསུང་༔ དབང་འདོད་སློབ་བུའི་ངག་ལ་འདི་སྦྱིན་པས༔ དབང་གི་ཕྲིན་ལས་རྗེས་གནང་ཐོབ་པར་ཤོག༔ རྩ་སྔགས་ཤམ་བུར༔ ཝཀྐཱ་ཨ་བྷི་ཥིཉྩ་ཨཱཿ མེ་ལོང་ཧྲཱིཿམཚན་སྙིང་ཁར་གཏུགས༔ ཧྲཱིཿ ཆོས་དབྱིངས་སྒྲིབ་བྲལ་དྭངས་གསལ་མེ་ལོང་ལ༔ མཁྱེན་བརྩེ་ནུས་པའི་ཐུགས་སྲོག་ཡི་གེ་ཧྲཱིཿ དབང་བསྒྱུར་སེམས་ལ་ཐུགས་ཀྱི་རྗེས་གནང་བས༔ རིག་བྱེད་དབང་མོའི་བྱིན་རླབས་མྱུར་ཐོབ་ཤོག༔ རྩ་སྔགས་ཤམ་བུར༔ ཙིཏྟ་ཨ་བྷི་ཥིཉྩ་ཧཱུྃ༔ ལྷ་འདྲེ་མི་གསུམ་སྲོག་ཡིག་གཏད༔ ཧྲཱིཿ ལྷས་ནི་རྒྱུད་དུལ་བདེ་སྐྱིད་དངོས་གྲུབ་སྟེར༔ འདྲེ་ཡིས་གནོད་ཀུན་དགྲ་རྐུན་སྐྱེལ་བསུ་བཞིན༔ མི་ནི་ཟས་ནོར་ཀུན་གྱི་འབྱུང་གནས་ཆེ༔ ཀུན་ཀྱང་དབང་འདུས་བྱང་ཆུབ་མཆོག་འགོད་ཤོག༔ རྩ་སྔགས༔ ཨ་ཏྲི་ནྲྀ་པ་ཤཾ་ཀུ་རུ་ཨ་བྷི་ཥིཉྩ་ཧཱུྃ༔ བཀྲ་ཤིས་རྟགས་བརྒྱད་སྦྱིན་པ་ནི༔ ཧྲཱིཿ རྒྱལ་བའི་མཚན་དཔེའི་སྐུ་ཡི་ཆ་ཤས་ལས༔ གདུགས་སོགས་བཀྲ་ཤིས་རྟགས་ཀྱི་དགེ་མཚན་ཤར༔ སྐལ་ལྡན་སློབ་བུའི་ལུས་ལ་དབང་བསྐུར་བས༔མི་མཐུན་ཀུན་ཞི་མཐུན་རྐྱེན་ཕུན་ཚོགས་ཤོག༔ མངྒ་ལཾ་ཨཥྚ་ཨ་བྷི་ཥིཉྩ་ཧཱུྃ༔ རྒྱལ་སྲིད་སྣ་བདུན་སློབ་བུར་གཏད༔ ཧྲཱིཿ བསོད་ནམས་ཤུགས་དྲག་ས་སྐྱོང་རིན་པོ་ཆེར༔ འཁོར་ལོ་ལ་སོགས་རྒྱལ་སྲིད་རྣམ་པ་བདུན༔ འབད་རྩོལ་མེད་པར་ཐོབ་པ་ཇི་བཞིན་དུ༔ ཁྱོད་ལ་དབང་བསྐུར་འབྱོར་བས་མངོན་མཐོ་ཤོག༔ སཔྟ་མ་ཧཱ་རཏྣ་ཨ་བྷི་ཥིཉྩ་ཧཱུྃ༔ སྤྲོ་ན་གཏོར་མ་གནས་བཞིར་གཏུགས༔ ཨོཾ་ཨཱཿཧཱུྃ༔ རིགས་བདག་སྣང་མཐའ་ཡས་པས་བྱིན་གྱིས་རློབས་ཤིག༔ པདྨ་ཧེ་རུ་ཀ་ཡིས་བྱིན་གྱིས་རློབས་ཤིག༔ རིག་བྱེད་དབང་གི་ལྷ་མོས་བྱིན་གྱིས་རློབས་ཤིག༔ རིག་འཛིན་ནཱ་གརྫུ་ནས་བྱིན་གྱིས་རློབས་ཤིག༔ སྤྲུལ་སྐུ་པདྨ་རྒྱལ་པོས་བྱིན་གྱིས་རློབས་ཤིག༔ ཅེས་སོགས་བརྒྱུད་པའི་མཚན་ནས་བརྗོད༔ དེས་ཀྱང་མཆོད་སྦྱིན་ལ་སོགས་པའི༔ དམ་ཚིག་ཁས་བླངས་མཎྜལ་འབུལ༔ ཤིས་པ་བརྗོད་པས་མཐའ་རྒྱས་བྱ༔ རྗེས་གནང་འཆིང་བྱེད་ནོར་བུ་འདིས༔ གནས་སྐབས་གེགས་སེལ་མཐུན་རྐྱེན་འགྲུབ༔ སྣང་བ་དབང་དུ་འདུས་པར་འགྱུར༔ རིག་འཛིན་མཁའ་འགྲོའི་བརྡས་བསྐུལ་ནས༔ སྐལ་ལྡན་དོན་དུ་ཡི་གེར་བཀོད༔ ས་མ་ཡཱ༔ རྒྱ་རྒྱ་རྒྱ༔