བསེ་རག་བཀར་བ་འདྲེ་ངན་མཐར་བསྐྲད།

ནོར་རྒྱུན་ལྷ་མོའི་ཐུགས་སྒྲུབ་ལས༔ བསེ་རག་བཀར་བ་འདྲེ་ངན་མཐར་བསྐྲད་བཞུགས༔

འཕགས་མ་ནོར་རྒྱུན་ལྷ་མོ་དང་༔ གསང་བདག་ཁྲོ་བོའི་རྒྱལ་ལ་འདུད༔ ནོར་ལྷ་གསང་སྒྲུབ་འདི་བརྩམས་ཚེ༔ བསེ་རག་བཀར་བ་འདིར་བརྩོན་བྱ༔ ཞེས་ཕྱིར་སྐྱེ་སྔོན་ཚོགས་བསགས་པའི༔ གང་ཟག་མཆོག་རྣམས་མ་གཏོགས་པ༔ འདི་འདྲའི་གདམས་པ་ཉམས་བླང་ཚེ༔ སྒབ་འདྲེ་བསེ་རག་དག་གིས་གནོད༔ དེ་ཕྱིར་ཡས་གླུད་འདི་གལ་ཆེ༔ སྡེར་ཆག་སྣོད་དུ་སྦང་ཟན་ལ༔ བསེ་རག་རྒྱལ་པོ་རི་བོང་ཞོན༔ ལག་གཉིས་བཟེད་ཅིང་གད་མོ་དགོད༔ གོས་ངན་ཧྲུལ་པོ་གྱོན་པའི་ཚུལ༔ གཡས་སུ་ནོར་ལ་གོད་ཁ་དང་༔ མི་འདོད་གཏོང་བའི་འབྱུང་པོ་ནི༔ བསེ་རག་ཤ་ཟན་ཞེས་བྱ་བ༔ བཤའ་སེལ་ཁུར་ཞིང་སྟྭ་རེ་ཐོགས༔ སྐེད་ལ་བཤའ་གྲི་རྗེན་པར་འཆང་༔ ཁྲག་གིས་སྦགས་པའི་གོས་ཧྲུལ་གྱོན༔ གཡོན་དུ་ཟས་ཀྱི་ལག་འགོང་མོ༔ བུད་མེད་གཟུགས་རིད་ཡོན་པོར་བལྟ༔ གོས་ངན་ཐག་ཧྲུལ་སྐེད་དུ་འཆང་༔ མདུན་དུ་འབྲུ་ཆང་དཀར་སྐྱུར་ལ༔ རྒྱུན་དུ་རྐུ་བའི་བློ་རྐུན་ཞེས༔ མི་སྐྱ་སིང་མོའི་ཕོར་པ་ཐོགས༔ རྒྱབ་ཏུ་ཡུལ་གྲོང་དམ་སྲི་མོ༔ བུད་མེད་རལ་ཅན་ཐགས་ཆ་ཁུར༔ དེ་འདྲའི་གཟུགས་ཀྱི་མཐའ་འཁོར་དུ༔ ཆངས་བུ་ཏིང་ལོ་གཏོར་མ་དང་༔ ཕོ་མོའི་གླུད་དང་རྟ་ནོར་ལུག༔ བྱ་ངན་སྲོག་ཆགས་གོང་མ་སྲེག༔ ཕག་དང་བོང་བུ་རྟོལ་ལུ་རྣམས༔ ཕྱོགས་མཚམས་བརྒྱད་དུ་དགོད་པར་བྱ༔ ཚ་སྒོག་རམ་རུག་ཁྱི་སྤྱང་བྲུན༔ ཐག་འབྲེང་ཆད་དུམ་གཡེར་མ་དང་༔ སྐྱུར་བསླད་རུས་དུམ་རྫས་རྣམས་བླུག༔ རང་ཉིད་གསང་བའི་བདག་པོ་ཡིས༔ ང་རྒྱལ་ལྡན་པས་སྔགས་དྲུག་དང་༔ ཕྱག་རྒྱ་དྲུག་དང་ལྷ་དྲུག་གིས༔ བྱིན་གྱིས་བརླབས་ཤིང་གཟུགས་དེ་ལ༔ ལོག་འདྲེན་འགུགས་པ་འདི་སྐད་དོ༔ ཀྱཻ༔ སྔོན་ཚེ་ཡེ་ཐོག་བསྐལ་པ་དང་པོའི་དུས༔ མི་རྣམས་བསོད་ནམས་ཚོགས་གཉིས་རབ་རྫོགས་ཏེ༔ རྣམ་རྟོག་ཕྲ་མོ་ཟས་ནོར་བདག་འཛིན་དང་༔ གཞན་ལ་རྐུ་དང་སེར་སྣས་བཅིངས་པ་སོགས༔ མ་དག་རྒྱུད་ལ་གློ་བུར་སྣང་བའི་འདྲེ༔ བསེ་རག་སྤུན་ལྔ་འགོང་པོ་སྤུན་དགུ་སྲིད༔ ཕལ་ཆེར་ལོ་ཏོག་ཞོ་ཆང་ཟས་བཅུད་རྐུ༔ ཕལ་ཆེར་ནོར་ལ་གོད་ཁ་བཤའ་གྲི་ཐོགས༔ ཕལ་ཆེར་ཡོད་ལ་མི་དགའ་མེད་ལ་དགའ༔ ཚོང་འགྲུལ་བློ་ཉེས་མི་ཁའི་སྣ་འདྲེན་བྱེད༔ དེང་འདིར་བདག་གིས་ནོར་ལྷ་སྒྲུབ་པ་ལ༔ བར་ཆད་བྱེད་པའི་བསེ་རག་འགོང་པོའི་རིགས༔ རང་ལ་འཁོར་རམ་གཞན་གྱི་ཟླ་ལས་བྱུང་༔ ཡུལ་ལ་གནས་ཤིང་ཟས་ནོར་གོས་རྗེས་འབྲང༔ མེད་སྲི་ལྟོགས་འགོང་འབྱུང་པོ་གང་ཡིན་པ༔ བསླུ་མེད་སངས་རྒྱས་ཆོས་དང་དགེ་འདུན་དང་༔ བླ་མ་ཡི་དམ་མཁའ་འགྲོ་ཆོས་སྐྱོང་ཚོགས༔ ཁྱད་པར་གསང་བདག་བཛྲ་པཱ་ཎི་དང་༔ ནོར་ལྷ་ཡབ་ཡུམ་འཁོར་བཅས་བདེན་པའི་མཐུས༔ བསེ་རག་སྤུན་ལྔ་གཟུགས་བརྙན་འདི་ལ་ཁུག༔ འགྲོ་དབང་མེད་ཅིང་ལྕགས་ཀྱུས་སྙིང་ནས་ཟུང་༔ ཞགས་པས་འཆིང་ཞིང་ལྕགས་སྒྲོག་ཡན་ལག་སྡོམས༔ དྲིལ་བུས་མྱོས་ནས་བཀའ་ཉན་གསུང་སྡོད་གྱུར༔ སརྦ་བུདྡྷ་ས་མ་ཡཱ་ཏྲི་ཨ་ཀར་ཤ་ཡ་ཛ་ཛ༔ ཏིང་འཛིན་ལྡན་པས་ལྔ་གསུམ་བདུན་གྱིས་འགུགས༔ དེ་ནས་ཡས་གླུད་སྦྱིན་པ་འདི་སྐད་དོ༔ ཀྱཻ༔ ཉོན་ཅིག་བསེ་རག་རྒྱལ་པོ་གཞོན་ནུ་འབར༔ བྱ་སེལ་ཁུར་བའི་ཤན་པ་ལག་དམར་དང་༔ ཟས་ལ་རྐུ་བའི་འགོང་པོ་འཇུར་འགེགས་མ༔ སྐྱུར་ལ་དགའ་བའི་ལྟོགས་འགོང་མེད་སྲི་དང་༔ འབྱུང་པོ་ཀུན་གྱི་སྣ་འདྲེན་ཡུལ་འདྲེ་མོ༔ ཁྱེད་ཅག་ཀུན་ལ་ལན་ཆགས་རྔན་པ་སྦྱིན༔ ཞོ་བསླད་ཆང་གི་སྦང་མ་སྒོག་པ་དང་༔ རམ་རུག་རུས་དུམ་ཟས་ཀྱི་སྐལ་བར་བསྔོ༔ ཝ་སྤྱང་ཁྱི་ཡི་བྲུན་རྣམས་སྣོམ་པའི་དྲི༔ གོས་ངན་ལྭ་བ་ཧྲུལ་པོ་ཀོ་ལྤགས་ཀྱི༔ དུམ་བུ་ལ་སོགས་གོས་ཀྱི་སྐལ་བར་བསྔོ༔ སྲེག་པ་ཁྱིམ་བྱ་རི་བོང་ཞོན་པ་དང་༔ ཕག་ནག་རིལ་ཚེ་བོང་བུ་ལ་སོགས་པ༔ སྲོག་ཆགས་ཐ་མ་ཕྱུགས་ཀྱི་གླུད་དུ་བསྔོ༔ ཐག་འབྲེང་ཆང་དུམ་ཇ་ཡི་བསྐོལ་རོ་སོགས༔ ཁྱོད་ལ་གང་འདོད་ཟས་གོས་ནོར་ཕྱུགས་དང་༔ ཕག་ཚིལ་ཏིང་ལོ་སྒྲོན་མེའི་མཆོག་ཏུ་བསྔོ༔ གོ་གསུམ་ཐལ་བ་སྒྱེད་གསུམ་དྲེག་པ་དང་༔ དབུལ་པོ་གསུམ་གྱི་ཟས་ལྷག་བསྡུས་པ་རྣམས༔ དགའ་བས་ལོངས་ལ་གནས་འདིར་མ་འཁོར་བར༔ ཤར་ཕྱོགས་ལུས་འཕགས་གླིང་ཞེས་བྱ་བར་དེངས༔ དེ་ན་ངོ་མཚར་འདོད་པའི་ཡོན་ཏན་ཆེ༔ ནམ་མཁའ་དཀར་པོའི་གཟི་འོད་ཡ་ལ་ལ༔ མི་རྣམས་ལུས་འཕགས་གཟི་བརྗིད་ལྟ་ན་སྡུག༔ དཀོར་ནོར་ལོངས་སྤྱོད་དཔག་མེད་རྫ་ལྟར་སྤུངས༔ ཆོས་བོན་དྲག་སྔགས་ཐུན་གྱི་མིང་ཡང་མེད༔ དེ་རུ་སོང་ལ་ཅི་བདེར་ལོངས་སྤྱོད་ཀྱིས༔ བདག་གི་ནོར་ལྷ་བསྒྲུབ་པའི་གནས་མཆོག་འདིར༔ སྐད་ཅིག་ཙམ་ཡང་སྡོད་པའི་གནས་མ་མཆིས༔ གལ་ཏེ་བཀའ་ལས་འདའ་ཞིང་འདིར་འཁོར་ན༔ དཀོན་མཆོག་གསུམ་དང་བཛྲ་པཱ་ཎི་དང་༔ རྩ་གསུམ་ནོར་ལྷ་རྒྱ་མཚོའི་བདེན་སྟོབས་ཀྱིས༔ ཁྱེད་རྣམས་མགོ་བོ་ཚལ་པ་བརྒྱར་འགས་ཤིང་༔ ལུས་ཀྱང་རྡུལ་ཕྲན་བཞིན་དུ་གཞིག་པར་འགྱུར༔ དེ་བས་འདི་རུ་མ་འདུག་གཞན་དུ་དེངས༔ བཛྲ་པཱ་ཎིའི་སྔགས་ཤམ་དུ༔ སུཾ་བྷ་ནི་དང་དྲག་སྔགས་བརྗོད༔ དཀར་ནག་རྡོ་ཐུན་དག་གིས་བྲབ༔ ཡས་གླུད་ཁྱིམ་གྱི་བདག་པོ་དེའི༔ ལོ་བདུད་ཕྱོགས་སུ་བསྐྱལ་བར་བྱ༔ ས་མ་ཡཱ༔ རྗེས་ལ་སྲུང་འཁོར་བསྒོམ་པ་ནི༔ ཧྲཱིཿ རྩ་གསུམ་ནོར་ལྷ་རྒྱ་མཚོའི་དཀྱིལ་འཁོར་འདིར༔ འདུ་བར་མི་འོས་སྒབ་འདྲེ་བསེ་རག་རྣམས༔ སྲུང་བའི་གུར་ཁང་རྡོ་རྗེའི་གོ་ཆ་ལས༔ ནམ་ཡང་འདའ་བའི་གོ་སྐབས་མེད་པར་གྱུར༔ གལ་ཏེ་གནོད་ཚེའི་བསམ་པས་འདིར་འོང་ན༔ ཡེ་ཤེས་ལྔ་ལྡན་མེ་ཡིས་བསྲེག་པར་འགྱུར༔ དཀོན་མཆོག་བཀའ་ལས་འདས་པའི་ཆད་པ་ཡིས༔ མགོ་བོ་འགས་ཤིང་སྙིང་ཡང་དུམ་བུར་འཐོར༔ ཁྲོ་བོ་ཁྲོ་མོའི་མཚོན་ཆའི་ཆར་འབེབས་པས༔ ནམ་ཡང་བདེ་བའི་གོ་སྐབས་དང་བྲལ་ནས༔ གཞན་ལ་གནོད་བསམ་རང་ལ་སྨིན་པར་འགྱུར༔ དེ་བས་སྲུང་བའི་མཚམས་འདིར་མ་འདུག་ཅིག༔ གསང་བདག་ཁྲོ་བོའི་སྔགས་ཤམ་དུཿ དྲག་སྔགས་བཛྲ་རཀྵ་བརྗོད༔ བྱ་ཁྱུང་རིགས་ལྔའི་སྔགས་བྱང་དང་༔ ཁྲོཾ་ཡིག་བྲིས་པ་ཁྱིམ་གྱི་སྒོ༔ ནོར་ཕྱུགས་ར་བ་རྣམས་ལ་གདགས༔ སངས་རྒྱས་སྟོང་གི་སྐུ་སྲུང་བ༔ གསང་བདག་རྡོ་རྗེ་འཛིན་པ་ཉིད༔ ཡེ་ཤེས་ཁྱུང་ལྔའི་སྐུར་བཞེངས་ནས༔ རྟེན་དང་གཉིས་སུ་མེད་པ་ཡི༔ བགེགས་རིགས་མ་ལུས་སྲུང་བར་བསམ༔ རྡོ་རྗེ་འཛིན་དང་བྱ་ཁྱུང་ལྔའི༔ སྔགས་ལ་རྟེན་འབྲེལ་སྙིང་པོ་གདགས༔ ཤིས་བརྗོད་མེ་ཏོག་འཐོར་བར་བྱ༔ ཨེ་མ་ནོར་ལྷའི་ཆོ་ག་འདིར༔ འཇུག་པའི་ཐོག་མར་ཚོགས་བསགས་ཕྱིར༔ རྩ་གསུམ་སྲུང་མར་ཚོགས་གཏོར་དང་༔ ཆུ་སྦྱིན་གྲངས་ལྡན་ཁྱད་པར་དུ༔ ཉ་གྲོག་སྦྱིན་གཏོང་ལ་སོགས་བྱ༔ དེ་རྗེས་ཡས་གླུད་འདི་བརྩམས་ནས༔ བསྙེན་སྒྲུབ་ཚུལ་བཞིན་བསྐྱལ་བ་ན༔ ལོངས་སྤྱོད་འཕེལ་བར་གདོན་མི་ཟ༔ གུ་ཧྱ༔ དགེའོ༔ ཁྲོ་རྒྱལ་ལག་ན་རྡོ་རྗེའི་དབུགས་དབྱུང་ལུང་བསྟན་ཐོབ་པའི་ལུང་རིག་མིང་གིས་བྲིས་པའོ༔