བསེ་རག་བཀར་བ་གསང་སྔགས་གླིང་པའི་གཏེར་བྱོན།
༄༅།། ཀུན་བཟང་དགོངས་པའི་གསང་མཛོད་ལས༔ བསེ་རག་བཀར་བ་བཞུགས༔
༄༅།། ཀུན་བཟང་དགོངས་པའི་གསང་མཛོད་ལས༔ བསེ་རག་བཀར་བའི་ལས་ཚོགས་ནི༔ གས་ཆག་ཅན་གྱི་སྣོད་ནང་དུ༔ འགབ་འདྲེ་རི་བོང་ལ་ཞོན་པ༔ ལག་པར་སྲེ་མོང་ཕུང་ཐོད་འཛིན༔ སག་ཞུ་གྱོན་པ་དེའི་མདུན་དུ༔ མི་ཁ་བྲ་མཆུ་བྱ་གཤོག་ཅན༔ ལག་ན་ཤ་ཟུང་ཞགས་པ་འཛིན༔ གཡས་སུ་གོད་འདྲེ་བྱ་མགོ་ཅན༔ ལག་ན་བ་དན་ཁྲག་ཕོར་འཛིན༔ གཡོན་དུ་མོ་འདྲེ་ཐགས་ཆ་ཁུར༔ ལག་ན་ནལ་བུ་འཛིན་ཅིང་རྩེ༔ གཞན་ཡང་དེ་ཡི་མཐའ་བསྐོར་དུ༔ ཕོ་གླུད་མོ་གླུད་ནོར་ཕྱུགས་གླུད༔ ཟ་འཕྲོ་འཐུང་འཕྲོ་ཕྱུགས་ཀྱི་སྤུ༔ ཞོ་ལད་ཆང་ལད་རམ་པ་དང་༔ ཟོ་བཤལ་རྐྱལ་བཤལ་ཆང་བུ་འབྲུ༔ ཏིང་ལོ་མཐེབ་སྐྱུ་གློ་དུམ་སོགས། གླུད་རྫས་ཡོ་བྱད་འཚོག་པར་བྱ༔ རྫས་རྣམས་བྱིན་གྱིས་བརླབས་བྱས་ཏེ༔ རང་ཉིད་ལྷ་ཡི་ང་རྒྱལ་གྱིས༔ ཧཱུྃ༔ ང་ནི་དབང་ཆེན་རྟ་མགྲིན་རྒྱལ༔ སྲིད་པ་གསུམ་ན་ང་དབང་ཆེ༔ ཉོན་ཅིག་འབྱུང་པོ་བགེགས་ཀྱི་ཚོགས༔ ས་འོག་ས་སྟེང་ས་བླར་རྒྱུ༔ འབྱུང་པོ་མི་མིན་བགེགས་ཀྱི་རིགས༔ བསེ་རག་གཞོན་ནུའི་རྒྱལ་པོ་ཆེ༔ ནོར་ལ་གང་སྟོང་གཏོང་བའི་བདག༔ མདོས་གླུད་ལེན་ཕྱིར་འདིར་འདུས་ཤིག༔ ཕོ་ཉ་མི་ཁ་བྲ་མཆུ་དང་༔ གནོད་བྱེད་ཕུང་སྲི་གོད་འདྲེའི་རིགས༔ མི་སྲི་བསེན་མོ་རལ་པ་ཅན༔ གནོད་པར་རྩོམ་པའི་བགེགས་ཀྱི་རིགས༔ ཐན་བདག་འགོང་པོ་ཕུང་སྲིའི་ཚོགས༔ མ་ལུས་འཁོར་དང་བཅས་པ་ཀུན༔ གླུད་ཀྱི་མགྲོན་ལ་འདིར་འདུས་ཤིག༔ བསྔོས་པའི་གླུད་གཏོར་རྫོངས་འདི་ལོངས༔ བསྒོ་བའི་བཀའ་ལ་ཉན་པར་གྱིས༔ ཀྱཻ༔ ད་ནི་ཁྱོད་ལ་རྫོངས་འདེབས་སོ༔ བཙུན་པ་སྟག་ཤར་བྱིས་པ་ཆུང་༔ གཟུགས་བྱང་གཅིག་རྫོངས་ཕོ་གླུད་དང་༔ རྒྱལ་མོ་བུ་མོ་ན་ཆུང་མོ༔ གཟུགས་གསུམ་གཅིག་རྫོངས་མོ་གླུད་འབུལ༔ རྟ་མཆོག་མཛོ་མོ་འབྲི་དང་གསུམ༔ གཟུགས་གཅིག་ལ་རྫོངས་ནོར་གླུད་འབུལ༔ བདག་དང་ཡོན་བདག་འཁོར་བཅས་ཀྱི༔ ཚེ་རབས་སྔོན་ནས་ད་ལྟའི་བར༔ དཀར་མངར་ཤ་ཁྲག་མན་ཆད་དང་༔ བསླད་ཟས་སྦང་མ་ཡན་ཆད་ཀྱི༔ བསོགས་བསོགས་ཟོས་ཟོས་ཟད་པའི་འཕྲོ་རྣམས་དང་༔ དར་ཟབ་སྟག་གཟིག་མན་ཆད་དང་༔ གོས་ངན་རས་ཧྲུལ་ཡན་ཆད་ཀྱི༔ གོས་གྱོན་རྙིང་པའི་འཕྲོ་རྣམས་ཀྱིས༔ བསེ་རག་ཁྱོད་ལ་རྫོངས་འདེབས་སོ༔ གསེར་དངུལ་བང་མཛོད་མན་ཆད་ནས༔ ཁབ་དང་སྐུད་པ་ཡན་ཆད་ཀྱིས༔ བསོགས་བསོགས་སྟོངས་པའི་འཕྲོ་རྣམས་ཀྱིས༔ བསེ་རག་ཁྱོད་ལ་རྫོངས་འདེབས་སོ༔ བདག་ལ་ནོར་རྫས་ཅི་ཡོད་ཀྱིས༔ ཡར་མཆོད་མར་སྦྱིན་བྱས་ནས་ཟད༔ ལྷག་མ་ཕྲན་བུ་ཅི་ཡོད་པས༔ བསེ་རག་ཁྱོད་ལ་རྫོངས་འདེབས་སོ༔ ཞོ་ལད་སྦང་མ་རྐྱལ་བཤལ་གྱིས༔ བསེ་རག་གཞོན་ནུ་ཚིམ་གྱུར་ཅིག༔ ཏིང་ལོ་ཆང་བུ་མཐེབ་སྐྱུ་ཡིས༔ མི་ཁ་བྲ་མཆུ་ཚིམ་གྱུར་ཅིག༔ ཕོ་གླུད་མོ་གླུད་ནོར་གླུད་ཀྱིས༔ གོད་འདྲེ་ཕུང་འདྲེ་ཚིམ་གྱུར་ཅིག༔ ནམ་མཁའ་རྒྱང་བུ་ཐགས་ཆ་ཡིས༔ མོ་སྲི་བསེན་མོ་ཚིམ་གྱུར་ཅིག༔ ཟ་འཕྲོ་འཐུང་འཕྲོ་འབྲུ་སྣ་ཡིས༔ འགོང་པོའི་སྡེ་ཚོགས་ཚིམ་གྱུར་ཅིག༔ ཞྭ་ངན་གོས་ངན་ལྷམ་ངན་གསུམ༔ ངན་གསུམ་རྫོངས་ཀྱིས་ཚིམ་གྱུར་ཅིག༔ རྫ་ཆག་ཕོར་ཆག་སྡེར་ཆག་གསུམ༔ ཆག་གསུམ་རྫོངས་ཀྱིས་ཚིམ་གྱུར་ཅིག༔ བདག་ཅག་དཔོན་སློབ་འཁོར་བཅས་ཀྱི༔ མི་ཕྱུགས་གཉིས་ལ་གནོད་མ་བྱེད༔ མི་ཡི་ཚེ་དང་ཕྱུགས་ཀྱི་གཡང་༔ ཟས་ཀྱི་བཅུད་དང་ལུས་ཀྱི་བཀྲག༔ མ་རྐུ་མ་ཁྱེར་མ་ཕྲོག་ཅིག༔ འོ་མ་རུལ་དང་ཞོ་མི་ཆགས༔ ཆང་ལ་ཁ་ཚ་སྐྱུར་ཕོག་ཅིང་༔ ནོར་རྫས་འདུ་ཡང་མི་ཕན་པ༔ སེམས་ཅན་འོ་མ་མི་སྟེར་ཞིང་༔ འཕག་དང་རྡུང་ཞིང་རི་ལ་འཆོར༔ འོ་བཤིགས་མར་མི་འབྱུང་བ་རྣམས༔ བསེ་རག་ཁྱོད་ཀྱི་འཕྲུལ་ཡིན་པས༔ ཐམས་ཅད་བཟློག་ཅིང་སྒྱུར་ལ་སོང༔ དྲེལ་རྟས་རྔ་རྔོག་འཆའ་བ་དང་༔ འདྲོག་ཅིང་སྒ་བཅག་ཡུལ་དོན་པ༔ ཞིང་ལ་སད་སེར་འབུ་སྲིན་འཚེ༔ བྱི་བས་གནོད་པ་ཐན་པས་འཇིགས༔ སྙེ་མ་སྐྱེས་ཀྱང་འབྲུ་མེད་པ༔ འགོང་པོ་ཁྱོད་ཀྱིས་བཟློག་ཏུ་གསོལ༔ གཞན་ཡང་བདག་ཅག་དཔོན་སློབ་ལ༔ རྨི་ལྟས་མཚན་མ་ངན་པ་དང་༔ ཆགས་ཆེ་ཉམ་ང་བཀྲ་མི་ཤིས༔ ཐན་ལྟས་རྦོད་གཏོང་ཐམས་ཅད་དང་༔ མི་མཐུན་ཕྱོགས་རྣམས་མ་ལུས་པ༔ ཟློག་ཅིང་སྡང་བའི་དགྲ་ལ་སྒྱུར༔ ལམ་བསྟན་ནི༔ ཀྱཻ༔ ད་ནི་ཁྱོད་ལ་ལམ་བསྟན་ནོ༔ ཁྲོ་བོ་ཁྲོ་མོའི་སྤྲིན་ཕུང་འཁྲིགས༔ ཡང་སྤྲུལ་ཁྲོ་ཆུང་སེར་ལྟར་གཏིབས༔ རིག་སྔགས་གདུག་པའི་མཚོན་ཆ་འབར༔ འདྲེ་གདོན་འདུག་པའི་གནས་མི་བདེ༔ བསེ་རག་གཞོན་ནུའི་རྒྱལ་པོ་ཁྱོད༔ འདི་ནས་ཆུ་བོའི་གཞུང་ལམ་ལ༔ འདུག་པའི་གནས་ཤིག་བདེ་བར་མཆིས༔ རྒྱ་ནག་རྒྱལ་པོའི་ཕོ་བྲང་ཡོད༔ ཟས་སྣ་བཏུང་བ་ཅིས་མི་འཛོམ༔ ཕྱྭ་གཡང་ལོངས་སྤྱོད་དེ་རུ་ཆེ༔ སྣང་སྲིད་ལྷ་འདྲེ་ཀུན་གྱི་གནས༔ འདི་རུ་མ་འདུག་དེ་རུ་སོང་༔ བཀའ་བཞིན་མི་འགྲོ་འདིར་འདུག་ན༔ ཡེ་ཤེས་ཁྲོ་རྒྱལ་རྔམ་པ་ཡིས༔ གསོད་ཅིང་གཞོམ་པར་ཐེ་ཚོམ་མེད༔ རང་གཟུགས་གླུད་ཀྱིས་ཚིམ་གྱིས་ལ༔ སྣང་སྲིད་ལྷ་འདྲེའི་ཚོགས་གྲལ་སོང་༔ ང་ཡིས་བདེ་བར་ལམ་བསྟན་གྱི༔ དེ་རིང་ཉི་མ་ཕན་ཆད་ལ༔ གནས་འདིར་མ་ལྡོག་མ་གནོད་ཅིག༔ བཀའ་དང་དམ་ལ་མ་འདའ་བར༔ ད་ལྟ་ཉིད་དུ་ཕྱིར་དེངས་ཤིག༔ ཅེས་བདེན་སྟོབས་བརྗོད་ཅིང་དྲག་སྔགས་དང་ཧཱུྃ་བཞིས་ཕྱིར་བསྐྲད༔ ཀ་ཅ་ནོར་རྫས་ཀུན་ལ་ཚེར་ལྕག་གིས་བྲབ་ཅིང་གླུད་བསྐོར་ནས་ཆུ་བོའི་གཞུང་ལ་བསྐྱལ་བར་བྱའོ༔ འགོང་པོའི་གནོད་པ་སེལ་བའི་མན་ངག་ཟབ་པོ༔ ས་མ་ཡཱ༔ རྒྱ་རྒྱ་རྒྱ༔ ཞེས་ཀུན་བཟང་དགོངས་པའི་གསང་མཛོད་ཀྱི་ཆོས་སྡེ་ལས༔ ཛམ་བྷ་ལའི་སྒྲུབ་ཐབས་ཀྱི་ཆ་ལག་འདི་ནི་རིག་འཛིན་གསང་སྔགས་གླིང་པས་དགོངས་ཀློང་ཆོས་ཉིད་ཀྱི་དབྱིངས་མཛོད་ནས་གདན་དྲངས་ཤིང་དག་པར་ཕབ་པས་ཡི་གེ་པ་ནི་དགེ་སྦྱོང་པདྨ་བསྟན་འཛིན་གྱིས་བྲིས་པ་དགེ་ལེགས་འཕེལ༔