གཏེར་བུམ་སྒྲུབ་ཐབས་འབྱུང་བའི་བཅུད་བསྡུས།

ནོར་རྒྱུན་ལྷ་མོའི་ཐུགས་སྒྲུབ་ལས༔ གཏེར་བུམ་སྒྲུབ་ཐབས་འབྱུང་བའི་བཅུད་བསྡུས་བཞུགས་སོ༔

འགྲོ་བའི་དབུལ་བ་སེལ་མཛད་པ༔ ནོར་རྒྱུན་ལྷ་མོའི་ཞབས་ལ་འདུད༔ སྙིགས་དུས་འགྲོ་བ་བསོད་ནམས་དམན༔ སྡིག་སྤྱོད་ལྷ་ཀླུ་འཁྲུགས་པ་ཡིས༔ ཆར་ཆུ་ལོ་འབྲས་དུས་མི་སྨིན༔ ཟས་གོས་བཅུད་མེད་ལྟོགས་ཤིང་འགོང་༔ མི་རྣམས་སེམས་ཞུམ་སྡུག་བསྔལ་མནར༔ དེ་ཚེ་བྱང་ཆུབ་སེམས་ལྡན་པས༔ གདམས་པ་ཟབ་མོ་འདི་ལ་འབད༔ ས་མ་ཡཱ༔ གཟའ་སྐར་ལེགས་པའི་དུས་སྦྱོར་ལ༔ ཡིད་དང་མཐུན་པའི་གནས་དལ་དུ༔ དཀྱིལ་འཁོར་གཞུང་བཞིན་ལེགས་བཀོད་དེ༔ མདུན་དུ་དར་རས་དཀར་པོའི་གདན༔ གྲུ་བཞི་འདབ་བརྒྱད་བྲིས་པའི་སྟེང་༔ ནས་དང་འབྲས་ཀྱི་ཚོམ་བུ་བཀོད༔ རབ་ལ་ལྕགས་ཀྱི་བུམ་པ་བྱ༔ འབྲིང་དུ་ཟངས་འཁར་ཐ་མ་ས༔ སྙིམ་པ་བཅོ་བརྒྱད་ཤོང་པ་འམ༔ ཡང་ན་དགུ་བདུན་ཙམ་གྱི་སྣོད༔ གས་ཆག་མེད་པ་ཚོན་གྱིས་བྱུག༔ བཀྲ་ཤིས་རྟགས་བརྒྱད་རི་མོ་བྱ༔ ནང་དུ་རྫས་སྣ་གཞུག་པ་ནི༔ བླ་མ་པདྨ་འབྱུང་གནས་དང་༔ ཡི་དམ་སྒྲུབ་སྡེ་བརྒྱད་ཀྱི་ལྷ༔ མཁའ་འགྲོ་སྒྲོལ་མ་ཉེར་གཅིག་དང་༔ ནོར་ལྷ་ཡབ་ཡུམ་བརྒྱད་ཀྱི་སྔགས༔ ཛམ་དཀར་སེར་དམར་ཁྱད་པར་དུ༔ ནོར་རྒྱུན་ལྷ་མོའི་སྔགས་མང་བྲི༔ རང་གིས་གང་བརྟེན་ཆོས་སྐྱོང་གི༔ གཟུངས་མཐར་སྦྱིན་བདག་འདི་ཞེས་ལ༔ ནོར་གྱི་དངོས་གྲུབ་སྩོལ་ཅིག་ཅེས༔ འདོད་གསོལ་ཤིས་བརྗོད་དང་བཅས་པ༔ གསེར་དངུལ་རྒྱ་མཚལ་སྣག་ཚས་བྲིས༔ ལྷ་ཤིང་སྲོག་རྟེན་སྣོད་ཀྱི་ཚད༔ མགོ་མཇུག་མ་ནོར་དར་སྣས་དྲིལ༔ རྒྱ་བོད་གནས་ཆེན་རྣམས་ཀྱི་ས༔ གསེར་དངུལ་ཟངས་ལྕགས་པད་རག་གཡུ༔ མེ་ཤེལ་ཆུ་ཤེལ་དར་སྣ་ལྔ༔ ག་བུར་ཛ་ཏི་སླེ་ཏྲེས་དང་༔ གུར་གུམ་ཙནྡན་དཀར་དང་དམར༔ འབྲས་བུ་གསུམ་དང་སྙིང་ཞོ་ཤ༔ ཀླུ་སྨན་སྣ་ཚོགས་གཡང་ཅན་རྫས༔ དཀར་གསུམ་དེ་བཞིན་ཤིང་ཐོག་རིགས༔ ཕྱུག་པོའི་ཞིང་ས་རྒྱལ་པོའི་ནོར༔ གཡང་ནོར་སྤུ་དང་ནས་འབྲས་གྲོ༔ ལེགས་པར་གཏམས་ཏེ་དར་སྣ་ལྔས༔ སྟེང་ནས་དགབ་ཅིང་དམ་པོར་བྱ༔ གུ་གུལ་བདུག་ཅིང་ཡུངས་ཐུན་བྲབ༔ བསེ་རག་འགོང་པོར་ལན་ཆགས་སྦྱིན༔ དཀོན་མཆོག་བདེན་པས་བཀའ་ཡང་བསྒོ༔ སྔགས་དམིགས་མཚམས་བཅད་དྲག་ཏུ་བྱ༔ ཕྱི་ནང་མཆོད་རྫས་གཡང་རྟེན་སོགས༔ གང་ཡོད་ལེགས་པར་བཀྲམ་བྱས་ནས༔ ཆོ་ག་སྒྲུབ་ཅིང་བསྙེན་པ་གཏོང་༔ སྐབས་སུ་གཏེར་བུམ་བསང་བྱས་ཏེ༔ ལྷ་དང་ལྷ་མིན་ཅོན་པཎ་གྱིས༔ སོགས། ཡུམ་ལ་ཕྱག་འཚལ་བསྟོད༔ ཕྱག་འཚལ་ས་གཞི་སྐྱོང་བའི་སོགས༴ཤྭ་ལོ་ཀ་ལན་བདུན་བརྗོད༔ མཆན། སྭ་བྷ་ཝའི་སྔགས་ཀྱིས་སྦྱངས༔ སྟོང་པའི་ངང་ལས་བྷྲུཾ་ཡིག་སྔོན་པོ་ལས༔ བཻཌཱུར་བུམ་པ་མཚན་ཉིད་ཚང་བའི་ནང་༔ ཡངས་ཤིང་རྒྱ་ཆེ་ནོར་ལྷ་བཞུགས་པའི་གནས༔ རིན་ཆེན་སྣ་ལྔའི་ཕོ་བྲང་བཀོད་ལེགས་དབུས༔ འདོད་འབྱུང་བུམ་པ་པདྨ་ཉི་ཟླའི་སྟེང་༔ སྐད་ཅིག་དྲན་རྫོགས་ལྷ་མོ་ནོར་རྒྱུན་མ༔ འཛམ་བུའི་གསེར་མདོག་ཞི་འཛུམ་སྒེག་ཅིང་འགྱིང་༔ ཞལ་གཅིག་ཕྱག་གཉིས་ཞབས་གཉིས་བཞེངས་པའི་སྟབས༔ སྐུ་སྟོད་དར་སྔོན་སྟོད་གཡོགས་གསེར་རིས་ཅན༔ སྨད་དཀྲིས་འཇའ་ཁྲ་ནོར་བུའི་སྐ་རགས་བསྡམས༔ མུ་ཏིག་མགུལ་རྒྱན་རིན་ཆེན་འཕྱང་འཕྲུལ་གཡོ༔ གསེར་གྱི་པྲོག་ཞུ་གཡུ་སྔོན་ཕྲ་ཚོམ་སྤྲས༔ ཕྱག་གཡས་འབྲས་ཀྱི་སྙེ་མ་འབྲུ་ཆར་འབེབས༔ ཕྱག་གཡོན་གཏེར་བུམ་སྣ་ཚོགས་ནོར་བུས་གཏམས༔ ཞལ་ནས་རྟག་ཏུ་སྦྱིན་ཞེས་ཆོས་སྒྲ་སྒྲོག༔ མདུན་དུ་བཻ་ལས་རྒྱལ་པོ་རྣམ་ཐོས་སྲས༔ བཙོ་མ་གསེར་གྱི་མདངས་ཕྲོག་དགྱེས་པའི་ཉམས༔ འཛུམ་པའི་སྤྱན་གྱིས་འཕགས་མའི་ཞལ་ལ་བལྟ༔ ཟ་འོག་བེར་བརྩེགས་དར་གོས་ལྷབ་ལྷུབ་གསོལ༔ རིན་ཆེན་པྲོག་ཞུ་གདུ་བུ་སྙན་རྒྱན་འཁྲོལ༔ གནག་སྣུམ་དབུ་སྐྲའི་ལྕང་ལོ་མུ་ཏིག་རྒྱན༔ ཕྱག་གཡས་རྒྱལ་མཚན་གཡོན་པས་ཡིད་བཞིན་ནོར༔ ཞབས་གཉིས་ཕྱེད་སྐྱིལ་པད་ཟླའི་གདན་ལ་རོལ༔ གཙོ་མོའི་སྤྱི་བོར་པད་ཟླའི་གདན་གྱི་སྟེང་༔ རྒྱལ་ཀུན་ཡོན་ཏན་བདག་ཉིད་རིན་ཆེན་མང་༔ མཆོག་སྦྱིན་མཉམ་བཞག་སྤྲུལ་སྐུའི་ཆ་ལུགས་ཅན༔ མཚན་དཔེ་ཡོངས་རྫོགས་རྡོ་རྗེ་སྐྱིལ་ཀྲུང་བཞུགས༔ ཡབ་ཡུམ་མཐའ་བསྐོར་ཕྱོགས་མཚམས་བརྒྱད་པོ་རུ༔ ཛཾ་བྷ་ལ་དང་གང་བ་བཟང་པོ་དང་༔ མ་ཎི་བྷ་དྲ་གནོད་སྦྱིན་ཡང་དག་ཤེས༔ ཀུ་བེ་ར་དང་འབྲོག་གནས་ལྔ་རྩེན་དང་༔ འཇམ་པོ་འཁྱིལ་བ་རང་རང་ཡུམ་དང་བཅས༔ དཀར་སེར་དམར་ལྗང་སྔོ་མཐིང་གཟི་འོད་འབར༔ དར་སྣའི་ན་བཟའ་ནོར་བུའི་རྒྱན་ཆ་བརྗིད༔ ཕྱག་མཚན་སྣ་ཚོགས་འདོད་རྒུའི་གཏེར་ཆེན་པོ༔ བསྟན་དང་འགྲོ་བའི་དབུལ་བ་སེལ་བའི་ལྷ༔ ཀླུ་ཆེན་བརྒྱད་དང་ཚོགས་བདག་གླང་པོའི་གདོང་༔ ལྷ་དང་དྲང་སྲོང་བདེན་ཚིག་གྲུབ་པའི་ཚོགས༔ གཙོ་འཁོར་ཀུན་གྱི་གནས་གསུམ་འབྲུ་གསུམ་ལས༔ དཀར་དམར་མཐིང་གསུམ་འོད་ཟེར་རབ་འཕྲོས་པས༔ དཔལ་ལྡན་ཞིང་དང་ལྕང་ལོ་ཅན་ལ་སོགས༔ དག་པའི་ཞིང་ཁམས་རབ་འབྱམས་ལེགས་བཞུགས་པའི༔ རིན་ཆེན་མང་སོགས་རྒྱལ་བ་སྲས་དང་བཅས༔ ངལ་བསོས་བུ་དང་འཕགས་མ་ནོར་རྒྱུན་མ༔ ནོར་ལྷ་རྒྱ་མཚོ་བདེན་ཚིག་གྲུབ་པའི་ཚོགས༔ རང་བཞིན་དབྱིངས་ནས་ཐུགས་རྗེའི་སྟོབས་ཀྱིས་སྤྱོན༔ སྒྲུབ་རྫས་རྟེན་དང་གཉིས་སུ་མེད་པར་གྱུར༔ སྤྱན་འདྲེན་སྤོས་རོལ་དབྱངས་དང་བཅས༔ མོས་གུས་ཤུགས་ཕྱུང་འདི་སྐད་བརྗོད༔ ཨེ་མ་ཧོ༔ ངོ་མཚར་རྨད་བྱུང་བདེ་ཆེན་དག་པའི་ཞིང་༔ རིན་ཆེན་ཆར་འབེབས་དཔལ་དང་ལྡན་པ་ནས༔ བདེ་གཤེགས་རྒྱལ་ཀུན་སྤྱི་གཟུགས་རིན་ཆེན་མང་༔ སངས་རྒྱས་བྱང་སེམས་རྡུལ་སྙེད་འཁོར་གྱིས་བསྐོར༔ རྩེ་གཅིག་གདུང་བའི་བློ་ཡིས་སྤྱན་འདྲེན་ན༔ བརྩེ་ཆེན་ཐུགས་རྗེས་གནས་འདིར་གཤེགས་སུ་གསོལ༔ རྔ་ཡབ་དཔལ་རི་སྤྲུལ་པའི་ཕོ་བྲང་ནས༔ སྙིགས་མའི་འགྲོ་མགོན་ཨོ་རྒྱན་ཐོད་ཕྲེང་རྩལ༔ རྗེ་འབངས་ཉེར་ལྔ་གཏེར་སྟོན་བརྒྱ་རྩ་སོགས༔ འགྲོ་བའི་དབུལ་སེལ་སྨོན་ལམ་ཐུགས་རྗེའི་གཏེར༔ རྩེ་གཅིག་མོས་པས་གནས་འདིར་སྤྱན་འདྲེན་ན༔ ཐུགས་བསྐྱེད་དམ་བཅའི་ཤུགས་ཀྱིས་གཤེགས་སུ་གསོལ༔ འདོད་འབྱུང་ཞིང་དང་ལྕང་ལོ་ཅན་གྱི་གནས༔ ནོར་རྒྱུན་ལྷ་མོ་རྒྱལ་པོ་རྣམ་ཐོས་སྲས༔ ནོར་ལྷ་མཆེད་བརྒྱད་གྲོགས་བྱེད་ལྷ་མོ་བརྒྱད༔ ཀླུ་ཆེན་བརྒྱད་སོགས་གཏེར་བདག་ཕན་བྱེད་ལྷ༔ མ་ལུས་ལུས་པ་མེད་པའི་ཚོགས་རྣམས་ཀུན༔ དབུལ་བས་ཉམ་ཐག་བདག་གཞན་འགྲོ་དོན་དུ༔ མོས་པས་ཤུགས་ཕྱུང་མཐུན་པའི་རྫས་བསགས་ཏེ༔ གདུང་བའི་དབྱངས་ཀྱིས་གནས་འདིར་སྤྱན་འདྲེན་ན༔ སྒྲིབ་མེད་མཁྱེན་པའི་སྤྱན་གྱིས་ཉེར་གཟིགས་ནས༔ ཚད་མེད་ཐུགས་རྗེ་ཆེན་པོས་རྒྱུད་བསྐུལ་ཏེ༔ ཉམ་ཐག་དབུལ་བའི་འགྲོ་ལ་ཉེར་དགོངས་ནས༔ ཐུགས་བསྐྱེད་དམ་བཅའི་སྟོབས་ཀྱིས་གཤེགས་སུ་གསོལ༔ ནོར་ལྷ་འཁོར་བཅས་གནས་འདིར་གཤེགས་པའི་ཚེ༔ སྣ་ཚོགས་དར་སྣའི་ཅོད་པཎ་ལྷུབས་སེ་ལྷུབ༔ རིན་ཆེན་མུ་ཏིག་རྒྱན་ཕྲེང་སི་ལི་ལི༔ སྣ་ཚོགས་འབྲུ་ཡི་ཆར་འབེབས་ཉི་ལི་ལི༔ ཕྱག་ཞབས་གསེར་གཡུའི་གདུ་བུ་ཁྲོ་ལོ་ལོ༔ ག་བུར་ཙནྡན་དྲི་ཞིམ་ཐུ་ལུ་ལུ༔ ཅང་ཤེས་ཞོན་པའི་གོམ་སྟབས་ཁྲབས་སེ་ཁྲབ༔ ནོར་ལྷ་དཔའ་མོའི་གླུ་ལེན་ཀྱུ་རུ་རུ༔ རོལ་མོ་སྣ་ཚོགས་སྒྲ་སྐད་དི་རི་རི༔ དབུལ་འདྲེ་ཚར་གཅོད་ཧཱུྃ་སྒྲ་སངས་སེ་སང་༔ བདག་དང་སྒྲུབ་རྫས་རྟེན་དང་བརྟེན་པར་བཅས༔ ནོར་ལྷ་རྒྱ་མཚོའི་གནས་དང་ཡོ་བྱད་དང་༔ འཕགས་མའི་སྐུ་གསུང་ཐུགས་སུ་བྱིན་གྱིས་རློབས༔ ཨོཾ་ཨཱཿཧཱུྃ༔ གུ་རུ་དེ་ཝ་ཌཀྐི་ནི་བ་སུ་དྷ་རི་བཻ་ཤྲ་མ་ཎ་ག་ན་པ་ཏི་མ་ཎི་དྷ་ར་ཨ་བེ་ཤ་ཡ་ཕེཾ་ཕེཾ༔ བཛྲ་ས་མ་ཛ་ཛ༔ དེ་ནས་རྟེན་ལ་བཞུགས་སུ་གསོལ་བ་ནི༔ ཧཱུྃ༔ བྷྲུཾ་ལས་བྱུང་བའི་གཏེར་བུམ་གཞལ་ཡས་སུ༔ དམིགས་པས་བསྐྱེད་པའི་ནོར་ལྷ་རྒྱ་མཚོའི་སྡེ༔ སྒྲུབ་པའི་སྔགས་བྱང་འབྱུང་བའི་གཡང་རྫས་ལ༔ འདུ་འབྲལ་མེད་པའི་ཚུལ་གྱིས་བཞུགས་སུ་གསོལ༔ སྔོན་ཚེ་འགྲོ་བའི་དོན་དུ་ཐུགས་བསྐྱེད་ནས༔ དབུལ་སེལ་གཏེར་དང་མུན་སེལ་སྒྲོན་མེ་རུ༔ ཐུགས་བསྐྱེད་དམ་བཅའ་སྨོན་ལམ་བཏབ་པ་རྣམས༔ དུས་འདིར་བརྩེ་བ་ཆེན་པོས་མ་དགོངས་ན༔ རང་དོན་འགྲུབ་པའི་རྫོགས་སངས་རྒྱས་རྣམས་ཀྱང་༔ གཞན་དོན་ཐུགས་བསྐྱེད་ཉམས་པར་མི་འགྱུར་རམ༔ དེ་ཕྱིར་གདུང་བའི་ང་རོ་འདིར་གསོན་ལ༔ རྣམ་པར་རྟོག་པ་མེད་ཀྱང་སྨོན་ལམ་མཐུས༔ དཔག་བསམ་ཤིང་དང་ཡིད་བཞིན་ནོར་བུ་ལྟར༔ སྒྲུབ་པའི་རྟེན་རྫས་འདི་ལ་ལེགས་བཞུགས་ནས༔ བདག་ལ་རེ་ལྟོས་སྦྱིན་པའི་བདག་པོ་ལ༔ བཅུད་ཅན་ཟས་དང་བརྗིད་ལྡན་གོས་སྩོལ་ཅིག༔ གཡང་ཅན་ནོར་དང་རྒྱུད་འཛིན་པུ་ཏྲ་དང་༔ མཛའ་བའི་གཉེན་དང་བརྟེན་པའི་གནས་གཞི་དང་༔ ཡིད་འོང་སྐྱེད་མོའི་ཚལ་དང་འདོད་འབྱུང་གཏེར༔ ཡིད་བཞིན་འགྲུབ་པའི་དངོས་གྲུབ་མཆོག་སྩོལ་ཅིག༔ ཨོཾ་ཨཱཿཧཱུྃ་གུ་རུ་དེ་ཝ་ཌཀྐི་ནི་བ་སུ་དྷ་རི་བཻ་ཤྲ་མ་ཎ་ག་ན་པ་ཏི་མ་ཎི་དྷ་ར་ཨཥྚ་བཛྲ་ས་མ་ཡཱ༔ ཛཿཧཱུྃ་བཾ་ཧོ༔ ཏིཥྛ་ལྷན༔ དེ་ནས་གུས་པས་ལྷ་ཕྱག་འཚལ་བ་ནི༔ ཧཱུྃ༔ གྲངས་མེད་བསྐལ་པ་མང་པོའི་སྔོན་རོལ་ནས༔ ཡང་དག་རྫོགས་པའི་སངས་རྒྱས་རིན་ཆེན་མང་༔ དྲན་པ་ཙམ་གྱིས་དབུལ་སེལ་འདོད་རྒུའི་གཏེར༔ བདག་གཞན་རེ་བ་སྐོང་ཕྱིར་གུས་ཕྱག་འཚལ༔ དེ་ཡི་སྤྱན་སྔར་ཐུགས་བསྐྱེད་དམ་བཅས་ནས༔ ཟས་གོས་ནོར་གྱིས་ཕོངས་པའི་སེམས་ཅན་ལ༔ ཅི་འདོད་དངོས་གྲུབ་སྟེར་བའི་ནོར་གྱི་ལྷ༔ འཕགས་མ་ནོར་རྒྱུན་དབང་མོར་གུས་ཕྱག་འཚལ༔ ས་བརྒྱད་ཐོབ་ཀྱང་འགྲོ་བའི་དབུལ་སེལ་ཕྱིར༔ གནོད་སྦྱིན་དབང་པོའི་སྲས་སུ་སྐུར་བཞེངས་ནས༔ འཛམ་བུའི་གླིང་གི་སེམས་ཅན་ལེགས་སྐྱོང་བའི༔ རྒྱལ་ཆེན་རྣམ་ཐོས་སྲས་ལ་གུས་ཕྱག་འཚལ༔ བདེ་གཤེགས་སྤྱན་སྔར་ཉེ་བའི་སྲས་ཆེན་བརྒྱད༔ གདུལ་བྱའི་དབང་གིས་ནོར་ལྷ་བརྒྱད་དུ་སྤྲུལ༔ སེམས་མ་ཆེན་མོ་དཔལ་ལྡན་བཀྲ་ཤིས་མ༔ ཡབ་ཡུམ་སྤྲུལ་པར་བཅས་ལ་གུས་ཕྱག་འཚལ༔ གཞན་ཡང་འགྲོ་བའི་ཁ་རྗེ་དབང་ཐང་དང་༔ ཚེ་དང་བསོད་ནམས་ཉམས་པ་གསོ་བའི་ལྷ༔ ཉི་ཟླ་ཚངས་པ་རྒྱུ་སྐར་ཉི་ཤུ་བརྒྱད༔ རྒྱལ་ཆེན་བཞི་དང་བཅས་ལ་གུས་ཕྱག་འཚལ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཀྐི་ནི་བ་སུ་དྷ་ར་བཻ་ཤྲ་མ་ཎ་ག་ན་པ་ཏི་མ་ཎི་དྷ་ར་ཨཥྚ་ཨ་ཏི་པུ་ཧོ༔ པྲ་ཏིཙྪ་ཧོ༔ དེ་ནས་ཕྱི་ནང་མཆོད་པ་འབུལ་བ་ནི༔ ཨེ་མ་ཧོ༔ བདེ་གཤེགས་རིན་ཆེན་མང་དང་ནོར་རྒྱུན་མ༔ རྣམ་ཐོས་སྲས་པོ་ནོར་ལྷ་ཡབ་ཡུམ་བརྒྱད༔ ཀླུ་ཆེན་མཆེད་བརྒྱད་ཚོགས་བདག་གླང་པོའི་གདོང་༔ ནོར་ལྷ་རྒྱ་མཚོ་འཁོར་དང་བཅས་པ་ལ༔ རྙོག་མེད་ཡིད་འོང་ཞབས་བསིལ་མཆོད་པ་འབུལ༔ འདབ་ལྡན་དྲི་ཞིམ་མེ་ཏོག་མཆོད་པ་འབུལ༔ ཙནྡན་ག་བུར་སྤོས་ཀྱི་མཆོད་པ་འབུལ༔ མ་རིག་མུན་སེལ་སྒྲོན་མེའི་མཆོད་པ་འབུལ༔ བཟང་པོའི་དྲི་ཆབ་བྱུག་པའི་མཆོད་པ་འབུལ༔ རོ་བརྒྱ་ལྡན་པའི་ཞལ་ཟས་མཆོད་པ་འབུལ༔ འབུད་དཀྲོལ་སྙན་འཇེབ་རོལ་མོའི་མཆོད་པ་འབུལ༔ རྒྱལ་སྲིད་རིན་ཆེན་བདུན་གྱི་མཆོད་པ་འབུལ༔ གདུགས་སོགས་བཀྲ་ཤིས་རྟགས་བརྒྱད་མཆོད་པ་འབུལ༔ མི་དབང་རིན་ཆེན་བདུན་གྱི་མཆོད་པ་འབུལ༔ ཡིད་འོང་བཀྲ་ཤིས་རྫས་བརྒྱད་མཆོད་པ་འབུལ༔ སྒེག་སོགས་ལྷ་མོ་བཅུ་དྲུག་མཆོད་པ་འབུལ༔ འདོད་འབྱུང་རིན་ཆེན་གཏེར་བུམ་མཆོད་པ་འབུལ༔ གསེར་དངུལ་རིན་ཆེན་སྣ་ལྔའི་མཆོད་པ་འབུལ༔ འདུ་བའི་ནད་སེལ་སྨན་ལྔའི་མཆོད་པ་འབུལ༔ བཀྲེས་པའི་གདུང་སེལ་འབྲུ་ལྔའི་མཆོད་པ་འབུལ༔ བཟང་པོའི་ངད་ལྡན་དྲི་ལྔའི་མཆོད་པ་འབུལ༔ ཚ་གྲང་གདུང་སེལ་གོས་ཀྱི་མཆོད་པ་འབུལ༔ གཞན་ཡང་བདག་ཏུ་བཟུང་དང་མ་བཟུང་བའི༔ རི་རབ་གླིང་བཞི་ཉི་ཟླ་གཟའ་སྐར་དང་༔ དཔག་བསམ་ཤིང་དང་འདོད་འབྱུང་མ་ཎི་ཀ༔ སྐྱེད་མོས་ཚལ་དང་ཁང་བཟང་འདོད་འཇོའི་བ༔ ཁྲུས་ཀྱི་རྫིང་བུ་མ་རྨོས་ལོ་ཏོག་དང་༔ གཏེར་གྱི་བུམ་པ་སྲིད་ཞིའི་འབྱོར་བའི་ཚོགས༔ བློ་ཡིས་བླངས་ཏེ་དཀྱིལ་འཁོར་ལྷ་ལ་འབུལ༔ དགྱེས་པར་བཞེས་ནས་བདག་གཞན་འགྲོ་བ་ལ༔ ཟས་གོས་ནོར་དང་ཆོས་སྲིད་ལེགས་རྒུའི་དཔལ༔ ཡིད་ལ་གང་འདོད་རེ་བ་བསྐང་དུ་གསོལ༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཀྐི་ནི་བ་སུ་དྷ་ར་བཻ་ཤྲ་མ་ཎ་ག་ན་པ་ཏི་མ་ཎི་དྷ་ར་ས་པཱ་རི་ཝ་ར་ཨརྒྷཾ་སོགས་ནས་ཤཔྟ་སཔྟ་མ་ཧཱ་རཏྣ་ཨཥྚ་མངྒ་ལཾ་པུ་ཙ་མེ་གྷ་ས་མུ་དྲ་སྥ་ར་ཎ་ས་མ་ཡཱ་ཨཱ་ཧཱུྃ༔ གསང་གསུམ་ཡོན་ཏན་རྗེས་དྲན་བསྟོད་པ་ནི༔ ཨེ་མ་ཧོ༔ མཐའ་ཡས་རྒྱལ་བ་ཀུན་གྱི་ཐུགས་རྗེ་ལས༔ མཐའ་ཡས་འགྲོ་བའི་དབུལ་བ་སེལ་བའི་ལྷ༔ མཐའ་ཡས་ཡོན་ཏན་ཀུན་ལ་དབང་འབྱོར་བའི༔ མཐའ་ཡས་རྒྱལ་ཡུམ་འཕགས་མ་ཁྱོད་ལ་བསྟོད༔ གྲངས་མེད་བསྐལ་མང་བྱ་དཀའི་སྤྱོད་པ་ཡིས༔ འཛད་མེད་སྦྱིན་པའི་སྒོ་འཕར་རབ་ཕྱེ་ནས༔ རབ་དགའ་ལ་སོགས་ས་ལམ་ཡོན་ཏན་ཀུན༔ ཡོངས་རྫོགས་ནོར་རྒྱུན་ལྷ་མོ་ཁྱོད་ལ་བསྟོད༔ སྐུ་ཡི་རང་བཞིན་ངོ་མཚར་མཚན་དཔེས་སྤྲས༔ གསུང་གི་བདག་ཉིད་ངོ་མཚར་ཚངས་པའི་དབྱངས༔ ཐུགས་མཆོག་རྟོག་བྲལ་ངོ་མཚར་མཁྱེན་བརྩེའི་དཔལ༔ གསང་གསུམ་ཡོན་ཏན་ངོ་མཚར་དྲན་པས་བསྟོད༔ བདེ་གཤེགས་རིན་ཆེན་མང་གི་ཐུགས་རྗེས་འཕྲུལ༔ འདོད་རྒུའི་ཆར་འབེབས་རྒྱལ་པོ་རྣམ་ཐོས་སྲས༔ ནོར་ལྷ་མཆེད་བརྒྱད་ཡབ་ཡུམ་ཚོགས་ཀྱི་བདག༔ འགྲོ་བའི་རེ་སྐོང་ནོར་ལྷའི་ཚོགས་ལ་བསྟོད༔ དེ་ནས་རང་གི་ཉེས་ལྟུང་བཤགས་པ་ནི༔ ཀྱེ་མ་དགོངས་ཤིག་ནོར་ལྷ་རྒྱ་མཚོའི་ཚོགས༔ བདག་གི་ཐོག་མ་མེད་ནས་ད་ལྟའི་བར༔ སེར་སྣའི་དབང་གིས་མཆོད་སྦྱིན་ལས་ལ་གཡེལ༔ འདོད་པའི་དབང་གིས་གཞན་གྱི་ནོར་རྫས་བརྐུས༔ ཆོག་ཤེས་མེད་པར་དཀོན་མཆོག་དཀོར་ལ་འབག༔ མི་དགེའི་རྒྱུ་ལས་འབྲས་བུ་མངོན་དུ་སྨིན༔ ཟས་གོས་མི་འབྱོར་ཡོ་བྱད་ནོར་དང་བྲལ༔ ཤིན་ཏུ་ཉམ་ཐག་འབྱོར་ལྡན་གཞན་གྱིས་བརྙས༔ སྐྱབས་མགོན་གཞན་ལ་རེ་ལྟོས་མི་འཆའ་བས༔ ཐུགས་རྗེས་དགོངས་ཤིག་འཕགས་མ་ནོར་རྒྱུན་མ༔ མཐུན་པའི་རྫས་བསགས་སྒྲུབ་པའི་རྟེན་དུ་བཙུགས༔ ལུས་ནི་ལྷར་གསལ་ངག་གིས་སྙིང་པོ་བཟླས༔ ཡིད་ཀྱི་དམིགས་པས་ཏིང་འཛིན་འཕྲོ་འདུ་གསལ༔ འདི་ལྟར་འབད་པའི་དོན་འབྲས་མ་མཆིས་ན༔ ནོར་ལྷ་ཁྱེད་རྣམས་ཐུགས་བསྐྱེད་ཇི་ལྟར་མཛད༔ སྨོན་ལམ་འགྲོ་བའི་དོན་ལས་གཞན་ཅི་ཞིག༔ དེ་ཕྱིར་བདག་གི་བཤགས་པ་དེང་བཞེས་ན༔ ལས་ཀྱི་སྒྲིབ་པ་མ་ལུས་བྱང་བ་དང་༔ དམ་ཆོས་སྒྲུབ་པའི་མཐུན་རྐྱེན་ཟས་གོས་ནོར༔ འབད་མེད་ཡིད་བཞིན་འགྲུབ་པར་མཛད་དུ་གསོལ༔ ཡི་གེ་བརྒྱ་པས་ནོངས་པ་བཤགས༔ དེ་ནས་དམིགས་པའི་འཕྲོ་འདུ་ནི༔ བསྒྲུབ་རྫས་ལྷར་གསལ་འཕགས་མའི་ཐུགས་ཀ་རུ༔ པད་ཟླའི་གདན་ལ་བཾ་ཡིག་གསེར་མདོག་མཐར༔ སྔགས་ཀྱིས་གཡས་བསྐོར་དེ་ལས་འོད་ཟེར་འཕྲོས༔ རྒྱལ་ཆེན་ཐུགས་སྲོག་བཻ་ཡིག་རང་མདོག་མཐར༔ རང་སྔགས་གཡོན་བསྐོར་ལ་ཕོག་ཐུགས་རྒྱུད་བསྐུལ༔ གཉིས་ཀའི་འོད་ཀྱིས་ཕྱི་སྣོད་འབྱུང་བ་བཞིའི༔ བཀྲག་མདངས་གཟི་བརྗིད་ནང་བཅུད་སེམས་ཅན་གྱི༔ ཚེ་དཔལ་བསོད་ནམས་འོད་ལྔའི་རྣམ་པར་བསྡུས༔ བདག་དང་བསྒྲུབ་རྫས་རྟེན་ལ་ཐིམ་པར་བསམ༔ དང་པོ་ཡུམ་སྔགས་སྟོང་རྩ་བཟླ༔ ཨོཾ་བ་སུ་དྷ་རི་སྭཱ་ཧཱ༔ དེ་རྗེས་ཡབ་སྔགས་སྟོང་རྩ་བཟླ༔ ཨོཾ་བཻ་ཤྲཱ་མ་ཎ་སྭཱ་ཧཱ༔ དེ་ནས་གཙོ་འཁོར་ཐམས་ཅད་ཀྱི༔ ཐུགས་ཀར་ཟླ་བའི་དཀྱིལ་འཁོར་སྟེང་༔ ཡབ་བརྒྱད་ཐུགས་ཀར་ཛཾ་ཡིག་བརྒྱད༔ ཡུམ་བརྒྱད་ཐུགས་ཀར་བཾ་ཡིག་བརྒྱད༔ རང་མདོག་སྔགས་ཀྱི་ཕྲེང་བ་ནི༔ ཡུམ་རྣམས་གཡས་ལ་ཡབ་རྣམས་གཡོན༔ འོད་ཟེར་ཕྲེང་ཐག་རབ་འཁོར་བས༔ སྲིད་དང་ཞི་བའི་ཕྱྭ་གཡང་ཀུན༔ བདག་མདུན་རྫས་ལ་ཐིམ་པ་ཡིས༔ གནས་ཁང་བང་མཛོད་མ་ལུས་པ༔ ཞིམ་དགུའི་ཟས་དང་མངར་རྒུའི་སྐྱེམས༔ སྲབ་འཇམ་གོས་དང་གཡང་ཅན་ནོར༔ མཁའ་དབྱིངས་སྤྲིན་ལས་ཆར་ལྟར་བབ༔ གསེར་འཛིན་གཞི་ལས་རླུང་ལྟར་འཐིབས༔ བར་སྣང་ཉི་ཟེར་རྡུལ་ལྟར་འཚུབས༔ བཀྲེས་སྐོམ་དབུལ་བ་རྒྱུན་བཅད་ནས༔ ལོངས་སྤྱོད་དབྱར་གྱི་མཚོ་ལྟར་རྒྱས༔ བསོད་ནམས་ཚོགས་ཆེན་རྫོགས་པར་བསམ༔ ནོར་ལྷ་ཕོ་མོའི་སྔགས་རྣམས་ནི༔ གཞན་ལས་བྱུང་ལྟར་བརྒྱ་རྩ་བཟླ༔ སླར་ཡང་རྩ་གསུམ་ཡོངས་རྫོགས་དང་༔ སྲུང་མ་ནོར་ལྷའི་སྔགས་རྣམས་ནི༔ གཅིག་དྲིལ་འདི་ལ་ཐུན་དུ་བཟུང་༔ སྨྲ་བ་བཅད་དེ་ནན་ཏན་བསྐྱེད༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཀྐི་ནི་བ་སུ་དྷ་ར་བཻ་ཤྲ་མ་ཎ་མ་ཎི་དྷ་ར་ཨཥྚ་ག་ཎ་པ་ཏི་དྷརྨ་པ་ལ་བ་སུ་ན་ན་ཁ་དྷེ་ཝསྟྲ་རཏྣ་སརྦ་སིདྡྷི་ཕ་ལ་ཧཱུྃ༔ དེ་ལ་རྟགས་ཀྱི་རིམ་པ་ནི༔ གང་ཟག་རབ་ཀྱིས་དངོས་ཞལ་མཇལ༔ འབྲིང་ཉམས་ཐ་མ་རྨི་ལམ་དུ༔ བུད་མེད་བཟང་མོས་དཀར་གསུམ་སོགས༔ ཟས་གོས་སྦྱིན་དང་ལོ་ལེགས་དང་༔ འབྲུ་སྣ་གསེར་དངུལ་གཏེར་ཁ་རྙེད༔ ཉམས་དགའ་ཤེས་པ་རབ་ཏུ་དྭངས༔ ནོར་ལྷ་འགྲུབ་པའི་རྟགས་སུ་བཤད༔ དེ་ནས་མཆོད་བསྟོད་ཐུན་སྐབས་སུ༔ དངོས་གྲུབ་བསྐུལ་བའི་རིམ་པ་ནི༔ མདའ་དར་གཡབ་ཅིང་སྤོས་དུད་བདུག༔ གཡང་འགུགས་དེ་མཐར་འདི་བཞིན་བརྗོད༔ ཧོ༔ དགོངས་ཤིག་ཐུགས་རྗེའི་བདག་ཉིད་ནོར་རྒྱུན་མ༔ ཡེ་ཤེས་སྤྱན་གྱིས་གཟིགས་ཤིག་རིན་ཆེན་མང་༔ ཐུགས་བསྐྱེད་དུས་ལ་བབ་པོ་རྣམ་ཐོས་སྲས༔ མཐུན་པའི་གྲོགས་ལ་སྤྱོན་ཅིག་ནོར་ལྷ་བརྒྱད༔ འདོད་རྒུའི་དངོས་གྲུབ་སྩོལ་ཅིག་ཚོགས་ཀྱི་བདག༔ རྣལ་འབྱོར་དཀའ་བས་ལྷ་སྔགས་ཏིང་འཛིན་གསལ༔ མཐུན་པའི་རྫས་བསགས་བསྒྲུབ་པའི་ཆོ་ག་བརྩམས༔ ནོར་ལྷ་བསྒྲུབ་པའི་ཞག་གྲངས་དེ་རིང་ཚང་༔ བདེ་སྐྱིད་ལེགས་པའི་ཉི་མ་དེ་རིང་ཤར༔ མཚན་དཔེ་སྐུ་ཡི་དངོས་གྲུབ་ད་སྩོལ་ཅིག༔ བདག་གཞན་ལུས་ལ་བཀྲག་མདངས་བསྐྱེད་དུ་གསོལ༔ ཚངས་དབྱངས་གསུང་གི་དངོས་གྲུབ་ད་སྩོལ་ཅིག༔ བདག་གཞན་ངག་ལ་དབྱངས་སྙན་བསྩལ་དུ་གསོལ༔ མཁྱེན་བརྩེ་ཐུགས་ཀྱི་དངོས་གྲུབ་ད་སྩོལ་ཅིག༔ བདག་གཞན་སེམས་ལ་རྟོགས་པ་བསྐྱེད་དུ་གསོལ༔ བཅུད་ལྡན་ཟས་ཀྱི་དངོས་གྲུབ་བསྩལ་དུ་གསོལ༔ མདངས་ལྡན་གོས་ཀྱི་དངོས་གྲུབ་བསྩལ་དུ་གསོལ༔ གཡང་ནོར་ཕྱུགས་ཀྱི་དངོས་གྲུབ་བསྩལ་དུ་གསོལ༔ འབྲུ་སྣ་རྫས་ཀྱི་དངོས་གྲུབ་བསྩལ་དུ་གསོལ༔ རིན་ཆེན་འདོད་རྒུའི་དངོས་གྲུབ་བསྩལ་དུ་གསོལ༔ རྒྱུད་འཛིན་རིགས་ཀྱི་དངོས་གྲུབ་བསྩལ་དུ་གསོལ༔ འཆི་མེད་ཚེ་ཡི་དངོས་གྲུབ་བསྩལ་དུ་གསོལ༔ ཐོས་བསམ་སྒོམ་པའི་དངོས་གྲུབ་བསྩལ་དུ་གསོལ༔ འཆད་རྩོད་རྩོམ་པའི་དངོས་གྲུབ་བསྩལ་དུ་གསོལ༔ མདོར་ན་སྲིད་དང་ཞི་བའི་དཔལ་འབྱོར་ཀུན༔ རྣམ་དཀར་བསོད་ནམས་བསགས་པའི་དགེ་འབྲས་དང་༔ ནོར་ལྷ་རྒྱ་མཚོའི་ཐུགས་རྗེས་རབ་བསྡུས་ནས༔ བདག་དང་སྦྱིན་བདག་རྣམས་ལ་བསྩལ་དུ་གསོལ༔ གོང་གི་རྩ་གསུམ་སྔགས་ཤམ་དུ༔ ཀཱ་ཡ་ཝཀྐ་ཙིཏྟ་གུརྞ་ཀརྨ་སརྦ་སིདྡྷི་ཕ་ལ་ཧཱུྃ༔ ཞེས་དང་གཙོ་མོའི་སྔགས་ཤམ་དུ༔ མ་མ་བ་སུ་སརྦ་སིདྡྷི་ཕ་ལ་ཧཱུྃ༔ ཞེས་པ་འདི་ཡང་ཅི་མང་བཟླ༔ དཀར་གསུམ་ཟས་ཀྱི་ཞལ་སྤྲོ་ཞིང་༔ གཏེར་བུམ་སྦྱིན་བདག་ལག་ཏུ་གཏད༔ དེ་ནས་རྗེས་ཀྱི་རིམ་པ་ལ༔ བུམ་པ་གང་དུ་སྦ་བའི་སར༔ ཁྱེར་ནས་ཡུལ་དེའི་གཞི་བདག་ལ༔ གཏོར་མ་ཆང་ཕུད་སྔགས་ཀྱིས་བསྔོ༔ ཕྲག་དོག་མ་བྱེད་བཀའ་ཡང་བསྒོ༔ འཇོར་གྱིས་ས་བྲུས་འདི་སྐད་བརྗོད༔ ཧཱུྃ༔ སྔོན་ཚེ་བདེ་གཤེགས་སངས་རྒྱས་ཀྱིས༔ བདུད་སྡེ་བཏུལ་བའི་དཔང་པོ་མཛད༔ དབང་ཆེན་ས་ཡི་མངའ་བདག་མོ༔ ས་ཡི་ལྷ་མོ་བསྟན་མ་དང་༔ ས་གཞི་ཁྱོན་ལ་དབང་བསྒྱུར་བའི༔ ས་བདག་དབང་ཆེན་འཁོར་བཅས་ཀྱིས༔ རིན་ཆེན་གཏེར་བུམ་སྦ་བ་ལ༔ ཐུགས་ཁྲེལ་ཀོ་ལོང་མ་མཛད་པར༔ བདག་དང་སྦྱིན་བདག་གྲོགས་མཛོད་ལ༔ ཉམ་ཐག་དབུལ་བའི་སྡུག་བསྔལ་ཅན༔ མགོན་མེད་བདག་ལ་བརྩེར་དགོངས་ནས༔ གཡང་བུམ་གཏེར་རྫས་བཞེས་སུ་གསོལ༔ འདི་ནས་སྐྱེ་བ་ཐམས་ཅད་དུ༔ འབྱོར་ལྡན་ནོར་གྱི་དངོས་གྲུབ་སྩོལ༔ ཅེས་པས་གསོལ་བ་བཏབ་པའི་རྗེས༔ ཞི་བརྔན་བསང་སོགས་གང་འཛོམ་བྱ༔ དེ་ནས་བུམ་པ་ལེགས་པར་སྦ༔ ཧཱུྃ་ཧོ༔ སྔོན་གྱི་དུས་ནས་བདེ་གཤེགས་སངས་རྒྱས་ཀྱིས༔ ཆོས་དབྱིངས་འགྱུར་བ་མེད་པའི་གཞལ་ཡས་སུ༔ རིན་ཆེན་བྱང་ཆུབ་སེམས་ཀྱི་གཏེར་སྦས་པས༔ འགྲོ་བའི་རྒྱུད་ལ་སྐུ་བཞིའི་དངོས་གྲུབ་བྱུང་༔ ས་བཅུ་ཕ་རོལ་ཕྱིན་པའི་སེམས་དཔའ་ཡིས༔ ཀུན་གཞི་རྣམ་པར་དག་པའི་གཞལ་ཡས་སུ༔ སྨོན་འཇུག་བྱང་ཆུབ་སེམས་ཀྱི་གཏེར་སྦས་པས༔ སྲིད་ཞིའི་མཐའ་ལས་གྲོལ་བའི་དངོས་གྲུབ་བྱུང་༔ རི་བོ་པོ་ཊ་ལ་ཡི་གཞལ་ཡས་ནས༔ གངས་ཅན་ལྷ་མཆོག་སྤྱན་རས་གཟིགས་དབང་གིས༔ རིན་ཆེན་འབྲུ་སྣ་ལྔ་ཡི་གཏེར་ཆེན་སྦས༔ བོད་ཡུལ་དབུལ་ཕོངས་སེལ་བའི་དངོས་གྲུབ་བྱུང་༔ སྤྲུལ་པའི་ཞིང་ཁམས་དཔལ་གྱི་རི་བོ་ནས༔ འགྲོ་མགོན་སྤྲུལ་སྐུ་པདྨ་འབྱུང་གནས་ཀྱིས༔ རིན་ཆེན་ཆོས་ནོར་རྫས་ཀྱི་གཏེར་ཆེན་སྦས༔ འགྲོ་དྲུག་སྡུག་བསྔལ་སེལ་བའི་དངོས་གྲུབ་བྱུང་༔ དེ་བཞིན་དེ་རིང་རྣལ་འབྱོར་བདག་ཅག་གིས༔ སེམས་ཅན་དབུལ་བའི་སྡུག་བསྔལ་སེལ་བའི་ཆེད༔ གཟུངས་སྔགས་ཆོས་སྐུའི་རིང་བསྲེལ་གཏེར་སྦེད་དོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ དམ་ཆོས་མི་ཟད་གཏེར་དང་འཕྲད་པར་ཤོག༔ གནས་ཆེན་ས་སྣ་རྣམས་ཀྱི་གཏེར་སྦེད་དོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ རྟེན་གཞི་ཡུལ་འཁོར་མཆོག་དང་འཕྲད་པར་ཤོག༔ གསེར་དངུལ་རིན་ཆེན་ལྔ་ཡི་གཏེར་སྦེད་དོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ འདོད་རྒུའི་རིན་ཆེན་གཏེར་དང་འཕྲད་པར་ཤོག༔ ནད་སེལ་སྨན་སྣ་ལྔ་ཡི་གཏེར་སྦེད་དོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ འབྱུང་འཁྲུག་ནད་སེལ་སྨན་དང་འཕྲད་པར་ཤོག༔ ནས་འབྲས་འབྲུ་སྣ་ལྔ་ཡི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ བཀྲེས་སྐོམ་གདུང་སེལ་ཟས་དང་འཕྲད་པར་ཤོག༔ འབྲུ་བཅུད་སྙིང་པོ་ལྔ་ཡི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ སྙིང་པོ་མི་ཟད་གཏེར་དང་འཕྲད་པར་ཤོག༔ ཁ་དོག་ལྔ་ལྡན་དར་སྣའི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ ཚ་གྲང་གདུང་སེལ་གོས་དང་འཕྲད་པར་ཤོག༔ གཡང་ཅན་ཕྱུག་པོའི་ནོར་གྱི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ འབྱོར་ལྡན་མི་ཟད་གཏེར་དང་འཕྲད་པར་ཤོག༔ ཁ་དྲག་རྒྱལ་བློན་ཟས་ནོར་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ རིགས་ལྡན་མི་ཟད་གཏེར་དང་འཕྲད་པར་ཤོག༔ གསལ་བ་ལྷ་སྐུར་བསྒོམ་པའི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ སྐུ་ཡི་དམ་ཚིག་ཉམས་པ་སོར་ཆུད་ནས༔ མི་ཟད་གཟུགས་སྐུས་འགྲོ་དོན་བྱེད་པར་ཤོག༔ བཟླས་པ་སྙིང་པོ་སྔགས་ཀྱི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ གསུང་གི་དམ་ཚིག་ཉམས་ཆག་སོར་ཆུད་ནས༔ མི་ཟད་གསུང་གིས་འགྲོ་དོན་མཐར་ཕྱིན་ཤོག༔ འགྱུར་མེད་ཏིང་འཛིན་ཐུགས་ཀྱི་གཏེར་སྦས་སོ༔ སྐྱེ་བ་འདི་ནས་བྱང་ཆུབ་མ་ཐོབ་བར༔ ཐུགས་ཀྱི་དམ་ཚིག་ཉགས་ཆག་སོར་ཆུད་ནས༔ འཕོ་མེད་ཐུགས་ཀྱིས་འགྲོ་དོན་མཐར་ཕྱིན་ཤོག༔ མི་ཟད་རིན་ཆེན་གཏེར་བུམ་འདི་སྦས་པས༔ བདག་གཅིག་མ་ཡིན་དབུལ་བའི་སེམས་ཅན་ཀུན༔ འཕགས་མ་ནོར་རྒྱུན་ལྷ་མོས་རྗེས་བཟུང་ནས༔ ཇི་སྲིད་དབང་བཅུའི་ཡོན་ཏན་མ་ཐོབ་བར༔ དེ་སྲིད་དབུལ་བ་སེལ་བའི་གྲོགས་མཛོད་ཅིག༔ གལ་ཏེ་ཁྱིམ་དུ་སྦ་བ་ནི༔ གཡང་སྒམ་སོགས་སུ་ལེགས་པར་གཞུགས༔ དེ་ནས་རྒྱས་གདབ་བྱ་བ་ནི༔ ཧཱུྃ༔ ཆོས་དབྱིངས་ཡེ་ཤེས་འཕོ་འགྱུར་མེད་པ་ཡི༔ བཀའ་རྟགས་ཕྱག་རྒྱས་གཏེར་འདི་རྒྱས་གདབ་བོ༔ དབུལ་འདྲེ་གཏི་མུག་གདོན་རྣམས་ཚར་བཅད་ནས༔ བདེ་གཤེགས་སྐུ་ཡི་རྒྱལ་སྲིད་ཐོབ་པར་ཤོག༔ མེ་ལོང་ཡེ་ཤེས་གསལ་སྒྲིབ་མེད་པ་ཡི༔ བཀའ་རྟགས་ཕྱག་རྒྱས་གཏེར་འདི་རྒྱས་གདབ་བོ༔ དབུལ་འདྲེ་ཞེ་སྡང་གདོན་རྣམས་མཐར་བསྐྲད་ནས༔ རྡོ་རྗེའི་ཐུགས་ཀྱི་རྒྱལ་སྲིད་ཐོབ་པར་ཤོག༔ མཉམ་ཉིད་ཡེ་ཤེས་ཕྱོགས་ལྷུང་མེད་པ་ཡི༔ བཀའ་རྟགས་ཕྱག་རྒྱས་གཏེར་འདི་རྒྱས་གདབ་བོ༔ དབུལ་འདྲེའི་ང་རྒྱལ་བསེ་རག་དབྱིངས་གྲོལ་ནས༔ རིན་ཆེན་ཡོན་ཏན་རྒྱལ་སྲིད་ཐོབ་པར་ཤོག༔ སོར་རྟོག་ཡེ་ཤེས་ཤེས་བྱ་ཀུན་མཁྱེན་པའི༔ བཀའ་རྟགས་ཕྱག་རྒྱས་གཏེར་འདི་རྒྱས་གདབ་བོ༔ དབུལ་འདྲེ་འདོད་ཆགས་འགོང་པོ་མཐར་བསྐྲད་ནས༔ པདྨ་གསུང་གི་རྒྱལ་སྲིད་ཐོབ་པར་ཤོག༔ བྱ་གྲུབ་ཡེ་ཤེས་ལྷུན་གྱིས་གྲུབ་པ་ཡི༔ བཀའ་རྟགས་ཕྱག་རྒྱས་གཏེར་འདི་རྒྱས་གདབ་བོ༔ ཕྲག་དོག་བདུད་ཀྱི་གཡུལ་ལས་རྣམ་རྒྱལ་ནས༔ ཕྲིན་ལས་གཞན་དོན་རྒྱལ་སྲིད་ཐོབ་པར་ཤོག༔ བཛྲ་རཏྣ་པདྨ་ཀརྨ་རཀྵ་རཀྵཿཧཱུྃ༔ ཞེས་པ་རིགས་ལྔའི་ཕྱག་རྒྱ་ཡིས༔ རྒྱས་གདབ་ཤིས་བརྗོད་མཐར་ཕྱིན་བྱ༔ དགའ་སྟོན་ཚོགས་ཀྱི་འཁོར་ལོ་བསྐོར༔ དབུལ་བའི་ཉམ་ཐག་འགྲོ་བ་ལ༔ སྦྱིན་གཏོང་བྱེད་པར་དམ་ཡང་བཅའ༔ བདག་གཞན་བསོད་ནམས་ཚོགས་རྫོགས་ནས༔ རྣམ་མཁྱེན་ཐོབ་པའི་སྨོན་ལམ་གདབ༔ ས་མ་ཡཱ༔ འཕགས་མ་ནོར་རྒྱུན་ལྷ་མོ་ཡི༔ ཕྱྭ་གཡང་བསྒྲུབ་པའི་ལས་ཚོགས་འདི༔ ཆོས་ལ་སྤྱོད་པའི་སྐལ་ལྡན་གྱི༔ མཐུན་རྐྱེན་ཟས་ནོར་གཏེར་ཁ་ཡིན༔ གུ་ཧྱ༔ ཞེས་དག་སྣང་ཟོལ་མེད་ཀྱི་ཆོས་སྡེ་ལས་བྱུང་བ་ལྟར་ཨོ་རྒྱན་གྱི་སངས་རྒྱས་པདྨ་ཀཱ་ར་དང་གྲུབ་དབང་བྱང་ཆུབ་རྡོ་རྗེའི་ཐུགས་རྗེའི་འོད་ཟེར་གྱིས་བློ་གྲོས་ཀྱི་པདྨོ་རྣམ་པར་གྲོལ་བའི་ཤཱཀྱའི་དགེ་སྦྱོང་རིག་པ་འཛིན་པ་པདྨ་དོན་ལྡན་རྩལ་གྱིས་ལེགས་པར་སྨྲས་པ་ཐོས་བསམ་བསྒོམ་པའི་ཡོན་ཏན་ལ་མངོན་པར་སྤྲོ་ཞིང་བཅུ་ཕྲག་རིག་པའི་གནས་ལ་བརྩོན་འགྲུས་ཀྱི་བརྟུལ་ཞུགས་མ་ཉམས་པའི་ཤཱཀྱའི་དགེ་ཚུལ་ཐུབ་བསྟན་གཞན་ཕན་ཉི་མ་ཞེས་པའི་ལུང་ཟིན་གྱི་སྐྱེས་བུས་ཡི་གེའི་རིས་སུ་ལེགས་པར་ཕབ་པའི་དགེ་བས་འགྲོ་དྲུག་དབུལ་བའི་སེམས་ཅན་གཅིག་ཀྱང་མ་ལུས་པ་བདེ་གཤེགས་རིན་ཆེན་མང་གི་རྒྱལ་སྲིད་ལ་དབང་འབྱོར་བའི་རྒྱུར་གྱུར་ཅིག༔ དགེའོ༔ དགེའོ༔ དགེའོ༔