བསྐང་བ་ཀུན་བཟང་མཆོད་སྤྲིན།

མཚོ་རྒྱལ་ཐུགས་སྒྲུབ་ཏིཀ་ལས༔ བསྐང་བ་ཀུན་བཟང་མཆོད་སྤྲིན་བཞུགས་སོ༔

གུ་རུ་པདྨ་ཌཱཀྐི་ནི༔ ཆོས་མཐུན་སྒྲུབ་བརྩོན་རྣལ་འབྱོར་པས༔ ཚོགས་གཉིས་ཡོན་ཏན་རྫོགས་པའི་ཕྱིར༔ བྱ་སླ་ཚེགས་ཆུང་དོན་ཆེ་བ༔ རྩ་གསུམ་མཁའ་འགྲོའི་དཀྱིལ་འཁོར་དུ༔ ཚོགས་ཀྱི་འཁོར་ལོ་ཕུལ་བའི་ཚེ༔ བསྐང་བའི་རིམ་པ་འདི་ལྟར་བྱ༔ དེ་ཡང་སྦྱོར་དངོས་རྗེས་དང་གསུམ༔ སྦྱོར་བ་སྒྲུབ་གནས་དབེན་པ་རུ༔ ཌཱཀྐིའི་དུས་གཉན་ཐམས་ཅད་དང་༔ ཁྱད་པར་དམར་ཕྱོགས་ཚེས་བཅུ་ལ༔ མཎྜལ་བྱི་དོར་ཆག་ཆག་གདབ༔ ལྷ་གྲངས་མཉམ་པའི་ཚོམ་བུ་བཀོད༔ ཕྱི་ནང་གསང་བའི་མཆོད་རྫས་དང་༔ ཡོལ་བ་བླ་བྲེ་གདུགས་དང་འཕན༔ རྒྱལ་མཚན་རོལ་མོ་བྱེ་བྲག་དང་༔ སྤོས་དང་མེ་ཏོག་གཙང་མའི་བཤོས༔ ཚོགས་རྫས་བཟའ་བཏུང་གྱ་ནོམ་བཤམས༔ གསང་སྔགས་སྒོར་ཞུགས་ཐམས་ཅད་ཀྱི༔ ཉམས་ཆག་མ་ལུས་བཤགས་པ་དང་༔ མཆོག་ཐུན་དངོས་གྲུབ་ཚེ་འདི་རུ༔ མྱུར་དུ་འགྲུབ་པའི་མོས་འདུན་གྱིས༔ རྩེ་གཅིག་བསྙེན་སྒྲུབ་གཞུང་བཞིན་བརྩམས༔ ས་མ་ཡཱ༔ གཉིས་པ་དངོས་གཞིའི་རིམ་པ་ནི༔ བསྐང་རྫས་སྔགས་དང་ཕྱག་རྒྱས་བརླབས༔ ཀུན་བཟང་མཆོད་པའི་སྤྲིན་ལྟ་བུས༔ གནམ་ས་བར་སྣང་ཁྱབ་པར་དམིགས༔ དཀྱིལ་འཁོར་ལྷ་ཚོགས་ཐམས་ཅད་ཀྱི༔ དབང་པོ་དྲུག་ལ་ཟག་མེད་ཀྱི༔ དགྱེས་པ་བསྐྱེད་པའི་འདུན་པ་དང་༔ རོལ་མོ་དབྱངས་དང་སྤོས་དུད་སྦྱར༔ འབྲུ་སྣ་འཐོར་ཞིང་འདི་སྐད་དོ༔ ཨེ་མ་ཧོ༔ སྟོང་ཉིད་དབྱིངས་ཀྱི་ཆོ་འཕྲུལ་ལས༔ རིག་པ་གསལ་སྣང་མཆོད་པའི་རྫས༔ དཀྱིལ་འཁོར་ལྷ་ཚོགས་མ་ལུས་པ༔ དགྱེས་པ་བསྐྱེད་པའི་ཡོ་བྱད་ནི༔ མེ་ཏོག་དྲི་ཞིམ་གསལ་བའི་སྒྲོན༔ བཟང་དྲུག་ཆུ་གཙང་རོ་ལྡན་བཤོས༔ ཡིད་འོང་སྙན་འཇེབས་རོལ་མོའི་སྒྲ༔ རྩ་བརྒྱད་ཡན་ལག་སྟོང་སྦྱར་སྨན༔ དུག་ལྔ་དབྱིངས་གྲོལ་རཀྟ་དམར༔ འབྲུ་བཅུད་སྨན་སྤོས་གཏོར་མར་བཤམས༔ བདེ་སྟོང་མུ་དྲ་སྒེག་བཞད་འཛུམ༔ ཞིང་བཅུ་བསྒྲལ་བའི་ཕུང་ཁམས་ལས༔ དབང་པོའི་མེ་ཏོག་ཚིལ་ཆེན་སྤོས༔ ཞུན་ཆེན་སྒྲོན་མ་མཁྲིས་པའི་ཆབ༔ ཤ་རུས་ཞལ་ཟས་ཐོད་པ་དང་༔ གསང་བའི་རྔེའུ་ཆུང་རྐང་གླིང་སོགས༔ རྩ་གསུམ་རྟེན་རྫས་སྒྲུབ་པའི་རྫས༔ བསྐང་རྫས་མ་ཚང་མེད་པའི་ཚོགས༔ གདུགས་དང་བ་དན་བླ་བྲེ་འཕན༔ ཁང་བཟང་སྐྱེད་ཚལ་ཁྲུས་ཀྱི་རྫིང་༔ མ་རྨོས་ལོ་ཏོག་འདོད་འཇོའི་བ༔ རྒྱལ་སྲིད་རིན་ཆེན་སྣ་བདུན་དང་༔ བཀྲ་ཤིས་རྫས་རྟགས་བཅུ་དྲུག་པོ༔ གཅིག་ལས་དུ་མར་འཆར་བའི་འཕྲུལ༔ སྨོན་ལམ་དག་པའི་རྒྱལ་སྲིད་རྣམས༔ ཀུན་ཏུ་བཟང་པོའི་མཆོད་སྤྲིན་ལྟར༔ འཛད་མེད་འདོད་རྒུའི་གཏེར་ཆེན་པོས༔ སྲིད་གསུམ་མ་ལུས་ཡོངས་གང་གྱུར༔ སྐབས་འདིར་སྔགས་དྲུག་ཕྱག་རྒྱ་དྲུག༔ དམིགས་པས་སྦྱང་སྤེལ་བསྒྱུར་བར་བྱ༔ དེ་ནས་བསྐང་མགྲོན་སྤྱན་འདྲེན་ནི༔ ཧྲཱིཿ ངོ་བོ་དག་པ་ཆོས་ཀྱི་དབྱིངས༔ རང་བཞིན་འགགས་མེད་སྐུ་ལྔའི་ཞིང་༔ མཁྱེན་བརྩེ་ནུས་པའི་ཕོ་བྲང་ནས༔ སྐུ་གསུམ་ལྷ་ཚོགས་གཤེགས་སུ་གསོལ༔ ཟབ་རྒྱས་སྨིན་གྲོལ་གདམས་པའི་མཛོད༔ བྱིན་རླབས་ཐུགས་རྗེའི་ཕོ་བྲང་ནས༔ དམ་ཚིག་དབང་དང་ཤེས་རབ་རྒྱུད༔ མན་ངག་ལུང་དང་ཉམས་ཆག་བསྐང་༔ དྲིན་ལྡན་ བརྒྱུད་གསུམ ་བླ་མ་རྣམས༔ ཐུགས་རྗེའི་དབང་གིས་གཤེགས་སུ་གསོལ༔ མཆོག་དང་ཐུན་མོང་དངོས་གྲུབ་ཀྱི༔ ཐེག་དགུའི་ལམ་ལ་ཞུགས་པ་རྣམས༔ ཚེ་འདིར་དོན་གཉིས་འགྲུབ་མཛད་པའི༔ ཡི་དམ་ཞི་ཁྲོ་སྒྲུབ་སྡེ་བརྒྱད༔ རང་སྣང་དག་པའི་ཕོ་བྲང་ནས༔ སྨོན་ལམ་ཤུགས་ཀྱིས་གཤེགས་སུ་གསོལ༔ རྩ་ཁམས་དག་པ་ཉེར་བཞིའི་ཡུལ༔ རླུང་ལྔའི་འགྲོས་དང་ཐིག་ལེ་ལྡན༔ ལྷན་སྐྱེས་དགའ་བཞིའི་མཆོག་སྩོལ་བའི༔ གནས་མཆོག་ཆེན་པོ་སོ་གཉིས་ནས༔ དཔའ་བོ་མཁའ་འགྲོ་ཡབ་ཡུམ་རྣམས༔ དམ་ཚིག་དབང་གིས་གཤེགས་སུ་གསོལ༔ དམ་ཚིག་གཉན་པོས་རྒྱུད་སྦྲེལ་བའི༔ རྣལ་འབྱོར་ལེགས་ཉེས་སྟངས་འཛིན་ཅིང་༔ བར་ཆད་སེལ་བའི་ཕོ་བྲང་ནས༔  བརྒྱུད་གསུམ ་དམ་ཅན་སྲུང་མའི་ཚོགས༔ ཕྲིན་ལས་སྒྲུབ་ཕྱིར་གཤེགས་སུ་གསོལ༔ ཚོགས་ཁང་རང་སྣང་སྤྲུལ་པའི་ཞིང་༔ ཚོགས་རྫས་ཟག་མེད་འདོད་ཡོན་ལྔ༔ རྣལ་འབྱོར་ཐབས་ཤེས་མཆེད་དང་ལྕམ༔ བྱ་སྤྱོད་ཆོས་ཉིད་རིག་པའི་གཤིས༔ ཐ་མལ་འཛིན་པས་མ་བསླད་པའི༔ འབྲས་བུ་ལམ་བྱེད་གསང་བའི་སྔགས༔ ཟབ་ཅིང་རྟོགས་དཀའི་ཉེ་ལམ་ནས༔ ཚེ་འདིར་མཁའ་སྤྱོད་འགྲུབ་པའི་ཕྱིར༔ དངོས་འབྱོར་ཡིད་སྤྲུལ་ཚོགས་ཀྱི་རྫས༔ མ་ཚང་མེད་པའི་ཡོ་བྱད་འདིས༔  བརྒྱུད་གསུམ ་བླ་མའི་ཐུགས་དམ་བསྐང་༔ ཡི་དམ་ཞི་ཁྲོའི་ཐུགས་དམ་བསྐང་༔ མ་དང་མཁའ་འགྲོའི་ཐུགས་དམ་བསྐང་༔ དམ་ཅན་སྲུང་མའི་ཐུགས་དམ་བསྐང་༔ རྡོ་རྗེ་སློབ་དཔོན་ཐུགས་དམ་བསྐང་༔ འདུས་པའི་མཆེད་ལྕམ་ཐུགས་དམ་བསྐང་༔ རིགས་དྲུག་ཕ་མའི་ཐུགས་དམ་བསྐང་༔ ལན་ཆགས་མགྲོན་རིགས་ཐུགས་དམ་བསྐང་༔ ཨེ་མ་ཧོ༔ ཁྱད་པར་ཐུགས་དམ་བསྐང་བའི་ཡུལ༔ གངས་ཅན་བོད་ཀྱི་ལྷ་གཅིག་པུ༔ སྤྱན་རས་གཟིགས་དབང་སྤྲུལ་པའི་སྐུ༔ པདྨ་འབྱུང་གནས་ཐུགས་དམ་བསྐང་༔རྒྱལ་ཀུན་ཐུགས་གསང་ཤེས་རབ་ཡུམ༔ འགགས་མེད་གཟུགས་སྐུའི་རྣམ་འཕྲུལ་ཀུན༔ གཅིག་བསྡུས་གནས་གསུམ་མཁའ་འགྲོའི་གཙོ༔ ཡེ་ཤེས་མཚོ་རྒྱལ་ཐུགས་དམ་བསྐང་༔ གཞན་ཡང་གནས་སྐབས་མཐར་ཐུག་ཏུ༔ ལེགས་ཚོགས་དངོས་གྲུབ་ཀུན་སྩོལ་ཅིང་༔ བར་ཆད་ཀུན་ལས་སྐྱོབས་མཛད་པ༔ ལྷ་དང་སྲུང་མའི་ཐུགས་དམ་བསྐང་༔ དེ་ལྟར་ཐུགས་དམ་བསྐང་བའི་མཐུས༔ བདག་དང་གསང་བ་སྔགས་ཀྱི་སྒོར༔ ཞུགས་ནས་སྡོམ་དང་དམ་ཚིག་ཀུན༔ ཡལ་བར་དོར་བའི་འགྲོ་རྣམས་ཀྱི༔ ཉམས་ཆག་མ་ལུས་སོར་ཆུད་ནས༔ སྒྲིབ་མེད་ཚངས་པའི་དངོས་གྲུབ་སྩོལ༔ ལུས་ཀྱི་སྟངས་སྟབས་ཕྱག་རྒྱ་དང་༔ བསྐྱེད་རིམ་ལྷ་སྐུ་བསྒོམས་པའི་མཐུས༔ སྐུ་ཡི་དམ་ཚིག་ཉམས་པ་ཀུན༔ སྣང་སྟོང་ངང་དུ་བསྐང་གྱུར་ཅིག༔ ངག་གི་བཟླས་བརྗོད་དབྱངས་རོལ་དང་༔ ཡེ་ཤེས་རླུང་ལྔར་སྦྱངས་གོམས་མཐུས༔ གསུང་གི་དམ་ཚིག་ཉམས་པ་ཀུན༔གྲག་སྟོང་དབྱིངས་སུ་བསྐང་གྱུར་ཅིག༔ ཞུ་བདེའི་ཐིག་ལེ་སྦྱངས་བཏུལ་དང་༔ ཡིད་ཀྱི་སྒྲིབ་སྦྱངས་ལྟ་གོམས་མཐུས༔ ཐུགས་ཀྱི་དམ་ཚིག་ཉམས་པ་ཀུན༔ གསལ་སྟོང་ཀློང་དུ་བསྐང་གྱུར་ཅིག༔ རྩེ་གཅིག་མོས་པའི་གདུང་ཤུགས་དང་༔ རྒྱུན་དུ་གུས་པས་གསོལ་བཏབ་མཐུས༔ སློབ་དཔོན་མཆེད་ལ་ཉམས་པ་ཀུན༔ འབྲལ་མེད་ངང་དུ་བསྐང་གྱུར་ཅིག༔ སྐུ་བསྒོམས་སྔགས་བཟླས་ཏིང་འཛིན་གསལ༔ ལོ་ཟླ་དུས་དྲུག་བསྙེན་སྒྲུབ་མཐུས༔ ཞི་དྲག་ལྷ་ལ་ཉམས་པ་ཀུན༔ དཀྱིལ་འཁོར་གསུམ་དུ་བསྐང་གྱུར་ཅིག༔ ཚོགས་དང་གཏོར་མའི་རྣལ་འབྱོར་དང་༔ འགྲོ་དྲུག་རང་བཞིན་མེད་པ་རུ༔ ཤེས་ཀྱང་མཆོད་སྦྱིན་བསགས་སྦྱངས་མཐུས༔ དཔའ་བོ་མཁའ་འགྲོར་ཉམས་པ་ཀུན༔ དག་མཉམ་ཀློང་དུ་བསྐང་གྱུར་ཅིག༔ ཅེས་དང་ཡི་གེ་བརྒྱ་པ་བརྗོད༔ མཐར་ནི་བཤགས་བྱ་བཤགས་ཡུལ་ཀུན༔ རང་བཞིན་མེད་པའི་གནད་ལ་སྦྱངས༔ འགྱོད་ཚངས་དྲུངས་ནས་འབྱིན་པ་ལ༔ ཀུན་ལས་ལྷག་པའི་མན་ངག་གོ༔ ས་མ་ཡཱ༔ ཞེས་འདི་གཏེར་སྟོན་ཆོས་བདག་དང་༔ རྟེན་འབྲེལ་བཟང་པོས་མཚམས་སྦྱར་དུས༔ རིག་རྩལ་བརྡ་ལས་ཐོགས་མེད་བྲིས༔ དགེ་འདིས་ཌཱཀྐིའི་ས་ཐོབ་ཤོག༔