རྗེས་གནང་བྱིན་རླབས་ཆར་རྒྱུན།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ རྗེས་གནང་བྱིན་རླབས་ཆར་རྒྱུན་བཞུགས༔

གུ་རུ་ཛྙཱ་ན་ཌཱཀྐཱི་ནི་སརྦ་སིདྡྷི་ཕ་ལ་ཧཱུྃ༔ ཤེས་རབ་ཕ་རོལ་ཕྱིན་མ་ནི༔ དུས་གསུམ་རྒྱལ་བ་ཀུན་གྱི་ཡུམ༔ འདུ་འབྲལ་མེད་པའི་རང་བཞིན་ལ༔ ཡེ་ནས་རང་ངོ་ཤེས་པས་འདུད༔ དུས་གསུམ་རྒྱལ་བའི་ཕྲིན་ལས་པ༔ བདག་ཉིད་ཆེན་པོ་པད་འབྱུང་གི༔ ཐུགས་ཀྱི་གཟུངས་མར་བསྔགས་པ་ཡི༔ མཁར་ཆེན་ཡེ་ཤེས་མཚོ་རྒྱལ་གྱི༔ སྒྲུབ་ཐབས་ཉམས་ལེན་གང་ཟག་དོན༔ རྗེས་གནང་བྱིན་རླབས་ཆར་རྒྱུན་བསྟན༔ ས་མ་ཡཱ༔ འདི་ལ་སྦྱོར་དངོས་རྗེས་དང་གསུམ༔ སྦྱོར་བ་ཡོ་བྱད་བཤམས་པ་ནི༔ དཀྱིལ་འཁོར་མདའ་གང་བཀོད་ལེགས་སྟེང་༔ རྡུལ་ཚོན་རས་བྲིས་ཚོམ་བུ་གསུམ༔ གང་འཛོམ་རབ་འབྲིང་ཐ་མར་དཔྱད༔ དབུས་སུ་སྐུ་རྟེན་བུམ་པ་དང་༔ མདུན་དུ་ཐུགས་རྟེན་ཤེལ་མེ་ལོང་༔ གཡས་སུ་ཡོན་ཏན་ཡིད་བཞིན་ནོར༔ རྒྱབ་ཏུ་གསུང་གཟུངས་བགྲང་ཕྲེང་དམར༔ གཡོན་དུ་ཕྲིན་ལས་ཐོད་ཊཾ་དྲིལ༔ གཞན་ཡང་གསང་རྫས་བདུད་རྩི་དང་༔ གཏོར་མ་སྨན་རཀ་ཉེར་སྤྱོད་བཤམས༔ རང་གཞུང་སྐྱབས་སེམས་ནས་བཟུང་སྟེ༔ བདག་མདུན་དབྱེར་མེད་ལྷ་རུ་བསྒོམས༔ བསྙེན་པ་བརྒྱ་སྟོང་ཁ་ཡང་གསོ༔ དེ་ནས་བུམ་པ་བསྒྲུབ་པ་ནི༔ སྭ་བྷ་ཝ་ཡིས་སྟོང་པར་སྦྱངས༔ སྟོང་པའི་ངང་ལས་བྷྲུཾ་ཡིག་ལས༔ རིན་ཆེན་བུམ་པ་མཚན་ཉིད་ཀུན༔ ཡོངས་རྫོགས་གཞལ་མེད་ཁང་དབུས་སུ༔ ལྔ་ཚན་ལྔ་ཡི་བཅུད་རྣམས་ཀུན༔ རིགས་ལྔ་མཁའ་འགྲོའི་ལྷ་རུ་གསལ༔ རང་སྲོག་སྔགས་ཀྱི་འོད་ཟེར་ལས༔ རང་སྔགས་ཡི་གེའི་འབྲུ་རྣམས་ཀུན༔ འོད་ཀྱི་ལམ་ནས་རང་སྒྲར་བཅས༔ མདུན་བསྐྱེད་བུམ་ལྷའི་ཐུགས་ཀར་ཕོག༔ བཟླས་པ་སྔགས་ཀྱིས་རྒྱུད་བསྐུལ་བས༔ སྐུ་ལས་བདུད་རྩིའི་རྒྱུན་བབས་པས༔ བུམ་པ་ལྟེམ་གྱིས་གང་བར་དམིགས༔ བཟླས་པ་བརྒྱ་སྟོང་ཅི་ནུས་ཀྱི༔ གཤམ་དུ་ཨ་བྷི་ཥིཉྩ་བཏགས༔ མཆོད་པས་མཆོད་ཅིང་གུས་པས་བསྟོད༔ ལྷ་ཉིད་འོད་ཞུ་བདུད་རྩིར་བསམ༔ དེ་ནས་དངོས་གྲུབ་དབང་བཞི་ནི༔ བདག་འཇུག་རྒྱས་པར་བྱེད་པ་འམ༔ ཡང་ན་ཚིག་འདིས་ལེན་པར་བྱ༔ ཨེ་མ་ཧོ༔ སྐྱེ་མེད་ཤེས་རབ་ཕར་ཕྱིན་ཆོས་ཀྱི་སྐུ༔ འགགས་མེད་རྡོ་རྗེ་རྣལ་འབྱོར་ལོངས་སྤྱོད་རྫོགས༔ གང་འདུལ་སྤྲུལ་སྐུ་ཡེ་ཤེས་མཚོ་རྒྱལ་མ༔ དམིགས་མེད་བརྩེ་བ་ཆེན་པོའི་ངང་ཉིད་ལས༔ སྐུ་དང་ཡེ་ཤེས་འདུ་འབྲལ་མེད་པ་ཡི༔ དངོས་གྲུབ་མཆོག་གིས་བདག་རྒྱུད་སྨིན་པ་དང་༔ སྐལ་ལྡན་རྣམས་ཀྱི་སྒོ་གསུམ་བག་ཆགས་སྦྱངས༔ སྐུ་བཞིའི་གོ་འཕང་ཐོབ་པར་མཛད་དུ་གསོལ༔ རྩ་བའི་སྔགས་ཀྱི་ཤམ་བུ་རུ༔ ཀཱ་ཡ་ཝཀྐ་ཙིཏྟ་སརྦ་སིདྡྷི་ཕ་ལ་ཧཱུྃ༔ སྒྲུབ་རྫས་བུམ་པ་གནས་གསུམ་གཏུགས༔ བུམ་ཆུ་བཏུང་ཞིང་དམིགས་པ་ནི༔ མདུན་བསྐྱེད་མཁའ་འགྲོའི་ལྷ་ཚོགས་དང༔ ཕྱོགས་བཅུའི་སངས་རྒྱས་བྱང་སེམས་རྣམས༔ བདག་དང་སློབ་མར་བརྩེར་དགོངས་ནས༔ དབང་བཞིའི་ཡེ་ཤེས་སྩོལ་བར་བསམ༔ ལས་བུམ་ཁྲོ་བོའི་གཞལ་ཡས་སུ༔ ཁྲོ་ཆེན་བདུད་རྩི་འཁྱིལ་བ་བསྐྱེད༔ བསྙེན་པ་བཟླ་ཞིང་མཆོད་བསྟོད་བྱ༔ འོད་ཞུ་བུམ་པའི་ཆུར་འདྲེས་པས༔ གདོན་བགེགས་མཐར་བྱེད་ནུས་ལྡན་བསམ༔ དངོས་གཞི་སློབ་མ་ཁྲུས་ནས་ཕྱུང་༔ བར་ཆད་བྱེད་པའི་གདོན་བགེགས་ལ༔ འབྲུ་གསུམ་སྔགས་ཀྱིས་གཏོར་མ་བྱིན༔རང་ཉིད་བདུད་རྩི་འཁྱིལ་བ་ཡི༔ ང་རྒྱལ་ལྡན་པས་སྲིད་མཐར་བསྐྲད༔ སྐུ་ལས་ཁྲོ་བོ་མེ་དཔུང་འཕྲོས༔ སློབ་མ་སྲུང་བའི་གུར་དུ་གཞུག༔ བཛྲ་རཀྵའི་སྔགས་ཤམ་གདགས༔ སློབ་མ་ཆོས་ལ་ཉན་པར་བསྐུལ༔ མི་རྟག་རྒྱུ་འབྲས་བསླུ་མེད་ཀྱིས༔ བློ་བཅོས་སྤྱི་དང་བྱེ་བྲག་གི༔ གསང་ཆེན་ཆོས་ཀྱི་ཆེ་བ་བརྗོད༔ ཁྱད་པར་གདམས་པ་ཟབ་མོ་འདིའི༔ འབྱུང་ཁུངས་ལོ་རྒྱུས་བརྗོད་པ་ནི༔ ཨེ་མ་ཧོ༔ རང་རིག་སྟོན་པ་ཀུན་བཟང་གིས༔ རང་ལས་མི་གཞན་འཁོར་རྣམས་ལ༔ ཤེས་རབ་ཕ་རོལ་ཕྱིན་པའི་དབང༔ འཕོ་མེད་དགོངས་པའི་ངང་ནས་བསྐུར༔ ལྔ་ལྡན་ལོངས་སྐུའི་ཞིང་ཁམས་སུ༔ གསལ་དག་རིགས་ལྔའི་སངས་རྒྱས་ཀྱིས༔ དག་པ་ས་གསུམ་འཁོར་རྣམས་ལ༔ རང་རིག་བརྡ་ཡི་དབང་ཆེན་བསྐུར༔ གང་འདུལ་སྤྲུལ་སྐུའི་ཞིང་ཁམས་སུ༔ མཛད་པ་ཡོངས་རྫོགས་སྟོན་པ་ཡིས༔ རིགས་ཅན་གསུམ་གྱི་སེམས་མ་ལ༔ རྒྱུད་ལུང་མན་ངག་འབྲས་བུའི་དབང་༔ རྫས་དང་སྔགས་ལ་བརྟེན་ནས་བསྐུར༔ ཞལ་ནས་སྙན་དུ་བརྒྱུད་པ་ཡི༔ བར་མ་ཆད་པའི་གདམས་པ་འོ༔ ཁྱད་པར་མཁའ་འགྲོའི་ཐུགས་བཅུད་འདི༔ ཆོས་སྐུའི་ཞིང་དུ་ཀུན་བཟང་མོས༔ རང་སྣང་སངས་རྒྱས་བྱང་སེམས་ལ༔ དབྱེར་མེད་དགོངས་པ་གཅིག་པར་བརྒྱུད༔ འོག་མིན་ལོངས་སྐུའི་ཞིང་ཁམས་སུ༔ རྒྱལ་ཡུམ་རྡོ་རྗེ་རྣལ་འབྱོར་མས༔ ས་དང་ལམ་ལ་གནས་པ་ཡི༔ གནས་ཡུལ་དུར་ཁྲོད་མཁའ་འགྲོ་ལ༔ སྒྲ་ཚིག་སྤངས་པའི་བརྡ་རུ་བསྟན༔ རང་བཞིན་སྤྲུལ་པའི་རྔ་ཡབ་གླིང་༔ རིག་འཛིན་པདྨ་ཐོད་ཕྲེང་གིས༔ མཁར་ཆེན་བཟའ་དང་མནྡྷ་ར༔ གསང་བའི་ཡུམ་ཆེན་སོ་སོ་ལ༔ རྒྱུད་དང་སྒྲུབ་ཐབས་གྲུབ་འབྲས་སོགས༔ གདུལ་བྱའི་དོན་དུ་སོ་སོར་བསྟན༔ དེ་ཡང་སྐུ་གསུམ་སྟོན་པ་རྣམས༔ ངོ་བོ་གཅིག་ལས་ཐ་དད་སྣང་༔ དཔེར་ན་མཁའ་ཡི་ཟླ་བ་དང་༔ ཆུ་ཟླ་སོ་སོར་དབྱེར་མེད་བཞིན༔ འདིར་ཡང་དག་སྣང་ཆོས་ཀྱི་སྡེ༔ མ་འོངས་སྐལ་བ་ལྡན་པ་ཡི༔ མཚོ་རྒྱལ་སྤྲུལ་པའི་གང་ཟག་ལ༔ སྨོན་ལམ་གཏད་རྒྱས་དབང་ཡང་བསྐུར༔ ལས་འཕྲོ་ལྡན་པར་ལུང་དུ་བསྟན༔ བརྒྱུད་པ་དམ་ལྡན་བྱིན་རླབས་མྱུར༔ དེ་ཕྱིར་ཌཱཀྐིའི་སྲོག་ཏིག་གོ༔ ཞེས་པ་ལ་སོགས་ཆོས་བཤད་མཐར༔ སློབ་བུས་གསེར་གཡུའི་མཎྜལ་ཕུལ༔ གདུང་བས་གསོལ་བ་འདི་ལྟར་ཐོབ༔ ཨེ་མ་ཧོ༔ སྐུ་བཞིའི་བདག་ཉིད་བླ་མ་རྗེས༔ རྒྱལ་ཡུམ་ཡེ་ཤེས་ཌཱཀྐི་མའི༔ སྐུ་གསུང་ཐུགས་ཀྱི་རྗེས་གནང་གིས༔ བདག་རྒྱུད་སྨིན་པར་མཛད་དུ་གསོལ༔ ཅེས་པས་ལན་གསུམ་གསོལ་བ་གདབ༔ གནང་བ་སྦྱིན་པ་འདི་སྐད་དོ༔ ཨེ་མ་སྐལ་ལྡན་རིགས་ཀྱི་བུ༔ ངེས་པར་འཁོར་བའི་སྡུག་བསྔལ་ལས༔ འགྲོ་ཀུན་སྒྲོལ་བར་དམ་བཅས་ན༔ མཁའ་འགྲོའི་བྱིན་རླབས་རྗེས་གནང་བྱ༔ དེ་ནས་སློབ་བུས་འདི་སྐད་དོ༔ རྡོ་རྗེ་འཛིན་པ་ཁྱེད་ཉིད་ཀྱིས༔ ཇི་ལྟར་བཀའ་བསྒོ་མཛད་པ་བཞིན༔ བདག་གིས་ལུས་ངག་ཡིད་གསུམ་གྱི༔ འགྲོ་བ་སྒྲོལ་བར་དམ་བཅའ་འོ༔ སྐྱབས་སུ་འགྲོ་ཞིང་སེམས་ཀྱང་བསྐྱེད༔ མཁའ་འགྲོའི་སྡོམ་བཟུང་འདི་སྐད་དོ༔ ཨེ་མ་ཡེ་ཤེས་ཌཱཀྐི་མའི༔ སྐུ་གསུང་ཐུགས་ཀྱི་དམ་ཚིག་ཏུ༔ བསྐྱེད་རིམ་བསྒོམ་ཞིང་བཟླས་པ་བྱ༔ དག་སྣང་རྩལ་སྦྱང་སྟོང་ཉིད་བསྒོམ༔ དེ་སྐད་ལན་གསུམ་རྗེས་ཟློས་བྱ༔ བྱིན་རླབས་བསྒྲུབ་ཕྱིར་བྱིན་འབེབས་ནི༔ སྭ་བྷ་ཝ་ཡིས་སྟོང་པར་སྦྱངས༔ སྟོང་པའི་ངང་ལས་དྲན་རྫོགས་སུ༔ སློབ་མ་ཡེ་ཤེས་མཚོ་རྒྱལ་གྱི༔ མངོན་རྟོགས་གཞུང་དང་མཐུན་པར་བསྒོམས༔ སྙིང་གར་གཡུང་དྲུང་དམར་པོ་ཡི༔ ལྟེ་བར་དགའ་འཁྱིལ་དབུས་སུ་བཾ༔ རྭ་བཞིར་ཧ་རི་ནི་ས་དང་༔ གནས་གསུམ་འབྲུ་གསུམ་འོད་ཟེར་གྱིས༔ སྐུ་གསུམ་ཞིང་དང་ཁྱད་པར་དུ༔ རྔ་ཡབ་ཟངས་མདོག་དཔལ་རི་ནས༔ མཁའ་འགྲོའི་གཙོ་མོ་མཚོ་རྒྱལ་མ༔ བུ་གཅིག་མ་ཡི་ངང་ཚུལ་གྱིས༔ སྐུ་དང་སྔགས་བྱང་ཕྱག་མཚན་ཚུལ༔ ཁ་བ་བུ་ཡུག་ཚུལ་ལྟར་བྱོན༔ སློབ་བུའི་ལུས་ངག་ཡིད་གསུམ་ལ༔ རྡོ་ཚན་སྟེང་དུ་མར་བཞག་བཞིན༔ དབྱེར་མེད་ཐིམ་པའི་མོས་འདུན་གྱིས༔ ཐོད་པའི་རྔ་བརྡུང་དབྱངས་དང་བཅས༔ ཨེ་མ་ཧོ༔ ཡུལ་གྱི་མིང་ནི་ཨོ་རྒྱན་མཁའ་འགྲོའི་གླིང་༔ གནས་ཀྱི་མིང་ནི་ཟངས་མདོག་དཔལ་གྱི་རི༔ རང་བྱུང་པདྨས་སྤྲུལ་པའི་ཞིང་ཁམས་ནས༔ སྐུ་གསུམ་མཁའ་འགྲོའི་གཙོ་མོ་མཚོ་རྒྱལ་མ༔ མོས་གུས་གདུང་བས་གནས་འདིར་སྤྱན་འདྲེན་ན༔ ཚད་མེད་ཐུགས་རྗེ་ཆེན་པོས་ཉེར་དགོངས་ནས༔ འདིར་འདུས་བདག་ཅག་སྐལ་ལྡན་སྒོ་གསུམ་ལ༔ སྐུ་གསུང་ཐུགས་ཀྱི་བྱིན་ཆེན་དབབ་ཏུ་གསོལ༔ སྐུ་ཡི་བྱིན་ཕོབ་ལུས་ལ་བདེ་དྲོད་འབར༔ གསུང་གི་བྱིན་ཕོབ་ངག་ལ་ནུས་པ་འབྱོངས༔ ཐུགས་ཀྱི་བྱིན་ཕོབ་སེམས་ལ་རྟོགས་པ་བསྐྱེད༔ རང་བྱུང་ཡེ་ཤེས་ལྔ་ཡི་དབང་མཆོག་བསྐུར༔ ཚེ་འདིར་སྨིན་ཅིང་གྲོལ་བར་མཛད་དུ་གསོལ༔ རྩ་བའི་སྔགས་ཀྱི་ཤམ་བུ་རུ༔ ཨོཾ་ཨཱཿཧཱུྃ་ཛྙཱ་ན་བཛྲ་ཨ་ཝེ་ཤ་ཡ་ཕཻཾ་ཕཻཾ༔ ཕེབས་རྟགས་ལུས་ངག་ཡིད་ལ་འབྱུང་༔ གནས་གསུམ་རྡོ་རྗེས་རྒྱས་གདབ་ནས༔ བྱང་ཆུབ་བར་དུ་བརྟན་པར་བསམ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་བརྗོད་མི་དམིགས་ངང་ལ་བཞག༔ ས་མ་ཡཱ༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྗེས་གནང་རྣམ་པ་ལྔ་རུ་བསྟན༔ དང་པོ་སྐུ་ཡི་རྗེས་གནང་ནི༔ བུམ་པ་སློབ་མའི་སྤྱི་བོར་བཞག༔ ཨོཾ་སྟོང་གསལ་འགགས་མེད་ཆོས་ཀྱི་དབྱིངས༔ འཁོར་འདས་གཞི་རྫོགས་བུམ་པ་ནས༔ སྐུ་གསུམ་ཡེ་ཤེས་བདུད་རྩིའི་རྒྱུན༔ སྐལ་ལྡན་ལུས་ལ་དབང་བསྐུར་བས༔ མཁའ་འགྲོའི་སྐུ་རུ་སྨིན་པར་ཤོག༔ རྩ་སྔགས་ཤམ་དུ་འདི་བཞིན་བརྗོད༔ ཀཱ་ཡ་ཨ་བྷི་ཥིཉྩ་ཨོཾ༔ མཁའ་འགྲོའི་སྐུ་རྟེན་སྤྱི་བོར་བཞག༔ གནས་གསུམ་མཁའ་འགྲོ་ཡོངས་ཀྱི་གཙོ༔ སྣང་སྟོང་སྒྱུ་མའི་ལྷ་སྐུར་བསྒོམ༔ ལུས་ཀྱི་གཉིས་འཛིན་སྒྲིབ་དག་ནས༔ སྤྲུལ་པའི་སྐུ་རུ་སྨིན་པར་ཤོག༔ སྦྱང་བྱ་ལུས་ཀྱི་ཕུང་པོ་དང་༔ སྦྱོང་བྱེད་བསྐྱེད་རིམ་རྣམ་པ་བཞི༔ སྦྱངས་འབྲས་སངས་རྒྱས་སྤྲུལ་པའི་སྐུ༔ ངོ་བོ་གཅིག་ལས་ལྡོག་པ་བཞིན༔ གསུང་དབང་སྔགས་བྱང་མགྲིན་པར་བཞག༔ ཨཱཿ མ་དག་འཁྲུལ་བའི་ལས་ཀྱི་རླུང་༔ སྦྱོང་བྱེད་རང་བྱུང་སྔགས་ཀྱི་སྒྲ༔ མཁའ་འགྲོའི་སྲོག་ཡིག་འདི་གཏད་པས༔ ཚངས་དབྱངས་གསུང་གི་དབང་ཐོབ་ཤོག༔ རྩ་སྔགས་ཤམ་དུ༔ ཝཀྐཱ་ཨ་བྷི་ཥིཉྩ་ཨཱཿ དཔོན་སློབ་གཉིས་ཀ་ལྷ་རུ་གསལ༔ ཐུགས་ཀར་ཉི་ཟླའི་དལ་ལ་བཾ༔ སྲོག་སྔགས་འོད་ལྔའི་ཁ་དོག་ཅན༔ གཡོན་དུ་འཁོར་བའི་འོད་ཟེར་གྱིས༔ གནས་གསུམ་མཁའ་འགྲོའི་བྱིན་རླབས་བསྡུས༔ དཔོན་སློབ་གཉིས་ཀར་ཐིམ་པ་ཡིས༔ གསུང་གི་བྱིན་རླབས་ཐོབ་བསམ་ནས༔ སྔགས་ཀྱི་རྗེས་ཟློས་འདི་བཞིན་བྱ༔ ཨོཾ་ཨཱཿཧཱུྃ་སྭཱ་ཧཱ༔ དེ་དང་རང་སྔགས་ལན་གསུམ་བཟླས༔ སྔགས་ཕྲེང་སློབ་མའི་སྤྱི་བོར་བཞག༔ ཨེ་མ་ཧོ༔ མཁའ་འགྲོའི་གཙོ་མོ་མཚོ་རྒྱལ་མའི༔ དམིགས་མེད་མཁྱེན་དང་བརྩེ་བ་ཡིས༔ སློབ་མ་འདི་ལ་ལེགས་དགོངས་ནས༔ བྱང་ཆུབ་སྙིང་པོའི་བར་དག་ཏུ༔ རྗེས་སུ་འཛིན་པར་མཛད་དུ་གསོལ༔ མ་ཧཱ་མཎྚ་སརྦ་སིདྡྷི་ཕ་ལ་ཧཱུྃ་བྷྲུཾ༔ སློབ་བུའི་ལྕེ་ལ་བདུད་རྩི་བཞག༔ ཨོཾ་ཨཱཿཧཱུྃ༔ རྩ་ཁམས་ཀུན་རྫོབ་བྱང་ཆུབ་སེམས༔ ཡེ་ཤེས་རླུང་གི་འཕྲོ་འདུ་ལས༔ འཕོ་མེད་སྒྲ་གཅན་དབྱིངས་ཆུད་ནས༔ ལས་རླུང་སྔགས་སུ་རང་གྲོལ་ཤོག༔ དབྱངས་གསལ་བརྗོད་ཅིང་བརྗོད་བྲལ་ངང་༔ རང་བྱུང་རྡོ་རྗེའི་བཟླས་པ་བྱ༔ ཐུགས་རྟེན་མན་ཤེལ་སྙིང་གར་བཞག༔ ཨེ་མ་ཧོ༔ སྤྲོས་དང་བྲལ་བའི་རིག་པ་ནི༔ གདངས་གསལ་དྭངས་ཤེལ་སྒྲིབ་བྲལ་ལྟར༔ ངོ་བོ་སྟོང་ཞིང་རང་བཞིན་གསལ༔ ཀ་དག་སྒྲིབ་མེད་དབང་ཐོབ་ཤོག༔ རྩ་སྔགས་ཤམ་དུ༔ ཙིཏྟ་ཨ་བྷི་ཥིཉྩ་ཧཱུྃ༔ མེ་ལོང་དྲི་བྲལ་མིག་ལ་བསྟན༔ ཨེ་མ་ཧོ༔ རྒྱལ་ཀུན་ཐུགས་ཀྱི་གསང་བའི་དབྱིངས༔ རྟོག་པ་མེད་ཀྱང་ཤེས་བྱའི་ཆོས༔ མ་འདྲེས་སོ་སོར་མཁྱེན་པ་ལྟར༔ མཁའ་འགྲོའི་ཐུགས་རྟེན་མེ་ལོང་གིས༔ སློབ་བུ་ཁྱོད་ལ་དབང་བསྐུར་བས༔ སྟོང་ཉིད་བསྒོམས་པའི་རང་རྩལ་གྱིས༔ ཆོས་ཀུན་མཁྱེན་པའི་རྩལ་རྫོགས་ཤོག༔ ཡོན་ཏན་ཡིད་བཞིན་ནོར་བུའི་གཟུགས༔ སློབ་བུའི་ལྟེ་བར་བཞག་བྱས་ཏེ༔ ཨེ་མ་ཧོ༔ རྟོག་མེད་ཡིད་བཞིན་ནོར་བུ་ལ༔ གསོལ་བཏབ་དགོས་འདོད་འབྱུང་བ་ལྟར༔ རྣམ་པར་རྟོག་པ་མི་མངའ་ཡང་༔ འགྲོ་ལ་འདོད་དགུའི་དཔལ་སྟེར་བའི༔ རྒྱལ་ཀུན་ཡོན་ཏན་དབང་བསྐུར་རོ༔ རྩ་སྔགས་ཤམ་དུ་འདི་ཉིད་བཏགས༔ གུ་ཎ་ཨ་བྷི་ཥིཉྩ་ཧཱུྃ༔ ཕྲིན་ལས་གཏོར་མ་ལག་ཏུ་གཏད༔ ཧཱུྃ་ཧྲཱིཿ སྣ་ཚོགས་གཉིས་འཛིན་ཀུན་བརྟགས་ཆོས༔ དམིགས་པ་མེད་པའི་དབྱིངས་སུ་གཏོར༔ སྟོང་ཉིད་ཀུན་ལ་ཁྱབ་པའི་མ༔ རྒྱལ་བ་ཀུན་གྱི་ཕྲིན་ལས་ཏེ༔ སྐལ་ལྡན་ཁྱོད་ལ་དབང་བསྐུར་བས༔ ཤེས་པ་དྲུག་ལྡན་དབང་ཐོབ་ཤོག༔ རྩ་བའི་སྔགས་ཀྱི་ཤམ་བུ་རུ༔ ཀརྨཱ་ཨ་བྷི་ཥིཉྩ་ཧཱུྃ༔ གཞན་ཡང་མཐའ་རྟེན་དབང་རྣམས་སྦྱིན༔ ས་མ་ཡཱ༔ རྗེས་ལ་དམ་ཚིག་བསྒྲགས་པ་ནི༔ ཨེ་མ་སྐལ་ལྡན་སྙིང་གི་བུ༔ མཁའ་འགྲོའི་སྐུ་ཡི་དམ་ཚིག་ཏུ༔ སྲོག་གཅོད་སྤངས་ཤིང་ཚངས་སྤྱོད་སྲུངས༔ གང་སྣང་སྒྱུ་མའི་ལྷ་སྐུར་སྦྱོངས༔ སློབ་དཔོན་སྐུ་དང་རང་གི་ལུས༔ རྟག་ཏུ་བརྙས་པར་མི་བྱའོ༔ མཁའ་འགྲོའི་གསུང་གི་དམ་ཚིག་ཏུ༔ རྫུན་ཕྲ་སྤངས་ཤིང་བཟླས་བརྗོད་བརྩོན༔ བུད་མེད་ཡོངས་ལ་མི་སྨོད་ཅིང༔ བླ་མས་ཅི་གསུང་བཀའ་བསྒྲུབས་སོ༔ མཁའ་འགྲོའི་ཐུགས་ཀྱི་དམ་ཚིག་ཏུ༔ དངོས་འཛིན་འཁྲུལ་བའི་དབང་མི་གཏོང་༔ གང་ཤར་སྤང་བླང་མི་བྱ་ཞིང་༔ སྟོང་ཉིད་ལྟ་བའི་གདེང་ལྡན་པས༔ འགྲོ་ལ་སྙིང་རྗེ་རྒྱུན་མི་གཅོད༔ ཡོན་ཏན་ཕྲིན་ལས་དམ་ཚིག་ཏུ༔ ཡར་མར་ཚེས་བཅུ་རྒྱུན་མི་གཅོད༔ སྒོ་གསུམ་དཀྱིལ་འཁོར་གསུམ་ལྡན་པས༔ རྟག་ཏུ་ཆོས་སྤྱོད་བཅུ་ལ་འབད༔ དེ་བཞིན་སློབ་མས་ཁས་བླང་ཞིང་༔ དགའ་སྟོན་ཚོགས་ཀྱི་འཁོར་ལོ་བསྐོར༔ མཎྜལ་འབུལ་ཞིང་དགེ་བ་བསྔོ༔ ཨེ་མ་ཧོ༔ ཤིན་ཏུ་ཟབ་གནད་མཁའ་འགྲོའི་སྲོག༔ སྐལ་ལྡན་བུ་མིན་ཀུན་ལ་གསོངས༔ བཀའ་སྲུང་ཁྱབ་འཇུག་ཆེན་པོ་ཡིས༔ བསྟན་པ་དཀྲུགས་པའི་གང་ཟག་དང་༔ ལོག་ལྟ་ཅན་གྱི་སྡིག་ཅན་གྱིས༔ དུས་མིན་ལེན་ན་སྲོག་དང་ཕྲོལ༔ རྩེ་གཅིག་ཆོས་ལ་མོས་པ་དང་༔ ཉམས་སུ་ལེན་ལ་རྟག་ཏུ་སྲུངས༔ གུ་ཧྱ༔ ཞེས་པའང་དག་སྣང་གི་ཆོས་ལ་དབང་བའི་སྐལ་ལྡན་ལུང་རིག་གླིང་པས་སྨྲས་པ་ལྟར་དད་བརྩོན་དང་ལྡན་པའི་བཙུན་ཆུང་ལུང་རྟོགས་མིང་གིས་ཡི་གེར་ཕབ་པའོ༔ དགེའོ༔ དགེའོ༔ དགེའོ༔