མེ་མཆོད་འདོད་རྒུའི་བསམ་འཕེལ།

དམ་ཆོས་ཡང་ཟབ་པདྨའི་ཐུགས་ཐིག་ལས༔ མེ་མཆོད་འདོད་རྒུའི་བསམ་འཕེལ་ཞེས་བྱ་བ་བཞུགས་སོ༔

རྗེ་བཙུན་འཕགས་མའི་སྐུ་ལ་འདུད༔ དེ་ཉིད་སྒྲུབ་པའི་གང་ཟག་གི༔ བསྙེན་ཁ་གསོའམ་ཞི་རྒྱས་དབང་༔ དྲག་པོའི་ལས་རྣམས་གང་བསྒྲུབས་ཀྱང་༔ མེ་ཡི་ལས་ནི་རྣོ་ལ་མྱུར༔ དེ་བས་འདི་ཉིད་སྙིང་ལ་འཆོངས༔ ས་མ་ཡཱ༔ འདི་ལ་རྣམས་གྲངས་བཞི་ཡིས་བསྟན༔ ནད་གདོན་བར་ཆད་འཇིགས་བརྒྱད་སོགས༔ ཞི་ཕྱིར་ཞི་བའི་མེ་མཆོད་བརྩམས༔ ཚེ་བསོད་དཔལ་འབྱོར་ཡོན་ཏན་སོགས༔ རྒྱས་ཕྱིར་རྒྱས་པའི་མེ་མཆོད་བརྩམས༔ སྐྱེ་འགྲོ་ཕོ་མོ་ཟས་ནོར་སོགས༔དབང་དུ་སྡུད་ཕྱིར་དབང་གི་མེ༔ དགྲ་བགེགས་དམ་སྲི་བརླག་པའི་ཕྱིར༔ གདུག་རྩུབ་དྲག་པོའི་མེ་ཡི་ལས༔ དེ་དག་གང་དང་གང་ལ་ཡང་༔ སྦྱོར་བ་གཞན་ཕན་སེམས་བསྐྱེད་གཅེས༔ དངོས་གཞི་བློ་འདས་ལྟ་བའི་གདེང་༔ མ་བྲལ་ཕྱག་བཞེས་ཚད་ལྡན་གཅེས༔ རྗེས་ལ་དགེ་རྩ་རང་གཅིག་པུའི༔ ཆེད་མིན་ཡོངས་ལ་བསྔོ་བ་གཅེས༔ བསྙེན་པ་སྔོན་དུ་སོང་བ་ཡིས༔ བསྙེན་ཁ་གསོས་ནས་སློབ་མ་ལ༔ དབང་རྫོགས་སེལ་མ་ཞུགས་པ་དང་༔ ཁྱད་པར་ཞི་བའི་སྦྱིན་སྲེག་གི༔ དུས་ནི་ཡར་ངོའི་ཚེས་གསུམ་མམ༔ བཀྲ་ཤིས་ཞི་བའི་ཟླ་བ་དང་༔ སྐར་མ་འཛོམས་པར་བཀྲ་ཤིས་པའི༔ ས་ལ་བ་ཡི་འོ་མ་ཡིས༔ ཆག་ཆག་གདབ་ནས་ཐིག་ཆེན་བརྒྱད༔ ལེགས་པར་མཐོང་རྒྱུན་བཞིན་དུ་གདབ༔ ལྟེ་བར་པདྨ་འདབ་བཞི་བ༔ དབུས་སུ་ཏཱཾཿམམ་ལྷ་གཞན་གྱི༔ ས་བོན་གང་ཡིན་ཁ་དོག་དཀར༔ མ་རྒྱུད་ཕྱི་མཐར་རྡོ་ར་མེ༔ མདའ་དར་དཀར་པོ་ཁ་ཤར་ཕྱོགས༔ ཆས་གོས་དཀར་རྒྱན་རྡོར་སེམས་ཀྱི༔ བདག་བསྐྱེད་བསྙེན་པ་རྫོགས་པའི་མཐར༔ ཐབས་ཤེས་རྡོ་རྗེ་དྲིལ་བུ་དང་༔ འབྲལ་མེད་དགོས་རྫས་ཡོ་བྱད་བསགས༔ དེ་ཡང་ལྷ་ཤིང་ཤུག་པ་འམ༔ འོམ་བུ་བདུད་རྩི་ཅན་གང་རུང་༔ མར་ཁུ་སྡིག་སྦྱོང་ཏིལ་ཡུངས་འབྲས༔ གྲོ་ནས་སྲན་འབྲུ་དར་དཀར་དུང་༔ ཤེལ་དང་མེ་ཏོག་དཀར་པོ་སོགས༔ ཞི་བའི་དགོས་རྫས་ཚང་བར་བསགས༔ རྩིགས་ཤིང་ཟླུམ་པོ་མཛེས་པར་བྱ༔ ས་མ་ཡཱ༔ དངོས་གཞི་་མཆོད་རྫས་རང་གཞུང་གི༔ བྱིན་བརླབས་བྱས་ཤིང་བསངས་ཆུས་བྲན༔ སྲེག་རྫས་འབྲུ་གསུམ་སྔགས་བརྗོད་ཅིང་༔ རྡོ་རྗེ་རྩེ་གཅིག་ཕྱག་རྒྱས་རེག༔ རྒྱལ་རིགས་དག་ལས་མེ་ཤིང་བླངས༔ ཚིག་འདིས་ཡང་དག་སྦྱང་བར་བྱ༔ ཨོཾ༔ འཇིག་རྟེན་གསུམ་ན་འབྱུང་བ་བཞིའི༔ དྲོད་ལ་མ་བརྟེན་གང་ཡང་མེད༔ མྱུར་ལ་ཤུགས་དྲག་ཞི་བའི་མེ༔རབ་ཏུ་འབར་བས་གོ་དབྱེ་འོ༔ ཨགྣེ་ཛྭ་ལ་རཾ༔ ཞེས་བརྗོད་ཤར་གྱི་ཕྱོགས་ནས་སྦར༔ ༼ཧཱུྃ་ཧཱུྃ་ཧཱུྃ་གསུམ་གྱིས་རླུང་གཡབ་མཆན།༽ འཇིག་རྟེན་མེ་ལྷ་བསྐྱེད་པ་ནི༔ མེ་ཉིད་བདུད་རྩི་འཁྱིལ་བ་ཡི༔ སྔགས་དང་བསང་ཆུས་དངོས་འཛིན་སྦྱངས༔ སྟོང་པའི་ངང་ལས་ར་སྐྱེས་ཁམ་པའི་སྟེང་༔ ཐོད་པའི་སྒ་ལ་དར་སྟན་མཛེས་དབུས་རཾ༔ ཟླ་བ་ཞུན་མ་ལྟ་བུའི་འོད་ཟེར་གྱིས༔ བདག་གཞན་ནད་གདོན་སྡིག་སྒྲིབ་བག་ཆགས་སྦྱངས༔ ཚུར་འདུས་ཡོངས་གྱུར་ཞི་བའི་མེ་ལྷ་དཀར༔ འཛུམས་ཤིང་དགྱེས་ཞལ་ཕྱག་གཡས་སྤྱི་བླུགས་དང་༔ གཡོན་པ་གནྡྷེ་ཚངས་སྐུད་དཀར་པོ་འཕྱང་༔ དབུ་གཙུག་སྐྲ་ཡི་ཟུར་ཕུད་མཛེས་པའི་རྩེར༔ རྡོ་རྗེ་སེམས་དཔའ་ཞི་ཚུལ་དགྱེས་པར་བཞུགས༔ གནས་གསུམ་འབྲུ་གསུམ་འོད་ཀྱིས་ཤར་ལྷོ་ནས༔ ཞི་བའི་མེ་ལྷ་སྤྱན་དྲངས་ཐིམ་པར་བསམ༔ མདའ་དར་དཀར་པོ་གཡབ་ཅིང་འདི་སྐད་དོ༔ ཧཱུྃ༔ དད་པ་དང་ནི་དམ་ཚིག་གིས༔ ཚུར་སྤྱོན་འབྱུང་པོ་མེ་ཡི་ལྷ༔ བདག་གི་ལས་ཀུན་བསྒྲུབ་པའི་ཕྱིར༔ གནས་འདིར་སྤྱན་འདྲེན་གཤེགས་སུ་གསོལ༔ བཛྲ་ས་མ་ཛཿ ཞེས་པས་སྤྱན་དྲངས་མེ་ཡི་ལྷ༔ དགྱེས་པ་ཆེན་པོས་བཞུགས་པར་བསམ་ལ༔ ཧཱུྃ༔ མེ་ཡི་ལྷ་ནི་དགྱེས་པ་ཡིས༔ འབར་བའི་གདན་ལ་ལེགས་བཞུགས་ནས༔ བདག་གི་མཆོད་ཡོན་བཞེས་པ་དང་༔ མེ་ཡི་ཕྱག་གཙང་མཛད་ནས་ཀྱང་༔ མཆོད་རྫས་ཡེ་ཤེས་ལྷར་ཕུལ་ཞིང་༔ ལས་བཞི་འགྲུབ་པའི་གྲོགས་དན་མཛོད༔ ཅེས་བརྗོད་ཡུངས་དཀར་ཐབ་ཏུ་གཏོར༔ མེ་ལྷའི་ལྗགས་བརྐྱང་དངུལ་དཀར་གྱི༔ རྡོ་རྗེ་རྩེ་གཅིག་སྦུབས་སྟོང་པའི༔ དབུས་རྭ་སྟོང་པའི་སྦུ་གུ་ཡིས༔ བསྲེག་རྫས་བདུད་རྩིའི་རང་བཞིན་དུ༔ གསོལ་ནས་ཞི་བའི་ལས་གང་བཅོལ༔ དེ་ཀུན་ཐོགས་མེད་སྒྲུབ་པར་བསམ༔ མར་ཁུ་བླུགས་གཟར་སྔགས་འདི་ཡིས༔ ལན་བདུན་དགང་སྟེ་འབུལ་བར་བྱ༔ ཨོཾ་ཨགྣེ་ཡེ་སྭཱ་ཧཱ༔ དེ་ནས་འདོད་དོན་གསོལ་བ་ནི༔ བདག་ཅག་མི་ནོར་འཁོར་བཅས་ཀྱི༔ ཚེ་རབས་སྔོན་ནས་ད་ལྟའི་བར༔ བསགས་པའི་སྡིག་སྒྲིབ་ནད་གདོན་བགེགས༔ འཇིགས་པ་བརྒྱད་སོགས་ཞི་གྱུར་ཅིག༔ ཤིནྟཾ་ཀུ་རུ་ཡེ་སྭཱ་ཧཱ༔ དེ་བཞིན་ཡམ་ཤིང་མར་ཁུ་ཏིལ༔ ནས་འབྲས་གྲོ་སྲན་དར་དུང་ཤེལ༔ རྫས་ཀྱི་རིམ་པ་གཞན་རྣམས་ལའང་༔ བརྒྱའམ་ཉེར་གཅིག་འདོད་གསོལ་སྦྱར༔དེ་ནས་རྡོར་དྲིལ་སྟངས་སྟབས་ཀྱིས༔ ཨོཾ༔ མེ་ལོང་ཡེ་ཤེས་རང་གདངས་གསལ༔ ཞི་མཛད་འཇིག་རྟེན་མེ་ཡི་ལྷ༔ དཀར་གསལ་ཞི་འཛུམ་ར་སྐྱེས་ཆིབས༔ ནད་གདོན་ཞི་མཛད་ཁྱོད་ལ་བསྟོད༔ གོང་ངམ་ཡང་ན་སྐབས་འདི་རུ༔ ཨོཾ་ཨགྣེ་ཡེ་བཛྲ་པུཥྤེ་པྲ་ཏིཥྩ་ཡེ་སྭཱ་ཧཱ༔ དེ་བཞིན་དྷུཔྤེ་ཨཱ་ལོ་ཀེ༔ གནྡྷེ་ནེ་ཝི་ཏེ་ཤཔྟ༔ མགོ་འཇུག་ཚིག་ཕྲད་སྦྱར་ཏེ་འབུལ༔ མེ་ལྷ་མེ་ཡི་རྣམ་པ་རུ༔ ཨགྣེ་མུཾ་ཞེས་མར་ཁུས་བྲན༔ དེ་ནས་ཡེ་ཤེས་ལྷ་བསྒོམ་པ༔ གཞལ་ཡས་གདན་ཁྲི་ལྷར་བཅས་བསྒོམས༔ སྤྱན་དྲངས་བཞུགས་གསོལ་ཕྱག་འཚལ་མཆོད༔ ལྷ་ཚོགས་སྐུ་མདོག་དཀར་པོར་བསྒྱུར༔ ལྗགས་ཉིད་དངུལ་དཀར་རྡོ་རྗེར་བསྒོམས༔ སྦུ་གུས་བསྲེག་རྫས་བདུད་རྩིར་དྲངས༔ བདག་གཞན་ནད་གདོན་སྡིག་སྒྲིབ་དང་༔ དམ་ཚིག་ཉམས་ཆག་ཀུན་བྱང་བསམ༔ རྩ་སྔགས་གང་ཡིན་ཤམ་བུ་རུ༔ ཞི་བའི་འདོད་གསོལ་སྔར་ལྟར་སྦྱར༔ མར་ཁུའི་སྐྱེམས་ཕུད་རྫས་རྣམས་ནི༔ ཞི་བའི་སྦྱིན་བསྲེགས་རིགས་མཐུན་ལ༔ སྔགས་ཀྱང་དེ་བཞིན་བྱས་པས་འགྲུབ༔ རྗེས་སུ་བསྟོད་ཅིང་གཤེགས་གསོལ་བསྔོ༔ དེ་ནས་མེ་ལྷ་སྔར་ལྟར་བསྒོམས༔ མཆོད་པས་མཆོད་ཅིང་བསྟོད་པས་བསྟོད༔ མེ་ལྷ་གཤེགས་ཤིང་དགེ་ཚོགས་བསྔོ༔ ཤིས་པ་བརྗོད་ཅིང་མེ་ཐབ་བསལ༔ ལས་རྗེས་མི་མངོན་པར་བྱའོ༔ ས་མ་ཡཱ༔ རྒྱ་རྒྱ་རྒྱ༔ དེ་བཞིན་ཚེ་བསོད་ལེགས་ཚོགས་ཀུན༔ རྒྱས་བྱེད་མེ་ལྷ་གསེར་མདོག་སྒེག༔ རྫས་ཀྱང་ཟས་སྣ་གོས་དར་སྣ༔ གསེར་དང་སྨན་སྣ་ཅི་མང་བསགས༔ མེ་ཡང་རྗེ་རིགས་དག་ལས་བླངས༔ འདོད་གསོལ་ཚིག་ནི་འདི་བཞིན་སྦྱར༔ ཏྲཾ༔ བདག་གཞན་ཚེ་དང་བསོད་ནམས་དང་༔ འཁོར་དང་ལོངས་སྤྱོད་རིགས་རྒྱུད་བུ༔ ལུང་རྟོགས་ཡོན་ཏན་ལེགས་ཚོགས་ཀུན༔ ཡར་ངོའི་ཟླ་རྒྱས་བཞིན་གྱུར་ཅིག༔ པུཥྚིཾ་ཀུ་རུ་སྭཱ་ཧཱ༔ མེ་ལྷའི་བསྟོད་པ་འདི་བཞིན་བྱ༔ ཏྲཾ༔ མཉམ་ཉིད་ཡེ་ཤེས་རང་རྩལ་ལས༔ ལེགས་ཚོགས་རྒྱས་མཛད་མེ་ཡི་ལྷ༔ གསེར་མདོག་སྒེག་ཉམས་ལྟ་ན་སྡུག༔ ཡོན་ཏན་ཀུན་རྫོགས་ཁྱོད་ལ་བསྟོད༔ འདི་ལ་མེ་ལྷའི་ལྟོ་བ་ནི༔ རྒྱ་ཁྱོན་ཆོས་དབྱིངས་མཉམ་པའི་ནང་༔ རྟེན་དང་བརྟེན་པའི་ལྷ་རྣམས་བསྐྱེད༔ སྤྱན་དྲངས་བཞུགས་གསོལ་ཕྱག་མཆོད་འབུལ༔ ཡེ་ཤེས་མེ་ལྷའི་ལྗགས་ནོར་བུའི༔ སྦུ་གུར་བསྲེག་རྫས་བདུད་རྩིར་དྲངས༔ ལྷ་རྣམས་སྐུ་མདོག་གསེར་མདངས་བསྒྱུར༔ འོད་ཟེར་ཉི་མ་ལྟར་འབར་བས༔ བདག་དང་སྦྱིན་བདག་མི་ནོར་གྱི༔ ལུས་ངག་ཡིད་གསུམ་ལ་རེག་པས༔ ཚེ་བསོད་དཔལ་འབྱོར་རྒྱས་པར་བསམ༔ རྗེས་ཀྱི་བྱ་བ་སྔར་དང་མཚུངས༔ ས་མ་ཡཱ༔ དབང་གི་ཕྲིན་ལས་སྒྲུབ་པ་ལ༔ དབང་གི་མེ་ལྷ་པད་རག་མདངས༔ རྫས་ཀྱང་རང་བྱུང་མཚལ་ལི་ཁྲི༔ དར་དམར་ཟངས་ཐེར་ཁུག་ཆོས་སོགས༔ ཕུལ་ནས་མེ་ལྷ་བསྟོད་པའི་སྐབས༔ ཧྲཱིཿ སོར་རྟོག་ཡེ་ཤེས་རྣམ་རོལ་ལས༔ ཁམས་གསུམ་དབང་མཛད་མེ་ཡི་ལྷ༔ རབ་དམར་ཆགས་པའི་ལང་ཚོ་འབར༔ སྐྱེ་འགྲོར་དབང་བསྒྱུར་ཁྱོད་ལ་བསྟོད༔ རྫས་ཀྱང་བརྒྱའམ་ཉེར་བརྒྱད་བསགས༔ དམ་ཚིག་མེ་ལྷའི་ལྟོ་བ་རུ༔ ཡེ་ཤེས་མེ་ལྷ་བསྒོམས་ནས་ནི༔ སྤྱན་དྲངས་བཞུགས་ཕྱག་མཆོད་པ་འབུལ༔ ལྗགས་ཉིད་པདྨ་འདབ་བརྒྱ་ལས༔ འོད་དམར་སྦུ་གུས་བསྲེག་རྫས་ལས༔ དམིགས་བྱའི་བླ་སྲོག་འགུག་ཅིང་བསྟིམས༔ ཀ་ཆ་ནོར་རྫས་གང་འདོད་ཀྱང་༔ དེ་ཉིད་འོད་ཞུ་རྫས་ལ་བསྟིམས༔ བདུད་རྩིར་དྲངས་ནས་གསོལ་བར་བསམ༔ འདོད་དོན་གསོལ་བ་འདི་བཞིན་བྱ༔ ཧྲཱིཿ བདག་དང་བསྲུང་བྱ་ཐམས་ཅད་ཀྱི༔ གང་འདོད་སྐྱེ་འགྲོ་ཕོ་མོ་དང་༔ ཟས་ནོར་ལོངས་སྤྱོད་རྒྱལ་བློན་བཙུན༔ འབངས་རྣམས་བདག་གི་དབང་གྱུར་ཅིག༔ པ་ཤཾ་ཀུ་རུ་ཡེ་སྭཱ་ཧཱ༔ དེ་རྗེས་མེ་ལྷར་བསྲེག་རྫས་འབུལ༔ ལྷ་རྣམས་སྐུ་མདོག་དམར་པོ་ལས༔ འོད་ཟེར་ལྕགས་ཀྱུ་ལྟར་འཕྲོས་པས༔ ཆེ་བཙན་འགྲོ་ཀུན་སྙིང་ག་དང་༔ མོ་བཙུན་གསང་བ་ནས་ཞུགས་ཏེ༔ ཡིད་ཆགས་བདག་དབང་གྱུར་པར་བསམ༔ རྗེས་ཀྱི་བྱ་བ་གོང་མཐུན་ལ༔ ཀུན་ལ་ཞལ་རྒྱུན་མཐོང་རྒྱུད་ལྟོས༔ ས་མ་ཡཱ༔ རྒྱ་རྒྱ་རྒྱ༔ བཞི་པ་དྲག་པོའི་ཕྲིན་ལས་ལ༔ གཟའ་དྲག་འཕྲོད་སྦྱོར་རྩུབ་པ་ལ༔ དགྲ་བགེགས་ལིང་ག་གཞན་མཐུན་འབྲི༔ ཧོམ་གཞུག་བཀུག་བསྟིམ་བསྒྲལ་ལས་བྱ༔ ཤ་ཁྲག་ལྕགས་ཟངས་དར་ནག་འབྲུ༔ ནག་པོའི་རིགས་བསགས་མེ་ལྷ་ཉིད༔ སྟོང་པའི་ངང་ལས་འཇིག་རྟེན་མེ་ཡི་ལྷ༔ ནག་པོ་རབ་ཁྲོས་གནམ་ལྕགས་སྡིག་པ་ཆེ༔ མགོ་དགུ་བཅོ་བརྒྱད་རྭ་རྩེར་བདུད་སྲིན་གཡེངས༔ ཡན་ལག་བགྲད་པས་གང་དམིགས་དགྲ་བགེགས་གཟིར༔ མཇུག་མ་གཡུགས་པས་ཡུལ་འདྲེ་མཐའ་རུ་སྤྱུགས༔ ཐུགས་ལས་ཛཿནག་འོད་ཀྱིས་དྲག་པོ་ཡི༔ མེ་ལྷ་སྤྱན་དྲངས་མེ་དང་གཉིས་མེད་པར༔ བསམས་ཏེ་ཚིག་འདིས་སྙན་གསན་དབབ་སྟེ་སྤྱོན༔ ཧཱུྃ༔ མ་རུངས་གདུག་ཅན་སྡང་དགྲ་དམ་སྲི་བགེགས༔ འདུལ་མཛད་དཔའ་བོ་ཆེན་པོ་མེ་ཡི་ལྷ༔ སྙིང་རྗེའི་ངང་ལས་ཞེ་སྡང་ཅན་འདུལ་བའི༔ ལོག་འདྲེན་བྱད་མ་འདུལ་ཕྱིར་གཤེགས་སུ་གསོལ༔ ཨགྣེ་ཡེ་བཛྲ་ས་མ་ཡཱ་ཛ་ཛ༔ ས་མ་ཡཱ་པདྨ་ཀ་མ་ལ་ཡ་སྟྭཾ༔ དེ་ནས་བསྲེག་རྫས་འབུལ་བ་ནི༔ ཧཱུྃ༔ དམ་ཉམས་ལོག་འདྲེན་བསྒྲལ་བ་ཡི༔ གཟུགས་ཀྱི་ཕུང་པོ་ལས་བྱུང་བའི༔ དབང་པོ་ལྔ་ཡི་མེ་ཏོག་དང་༔ རོ་བསྲེགས་བདུག་སྤོས་ཞུན་ཆེན་མེ༔ ཤ་རུས་ཞལ་ཟས་མཁྲིས་ཁྲག་ཆེན༔ ཐོད་རྔ་རྐང་གླིང་རོལ་མོའི་སྒྲ༔ འཇིགས་བྱེད་མེ་ལྷ་ཁྱོད་ལ་བསྟོད༔ ཨརྒྷཾ་ལ་སོགས་ཉེར་སྤྱོད་འབུལ༔ མེ་ལྷའི་ལྗགས་ནི་གནམ་ལྕགས་ཀྱི༔ རལ་གྲི་སྦུ་གུ་ཅན་འོད་ཀྱིས༔ བསྲེག་རྫས་དགྲ་བགེགས་ཤ་ཁྲག་གི༔ རྣམ་པར་དྲངས་ཏེ་གསོལ་བར་བསམ༔ ཁྲག་དང་མར་ཁུ་བསྲེས་ཏེ་འབུལ༔ ཨོཾ་ཨགྣེ་ཡེ་ཀྲོ་ཏ་ཛྭ་ལ་དགྲ་བགེགས་འབྱུང་པོ་ཐམས་ཅད་མཱ་ར་ཡ་ཧཱུྃ་ཕཊ༔ ཁ་ཧཱི་ཁཱ་ཧཱི༔ བསྲེག་རྫས་ཚ་བའི་རྫས་གསུམ་དང་༔ གནད་རྫས་གསོད་རྫས་མྱོས་བྱེད་རྫས༔ རྩ་བའི་རྫས་སོགས་གཞན་དང་བསྟུན༔ དེ་ནས་བསྟོད་པ་བྱ་བ་ནི༔ ཧཱུྃ༔ བྱ་བ་གྲུབ་པའི་ཡེ་ཤེས་འཕྲུལ༔ མཐིང་ནག་ལྕགས་སྡིག་མགོ་དགུར་སྟོན༔ དྲག་རྩུབ་ལས་མཛད་མེ་ཡི་ལྷ༔ ལོག་འདྲེན་གཤེད་མ་ཁྱོད་ལ་བསྟོད༔ དེ་ཡི་ལྟོ་བ་གནམ་ལྕགས་ཀྱི༔ གཞལ་ཡས་དབུས་སུ་བསྐྱེད་པའི་ལྷ༔ ཀུན་ཀྱང་སྐུ་མདོག་མཐིང་ནག་དང་༔ སེར་དམར་ལྗང་དཀར་ཁྲོ་ཉམས་ཅན༔ འོད་ཟེར་མེ་ཡི་ཚྭ་ཚྭ་འཁྲུགས༔ ལྗགས་ཀྱི་དབང་པོ་རལ་གྲི་ཡི༔ སྦུབས་སུ་ལོག་འདྲེན་ཤ་ཁྲག་ཀུན༔ བདུད་རྩིའི་རང་བཞིན་གསོལ་བར་བསམ༔ རྩ་སྔགས་ཤམ་དུ་སྔགས་འདི་གདགས༔ ཀྲོ་ཏ་ཀྲོ་ཏཱི་ལོག་འདྲེན་འབྱུང་པོ་མཱ་ར་ཡ་ཛྭ་ལ་རཾ་རཾ་ཧཱུྃ་ཕཊ་ཁཱ་ཧི༔ སྐབས་སུ་འདོད་གསོལ་ཚིག་འདིའོ༔ མཐུ་སྟོབས་ཚད་མེད་དཀྱིལ་འཁོར་ལྷར༔ ཟག་མེད་བསྲེག་རྫས་འདི་ཕུལ་བས༔ དམ་ཚིག་ཉམས་ཆག་བསྐང་བ་དང་༔ ཉམས་པ་ཅན་གྱི་དགྲ་བགེགས་དཔུང་༔ དྲག་པོའི་ལས་ཀྱིས་ཚར་ཆོད་ཅིག༔ ཅེས་བརྗོད་དྲག་པོའི་གཏོར་མ་ལ༔ དགྲ་བགེགས་འགུགས་བསྟིམས་རྩ་སྔགས་མཐར༔ དམ་ཉམས་དམིགས་ཡུལ་འདི་ཞེས་པའི༔ ཕུང་ཁམས་སྐྱེ་མཆེད་མཆོད་རྫས་འབུལ༔བཞེས་ནས་བསྟན་འགྲོ་ལ་གནོད་པའི༔ དགྲ་བགེགས་དམ་སྲིའི་མཐའ་བསྟུངས་ཤིག༔ སླར་ཡང་མེ་ལྷ་ཡང་གསལ་གདབ༔ བསྲེག་རྫས་ཐམས་ཅད་ཉེར་གཅིག་གམ༔ བདུན་ནམ་གསུམ་གྱིས་ཞལ་བསྲོ་འབུལ༔ མེ་ལྷའི་གཏོར་མ་དགྲ་བགེགས་འགུགས༔ ཕུལ་ནས་ཕྲིན་ལས་སྔར་ལྟར་བཅོལ༔ ལྷ་གཤེགས་བསྔོ་སྨོན་བཀྲ་ཤིས་བརྗོད༔ ཐལ་སོལ་ལིངྒ་དག་ཏུ་རྩར༔ མནན་ཅིང་ལས་རྗེས་མི་མངོན་བྱ༔ དོན་དམ་གཉུག་མ་བབ་ཀྱི་གཤིས༔ རྩོལ་བྲལ་སེམས་ཀྱི་ངང་མདངས་བསྐྱངས༔ ས་མ་ཡཱ༔ དེ་ལྟར་མེ་ཡི་ལས་བརྩམས་པས༔ ལས་ནི་གང་བརྩམས་ཐོགས་མེད་འགྲུབ༔ འདི་ལྟར་ཡང་ཟབ་དགོངས་པའི་གཏེར༔ མཚོ་རྒྱལ་སྤྲུལ་པའི་གང་ཟག་ལ༔ པདྨའི་ཐུགས་རྗེའི་རྩོལ་མེད་འཆར༔ གང་འབྲེལ་ཕན་བདེས་འཚེངས་པའི་ཆོས༔ ལས་སྐལ་ལྡན་པའི་དཔལ་དུ་ཤོག༔ བཀའ་སྲུང་ནམ་མཁའི་རལ་གཅིག་མ༔ གཏེར་སྲུང་ལྷ་མོ་དུད་སོལ་མས༔ བརྙས་ཤིང་གཤེ་བའི་སྙིང་ཁྲག་རོལ༔ ལོག་ལྟ་ཅན་ལ་གསང་ངོ་རྒྱ༔ གུ་ཧྱ༔ བདག་འདྲ་བན་སྤྲང་ཟོག་ཁྲམ་དགེ་སྦྱོང་ལུང་རྟོགས་མིང་གིས༔ མཚུངས་མེད་གྲུབ་དབང་རིན་པོ་ཆེའི་ཐུགས་རྗེ་ལ་བརྟེན་ནས་དག་པར་ཕབ་པའོ༔