གཅོད་ཡུལ་མཁའ་འགྲོའི་ཞལ་ལུང་གི་གསོལ་འདེབས་བྱིན་རླབས་སྤྲིན་ཕུང་།

གཅོད་ཡུལ་མཁའ་འགྲོའི་ཞལ་ལུང་ལས༔ གསོལ་འདེབས་བྱིན་རླབས་སྤྲིན་ཕུང་བཞུགས༔ ཨེ་མ་ཧོ༔ རྒྱལ་བའི་དབང་པོ་བཅོམ་ལྡན་ཤཱཀྱ་ཐུབ༔ རྒྱལ་སྲས་ཐུ་བོ་རྗེ་བཙུན་འཇམ་པའི་དབྱངས༔ རྒྱལ་ཡུམ་དཔའ་མོ་འཕགས་མཆོག་སྒྲོལ་མ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གནས་གསུམ་མཁའ་འགྲོའི་ཚོགས་རྗེ་བདེ་བའི་དཔལ༔ འཛམ་གླིང་རྒྱན་མཆོག་མཁས་གྲུབ་འཕགས་པ་ལྷ༔ རྒྱ་བོད་བསྟན་འཛིན་དམ་པ་རྒྱ་གར་བ༔ གངས་ཅན་སྐྱེས་མཆོག་པུཎྱཻ་གུ་རུའི་ཞབས༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ རྒྱལ་བས་ལུང་བསྟན་མ་ཅིག་ལབ་སྒྲོན་མ༔ རླུང་སེམས་དབང་ཐོབ་ཐོད་སྨྱོན་བསམ་པ་འགྲུབ༔ གཞན་ཡང་བརྒྱུད་འཛིན་དམ་པ་ཐམས་ཅད་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གཅོད་ཡུལ་བརྒྱུད་པའི་བླ་མ་ཐམས་ཅད་ཀྱི༔ བྱིན་རླབས་གཅིག་འདུས་གྲུབ་དབང་བྱང་ཆུབ་གླིང་༔ གང་དེས་དག་སྣང་ཆོས་ཀྱི་བདག་པོ་རུ༔ དབུགས་དབྱུང་བྱིན་ཐོབ་ལུང་རྟོགས་མཚན་ཅན་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ རབ་འབྱམས་རྒྱལ་བ་མ་ལུས་བསྐྱེད་པའི་ཡུམ༔ ཆོས་ཕུང་བརྒྱད་ཁྲི་བཞི་སྟོང་འབྱུང་བའི་གནས༔ སྲིད་ཞིའི་དཔལ་གྱུར་ཤེས་རབ་ཕ་རོལ་ཕྱིན༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གང་དེ་རྨད་བྱུང་གཟུགས་ཀྱི་སྐུར་བཞེངས་ནས༔ ཁམས་གསུམ་སྲིད་གསུམ་སྣང་བ་དབང་བསྡུས་ཏེ༔ ལོག་རྟོག་བདུད་བཞི་ཟིལ་གྱིས་གནོན་མཛད་པའི༔ མ་ཅིག་ཡུམ་ཆེན་ལབ་ཀྱི་སྒྲོན་མ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ དེ་ཉིད་གནས་གསུམ་མཁའ་འགྲོའི་ཚོགས་ཀྱི་རྗེར༔ དཀྱིལ་འཁོར་རྒྱ་མཚོའི་གཙོ་མོར་རྟག་བཞུགས་ཤིང་༔ དཔལ་ཆེན་ཁྲག་འཐུང་མ་ལུས་དགྱེས་བསྐྱེད་ཡུམ༔ ཡེ་ཤེས་མཁའ་འགྲོ་བཛྲ་ཝཱ་ར་ཧིར༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ མེ་ལོང་མཉམ་ཉིད་མ་འདྲེས་སོ་སོར་རྟོག༔ ལས་བཞིའི་བྱ་བ་ཀུན་གྲུབ་ཌཱཀྐི་མ༔ བཛྲ་རཏྣ་པདྨ་ཀརྨ་ཡི༔ རྣམ་འགྱུར་ཡེ་ཤེས་མཁའ་འགྲོ་སྡེ་ལྔ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ གཞན་ཡང་ཐེག་དགུའི་ཡང་རྩེ་རྫོགས་པ་ཆེའི༔ ལམ་གྱི་གཞིར་གྱུར་ཕྱག་རྒྱ་ཆེན་པོ་ཞེས༔ རྒྱ་བོད་ཡོངས་ལ་ཉི་ཟླ་ལྟར་གྲགས་པའི༔ དམ་ཆོས་ཟབ་མོ་བཀའ་གཏེར་གཅོད་ཡུལ་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ སངས་རྒྱས་བསྟན་ལ་བྱ་བ་ཆེར་མཛད་པའི༔ རྒྱན་དྲུག་མཆོག་གཉིས་གྲུབ་ཆེན་བརྒྱད་ཅུ་བཞི༔ མཁན་སློབ་ཆོས་རྒྱལ་གཏེར་སྟོན་བརྒྱ་རྩ་སོགས༔ ལུང་བསྟན་བཀའ་བབས་ཆོས་བདག་བརྒྱུད་འཛིན་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ ཐུབ་བསྟན་འཛིན་སྐྱོང་སྤེལ་རྣམས་རྟག་བསྲུང་ཞིང་༔ ཟབ་ཆོས་གཡེལ་མེད་མེལ་ཚེས་འཛིན་མཛད་པའི༔ མ་མགོན་ལྕམ་དྲལ་ཀླུ་རྒྱལ་ཟླ་སྐྱོང་དང་༔ ཟངས་རིའི་གཞི་བདག་བཙན་རྒོད་མཆེད་གཉིས་ལ༔ གསོལ་བ་འདེབས་སོ་བདག་རྒྱུད་བྱིན་གྱིས་རློབས༔ དེ་ལྟར་གསོལ་བ་བཏབ་པའི་བྱིན་རླབས་ཀྱིས༔ མཐའ་མེད་འཁོར་བའི་རྒྱ་མཚོ་ཆེན་པོ་ལ༔ བཟོད་མེད་ངེས་འབྱུང་དྲག་པོས་རྒྱུད་བསྐུལ་ནས༔ ཚེ་གཅིག་སྒྲུབ་ལ་བརྩོན་པར་བྱིན་གྱིས་རློབས༔ ཁྱིམ་ནས་འབྱུང་ཡང་དབེན་པར་ཚེ་འདིའི་ཆེད༔ ཚུལ་འཆོས་བཅོས་མའི་ཆོས་ཚུགས་མི་འཛིན་པར༔ ལུས་སེམས་གཟན་བོར་གཅེས་འཛིན་རྒྱང་དུ་དོར༔ ལྷ་འདྲེར་འགྲོ་དོན་ནུས་པར་བྱིན་གྱིས་རློབས༔ གཅོད་ཡུལ་མཐར་ཕྱིན་གཅོད་དོན་ཡུམ་ཆེན་མོ༔ གནས་ལུགས་མ་བཅོས་རང་བྱུང་རང་ཞལ་མཇལ༔ རང་དོན་ཞི་བདེའི་འདམ་ལས་རབ་བརྒལ་ནས༔ གཞན་དོན་ཕུན་ཚོགས་དོན་གཉིས་ལྷུན་གྲུབ་ཤོག༔ གསོལ་འདེབས་ཁྱད་འཕགས་བྱིན་རླབས་སྤྲིན་ཕུང་འདི༔ སྔོན་སྨོན་དུས་བབས་ཌཱཀྐིའི་བརྡ་རིས་ལས༔ མ་ཅིག་ཇོ་མོ་ཡེ་ཤེས་མཚོ་རྒྱལ་དང་༔ ཚེ་རབས་བླ་མ་པད་འབྱུང་གྲུབ་དབང་རྗེའི༔ ཐུགས་རྗེའི་མཐུ་ལས་ལུང་རིག་གླིང་པས་བྲིས༔ ནོར་མེད་སྒྲུབ་བརྩོན་ལས་ལྡན་བུ་ལ་གཏད༔ གུ་ཧྱ༔ སྐལ་ལྡན་ལུང་རིག་གླིང་པས་དུས་ཚེས་དགེ་བར་བྲིས་པས་རྣལ་འབྱོར་པ་པྲཛྙཱའི་མཚན་ཅན་ལ་གཏད་པ་ཛ་ཡནྟུ༔