མཁའ་འགྲོ་སྡེ་ལྔའི་ལས་བྱང་དངོས་གྲུབ་ཆར་འབེབས།
གཅོད་ཡུལ་མཁའ་འགྲོའི་ཞལ་ལུང་ལས༔ མཁའ་འགྲོ་སྡེ་ལྔའི་ལས་བྱང་དངོས་གྲུབ་ཆར་འབེབས་བཞུགས༔
དབྱིངས་རིག་ཟུང་འཇུག་ཀུན་བཟང་མོ༔ རང་བྱུང་རང་ཞལ་ཤེས་པས་འདུད༔ མ་ཅིག་ཌཱཀྐིའི་ཚོགས་རྗེ་མོ༔ ཕྱི་ནང་གསང་གསུམ་གཅིག་དྲིལ་བའི༔ ལས་བྱང་དངོས་གྲུབ་ཆར་འབེབས་བསྟན༔ ས་མ་ཡཱ༔ འདི་ལ་སྦྱོར་དངོས་རྗེས་དང་གསུམ༔ སྦྱོར་བ་ལ་ཡང་རྣམ་པ་བདུན༔ སྐྱབས་སེམས་མཚམས་གཅོད་བསྲུང་འཁོར་བསྒོམས༔ བྱིན་འབེབས་མཆོད་རྫས་བྱིན་གྱིས་བརླབས༔ དམ་བཅའ་སྔར་བྱས་བཤགས་པ་འོ༔ དང་པོ་མདུན་མཁར་ལབ་སྒྲོན་མ༔ གཙོར་གྱུར་སྐྱབས་ཡུལ་གསལ་གདབ་སྟེ༔ ན་མོ༔ དེང་ནས་བཟུང་སྟེ་བྱང་ཆུབ་སྙིང་པོའི་བར༔ བསླུ་མེད་སྐྱབས་གནས་དཀོན་མཆོག་རིན་ཆེན་གསུམ༔ བདག་གཞན་སྲིད་པའི་སྡུག་བསྔལ་ལས་སྐྱོབ་ཕྱིར༔ ཁྱེད་ཤེས་དད་པས་སྙིང་ནས་སྐྱབས་སུ་མཆི༔ གཉིས་པ་ཕ་མ་སེམས་ཅན་མ་ལུས་པ༔ མི་གནས་མྱང་འདས་ལ་འགོད་སེམས་བསྐྱེད་ནི༔ ཀྱེ་ཧོ༔ མ་རུངས་བཟོད་དཀའ་སྲིད་པའི་བཙོན་ར་ལས༔ མཁའ་ཁྱབ་འགྲོ་ཀུན་སངས་རྒྱས་གོ་འཕང་གི༔ བདེ་ཆེན་རྒྱལ་སྲིད་འཕོ་མེད་ལ་འགོད་ཕྱིར༔ སྨོན་དང་འཇུག་པའི་བྱང་ཆུབ་སེམས་བསྐྱེད་དོ༔ གསུམ་པ་ཐར་ལམ་བར་ཆད་བགེགས་ཡིན་པས༔ དེ་ལ་གཏོར་མ་བྱིན་ཏེ་བསྐྲད་པ་ནི༔ རཾ་ཡཾ་ཁཾ༔གིས་བགེགས་གཏོར་བསྲེགས་གཏོར་བཀྲུས༔ ཨོཾ་ཨཱཿཧཱུྃ༔གིས་བདུད་རྩིར་བྱིན་བརླབས་ཏེ༔ ཧཱུྃ༔ བགེགས་ནི་མ་རིག་རྒྱུ་ལས་སྡུག་བསྔལ་ཀུན༔ རྟེན་དང་བརྟེན་པར་བརྒྱུད་དེ་འབྱུང་བའི་བདུད༔ རིག་པ་རང་བྱུང་མཁའ་འགྲོའི་བཀའ་བཞིན་དུ༔ སྔགས་དང་ཕྱག་རྒྱས་བྱིན་བརླབས་གཏོར་མ་སྦྱིན༔ ཐར་ལམ་བྱང་ཆུབ་རང་གཞན་དོན་སྒྲུབ་པའི༔ བར་ཆད་མ་བྱེད་སྐྱེ་མེད་ཀློང་དུ་དེངས༔ གལ་ཏེ་རིག་སྟོང་ཌཱཀྐཱིའི་གཙོ་མོ་ཡིས༔ བཀའ་ལས་འདས་ན་མིང་གི་ལྷག་མར་བྱེད༔ ཧཱུྃ་བཞིའི་སྔགས་དང་ཡུངས་ཐུན་བརྡེག༔ བཞི་པ་སྲུང་བའི་འཁོར་ལོ་བསྒོམ་པ་ནི༔ ཧཱུྃ་བྷྲུཾ༔ སྣང་སྲིད་འབྱུང་བ་རྣམ་ལྔ་ཡུམ་ལྔའི་ཀློང་༔ ཕུང་ལྔ་བདེ་གཤེགས་ཚོགས་བརྒྱད་ཡུལ་དང་བཅས༔ སེམས་དཔའ་ཡབ་ཡུམ་སྲུང་བའི་འཁོར་ལོ་ནི༔ དག་པ་རབ་འབྱམས་ཡེ་ཤེས་རྣམ་ལྔའི་རྩལ༔ འདི་ལས་ལོག་རྟོག་གློ་བུར་བདུད་ཀྱི་སྡེ༔ ནམ་ཡང་འདའ་བའི་གོ་སྐབས་གནས་མ་མཆིས༔ བཛྲ་ཌཱཀྐི་རཀྵ་རཀྵ་བྷྲུཾ༔ ལྔ་པ་རྫས་དང་ཡོ་བྱད་རྣལ་འབྱོར་ལ༔ དབྱིངས་ནས་ཡེ་ཤེས་བྱིན་ཆེན་དབབ་པ་ནི༔ ཧཱུྃ་ཧྲཱིཿ རང་བྱུང་དབྱིངས་ནས་སྐུ་གསུམ་མཁའ་འགྲོའི་ཚོགས༔ སྐུ་དང་ཡེ་ཤེས་ཐུགས་རྗེའི་རྩལ་བསྐྱེད་ནས༔ གནས་འདིར་མཁྱེན་བརྩེ་ནུས་མཐུས་བྱིན་ཆེན་ཕོབ༔ སྒྲུབ་རྫས་ཟག་མེད་ཡེ་ཤེས་བདུད་རྩིར་བསྒྱུར༔ རྣལ་འབྱོར་སྒོ་གསུམ་རྒྱལ་ཀུན་གསང་གསུམ་དང་༔ ཡེ་ནས་འདུ་འབྲལ་མེད་པའི་བྱིན་ཕོབ་ཅིག༔ ཨོཾ་ཨཱཿཧཱུྃ་གུ་རུ་དྷེ་ཝ་ཌཱཀྐཱི་ནི་ཛྙཱ་ན་ཨ་བེ་ཤ་ཡ་ཕཻཾ་ཕཻཾ༔ སྤོས་དང་རོལ་མོས་བྱིན་ཆེན་ཡང་ཡང་དབབ༔ དྲུག་པ་མཁའ་འགྲོ་སྲོག་གི་ཕྱིར་དུ་ཡང་༔ མི་གཏོང་དམ་བཅའ་སྙིང་ནས་འཆའ་བ་ནི༔ ཧཱུྃ་ཧྲཱིཿ དེང་ནས་སྐུ་གསུམ་མངའ་བདག་ཀུན་བཟང་མོའི༔ གོ་འཕང་མངོན་གྱུར་དོན་གཉིས་མ་གྲུབ་བར༔ མཁའ་འགྲོའི་གཙོ་མཆོག་མ་ཅིག་ལབ་སྒྲོན་མ༔ སྲོག་གི་ཕྱིར་ཡང་མི་གཏོང་སྒྲུབ་པར་བགྱི༔ ས་མ་ཡཱ་ཙིཏྟ་ཧཱུྃ༔ བདུན་པ་སྒྲུབ་ལ་བར་ཆད་སྡིག་པའི་ཚོགས༔ མི་འཆབ་བཤགས་ཤིང་ཕྱིན་ཆད་སྡོམ་སེམས་ནི༔ ཧཱུྃ་ཧྲཱིཿ བདག་ནི་ཐོག་མའི་གཞི་སྣང་ལས་འཁྲུལ་ཏེ༔ བདག་གཞན་གཉིས་བཟུང་ཆགས་སྡང་རྨོངས་གསུམ་གྱིས༔ སྒོ་གསུམ་མི་དགེའི་ལས་ངན་ཅི་བགྱིས་པ༔ སྙིང་ནས་བཤགས་སོ་དག་ཚངས་དངོས་གྲུབ་སྩོལ༔ ཕྱིན་ཆད་དྲན་ཤེས་བརྟན་པོས་སྡོམ་པར་བགྱི༔ འབྲུ་གསུམ་སྔགས་ལ་ཡིག་བརྒྱ་བཏགས༔ བདུན་ནམ་གསུམ་སོགས་སྐབས་མཐུན་བྱ༔ ས་མ་ཡཱ༔ གཉིས་པ་དངོས་གཞི་རྣམ་གྲངས་དགུ༔ ལྷ་བསྐྱེད་སྤྱན་དྲངས་བཞུགས་གསོལ་ཕྱག༔ ཕྱི་ནང་གསང་མཆོད་བསྟོད་པ་འཛབ༔ དང་པོ་རྟེན་དང་བརྟེན་པའི་ལྷ་བསྐྱེད་ནི༔ ཏིང་འཛིན་གསུམ་གྱིས་ཁོག་ཕུབ་མངོན་བྱང་ལྔས༔ སྲིད་པ་མངལ་སྐྱེས་བག་ཆགས་སྦྱོང་བ་ནི༔ ཨཱཿ འདི་ལྟར་སྣང་བའི་ཆོས་རྣམས་མ་ལུས་པ༔ དང་པོ་མ་སྐྱེས་ཆོས་དབྱིངས་སྟོང་པའི་མདངས༔ བར་དུ་མི་གནས་བརྗོད་བྲལ་ཡུམ་ཆེན་མཁའ༔ ཐ་མ་འགག་མེད་ཤེས་རབ་ཕ་རོལ་ཕྱིན༔ འདི་ལ་བཅོས་མེད་སྟོང་ཆེན་གཤིས་ཀྱི་ལྷ༔ དྷརྨཱ་དྷརྟུ་སྭ་བྷ་ཝ་ཤུདྡྷ་ཀོ྅་ཧཾ༔ ཨོཾ༔ དེ་ལྟར་མ་རྟོགས་རང་གཞན་དངོས་པོར་བཟུང་༔ བདག་མེད་བདག་བཟུང་མི་གཙང་གཙང་བར་འཁྲུལ༔ མི་རྟག་དངོས་པོར་བཟུང་བའི་སེམས་ཅན་རྣམས༔ བརྩེ་ཆེན་ཚད་མེད་སྙིང་རྗེས་རྗེས་འཛིན་བྱ༔ མ་ཧཱ་ཀ་རུ་ཎི་ཀ་ས་མ་ཏི་ཧཱུྃ༔ ཧཱུྃ༔ མ་རྟོགས་སེམས་ཅན་ཡུམ་ཆེན་མཁའ་འགྲོ་མའི༔ གོ་འཕང་མཆོག་ལ་མྱུར་དུ་འགོད་པའི་ཕྱིར༔ སྟོང་ཉིད་སྙིང་རྗེ་ཟུང་འཇུག་རང་རིག་ཨཱཿ མཐིང་གསལ་ནམ་མཁའི་མདོག་ཅན་འོད་ཟེར་འབར༔ མཁའ་དབྱིངས་སྟོང་པའི་དབྱིངས་སུ་འཇའ་ལྟར་ཤར༔ དེ་ལས་ཨེ་ཡཾ་རཾ་བཾ་ལཾ་ཡིག་འཕྲོས༔ ཨེ་ལས་ནམ་མཁའ་མཐིང་གསལ་རྒྱ་ཁྱོན་བྲལ༔ ཡཾ་ལས་རླུང་དཀྱིལ་ལྗང་གསལ་རྒྱ་གྲམ་དབྱིབས༔ རཾ་ལས་མེ་དཀྱིལ་དམར་པོ་མཐའ་རུ་འབར༔ བཾ་ལས་ཆུ་དཀྱིལ་དཀར་པོ་ཟླུམ་ལ་འཁྱིལ༔ ལཾ་ལས་རིན་ཆེན་སྣ་ལྔའི་ས་གཞི་འཁྲིགས༔ རང་བྱུང་བྷྲུཾཿལས་མཁའ་འགྲོའི་གཞལ་མེད་ཁང་༔ གྲུ་བཞི་སྒོ་བཞི་འདོད་སྣམ་ཕ་གུ་དང་༔ དྲྭ་ཕྱེད་མདའ་ཡབ་ཤར་བུ་གདུགས་ཏོག་དང་༔ ཆོས་ཀྱི་འཁོར་ལོ་རི་དྭགས་ཕོ་མོས་མཚན༔ ཕྱི་རིམ་དུར་ཁྲོད་རྡོ་ར་མེ་རིས་བསྐོར༔ དེ་དབུས་སྣ་ཚོགས་པདྨ་འདབ་བཞི་དང་༔ ཕྱི་རིམ་གནས་ཡུལ་དཔའ་བོ་དཔའ་མོ་གདན༔ པདྨ་ཉི་ཟླ་བཾ་རོ་ངེས་མེད་གསལ༔ དབུས་ཀྱི་གདན་སྟེང་ཐབས་ཤེས་ཉི་ཟླ་ཟུང་༔ དེ་དབུས་མཁའ་ནས་ཨཱཿཡིག་འོད་གོང་གྱུར༔ ཕྱོགས་བཞིར་ཉི་ཟླའི་གདན་ལ་མཁའ་འགྲོ་ལྔའི༔ ས་བོན་ཧ་རི་ནི་ས་ཕྱོགས་ཀྱི་མདོག༔ གཙོ་མོའི་ས་བོན་འོད་ཀྱི་གོང་བུ་ལས༔ འོད་ཟེར་ཡར་འཕྲོས་སྐུ་གསུམ་སངས་རྒྱས་དང་༔ བྱང་སེམས་དཔའ་བོ་ཌཱཀྐཱིའི་བྱིན་ནུས་བསྡུས༔ མར་འཕྲོས་འགྲོ་དྲུག་ལས་ཉོན་བག་ཆགས་སྦྱངས༔ ཀུན་ཀྱང་ཡུམ་ཆེན་གོ་འཕང་ཐོབ་པར་བྱས༔ ཚུར་འདུས་འོད་གོང་གནམ་ལྕགས་གྲི་གུག་གི༔ ལྟེ་བར་ཡི་གེས་མཚན་པ་གནས་འགྱུར་བས༔ ཆོས་སྐུ་ཀུན་བཟང་ལོངས་སྐུ་རྣལ་འབྱོར་མ༔ སྤྲུལ་སྐུ་མ་ཅིག་ལབ་ཀྱི་སྒྲོན་མ་དང་༔ དབྱེར་མེད་སངས་རྒྱས་མཁའ་འགྲོ་སྐུ་མདོག་མཐིང་༔ ཁྲོ་འཛུམ་ཆགས་པའི་ཞལ་ཅན་ཁྲོ་མོའི་ཆས༔ སྤྱན་གསུམ་སྡང་མིག་དམར་ཟླུམ་ཞལ་གདངས་ཤིང་༔ ཁྲོ་གཉེར་མཆེ་གཙིགས་དམར་སེར་དབུ་སྐྲ་གྲོལ༔ ཐོད་སྐམ་དབུ་རྒྱན་ཐོད་རློན་དོ་ཤལ་འཕྱང་༔ ཕྱག་གཡས་གནམ་ལྕགས་གྲི་གུག་མཁའ་ལ་ཕྱར༔ ཕྱག་གཡོན་ཐོད་ཁྲག་ཞབས་གཉིས་བརྐྱང་བསྐུམ་གར༔ མི་རོའི་གདན་ལ་དོར་སྟབས་བརྗིད་པར་འགྱིང་༔ མཆན་གཡོན་ཐབས་མཆོག་དཔལ་ཆེན་ཧེ་རུ་ཀ༔ བདེ་བ་ཆེན་པོ་རྡོ་རྗེའི་ཁ་ཌཱཾ་ཀ༔ དར་དཔྱངས་ཐོད་རྔ་དྲིལ་བུའི་རྒྱན་ཅན་འཁྱུད༔ སྟག་ཤམ་གླང་ཀོའི་སྟོད་གཡོགས་རུས་པས་བརྒྱན༔ ཕཻཾ་གྱི་སྒྲ་སྒྲོགས་སྟོང་ཉིད་སྙིང་རྗེའི་ངང་༔ ཡེ་ཤེས་མེ་དཔུང་འབར་བའི་ཀློང་དུ་བཞུགས༔ ཐུགས་ཀར་ཡེ་ཤེས་སེམས་དཔའ་ལབ་སྒྲོན་མ༔ པད་ཟླའི་གདན་ལ་དུང་དང་ཟླ་བའི་མདོག༔ ཞི་ཚུལ་ཌཱ་དྲིལ་གར་སྟབས་རུས་རྒྱན་དང་༔ དར་སྣའི་ན་བཟའི་དབུ་སྐྲ་གནག་སྣུམ་མཛེས༔ དེ་ཡི་ཐུགས་དབུས་པདྨ་ཉི་ཟླའི་སྟེང་༔ ཨཱཿཡིག་མཐིང་མཐར་རྩ་སྔགས་བྱུ་རུའི་མདོག༔ གཡས་སུ་འཁོར་ལས་རང་སྒྲ་སྙན་པར་སྒྲོག༔ ཤར་དུ་ཧ་ལས་རྡོ་རྗེ་མཁའ་འགྲོ་དཀར༔ ལྷོ་རུ་རི་ལས་རིན་ཆེན་མཁའ་འགྲོ་སེར༔ ནུབ་ཏུ་ནི་ལས་པདྨ་མཁའ་འགྲོ་དམར༔ བྱང་དུ་ས་ལས་ཀརྨ་མཁའ་འགྲོ་ལྗང་༔ ཀུན་ཀྱང་ཁྲོ་འཛུམ་ཆགས་པའི་ཉམས་དང་ལྡན༔ གཡས་པས་རང་རྟགས་ཀྱིས་མཚན་གྲི་གུག་དང་༔ གཡོན་པས་ཐོད་ཁྲག་རང་རང་ཐུགས་ཀར་འཛིན༔ ཐབས་མཆོག་བདེ་ཆེན་རྡོ་རྗེའི་ཁ་ཌཱཾ་ཀ༔ ཟག་མེད་ཞུ་བདེའི་ཡེ་ཤེས་དགྱེས་བསྐྱེད་པ༔ མཆན་ཁུང་གཡོན་དུ་འཁྱུད་ཚུལ་མཛད་པས་མཛེས༔ གཡས་བསྐུམ་རྟིང་པ་བྷ་གར་གཏད་པའི་ཚུལ༔ གཡོན་པས་བཾ་རོའི་གདན་ལ་བརྐྱངས་ཏེ་འགྱིང་༔ སྐུ་སྟོད་གཉིས་འཐུང་པགས་པའི་སྟོད་གཡོགས་དང་༔ སྐུ་སྨད་སྟག་ཤམ་རུས་པའི་རྒྱན་དྲུག་གསོལ༔ ཐོད་སྐམ་དབུ་རྒྱན་རློན་པའི་དོ་ཤལ་འཕྱངས༔ མེ་ཀློང་བཞུགས་ཏེ་སྤྲུལ་པའི་མཁའ་འགྲོ་དང་༔ དཔའ་བོ་རིག་འཛིན་གྲུབ་ཐོབ་སྤྲིན་ལྟར་འཁྲིགས༔ སྒོ་བཞིར་གིང་ཆེན་སྡེ་བཞི་ལས་མདོག་ཅན༔ ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་དང་༔ གར་སྟབས་ཕྱག་རྒྱས་བཾ་གྱི་གདན་ལ་རོལ༔ གཙོ་འཁོར་གནས་གསུམ་ཟླ་ཉི་པདྨའི་སྟེང་༔ ཡི་གེ་འབྲུ་གསུམ་འོད་དུ་ཞུ་བ་ལས༔ སྤྱི་བོར་རྣམ་སྣང་མགྲིན་པར་འོད་དཔག་མེད༔ ཐུགས་ཀར་མི་བསྐྱོད་རང་རྟགས་ཕྱག་རྒྱ་ཅན༔ རྒྱལ་ཀུན་གསང་གསུམ་ངོ་བོར་བཞུགས་པར་བསམ༔ གཉིས་པ་སྤྱན་འདྲེན་གདུང་ཤུགས་དབྱངས་རོལ་དང་༔ དྲི་བཟང་དུད་པ་གཏོང་ཞིང་འདི་སྐད་དོ༔ ཧཱུྃ་ཧྲཱིཿ འོག་མིན་དག་པ་ཆེན་པོའི་ཕོ་བྲང་ནས༔ སྐུ་གསུམ་མཁའ་འགྲོའི་བདག་ཉིད་ལབ་སྒྲོན་མ༔ ཡེ་ཤེས་མཁའ་འགྲོ་སྡེ་ལྔའི་སྐུར་བཞེངས་ཏེ༔ བརྩེ་ཆེན་ཐུགས་ཀྱིས་གནས་འདིར་གཤེགས་སུ་གསོལ༔ གདན་གསུམ་སྐུ་ཡི་གཟི་མདངས་ཏ་ལ་ལ༔ ཚངས་དབྱངས་གསུང་གི་ཆོས་སྒྲ་ལྷངས་སེ་ལྷང་༔ ཟག་མེད་ཐུགས་ཀྱི་མཁྱེན་བརྩེ་ཡ་ལ་ལ༔ གནས་འདིར་དངོས་གྲུབ་སྩོལ་ཕྱིར་གཤེགས་སུ་གསོལ༔ འཁོར་གྱི་གནས་ཡུལ་དཔའ་བོ་མཁའ་འགྲོའི་ཚོགས༔ རྣལ་འབྱོར་ཚེ་ཡི་བར་ཆད་བསལ་བ་དང་༔ ཚེ་འདིར་རང་གཞན་དོན་གཉིས་འགྲུབ་པའི་ཕྱིར༔ དབྱིངས་ནས་སྐུར་བསྐྱོད་དགྱེས་པའི་ཚུལ་གྱིས་སྤྱོན༔ ཨོཾ་ཨཱཿཧཱུྃ་ཨ་ཧ་རི་ནི་ས་ཛྙཱ་ན་ཌཱཀྐི་སརྦ་སིདྡྷི་ཕ་ལ་ཧཱུྃ༔ ཨེ་ཧྱ་ཧི་ཨེ་ཨ་ར་ལི་ཧྲིཾ་ཧྲིཾ་ཛ་ཛ༔ གསུམ་པ་དམ་ཚིག་པ་དང་དབྱེར་མེད་དུ༔ འདུ་འབྲལ་མེད་ཕྱིར་བཞུགས་གསོལ་འདེབས་པ་ནི༔ ཧཱུྃ་ཧྲཱིཿ ཡེ་ནས་རང་རིག་མཁའ་འགྲོའི་བདག་ཉིད་ལ༔ གཅིག་ཏུ་འདུ་དང་སོ་སོར་འབྲལ་མེད་ཀྱང་༔ གློ་བུར་བློ་ཡི་བག་ཆགས་བསལ་བའི་ཕྱིར༔ དམ་ཚིག་ཀུན་བརྟགས་བསྐྱེད་པའི་ལྷ་ཚོགས་དང་༔ སྐུ་གསུམ་དབྱིངས་ནས་སྤྱན་དྲངས་ཡེ་ཤེས་པ༔ ངོ་བོ་གཅིག་ལས་རྣམ་པ་སོ་སོ་རུ༔ འབྲལ་མེད་དགྱེས་ཤིང་བརྟན་པར་བཞུགས་སུ་གསོལ༔ བཛྲ་ས་མ་ཡཱ་ཏིཥྛ་ལྷན༔ བཞི་པ་ལྷ་ཆེན་འཕྲུལ་དགའི་ཚུལ་ལྟ་བུས༔ བསོད་ནམས་ཚོགས་བསགས་བརྡ་ཡིས་ཕྱག་འཚལ་ནི༔ ཧཱུྃ་ཧྲཱིཿ རང་གི་ཐུགས་ལས་སྤྲུལ་པའི་ལས་བྱེད་པའི༔ ཌཱཀྐི་དཀར་སེར་དམར་ལྗང་གྲངས་མེད་པས༔ ལུས་ཀྱིས་ཕྱག་འཚལ་ངག་གིས་བསྟོད་བསྔགས་དང་༔ སེམས་ཀྱིས་གདུང་བའི་ཤུགས་ཀྱིས་མཁའ་ཁྱབ་ཀྱི༔ འགྲོ་རྣམས་ཚོགས་གཉིས་རྫོགས་ཕྱིར་གུས་ཕྱག་འཚལ༔ ཨ་ཏི་པཱུ་ཧོ༔ པྲ་ཏིཥྩ་ཧོ༔ ལྔ་པ་ཕྱི་ཡི་མཆོད་པ་འབུལ་བ་ནི༔ ཧཱུྃ་ཧྲཱིཿ ལྷ་རྣམས་དབང་པོ་དྲུག་ལ་དགྱེས་བསྐྱེད་ཕྱིར༔ མཛེས་པའི་མེ་ཏོག་དྲི་ཞིམ་བདུག་པའི་སྤོས༔ སྣང་གསལ་སྒྲོན་མེ་དྲི་བཟང་སྦྱར་བའི་ཆབ༔ རོ་བརྒྱའི་ཞལ་ཟས་སྙན་འཇེབས་རོལ་མོའི་སྒྲ༔ རང་རང་མཆོད་པའི་ལྷ་མོའི་གར་སྟབས་དང་༔ ངག་གི་དབྱངས་ཚིག་དད་གུས་ཆེན་པོ་ཡིས༔ མཁའ་ཁྱབ་བཞུགས་པའི་རྒྱལ་བ་སྲས་བཅས་དང་༔ ཁྱད་པར་གནས་གསུམ་མཁའ་འགྲོའི་ཚོགས་ཀྱི་རྗེ༔ ཡེ་ཤེས་ཌཱཀྐཱི་ལབ་སྒྲོན་གཙོ་འཁོར་ལ༔ འབུལ་ལོ་ཚོགས་གཉིས་རྫོགས་ཕྱིར་བཞེས་སུ་གསོལ༔ ཨོཾ་བཛྲ་ཨརྒྷཾ་ནས་སོགས་ཤཔྟ་པྲ་ཏིཥྩ་པུ་ཛ་ཧོ༔ དྲུག་པ་ནང་གི་མཆོད་པ་འབུལ་བ་ནི༔ ཧཱུྃ་ཧྲཱིཿ རྩ་བ་བརྒྱད་ལ་ཡན་ལག་སྟོང་སྦྱར་བའི༔ འཆི་མེད་བདུད་རྩི་སྨན་གྱི་མཆོད་པ་འབུལ༔ མཚན་ལྡན་མུ་དྲའི་གསང་རྫས་ཞིང་བཅུའི་ཁྲག༔ ཕྱི་ནང་གསང་བའི་དམར་ཆེན་མཆོད་པ་འབུལ༔ འབྲུ་བཟང་སྨན་སྤོས་ཤ་སྣ་སྟོང་སྦྱར་བའི༔ དམ་རྫས་རྨད་བྱུང་གཏོར་མའི་མཆོད་པ་འབུལ༔ མ་ཅིག་ཌཱཀྐིའི་དབང་ཕྱུག་ལབ་སྒྲོན་མ༔ དངོས་གྲུབ་ཆར་འབེབས་མཁའ་འགྲོའི་ཚོགས་ལ་འབུལ༔ དགྱེས་པ་ཆེན་པོས་བཞེས་ནས་རྣལ་འབྱོར་གྱི༔ ལྟ་བ་གཡེལ་དང་སྒོམ་པ་བྱིང་རྨུགས་གཡེངས༔ སྤྱོད་པ་རྩིང་སྤྱོད་ཚུལ་འཆོས་དབང་གྱུར་པས༔ འབྲས་བུ་རེ་དོགས་ཉམས་པའི་སྐྱོན་རྣམས་ཀུན༔ དབྱིངས་སུ་དག་ནས་མཆོག་ཐུན་དངོས་གྲུབ་སྩོལ༔ སརྦ་པཉྩ་ཨ་མྲྀ་ཏ་མ་ཧཱ་རཀྟ་བྷ་ལིངྟ་ཁ་ཁ་ཁཱ་ཧི༔ བདུན་པ་ཟག་བྲལ་གསང་བའི་མཆོད་པ་ནི༔ ཧཱུྃ་ཧྲཱིཿ མཆོད་བྱ་མཆོད་བྱེད་མཆོད་ཡུལ་མ་ལུས་པ༔ རང་བྱུང་རིག་པའི་ངང་དུ་རོ་མཉམ་ཕྱིར༔ བཟང་ངན་རེ་དོགས་སྤང་བླང་གཉིས་མེད་པའི༔ ལྟ་བ་བློ་འདས་སྤྲོས་བྲལ་ངང་དུ་མཆོད༔ སྒོམ་པ་ཡེང་མེད་རང་བབས་ངང་ནས་མཆོད༔ སྤྱོད་པ་གུ་ཡངས་བླང་དོར་བྲལ་བས་མཆོད༔ འབྲས་བུ་ཐོབ་ཤོར་བྲི་གང་མེད་པར་མཆོད༔ དྷརྨ་དྷརྟུ་མ་ཧཱ་མུ་ཏྲ་ཨ་ལ་ལ་ཧོ༔ བརྒྱད་པ་གསང་གསུམ་ཡོན་ཏན་རྗེས་དྲན་པས༔ དད་མོས་གུས་པ་ཆེན་པོས་བསྟོད་པ་ནི༔ ཨེ་མ་ཧོ༔ སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན༔ མ་སྐྱེས་མི་འགགས་ནམ་མཁའི་ངོ་བོ་ཉིད༔ སོ་སོ་རང་རིག་ཡེ་ཤེས་སྤྱོད་ཡུལ་བ༔ དུས་གསུམ་རྒྱལ་བའི་ཡུམ་ལ་ཕྱག་འཚལ་བསྟོད༔ ནང་དབྱིངས་སྤྲོས་པ་བྲལ་བའི་རང་གདངས་ལས༔ མ་འགགས་ཡེ་ཤེས་རྣམ་པ་ལྔ་ཡི་རྩལ༔ འགྲོ་བའི་བསོད་ནམས་མཆོད་སྡོང་སྤྲུལ་པའི་སྐུ༔ མ་ཅིག་ལབ་ཀྱི་སྒྲོན་མར་ཕྱག་འཚལ་བསྟོད༔ ནད་གདོན་འཇིགས་ཚོགས་ཞི་མཛད་ཌཱཀྐི་འབུམ༔ ཚེ་བསོད་ཡོན་ཏན་རྒྱས་བྱེད་མཁའ་འགྲོ་འབུམ༔ ཁམས་གསུམ་དབང་སྡུད་རྗེས་ཆགས་མཁའ་འགྲོ་འབུམ༔ དགྲ་བགེགས་འདུལ་མཛད་དྲག་པོའི་མཁའ་འགྲོ་འབུམ༔ ཡང་སྤྲུལ་བསམ་ལས་འདས་ལ་ཕྱག་འཚལ་བསྟོད༔ མདོར་ན་འགྲོ་བའི་སྡུག་བསྔལ་ཀུན་སེལ་ཞིང་༔ ཕན་དང་བདེ་བའི་དཔལ་ཀུན་འབྱུང་བའི་གཞི༔ རྩ་གསུམ་ཆོས་སྐྱོང་དཀར་ཕྱོགས་འགོ་བའི་ལྷ༔ མ་ལུས་འཁོར་དང་བཅས་ལ་ཕྱག་འཚལ་བསྟོད༔ དགུ་པ་ཛཔ྄་ལ་བསྙེན་སྒྲུབ་ལས་སྦྱོར་གསུམ༔ དང་པོ་བསྙེན་པའི་དམིགས་པ་འདི་ལྟ་སྟེ༔ རང་ཉིད་སངས་རྒྱས་མཁའ་འགྲོའི་ཐུགས་དབུས་སུ༔ ཡེ་ཤེས་ཌཱཀྐི་ལབ་སྒྲོན་གསལ་བ་ཡི༔ ཐུགས་ཀར་སྣ་ཚོགས་པདྨ་ཉི་ཟླའི་དབུས༔ ཨཱཿཡིག་མཐིང་ག་བཀྲག་མདངས་མི་བཟོད་པའི༔ མཐའ་ལ་རྩ་སྔགས་དམར་གསལ་གཡས་སུ་འཁོར༔ རང་སྔགས་སྙན་པའི་སྒྲ་དང་བཅས་པ་བསྒོམ༔ ཨོཾ་ཨཱཿཧཱུྃ༔ཨ་ཧ་རི་ནི་ས་ཛྙཱ་ན་ཌཱཀྐི་སརྦ་སིདྡྷི་ཧཱུྃ༔ རྩ་སྔགས་ཡི་གེ་བཅུ་བདུན་གྲངས་ལྡན་པ༔ མ་ཡེངས་གསལ་དག་ལྡན་པས་འབྲུ་འབུམ་བཟླ༔ སྒྲུབ་པའི་དམིགས་པ་ཁ་བསྒྱུར་གཞན་དུ་གསལ༔ སྤྱི་ལ་ཡུམ་ཆེན་བསྒོམ་བཟླས་བྱ་བ་ནི༔ ཐུགས་ཀར་པད་ཟླའི་གདན་ལ་ཡུམ་ཆེན་མོ༔ གསེར་མདོག་ཞལ་གཅིག་ཕྱག་བཞི་ལོངས་སྐུའི་ཆས༔ དམར་སེར་གུར་གུམ་གཞོན་ནུའི་མདངས་ལྡན་པ༔ གཡས་གཡོན་དང་པོས་ཆོས་འཆད་མཉམ་བཞག་དང་༔ འོག་མ་རྡོ་རྗེ་པུསྟི་ལེགས་པར་བསྣམས༔ ཐུགས་དབུས་པད་ཟླར་ཨ་ཡིག་གསེར་མདོག་མཐར༔ ག་ཏེའི་སྔགས་འབྲུ་གསེར་སྦྱངས་བཙོ་མའི་མདོག༔ གཡས་བསྐོར་དེ་ལ་སེམས་གཏད་སྔགས་བཟླས་པས༔ ཤེས་རབ་ཕར་ཕྱིན་དོན་རྟོགས་རང་གཞན་ཀུན༔ ཀུན་བཟང་གདོད་མའི་མགོན་དང་དབྱེར་མེད་བསམ༔ ཏདྱ་ཐཱ༔ ག་ཏེ་ག་ཏེ་པ་ར་ག་ཏེ་པ་ར་སཾ་ག་ཏེ་བྷོ་དྷི་སྭཱ་ཧཱ༔ སྔགས་ཀྱི་རྒྱལ་པོ་ཡུམ་སྔགས་ཉི་ཤུ་པ༔ ཡེངས་མེད་དྲན་ཤེས་ལྡན་པས་འབྲུ་འབུམ་བཟླ༔ དེ་ཚེ་རྟགས་ཀྱི་རིམ་པ་དངོས་སུ་ཡང་༔ དབང་པོ་རབ་ལ་ལྷ་ཞལ་དངོས་སུ་མཇལ༔ འབྲིང་ཉམས་ལྷ་སྔགས་མཐོང་ཐོས་ཡོན་ཏན་འཕེལ༔ ཐ་མ་རྨི་ལམ་རི་བོའི་རྩེར་འཛེགས་དང་༔ ཉི་ཟླ་ཤར་དང་རལ་གྲི་རྡོ་རྗེ་དང་༔ པུསྟི་རྙེད་དང་གྱེན་ལ་འགྲོ་བ་དང་༔ ཀུན་གྱིས་བསྟོད་དང་ཁྲི་ལ་འདུག་པ་སོགས༔ ལེགས་པའི་ཡོན་ཏན་ཐོབ་པའི་རྟགས་རྣམས་དང་༔ རྣག་ཁྲག་སྲོག་ཆགས་ལུས་ལས་ཕྱིར་ཐོན་སོགས༔ སྡིག་སྒྲིབ་དག་དང་གདོན་ལས་ཐར་བའི་རྟགས༔ མཐོང་ཚེ་དགའ་སྤྲོ་རེ་དོགས་རྟོག་པ་སྤོངས༔ ས་མ་ཡཱ༔ གསུམ་པ་ལས་སྦྱོར་རང་གི་ཐུགས་ཀ་རུ༔ བདག་ཉིད་ཡེ་ཤེས་མཁའ་འགྲོའི་ཐུགས་ཀ་རུ༔ རྡོ་རྗེ་ཕག་མོ་མཐིང་ནག་ཁྲོ་མོའི་ཆས༔ རྣ་ལྟག་གཡས་སུ་ཕག་ཞལ་ངུར་སྒྲ་སྒྲོག༔ ཐུགས་དབུས་ཉི་སྟེང་གྲི་གུག་ལྟེ་བ་རུ༔ ཧཱུྃ་མཐིང་མཐའ་ལ་སྔགས་འབྲུ་མཐིང་ནག་ནི༔ མེ་ཡི་ཚྭ་ཚྭས་བགེགས་དང་ལོག་འདྲེན་བསྲེགས༔ རྒྱལ་ཀུན་ཐུགས་ཀྱི་ས་བོན་ཧཱུྃ༔ བྱེ་བ་གསུམ་བཟླས་དངོས་གྲུབ་འབྱུང་༔ དེ་ནས་རྩ་སྔགས་འདི་ཉིད་བཟླ༔ ཨོཾ་བཛྲ་ཀྲོ་ཏ་ཀ་ལི་ཝ་ར་ཧཱི་སརྦ་སིདྡྷི་ཕ་ལ་ཧཱུྃ༔ མ་ཡེངས་ངང་ནས་བྱེ་བ་བཟླ༔ གདོན་ཐུལ་སྡིག་སྒྲིབ་དག་རྟགས་གསལ༔ས་མ་ཡཱ༔ རྒྱ་རྒྱ་རྒྱ༔ གསུམ་པ་རྗེས་ཀྱི་རིམ་པ་ལའང་བདུན༔ དངོས་གྲུབ་ལེན་དང་ནོངས་བཤགས་དམ་ཚིག་བསྡུ༔ དགེ་བསྔོ་སྨོན་ལམ་ཤིས་པ་བརྗོད་པ་འོ༔ དང་པོ་དངོས་གྲུབ་ལེན་ཚེ་སྐུ་རྟེན་ཉིད༔ སྤྱི་བོར་འཇོག་ཅིང་རང་གི་གནས་གསུམ་གཏུག༔ དམ་རྫས་ལྕེ་ལ་མྱང་ཞིང་འདི་སྐད་དོ༔ ཧཱུྃ་ཧྲཱིཿ ཡེ་ཤེས་མཁའ་འགྲོ་སྡེ་ལྔའི་ལྷ་ཡི་ཚོགས༔ བསྙེན་སྒྲུབ་མཐར་བསྐྱལ་སྒྲུབ་པའི་ཞག་གྲངས་རྫོགས༔ དེང་དུས་སྐྱ་རེངས་དང་པོ་གསལ་བའི་ཚེ༔ མ་རིག་མུན་སེལ་ཉི་མ་འཆར་ལ་ཉེ༔ ཡེ་ཤེས་མཁའ་འགྲོའི་དངོས་གྲུབ་ཐོབ་ལ་ཉེ༔ དངོས་གྲུབ་གང་ཞིག་འདོད་དོན་གསོལ་བ་ནི༔ འགྱུར་མེད་རྡོ་རྗེའི་སྐུ་གསུང་ཐུགས་ཡོན་ཏན༔ ཕྲིན་ལས་མཐར་ཕྱིན་དོན་གཉིས་ལྷུན་གྲུབ་ཀྱི༔ དངོས་གྲུབ་དམ་པ་དེང་འདིར་སྩལ་དུ་གསོལ༔ གུ་རུ་དྷེ་ཝ་ཌཱཀྐི་ནི་ཀཱ་ཡ་ཝཀྐཱ་ཙིཏྟ་སརྦ་སིདྡྷི་ཕ་ལ་ཧཱུྃ༔ གཉིས་པ་ནོངས་པ་བཤགས་པ་ནི༔ ཧཱུྃ་ཧྲཱིཿ ཉེས་པའི་སྣོད་གྱུར་སྡིག་ལྡན་བདག་ཅག་གི༔ ལས་དང་ཉོན་མོངས་བག་ཆགས་ཀྱིས་བསགས་པའི༔ མི་དགེ་བཅུ་དང་མཚམས་མེད་ཉེ་བའི་སྡིག༔ སོ་བྱང་སྔགས་ཀྱི་དམ་སྡོམ་ལས་འགལ་བ༔ མ་ལུས་མཐོལ་ཞིང་བཤགས་སོ་གནོང་ངོ་འགྱོད༔ མི་འཆབ་སྙིང་ནས་མཐོལ་བཤགས་དག་གྱུར་ཅིག༔ ས་མ་ཡཱ་ཤུདྡྷེ་ཨཱཿ ཡི་གེ་བརྒྱ་པ་ཅི་མང་བཟླ་བར་བྱ༔ གསུམ་པ་རྟེན་ལ་མདུན་བསྐྱེད་བརྟན་བཞུགས་དང་༔ བདག་བསྐྱེད་དམ་ཚིག་ལྷར་སྣང་བསྡུ་བ་ནི༔ ཧོ༔ བསྐྱེད་པའི་སྣོད་རྣམས་འོད་ཞུ་འཁོར་རྣམས་དང་༔ དེ་ཡང་རིམ་བཞིན་གཙོ་མོའི་སྐུ་ལ་ཐིམ༔ སྐུ་ཡང་རིམ་ཡལ་སྔགས་ཕྲེང་ལ་བསྡུ་ཞིང་༔ ཐུགས་སྲོག་སྐྱེ་མེད་ཡི་གེ་ཨ་ཡིག་ལ༔ བསྡུས་ཏེ་སྟོང་ཆེན་ཀློང་དུ་མཉམ་པར་བཞག༔ ཨ་ཨཱཿ བཞི་པ་རྗེས་ཐོབ་སྒྱུ་མའི་ལྷར་ལངས་ཏེ༔ ཧཱུྃ་ཧྲཱིཿ སྟོང་པའི་ངང་ལས་རང་ཉིད་རྗེས་ཐོབ་ལྷ༔ ལབ་ཀྱི་སྒྲོན་མ་མཉམ་བཞག་ཞི་བའི་སྐུ༔ གནས་གསུམ་འབྲུ་གསུམ་མཚན་པས་རྣམ་རྟོག་བསྲུང་༔ བར་ཆད་བགེགས་ཀྱིས་མི་ཚུགས་གོ་ཆས་གཏམས༔ བཛྲ་རཀྵ་རཀྵ་བྷྲུཾ༔ ལྔ་པ་དགེ་རྩ་འགྲོ་ལ་བསྔོ་བ་ནི༔ ཧོ༔ དགེ་བའི་རྩ་བ་འདི་ཡིས་སྲིད་གསུམ་འགྲོ༔ སྡུག་བསྔལ་འཁོར་བའི་མཚོ་ལས་རབ་བསྒྲལ་ནས༔ སྐུ་དང་ཡེ་ཤེས་འདུ་འབྲལ་མེད་པ་ཡི༔ སྐུ་གསུམ་མཁའ་འགྲོའི་གོ་འཕང་འཐོབ་ཕྱིར་བསྔོ༔ དྲུག་པ་བསྟན་པ་རྒྱས་དང་སེམས་ཅན་ཀུན༔ བདེ་ཞིང་སྐྱིད་པའི་སྨོན་ལམ་བཏབ་པ་ནི༔ ཧོ༔ དེ་ལྟར་བརྩོན་པའི་མཐུ་ཡིས་སེམས་ཅན་ཀུན༔ སྡུག་བསྔལ་ཀུན་བྲལ་བདེ་སྐྱིད་ལྡན་པར་སྨོན༔ གནས་སྐབས་མཐར་ཐུག་ཕན་དང་བདེ་བའི་གཞི༔ སངས་རྒྱས་བསྟན་པ་དར་ཞིང་རྒྱས་པར་སྨོན༔ མཐར་ཐུག་རང་གཞན་འགྲོ་ཀུན་གདོད་མའི་མགོན༔ ཀུན་ཏུ་བཟང་མོའི་རང་ཞལ་མངོན་གྱུར་སྨོན༔ དེ་བཞིན་མཆོག་གསུམ་བདེན་པས་འགྲུབ་གྱུར་ཅིག༔ བདུན་པ་ཤིས་པ་བརྗོད་པས་མཐའ་བརྒྱན་ནི༔ ཨེ་མ་ཧོ༔ ཆོས་སྐུའི་སྟོན་པ་ཀུན་བཟང་ཤེར་ཕྱིན་ཡུམ༔ ལོངས་སྐུའི་སྟོན་པ་རིགས་ལྔའི་ཌཱཀྐི་མ༔ སྤྲུལ་སྐུའི་སྟོན་པ་ལབ་སྒྲོན་འགྲོ་བའི་མགོན༔ སྐུ་གསུམ་མཁའ་འགྲོའི་གཙོ་མོའི་བཀྲ་ཤིས་ཤོག༔ འགྲོ་ཀུན་བདེ་སྐྱིད་མ་ལུས་འབྱུང་བའི་གནས༔ རྒྱལ་བསྟན་མི་ནུབ་ཡུན་དུ་གནས་པ་དང་༔ བསྟན་འཛིན་དགེ་བའི་བཤེས་ཀུན་ཞབས་པད་བརྟན༔ མཛད་ཕྲིན་གོང་དུ་འཕེལ་བའི་བཀྲ་ཤིས་ཤོག༔ སྣོད་ཀྱི་འཇིག་རྟེན་བདེ་ལྡན་ཞིང་བཞིན་དུ༔ སྡུག་བསྔལ་མིང་མེད་བཅུད་ཀྱི་སེམས་ཅན་ཀུན༔ དགེ་བཅུའི་ཁྲིམས་གནས་ཐེག་ཆེན་ལམ་ཞུགས་ཏེ༔ མཐར་ཐུག་དོན་གཉིས་འགྲུབ་པའི་བཀྲ་ཤིས་ཤོག༔ ས་མ་ཡཱ༔ དེ་ལྟར་མཁའ་འགྲོ་སྡེ་ལྔའི་ཕྲིན་ལས་ཀྱི༔ ལས་བྱང་དངོས་གྲུབ་ཆར་འབེབས་གང་འདི་ཉིད༔ ཐུགས་ཐིག་མཁའ་འགྲོའི་ཆོས་སྡེའི་ཆ་ལག་སྟེ༔ ཟོལ་མེད་དགོངས་པའི་དབྱིངས་ཀྱི་བརྡ་རིས་ལས༔ ལས་སྐལ་ལྡན་པའི་སྐྱེས་བུའི་བཀས་བསྐུལ་ངོར༔ སྦ་གསང་མེད་པར་ཕབ་འདིས་བསྟན་པ་དང་༔ འགྲོ་བའི་བདེ་སྐྱིད་འཕེལ་བའི་གསོས་སུ་ཤོག༔ གུ་ཧྱ༔ སྤྲུལ་མིང་ལུང་རིག་གླིང་པས་དུས་ཚེས་དགེ་བར་བྲིས་པ་རྣལ་འབྱོར་པ་པྲཛྙཱའི་མཚན་ཅན་ལ་གཏད་པ་ཛ་ཡནྟུ༔