གཅོད་ཀྱི་བརྒྱུད་རིམ་ཁ་སྐོང་བསྐང་བ་པདྨ་ཤེས་རབ་རྡོ་རྗེས་མཛད་པ།
༄༅།། གཅོད་ཀྱི་བརྒྱུད་རིམ་ཁ་སྐོང་ལ། མཁའ་སྤྱོད་འོག་མིན་གནས་མཆོག་ཕོ་བྲང་ན། །རྡོ་རྗེ་ཕག་མོ་གར་དབང་ཐུགས་དམ་བསྐང་། །དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་མ། །སྔོན་མོ་འབུམ་སྡེའི་འཁོར་བཅས་ཐུགས་དམ་བསྐང་། །ཤར་ཕྱོགས་རྡོ་རྗེ་རིགས་ཀྱི་མཁའ་འགྲོ་མ། །དཀར་མོ་འབུམ་སྡེའི་འཁོར་བཅས་ཐུགས་དམ་བསྐང་། །ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་མ། །སེར་མོའི་འབུམ་སྡེའི་འཁོར་བཅས་ཐུགས་དམ་བསྐང་། །ནུབ་ཕྱོགས་པདྨ་རིགས་ཀྱི་མཁའ་འགྲོ་མ། །དམར་སེར་འབུམ་སྡེའི་འཁོར་བཅས་ཐུགས་དམ་བསྐང་། །བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་མ། །ལྗང་མོའི་འབུམ་སྡེ་འཁོར་བཅས་ཐུགས་དམ་བསྐང་། །འཇིགས་པ་ཀུན་སྐྱོབ་ལོངས་སྤྱོད་རྫོགས་པའི་སྐུ། །རྗེ་བཙུན་ཨཱརྱ་ཏཱ་རེའི་ཐུགས་དམ་བསྐང་། །དོན་དམ་ཕྱག་རྒྱ་ཆེན་པོ་མངོན་དུ་གྱུར། །མཁའ་འགྲོ་ཡེ་ཤེས་མཚོ་རྒྱལ་ཐུགས་དམ་བསྐང་།། ༈ ཐུགས་སྲས་བུ་ཆེན་བཅུ་དྲུག་གི་བརྒྱུད་རིམ་ལ། ཤེར་ཕྱིན་དགོངས་དོན་རྒྱ་བོད་ཡོངས་ལ་གྲགས། །སྐྱེས་མཆོག་རྒྱལ་བ་དོན་གྲུབ་ཐུགས་དམ་བསྐང་། །སྲིད་ཞིའི་དཔལ་གྱུར་གཅོད་ཡུལ་མཐའ་རུ་ཕྱིན། །སྟོང་སྡེ་ངག་གི་དབང་ཕྱུག་ཐུགས་དམ་བསྐང་། །ཟབ་མོ་གཅོད་ཀྱི་བསྟན་འཛིན་རིན་པོ་ཆེ། །རབ་འབྱམས་རྒྱལ་བའི་འབྱུང་གནས་ཐུགས་དམ་བསྐང་། །བདུད་བཞི་ལམ་སློང་གཅོད་ཡུལ་མཐའ་རུ་ཕྱིན། །རང་གྲོལ་ཁུ་སྒོམ་ཆོས་སེང་ཐུགས་དམ་བསྐང་། །བྲམ་ཟེ་དཔལ་རྒྱན་འབུམ་རྒྱན་བསོད་རྒྱན་བཞི། །བརྒྱུད་འཛིན་སྲས་མོ་རྣམ་བཞིའི་ཐུགས་དམ་བསྐང་།། མ་ཅིག་དང་འདྲ་བའི་སྲས་བརྒྱད་ནི། འདས་དང་མ་འོངས་མཁྱེན་པ་ཐོགས་མེད་ཤར། །རང་བྱུང་སྐྱེ་མེད་དགའ་ཡན་ཐུགས་དམ་བསྐང་། །གནས་ལུགས་ལྷུན་གྲུབ་རྟོགས་པ་མངོན་དུ་གྱུར། །ཀློང་གྲོལ་ཕོ་སྨྱོན་སེང་གེའི་ཐུགས་དམ་བསྐང་། །བྱིན་ཐོབ་བྱིན་རླབས་ཆོས་ཀྱི་ཆར་པ་འབེབས། །རྣམ་འདྲེན་སྨྱོན་པ་རང་སངས་ཐུགས་དམ་བསྐང་། །བརྟུལ་ཞུགས་སྤྱོད་པས་རྣལ་འབྱོར་རྟོགས་ལྡན་གྱི། །འཁོར་འདས་དོལ་བ་ཟང་ཐལ་ཐུགས་དམ་བསྐང་། །ནུས་པ་སྔགས་ཀྱི་མྱུར་ལམ་ཟབ་མོ་ཐོབ། །སྟོབས་ལྡན་ཞིག་པོ་ཧུར་ཐོན་ཐུགས་དམ་བསྐང་། །ཐེག་ཆེན་ལྟ་བ་གནས་ལུགས་དབྱིངས་སུ་ཤར། །མཐུ་སྟོབས་སྐལ་ལྡན་སེང་གེའི་ཐུགས་དམ་བསྐང་། །མངོན་ཤེས་མངའ་ལྡན་རྫུ་འཕྲུལ་དཔག་མེད་སྟོན། །གྲུབ་ཆེན་རྒྱ་སྒོམ་ཧག་ཐོན་ཐུགས་དམ་བསྐང་། །འགྲོ་དོན་རང་འདྲའི་ཁམས་གསུམ་བདེ་ལ་བཀོད། །མཉམ་མེད་རྗེ་བཙུན་ཟིལ་གནོན་ཐུགས་དམ་བསྐང་།། བརྒྱུད་རིམ་བསྐང་བ་འདི་ནི་དབང་རྒྱལ་གྱིས་བཀོད་པའོ།། སྤྲང་བན་པདྨ་ཤེས་རབ་རྡོ་རྗེ་ཡང་ཟེར་མཆན།