གཟའ་བཙན་ཀླུའི་མཆོད་ཕྲིན་རབ་འབྱམས་རྒྱ་མཚོ་ཧོར་བླས་མཛད་པ།

ཟབ་མོ་གཅོད་ཀྱི་བཀའ་བསྲུང་གཟའ་བཙན་ཀླུའི་མཆོད་ཕྲིན་རབ་འབྱམས་རྒྱ་མཚོ་བི་ཛ་ཧ་རཾ༔

ན་མོ་པྲཛྙཱ་པ་ར་མི་ཏ་ཡེ༔ ཡུམ་ཆེན་སྒྲོལ་མ་ཛྙཱ་ན་ས་ག་ར༔ དབྱེར་མེད་སྤྲུལ་སྐུ་མ་ཅིག་མ་ལ་འདུད༔ བཀའ་སྲུང་དྲག་པོ་མཆེད་གསུམ་མཆོད་ཕྲེང་འདི༔ མ་བརྩམ་སྒྲུབ་ལ་བར་ཆད་འབྱུང་ཉེན་ཆེ༔ དེ་ཕྱིར་མཆོད་ཐབས་རབ་འབྱམས་རྒྱ་མཚོ་སྤེལ༔ མ་ཅིག་གྲུབ་ཐོབ་ཚོགས་ཀྱིས་གནང་བ་སྩོལ༔ དེ་ལ་འདིར་དྲག་པོ་ལྷ་གསུམ་བརྟེན་པར་འདོད་པས་ཐོད་པའི་ནང་དུ་གཟའ་གཏོར་གཡས་གཅུས་མི་རོ༔ མིག་མང་གློག་ཞགས་མེ་རིའི་ཕྲེང་བས་བསྐོར་བ༔ མཐུན་རྫས་བསགས་ཤིང་དར་དཀར་གྱི་གུར་ཕུབ༔ བཙན་རྒོད་མཆེད་གཉིས་ལ་བསེ་སྡེར་ནང་དུ་མཁར་ཐབས་སྟེང་དམར་གཏོར་གཉིས་ལ་བྱ་དམར་ལིངྐ་མི་དམར་ཁྱི་དམར་དར་དམར་སོགས་མཐུན་རྫས་ཚོགས་ཚད་བཤམས༔ རིན་པོ་ཆེའི་སྣོད་དུ་ཀླུ་རྒྱལ་དྲག་པོ་ཟླ་སྐྱོང་ལ་བཤོས་ཟླུམ་རྒྱབ་ཡོལ་སྦྲུལ་མགོ་བདུན་གྱི་གདེངས་ཀ་ཅན་དཀར་གསུམ་མངར་གསུམ་ཀླུ་ནོར་འབྲུ་སྨན་རྩི་བཅུད་དར་སྔོན་འཕན་གདུགས་སོགས་གཙང་སྦྲ་གྱ་ནོམ་བསགས༔ རྣལ་འབྱོར་སེམས་བསྐྱེད་ལྡན་པས་ཕུད་གཏོར་གསེར་སྐྱེམས་ཆབ་ཀྱིས་སྦྱངས་ཤིང་འབྲུ་གསུམ་གྱིས་བརླབས་ལ༔ ཕཊ༔ ཡེ་གཞི་སྟོང་ཆེན་ཆོས་དབྱིངས་ནམ་མཁའ་ལ༔ ཡེ་ཤེས་གྲོལ་འཁྲུལ་རླུང་འགྱུའི་སྒྱུ་འཕྲུལ་གར༔ གྲོལ་གཞི་བདག་མེད་ལྷ་མོ་ལབ་སྒྲོན་མ༔ རྣམ་པ་ཁྲོས་མ་དམར་མོའི་སྐུར་གསལ་བའི༔ ཐུགས་ཀའི་བཾ་ལས་འོད་ཟེར་ལྕུགས་མ་ལྟར༔ འཕྲོས་པས་བཀའ་སྲུང་དྲག་པོ་མཆེད་གསུམ་ལ༔ ཕོག་པས་རང་བཞིན་གར་བཞུགས་ཞིང་ཁམས་ནས༔ སྔོན་གྱི་དམ་ཚིག་དྲན་བཞིན་འུར་གྱིས་བསྐྱོད༔ སྐད་ཅིག་ཉིད་ལ་རང་མདུན་བྱོན་པར་གྱུར༔ ཀཿཙ་ཏྲི་ནཱ་ག་བཛྲ་ས་མ་ཡཱ་ཛ་ཛ༔ ཕཊ༔ ཀྱཻ༔ དད་པ་དང་ནི་དམ་ཚིག་གིས༔ ཚུར་གཤེགས་དྲག་པོ་མཆེད་སྡེ་གསུམ༔ ནམ་མཁའི་ཁམས་ལ་བརྟེན་བཅས་པའི༔ དྲང་སྲོང་སྲིན་པོ་གཤེགས་སུ་གསོལ༔ ཟངས་རི་མཁར་ལ་བརྟེན་བཅས་པའི༔ བཙན་རྒོད་མཆེད་གཉིས་གཤེགས་སུ་གསོལ༔ རྒྱ་མཚོ་ཆེན་པོར་གནས་བརྟེན་པའི༔ ཀླུ་རྒྱལ་ཟླ་སྐྱོང་གཤེགས་སུ་གསོལ༔ ཁྱེད་རྣམས་དྲག་པོ་ལྷ་ཆེན་གསུམ༔ སྤྲུལ་པ་ཡང་སྤྲུལ་འཁོར་ཚོགས་བཅས༔ དམ་པ་སྐྱོ་སྟོན་བླ་མ་དང་༔ མ་ཅིག་ཡབ་སྲས་བཀའ་དམ་བཞིན༔ དྲན་པར་མཛོད་ལ་འདིར་སྤྱོན་ཅིག༔ རང་རང་མཐུན་པའི་གདན་ལ་བཞུགས༔ ཤ་ཁྲག་དཀར་མངར་སྐྱེམས་དང་ཕུད༔ དྲག་པོ་མཆེད་གསུམ་མཉེས་པའི་རྫས༔ དངོས་འབྱོར་ཡིད་ཀྱིས་རྣམ་སྤྲུལ་ཏེ༔ མཆོད་དོ་འབུལ་ལོ་དགྱེས་པར་མཛོད༔ མ་གཡེལ་མ་འདའ་ས་མ་ཡཱ༔ ཕཊ༔ དེ་ནས་རང་མདུན་གཏོར་སྣོད་གྲུ་གསུམ་འབར་བའི་ནང་དུ༔ གཏོར་མ་དེ་ཉིད་དགྲ་བོ་དམ་སྲི་ཡིད་ལ་དམིགས་པ་དེ་དངོས་སུ་གསལ་བར་གྱུར༔ བདག་ཉིད་ཁྲོས་མའི་ཐུགས་ཀ་ནས་ཚ་ཞིང་རྩུབ་པའི་འོད་ཟེར་གཅིག་འཕྲོས༔ དྲག་པོ་མཆེད་གསུམ་གྱི་ཐུགས་རྒྱུད་བསྐུལ༔ དགྲ་བོ་འགུགས་པའི་ལས་ལ་རྔམ་ཞིང་འཁྲུགས་པས་དེ་རྣམས་ཀྱི་ཐུགས་ཀ་ནས་ལས་བྱེད་ཀྱི་ཕོ་ཉ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུའི་ཚོགས་དཔག་ཏུ་མེད་པ་འཕྲོས་ནས་དགྲ་བགེགས་རྣམས་རང་དབང་མེད་པར་བཀུགས་ནས་དམིགས་པའི་རྟེན་ལ་ཐིམ་པར་བསམ༔ ན་མོ་དྲིན་ཆེན་གཅོད་ཡུལ་བརྒྱུད་པའི་བླ་མ་དམ་པ་རྣམས་ཀྱི་བཀའ་བདེན་པ་དང་༔ དཀོན་མཆོག་གསུམ་གྱི་བདེན་པ་དང༔ ཡི་དམ་རྡོ་རྗེ་ཕག་མོ་ལྷ་ལྔའི་བདེན་པ་དང༔ བདུད་འདུལ་ཁྲོས་མ་ནག་མོའི་བདེན་པ་དང་༔ མ་ཅིག་ལབ་ཀྱི་སྒྲོལ་མའི་བདེན་པ་དང༔ མཁའ་འགྲོ་བྱེ་བ་འབུམ་སྡེ་བཀའ་བསྲུང་ཆོས་སྐྱོང་དང་བཅས་པའི་བདེན་པ་དང༔ ཁྱད་པར་དུ་དྲང་སྲོང་ཁྱབ་འཇུག་མགོ་དགུ། ཟངས་རི་འབར་བ་མཆེད་གཉིས༔ ཀླུ་རྒྱལ་དྲག་པོ་ཟླ་སྐྱོང༔ སྤྲུལ་པ་ཡང་སྤྲུལ་དང་བཅས་པའི་བདེན་པ་དང་༔ བདེན་པ་ཆེན་པོའི་མཐུས༔ སངས་རྒྱས་བསྟན་པའི་སྤྱི་དགྲ༔ རྣལ་འབྱོར་བདག ་གི་སྒོས་དགྲ༔ བཀའ་དང་དམ་ལ་མི་གནས་འགྱུར་ལྡོག་འཕར་ལྡང་མགོ་གཡོག་མགོ་སྐོར་བྱེད་པའི་གདོན་བགེགས༔ བསམ་ངན་འཆང་བའི་བྱད་མ༔ དོ་བརྡོ་ཞིང་ཕོད་བཙུགས་པའི་དགྲ་བོ་ཐམས་ཅད་ཀྱི་བླ་སྲོག་རྣམ་པར་ཤེས་པ་སྐད་ཅིག་རང་དབང་མེད་པར་དྲག་པོ་དམར་གྱི་གཏོར་མ་འདིའི་ནང་དུ་ཁུག་ཅིག༔ བཛྲ་ཨངྐུ་ཤ་ཡ་ཛ་ཛ༔ ཛཿཧཱུྃ་བཾ་ཧོ༔ སྤྲུལ་པ་ལས་བྱེད་ཤན་པའི་ཚོགས་ཀྱིས་དགྲ་བགེགས་བྱད་མ་བསྒྲལ་བའི་ལས་བྱས་པ་ཙམ་གྱིས་ཤ་རི་ཁྲག་མཚོ་རུས་པའི་གྲམ་ཁྲོད་ཆེན་པོར་གྱུར་ནས་དྲག་པོ་མཆེད་གསུམ་འཁོར་དང་བཅས་པས་ལྷག་མ་མེད་པར་གསོལ་བར་བསམ༔ ཀྵ་རཀྴ་ར་ཧུ་ལ་ཙ་ཏྲི་ཧུར་ཐུམ་ནཱ་ག་ར་ཛ་ཕུ་པྲ་ས་པཱ་རི་ཝ་ར་ཨེ་དམ་བྷ་ལིང་ཏ་མ་ཧཱ་མཾ་ས་རཀྟ་ཙིཏྟ་ཀིཾ་ནི་རི་ཏི་ལ་ཁ་ཁ་ཁ་ཧཱི་ཁ་ཧཱི༔ ལན་གསུམ་མམ་བདུན་གྱིས་འབུལ་ཞིང་ཞུ་གསོལ་ནི༔ ཧཱུྃ་ཀྵ་ཕཊ༔ དྲང་སྲོང་ཁྲོས་པ་སྲོག་གི་བདག༔ ལུས་གཅིག་མགོ་དགུ་བྱ་རོག་གི༔ གཙུག་ཏོར་རྩ་ཞལ་རཀྴའི་གདོང༔ མགོ་བོ་བརྒྱད་ལ་གཟའ་བརྒྱད་འཕྲོ༔ བྱ་རོག་མགོ་ཡིས་བསྟན་པ་སྲུང་༔ སྐུ་སྟོད་སྲིན་གཟུགས་སྐུ་སྨད་སྦྲུལ༔ ལྷ་ཀླུའི་དམག་ཚོགས་སྡོང་ཟླ་བྱེད༔ ཕྱག་བཞི་ཆུ་སྲིན་རྒྱལ་མཚན་དང༔ ཞགས་པ་མདའ་གཞུ་དགྲ་ལ་གཟིར༔ གདོང་མོ་མཆེད་བཞི་ལས་ལ་འགྱེད༔ སྤྱན་སྟོང་སྲིད་གསུམ་བྱ་ར་བྱེད༔ ལྷ་སྲིན་རྒྱུ་སྐར་ཕོ་ཉར་འགྱེད༔ མེ་འབར་འོད་འཁྱུགས་ཐོག་སེར་འབེབས༔ གཟའ་བདུད་མ་རུང་མཐུ་རྩལ་ཅན༔ ཤམ་པོ་གངས་ཀྱི་ར་བ་རུ༔ དམ་པ་མ་ཅིག་སྤྱན་སྔ་རུ༔ ཁས་བླངས་ཡལ་གམ་ཕོག་པ་བཞིན༔ ཤ་ཁྲག་བརྒྱན་པའི་གཏོར་མ་བཞེས༔ རྣལ་འབྱོར་ཡོན་མཆོད་འཁོར་འབངས་ལ༔ ལྷ་ཀླུའི་དལ་ཁ་གནམ་གཟེར་བཟློག༔ གཅོད་ཡུལ་བསྟན་པ་དར་བ་དང་༔ གཅོད་མཁན་བདག་གི་སྡོང་གྲོགས་མཛོད༔ སྡང་བར་བྱེད་པའི་དགྲ་བོ་རྣམས༔ ཧུར་ཐུམ་ལྐུགས་རིང་ནད་ཀྱིས་སོད༔ གང་བཅོལ་ཕྲིན་ལས་འགྲུབ་པར་མཛོད༔ ཕཊ༔སྒྲ་སྒྲོགས་ལ་བཀའ་བསྒོ་བྱ༔ ས་མ་ཡཱ༔ གཉིས་པ་བཙན་གྱི་མཆོད་ཐབས་ནི༔ ཧཱུྃ་ཏྲི་ཛ༔ ཕཊ༔ བཙན་རྒོད་འབར་བ་མཆེད་གཉིས་པོ༔ ཁས་བླངས་དམ་ཚིག་དྲན་མཛོད་ལ༔ གཅོད་ཡུལ་བསྟན་པ་སྲུང་བ་དང་༔ གཅོད་མཁན་བདག་གི་སྡོང་གྲོགས་མཛོད༔ བསྟན་ལ་འཁུ་བའི་ལོག་འདྲེན་ལ༔ མི་མཐུན་རྟགས་དང་ཆོ་འཕྲུལ་སྟོན༔ བཅོལ་པའི་ཕྲིན་ལས་འགྲུབ་པར་མཛོད༔ ཕཊ༔ ཅེས་འདིས་ཕྲིན་ལས་གང་བརྩམ་བཅོལ༔ ས་མ་ཡཱ༔ གསུམ་པ་ཀླུ་ཡི་མཆོད་ཕྲེང་ནི༔ ཕུ་པྲ་ནཱ་ག༔ ཕཊ༔ ཤིང་གཅིག་སྡོང་པོ་གསེར་སླག་ཅན་གྱི་དྲུང༔ ཆུ་མིག་དྲག་པོ་གནམ་དུ་འཕྱུར་བའི་ནང༔ ཡིད་བཞིན་རིན་ཆེན་ལས་གྲུབ་གཞལ་ཡས་ཁང༔ པདྨ་འདབ་སྟེང་གསེར་གྱི་རུས་སྦལ་སྟེང༔ སྣང་སྲིད་ལྷ་སྲིན་སྡེ་བརྒྱད་ཀུན་གྱི་གཙོ༔ ཀླུ་མཆོག་ཀླུ་རྒྱལ་ཟླ་བ་སྐྱོང་མཛད་ཞེས༔ སྔོན་ཚེ་སངས་རྒྱས་བསྟན་པ་བསྲུང་བའི་གཉེན༔ སྐུ་མདོག་དཀར་ལ་སྔོ་བསང་འཇའ་འོད་འཕྲོ༔ སྦྲུལ་མགོ་འབར་བ་བདུན་གྱི་གདེངས་ཀ་འཕྲོ༔ དབང་སྔོན་ལྷུན་པོའི་ཅོད་པཎ་བླ་ན་མཐོ༔ ཕྱག་གཉིས་ཐལ་སྦྱར་ཡིད་བཞིན་མ་ཎི་འཛིན༔ དར་དང་རིན་ཆེན་ནོར་བུའི་རྒྱན་ཆས་སྤུད༔ སྐུ་སྨད་ལྟོ་འཕྱེ་གདུག་པ་སྦྲུལ་དུ་འཁྱིལ༔ རྒྱལ་རིགས་རྗེ་རིགས་དམངས་རིགས་གདོལ་བ་སོགས༔ ས་བདག་ཀླུ་གཉན་བྱེ་བ་དུང་ཕྱུར་བཅས༔ གཏོར་མ་དཀར་མངར་འོ་ཞོ་གསེར་གཡུའི་སྐྱེམས༔ མེ་ཏོག་ནེའུ་གསིང་ལྗོན་པ་སྐྱེད་ཚལ་བཅས༔ ཚ་བའི་གདུང་བསིལ་གྲང་བའི་ཆབ་གཏོར་སོགས༔ གང་ཡང་མ་ཚང་མེད་པའི་མཐུན་རྫས་འབུལ༔ དམ་པ་མ་ཅིག་ཐོད་པ་བྷ་ཏྲ་དང་༔ རྒྱལ་བ་དོན་གྲུབ་གཅོད་བརྒྱུད་བླ་མ་ཡིས༔ བཀའ་དང་དམ་ཚིག་བསྒྲགས་པ་དྲན་མཛོད་ལ༔ གཅོད་ཡུལ་བསྟན་པ་ཕྱོགས་བཅུར་རྒྱས་པ་དང་༔ གཅོད་མཁན་བདག་གི་ཁ་འཛིན་དཔུང་གྲོགས་མཛོད༔ བདག་ཅག་དཔོན་སློབ་ལྟོས་བཅས་ཡོན་བདག་ལ༔ གཉན་ནད་ཀློག་པ་སྐེམ་པ་སྲན་ཆུ་བུར༔ མཛེ་རིགས་བཅོ་བརྒྱད་ནད་རྣམས་ཞི་བ་དང༔ རྩ་དཀར་བཀྲོལ་ཞིང་རྨང་ནག་ལ་ཐག་ཆོད༔ ཆར་ཆུ་དུས་འབབ་ལོ་ཕྱུག་ཕུན་སུམ་ཚོགས༔ མུ་གེ་བང་མཛོད་སྐམ་པའི་འགོང་པོ་ཐུལ༔ ཀླུ་ཡི་ཕྱྭ་གཡང་དཔལ་གྱི་དངོས་གྲུབ་སྩོལ༔ སྟོབས་རྩལ་ཀླུ་ཡི་དཔལ་ལ་འགྲན་པར་མཛོད༔ བདག་དང་བསྟན་ལ་སྡང་བའི་དགྲ་བོ་ལ༔ མཛེ་ནད་ལྷོག་རྒོད་འབེབ་པས་དུས་མཐའ་སྟོང༔ གང་བཅོལ་ལས་རྣམས་འགྲུབ་པར་མཛད་དུ་གསོལ༔ ཕཊ༔ ཅེས་འདིས་འདོད་དོན་ལས་ལ་བསྐུལ༔ ས་མ་ཡཱ༔ ཀྵ་ཏྲི་ཙ་ནཱ་ག་ཕུ་པྲ་ཛ༔ ཕཊ༔ ཆོས་སྐུ་ཡུམ་ཆེན་ལོངས་སྐུ་ཁྲོས་མ་ནག༔ སྤྲུལ་སྐུ་མ་ཅིག་ཡབ་སྲས་བཀའ་ཉན་པ༔ དྲང་སྲོང་ཁྱབ་འཇུག་ཟངས་རི་མཆེད་སྡེ་གཉིས༔ ཀླུ་ཡི་རྒྱལ་པོ་དྲག་པོ་ཟླ་བ་སྐྱོང༔ འཁོར་བཅས་བསྟན་པ་གཉན་པོ་བསྲུང་བའི་ཕྱིར༔ གཡར་དམ་གཅིག་པུས་ངང་ནས་བསྟོད་པར་བགྱི༔ དབུ་འཕང་ལྷུན་པོའི་སྤོ་ལ་བསྟོད་ཅིང་བསྔགས༔ དགྲ་བགེགས་ལོག་འདྲེན་འདུལ་ཕྱིར་ལས་ལ་བསྐུལ༔ ཕྲིན་ལས་གཉན་པོ་བསྒྲུབ་ཕྱིར་བསྐུལ་ཞིང་རྦད༔ རྣམ་པ་བཞི་ཡི་ཕྲིན་ལས་མྱུར་དུ་སྒྲུབ༔ བསྐུལ་ལོ་དྲག་པོ་མཆེད་གསུམ་ལས་ལ་བསྐུལ༔ ཤ་ཁྲག་མཐུན་རྫས་གཏོར་མ་འདི་འབུལ་ལོ༔ དམ་པ་ཡུམ་ཆེན་མ་ཅིག་བཀའ་བཞིན་དུ༔ སྡང་བའི་དགྲ་དང་བགེགས་ལ་རྟགས་ཕྱུངས་ཤིག༔ མི་མིན་བྱད་མ་བསྒྲལ་བའི་ལས་མཛོད་ཅིག༔ གཉན་ས་རི་ཁྲོད་འགྲིམ་པའི་མཐུན་རྐྱེན་སྒྲུབས༔ སྟོང་ཉིད་སྙིང་རྗེ་སྒོམ་པའི་བུ་སློབ་སྐྱོངས༔ བསྟན་ལ་ཞབས་ཏོག་སྒྲུབ་པའི་སྦྱིན་བདག་འཚོས༔ གཅོད་ཡུལ་བསྟན་པ་ཡར་ཟླའི་མཆེད་པོར་མཛོད༔ དེ་འཛིན་སྐྱེས་བུ་སྐར་ཚོགས་གྲངས་སུ་སྤེལ༔ དམ་ལོག་བསྟན་དགྲ་ཉེར་དགུའི་ཟླ་ལྟར་ཐོངས༔ ཁ་རྗེ་དབང་ཐང་ནམ་ལངས་རྒྱུ་སྐར་བཞིན༔ མི་འདོད་ལོག་ལམ་ཁྲིད་ལ་དུས་མཐའ་སྟུངས༔ གནོད་ཅིང་འཚེ་བའི་བསྟན་དགྲ་འཇོམ་པར་མཛོད༔ ཅེས་པའང་ཡབ་རྗེ་སྤྲུལ་པའི་སྐུ་མཆོག་ལུང་རིག་གླིང་པའི་མ་ཅིག་སྒྲུབ་ཐབས་ཀྱི་མ་ཚང་ཁ་སྐོང་གི་རྒྱུར་རང་སློབ་དད་པའི་ལང་ཚོ་བླ་ལྷག་ཏུ་ངོམ་པའི་བཙུན་པ་འཇམ་དབྱངས་ཉི་མས་གཤའ་ཡི་པར་བུ། ཤེལ་གྱི་མེ་ལོང་བཞིན་ལེགས་པ། མཛེས་བྱེད་རྨ་བྱའི་སྒྲོའི་སྐྱེས་བཅས་བསྐུལ་བ་ལ་བརྟེན་ནས་ཆོས་རྒྱུད་འཛིན་པའི་རིགས་ལ་མཁོ་ཕྱིར་ཁོ་བོ་བླ་གཟུགས་ཁྱི་ཕག་གི་མཾ་ས་ཟས་མཆོག་ཏུ་རློམ་པའི་འཆོལ་བོ་འདུ་ཤེས་གསུམ་པ་དེས་བྲིས་ཤིང་ཡོངས་ལ་དགེ་ཞིང་བཀྲ་ཤིས་སྟེ་ཟབ་མོ་གཅོད་ཀྱི་བསྟན་པ་ཉི་ལྟར་མངོན་པའི་རྒྱུར་གྱུར་ཅིག །