སྒྱུ་ལུས་མཆོད་སྦྱིན་ཚོགས་གཉིས་གཏེར་བུམ།
༄༅།། སྒྱུ་ལུས་མཆོད་སྦྱིན་ཚོགས་གཉིས་གཏེར་བུམ་བཞུགས༔ ཕཊ༔ ཚེ་འདིར་བདེ་དང་གྲགས་འདོད་རེ་བ་དང་༔ སྡུག་བསྔལ་ན་ཚ་གཏམ་ངན་བྱུང་དོགས་སྡུག༔ དེ་ཀུན་འཁོར་བའི་བདག་འཛིན་འདྲེ་བོ་ཆེ༔ རོ་སྙོམས་སྟོང་པའི་དབྱིངས་སུ་དབང་བསྡུས་ནས༔ རང་བྱུང་བདེ་ཆེན་ཀློང་དུ་ཟིལ་གྱིས་གནོན༔ ཕཊ༔ མདུན་མཁར་སྐྱབས་ཀུན་བདག་ཉིད་བླ་མ་དང་༔ མ་ཅིག་ལབ་སྒྲོན་དབྱེར་མེད་རྣམ་པར་བཞུགས༔ སྐྱབས་གནས་མཆོག་གསུམ་རྩ་གསུམ་དམ་ཅན་ཚོགས༔ སྤྲིན་ཕུང་འཐིབས་བཞིན་བཞུགས་པར་གསལ་བ་ལ༔ བདག་གཞན་བྱང་ཆུབ་བར་དུ་སྐྱབས་སུ་མཆི༔ ཕཊ༔ འགྲོ་ཀུན་འཁོར་བའི་སྡུག་བསྔལ་ལས་བསྒྲལ་ནས༔ ཡང་དག་རྫོགས་པའི་བྱང་ཆུབ་འཐོབ་བྱའི་ཕྱིར༔ ཚོགས་གཉིས་ཟུང་འཇུག་མཆོད་སྦྱིན་ཉམས་བླངས་ནས༔ རྣམ་རྟོག་ཐོག་བརྫིས་འཁོར་འདས་མཉམ་ཉིད་ངང་༔ ལྟ་སྤྱོད་མ་ནོར་ཆོས་སྤྱོད་རྒྱུན་འཁྱེར་བྱ༔ ཕཊ༔ བདག་གི་རྐང་མཐིལ་གཉིས་སུ་ཕ་མ་ལས༔ ཐོབ་པའི་ཐིག་ལེ་དཀར་དམར་གསང་བར་འདྲེས༔ ཕཊཿཅེས་ལྟེ་བ་སྙིང་མགྲིན་སྤྱི་བོ་ནས༔ ཚངས་བུག་མཁའ་ལ་ཐོན་ཏེ་དབྱིངས་རིག་བསྲེས༔ སྟོང་ཆེན་ནམ་མཁའ་བརྡལ་བའི་ངང་དུ་བཞག༔ ཕཊ༔ སླར་ཡང་དབྱིངས་ལས་རིག་པ་རྣལ་འབྱོར་མ༔གྲི་གུག་ཐོད་འཛིན་གཟུགས་ཕུང་ས་ལ་འགྱེལ༔ ཆེ་ཚོ་སྣུམ་ལྡན་དེ་ཡི་ཐོད་པ་བྲེགས༔ སྟོང་ཁམས་ཁྱབ་པའི་ནང་དུ་རང་ལུས་གཞུག༔ ཨོཾ་ཨཱཿཧཱུྃ་གིས་སྦྱངས་སྤེལ་བདུད་རྩིར་བསྒྱུར༔ ཨོཾ་ཨཱཿཧཱུྃགྲངས་མང་། མཐར་ནི་མགྲོན་བཞིར་དམིགས་པར་བསྔོ༔ ཕཊ༔ དཀོན་མཆོག་སྲིད་ཞི་མགོན་པོ་ཡོན་ཏན་མགྲོན༔ རིགས་དྲུག་སྙིང་རྗེ་བགེགས་རིགས་ལན་ཆགས་མགྲོན༔ མཆོད་སྦྱིན་མགྲོན་བཞི་འདིར་གཤེགས་མཆོད་སྦྱིན་བཞེས༔ བདག་གཞན་ལས་ངན་སྡིག་སྒྲིབ་ལན་ཆགས་བྱང་༔ བསོད་ནམས་ཡེ་ཤེས་ཚོགས་གཉིས་རྫོགས་པར་ཤོག༔ ཕཊ༔ བདག་ལུས་ཀུན་ཏུ་བཟང་པོའི་མཆོད་པའི་སྤྲིན༔ མེ་ཏོག་སྤོས་མེ་དྲི་ཆབ་ཞལ་ཟས་སྒྲ༔ རྒྱལ་སྲིད་བདུན་དང་བཀྲ་ཤིས་རྫས་རྟགས་སོགས༔ དཀོན་མཆོག་སྲི་ཞུའི་མགྲོན་ལ་མཆོད་པ་འབུལ༔ བཞེས་ནས་མཆོག་ཐུན་དངོས་གྲུབ་བསྩལ་དུ་གསོལ༔ ཕཊ༔ བདག་ལུས་སྐྱེད་ཚལ་ཟས་གོས་ན་བའི་སྨན༔ དཀོར་ནོར་རྟ་གླང་འདོད་འཇོའི་བ་ལ་སོགས༔ གང་འདོད་ལོངས་སྤྱོད་ནམ་མཁའ་མཛོད་ལྟར་དམིགས༔ མགོན་པོ་ཡོན་ཏན་མགྲོན་རིགས་རྣམས་ལ་བསྔོ༔ བཞེས་ནས་མཐུན་རྐྱེན་སྒྲུབ་ལ་འགལ་རྐྱེན་སོལ༔ ཕཊ༔ བདག་ལུས་ཟག་མེད་ཆོས་སྒྲས་སྟོང་ཁམས་གང་༔ རིགས་དྲུག་འགྲོ་བའི་སེམས་ཅན་ཀུན་གྱིས་ཐོས༔ ངན་སོང་གསུམ་གྱི་ཚ་གྲང་བཀྲེས་སྐོམ་དང་༔ བཀོལ་སྤྱོད་ལ་སོགས་སྡུག་བསྔལ་མ་ལུས་ཞི༔ ཀུན་ཀྱང་རྣམ་མཁྱེན་ཡེ་ཤེས་མྱུར་ཐོབ་ཤོག༔ ཕཊ༔ བདག་ལུས་ཤ་ཁྲག་རུས་གསུམ་ས་གཞི་ཁྱབ༔ ཕོ་གདོན་རྒྱལ་པོ་མོ་གདོན་བསེན་མོ་དང་༔ ཀླུ་གདོན་ས་བདག་བགེགས་རིགས་ཚོགས་ལ་བསྔོ༔ ཀུན་ཀྱང་དགྱེས་བཞེས་བུ་ལོན་ལན་ཆགས་བྱང་༔ ངན་སོང་འཁོར་བའི་སྐྱེ་སྒོ་ཆོད་པར་ཤོག༔ ཕཊ༔ རྗེས་ལ་དགེ་རྩ་བྱང་ཆུབ་ཆེན་པོའི་རྒྱུར༔ བསྔོ་བའི་ཚིག་ནི་གཞན་ཕན་བློ་དང་བཅས༔ ཕཊ༔ སྐྱབས་ཡུལ་ཐམས་ཅད་འོད་ཀྱི་ཕུང་པོ་རུ༔ གྱུར་ནས་བླ་མ་ལ་ཐིམ་སྤྲོས་བྲལ་ངང་༔ སླར་ཡང་བླ་མ་འོད་ཞུ་རང་ལ་ཐིམ༔ གཉིས་འཛིན་བྲལ་བ་སྐྱེ་མེད་ཡུམ་ཆེན་ཀློང་༔ ཕཊ༔ དེ་ལྟར་སྒྱུ་ལུས་ཆོས་དང་ཟང་ཟིང་གི༔ མཆོད་སྦྱིན་འཁོར་གསུམ་ཡོངས་དག་རྒྱས་བཏབ་ནས༔ སྲིད་ཞི་མཉམ་ཉིད་ཀ་དག་གཉུག་མའི་ཀློང་༔ ལྷུན་གྲུབ་གཞོན་ནུ་བུམ་སྐུའི་བཀྲ་ཤིས་ཤོག༔ བསོད་ནམས་འདི་ཡིས་སོགས་བྱའོ༔ ཞེས་པའང་རྒྱ་སྤྲུལ་བླུན་རྒན་ཟོག་པོས་རྣལ་འབྱོར་བླ་མའི་བཀའ་བཞིན་ཐོལ་བྱུང་དུ་སྨྲས་པའོ༔