སྒྱུ་ལུས་མཆོད་སྦྱིན་མན་ངག་ཡུམ་ཆེན་མཁའ་འགྲོའི་ཐུགས་བཅུད།
༁ྃ༔ སྒྱུ་ལུས་མཆོད་སྦྱིན་བདུད་གཅོད་ཟབ་མོ་ཡི༔ མན་ངག་ཡུམ་ཆེན་མཁའ་འགྲོའི་ཐུགས་བཅུད་བཞུགས༔ གུ་རུ་དྷེ་ཝ་ཌཱཀྐི་སརྦ་སིདྡྷི་ཕ་ལ་ཧཱུྃ༔ ཕཊ༔ ཚེ་འདིར་བདེ་དང་གྲགས་འདོད་རེ་བ་དང་༔ སྡུག་བསྔལ་ན་ཚ་གཏམ་ངན་བྱུང་དོགས་སྡུག༔ གཉིས་འཛིན་འཁྲུལ་བའི་རྣམ་རྟོག་འཁོར་བའི་རྒྱུ༔ བདག་མེད་མྱ་ངན་འདས་པར་ཟིལ་གྱིས་གནོན༔ ཕཊ༔ གང་ལ་བསམ་ཀྱང་འཁོར་བ་མེ་ཡི་འོབས༔ བདེ་བའི་གོ་སྐབས་མེད་འདིར་ངེས་འབྱུང་བས༔ རྣམ་མཁྱེན་སངས་རྒྱས་ཐོབ་ཕྱིར་བདག་གཞན་འགྲོ༔ དཀོན་མཆོག་གསུམ་དང་གཅོད་བརྒྱུད་བླ་མ་དང་༔ ཡི་དམ་ཌཱཀྐི་དམ་ཅན་རྒྱ་མཚོ་ལ༔ རྣམ་པ་ཀུན་ཏུ་གུས་པས་སྐྱབས་སུ་མཆི༔ ཕཊ༔ ཡུམ་ཆེན་ལབ་སྒྲོན་སྲས་བཅས་རྒྱལ་བའི་ཚོགས༔ སྟོང་ཉིད་སྙིང་རྗེ་ཟུང་འཇུག་ལས་འཁྲུངས་ཕྱིར༔ ཡུམ་ཆེན་ཐུགས་བཅུད་སྨོན་འཇུག་བྱང་ཆུབ་སེམས༔ བདག་ཅག་བྱང་ཆུབ་ཐོབ་ཕྱིར་བསྐྱེད་པར་བྱ༔ ཕཊ༔ རང་གི་སྙིང་གར་པདྨ་འདབ་བརྒྱད་སྟེང་༔ རང་རིག་ཐིག་ལེ་དཀར་ལ་དམར་མདངས་ཅན༔ དབུ་མའི་ལམ་བརྒྱུད་རྡོ་རྗེ་རྣལ་འབྱོར་མ༔ དམར་མོ་གྲི་གུག་ཐོད་ཁྲག་འཛིན་པར་གྱུར༔ ཕཊ༔ རང་རིག་རྣལ་འབྱོར་ནམ་མཁའི་དབྱིངས་སུ་འཕོས༔ རང་ལུས་བྷནྡྷ་བཀོག་པ་སྟོང་གསུམ་ཁྱོན༔ བམ་རོ་བདུད་རྩི་ཨོཾ་ཨཱ༔ཧཱུྃ་གིས་སྦྱངས༔ མི་མགོའི་སྒྱེད་པུ་གསུམ་སྟེང་མེ་རླུང་གཡོས༔ ཨོཾ་ཨཱ༔ཧཱུྃ༔གིས་བམ་རོ་ཐོད་པའི་ནང༔ བདུད་རྩི་ཁ་ཏོག་ལྔ་དང་ལྡན་པར་བསམ༔ ཕཊ༔ ཕཊ༔ བདུད་རྩི་ཞུ་བའི་དངས་བཅུད་མཆོད་པའི་རྫས༔ རྒྱལ་སྲིད་བདུན་དང་ཉེར་སྤྱོད་འདོད་ཡོན་ལྔ༔ རྩ་བརྒྱུད་བླ་མ་ཡི་དམ་ཞི་ཁྲོའི་ལྷ༔ མཁའ་འགྲོ་སྡེ་ལྔ་སྲིད་ཞིའི་མགྲོན་ལ་འབུལ༔ ཕཊ༔ ཚོགས་གཉིས་རྫོགས་ཤིང་སྒྲིབ་དག་དངོས་གྲུབ་སྩོལ༔ ཕཊ༔ སྨན་རཀ་གཏོར་མ་བརྟེན་རྫས་བསྐང་བའི་རྫས༔ མ་མགོན་གཟའ་རྡོར་དཔལ་མགོན་བདུན་ཅུའི་ཚོགས༔ རྫོགས་ཆེན་བཀའ་གཏེར་བསྲུང་མ་རྒྱ་མཚོའི་ཚོགས༔ མགོན་པོ་ཡོན་ཏན་མགྲོན་གྱུར་རྣམས་ལ་འབུལ༔ ཕཊ༔ བར་ཆད་ཞི་ཞིང་མཐུན་རྐྱེན་འགྲུབ་པར་མཛོད༔ ཕཊ༔ ཕཊ༔ རང་ལུས་པགས་པ་སྟོང་གསུམ་ཁྱོན་དུ་བརྡལ༔ ཤ་ཁྲག་རུས་པ་ནང་ཁྲོལ་ཁྱབ་པར་སྤུངས༔ བགེགས་རིགས་ལན་ཆགས་གཉེར་བ་སྤྱི་དང་ནི༔ ཁྱད་པར་ནད་བདག་རྒྱལ་བསེན་རྣམས་ལ་སྦྱིན༔ ཕཊ༔ གནོད་སེམས་ཞི་ཞིང་བྱང་ཆུབ་སེམས་ལྡན་ཤོག༔ ཕཊ༔ རང་ལུས་དཀར་གསུམ་བདུད་རྩི་དངས་མའི་བཅུད༔ འཛད་མེད་ནམ་མཁའ་མཛོད་ཀྱི་ཆར་ཆེན་པོས༔ རིགས་བཞིའི་ཀླུ་དང་ཉམས་ཐག་བར་དོའི་འགྲོ༔ རིགས་དྲུག་སྙིང་རྗེའི་མགྲོན་རྣམས་ཚིམ་གྱུར་ཅིག༔ ཕཊ༔ སྡུག་བསྔལ་ཞི་ཞིང་བདེ་བ་མཆོག་ཐོབ་ཤོག༔ ཕཊ༔ རིག་པ་སྟོང་གསལ་རྡོ་རྗེ་ཌཱཀྐི་མ༔ དབྱིངས་ཀྱི་ངང་ལས་དབྱིངས་དང་རིག་པ་འདྲེས༔ གནོད་བྱ་བདག་དང་གནོད་བྱེད་ལྷ་འདྲེའི་སེམས༔ སྐྱབས་ཡུལ་ཐུགས་རྒྱུད་ངོ་བོ་གཅིག་པར་གྱུར༔ ཕཊ༔ རིག་སྟོང་ཀློང་དུ་བརྗོད་བྱ་རྗོད་བྱེད་བྲལ༔ སྙིང་རྗེའི་རྩལ་གྱིས་དུས་གསུམ་དགེ་བའི་ཚོགས༔ ནམ་མཁའི་མཐར་ཐུག་འགྲོ་བ་ཡོངས་ལ་བསྔོ༔ ཀུན་ཀྱང་ཡུམ་ཆེན་རྒྱལ་བའི་ས་ཐོབ་ཤོག༔ ཕཊ༔ ཆོས་ཀྱི་སྦྱིན་པ་བྱ་ཞིང་བདེ་སྡུག་གི༔ དངོས་པོ་གཏོང་ལེན་བཀྲ་ཤིས་བསྔོ་སྨོན་བྱ༔ ཨེ་མ་ཟབ་ཆོས་ཁྱད་འཕགས་ཌཱཀྐིའི་ཐུགས་ཀྱི་བཅུད༔ ས་རྡོ་རྡོལ་ཞིང་བུད་མེད་གྲོགས་མེད་པར༔ ཀུན་གཞིའི་ཀློང་ནས་ཡུམ་ཆེན་ལབ་སྒྲོན་མའི༔ བྱིན་རླབས་ཐུགས་རྗེས་ཐོལ་བྱུང་ཚུལ་དུ་བབས༔ ལས་ཅན་སྐྱེས་བུས་བདུད་བཞི་རང་གྲོལ་ཤོག༔ གལ་ཏེ་རྒྱུད་དོན་གབ་འཁྲུགས་ནོར་འཁྲུལ་སོགས༔ བྱུང་ན་ཡུམ་ཆེན་སྲུང་མར་བཅས་ལ་བཤགས༔ ཟབ་དོན་མན་ངག་དུ་མའི་གནད་རྟོགས་ཤོག༔ ཅེས་པའང་ལས་ཅན་གྱི་སློབ་མ་རིག་འཛིན་བཟང་པོས་བསྐུལ་ངོར་དགེ་སློང་རྡོ་རྗེ་འཛིན་པ་ཆེ་མཆོག་ཡོན་ཏན་རྩལ་གྱིས་ཐོལ་བྱུང་དུ་བྲིས་པའོ། །དགེའོ།།