རལ་གཅིག་མའི་མདུན་བསྐྱེད་གནམ་ལྕགས་ཐོག་མདའ།
༄༅།། སྔགས་སྲུང་རལ་གཅིག་མའི་མདུན་བསྐྱེད་གནམ་ལྕགས་ཐོག་མདའ་བཞུགས་སོ༔ དེ་ནས་མདུན་བསྐྱེད་བསང་སྦྱང་བྱ་ལ༔ སྭ་བྷ་ཝས་སྦྱངས༔ སྟོང་པར་གྱུར༔ སྟོང་པའི་ངང་ལས་ཕྱི་སྣོད་དག་པའི་ཞིང་ཕོ་བྲང་ཆེན་པོ་ལྕང་ལོ་ཅན་དུར་ཁྲོད་ཀྱི་མཚན་ཉིད་ཐམས་ཅད་ཡོངས་སུ་རྫོགས་པ་ཁྲག་གི་ཞམ་ཆུ་འབེབས་པ། ཤ་ཆེན་གྱི་ཐང་མ་བརྡལ་བ༔ དུར་མེ་དམར་ནག་ཏུ་འབར་ཞིང་དུར་རླུང་ཁམ་ནག་འཚུབས་པ༔ བྱ་གཅན་རོ་ལངས་ཀེང་རུས་རྒྱུག་པ༔ ཐོད་མཁར་གྲུ་གསུམ་ཙིཏྟའི་ཏོག་ལ་སོགས་ཞིང་ཆེན་གྱི་རྒྱལ་མཚན༔ གནམ་ལྕགས་ཀྱི་སྒོ་ཐེམ༔ རྡོ་རྗེའི་ར་བ་དང་ལྷ་བརྒྱད་ཀྱི་ཀ་བ་རྔམས་ཤིང་༔ གཟའ་ཆེན་གྱི་དྲལ་ཕྱམ༔ ཀླུ་ཆེན་བརྒྱད་ཀྱི་གདུང་ཁང་བྲེས་པ༔ ཉི་ཟླའི་སྐར་ཁུང་ཆུ་སྲིན་ལ་སོགས་པས་བརྒྱན་པ༔ དེ་དབུས་ཁྲག་མཚོ་ཆོས་འབྱུང་གྲུ་གསུམ་གྱི་ཁར་པདྨ་ཉི་མ་དགྲ་བགེགས་དང་རོའི་གདན་སྟེང་དུ༔ སྐད་ཅིག་གིས་མ་མོ་སྔགས་ཀྱི་སྲུང་མ་རལ་གཅིག་མ་སྐུ་མདོག་སྨུག་ནག་དུས་མཐའི་མེ་དཔུང་ལྟར་འབར་ཞིང་བཟོད་པར་དཀའ་བའི་བདག་ཉིད་ཅན༔ དབུ་དགུ་ཤིན་ཏུ་ཁྲོས་ཤིང་དམར་ལ་ཟླུམ་པ༔ གློག་གི་ཞགས་པ་ལྟར་ཕྱོགས་བཅུར་བལྟ་བའི་སྤྱན་རྣམས་ཁྲག་མཚོར་ཁོལ་བ༔ ཕྱག་བཅོ་བརྒྱད་ཀྱི་དང་པོ་གཉིས་ཀྱིས་ཙིཏྟ་དང་ལྕགས་སྤྱང་ཕྲ་ཐབས་སུ་འགྱེད་པ༔ གཡས་འོག་བརྒྱད་ཀྱིས་རིམ་བཞིན་གཅོད་བྱེད་ཀྱི་གྲི་གུག༔ གནམ་ལྕགས་ཀྱི་འཁོར་ལོ༔ གནོན་པའི་རི་རབ༔ སྲེག་བྱེད་ཀྱི་མེ་དཔུང་༔ གཏུབ་པར་བྱེད་པའི་ཆུ་གྲི༔ དམར་ཡམས་ནད་ཀྱི་རྐྱལ་པ༔ འཛིན་པའི་ལྕགས་ཀྱུ༔ འཆིང་བྱེད་ཀྱི་ཞགས་པ༔ གཡོན་པ་བརྒྱད་ཀྱིས་ཀུན་ཏུ་འབར་བའི་ཉི་མ༔ བསིལ་ཞིང་གྲང་བའི་ཟླ་བ༔ ཉམས་པའི་སྙིང་ཁྲག་གིས་བཀང་བའི་ཐོད་པ༔ ལུས་དང་ཡན་ལག་སྡོམ་པའི་ལྕགས་སྒྲོག༔ མྱོས་བྱེད་ཀྱི་དྲིལ་བུ༔ སྔགས་ཀྱི་མཚོན་རྩེ་གསུམ༔ སྙིང་ལ་གཟེར་བྱེད་དམར་གཏོར༔ ཞིང་གི་དབྱུག་པ་ཕྱར་ཞིང་བསོར་བ༔ དེའི་སྤྱི་བོར་ཁྱུང་ཆེན་འབར་བས་བརྒྱན་པར་བསྒོམས༔ ཞབས་བརྒྱད་ཀྱིས་དམ་མེད་སྡེ་བརྒྱད་ཁ་སྦུབ་དང་གན་རྐྱལ་དུ་བསྣོལ་བ༔ ཐོད་སྐམ་གྱིས་དབུ་རྒྱན་སྤྲས་པའི་སྐྲ་དམར་སེར་ཐུར་དུ་གྲོལ་བའི་གཙུག་ཏུ་ལྕགས་རལ་ཉག་གཅིག་མཁའ་ལ་གཟེང་བ་ཁམས་གསུམ་ལས་རྣམ་པར་རྒྱལ་བའི་བདག་ཉིད་ཆེན་མོ་ཉམས་པ་བདུན་ལྡན་གྱི་སྲོག་ལ་རྔམས་ཤིང་ཧབ་ཤ་བྱེད་པར་བསྒོམས༔ དེ་ཡི་ཕྱི་རིམ་གནམ་ལྕགས་རྩིབས་བརྒྱད་ཀྱི་གདན་ལ་ཤར་དུ་ཨ་ལས་སྲོག་བདག་ཚངས་པ་དཀར་པོ་བེར་སྨུག་གསོལ་ཞིང་རྟ་དཀར་ལ་ཆིབས་པ༔ ཕྱག་ན་མདུང་དར་དང་ཤེལ་གྲི་ཕྱར་བ་དར་ཐོད་དང་ཉི་ཟླའི་འཕྲུ་ཡིས་བརྒྱན་པ༔ ལྷོ་རུ་ཡ་ལས་གཤིན་རྗེ་ཡ་མ་ར་ཙ་སེར་ནག་མི་ལྤགས་གསོལ་ཞིང་མ་ཧེ་སེར་ནག་ལ་ཆིབས་པ༔ ཕྱག་ན་ཐོད་དབྱུག་དང་ཞགས་པ་བསྣམས་པ་ཐོད་སྐམ་དབུ་རྒྱན་ཁྲོ་གཏུམ་འབར་བ༔ ནུབ་ཏུ་ཙ་ལས་བཙན་རྒོད་དམར་པོ་སྐུ་ལ་བསེ་ཁྲབ་དང་བསེ་རྨོག་གསོལ་བ་རྟ་དམར་ལ་ཆིབས་པ༔ ཕྱག་ན་མདུང་དམར་དང་ཞགས་པ་འཁོར་གསུམ་སྤྲས་པ་ཨཾ་གཙིགས་བསྡམས་ཤིང་གློག་ཞགས་འཁྱུག་པ༔ བྱང་དུ་དུ་ལས་བདུད་རྗེ་ནག་པོ་བེར་ནག་གསོལ་ཞིང་རྟ་ནག་ལ་ཞོན་པ༔ ཞགས་པ་དང་ཁྲམ་ཤིང་ཕྱར་བ་མགོ་ཕྲེང་ལ་སོགས་པས་བརྒྱན་པ༔ ཤར་ལྷོར་ན་ལས་ཀླུ་སྲིན་སྨུག་ནག་སྦྲུལ་གྱི་གདེངས་ཀ་སྤྲིན་ལྟར་གཡོ་བ་སྦྲུལ་མཇུག་ཅན་ཆུ་སྲིན་ཁམ་སེར་ལ་ཞོན་པ༔ ཕྱག་ན་ནད་རྐྱལ་དང་སྦྲུལ་ཞགས་འཕེན་པ༔ ལྷོ་ནུབ་ཏུ་རུ་ལས་ར་ཧུ་ལ་མགོ་དགུ་དུད་མདོག་ལྟོ་ཞལ་གདངས་པ༔ བྱ་རོག་གི་གཙུག་ཏོར་དང་སྦྲུལ་མཇུག་འཁྱིལ་བ་གཡུ་འབྲུག་ལ་ཞོན་པ༔ ཕྱག་བཞི་མདའ་གཞུ་ཆུ་སྲིན་ཞགས་པ་བསྣམས་པ༔ ནུབ་བྱང་དུ་ཤ་ལས་མགར་བ་ནག་པོ་སག་ཞུ་གསོལ་ཞིང་བེར་དམར་མནབས་པ་ར་སྐྱེས་ལ་ཞོན་པ༔ ཕྱག་ན་རྡོ་རྗེ་ཐོ་བ་མགར་གྱི་སྦུད་པ་རླུང་ནག་འཚུབས་པ་བསྣམས་པ༔ བྱང་ཤར་དུ་མ་ལས་མ་མོ་མཐིང་ནག་དར་ནག་གསོལ་བ་བོང་བུ་ལ་ཞོན་པ་ཕྱག་ན་བ་དན་དང་ཐོད་ཁྲག་གསོལ་ཞིང་ཉི་ཟླས་བརྒྱན་པ༔ དེའི་ཕྱི་རོལ་ལ་མཁའ་འགྲོ་སུམ་ཅུ་སོ་གཉིས་སྐུ་མདོག་སྣ་ཚོགས་ལ་ན་བཟའ་ཕྱག་མཚན་ཞོན་པ་ཐམས་ཅད་སྤྲུལ་བསྒྱུར་གྱི་ཚུལ་དུ་བསྐྱེད་དོ༔ དེ་ལྟར་གསལ་བའི་གནས་གསུམ་འབྲུ་གསུམ་ལས་འོད་ཟེར་འཕྲོས་པས་འོག་མིན་དང་ལྕང་ལོ་ཅན་ནས་དཔག་ཏུ་མེད་པ་སྤྱན་དྲངས་ལ་བསྟིམས༔ མདུན་བསྐྱེད་དགོས་ཟེར་བྱུང་བས་ལུང་རིག་གླིང་པས་སྦྱར་བའོ༎