ཚོགས་མཆོད་བསོད་ནམས་རྒྱུན་བཟང་།
སྔགས་སྲུང་ཁྲོས་མའི་ཐུགས་སྒྲུབ་ལས༔ ཚོགས་མཆོད་བསོད་ནམས་རྒྱུན་བཟང་བཞུགས༔
རབ་འབྱམས་རྒྱལ་བ་ཀུན་གྱི་ཡུམ༔ དབྱིངས་ཀྱི་གཙོ་མོ་ཀུན་ཏུ་བཟང་༔ རྡོ་རྗེ་ཐེག་པའི་ཡང་རྩེ་མཆོག༔ རྫོགས་པ་ཆེན་པོའི་བསྟན་སྲུང་མའི༔ ཚོགས་མཆོད་ལག་ཏུ་ལེན་པ་ལ༔ དུས་བཟང་ཚེས་བརྒྱད་བཅོ་ལྔ་དང་༔ བཅུ་བཞི་ཉེར་ལྔ་གནམ་སྟོང་སོགས༔ གང་ཡང་རུང་བའི་དུས་མཆོད་དམ༔ ཡང་ན་ལྷ་དང་སྲུང་མ་ནི༔ ནམ་དྲན་དུས་སུ་བརྩམ་ན་ལེགས༔ དབེན་པར་སྨན་རཀ་གཏོར་མ་དང་༔ ཉེར་སྤྱོད་ལྔ་བཤམས་ལས་གཞུང་བསྲིངས༔ བསང་སྦྱང་ཐོག་མར་རང་ཉིད་ནི༔ ཡི་དམ་ལྷ་ཡི་ཏིང་འཛིན་ངང་༔ རང་ཉིད་ཐུགས་ལས་རྃ་ཡྃ་ཁྃ་འཕྲོས་པས༔ ཚོགས་ཀྱི་ཉེས་སྐྱོན་འབག་བཙོག་བསྲེགས་གཏོར་བཀྲུས༔ ཨོཾ་ཨཱཿཧཱུྃ་གིས་ཟབ་ཡངས་རིན་ཆེན་སྣོད༔ བཅུད་རྣམས་རིགས་ལྔ་ཡབ་ཡུམ་སྦྱོར་མཚམས་ནས༔ ཟག་མེད་བདུད་རྩིར་དཀར་དམར་མཐིང་གར་གྱུར༔ མཆོད་སྤྲིན་རྒྱ་མཚོ་ཀུན་ཏུ་བཟང་པོ་ཡི༔ རྣམ་རོལ་འཁོར་བ་མ་སྟོངས་བར་ཉིད་དུ༔ སྲུང་མ་དམ་ཅན་རྒྱ་མཚོ་དགྱེས་བྱེད་རྫས༔ མི་ཟད་ནམ་མཁའ་མཛོད་ལ་མངའ་དབང་བསྒྱུར༔ ཨོཾ་ཨཱཿཧཱུྃ་ཧ་ཧོ་ཧྲཱིཿ དང་པོ་ཚོགས་ལ་སྤྱན་འདྲེན་བྱ་བ་ནི༔ ཧཱུྃ་ཧྲཱིཿ རང་བཞིན་རྣམ་དག་འོག་མིན་ཕོ་བྲང་ནས༔ ལྷུན་གྲུབ་གཟུགས་སྐུའི་རོལ་པར་ཡོངས་ཤར་བ༔ བླ་མ་ཡི་དམ་མཁའ་འགྲོ་ཆོས་སྐྱོང་དང་༔ ཁྱད་པར་རྡོ་རྗེ་སྙིང་པོའི་སྲུང་མ་མཆོག༔ མ་མོ་སྔགས་ཀྱི་སྲུང་མ་རལ་གཅིག་མ༔ སྦྱོར་སྒྲོལ་གིང་ཆེན་སྤྲུལ་དང་ཡང་སྤྲུལ་བཅས༔ མ་ལུས་འཁོར་དང་བཅས་ཏེ་གཤེགས་སུ་གསོལ༔ ཆོས་དབྱིངས་ནམ་མཁའ་ཡངས་པའི་ད་ལ་ནས༔ རྡོ་རྗེའི་འགྲོས་ཀྱིས་གནས་འདིར་གཤེགས་ནས་ཀྱང་༔ བསོད་ནམས་ཡེ་ཤེས་ཚོགས་གཉིས་རྫོགས་པ་དང་༔ རྐྱེན་ངན་བར་ཆད་བཟློག་ཕྱིར་འདིར་སྤྱོན་ཅིག༔ དང་པོ་ཚོགས་ཕུད་འབུལ་ཞིང་འདི་སྐད་དོ༔ ཧཱུྃ༔ ཚོགས་དྲུག་ཡུལ་ལ་ཟག་མེད་བདེ་བསྐྱེད་རྫས༔ ཡུལ་དྲུག་འདོད་ཡོན་ལྷ་མོས་ཕྱག་རྒྱ་བསྒྱུར༔ མེ་ཏོག་བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་མཆོད་སྤྲིན་རྒྱ་མཚོ་འབུལ༔ མ་ཧཱ་ག་ན་ཙཀྲ་པཱུ་ཙ་ཁ་ཧཱི༔ བར་བ་བཤགས་པ་གནོང་འགྱོད་དང་བཅས་པས༔ གདུང་བའི་དབྱངས་ཀྱིས་སྨྲེ་སྔགས་འདི་བཞིན་བརྗོད༔ ཀྱཻ་མ་ཀྱཻ་མ་དགོངས་ཤིག་རྩ་བ་གསུམ༔ དམ་ཅན་སྔགས་སྲུང་རྒྱ་མཚོ་འདིར་གསོན་ཅིག༔ ཐོག་མའི་གཞི་ལས་རང་སྣང་འཁྲུལ་བས་བསླད༔ སྡིག་ལྡན་བདག་གི་ཚེ་རབས་ཐོག་མེད་ནས༔ མཚམས་མེད་ཉེ་བ་ལྔ་དང་མི་དགེ་བཅུ༔ ལྕི་བཞི་ལོག་བརྒྱད་སོ་བྱང་སྔགས་ཀྱི་སྡོམ༔ རྩ་བ་ཡན་ལག་དམ་ཚིག་ཉམས་འགལ་རལ༔ མ་ལུས་ཚོགས་ཀྱི་འཁོར་ལོ་ལ་བརྟེན་ནས༔ མི་འཆབ་འགྱོད་པ་ཆེན་པོས་བཤགས་ཤིང་སྡོམ༔ དག་ཚངས་མཆོག་གི་དབུགས་དབྱུང་བདག་ལ་སྩོལ༔ ཡི་གེ་བརྒྱ་པ་བརྗོད་ཅིང་མི་དམིགས་ངང་༔ རང་བབ་གཤིས་སུ་བཞག་པ་བཤགས་པའི་མཆོག༔ ཐ་མ་ཚོགས་རྫས་དགྲ་བགེགས་དངོས་སུ་བསམ༔ ཧཱུྃ༔ མ་རིག་གསུམ་དང་ཉོན་མོངས་རྒྱུ་དྲུག་གིས༔ བསྐྱེད་པའི་བསྟན་དང་འགྲོ་བ་སྤྱི་ཡི་དགྲ༔ ཉེས་མེད་རྣལ་འབྱོར་ལ་སྡང་དགོས་ཀྱི་དགྲ༔ ཚེ་བསོད་དཔལ་འབྱོར་ཉམས་བྱེད་གཟུགས་མེད་བགེགས༔ མཚན་མ་རྫས་ཀྱི་ལིང་ག་འདི་ལ་ཁུག༔ འཆིང་སྡོམ་མྱོས་པར་མཛོད་ལ་ལྷ་དང་ཕྱེ༔ བདག་ཉིད་ཡི་དམ་ཕྱག་གིས་ཕུར་པ་འདྲིལ༔ སྲས་མཆོག་རྡོ་རྗེ་གཞོན་ནུའི་རྣོ་དབལ་གྱིས༔ ཚེ་བསོད་བདག་ལ་བསྟིམས་ཤིང་རྣམ་ཤེས་སྤར༔ ཤ་ཁྲག་བདུད་རྩི་གསང་སྔགས་ལྷ་ལ་འབུལ༔ སྐྱེ་མེད་དབྱིངས་སུ་རོལ་ཅིག་ས་མ་ཡཱ༔ ནྲྀ་ཏྲི་ཤ་ཏྲུཾ་མཱ་ར་ཡ་ཧཱུྃ་ཕཊ༔ མ་ཧཱ་མཾ་ས་རཀྟ་ཀེཾ་ནི་རི་ཏི་ཁ་ཁ་ཁ་ཧཱི་ཁ་ཧཱི༔ ཞེས་བརྗོད་མཚོན་ཆས་གཏུབས་ནས་གཏོར་མར་འབུལ༔ རྣལ་འབྱོར་ཚོགས་ལ་རོལ་ཞིང་ལྷག་མ་རྣམས༔ སྨན་རཀ་བཏབ་ཅིང་བདུད་རྩིར་བྱིན་གྱིས་རློབ༔ ཨོཾ་ཨཱཿཧཱུྃ་ཧ་ཧོ་ཧྲཱིཿཕེཾ་ཕེཾ༔ ཞེས་ལྷག་མའི་མགྲོན་རྣམས་སྤྱན་དྲངས་ནས༔ ཚིག་འདིས་བསྔོ་ཞིང་མཐར་ནི་གཙང་སར་འབུལ༔ ཧཱུྃ༔ འདོད་ཡོན་ཚོགས་ཕུད་དཀྱིལ་འཁོར་ལྷ་ལ་འབུལ༔ བར་བས་ཉམས་བསྐང་ཉེས་ལྟུང་བཤགས་ཤིང་སྦྱང་༔ ཐ་མ་དམིགས་བྱའི་ལོག་འདྲེན་བསྒྲལ་ཞིང་བསྟབས༔ ཚིམ་པ་དྲུག་གིས་ཕུང་ཁམས་ལྷ་ཚོགས་མཉེས༔ དཀྱིལ་འཁོར་མུ་རན་སྐྱོང་བ་ལྷག་མའི་མགྲོན༔ མཁའ་འགྲོ་སོ་གཉིས་གིང་ལིང་བསྟན་མར་བཅས༔ ཚོགས་ལྷག་བཞེས་ལ་བསྟན་པའི་དགྲ་བགེགས་སྒྲོལ༔ རྣལ་འབྱོར་བསམ་པའི་དོན་ཀུན་མྱུར་འགྲུབ་མཛོད༔ ཨུཥྩི་ཊ་བྷ་ལིང་ཏ་ཁ་ཧཱི༔ ཞེས་ལྷག་མ་གཏོང་ཞིང་སྲུང་མ་རྣམས༔ ཐུགས་དམ་དབྱིངས་སུ་བསྐུལ་བ་འདི་སྐད་དོ༔ ཧཱུྃ་བྷྱོ༔ མི་མངོན་ཆོས་དབྱིངས་དག་པའི་ཕོ་བྲང་ནས༔ ཀུན་ཏུ་བཟང་མོ་དབྱིངས་ནས་སྐུར་བཞེངས་ཤིག༔ གཟུང་འཛིན་རང་གར་ཤོར་བའི་ལོག་རྟོག་འགྲོ༔ མཐའ་བྲལ་གདོད་མའི་གཞི་ལ་འདྲེན་ཕྱིར་བསྐུལ༔ དུར་ཁྲོད་མེ་རི་འབར་བའི་ཕོ་བྲང་ནས༔ རྡོ་རྗེ་རྣལ་འབྱོར་ཕག་མོ་སྐུར་བཞེངས་ཤིག༔ ཞིང་བཅུའི་དགྲ་བགེགས་དུག་ལྔའི་རང་གཟུགས་རྣམས༔ ཡེ་ཤེས་ལྔ་ཡི་ཀློང་དུ་སྒྲོལ་ཕྱིར་བསྐུལ༔ རབ་འཇིགས་གཏུམ་པའི་དུར་ཁྲོད་བརྒྱད་སོགས་ནས༔ སྔགས་སྲུང་ཁྲོ་མོ་རྡོ་རྗེ་རལ་གཅིག་མ༔ དོན་དམ་དབྱིངས་ལ་ཁྲོ་འཁྲུག་མི་མངའ་ཡང་༔ ཀུན་རྫོབ་སྣང་ཆར་འཁྲུལ་བའི་སྤྱི་དགོས་དགྲ༔ ཁྱད་པར་དམ་ལོག་བླ་མ་མཆེད་ལ་བརྙས༔ དཀྱིལ་འཁོར་གཉན་པོ་རལ་ཞིང་གསང་སྔགས་ཆོས༔ ལོག་རྟོག་དབང་གིས་སྨད་སོགས་ཉམས་པ་བདུན༔ ད་ལྟ་མྱུར་དུ་བསྒྲལ་ཕྱིར་ཐུགས་དམ་བསྐུལ༔ སྟོང་ཁམས་ཅིག་ཅར་གཟིགས་པའི་སྤྱན་གཅིག་མ༔ ཐོགས་མེད་རྫུ་འཕྲུལ་ཤུགས་ཀྱིས་སྲིད་པ་གསུམ༔ གོམ་སྟབས་གཅིག་གིས་བགྲོད་པའི་མ་མོ་ཆེ༔ ཞིང་བཅུའི་ཙིཏྟ་ཕྱུང་ལ་ཞལ་དུ་གསོལ༔ ནག་པོའི་རྩ་ལག་སྡེར་བཅས་རྨིང་མེད་དུ༔ དྲག་རྩལ་སྟོབས་ཀྱིས་སྒྲོལ་བའི་ཕྲིན་ལས་མཛོད༔ ཅེས་བརྗོད་གཏོར་མ་དགྲ་ཕྱོགས་ལ་འཕང་༔ ཐ་ཚིག་ཆད་མདོའི་གཏོར་མ་ནི༔ སྨན་རཀ་སྦྲེང་ཞིང་འདི་སྐད་དོ༔ ཧཱུྃ་བྷྱོ༔ ཀུན་རྫོབ་དུས་གསུམ་ལས་འདས་གདོད་མའི་དབྱིངས༔ དོན་དམ་ཀུན་ཏུ་བཟང་མོའི་རང་གདངས་ལས༔ རིགས་ལྔའི་ཌཀྐཱི་རྡོ་རྗེ་ཁྲོས་མ་ཡིས༔ དུར་ཁྲོད་མེ་རི་འབར་བའི་ཕོ་བྲང་དུ༔ གནས་གསུམ་ཡེ་ཤེས་འཇིག་རྟེན་ལས་སྤྲུལ་པའི༔ དཔའ་བོ་མཁའ་འགྲོ་རིག་པ་འཛིན་རྣམས་ལ༔ ཨེ་ཝཾ་ཟབ་དོན་རྒྱུད་སྡེ་བསྟན་པའི་ཚེ༔ གསང་ཆེན་བསྟན་དང་བསྟན་འཛིན་སྐྱོང་བ་དང་༔ བསྟན་པའི་དགྲ་བགེགས་སྒྲོལ་བར་ཞལ་བཞེས་བཞིན༔ དམ་ཚིག་གཙང་མའི་མཆོད་གཏོར་འདི་བཞེས་ལ༔ གསང་ཆེན་བསྟན་སྲུང་རྣལ་འབྱོར་ཚེ་སྲོག་བསྲིངས༔ བསྟན་པའི་དགྲ་སྒྲོལ་ལས་བཞིའི་ཕྲིན་ལས་མཛོད༔ དེ་འོག་རྒྱལ་ཀུན་ངོ་བོ་པད་འབྱུང་གིས༔ ཡེ་ཤེས་མཚོ་རྒྱལ་ཁྲི་སྲོང་མུ་རུབ་བཙན༔ དག་པའི་འཁོར་ཚོགས་རྗེ་འབངས་ལྕམ་དྲལ་ལ༔ ཟབ་ཆོས་གདམས་པ་དཔག་མེད་གནང་བའི་ཚེ༔ གསང་སྔགས་སྲུང་མ་ཨེ་ཀ་ཛ་ཊི་སོགས༔ བཀའ་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས༔ ཇི་ལྟར་ཁས་བླངས་དམ་བཅས་ཇི་བཞིན་དུ༔ བཀའ་ཡི་དམ་རྫས་གཏོར་མ་འདི་བཞེས་ལ༔ གང་བཅོལ་ཕྲིན་ལས་ཐོགས་མེད་འགྲུབ་པར་མཛོད༔ དེ་འོག་སྐལ་ལྡན་ལུང་རིག་གླིང་པ་ཉིད༔ ཕྱོགས་མེད་ལྷ་དང་བླ་མར་མོས་གུས་ཤར༔ སྔོན་སྨོན་ལས་འཕྲོའི་རྨི་ལམ་ཉམས་སྣང་དུ༔ ཨོ་རྒྱན་རྗེ་དང་རྒྱལ་ཡུམ་མཁར་ཆེན་བཟའ༔ གྲུབ་དབང་བླ་མས་དབང་བསྐུར་བྱིན་བརླབས་ནས༔ ཟབ་གསང་དགོངས་པའི་གཏེར་ལ་དབང་བསྒྱུར་ནས༔ སྐལ་ལྡན་རྣམས་ལ་སྤེལ་བར་དམ་བཅས་ཚེ༔ སྔགས་སྲུང་སྤྱི་དང་རལ་གཅིག་དུད་སོལ་མས༔ ཆོས་འདིའི་བརྒྱུད་འཛིན་བར་ཆད་སེལ་བ་དང་༔ སྒྲུབ་པའི་རྟགས་མཚན་མཆོག་ཐུན་དངོས་གྲུབ་ཀྱིས༔ དབུགས་དབྱུང་མཛད་པར་ཞལ་བཞེས་དེ་བཞིན་དུ༔ གཏོར་མ་བཞེས་ལ་ལས་བཞིའི་ཕྲིན་ལས་མཛོད༔ ཅེས་བརྗོད་གཏོར་མ་གཙང་སར་འབུལ༔ བཤལ་ཆུ་བསྟན་སྐྱོང་བདུད་རྩིར་བརླབས༔ ཨོཾ་ཨཱཿཧཱུྃ་གིས་མཆོད་སྤྲིན་སྤེལ༔ ཧཱུྃ་བྷྱོ༔ ཨོ་རྒྱན་རྒྱལ་སྲས་པདྨ་ཐོད་ཕྲེང་གིས༔ ཞལ་སློབ་ཆོས་ཀྱི་བརྒྱུད་འཛིན་གང་ཟག་དང་༔ བོད་ཡུལ་བསྟན་པའི་རྒྱལ་མཚན་འཛུགས་པའི་ཕྱིར༔ ཕྱག་རྒྱས་ཟིལ་གྱིས་མནན་ནས་དམ་བཏགས་པའི༔ མ་སྲིང་བསྟན་མ་ཆེན་མོ་བཅུ་གཉིས་རྣམས༔ དམ་རྫས་བཤལ་ཆུ་གཏོར་མ་འདི་བཞེས་ལ༔ རྟག་ཆད་མུ་སྟེགས་དྲུངས་ནས་ཕྱུང་བ་དང་༔ ཐུབ་བསྟན་དར་ཞིང་རྒྱས་ནས་འགྲོ་བ་ཀུན༔ བདེ་སྐྱིད་དཔལ་ལ་སྤྱོད་པའི་ཕྲིན་ལས་མཛོད༔ མ་མ་ཧྲིང་ཧྲིང་ཨེ་དཾ་བྷ་ལིང་ཏ་ཁ་ཁ་ཁ་ཧཱི༔ ཞེས་པས་བསྟན་གཏོར་གཙང་སར་གཤེགས༔ གཏོར་གཞོང་ཁ་སྦུབ་དེ་ཡི་འོག༔ དམ་སྲི་འགུགས་ཤིང་རི་རབ་ཀྱིས༔ ལོག་འདྲེན་ནམ་ཡང་ལྡང་མེད་བསམ༔ ཧཱུྃ་བྷྱོ༔ རྩ་གསུམ་ཡོངས་རྫོགས་མཁའ་འགྲོའི་དཀྱིལ་འཁོར་འདིར༔ ཆོས་དང་སྲིད་འབྱོར་དཔལ་ལ་སྡང་བ་ཡི༔ དམ་སྲིའི་རིགས་ཀུན་རི་རབ་འོག་ཏུ་གནོན༔ ཇི་སྲིད་བྱང་ཆུབ་སེམས་མཆོག་མ་སྐྱེས་བར༔ ནམ་ཡང་ལྡང་བ་མེད་པར་རྒྱས་གདབ་བོ༔ ཁྲོ་བོ་ཕོ་ཚོགས་གཡས་ནས་ཐབས་ཀྱི་བྲོ༔ ཁྲོ་མོ་མོ་ཚོགས་གཡོན་ནས་ཤེས་རབ་བྲོ༔ ཐབས་ཤེས་ཟུང་འཇུག་ཕྱག་རྒྱ་ཆེན་པོའི་བྲོ༔ གཟུང་འཛིན་དགྲ་བགེགས་དམ་སྲིའི་སྟེང་དུ་བརྡུང་༔ ཆོས་དབྱིངས་ཀློང་དུ་མི་འདའ་རྒྱས་བཏབ་པོ༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ དགྲ་བགེགས་དམ་སྲིའི་ལུས་ངག་ཡིད་གསུམ་སྟྭཾ་བྷ་ཡ་ནནཿནནཿ གཏོར་གཞོང་འབྲུ་སྣས་བཀང་ལ་ཚེ་འགུགས་ནི༔ ཧྲཱིཿ དབྱིངས་ཀྱི་མཁའ་འགྲོ་མ་མོ་རལ་གཅིག་མ༔ འཁོར་འདས་སྣང་སྲིད་སྐྱེ་འགྲོའི་ཚེ་ཡི་བདག༔ བདག་གི་བླ་ཚེ་ལྷ་འདྲེས་བརྐུས་དང་ཕྲོག༔ མི་དགེའི་དབང་གིས་ཟད་དང་རྦོད་གཏོང་གིས༔ རྫས་སྔགས་ཏིང་འཛིན་ནུས་པས་ཉམས་པ་རྣམས༔ མཁྱེན་བརྩེ་ནུས་པའི་སྟོབས་ཀྱིས་འདིར་ཁུག་ལ༔ འབྱུང་ལྔའི་བཅུད་བསྡུས་བདག་ཉིད་ལུས་ངག་ཡིད༔ ཚེ་བསོད་བཀྲག་མདངས་ཡར་ངོའི་ཟླ་བ་ལྟར༔ མི་ཉམས་གོང་འཕེལ་དར་ཞིང་རྒྱས་པར་མཛོད༔ ཨོཾ་གུ་རུ་དྷེ་ཝ་ཊཱཀྐི་ནི་ཨེ་ཀ་ཛ་ཊི་མ་མ་ཨ་ཡུརྫྙཱ་ན་པུཥྚིཾ་ཀུ་རུ་སྭཱ་ཧཱ༔ མདའ་དར་གཡབ་ཅིང་ཚེ་རྫས་རོལ༔ ལན་གསུམ་བརྗོད་ལ་མི་དམིགས་བཞག༔ རྗེས་ལ་མཆོད་ཅིང་བསྟོད་པ་བྱ༔ དམ་རྫས་གཏོར་མ་གནས་བཞིར་གཏུགས༔ ཧཱུྃ་ཧྲཱིཿ ལྷ་དང་བླ་མ་དུས་གསུམ་བདེ་བར་གཤེགས༔ ཀུན་གྱི་བསྐྱེད་ཡུམ་རྡོ་རྗེ་རྣལ་འབྱོར་མ༔ བསྟན་སྲུང་ཁྲོ་མོ་རཀྴ་སྲིན་པོའི་གདོང་༔ རྣལ་འབྱོར་ལུས་ལ་སྐུ་ཡི་དངོས་གྲུབ་སྩོལ༔ རྣལ་འབྱོར་ངག་ལ་གསུང་གི་དངོས་གྲུབ་སྩོལ༔ རྣལ་འབྱོར་ཡིད་ལ་ཐུགས་ཀྱི་དངོས་གྲུབ་སྩོལ༔ ནད་གདོན་ཞི་ཞིང་ཚེ་བསོད་དཔལ་འབྱོར་རྒྱས༔ སྣང་བ་དབང་འདུས་དགྲ་བགེགས་དྲག་པོས་སྒྲོལ༔ ཕྲིན་ལས་རབ་འབྱམས་རྒྱ་མཚོར་མངའ་དབང་བསྒྱུར༔ སྐུ་གསུམ་བདག་ཉིད་མཆོག་གི་དངོས་གྲུབ་སྩོལ༔ རྩ་སྔགས་ཤམ་བུར༔ ཀཱ་ཡ་ཝཀྐཱ་ཙིཏྟ་སརྦ་སིདྡྷི་ཕ་ལ་ཧཱུྃ་ཨཱཿ ཞེས་བརྗོད་གཏོར་མ་བདུད་རྩིར་མྱོང་༔ བདག་མདུན་འོད་ཞུ་ཧཱུྃ་ཡིག་མཐིང་གར་གྱུར༔ ཞབས་ཀྱུ་འ་ཆུང་ཧ་ཁོག་ཟླ་ཚེས་དང་༔ ཐིག་ལེ་ནཱ་ད་སྟོང་ཉིད་དབྱིངས་སུ་ཡལ༔ རྟག་པའི་མཐའ་བསལ་ཆད་མཐའ་ལས་གྲོལ་ཕྱིར༔ རང་ཉིད་ཡི་དམ་ལྷ་ཡི་ཏིང་འཛིན་གསལ༔ ཡང་ན་བསྒྲུབ་པའི་རྟེན་ལ་བསྟིམ་པར་བྱ༔ དེ་རྗེས་དགེ་རྩ་འགྲོ་ལ་བསྔོ་སྨོན་ནི༔ ཧཱུྃ༔ བདག་གིས་དུས་གསུམ་བསགས་པའི་དགེ་བ་ཀུན༔ གཅིག་ཏུ་བསྡུས་ཏེ་མཁའ་ཁྱབ་འགྲོ་ཀུན་གྱི༔ རྣམ་དཀར་ཚོགས་དང་ལྷན་ཅིག་ཆོས་དབྱིངས་བསྔོ༔ རྟེན་འབྲེལ་བདེན་མཐུས་རྒྱལ་བསྟན་དར་ཞིང་རྒྱས༔ བསྟན་འཛིན་ཞབས་བརྟན་འགྲོ་ཀུན་བདེ་སྐྱིད་འཕེལ༔ མཐར་ཐུག་རྣམ་ཀུན་མཆོག་ལྡན་མཁའ་འགྲོ་དང་༔ དབྱེར་མེད་དོན་གཉིས་ལྷུན་གྲུབ་རྒྱུ་རུ་བསྔོ༔ དེ་ནས་ཤིས་བརྗོད་ལག་ཏུ་མེ་ཏོག་ཐོགས༔ ཧཱུྃ་ཧྲཱིཿ ཆོས་ཀྱི་དབྱིངས་ནས་ཐུགས་རྗེའི་སྐུར་བཞེངས་པ༔ སྔགས་སྲུང་དབྱིངས་ཀྱི་ཁྲོ་མོ་རལ་གཅིག་མའི༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ རྒྱལ་བསྟན་དར་ཞིང་རྒྱས་པའི་ཤིས་པ་སྩོལ༔ གཞན་ཡང་བཀྲ་ཤིས་གང་འོས་མཐའ་རྒྱས་བྱ༔ ས་མ་ཡཱ༔ རང་བྱུང་རིག་པའི་སྒྲོམ་བུ་ནས༔ རིག་རྩལ་ཡི་གེའི་རིས་སུ་ཕབ༔ ལས་ལྡན་རྣལ་འབྱོར་གྲོགས་སུ་ཤོག༔ དམ་མེད་ལོག་ལྟ་ཅན་ལ་རྒྱ༔ བཀའ་འདི་རལ་གཅིག་མ་མོས་སྲུངས༔ གུ་ཧྱ༔ ཞེས་པའང་དགོངས་གཏེར་ཟབ་མོའི་མཛོད་ལས་ཨོ་རྒྱན་ཡབ་ཡུམ་དང་རྡོ་གྲུབ་བླ་མས་དབུགས་དབྱུང་ཐོབ་པའི་དགེ་སྦྱོང་ལུང་རིག་མིང་གིས་སྤེལ་བ་ཛ་ཡནྟུ། དགེའོ། །དགེའོ། །དགེའོ།།