སྲུང་ཟློག་གི་འདོན་སྒོམ་ཟབ་མོ་རིག་འཛིན་ཉི་གྲགས་གཏེར་བྱོན།

སྔགས་བདག་འབར་མའི་ཐུགས་ཐིག་ལས༔ སྲུང་ཟློག་གི་འདོན་སྒོམ་ཟབ་མོ་བཞུགས་སོ༔ སྔགས་བདག་འབར་མའི་སྲུང་བའི་འདོན་སྒོམ་གྱི་རིམ་པ་ནི༔ ཧཱུྃ༔ སྐད་ཅིག་མི་དམིགས་སྟོང་པའི་ངང་༔ རླུང་ནག་འཚུབ་མ་མེ་རིའི་ཀློང་༔ པདྨ་ཉི་མའི་གདན་སྟེང་དུ༔ ཐུགས་སྲོག་མ་ཡིག་དཀར་པོ་ལས༔ འོད་ཟེར་འཕྲོས་པས་རྒྱལ་བ་མཆོད༔ བྱིན་རླབས་ཚུར་འདུས་འཁོར་འདས་ཀྱི༔ དྲེགས་ཚོགས་མ་ལུས་ཀུན་ལ་ཕོག༔ ཞེ་སྡང་ཞི་ཞིང་ནུས་མཐུ་བསྡུས༔ འོད་ཀྱི་རྣམ་པར་མ་ལ་ཐིམ༔ མ་ཡིག་གནས་འགྱུར་དྲན་རྫོགས་སུ༔ དཔལ་གྱི་ལྷ་མོ་དམར་སེར་མདོག༔ ཞལ་གཅིག་ཕྱག་གཉིས་འཛུམ་མདངས་ཅན༔ ཞབས་གཉིས་ཕྱེད་སྐྱིལ་འགྱིང་བག་བཞུགས༔ དར་གྱི་ན་བཟའ་རིན་ཆེན་བརྒྱན༔ གཡས་པས་ཁ་ཊཱཾ་བུམ་པའི་དབྱིབས༔ འོད་ཟེར་རྣམ་ལྔའི་གུར་ཁང་ནང་༔ བསྲུང་བྱ་ཐམས་ཅད་ཚུད་པར་བསྒོམ༔ གཡོན་གྱི་བྷནྡྷ་བདུད་རྩི་ལས༔ བཛྲ་རཏྣ་པདྨ་དང༔ རལ་གྲི་འཁོར་ལོའི་གུར་ཁང་འབར༔ རིམ་པ་ལྔ་ཡི་དྲྭ་མིག་ཏུ༔ ལྷ་མོ་དཀར་མོ་གྲངས་མེད་གཏམས༔ རང་གི་ཞལ་ནས་སྔགས་བཟླས་པས༔ འཁོར་འདས་ཐམས་ཅད་སྔགས་སྒྲ་སྒྲོག༔ ནང་དུ་ཞལ་གཟིགས་སྲུང་བར་བསྒོམས༔ ཨོཾ་རུ་རུ་རོ་རུ་བི་ཏི་སྟ་བ་ཏ་ཏོ་སི་མེ་ཙ་པ་ལ་ཨ་ཤུག་མེ་མ་མ་ཏྲག་རཀྴ༔ ཨོཾ་རུ་རུ་རོ་རུ་བེ་ཏོ་ཧུ་ཏ༔ཥྚ་ཏོ་སི་མེ་ཙ་པ་ལ་ཨ་ཤུག་མེ་མ་མ་ཏྲག་རཀྴ་རུ་ལུ་རུ་ལུ་རེ་མ་ཏི་རུ་ཏི་སྙིང་ཁ་རཀྨོ་ཙ་ཙ༔ མོ་མུམ་ཛ་ཛཿཧཱུྃ་བྷྱོ་ཛ་ཛ༔ ཨོཾ་བཛྲ་དྷེ་ཝི་ཀཱ་ལི་རཀྵྱ་རུ་ཏི་ཧྲཱིཿ བདག་ཅག་འཁོར་དང་བཅས་པ་སྲུངས་ཤིག་རཀྵྱ་རཀྵྱ་སྭཱ་ཧཱ༔ རྒྱས་བསྡུས་སྐབས་ལྟར་བཟླས༔ བཛྲ་པུཥྤེ་སོགས༔ ཧཱུྃ་བྷྱོ༔ ཁམས་གསུམ་དབང་བསྒྱུར་དཔལ་ལྡན་མ་སོགས། གཙོ་ལ་ཕྱག་འཚལ་བསྟོད༔ བསྲུང་བའི་གུར་དང་སྔགས་ཕྲེང་ལྷ་ཚོགས་ལས༔ འོད་དང་གཟི་བརྗིད་ཕྱོགས་བཅུར་འབར་བ་ཡིས༔ བྱད་དང་རྦོད་གཏོང་གནོད་བྱེད་ཐམས་ཅད་ཟློག༔ ཚེ་དང་བསོད་ནམས་ཡར་ངོ་ལྟར་རྒྱས་གྱུར༔ པར་བསམ༔

སྔགས་བདག་འབར་མའི་བཟློག་པའི་འདོན་བསྒོམ་ནི༔ ཧཱུྃ༔ ཨེ་མཐིང་ལྕགས་ཁང་འབར་བའི་ནང་༔ དགྲ་བགེགས་བྱད་མ་ལྷ་སྲུང་རྣམས༔ དབང་དུ་བསྡུས་ཏེ་ཟིལ་གྱིས་མནན༔ ལྷ་མོ་ཆེན་མོ་སྔགས་སྲུང་མས༔ སྤྲུལ་པ་ནད་མཚོན་དུག་ཆར་ཕབ༔ ལྕགས་ཁང་དྲེལ་རྟའི་ཞབས་འོག་ཏུ༔ དགྲ་བགེགས་བྱད་མ་ནོན་པར་མནན༔ ཁོ་ཡི་ལྷ་སྲུང་མ་བཟོད་འཁྲོས༔ བྱད་མ་རང་གཤེད་རང་ལ་ཕབ༔ མ་མོའི་སྤྲུལ་པ་དྲེགས་ཚོགས་ཀྱིས༔ རྡུལ་ཕྲན་བཞིན་དུ་བརླག་པར་གྱུར༔ བར་བསམ༔ མ་བྷྱོ༔མ་མ་རུ་ལུ་རུ་ལུ་ཏྲག་རཀྴ་བྷྱོ་རེ་མ་ཏི་དགྲ་བགེགས་བྱད་མ་ལྷ་སྲུང་དང་བཅས་པ་མཱ་ར་ཡ་ཧཱུྃ་ཛ་བྷྱོ་ཟློག༔ བྱད་ཕུར་གཏད་ཁྲམ་སྟོན་པའི་བན་བོན་བྱད་མ་དགྲ་བགེགས་ཐམས་ཅད་ཀྱི་བླ་སྲོག་རྣམ་པར་ཤེས་པ་སོད་ཅིག་ཆོད་ཅིག་གཏུབས་ཤིག་ས་མ་ཡཱ་བྷྱོ་བྷྱོ་ཟློག་ཟློག་མཱ་ར་ཡ་ཧཱུྃ་ཕཊ༔ ཅི་མང་བཟླས་ཤིང་༔ ཐུན་སྐབས་སུ་མཆོད་བསྟོད་འབུལ་བ་ནི༔ ཨོཾ་ཨཱཿཧཱུྃ་བཛྲ་པུཥྤེ་སོགས་ཤཔྟ་པཱུ་ཛ་ཧོ༔ མ་ཧཱ་སརྦ་པཉྩ་ཨ་མྲྀ་ཏ་མ་ཧཱ་བྷ་ལིང་ཏ་མ་ཧཱ་རཀྟ་སརྦ་པུ་ཙ་ས་མ་ཡཱ་ཁཱ་ཧི་ཁཱ་ཧི༔ མ་ཧཱ་མཾ་ས་ཙིཏྟ་བ་སུ་ཏ་ཀོ་རོ་ཙ་ན་ཀེཾ་ནི་རི་ཏི་ཁ་ཁ་ཁཱ་ཧི་ཁཱ་ཧི༔ ཧཱུྃ་བྷྱོ༔ ཁམས་གསུམ་དབང་བསྒྱུར་དཔལ་ལྡན་མ༔ སྲིད་གསུམ་ཟིལ་གནོན་རལ་གཅིག་མ༔ མ་བདུད་ཆེན་མོ་རེ་མ་ཏི༔ མཁའ་འགྲོའི་གཙོ་ལ་ཕྱག་འཚལ་བསྟོད༔ འདོད་ཁམས་ལྷ་དབང་དགྱེས་སྡེ་མོ༔ ནཱ་ག་རཀྴ་ཀླུ་ཡི་ལྕམ༔ བདུད་མོ་ནག་མོའི་ཕྱག་བརྙན་མོ༔ སྔགས་ཀྱི་སྲུང་མར་ཕྱག་འཚལ་བསྟོད༔ མ་མོ་མཁའ་འགྲོའི་ལས་མཁན་མོ༔ བསྟན་པ་ཀུན་གྱི་ཡང་རྗེ་མོ༔ དུར་ཁྲོད་དྷཱཀྐཱིའི་གཙོ་མོ་སྟེ༔ ཤ་ཟ་ཀཱ་ལིར་ཕྱག་འཚལ་བསྟོད༔ འཆི་བདག་ལས་བྱེད་དྲེགས་པ་བདུན༔ སོ་སོའི་བྲན་གཡོག་བཀའ་ཉན་དང་༔ ནག་མོ་འབུམ་སྡེ་བྱེ་བའི་ཚོགས༔ འཁོར་དང་བཅས་ལ་བསྟོད་པར་བགྱི༔ ཞེས་བསྟོད་དོ༔ ཧཱུྃ་ཧཱུྃ་ཧཱུྃ༔ ཆོས་སྐུ་མི་བསྐྱོད་རྡོ་རྗེའི་ལྷ་ཚོགས་རྣམས་ཀྱི་བཀའ་བདེན་པ་དང་༔ ལོངས་སྐུ་དཔལ་ཆེན་ཧེ་རུ་ཀའི་ལྷ་ཚོགས་རྣམས་ཀྱི་བཀའ་བདེན་པ་དང་༔ སྤྲུལ་སྐུ་སངས་རྒྱས་བཅོམ་ལྡན་འདས་ཀྱི་བཀའ་བདེན་པ་དང་༔ རིགས་གསུམ་མགོན་པོ་ལ་སོགས་བྱང་ཆུབ་སེམས་དཔའ་རྣམས་ཀྱི་བཀའ་བདེན་པ་དང་༔ སློབ་དཔོན་པདྨ་བཛྲ་ལ་སོགས་གསང་སྔགས་འཆང་བའི་རིག་འཛིན་གྲུབ་ཐོབ་རྣམས་ཀྱི་བཀའ་བདེན་པ་དང་༔ ཡི་དམ་རྩ་གསུམ་ལྷ་ཚོགས་རྣམས་ཀྱི་བཀའ་བདེན་པ་དང་༔ དཔལ་ལྡན་ལྷ་མོ་འབུམ་ཕྲག་ཡངས་པའི་མཁའ་འགྲོ་མ་རྣམས་ཀྱི་བཀའ་བདེན་པ་དང་༔ བ་ལམ་དྲེལ་སྣ་མ༔ སྟག་སྨན་གཟེར་འདེབས་མ༔ ཁྲི་སྨན་སི་ལི་མ༔ རྡོ་རྗེ་བ་ལམ་མ༔ ཚངས་པ་དུང་གི་ཐོར་གཙུག༔ གཤིན་རྗེ་བྷེ་ཝ་ས་ཏ༔ བདུད་པོ་བྱེ་བ་དགུ་རིང་༔ དཔལ་མགོན་དྲེགས་པ་ཕྱི་ནང་གསང་བའི་ལྷ་སྲིན་རང་རང་སྤྲུལ་འཁོར་དང་བཅས་པའི་བཀའ་ཡི་བདེན་པའི་མཐུ་ལ་བརྟེན་ནས༔ བདག་ཅག་དཔོན་སློབ་ཡོན་མཆོད་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་གཟུགས་ཅན་གཟུགས་མེད༔ བན་བོན་སྡེ་བརྒྱད་སྔོན་ལས་འཕྲལ་རྐྱེན་ངན་པ༔ ཆགས་ཆེ་ཉམ་ང་༔ བྱད་མ་རྦོད་གཏོང་༔ ནད་རིགས་བཞི་བརྒྱ་རྩ་བཞི༔ གློ་བུར་བདུན་བརྒྱ་ཉི་ཤུ༔ རྐྱེན་ངན་ཉི་ཁྲི་ཆིག་སྟོང་༔ ཡེ་འདྲོག་སུམ་བརྒྱ་དྲུག་ཅུ༔ བགེགས་རིགས་སྟོང་ཕྲག་བརྒྱད་ཅུ༔ བྱིས་པའི་གདོན་ཆེན་བཅོ་ལྔ༔ ལྟས་ངན་བརྒྱད་ཅུ་རྩ་གཅིག༔ རྒྱ་འདྲེ་འགོང་པོའི་གནོད་པ༔ ལོ་ཟླ་ཞག་དུས་ཀྱི་སྐག་ངན༔ ཕོ་གདོན་མོ་གདོན༔ གྲི་ཕོ་གྲི་མོ་ཤི་འདྲེ་གསོན་འདྲེ༔ དམ་སྲི་དམ་འགོང་༔ ཟ་འདྲེ་ཤི་གཤེད༔ མི་ནད་ཕྱུགས་ནད༔ ཡམས་རིམས་ངན་པ་ལ་སོགས་པ་མི་མཐུན་པའི་ཕྱོགས་ཐམས་ཅད་ཕྱིར་བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ བརླག་པར་གྱུར་ཅིག༔ རབ་ཏུ་ཞི་བར་གྱུར་ཅིག༔ ཐལ་མོ་བརྡབ་པས་དགྲ་དང་བགེགས༔ ཁྱད་པར་བྱད་མ་རྦོད་གཏོང་རྣམས༔ མེ་ལྕེ་ཁ་ཡི་སྦྲང་བུ་ལྟར༔ སྐད་ཅིག་ཉིད་ལ་བརླག་པར་གྱུར༔ པར་བསྒོམ༔ ཉ་སྟོང་དུས་ཆེན་ལ་སོགས་ལ༔ ཐུན་བཟུང་གནད་དུ་བསྣུན་པར་བྱ༔ དམར་ཐག་དུས་སམ་སྲོད་དྲག་པོར༔ རྒྱུན་དུ་མ་ཆག་བརྩོན་གྱུར་ན༔ ཕས་ཀྱི་བྱད་མ་རྦོད་གཏོང་རྣམས༔ བཟློག་འགྱུར་འདི་ལ་ཐེ་ཚོམ་མེད༔ ལྔ་བརྒྱ་དུས་ཀྱི་ཐ་མ་ལ༔ ལས་འཕྲོ་ཅན་དང་འདི་འཕྲད་ནས༔ བར་ཆད་ཚོགས་ལས་རྒྱལ་བར་ཤོག༔ སྲུང་མ་རྣམས་ལ་བཅོལ་ལོ་རྒྱ༔ དམ་མེད་འགྲོ་ལ་ཨ་ཐཾ་རྒྱ༔ ས་མ་ཡཱ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ ས་མ་ཡཱ༔ རྒྱ་རྒྱ་རྒྱ༔ ཁམས་པ་ཉི་མ་གྲགས་པས་གནས་མཆོག་ཧ་ཙོ་ནས་གདན་དྲངས་པའོ༔