རལ་གཅིག་ཕྱི་སྒྲུབ་མ་མོ་སྨན་བཙུན་ལྟར་སྒྲུབ་པའི་རིམ་པ།

དག་སྣང་མཚོ་རྒྱལ་དགོངས་པའི་གསང་མཛོད་ལས༔ ཕྱི་སྒྲུབ་མ་མོ་སྨན་བཙུན་ལྟར་སྒྲུབ་པའི་རིམ་པ་བཞུགས༔

དབྱིངས་ཀྱི་མཁའ་འགྲོའི་སྐུ་ལ་འདུད༔ མ་འོངས་དུས་ཀྱི་རྣལ་འབྱོར་པས༔ པྲ་དང་མངོན་ཤེས་གསལ་བའི་ཕྱིར༔ མ་མོ་སྨན་བཙུན་ལྟར་སྒྲུབ་ན༔ རི་བོ་སྨན་མོའི་ནུ་མ་ལྟར༔ སྣུམ་བག་ཆགས་པའི་ས་དེ་རུ༔ དུས་ཚེས་བཟང་པོའི་འཕྲོད་སྦྱོར་ལ༔ མཎྜལ་སྟེང་དུ་འབྲུ་ཚོམ་བཀོད༔ དུང་གི་ཤྭ་དང་ས་ལེ་སྦྲམ༔ གཡུ་བྱང་མིག་མེད་མགྲོན་བུ་རྣམས༔ རྟེན་བཀོད་མཐའ་ནས་མཆོད་པས་བསྐོར༔ དྲི་མེད་དར་དཀར་གུར་དུ་ཕུབ༔ ཤིན་ཏུ་བསང་ཞིང་སྤོས་དུད་གཏོང་༔ རྒྱུན་གཏོར་དུས་སུ་ཆག་མེད་བྱ༔ ས་མ་ཡཱ༔ རང་ཉིད་རལ་གཅིག་བསྙེན་པ་བསྐྱལ༔ མཆོད་བསྟོད་མདུན་གྱི་རྟེན་རྫས་རྣམས༔ སྭ་བྷ་ཝ་ཡིས་སྔགས་ཀྱིས་སྦྱངས༔ སྟོང་པའི་ངང་ལས་རང་མདུན་དུ༔ ནེའུ་སེང་སྤང་ལྗོངས་ཆུ་མིག་དང་༔ མཚོ་རྫིང་གསང་རི་ལྷུན་ཆགས་སར༔ རིན་ཆེན་གཡུ་ཡི་ཁང་བཟང་ལ༔ པདྨ་རཱ་གའི་བ་གམ་དང་༔ དྲི་མེད་ཤེལ་གྱི་ཐེམ་སྐས་ཅན༔ དབུས་སུ་འདབ་ལྔ་འོད་ལྔ་འཁྲིགས༔ དེ་དབུས་རིན་ཆེན་གསེར་གྱི་ཁྲི༔ བཻཌཱུར་བྱུ་རུ་གཡུ་སྔོན་གྱི༔ ཕྲ་ཚོམ་དར་གྱི་ལྷུབ་འབོལ་སྟེང་༔ མ་མོ་རལ་གཅིག་གསུང་གི་སྤྲུལ༔ སྨན་བཙུན་ཇོ་མོ་ཚེ་རིང་མ༔ དཀར་དམར་ལང་ཚོ་གཞོན་ཉམས་འཛུམ༔ ཞལ་གཅིག་ཕྱག་གཉིས་གཡས་པ་ཡིས༔ དུང་ཤྭ་བསྒྲིལ་ཞིང་སྒྲུབ་སྔགས་གསུངས༔ གཡོན་པས་མདའ་དར་སྣ་ལྔ་གཡབ༔ དར་ཐོད་ནོར་བུས་མགུལ་བྲང་བརྒྱན༔ ཕྱེད་དཀྱིལ་གྱིས་བཞུགས་དབུ་སྐྲ་ནི༔ གནག་སྣུམ་མུ་ཏིག་ཟར་བུ་འཕྱངས༔ མདུན་དུ་པྲ་ལྷ་མཐིང་བཟང་མ༔ གཡས་སུ་ཅོད་པཎ་མགྲིན་བཟང་མ༔རྒྱབ་ཏུ་མི་གཡོ་གླང་བཟང་མ༔ གཡོན་དུ་གཏད་དཀར་འགྲོ་བཟང་མ༔ ཀུན་ཀྱང་གཡས་པས་ཤྭ་བསྒྲིལ་ཞིང་༔ གཡོན་རྣམས་ནོར་བུའི་གཞོང་པ་ཐོགས༔ རྒྱན་ཆ་གཙོ་དང་མཚུངས་པར་བསྐྱེད༔ རང་ཉིད་ཁྲོ་མོའི་ཐུགས་ཀ་ནས༔ འོད་ཟེར་དཀར་པོ་སྤྲིན་ལྟར་འཁྲིགས༔ སྔགས་ཀྱི་ཟེར་ཕྲེང་ལྕགས་ཀྱུ་ལྟར༔ འཕྲོས་པས་གངས་ཅན་བོད་ཀྱི་ལྗོངས༔ སྤྱི་དང་ཤེལ་གྱི་ཟུར་ཕུད་ནས༔ སྨན་བཙུན་ཇོ་མོ་ཚེ་རིང་མ༔ སྤྲུལ་པ་པྲ་འབེབས་སྨན་མོ་འབུམ༔ གཙོ་ཡིས་འབངས་ལ་བཀའ་བསྒོས་ལྟར༔ ཐོགས་པ་མེད་པར་སྤྱན་དྲངས་གྱུར༔ སྤོས་དང་རོལ་མོ་གླིང་བུས་འབོད༔ ཧཱུྃ༔ གསང་སྔགས་སྲུང་མ་ཨེ་ཀ་ཛ༔ ཕྱི་ལྟར་སྨན་བཙུན་སྐུར་སྤྲུལ་བ༔ ཇོ་མོ་ཚེ་རིང་མཆེད་ལྔ་རྣམས༔ སྔོན་ཚེ་པདྨ་ཐོད་ཕྲེང་དང་༔ མི་ལ་བཞད་པ་རྡོ་རྗེ་ཡི༔ སྤྱན་སྔར་ཇི་ལྟར་དམ་བཅས་བཞིན༔ རྣལ་འབྱོར་མངོན་ཤེས་པྲ་འབེབས་ཕྱིར༔ ཐོགས་པ་མེད་པར་ད་ཚུར་བྱོན༔ ཏྲག་རཀྵ་བཛྲ་པྲ་མོ་ཧ་པཉྩ་ཛྙཱ་ན་ས་མ་ཡཱ་ཛ་ཛཿ དེ་ནས་བརྟན་པར་བཞུགས་ཕྱག་ནི༔ ཧཱུྃ༔ རྒྱལ་ཀུན་ཡེ་ཤེས་རྣམ་ལྔའི་འཕྲུལ༔ མ་རིག་མུན་སེལ་པྲ་འབེབས་ལྷ༔ སྨན་བཙུན་མཆེད་ལྔ་རྫས་ལ་བཞུགས༔ དམ་ཚིག་དབང་གིས་གུས་ཕྱག་འཚལ༔ དེ་ནས་མཆོད་འབུལ་བསྐང་བཤགས་ནི༔ ཧཱུྃ༔ སྟོང་ཉིད་ངང་ལས་རིག་པའི་འཕྲུལ༔ ཏིང་འཛིན་ནམ་མཁའ་མཛོད་ཀྱི་གཏེར༔ མི་ཟད་ཐུགས་དམ་བསྐང་བའི་རྫས༔ མེ་ཏོག་སྤོས་སྒྲོན་དྲི་ལྡན་ཆབ༔ དཀར་མངར་བཤོས་དང་གླིང་བུ་དང་༔ སིལ་སྙན་ཏིང་ཤག་རོལ་མོའི་སྒྲས༔ མཆོད་དོ་སྨན་བཙུན་ཚེ་རིང་མ༔ དེ་ཡི་མཆེད་དུ་གྱུར་པ་ཡི༔ མཐིང་གི་ཞལ་བཟང་མགྲིན་བཟང་མ༔ མི་གཡོ་གླང་བཟང་གཏད་དཀར་མ༔ སྨན་བཙུན་འབུམ་གྱི་བྲན་དང་བཅས༔ ཁྱེད་རྣམས་ཐུགས་དམ་གཉན་པོ་བསྐང་༔ གཞན་ཡང་སྨན་རཀ་གཏོར་མ་དང་༔ ཕྱེ་མར་འོ་ཞོ་ཇ་ཆང་སྐྱེམས༔ དར་གོས་རྒྱན་ཕྲེང་ཅང་ཤེས་རྟ༔ ཤ་རྐྱང་མ་ཧེ་འདོད་འཇོ་བ༔ སྤོས་ཀྱི་གླང་པོ་རྨ་བྱ་དང་༔ ནེ་ཙོ་སྲོག་ཆགས་ཡིད་འོང་རིགས༔ དུང་ཤྭ་གཡུ་བྱང་ས་ལེ་སྦྲམ༔ སྣང་གསལ་མེ་ལོང་དར་གྱི་གུར༔ མདའ་དར་ལ་སོགས་བསྐང་རྟེན་རྫས༔ མ་ཚང་མེད་པས་ཐུགས་དམ་བསྐང་༔ བདག་གི་སྒོ་གསུམ་ཉེས་ཚོགས་དང་༔ ཐེ་ཚོམ་རྫུན་དང་གཡོ་སྒྱུ་སོགས༔ མངོན་ཤེས་འགོག་པའི་ཉེས་སྐྱོན་བཤགས༔ དག་ནས་ཚངས་པའི་དངོས་གྲུབ་སྩོལ༔ ཚིག་འདིས་གུས་པས་སེམས་ཀྱིས་བསྟོད༔ ཧཱུྃ་ཧྲཱིཿ གདོད་ནས་རྣམ་དག་ཀུན་བཟང་མོའི༔ རང་རྩལ་མ་མོ་ཆེན་མོ་ནི༔ ཕྱི་ལྟར་སྨན་བཙུན་སྒྱུ་མའི་གཟུགས༔ རྣམ་འགྱུར་ཅིར་ཡང་འཆར་ལ་བསྟོད༔ བདག་ལ་མངོན་ཤེས་པྲ་འབེབས་ཀྱི༔ དངོས་གྲུབ་ཐོགས་པ་མེད་པར་སྩོལ༔ སྔགས་བཟླས་དམིགས་པ་འདི་བཞིན་ནོ༔ རང་ཉིད་རལ་གཅིག་ཐུགས་ཀ་ནས༔ འོད་འཕྲོས་སྨན་བཙུན་གཙོ་འཁོར་ལྔའི༔ ཐུགས་ཀར་ཟླ་སྟེང་བམ་གྱི་མཐར༔ སྔགས་ཀྱིས་གཡོན་བསྐོར་ལ་ཕོག་པས༔ ལྷ་དང་དྲང་སྲོང་མངོན་ཤེས་ཅན༔ ཀུན་ཀྱི་ནུས་མཐུ་གཅིག་ཏུ་བསྡུས༔ རང་ལ་ཕུལ་བའི་མངོན་ཤེས་ཀྱིས༔ སྲིད་གསུམ་ས་ལེར་མཐོང་བར་བསམ༔ ཨོཾ་བཛྲ་རཀྨོ་ཨེ་ཀ་ཛ་ཊཱི་པྲ་མོ་ཧཱ༔ ཙིཏྟ་ཧྲཱིང་ཛཿ སྔགས་དེ་འབུམ་གྱིས་རྟགས་མཐོང་འགྱུར༔ རྟགས་ནི་བུད་མེད་བཟང་མོ་ཡིས༔ ཟས་བྱིན་གཏམ་སྨྲ་དད་གུས་ལགས༔ སྨོན་ལམ་འགྲུབ་པའི་རྟགས་སུ་ངེས༔ ས་མ་ཡཱ༔ སྐབས་སུ་ཚོགས་དང་གཏོར་མར་བརྩོན༔ ཀ་ར་ཀ་ར་དང་ར་དང་ར་ཐི་སེ་ཐི་སེ་ཙཀྵུ་པྲ་བེ་ཤ་ཡ་ཕཊ་སྭཱ་ཧཱ༔ དེ་ནས་མོ་རུ་གདབ་པ་ནི༔ གོང་བསྙེན་སྔོན་སོང་སྔགས་འདི་བཟླ༔ ཨོཾ་བཛྲ་ཏྲག་རཀྨོ་པྲ་མོ་ཧཱ༔ ཙིཏྟ་ཧྲཱིང་ཛཿ ལེགས་ཉེས་གསལ་བར་ཕོབ་ཅིག༔ ཅེས་པ་ཁྲི་གཅིག་སྨྲ་བཅད་བཟླ༔ མཎྜལ་སྟེང་དུ་དུང་ཤྭ་བསྒྲིལ༔ འདོད་དོན་གསལ་བར་སྨྲོས་ཤིག་ཅེས༔ བདེན་པ་བརྡར་ནས་ཤྭ་མིག་བརྟགས༔ ལྔ་བབ་ཇོ་མོ་ཚེ་རིང་མ༔ གཙོ་འཁོར་འཛོམས་པའི་གཞི་ཕྱྭ་ལ༔ བདེ་སྐྱིད་ཕུན་སུམ་ཚོགས་པར་འགྱུར༔ མགྲོན་ཕྱྭ་ཅུང་ཟད་ཕྱི་དལ་ངོ་༔ ནད་ཕྱྭ་མྱུར་དུ་མ་སོས་ན༔ རིམ་གྲོ་ཆེན་པོས་བླུས་ཙམ་ཡིན༔ དེ་མིན་གང་ལ་བཏབ་ཀྱང་བཟང་༔ ཆོས་ཕྱྭར་སྟོན་འཁོར་དབུ་འཕང་མཐོ༔ བཞི་བབ་གླང་བཟང་མ་ཡིན་ཏེ༔ གཞི་ཕྱྭར་ཕྱོགས་བཞི་ནད་དགྲ་ལྡང་༔ ལ་འུར་རིམ་གྲོ་བཟློག་པར་འབད༔ མགྲོན་ཕྱྭ་འགྱོད་པ་དང་བཅས་འོང་༔ ནད་པ་འདུ་བ་བཞི་ཀ་བསྡོངས༔ སྨན་རྒྱལ་ལ་སོགས་རིམ་གྲོ་དང་༔ རྟེན་བཞེངས་སྤོང་དག་ལུས་མིང་བརྗེ༔ ཆོས་ཕྱྭར་ཆོས་ཕུགས་རླུང་གིས་ཁྱེར༔ གསུམ་བབ་གཡང་ལྷ་གཏད་དཀར་མ༔ གཞི་ཕྱྭ་གཡང་འབོད་གཡང་རྟེན་འཛུགས༔ རྒྱལ་བའི་གསུང་རབ་བཞེངས་དང་སྒྲོགས༔ མགྲོན་ཕྱྭར་ཟས་ནོར་རྙེད་དེ་འོང་༔ ནད་ཕྱྭར་འོད་ཅན་གཡང་ཆགས་རྫས༔ དེ་རྗེས་རྒྱལ་བསེན་འབྲང་ཞེས་བཤད༔ ཆོས་ཕྱྭར་ཆོས་པ་ནོར་ཕྱིར་འབྲང་༔ ལོངས་སྤྱོད་ཕུན་སུམ་ཚོགས་པའི་མོ༔ གཉིས་བབ་མཐིང་གི་ཞལ་བཟང་མ༔ བུད་མེད་དཔལ་ཅན་མོ་ལ་བཟང་༔ གཞི་ཕྱྭར་འཕྱོན་མའི་གཏམ་བཞིན་དུ༔ མ་ངེས་བདེ་སྡུག་རེས་མོས་བྱེད༔ མགྲོན་ཕྱྭར་ཐག་ཉེར་སླེབས་པའི་ངོ་༔ ནད་ཕྱྭར་བུད་མེད་འདྲེ་མོས་གནོད༔ ཞག་བདུན་ཚུན་དུ་གེགས་ཆེན་ཡོད༔ པད་འབྱུང་སྒྲོལ་མར་གསོལ་བ་ཐོབ༔ ཆོས་ཕྱྭར་བུད་མེད་བསླུ་བྲིད་ངོ་༔ གཅིག་བབ་ཅོད་པཎ་མགྲིན་བཟང་མ༔ གཞི་ཕྱྭར་ཁྱིམ་གཅིག་མི་གཅིག་སྡོད༔ ནང་དུ་རྫས་མེད་སྟོང་པའི་ངོ་༔ ཉ་གྲོག་གསོ་ཞིང་འབུམ་གསུམ་ཀློག༔ དཀོན་མཆོག་སྐྱབས་འགྲོ་གཡང་ལྷ་སྒྲུབ༔ མགྲོན་ཕྱྭར་འགྱོད་མེད་དལ་དུ་སླེབ༔ ནད་ཕྱྭར་ཚེ་སྒྲུབ་འཆི་བསླུ་སྒྲུབ༔ སིདྡྷི་མ་ཎི་འུར་འདོན་དགོས༔ ད་རེས་རིམ་གྲོས་བསླུས་པ་ཙམ༔ ཆོས་ཕྱྭར་གཅིག་པུར་སྒྲུབ་ཚུགས་ཟིན༔ དེ་ལྟར་ཕྱི་སྒྲུབ་ཟབ་མོ་འདིས༔ མངོན་ཤེས་གསལ་ཞིང་སྙན་གྲགས་ཐོབ༔ ཕྱི་རབས་དོན་དུ་ཡི་གེར་བྲིས༔ དུས་བབ་ལས་འཕྲོ་ཅན་ལ་གཏོད༔ ས་མ་ཡཱ༔ རྒྱ་རྒྱ་རྒྱ༔ སྐལ་ལྡན་ལུང་རིག་གླིང་པའི་གཏེར་མའོ༔