རལ་གཅིག་གསང་སྒྲུབ་མཁའ་འགྲོའི་ཐུགས་བཅུད།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ རལ་གཅིག་གསང་སྒྲུབ་མཁའ་འགྲོའི་ཐུགས་བཅུད་བཞུགས༔
རང་བྱུང་དབྱིངས་ཀྱི་རལ་པ་གཅིག༔ རྩ་གསུམ་ཡོངས་རྫོགས་ལྷ་ལ་འདུད༔ གསང་བ་མཁའ་འགྲོ་སྡེ་ལྔ་རུ༔ སྒྲུབ་ཐབས་ཟབ་མོ་འདི་རུ་བསྟན༔ ས་མ་ཡཱ༔ དེ་ཡང་སྦྱོར་དངོས་རྗེས་གསུམ་ལས༔ དང་པོ་གནས་དུས་ཕུན་ཚོགས་སར༔ དགྲ་འདྲེའི་གཞན་དབང་མ་གྱུར་བཞིན༔ དཀྱིལ་འཁོར་འབྲུ་ཚོམ་ལྔ་རུ་བཀོད༔ དབུས་སུ་ཟན་བཤོས་གྲི་གུག་དབྱིབས༔ ཆོས་འབྱུང་གདན་བཀོད་རང་འདྲ་བའི༔ འཁོར་བཞི་དཔལ་བཤོས་མེ་རིས་བརྒྱན༔ སྨན་རཀ་བཤམས་ཤིང་དར་མཐིང་གུར༔ མཁའ་འགྲོ་སྡེ་ལྔའི་སྐུ་ཡང་གཟུགས༔ ཉེར་སྤྱོད་རྣམ་ལྔས་མཐའ་ནས་བསྐོར༔ གྷ་ན་ཚོགས་ཀྱི་ཡོ་བྱད་དང་༔ གསལ་བའི་ཞུན་མེ་བདུག་སྤོས་སོགས༔ མ་ཚང་མེད་པར་འདུ་བྱས་ནས༔ རྣལ་འབྱོར་བདེ་བའི་སྟན་ལ་འདུག༔ ས་མ་ཡཱ༔ དངོས་གཞི་སྐྱབས་སེམས་ཡན་ལག་བདུན༔ སྔོན་འགྲོའི་ཆོས་རྣམས་གཞན་ལྟར་ལ༔ དྲན་རིག་ལྷ་རུ་འདི་བཞིན་བསྒོམ༔ ཨཱཿ འདི་ལྟར་འཁོར་འདས་སྣང་བའི་ཆོས༔ མ་སྐྱེས་བློ་འདས་སྟོང་པའི་ངང་༔ ཕྱི་སྣོད་མཁའ་འགྲོའི་ཞིང་གི་དབུས༔ དུར་ཁྲོད་གཞལ་ཡས་མཚན་ཉིད་རྫོགས༔ དབུས་སུ་རྩིབས་བཞི་གྲུ་གསུམ་མཐིང་༔ པད་ཉི་བཾ་གྱི་གདན་ཁྲི་ལ༔ རང་སེམས་བམ་མཐིང་ཨ་ཡིག་མཚན༔ ཡོངས་གྱུར་རྡོ་རྗེ་ཕག་མོ་མཐིང་༔ རྩིབས་བཞི་མདུན་ནས་གཡས་བསྐོར་ལ༔ ཧ་རི་ནི་ས་ལས་བཞིའི་མདོག༔ ཡོངས་གྱུར་པད་ཉི་བཾ་གྱི་ཁྲིར༔ རྡོ་རྗེ་རིན་ཆེན་པདྨ་ལས༔ རིགས་བཞི་མཁའ་འགྲོ་ཕྱོགས་མཚོན་མདངས༔ ཀུན་ཀྱང་ཞལ་གཅིག་ཁྲོ་ཆགས་ཉམས༔ གཙུག་ཏུ་ཕག་ཞལ་ལས་མདོག་ངུར༔ ཐོད་སྐམ་དབུ་རྒྱན་དབུ་སྐྲ་ཁྲོལ༔ རུས་རྒྱན་གཅེར་བུ་གར་སྟབས་འགྱིང་༔ ཡེ་ཤེས་མེ་ཡི་ཀློང་དུ་བསྐྱེད༔ མཐའ་བསྐོར་འབུམ་ཕྲག་མཁའ་འགྲོས་བསྐོར༔ སྒོ་བཞིར་ཁྭ་གདོང་ཕག་གདོང་དང་༔ ཁྱི་གདོང་སྤྱང་གདོང་དཀར་སེར་དམར༔ ལྗང་ཁུ་ལྕགས་ཀྱུ་ཞགས་སྒྲོག་དྲིལ༔ གཙོ་འཁོར་གནས་གསུམ་ཨོཾ་ཨཱཿཧཱུྃ༔ དཀར་དམར་མཐིང་ལས་རང་འོད་འཕྲོ༔ སྐུ་གསུམ་མཁའ་འགྲོའི་ཞིང་ཁམས་ནས༔ ཡེ་ཤེས་སེམས་དཔའ་སྤྱན་དྲངས་གྱུར༔ དེ་ནས་སྤོས་རོལ་དབྱངས་དང་བཅས༔ ཧཱུྃ་བྷྱོ༔ ཆོས་དབྱིངས་བདེ་སྟོང་ཡེ་ཤེས་ཀློང་༔ བུདྡྷ་མཁའ་འགྲོ་འཁོར་བཅས་གཤེགས༔ མེ་ལོང་གསལ་བའི་ཡེ་ཤེས་ཀློང་༔ རྡོ་རྗེ་མཁའ་འགྲོ་འཁོར་བཅས་གཤེགས༔ རང་བཞིན་མཉམ་པའི་ཡེ་ཤེས་ཀློང་༔ རཏྣ་མཁའ་འགྲོ་འཁོར་བཅས་གཤེགས༔ ཆོས་ཀུན་མ་འདྲེས་སོར་རྟོག་ཀློང་༔ པདྨ་མཁའ་འགྲོ་འཁོར་བཅས་གཤེགས༔ ཕྲིན་ལས་སྣ་ཚོགས་ལྷུན་གྲུབ་རྫོགས༔ ལས་ཀྱི་མཁའ་འགྲོ་འཁོར་བཅས་གཤེགས༔ གནས་ཡུལ་དུར་ཁྲོད་ཐམས་ཅད་ནས༔ འབུམ་ཕྲག་མཁའ་འགྲོ་འཁོར་བཅས་གཤེགས༔ ཕྲིན་ལས་ཀུན་འགྲུབ་དངོས་གྲུབ་སྟེར༔ ལས་བྱེད་ཕྲ་མེན་འཁོར་བཅས་གཤེགས༔ གནས་ཡུལ་མ་དང་ཌཱཀྐིའི་ཚོགས༔ སྐུ་ལ་རུས་རྒྱན་ཁྲ་ལ་ལ༔ གསང་བའི་བརྡ་སྐད་སངས་སེ་སང་༔ སྙིང་རྗེའི་ཐུགས་བརྩེ་ཡ་ལ་ལ༔ སྐལ་ལྡན་བདག་ལ་བྱིན་གྱིས་རློབས༔ ཨ་བཾ་ཧ་རི་ནི་ས་ས་མ་ཡཱ་ཛ༔ རང་སྣང་དག་པའི་གཞལ་ཡས་ལ༔ ཏིང་འཛིན་གསལ་བའི་དམ་ཚིག་ལྷར༔ དབྱིངས་ནས་ཡེ་བབས་ཡེ་ཤེས་པ༔ དམིགས་མེད་ངང་དུ་བརྟན་པར་བཞུགས༔ ས་མ་ཡཱ་ཏིཥྛ་ལྷན༔ ཧོ༔ ཀུན་ནས་བཏགས་པའི་མཁའ་འགྲོ་མ༔ ཀུན་ཏུ་རྟོག་པ་མི་མངའ་བས༔ ཀུན་ཀྱང་རང་རྩལ་དམ་ཚིག་གཅིག༔ ཀུན་ཏུ་བཟང་པོ་ཕྱག་གིས་བསྟོད༔ ཨ་ལ་ལ་ཧོ༔ ཨོཾ་ཨཱཿཧཱུྃ༔ ཕྱི་ཡི་ཉེར་སྤྱོད་རྣམ་པ་ལྔ༔ ནང་གི་འདོད་ཡོན་ཡུལ་ལྔའི་རྫས༔ གསང་བ་བདེ་སྟོང་སྨན་རཀ་གཏོར༔ མཁའ་འགྲོའི་ཚོགས་ལ་མཆོད་པ་འབུལ༔ སྤང་བླང་གཉིས་མེད་མཆོད་པར་བཞེས༔ མཆོག་དང་ཐུན་མོང་དེང་འདིར་སྩོལ༔ ཨོཾ་བཛྲ་ཨརྒྷཾ་ནས་ཤཔྟ་རུ་པ་ཤཔྟ་གནྡྷེ་ར་ས་སྤཪྴེ་དྷརྨ་དྷརྟུ་པཱུ་ཛ་ཧོ༔ ཧཱུྃ༔ ཆོས་དབྱིངས་སྐྱེ་བ་མེད་པ་ལས༔ འགག་མེད་ལོངས་སྐུ་ཕག་མོར་ཤར༔ རྒྱལ་བ་ཀུན་དང་མཉམ་སྦྱོར་བའི༔ མཁའ་འགྲོའི་ཚོགས་ལ་ཕྱག་འཚལ་བསྟོད༔ ནད་གདོན་ཞི་ཞིང་ཚེ་དཔལ་རྒྱས༔ སྣང་བ་དབང་སྡུད་དགྲ་བགེགས་འདུལ༔ ལས་བཞིའི་ཕྲིན་ལས་ཀུན་ལ་དབང་༔ མཁའ་འགྲོ་རིགས་བཞིར་ཕྱག་འཚལ་བསྟོད༔ འབུམ་ཕྲག་ཡངས་པའི་མཁའ་འགྲོ་མ༔ ཀུན་ཀྱང་མི་མཐུན་བར་ཆད་སེལ༔ མཐུན་པའི་རྐྱེན་ཚོགས་གུས་པས་སྒྲུབ༔ ཡང་འཁོར་ཌཱཀྐི་རྒྱ་མཚོར་བསྟོད༔ རང་ཉིད་གཙོ་མོའི་ཐུགས་ཀ་རུ༔ པད་ཉི་གནམ་ལྕགས་གྲི་གུག་གི༔ ལྟེ་བར་ཨ་མཐིང་གིས་མཚོན་བཾ༔ འཁོར་བཞིར་ཧ་རི་ནི་སའི་མཐར༔ གཡོན་བསྐོར་བསྒོམ་ཞིང་ཤུབ་བུར་བཟླ༔ དང་པོ་གཙོ་མོའི་ཐུགས་སྲོག་ལ༔ སེམས་བཟུང་ཨ་ཡིག་བྱེ་བ་གཅིག༔ འཁོར་བཞིའི་ཐུགས་སྲོག་སྔགས་བཅས་ལ༔ སེམས་བཟུང་སྔགས་འདི་འབུམ་ཕྲག་ལྔ༔ གྲངས་ཀྱི་བསྙེན་པ་ཡིན་པར་བཤད༔ བཾ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ༔ སྔགས་ལས་འོད་འཕྲོས་སྟོང་གསུམ་གང་༔ ཁམས་གསུམ་ཀུན་གྱི་སེམས་ཉིད་རྩལ༔ འགྲོ་ཀུན་མཁའ་འགྲོའི་གསང་གསུམ་དང་༔ དབྱེར་མེད་རིག་པའི་ངང་མདངས་བསྐྱང་༔ དེ་ནས་མ་དང་མཁའ་འགྲོ་རྣམས༔ ལུས་དང་གྲིབ་བཞིན་འགོ་ཞིང་འགྲོགས༔ བར་ཆད་སེལ་ཞིང་གྲོགས་བྱེད་གྱུར༔ ས་མ་ཡཱ༔ རྗེས་ནི་བསྐྱེད་པའི་ལྷ་ཡི་ཚོགས༔ འོད་ཞུ་ཐུགས་སྲོག་ཨ་ལ་ཐིམ༔ དེ་ཡང་མི་དམིགས་སྟོང་པའི་ངང་༔ འགྱུར་མེད་ལྟ་བའི་རང་མདངས་བསྐྱང་༔ རྗེས་ཐོབ་རང་ལུས་ཁྲོས་མ་ཡི༔ གནས་གསུམ་ཡི་གེས་མཚན་པས་བསྲུང་༔ ཨོཾ་ཨཱཿཧཱུྃ་རཀྵ༔ དེ་ནས་དགེ་བ་བསྔོ་བ་ནི༔ ཨེ་མ་ཧོ༔ བདག་གི་དུས་གསུམ་དགེ་བའི་ཚོགས༔ མ་ལུས་གཅིག་ཏུ་རབ་བསྡུས་ནས༔ མཐའ་ཡས་འགྲོ་རྣམས་ཡུམ་ཆེན་མོའི༔ གོ་འཕང་ཐོབ་པའི་རྒྱུ་རུ་བསྔོ༔ ཞེས་དང་བཀྲ་ཤིས་བརྗོད་པ་ནི༔ ཆོས་སྐུ་ཡུམ་ཆེན་ཕ་རོལ་ཕྱིན༔ ལོངས་སྐུ་རྡོ་རྗེ་རྣལ་འབྱོར་མ༔ སྤྲུལ་སྐུ་རལ་གཅིག་སྔགས་སྲུང་མས༔ རྗེས་བཟུང་དོན་གཉིས་ལྷུན་གྲུབ་ནས༔ སངས་རྒྱས་བསྟན་པ་བསྲུང་བ་དང་༔ སེམས་ཅན་སྨིན་ནུས་བཀྲ་ཤིས་ཤོག༔ ཅེས་བརྗོད་མེ་ཏོག་སིལ་མ་འཐོར༔ སྤྲོ་ན་ཐུན་སྐབས་ཚོགས་མཆོད་ནི༔ ཚེས་བཅུ་ཉེར་ལྔའི་དུས་གཉན་ལ༔ ཤ་ཆང་སྒོག་ཙོང་ཟན་བཤོས་ཆང་༔ མར་མེ་ལ་སོགས་ལེགས་པར་བཤམས༔ བཤགས་པ་ཅི་རིགས་སྔོན་སོང་ནས༔ ཨོཾ་ཨཱཿཧཱུྃ༔ ཚོགས་ཀྱི་ཡོ་བྱད་བདུད་རྩིར་གྱུར༔ ཚོགས་མགྲོན་རྡོ་རྗེ་རྣལ་འབྱོར་མ༔ མཁའ་འགྲོ་སྡེ་ལྔ་སྤྲུལ་འཁོར་བཅས༔ མཆོད་པའི་མགྲོན་དུ་གཤེགས་སུ་གསོལ༔ རོལ་མོ་སྤོས་གསུར་རྐང་གླིང་འབུད༔ ཚོགས་ཀྱི་མཆོད་པ་ཀུན་བཟང་གི༔ རྣམ་རོལ་གུས་པས་ལྷ་ལ་འབུལ༔ ཉམས་ཆག་སྤྱི་དང་མཁའ་འགྲོ་ཡི༔ དམ་ལས་འགལ་བའི་ཉེས་ཀུན་བཤགས༔ ཞེས་བརྗོད་ཚོགས་ཕུད་མཆོད་པ་འབུལ༔ ཡི་གེ་བརྒྱ་པས་ནོངས་པ་བཤགས༔ ཐ་མ་རྫས་ལ་དགྲ་བགེགས་འགུགས༔ བསྒྲལ་ནས་ལྷ་ལ་འདི་བཞིན་སྟོབ༔ཧཱུྃ༔ ལོག་འདྲེན་མཚན་མའི་རྫས་ལ་ཁུག༔ དགྲ་བགེགས་ཕུང་ཁམས་རྡུལ་དུ་རློགས༔ ཤ་ཁྲག་དྭངས་མ་བདུད་རྩིའི་རོས༔ སྔགས་སྲུང་གཙོ་འཁོར་མཉེས་གྱུར་ཅིག༔ སརྦ་པཉྩ་ཧ་ལ་ཁཱ་ཧི༔ ཚོགས་ལ་རོལ་ཞིང་ལྷག་མ་ནི༔ བདུད་རྩིར་བྱིན་བརླབས་འདི་བཞིན་བསྔོ༔ ཧོཿ གསང་སྔགས་དཀྱིལ་འཁོར་མཐའ་སྐྱོང་བ༔ ཕྲ་མེན་མཁའ་འགྲོ་རྒྱ་མཚོའི་ཚོགས༔ ལྷག་མའི་གཏོར་མ་འདི་བཞེས་ལ༔ བར་ཆད་སེལ་ཞིང་སྡོང་གྲོགས་མཛོད༔ ཨུ་ཙུཥྚ་བྷ་ལིང་ཏ་ཁཱ་ཧི༔ དེ་ནས་སྨོན་ལམ་གདབ་པ་ནི༔ ཧཱུྃ༔ རྒྱལ་ཡུམ་མཁའ་འགྲོའི་དཀྱིལ་འཁོར་དུ༔ ཚོགས་ཀྱི་མཆོད་པ་འདི་འབུལ་བས༔ ཚེ་འདིར་བདེ་སྐྱིད་ཕུན་སུམ་ཚོགས༔ མཐར་ཐུག་སྐུ་གསུམ་མངོན་གྱུར་ཤོག༔ མཁའ་འགྲོའི་ཚོགས་མཆོད་བསྡུས་པ་འདིས༔ ཚོགས་གཉིས་དཔལ་ལ་སྤྱོད་པར་ཤོག༔ མནྟྲ་གུ་ཧྱ༔ ལུང་རིག་མིང་གིས་སོ༔