བསྐུལ་བ་དུག་གི་སྤུ་གྲི།

སྔགས་སྲུང་ཁྲོས་མའི་ཐུགས་སྒྲུབ་ལས༔ བསྐུལ་བ་དུག་གི་སྤུ་གྲི་བཞུགས༔

དབྱིངས་ཡུམ་ཁྲོས་མ་ནག་མོར་འདུད༔ འདི་ཉིད་སྒྲུབ་པའི་རྣལ་འབྱོར་ལ༔ དགྲ་འདྲེའི་འཚེ་འམ་རྦོད་གཏོང་མཁན༔ གཞན་དང་འདྲེས་སམ་རྨི་ལམ་ངན༔ དེ་ཚེ་ལས་ཀྱི་གཞུང་བསྲིངས་ནས༔ ཚོགས་འཁོར་བསྐོར་ཞིང་དམར་གཏོར་ལ༔ འགུག་གཞུག་བྱ་ཞིང་སྔགས་པ་རྣམས༔ རཀྟས་གདོང་བྱུག་རྔ་བརྡུང་ཞིང་༔ སྲིན་མོ་ཁྲོས་པའི་ངུར་སྒྲ་ཡིས༔ ཧཱུྃ་བྷྱོ༔ གྲུ་གསུམ་མཐིང་ནག་ཨེ་དབྱིངས་ཁྲག་མཚོའི་ཀློང་༔ ཀེང་རུས་རི་རབ་དགྲ་བགེགས་བསྣོལ་བའི་ཁྲི༔ ཐབས་ཤེས་ཉི་ཟླ་འདབ་སྟོང་གེ་སར་ལ༔ དབྱིངས་ནས་དྲག་ཏུ་ཁྲོས་པའི་རལ་གཅིག་མ༔ དོན་དམ་ཐུགས་དབྱིངས་ཞི་ལས་མ་གཡོས་ཀྱང་༔ གསང་སྔགས་བསྟན་ལ་སྡང་བའི་ལོག་འདྲེན་དགྲ༔ བསླབ་གསུམ་ཡོན་ཏན་ཉམས་བྱེད་དམ་སྲིའི་དཔུང་༔ ཚེ་བསོད་དཔལ་ལ་སྡང་བའི་འཕྲལ་རྐྱེན་བགེགས༔ མིང་གི་ལྷག་མ་ཙམ་དུ་ཚར་གཅོད་ཕྱིར༔ མི་བསྲུན་སྲིན་མོ་ཁྲོས་པའི་དྲག་ཤུལ་གྱིས༔ རྔམ་པའི་ང་རོ་དང་བཅས་སྐུར་བཞེངས་ཤིག༔ དགྲ་འདྲེའི་གཤེད་དུ་ཁྲོས་པས་སྐུར་བཞེངས་ཚེ༔ སྐུ་མདོག་སྨུག་ནག་བཟོད་དཀའི་གཟི་མདངས་འབར༔ ཁམས་གསུམ་ཟ་བྱེད་མགོ་དགུ་རྔམས་ཞལ་གདངས༔ མེ་ལྟར་འབར་བའི་སྡང་མིག་ཕྱོགས་བཅུར་གཡོ༔ གངས་ཀྱི་རི་ལྟར་མཆེ་བ་རྣོ་དབལ་གཙིགས༔ གཡས་གཡོན་ཞིང་བཅུའི་ཙིཏྟ་ཁྲག་འཛགས་གསོལ༔ མི་སྡུག་ལྕགས་སྤྱང་མགོ་དགུ་ཕྲ་ཐབས་འགྱེད༔ རྒྱལ་བསེན་སྡེ་བརྒྱད་ཞབས་བརྒྱད་བསྒྲད་ཅིང་གནོན༔ དུས་མེ་ཚྭ་ཚྭ་འཐོར་རླུང་དྲག་པོ་འཁྲུགས༔ ཡེ་ཤེས་འཇིག་རྟེན་མཁའ་འགྲོའི་སྤྲིན་དབུས་སུ༔ བསྟན་དགྲའི་སྲོག་ལ་དཔའ་མོས་རྔམ་ཟས་ཀྱི༔ སྦྱོར་བའི་གིང་ཆེན་དཔལ་མགོན་མ་ནིང་ནག༔ བདུད་རྟ་ནག་པོ་རླུང་གི་ཤུགས་ཅན་ཆིབས༔ ལྕགས་ཀྱི་མདའ་གཞུ་ཉམས་པའི་སྙིང་རྩ་འབིགས༔ དཔལ་མགོན་བདུན་ཅུའི་དམག་ཚོགས་མེ་རེ་རེ༔ བདུད་ཀྱི་བྱ་ནག་ལྕགས་སྡེར་ཟེངས་སེ་ཟེང་༔ ཁྱི་སྤྱང་དོམ་དྲེད་ང་རོ་འུ་རུ་རུ༔ རལ་གྲི་མདའ་མདུང་མཚོན་ཆའི་དྲག་ཆར་འབེབས༔ ལྷ་ཀླུ་གཟའ་ཆེན་རྒྱུ་སྐར་ཕོ་ཉར་འགྱེད༔ བསྐུལ་ལོ་བསྐུལ་ལོ་ཞིང་བཅུའི་གཤེད་དུ་སྐུལ༔ མཛོད་ཅིག་གསོད་ཅིག་བསྒྲལ་བའི་ལས་མཛོད་ཅིག༔ སྒྲོལ་བའི་དཔའ་བོ་དམ་ཅན་མགར་བ་ནག༔ རྩལ་ལྡན་སེང་གེ་དཀར་མོའི་རྟ་ལ་ཞོན༔ མྱོང་བའི་གོམ་སྟབས་གཅིག་གིས་ས་གསུམ་བགྲོད༔ གཡས་པས་ཐོ་ཆེན་རི་རབ་རྡུལ་དུ་རློགས༔ གཡོན་པའི་སྦུད་པས་དགྲ་ཡུལ་རླུང་ལ་སྐུར༔ གཡུ་འབྲུག་ཁྲིད་ཅིང་ཐོག་སེར་སྲིད་གསུམ་འཁྲུགས༔ སྟག་རལ་གཟིག་ཤུབ་མེ་སྟག་གློག་ཞགས་འཁྱུགས༔ བྱ་ཞོན་གཤོག་སྒྲས་ནམ་མཁའ་སྒྲ་ཡིས་འགེངས༔ ར་ཞོན་འབའ་སྒྲས་བར་སྣང་གཡོ་སྙམ་བྱེད༔ སེང་ཞོན་རྩལ་གྱིས་ལོག་འདྲེན་སྙིང་རྩ་འདར༔ མཆེད་འཁོར་སུམ་བརྒྱ་དྲུག་ཅུ་ཡང་འཁོར་བཅས༔ ཐེའུ་རིང་སྟོང་སྡེ་བསྟན་མ་བཅུ་གཉིས་རྣམས༔ གད་རྒྱངས་བཤུད་གླུས་སྲིད་གསུམ་འབྱུང་པོ་སྡུད༔ བསྐུལ་ལོ་དགྲ་བགེགས་དམ་སྲིའི་གཤེད་དུ་སྐུལ༔ མཛོད་ཅིག་ཉམས་པ་བདུན་ལྡན་སྲོག་དབུགས་ལོངས༔ སྟེང་གི་ཕོ་ལ་ཆོས་སྐྱོང་ཕོ་རྒྱུད་བྷྱོ༔ དཔའ་བོའི་སྙིང་ཕྱུང་སྲ་བའི་གོ་མཚོན་ཕྲོགས༔ མགྱོགས་པའི་རྟ་སོད་འཚོ་བའི་ནང་དབུགས་ལོངས༔ འོག་གི་མོ་ལ་ཆོས་སྐྱོང་མོ་རྒྱུད་བྷྱོ༔ མཛེས་པའི་མདངས་ཕྲོགས་བཏགས་པའི་རྒྱན་ཆ་གཏོར༔ མཛངས་པའི་གཡོ་སྒྱུའི་རྫུན་ཕུག་སྒྱུ་མར་ཐོངས༔ མངལ་གྱི་སྐྱེ་རྒྱུད་རིགས་ཀྱི་མྱུ་གུ་སྐོམས༔ དགྲ་མཁར་གནམ་ལྕགས་ཐོག་གིས་སིལ་བུར་ཐོངས༔ དགྲ་ཞིང་སྐྱིན་ཐང་སེར་བས་ཐལ་བར་རློགས༔ དགྲ་ནོར་གློ་གོར་ཧོན་གྱིས་དམར་དུ་བསྐྱིལ༔ མི་དགེའི་ལས་ཀུན་ན་བུན་ཡལ་བ་བཞིན༔ སྐྱེ་མཆེད་བཅུ་གཉིས་སྲིད་པའི་རྒྱུན་ལམ་ཆོད༔ ང་བདག་གཟུང་འཛིན་རྩ་བ་དྲུངས་ནས་ཕྱུང་༔ བསྟན་ལ་སྡང་བའི་དགྲ་དང་དམ་སྲིའི་ཚོགས༔ འཁོར་བའི་གནས་ནས་ཐུགས་རྗེའི་ལྕགས་ཀྱུས་དྲོངས༔ ཞི་བའི་དབྱིངས་སུ་སྒྲོལ་ཅིག་ས་མ་ཡཱ༔ རྣལ་འབྱོར་དྲག་པོའི་ལས་ཆེན་མྱུར་འགྲུབ་མཛོད༔ དེ་ལྟར་བསྐུལ་གསང་ཟབ་མོ་འདི༔ ཤིན་ཏུ་གཉན་པས་བག་ཡོད་བྱོས༔ བསྟན་འགྲོའི་དོན་དང་རང་གི་སྲོག༔ བསྲུང་ཕྱིར་དེ་ལས་དུས་མིན་དུ༔ བསྐུལ་ན་རང་གི་སྲོག་ལ་འོང་༔ དཔལ་མགོན་ལྕམ་དྲལ་ཁྱོད་ལ་གཏད༔ དུས་བབས་མཚོ་རྒྱལ་ཐུགས་ཀྱི་སྤྲུལ༔ དགོངས་གཏེར་ཟབ་མོའི་མཛོད་འཆང་བ༔ སྐལ་ལྡན་བུ་ལ་གཏད་དོ་རྒྱ༔ གུ་ཧྱ༔ སྐལ་ལྡན་ལུང་རིག་གླིང་པས་དག་པར་ཕབ་པའི་དུས་ཀུན་ཏུ་དགེ་བར་གྱུར་ཅིག༔