སྡེ་བརྒྱད་བསྐུལ་བ་ཐོག་མདའི་རྣོ་དབལ།

སྔགས་སྲུང་ཁྲོས་མའི་ཐུགས་སྒྲུབ་ལས༔ སྡེ་བརྒྱད་བསྐུལ་བ་ཐོག་མདའི་རྣོ་དབལ་བཞུགས༔

རང་བཞིན་དབྱིངས་ཀྱི་མཁའ་འགྲོར་འདུད༔ སྔགས་སྲུང་རལ་གཅིག་སྒྲུབ་བརྩོན་གྱིས༔ སྒྲོལ་བའི་ཕྲིན་ལས་བརྩམས་པའི་ཚེ༔ དགྲ་བགེགས་ལིང་ག་ཧོམ་དུ་གཞུག༔ གཟུ་དཔང་ཡུས་བྱ་གསེར་སྐྱེམས་མཆོད༔ རང་ཉིད་སྔགས་སྲུང་གསལ་བ་ཡི༔ ཐུགས་སྤྲུལ་ཕོ་ཉས་དགྲ་བགེགས་བདུད༔ གཟུགས་ལ་བསྟིམས་ཤིང་ཕྱག་རྒྱས་བཅིངས༔ དེ་ནས་འཁོར་གྱི་སྡེ་བརྒྱད་རྣམས༔ ཤ་ཁྲག་གཏོར་མ་སྔགས་འདིས་བརྔན༔ རོ་རུ་ཨེ་ཀ་ཛ་ཊི་མ་ཧཱ་ཀཱ་ལ་བཛྲ་ས་དྷུ་ར་ཧུ་ལ་རེ་མ་ཏི༔ ཨ་ཡ་མ་དུ་རུ་ཙ་ཤ་ན་ས་པཱ་རི་ཝ་ར་ཨེ་དཾ་བྷ་ལིང་ཁ་ཁ་ཁཱ་ཧི་ཁཱ་ཧི༔ ལན་གསུམ་ལྟ་བའི་གདེང་བསྐྱེད་རྔ་བརྡུང་ཞིང་༔ཤ་ཁྲག་གསུར་གཏོང་འདི་སྐད་བསྐུལ༔ ཧཱུྃ་བྷྱོ༔ མཐིང་ནག་གྲུ་གསུམ་ཨེ་ཡི་ཀློང་༔ ཁྲག་ཞགས་རྒྱ་མཚོའི་རྦ་རླབས་འཁྲུགས༔ ཀེང་རུས་རི་རབ་ལྷུན་པོ་སྤུངས༔ རོ་ལངས་ཕོ་མོ་ཐལ་སྒྲ་རྡེབ༔ དུར་བྱ་སྣ་ཚོགས་འཕུར་ལྡིང་གཡོ༔ སྟག་གཟིག་དོམ་དྲེད་འཕར་སྤྱང་རྣམས༔ ཤ་ཁྲག་ཟས་ལ་ཧབ་ཐོབ་རོལ༔ མེ་རླུང་ཐོག་སེར་བུ་ཡུག་འཚུབས༔ ཚངས་པ་ཆེན་པོ་སྐྱི་གཡའི་གནས༔ རབ་ཏུ་གཏུམ་པའི་དུར་ཁྲོད་ནས༔ དོན་དམ་ཆོས་སྐུ་ཀུན་བཟང་མོ༔ གསང་ཆེན་བསྟན་པ་སྲུང་བའི་ཕྱིར༔ རལ་གཅིག་ཁྲོས་མའི་རྣམ་འགྱུར་གར༔ ལོག་འདྲེན་སྒྲོལ་ཕྱིར་ཐུགས་དམ་བསྐུལ༔ འབར་ཁྲོ་རྔམ་པའི་དྲག་ཤུལ་གྱིས༔ བསྟན་དགྲ་སྡེར་བཅས་རྡུལ་དུ་རློགས༔ ཧཱུྃ་བྷྱོ༔ དབྱིངས་ཀྱི་ཁྲོ་མོ་རལ་གཅིག་མའི༔ ཚོགས་བརྒྱད་དག་པའི་རང་རྩལ་ལས༔ སྙིང་རྗེས་ཁྲོས་པའི་ཧེ་རུ་ཀ༔ སྡེ་བརྒྱད་གཙོ་བོ་ཐུགས་དམ་བསྐུལ༔ ཤར་ཕྱོགས་འཁོར་ལོའི་རྩིབས་སྟེང་ནས༔ ཨ་ཡིག་ལས་སྐྱེས་ཚངས་པ་ཆེ༔ དུང་གི་ཐོར་ཚུགས་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ རེས་འགའ་དཀར་གསལ་ཁྲོ་འཛུམ་ཉམས༔ དུང་ཁྲབ་རྨོག་ཞུ་ཟླ་ལྟར་དཀར༔ ཉི་ཟླ་འོད་ཀྱི་འཕྲུ་ཡང་བཙུགས༔ མདུང་དར་བ་དན་ཀླད་ལ་བསྐོར༔ཞགས་པས་དམ་ཉམས་ཁྱི་བཞིན་ཁྲིད༔ རྟ་དཀར་ཕུམ་དམར་རླུང་གཤོག་ཆིབས༔ སྤྲུལ་བ་རྒྱལ་འགོང་འབུམ་སྡེ་འགྱེད༔ རུ་འདྲེན་སྡེ་བཞི་རྡུལ་ལྟར་འཚུབས༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ སྨྱོ་འབོགས་ནད་ཀྱིས་མྱུར་དུ་སོད༔ དུས་ལ་བབ་པོ་ས་མ་ཡཱ༔ ལྷོ་ཕྱོགས་འཁོར་ལོའི་རྩིབས་སྟེང་ནས༔ ཡ་ཡིག་ལས་སྐྱེས་གཤིན་རྗེའི་རྒྱལ༔ བྷེ་ཝ་ས་ཏྭ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ སེར་ནག་ཁྲོ་གཏུམ་ཤན་པའི་གཟུགས༔ མི་ལྤགས་རློན་པའི་སྟོད་གཡོགས་དང་༔ སྟག་གི་ལྤགས་པའི་ཤམ་ཐབས་བཀླུབས༔ མ་ཧེ་དམར་སེར་ཞིང་སྦྲུལ་གྱི༔ རྒྱན་ཆས་རྔམ་བརྗིད་ཕྱེད་དཀྱིལ་རོལ༔ གཡས་པས་གནམ་ལྕགས་འཁོར་ལོ་ཡི༔ ཞིང་བཅུའི་ཕུང་པོ་ཚལ་བར་གཏོར༔ གཡོན་པས་ལས་ཀྱི་མེ་ལོང་གིས༔ དམ་ཉམས་སྡིག་སྤྱོད་མཚང་ལ་རྒོལ༔ སྐྲ་དང་བ་སྤུ་མེ་སྟག་འཕྲོ༔ མི་བསྲུན་ཕོ་ཉ་སྤྲིན་ལྟར་འཚུབས༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ གཤིན་རྗེའི་ཁྲམ་ལ་ད་ཐོབ་ཅིག༔ དུས་ལ་བབ་པོ་ས་མ་ཡཱ༔ ནུབ་ཕྱོགས་འཁོར་ལོའི་རྩིབས་སྟེང་ནས༔ ཙ་ཡིག་ལས་སྐྱེས་བཙན་རྒོད་ཆེ༔ རྡོ་རྗེ་དྲག་རྩལ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ ཁྲག་མདོག་བསེ་ཡི་ཁྲབ་རྨོག་དང་༔ འཁོར་གསུམ་མེ་ལྕེ་གློག་འོད་འཁྱུགས༔ རྟ་དམར་རླུང་གི་ཤུགས་ཅན་དང༔ མཁའ་ཡི་ལྕེ་དམར་གློག་ཞགས་ཆིབས༔ གཡས་པས་མདུང་དམར་བ་དན་ཕྱར༔ གཡོན་པས་ཞིང་བཅུའི་ཙིཏྟ་འདྲད༔ ཤར་ལྷོ་ནུབ་བྱང་བཙན་གྱི་ཚོགས༔ གཡུལ་ཆེན་འགྱེད་པའི་དམག་དཔུང་བཞིན༔ རྟ་ཞོན་གོ་གྱོན་བསོ་སྒྲ་སྒྲོག༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ གྲི་མཚོན་དབལ་གྱིས་དུམ་བུར་གཏུབས༔ དུས་ལ་བབ་པོ་ས་མ་ཡཱ༔ བྱང་ཕྱོགས་འཁོར་ལོའི་རྩིབས་སྟེང་ནས༔ དུ་ཡིག་ལས་སྐྱེས་བདུད་ཀྱི་རྗེ༔ རལ་པ་ཚལ་དགུ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ མཐིང་ནག་དུད་སྤྲིན་མི་སྡུག་གཟུགས༔ བེར་ནག་ལྕགས་ཀྱི་ཚེམས་ཁྲབ་དང་༔ རྨོག་ནག་ལྕགས་ལྷྭམ་བདུད་ཀྱི་ཆས༔ བདུད་རྟ་ནག་པོ་མགོ་དགུ་ནས༔ ནད་དུག་དལ་ཡམས་ཁ་ཕྲུ་གཏོང་༔ གཡས་པས་ཁྲམ་ཤིང་མཁའ་ལ་གདེངས༔ ཞགས་ནག་འདོམ་དགུས་དགྲ་ལག་སྡོམ༔ སྤྲུལ་བ་ཚེ་སྲོག་ལོངས་སྤྱོད་ལ༔ རབ་ཏུ་སྡང་བའི་བདུད་སྲིན་ཚོགས༔ ཆར་སྤྲིན་མཁའ་ལ་རྒྱུག་ལྟར་འཐིབས༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ འཐིབས་ནད་དྲག་པོས་མྱུར་དུ་སྒྲོལ༔ དུས་ལ་བབ་པོ་ས་མ་ཡཱ༔ ཤར་ལྷོར་འཁོར་ལོའི་རྩིབས་སྟེང་ནས༔ ན་ཡིག་ལས་སྐྱེས་ཀླུ་བདུད་ཆེ༔ ནཱ་ག་རཀྴ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ དུད་མདོག་དབུ་དགུ་ཕྱག་བཅོ་བརྒྱད༔ མཛེ་རིགས་ནད་ཀྱི་སྤྲིན་ནག་འཐིབས༔ དབུ་སྐྲ་བ་སྤུ་སྦྲུལ་དུ་འཁྱིལ༔ མཚོན་ཆ་སྣ་ཚོགས་ཕྱག་མཚན་གདེངས༔ ཆུ་སྲིན་ཁམ་ཁྲ་རུས་སྦལ་གྱི༔ སྒ་ཆ་ཉ་སྦྲུལ་རྒྱན་ཅན་ཞོན༔ ཀླུ་རིགས་བཞི་པོ་ཕོ་ཉར་འགྱེད༔ བསྟན་དགྲའི་དབུགས་ལ་ཧབ་ཐོབ་བྱེད༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ ཀླུ་ནད་མཛེ་རིགས་ཆར་དུ་ཕོབ༔ དུས་ལ་བབ་པོ་ས་མ་ཡཱ༔ ལྷོ་ནུབ་འཁོར་ལོའི་རྩིབས་སྟེང་ནས༔ རུ་ལས་སྐྱེས་པའི་དྲང་སྲོང་ཆེ༔ གཟའ་ཆེན་ཁྱབ་འཇུག་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ དུད་ཁ་མགོ་དགུ་ཕྱག་བཞི་བ༔ སྦྲུལ་གྱི་མཇུག་མ་སྲིད་ཁམས་འཁྱིལ༔ དབུ་སྐྲ་དམར་སེར་མེ་སྟག་འཁྲིགས༔ གཙུག་ནས་བྱ་རོག་སྟོང་སྒྲ་སྒྲོག༔ རལ་གྲི་མདའ་གཞུ་ཆུ་སྲིན་ཞགས༔ ཕྱག་མཚན་རྣམ་བཞིས་དགྲ་བགེགས་སྒྲོལ༔ གཡུ་འབྲུག་སྔོན་མོའི་ཁྲི་ལ་འགྱིང་༔ ཐོག་དང་མེ་ལྕེ་གློག་དམར་འཁྱུགས༔ སྡེ་བརྒྱད་ཡོངས་ཀྱི་དམག་དཔོན་བྱེད༔ གཟའ་བརྒྱད་གདོང་མོ་རྣམ་བཞི་དང་༔ རྒྱུ་སྐར་ཉེར་བརྒྱད་ཕོ་ཉར་འགྱེད༔ དུག་གསུམ་གཟའ་ཡི་གྲིབ་ཀྱི་མདས༔ ལས་ངན་བསྟན་དགྲའི་སྲོག་རྩ་ཆོད༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ འབྱུང་བཞིའི་གྲིབ་ཀྱིས་གློ་བུར་སོད༔ དུས་ལ་བབ་པོ་ས་མ་ཡཱ༔ ནུབ་བྱང་འཁོར་ལོའི་རྩིབས་སྟེང་ནས༔ ཤ་ཡིག་ལས་སྐྱེས་ཐེའུ་རང་གཙོ༔ རྡོ་རྗེ་འབར་བ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ དམར་ནག་གཟི་བརྗིད་ཉི་ལྟར་འབར༔ སྐུ་ལ་དར་དམར་བེར་ཕྱམ་དང་༔ དམར་པོ་ཟངས་ཀྱི་ཁྲབ་ཆེན་གསོལ༔ རྡོ་རྗེ་འབར་བའི་སག་ཞྭ་དང་༔ ལྕགས་ལྷྭམ་ནག་པོ་གསེར་སྐས་སྤྲས༔ མདའ་གཞུ་རལ་ཤང་གློག་འོད་འཕྲོས༔ ར་སྐྱེས་ཁམ་པ་རླུང་ཤུགས་ཅན༔ རི་རབ་རྨིག་པས་བརྫི་ནུས་ཞོན༔ གཡས་གཡོན་རྡོ་རྗེ་དགྲ་སྙིང་གསོལ༔ དགྱེས་སྡེ་བསྟན་མ་བཅུ་གཉིས་དང་༔ མཆེད་འཁོར་སུམ་བརྒྱ་དྲུག་ཅུར་བཅས༔ དགྲ་ལ་མི་འདོད་སྣ་ཚོགས་ཐོངས༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔ སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ གདུག་རྩུབ་གཟེར་ནད་ཧུར་ཐུམ་ཐོངས༔ དུས་ལ་བབ་པོ་ས་མ་ཡཱ༔ བྱང་ཤར་འཁོར་ལོའི་རྩིབས་སྟེང་ནས༔ མ་ཡིག་ལས་སྐྱེས་སྲིད་གསུམ་བདག༔ དཔལ་ལྡན་ལྷ་མོ་སྐུར་བཞེངས་ཤིག༔ ཆ་ལུགས་སྤྲུལ་བསྒྱུར་མ་ངེས་ཀྱང་༔ མཐིང་ནག་དབྱར་གྱི་ཆར་སྤྲིན་མདོག༔ ཐོད་སྐམ་དབུ་བརྒྱན་ཟླ་ཚེས་དང་༔ ལྟེ་བར་ཉི་མའི་དཀྱིལ་འཁོར་བཀྲ༔ དབུ་སྐྲ་སྨ་ར་ཁ་སྤུ་ལས༔ མེ་སྟག་ཚྭ་ཚྭ་སྐར་ལྟར་འཁྲིགས༔ སྦྲུལ་དང་དུང་སེང་སྙན་རྒྱན་འཕྱོ༔ གཡས་པས་རྩེ་གསུམ་བ་དན་ཕྱར༔ གཡོན་པས་ནད་རྐྱལ་དགྲ་ལ་རྡེག༔ རྒྱ་བོང་དམར་གྭ་སྲིན་པོ་བརྒྱའི༔ ཐོད་སྒ་སྙིང་སྦྲུལ་རྒྱུ་རློན་གྱི༔ གློ་རྨེད་གསེར་སྲབ་གཡུ་མཐུར་གྱི༔ རྒྱན་དང་ལྡན་པ་མཁའ་ལ་ལྡིང་༔ རྫུ་འཕྲུལ་རྐང་པའི་ཤུགས་མྱུར་ཆིབས༔ གནས་གསུམ་མ་སྲིང་ཌཀྐི་ཚོགས༔ ཁྲོ་ཆགས་བཞད་པའི་གད་རྒྱངས་སྒྲོག༔ ལྷ་མོ་ཀླུ་མོ་བདུད་སྲིན་མོས༔ དགྲ་བགེགས་དགུག་མྱོས་གསོད་ཅིང་གཅོད༔ སྤྲུལ་པ་ཡང་སྤྲུལ་བསམ་མི་ཁྱབ༔ ཤ་ཁྲག་གཏོར་མ་འདི་བཞེས་ལ༔ སངས་རྒྱས་བསྟན་པ་བཤིག་པ་དང་༔སེམས་ཅན་སྤྱི་ལ་སྡུག་བསྔལ་གཏོང་༔ རྣལ་འབྱོར་བདག་ལ་དུས་ཀུན་ཏུ༔ སྡང་བའི་དགྲ་དང་གནོད་པའི་བགེགས༔ མཁའ་འགྲོས་ཆད་པས་ལུས་སེམས་ཕྲོལ༔ དུས་ལ་བབ་པོ་ས་མ་ཡཱ༔ ཧཱུྃ་བྷྱོ༔ བསྟན་སྲུང་རྡོ་རྗེ་རལ་གཅིག་མའི༔ བཀའ་ཉན་གནས་ཡུལ་དུར་ཁྲོད་ནས༔ དཔའ་བོ་མཁའ་འགྲོ་ཆོས་སྐྱོང་རྣམས༔ དམ་ཚིག་གནས་ནས་སྐུར་བཞེངས་ཤིག༔ བདུད་རྩི་སྨན་གྱི་མཆོད་པ་བཞེས༔ དགྲ་བོའི་ཉོན་མོངས་དུག་ལྔ་པོ༔ ཡེ་ཤེས་ལྔ་ཡི་ཀློང་དུ་སྒྲོལ༔ རཀྟ་དམར་གྱི་མཆོད་པ་བཞེས༔ དགྲ་བགེགས་དབང་པོ་སྒོ་ལྔ་ཡི༔ གཉིས་འཛིན་འདོད་ཅིང་ཆགས་པའི་ཚོགས༔ རྟོག་མེད་མཉམ་པའི་ཀློང་དུ་སྒྲོལ༔ ཤ་ཁྲག་གཏོར་མའི་མཆོད་པ་བཞེས༔ དགྲ་བོའི་ཕྱི་ནང་གསང་གསུམ་གྱི༔ ཡུལ་མཁར་ལོངས་སྤྱོད་ཕུང་པོ་ལྔས༔ བདག་བཟུང་བུ་དང་ཆུང་མར་བཅས༔ ཐམས་ཅད་སྟོང་ཉིད་ངང་དུ་གཏོར༔ ལས་ལ་བསྐུལ་ལོ་དམ་ཅན་རྣམས༔ དགྲ་བོའི་ཕོ་རྒྱུད་འཐབ་འཛིང་སློང་༔ བཟོད་དཀའ་མཚོན་ཆའི་དབལ་གྱིས་སོད༔ དགྲ་བོའི་མོ་རྒྱུད་ཀླུ་ལ་གཏོད༔ མཛེ་ནད་དྲག་པོས་རིགས་རྒྱུད་སྐོམས༔ འོག་རྟ་གཅན་གཟན་ཟས་སུ་གཏད༔ ཤ་ཁྲག་འདབ་ཆགས་སྟོན་མོར་སྦྱིན༔ ལོ་ཏོག་སྐྱིན་ཐང་སེར་བས་ཆོམས༔ སྡིག་པའི་ཁ་ཟས་རླུང་ལ་སྐུར༔ ཇི་སྲིད་བྱང་ཆུབ་མ་ཐོབ་བར༔ ལས་ངན་དམིགས་པའི་དགྲ་དང་བགེགས༔ ཡན་པར་མ་གཏོང་ཤྭ་ར་རེ༔ དྲག་པོའི་ལས་ཆེན་བཅུ་གཉིས་ཀྱིས༔ རྡུལ་དུ་བརླགས་པའི་ཕྲིན་ལས་མཛོད༔ ཅེས་བརྗོད་དམར་སྐྱེམས་གཏོར་མ་རྣམས༔ ཕྱོགས་བཅུར་འབུལ་ཞིང་དར་ནག་གཡབ༔ བཤུད་པ་དྲག་པོས་སྐྱི་ཟིང་སློང་༔ ཤིན་ཏུ་གཉན་པའི་དྲག་བསྐུལ་འདི༔ འཆོལ་བར་བཏང་ན་རང་སྲོག་གཅོད༔ དུས་ལ་བབ་ཚེ་སྒྲོལ་ལས་དང་༔ སྦྲགས་ན་གཉིས་འཐུང་སྣ་རྩེ་རུ༔ མི་བཟད་མཚོན་འཁོར་གདགས་དང་མཚུངས༔ ས་མ་ཡཱ༔ རྒྱ་རྒྱ་རྒྱ༔ བཀའ་འདི་རལ་གཅིག་མ་མོས་སྲུངས༔ གཏེར་འདི་དུད་སོལ་ལྷ་མོས་འཚོས༔ སྐལ་ལྡན་ལུང་རིག་གླིང་པས་དག་པར་ཕབ་པ་དུས་ཀུན་ཏུ་དགེ་བར་གྱུར་ཅིག༔