རྩང་ཟློག་མཚོན་ཆའི་འཁོར་ལོ།

རལ་གཅིག་སྒྲུབ་པའི་གཏོར་ཟློག་ལས༔ རྩང་ཟློག་མཚོན་ཆའི་འཁོར་ལོ་བཞུགས་སོ༔ དབྱིངས་ཀྱི་མཁའ་འགྲོའི་སྐུ་ལ་འདུད༔ ཕྱི་རབས་རྣལ་འབྱོར་སྐལ་ལྡན་གྱིས༔ ཟབ་མོའི་གཏེར་ལ་སྤྱོད་པའི་ཚེ༔ དྲག་པོའི་ལས་ཀྱི་རྩང་ཟློག་འདི༔ ཉམས་སུ་ལོངས་དང་བར་ཆད་སེལ༔ དེ་ཡང་གཏོར་མ་རྩང་གི་གྲངས༔ སུམ་ཅུ་རྩ་གཉིས་སྲིན་མོའི་འགྲོས༔ བཙུགས་ལ་དགྲ་བགེགས་ཕུང་ཁམས་ཀྱི༔ ཤ་ཁྲག་འབུལ་ཞིང་འདི་སྐད་དོ༔ ཧཱུྃ་བྷྱོ༔ དུར་ཁྲོད་དྲག་པོའི་ཕོ་བྲང་འདིར༔ ཡེ་ཤེས་ཁྲོ་མོ་རག་གདོང་མའི༔ སྒྲོལ་བའི་ཕྲིན་ལས་བརྩམ་པའི་ཚེ༔ དམར་ནག་རྩང་གིས་དགྲ་གདོན་བགེགས༔ བཟློག་ཅིང་བསྒྱུར་བའི་ཕྲིན་ལས་མཛོད༔ ཧཱུྃ་བྷྱོ༔ དང་པོ་རྩང་བྱུང་ཐོག་མའི་དུས༔ བདག་འཛིན་སྲིད་པའི་མཚོན་རྣོན་པོ༔ སུས་ཀྱང་མ་བྱས་རང་ལས་བྱུང་༔ ཁམས་གསུམ་སྲིད་པའི་སྡུག་བསྔལ་ཀུན༔ ཐམས་ཅད་བྱུང་ཞིང་འགྲོ་དྲུག་མནར༔ ཆེ་མཆོག་ཀུན་བཟང་སྟོན་པ་ཡིས༔ བདག་འཛིན་སྲིད་པའི་རྩ་བ་དེ༔ བདག་མེད་ཤེས་རབ་མཚོན་གྱིས་བཅད༔ གསང་ཆེན་ཐབས་ཀྱི་ཕྱག་རྒྱར་བཅས༔ ཐབས་ཀྱིས་བསྣུན་པས་བར་ཆད་ཀུན༔ རང་སར་གྲོལ་ནས་དབྱིངས་སུ་ཟློག༔ དེ་འོག་བསྐལ་པའི་བར་མ་ལ༔ བདུད་པོ་མ་ཊཾ་རུ་ཊ་དེའི༔ ཡང་དག་ལྟ་བ་ལོག་པར་གོལ༔ ལས་ངན་སྨིན་ནས་འཇིགས་པའི་གཟུགས༔ རྩེ་གསུམ་མཚོན་ཆ་ལག་ཆར་བྱུང་༔ རྒྱལ་ཀུན་བཀའ་བགྲོས་རྟ་ཕག་གིས༔ རུ་ཊ་བསྒྲལ་ནས་མཚོན་ཆ་ཡང་༔ གསང་སྔགས་ཕྱག་མཚན་ཁ་ཊཱཾ་ཀ༔ དུག་གསུམ་རྩད་གཅོད་བརྡ་རུ་བསྔགས༔ དེ་བཞིན་རྣལ་འབྱོར་བདག་ཅག་གིས༔ གཟུགས་ཅན་དགྲ་དང་གཟུགས་མེད་བགེགས༔ མཁའ་འགྲོའི་དལ་ཡམས་ཐན་ལྟས་རིགས༔ བན་བོན་བྱད་ཕུར་ཟློག་པའི་ཕྱིར༔ དུག་ཤིང་སྐྱེར་བའི་རྩང་ཕུར་འདི༔ སྔགས་དང་ཕྱག་རྒྱས་མཚོན་ཆར་བརླབས༔ དེ་རིང་བཟློག་པའི་ཕྲིན་ལས་བཅོལ༔ དེ་རྗེས་བསྐལ་པའི་ཐ་མ་ལ༔ མུ་སྟེགས་གནས་པའི་ལྷོ་ནུབ་མཚམས༔ དུག་ཤིང་ནག་པོའི་ཚལ་དབུས་སུ༔ སློབ་དཔོན་ཤནྟིཾ་གརྦྷ་ཡིས༔ གདུག་རྩུབ་དྲག་པོའི་ཤིང་རྣམས་ལ༔ དམར་ནག་རྩང་གི་ཕུར་པ་བྱས༔ དུག་ཁྲག་སྔགས་ཀྱིས་ངར་བཏབ་ནས༔ ལས་བྱེད་སྤྲུལ་པའི་མཚོན་དུ་བསྔགས༔ དེ་བཞིན་རྣལ་འབྱོར་བདག་ཅག་གིས༔ གཟུགས་ཅན་དགྲ་དང་གཟུགས་མེད་བགེགས༔ མཁའ་འགྲོའི་དལ་ཡམས་ཐན་ལྟས་རིགས༔ བན་བོན་བྱད་ཕུར་ཟློག་པའི་ཕྱིར༔ དུག་ཤིང་སྐྱེར་བའི་རྩང་ཕུར་འདི༔ སྔགས་དང་ཕྱག་རྒྱས་མཚོན་ཆར་བརླབས༔ དེ་རིང་བཟློག་པའི་ཕྲིན་ལས་བཅོལ༔ ཧཱུྃ་བྷྱོ༔ རལ་གཅིག་ཁྲོས་མའི་བཀའ་ཉན་པའི༔ མཁའ་འགྲོ་སོ་གཉིས་ཐུགས་དམ་བསྐུལ༔ དྲག་པོའི་རྩང་ལ་བརྟན་པར་བཞུགས༔ ཕྱག་མཚན་མཚོན་ཆས་དགྲ་གདོན་ཟློག༔ ཤར་ནས་རྒྱལ་འགོང་ལས་བྱུང་བའི༔ དགྲ་གདོན་བྱད་ཕུར་ཐན་ལྟས་ངན༔ དམར་ནག་མཁའ་འགྲོའི་རྩང་གིས་ཟློག༔ ལྷོ་ནས་གཤིན་རྗེ་ལས་བྱུང་བའི༔ དགྲ་གདོན་བྱད་ཕུར་ཐན་ལྟས་ངན༔ དམར་ནག་མཁའ་འགྲོའི་རྩང་གིས་ཟློག༔ ནུབ་ནས་ཀླུ་བདུད་ལས་བྱུང་བའི༔ དགྲ་གདོན་བྱད་ཕུར་ཐན་ལྟས་ངན༔ དམར་ནག་མཁའ་འགྲོའི་རྩང་གིས་ཟློག༔ བྱང་ནས་གནོད་སྦྱིན་ལས་བྱུང་བའི༔ དགྲ་གདོན་བྱད་ཕུར་ཐན་ལྟས་ངན༔ དམར་ནག་མཁའ་འགྲོའི་རྩང་གིས་ཟློག༔ ཤར་ལྷོ་མེ་ལྷའི་ཆོ་འཕྲུལ་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ ལྷོ་ནུབ་སྲིན་པོའི་ཆོ་འཕྲུལ་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ ནུབ་བྱང་རླུང་ལྷའི་ཆོ་འཕྲུལ་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ བྱང་ཤར་དབང་ལྡན་ཆོ་འཕྲུལ་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ སྟེང་གདོན་གཟའ་དང་རྒྱུ་སྐར་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ འོག་གདོན་ཀླུ་གཉན་ས་བདག་ལས༔ བྱུང་བའི་དགྲ་གདོན་ལྟས་ངན་རིགས༔ བཟློག་གོ་བསྒྱུར་རོ་དུས་ལ་བབས༔ ཧཱུྃ་བྷྱོ༔ སྔོན་ལས་བརྡུང་བརྡེག་བསད་བཅད་མཐུས༔ལུས་ལ་ན་ཚ་བྱུང་བ་དང་༔ ཚེ་ལ་བར་དུ་གཅོད་པ་ཀུན༔ དམར་ནག་དྲག་པོའི་རྩང་གིས་ཟློག༔ གཞན་ལ་གཤེ་སྐུར་ངན་ཚིག་མཐུས༔ ངག་ལ་དིག་ལྐུགས་གཏོང་བ་དང་༔ མི་ཁ་སྒྲོ་སྐུར་བྱུང་བ་ཡང་༔ དམར་ནག་དྲག་པོའི་རྩང་གིས་ཟློག༔ ཡིད་ཀྱི་བསམ་ངན་དུག་གཡོས་མཐུས༔ བརྒྱལ་འབོག་སྨྱོ་རེངས་སེམས་མི་གནས༔ བསམ་ཚད་ལོག་པར་གྱུར་པ་ཡང་༔ དམར་ནག་དྲག་པོའི་རྩང་གིས་ཟློག༔ རང་སྐྱོན་ངན་པས་སྣ་དྲངས་ནས༔ བན་བོན་སྔགས་པས་དམོད་ཚིག་གཤེ༔ ཆོས་སྔགས་བཙོ་ཟོར་རྡེབ་པ་ཡང་༔ དམར་ནག་དྲག་པོའི་རྩང་གིས་ཟློག༔ རང་དབང་མ་ཐོབ་གཞན་དབང་གྱུར༔ གསང་ཆེན་དབང་ཁྲིད་གདམས་པ་ལ༔ དབང་ཡོད་གཟུ་ལུམ་རིས་གཅོད་ཐན༔ དམར་ནག་དྲག་པོའི་རྩང་གིས་ཟློག༔ ཅེས་བརྗོད་ཟློག་སྔགས་གཏོར་མ་བཅས༔ དེས་ནི་སྲིད་དང་ཞི་བ་ཡི༔ མི་འདོད་རྐྱེན་ངན་ཐམས་ཅད་དང་༔ ཁྱད་པར་བྱད་ཕུར་རིམས་ནད་སོགས༔ མེ་ལྕེས་རྩི་སྦུར་གཞོ་པ་ལྟར༔ ལྷག་མེད་བཟློག་པར་ཐེ་ཚོམ་མེད༔ ཅེས་པའང་ཆོས་ལ་དབང་བའི་སྐལ་ལྡན་ལུང་རིག་གླིང་པས་དག་པར་ཕབ་པའོ༔