རལ་གཅིག་སྲོག་དབང་མཁའ་འགྲོའི་ཐུགས་བཅུད།
དམ་ཆོས་ཡང་ཟབ་པདྨའི་ཐུགས་ཐིག་ལས༔ རལ་གཅིག་སྲོག་དབང་མཁའ་འགྲོའི་ཐུགས་བཅུད་བཞུགས༔
ཤེས་རབ་དབྱིངས་ཀྱི་ཡུམ་ལ་འདུད༔ གསང་སྔགས་སྲུང་མ་ཀུན་གྱི་གཙོ༔ ཁྱད་པར་རྫོགས་པ་ཆེན་པོ་ཡི༔ མན་ངག་བཀའ་ཡི་གཉེར་འཛིན་པ༔ རལ་གཅིག་སྲོག་དབང་ཟབ་མོ་བསྟན༔ བདག་ཉིད་པདྨ་ཐོད་ཕྲེང་གིས༔ རྒྱ་བོད་ཆོས་ཀྱི་ཚོང་དུས་འགྲིམ༔ མཁས་གྲུབ་བརྒྱ་དང་རྩ་བརྒྱད་བསྟེན༔ ཁྱད་པར་རོམ་བུ་གུ་ཧྱ་ལ༔ འཇིག་རྟེན་མཆོད་བསྟོད་རྒྱུད་ལུང་ཞུས༔ ཡེ་ཤེས་འཇིག་རྟེན་དྲེགས་པ་ཡི༔ སྲོག་ལ་དབང་བསྒྱུར་སྲིད་ཞིའི་བདག༔ དེ་ཕྱིར་སྲོག་གཏད་ཟབ་མོ་ཀུན༔ རྒྱུད་ཀྱི་དགོངས་པ་མངོན་ཕྱུང་ནས༔ མ་འོངས་སྐལ་ལྡན་དོན་དུ་བསྟན༔ ས་མ་ཡཱ༔ ཁྱད་པར་གཟུངས་མ་མཚོ་རྒྱལ་གྱིས༔ ཨོ་རྒྱན་ཡུལ་གྱི་གནས་ཀུན་ཉུལ༔ ཡེ་ཤེས་འཇིག་རྟེན་མཁའ་འགྲོ་ཀུན༔ བླ་མར་བསྟེན་ཅིང་བྲན་དུ་བཀོལ༔ དེ་ཕྱིར་སྔགས་སྲུང་རལ་གཅིག་མ༔ ལུས་དང་གྲིབ་མའི་ཚུལ་དུ་འགྲོགས༔ ད་ལྟ་དགོས་པའི་གནས་མེད་ཀྱང་༔ མ་འོངས་སྐྱེ་བ་བརྒྱུད་པའི་དུས༔ བར་ཆད་སེལ་ཞིང་དངོས་གྲུབ་ཀུན༔ སྲུང་མ་འདི་ཡིས་ངེས་པར་སྟེར༔ དེ་ཕྱིར་སྲོག་དབང་ཟབ་མོ་འདི༔ ཡེ་ཤེས་དགོངས་པའི་རྩལ་བདུན་གྱིས༔ སྙིང་གི་ག་འུར་རྒྱས་ཐོབ་ལ༔ མ་འོངས་སྤྲུལ་པའི་གང་ཟག་དང་༔ འཕྲད་པའི་སྨོན་ལམ་ཡང་ཡང་ཐོབ༔ དེ་ཡང་ཡིད་དང་མཐུན་པའི་གནས༔ དཀྱིལ་འཁོར་མདའ་གང་བཀོད་ལེགས་སྟེང་༔ བུམ་པ་སྐུ་ལ་སྲོག་སྔགས་གསུང་༔ ཐུགས་རྟེན་མན་ཤེལ་ཡོན་ཏན་སྦ༔ ཕྲིན་ལས་ལྕགས་ཕུར་དར་སྣས་བརྒྱན༔ ལས་སྒྲུབ་གཏོར་མ་ཕྱག་མཚན་ཆས༔ སྦྱོར་སྒྲོལ་རྫས་བཤམས་བདག་མདུན་ཀུན༔ དབྱིངས་ཀྱི་རལ་གཅིག་ལྷ་རུ་བསྐྱེད༔ བསྙེན་པ་བརྒྱ་སྟོང་ཁ་གསོ་ཞིང་༔ ཁྱད་པར་བུམ་པ་བཅུད་དང་བཅས༔ ལྷ་རུ་བསྐྱེད་ཅིང་སྔགས་ཀྱིས་གསོ༔ མཆོད་བསྟོད་དངོས་གྲུབ་ལེན་པ་རྣམས༔ གཞུང་བཞིན་སྔོན་དུ་སོང་ནས་སླར༔ དམ་ལྡན་སློབ་མར་དབང་བསྐུར་བའི༔ གནང་བ་ཞུ་ཞིང་མདུན་དུ་འཁོད༔ ལྔ་བདུན་གསུམ་ལས་མི་མང་བའི༔ སློབ་མར་ཁྲུས་བྱས་བགེགས་བསྐྲད་དེ༔ མི་དམིགས་སྟོང་པའི་སྲུང་གུར་ཕུབ༔ ཕྱག་མཚན་མཚོན་ཆའི་མཎྜལ་དབུལ༔ གསོལ་བ་འདེབས་པ་འདི་བཞིན་བྱ༔ འཁོར་འདས་ཡོངས་ཀྱི་བདག་ཉིད་ཆེ༔ དཀྱིལ་འཁོར་གཙོ་བོ་ཧེ་རུ་ཀ༔ སྔགས་སྲུང་ཁྲོ་མོ་རལ་གཅིག་མ༔ སྲོག་དབང་ཟབ་མོ་བདག་ལ་སྩོལ༔ དེ་ནས་བླ་མས་ལན་འདི་བྱིན༔ ཀྱཻ་ཧོ་ལས་དང་སྐལ་བར་ལྡན༔ ཟབ་གསང་རྫོགས་པ་ཆེན་པོ་ཡི༔ ཉམས་ལེན་གནད་དུ་བསྣུན་ནུས་ན༔ སྲུང་མའི་སྲོག་གཏད་ངེས་པར་སྦྱིན༔ དེ་ཕྱིར་སྙིང་ལ་བྲོ་བོར་ཅིག༔ བཛྲ་ས་མ་ཡཱ་ཧཱུྃ༔ དེ་ནས་དམ་ཆུ་སྦྱིན་པ་ནི༔ ཧཱུྃ༔ འདི་ནི་སྲེག་བྱེད་རྡོ་རྗེའི་ཆུ༔ དམ་ཚིག་ལྡན་ན་དངོས་གྲུབ་ཀུན༔ སྦྱིན་མཛད་ཡེ་ཤེས་སེམས་དཔའ་ཆེ༔ ཉམས་ན་མནར་མེད་མེ་ཡིས་སྲེག༔ ཁེ་ཉེན་ཆེ་བའི་བདུད་རྩིའི་བཅུད༔ དྲན་པས་ཟུངས་ལ་ཚུལ་བཞིན་འཐུང་༔ ངག་ཏུ་བླུད་ཅིང་གནས་གསུམ་དུ༔ འབྲུ་གསུམ་སྔགས་ཀྱིས་རྒྱས་གདབ་བྱ༔ གདོང་གཡོགས་དར་རས་དམར་པོས་དཀྲིས༔ རྟེན་འབྲེལ་རྫས་ཀྱི་མེ་ཏོག་གཏད༔ ལོ་རྒྱུས་ཟབ་མོ་འདི་བཞིན་བརྗོད༔ ཀྱཻ་ཧོ་སྐལ་ལྡན་སེམས་ཀྱི་བུ༔ གཞི་སྣང་མ་ངེས་དུས་ཀྱི་ཚེ༔ ཡེ་ཐོག་གདོད་མའི་མགོན་པོ་ལ༔ རང་བྱུང་རྩོལ་མེད་བླ་མ་ཡིས༔ རང་བབ་གཤིས་ཀྱི་གནས་ལུགས་བསྟན༔ བརྗོད་མེད་ཀློང་ལས་རྩལ་སྣང་ཤར༔ དྲུག་ལྡན་དགོངས་པའི་གསང་མཛོད་ནས༔ རང་བཞིན་རྫོགས་པ་ཆེན་པོ་ནི༔ སྒྲ་ཚིག་བློ་ལས་འདས་པ་རུ༔ རང་ལས་མི་གཞན་འཁོར་རྣམས་ལ༔ རང་བཞིན་ཉིད་དུ་སྣང་བའི་ཚེ༔ འགྱུ་གྲོལ་རྟོགས་པའི་རང་རྩལ་ལས༔ སྔགས་སྲུང་ཁྲོས་མའི་རྣམ་པར་ཤར༔ དུར་ཁྲོད་མེ་རི་འབར་བ་རུ༔ གསང་སྔགས་རྒྱུད་ཀྱི་གཉེར་ཁ་བཟུང་༔ གསང་འཛིན་ལག་ན་རྡོ་རྗེ་ཡིས༔ བསྟན་པ་སྲུང་བར་བཀའ་ཡང་བསྒོས༔ ཟབ་གསང་རྒྱུད་ཀྱི་གླེགས་བམ་དང་༔ དེ་འཛིན་རྣལ་འབྱོར་སྡེ་དང་བཅས༔ རྟག་ཏུ་སྲུང་སྐྱོབ་དམ་ཡང་མནོས༔ སྒྲུབ་པོ་ཀུན་གྱི་སྙིང་ལ་གནས༔ ཏིང་འཛིན་ཉམས་ཀྱི་དྲོད་ཚད་ཉུལ༔ ལེགས་ཉེས་སྟངས་འཛིན་བྱ་ར་མཛད༔ ཞིང་བཅུའི་གཤེད་དུ་ཆེར་ཁྲོས་པ༔ སྲུང་མ་ཀུན་གྱི་མཐར་ཐུག་སྟེ༔ འདི་ཉིད་གཅིག་པུ་བསྒྲུབ་པས་ཀྱང་༔ ཡེ་ཤེས་འཇིག་རྟེན་དྲེགས་པ་ཀུན༔ ལས་ལ་བཀོལ་ཞིང་སྲོག་ལ་དབང་༔ འབངས་སུ་བགྱིད་ཅིང་གང་བཅོལ་འགྲུབ༔ ཟབ་པའི་ནང་ནས་ཡང་ཟབ་སྟེ༔ སྙིང་དང་མིག་ལས་གཅེས་པར་གྱིས༔ ཞེས་བསྒོས་སླར་ཡང་སློབ་མ་ཡིས༔ རིགས་ཀྱི་མེ་ཏོག་འདི་བཞིན་དོར༔ ཀྱཻ་ཧོ༔ དཀྱིལ་འཁོར་བདག་པོ་མཆོག༔ རྟེན་འབྲེལ་རྫས་ཀྱི་མེ་ཏོག་འདི༔ དབྱིངས་ལས་ཤར་བའི་དཀྱིལ་འཁོར་ལྷ༔ སྔོན་ནས་འབྲེལ་བ་གང་ཡོད་ལ༔ ད་ལྟ་ཉིད་དུ་འབབ་པར་ཤོག༔ བཛྲ་པུཥྤེ་པྲ་ཏི་ཛ་ཧོ༔ ཞེས་བརྗོད་ལྟོས་པ་མེད་པར་འབུལ༔ དབུས་སུ་བབ་ན་གཙོ་མོ་དང་༔ ཕྱོགས་མཚམས་དྲེགས་པ་གང་བབ་ཀྱི༔ ལས་བཅོལ་ཕྲིན་ལས་ངེས་པར་བྱེད༔ དེ་ནས་བླ་མས་གསེར་ཐུར་ཐོགས༔ གདོང་གཡོགས་བཀྲོལ་བ་འདི་སྐད་དོ༔ ཡེ་ནས་རང་རིག་སྐུ་གསུམ་སྟེ༔ མ་རྟོགས་འཁྲུལ་བའི་ལོག་རྟོག་སྒྲིབ༔ རིག་པའི་གསེར་ཐུར་གྱིས་དབྱེ་ནས༔ ཆོས་དབྱིངས་རང་ཞལ་མཇལ་བར་ཤོག༔ ཙཀྵུ་པྲ་བེ་ཤ་ཡ་ཕཊ༔ ལྷ་དང་དཀྱིལ་འཁོར་བསྟན་པ་ནི༔ ཀྱཻ་ཧོ་སྐལ་ལྡན་རིགས་ཀྱི་བུ༔ དུག་གསུམ་གནས་དག་ཐོད་པའི་མཁར༔ ཕྲ་རགས་རྣམ་རྟོག་དུར་ཁྲོད་དབུས༔ ཆོས་དབྱིངས་སྟོང་པ་ཨེ་ཡི་དཀྱིལ༔ གསལ་སྟོང་ཟུང་འཇུག་སྔགས་སྲུང་མ༔ འཁོར་འདས་ཡོངས་ཀྱི་ཆེ་བཙན་མཆོག༔ ཚོགས་བརྒྱད་དྲེགས་པ་མིང་སྲིང་ཚུལ༔ རིག་རྩལ་སྣ་ཚོགས་མཁའ་འགྲོའི་ཚོགས༔ བརྡ་རྟགས་རྫོགས་པའི་དཀྱིལ་འཁོར་ནས༔ གཞན་དུ་མི་དམིགས་རང་གི་རྩལ༔ མ་བཅོས་རང་བབ་གཤིས་ཀྱི་ལྷ༔ རང་ངོ་ཤེས་པས་རང་ཞལ་ལྟོས༔ བྱིན་འབེབ་དམིགས་པ་འདི་བཞིན་འབོགས༔ ཕྱི་སྣོད་ཕོ་བྲང་ལྕང་ལོ་ཅན༔ མཚན་ཉིད་ཡོངས་རྫོགས་ད་ལ་རུ༔ སློབ་མ་གསང་བདག་དཔའ་བོའི་སྐུ༔ སྣང་སྲིད་ཟིལ་གྱིས་གནོན་པར་བསམ༔ སྲིད་རྩ་ལྟེ་བའི་འཁོར་ལོ་རུ༔ ཆོས་འབྱུང་པད་ཉི་བམ་གྱི་སྟེང་༔ སྔགས་སྲུང་ཁྲོ་མོ་རལ་གཅིག་མ༔ མི་བསྲུན་དྲེགས་པ་སྡེ་བརྒྱད་དང་༔ མཁའ་འགྲོ་སུམ་ཅུ་རྩ་གཉིས་སོགས༔ ཏིལ་གོང་ཁ་ཕྱེ་ལྟ་བུར་གསལ༔ གནས་གསུམ་ཡི་གེ་འབྲུ་གསུམ་དང་༔ ཐུགས་སྲོག་སྦུབས་སུ་མ་ཡིག་སྨུག༔ འོད་ཟེར་འཇའ་ཚོན་ལྟར་འཕྲོས་པས༔ སྐུ་གསུམ་རྒྱལ་བའི་ཞིང་ཁམས་དང་༔ གནས་ཡུལ་དུར་ཁྲོད་ཐམས་ཅད་ནས༔ མ་སྲིང་ཌཱཀྐི་བྲན་གཡོག་བཅས༔ སྔགས་སྲུང་སྐུ་དང་ཕྱག་མཚན་དང་༔ གསང་སྔགས་ཡི་གེའི་རྣམ་པ་རུ༔ ཁ་ཆར་བུ་ཡུག་འཚུབས་པ་བཞིན༔ སློབ་མའི་ལུས་ངག་ཡིད་གསུམ་ལ༔ སིབ་སིབ་ཐིམ་པའི་དམིགས་འདུན་གྱིས༔ རོལ་མོའི་སྒྲ་དང་ཤ་ཆེན་བདུག༔ གདུང་བའི་དབྱངས་ཀྱིས་འདི་ལྟར་བརྗོད༔ ཧཱུྃ༔ སྐྱེ་མེད་ཆོས་དབྱིངས་དག་པའི་མཁའ༔ བརྗོད་མེད་བློ་འདས་རྩལ་སྣང་ལས༔ སྔགས་སྲུང་ནམ་མཁའི་རལ་གཅིག་མ༔ འཁོར་འདས་མཉམ་བརྡལ་དབྱིངས་ནས་བཞེངས༔ རྣལ་འབྱོར་བར་ཆད་སེལ་བ་དང་༔ མཆོག་ཐུན་དངོས་གྲུབ་ཐོབ་པའི་ཕྱིར༔ གནས་འདིར་བྱིན་ཕོབ་རྟགས་མཚན་སྟོན༔ འགྱུར་མེད་སྐུ་ཡི་དཀྱིལ་འཁོར་ནས༔ རྣལ་འབྱོར་ལུས་ལ་བྱིན་ཆེན་ཕོབ༔ འགག་མེད་གསུང་གི་དཀྱིལ་འཁོར་ནས༔ སྒྲུབ་མཆོག་ངག་ལ་བྱིན་ཆེན་ཕོབ༔ གསལ་སྟོང་ཐུགས་ཀྱི་དཀྱིལ་འཁོར་ནས༔ རྣལ་འབྱོར་སེམས་ལ་བྱིན་ཆེན་ཕོབ༔ ཉམས་དང་རྟོགས་པའི་རྩལ་ཤུགས་ཕྱུང་༔ སྣང་གཞི་ཡེ་ཤེས་དྲོད་ཚད་ཕོབ༔ འཁོར་འདས་གཞི་གྲོལ་དགོངས་པ་སྟོན༔ སྐུ་གསུམ་རང་ཞལ་མངོན་གྱུར་མཛོད༔ ཨོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཨོཾ་རོ་རུ་ཨེ་ཀ་ཛ་ཊི་ཛྙཱ་ན་བཛྲ་ཨ་བེ་ཤ་ཡཱ་ཕེཾ་ཕེཾ༔ ཕེབས་རྟགས་ལུས་ངག་ཡིད་ལ་འབྱུང་༔ བདེ་གསལ་མི་རྟོག་རིག་རྩལ་འབར༔ བརྟན་པར་བྱ་ཕྱིར་སྔགས་འདི་བརྗོད༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ དེ་ནས་དབང་གི་དངོས་གཞིའི་དོན༔ མཎྜལ་འབུལ་ཞིང་གསོལ་གདབ་ནི༔ རིགས་ཀུན་ཁྱབ་བདག་ཧེ་རུ་ཀ༔ དྲེགས་ཚོགས་རྗེ་མོའི་གསང་གསུམ་གྱི༔ བྱིན་རླབས་སྲོག་དབང་ཟབ་མོ་ཡིས༔ བདག་རྒྱུད་སྨིན་ཅིང་གྲོལ་བར་མཛོད༔ དེ་ནས་ཐོག་མར་བུམ་དབང་ནི༔ ཧཱུྃ་ཧྲཱིཿ སྟོང་ཉིད་དབྱིངས་ཀྱི་བུམ་པ་རུ༔ འོད་གསལ་འཕོ་མེད་བཅུད་ཀྱིས་གཏམས༔ སྐལ་ལྡན་ལུས་ལ་དབང་བསྐུར་བས༔ བསྐྱེད་རིམ་སྐུ་ཡི་དབང་ཐོབ་ཤོག༔ རྩ་སྔགས་ཤམ་བུར༔ ཀཱ་ཡ་ཨ་བྷི་ཥིཉྩ་ཧཱུྃ༔ གཙོ་མོའི་སྐུ་སྤྱི་བོར་བཞག་ལ༔ ཧཱུྃ༔ ཆོས་དབྱིངས་མཁའ་ལས་གཟུགས་སྐུར་ཤར༔ མཁའ་འགྲོའི་གཙོ་མོ་སྔགས་སྲུང་མའི༔ སྐུ་ཡི་དབང་མཆོག་འདི་སྦྱིན་པས༔ བསྟན་སྲུང་ཡོངས་ཀྱི་འཁོར་ལོས་སྒྱུར༔ སྲིད་གསུམ་འགྲན་བྲལ་དབང་ཐོབ་ཤོག༔ རྩ་སྔགས་ཤམ་བུར༔ ཀཱ་ཡ་ཨ་བྷི་ཥིཉྩ་ཧཱུྃ༔ སྲོག་བདག་ཚངས་པའི་སྐུ་སྤྱི་བོར་བཞག་སྟེ༔ ཧཱུྃ༔ རྒྱལ་པོ་ཡོངས་ཀྱི་དབང་ཕྱུག་ཆེ༔ སྨྱོ་འབོག་གཏོང་བའི་དྲག་རྩལ་ཅན༔ སྲོག་བདག་ཚངས་པ་དཀར་པོ་ཡི༔ མཐུ་ནུས་སྲོག་ལ་དབང་ཐོབ་ཤོག༔ ཨ་དྷེ་ཝ་རཀྴ་ཨ་བྷི་ཥིཉྩ་ཧཱུྃ༔ གཤིན་རྗེའི་སྐུ་མགྲིན་པར་བཞག་སྟེ༔ ཧཱུྃ༔ གཤིན་རྗེ་མི་ཟན་སྲོག་གི་བདག༔ ཁམས་གསུམ་དྲེགས་པ་ཡོངས་ཀྱི་རྗེ༔ ཞིང་བཅུའི་གཤེད་མ་ཁྲོ་བོའི་རྒྱལ༔ བཀའ་ཉན་སྲོག་ལ་དབང་ཐོབ་ཤོག༔ ཡ་མ་མ་རཀྴ་ཨ་བྷི་ཥིཉྩ་ཧཱུྃ༔ བཙན་གྱི་སྐུ་དཔུང་གཡས་སུ་བཞག་ལ༔ ཧཱུྃ༔ བཙན་གྱི་སྡེ་དཔོན་མཐུ་བོ་ཆེ༔ གྲི་ཐབ་གཏོང་བའི་མྱུར་མགྱོགས་ཅན༔ དབང་དྲག་སྟོབས་རྩལ་ལྡན་པ་ཡི༔ དྲག་ཤུལ་སྲོག་ལ་དབང་བསྒྱུར་ཤོག༔ ཙ་ཤུ་ལ་རཱ་ཛ་ཨ་བྷི་ཥིཉྩ་ཧཱུྃ༔ བདུད་ཀྱི་སྐུ་དཔུང་གཡོན་པར་བཞག་སྟེ༔ ཧཱུྃ༔ དྲེགས་པ་འབུམ་སྡེའི་དབང་ཕྱུག་ཆེ༔ བདུད་ཀྱི་གཤེད་མ་བདུད་ཀྱི་རྒྱལ༔ ནག་པོ་བཀྲག་མེད་འཆོལ་བ་ཡི༔ མཐུ་སྟོབས་སྲོག་ལ་དབང་བསྒྱུར་ཤོག༔ དུ་པྲ་མ་རཀྴ་ཨ་བྷི་ཥིཉྩ་ཧཱུྃ༔ ཀླུ་བདུད་ཀྱི་སྐུ་ལྟག་པར་བཞག་ལ༔ ཧཱུྃ༔ གདུག་པའི་དུག་རླངས་དྲག་པོ་ཡིས༔ ཞིང་བཅུའི་སྲོག་ལ་རྒོལ་བའི་གཤེད༔ རྔམ་འཁྲུག་ཀླུ་བདུད་ནག་པོ་ཡི༔ དྲག་རྩལ་ནུས་མཐུར་དབང་བསྐུར་ཤོག༔ ན་ནཱ་ག་རཀྴ་ཨ་བྷི་ཥིཉྩ་ཧཱུྃ༔ གཟའ་ཡི་སྐུ་ལྟེ་བར་བཞག་སྟེ༔ ཧཱུྃ༔ སྡེ་བརྒྱད་ཡོངས་ཀྱི་སྤྱི་དཔལ་ཆེ༔ དུག་ལྔ་རབ་གཏུམ་འཇིགས་པའི་གཟུགས༔ དགྲ་གཤེད་དྲང་སྲོང་ར་ཧུ་ལའི༔ མཐུ་རྩལ་སྲོག་ལ་དབང་ཐོབ་ཤོག༔ རུ་རཀྴ་ཛྭ་ལ་ཨ་བྷི་ཥིཉྩ་ཧཱུྃ༔ རྡོ་རྗེ་ལེགས་པའི་སྐུ་གསང་བར་བཞག་སྟེ༔ ཧཱུྃ༔ འགོང་པོ་ཐེའུ་རང་འབུམ་གྱི་གཙོ༔ རྣལ་འབྱོར་ཡོངས་ཀྱི་དགྲ་ལྷ་ཆེ༔ སྲུང་མ་རྡོ་རྗེ་ལེགས་པ་ནི༔ དམ་ལྡན་ཁྱོད་ཀྱི་གྲོགས་སུ་ཤོག༔ ཤ་བཛྲ་ས་དྷུ་ཨ་བྷི་ཥིཉྩ་ཧཱུྃ༔ མ་མོའི་སྐུ་སྙིང་གར་བཞག་སྟེ༔ ཧཱུྃ༔ དབྱིངས་ལས་ཤར་བའི་ཡུམ་ཆེན་མོ༔ སྔགས་སྲུང་ཨེ་ཀ་ཛ་ཊི་ཡི༔ བཀའ་སྡོད་དཔལ་ལྡན་རེ་མ་ཏིས༔ བརྩེ་གདུང་འབྲལ་མེད་དབང་ཐོབ་ཤོག༔ མ་མ་མ་རཀྴ་ཨ་བྷི་ཥིཉྩ་ཧཱུྃ༔ གཉིས་པ་གསུང་གི་སྲོག་གཏད་ནི༔ སྲོག་གི་སྔགས་བྱང་ལག་ཏུ་ཐོགས༔ སློབ་བུའི་མགྲིན་པར་བཞག་བྱས་ཏེ༔ ཧཱུྃ༔ མ་མོའི་སྲོག་གི་སྙིང་པོ་ནི༔ མ་སྐྱེས་སྤྲོས་བྲལ་ཀློང་ཡངས་ལས༔ འགག་མེད་ཡི་གེའི་གཟུགས་སུ་ཤར༔ སྐལ་ལྡན་མགྲིན་པར་དབང་བསྐུར་བས༔ བཟླས་པ་སྔགས་ལ་དབང་ཐོབ་ཤོག༔ རྩ་སྔགས་ཤམ་བུར༔ ཝཀྐ་ཨ་བྷི་ཥིཉྩ་ཧཱུྃ༔ དེ་དང་རྗེས་འབྲེལ་བཟླས་ལུང་ནི༔ རང་དང་སློབ་མ་ལྷ་རུ་གསལ༔ ཐུགས་ཀར་ཉི་སྟེང་མ་ཡིག་སྨུག༔ སྔགས་ཀྱི་ཕྲེང་བ་གཡོན་དུ་འཁོར༔ ལས་བཞིའི་ཕྲིན་ལས་གང་བཅོལ་ཀུན༔ ཐོགས་མེད་འགྲུབ་པའི་དམིགས་འདུན་གྱིས༔ རྩ་སྔགས་ཤམ་དང་བཅས་པ་ལ༔ རྗེས་ཟློས་གསུམ་ལྔ་བདུན་སོགས་བྱ༔ ས་མ་ཡཱ༔ གསུམ་པ་ཐུགས་ཀྱི་སྲོག་དབང་ནི༔ མེ་ལོང་ཤེལ་རྡོ་སྙིང་ཁར་བཞག༔ ཧཱུྃ༔ སྤྲོས་བྲལ་དབྱིངས་ཀྱི་མེ་ལོང་ལ༔ རྟེན་འབྲེལ་འགག་མེད་མན་ཤེལ་དྭངས༔ ཟུང་འཇུག་སྣང་སྟོང་ཐུགས་ཀྱི་དབང་༔ སྐལ་ལྡན་སེམས་ལ་དབང་ཐོབ་ཤོག༔ རྩ་སྔགས་ཤམ་དུ༔ ཙིཏྟ་ཨ་བྷི་ཥིཉྩ་ཧཱུྃ༔ གནས་ལུགས་སྟོང་པ་ཆོས་ཀྱི་སྐུ༔ གསལ་སྣང་མ་འགགས་ལོངས་སྤྱོད་རྫོགས༔ རིག་རྩལ་སྲིད་པ་མ་མོར་ཤར༔ གདོད་མའི་གཤིས་སུ་རང་བབ་སྐྱོང་༔ དྲེགས་པ་སེམས་ཀྱི་རང་རྩལ་ལ༔ རྟོགས་ནས་སྲོག་ལ་དབང་ཐོབ་འགྱུར༔ བཞི་པ་ཡོན་ཏན་སྲོག་དབང་ནི༔ སྦ་འཁར་ཚིགས་གསུམ་ལྟེ་བར་བཞག༔ ཧཱུྃ༔ སྦ་འཁར་སྦུབས་སྟོང་ཆོས་ཀྱི་དབྱིངས༔ དཀར་ལ་དྭངས་པ་བྱང་ཆུབ་སེམས༔ ཚིགས་གསུམ་ཐེག་པ་གསུམ་དང་འབྲེལ༔ འདོད་འབྱུང་ཡོན་ཏན་དབང་ཐོབ་ཤོག༔ རྩ་སྔགས་ཤམ་བུར༔ གུརྞ་ཨ་བྷི་ཥིཉྩ་ཧཱུྃ༔ ལྔ་པ་ཕྲིན་ལས་སྲོག་དབང་ནི༔ ལྕགས་ཕུར་གསང་བར་བཞག་བྱས་ལ༔ ཧཱུྃ༔ སྲིད་ཞི་མཉམ་བརྡལ་ཕུར་པ་འདིས༔ བདག་རྟོག་གཟུང་འཛིན་དབྱིངས་སུ་སྒྲོལ༔ རིག་རྩལ་ལས་བཞི་ལྷུན་གྱིས་གྲུབ༔ ཕྲིན་ལས་ཐོགས་མེད་དབང་ཐོབ་ཤོག༔ རྩ་སྔགས་ཤམ་བུར༔ ཀརྨ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་སྤྱི་བོར་བཞག༔ ཧཱུྃ༔ རང་བྱུང་སྟོང་པའི་གཏོར་གཞོང་དུ༔ རང་རྩལ་འགག་མེད་གཏོར་མར་བཀྲམ༔ ཤེས་པ་དྲུག་ལྡན་སྔགས་ཀྱིས་སྦྱངས༔ གང་བརྩམ་མྱུར་འགྲུབ་དབང་ཐོབ་ཤོག༔ རྩ་སྔགས་ཤམ་བུར༔ ཀཱ་ཡ་ཝཀྐཱ་ཙིཏྟ་ཨ་བྷི་ཥིཉྩ་ཧཱུྃ༔ མུ་ཏྲའི་གཟུགས་བརྙན་ལག་གཡོན་གཏད༔ སྣང་སྟོང་འདུ་ཤེས་གསུམ་གྱིས་སྦྱོར༔ སྣང་བའི་ངོ་བོ་ཧེ་རུ་ཀ༔ སྟོང་པའི་རང་བཞིན་དཔའ་མོ་ཡུམ༔ ཟུང་འཇུག་དགའ་བཞིའི་ཡེ་ཤེས་ཀྱི༔ སྦྱོར་སྒྲོལ་ལྷན་སྐྱེས་དབང་ཐོབ་ཤོག༔ མུ་ཏྲ་ཛྙཱ་ན་ཨ་བྷི་ཥིཉྩ་ཧཱུྃ༔ སྒྲོལ་དབང་དགྲ་གཟུགས་མདུན་དུ་བཞག༔ དགུག་གཞུག་ཕྱག་རྒྱ་བཞི་ཡིས་བཅིངས༔ སློབ་མ་ལྷ་རུ་གསལ་བ་ཡི༔ བསྒྲལ་ཞིང་ཕུང་ཁམས་ལྷ་ལ་བསྟབས༔ ཧཱུྃ༔ དགྲ་ནི་རྟོག་པས་བཏགས་པ་སྟེ༔ བགེགས་ནི་འཁྲུལ་བའི་རྩལ་ལས་ཤར༔ རིག་པ་དབྱིངས་ཀྱི་མ་མོ་ཡི༔ ཐུགས་རྗེ་ཁྲོས་པའི་ཤུགས་ཀྱིས་བསྒྲལ༔ སྐལ་ལྡན་ཁྱོད་ལ་དབང་བསྐུར་བས༔ སྲིད་ཞི་དབྱིངས་སྒྲོལ་དབང་ཐོབ་ཤོག༔ སརྦ་ཤ་ཏྲུཾ་མཱ་ར་ཡ་ཕཊ༔ རྩ་སྔགས་ཤམ་བུར་ཁ་ཧཱི་བཏགས༔ ས་མ་ཡཱ༔ ཡང་ཟབ་མཁའ་འགྲོའི་སྲོག་དབང་འདི༔ གསང་སྔགས་རྒྱུད་ཀྱི་དགོངས་བཅུད་ལ༔ རྡོ་རྗེ་ཕག་མོའི་ཐུགས་བརྒྱུད་ནས༔ པདྨ་ཐོད་ཕྲེང་བདག་ལ་གཏམས༔ ད་ལྟ་རྗེ་འབངས་མཚོ་རྒྱལ་ལ༔ གདམས་ཏེ་སྙིང་མཛོད་སྒྲོམ་བུར་སྦོས༔ ལྔ་བདོ་རྩུབ་འགྱུར་འཇིགས་པའི་དུས༔ སྨོན་ལམ་སྤྲུལ་པའི་སྲས་དང་འཕྲད༔ རྣལ་འབྱོར་དགྲ་སྒྲོལ་མཚོན་ཆར་ཤོག༔ དབྱིངས་ཀྱི་མ་མོས་བྱ་ར་གྱིས༔ དམ་མེད་བཀའ་རྐུན་རྣམས་ལ་གསང་༔ འཆོལ་ན་རྣལ་འབྱོར་སྲོག་ལ་རྒོལ༔ དེ་ཕྱིར་རབ་ཏུ་འཚོ་ཤེས་བྱ༔ ས་མ་ཡཱ༔ གུ་ཧྱ༔ བདག་སྤྲང་བན་ལུང་རིག་གླིང་པས་དབྱིངས་རིག་སྟོང་གསལ་གྱི་སྒྲོམ་ནས་བཏོན་ཏེ་སྤེལ་བས་ཡི་གེ་པ་ནི་ལུང་ཟིན་གྱི་སྐྱེས་བུ་ཀརྨ་ཆོས་སྐྱོང་དཔལ་བཟང་པོར་འབོད་པས་བྲིས་པ་འདིས་ཀྱང་གསང་སྔགས་ཟབ་གཏེར་གྱི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་པའི་རྒྱུར་གྱུར་ཅིག །སརྦ་མངྒ་ལཾ།།