དུད་སོལ་མའི་ཚོགས་མཆོད་འདོད་དོན་དཔལ་འབྱུང་།
དུད་སོལ་ལྷ་མོའི་ཐུགས་སྒྲུབ་ལས༔ ཚོགས་མཆོད་འདོད་དོན་དཔལ་འབྱུང་བཞུགས་སོ༔
དབྱིངས་ཡུམ་ཀུན་བཟང་རལ་གཅིག་མར༔ སྒོ་གསུམ་དད་པས་ཕྱག་འཚལ་ནས༔ དུད་སོལ་ལྷ་མོའི་རྣལ་འབྱོར་པས༔ བསྙེན་སྒྲུབ་བརྩམ་མམ་དགྲ་བགེགས་སྒྲོལ༔ ལས་བཞི་ཆེ་ཕྲ་གང་བསྒྲུབས་ཀྱང་༔ ཚོགས་མཆོད་འདི་ལ་འབད་པ་གཅེས༔ ས་མ་ཡཱ༔ ཆོ་གའི་གཞུང་བསྲངས་བསྙེན་པ་བསྐྱལ༔ མཆོད་བསྟོད་ལ་སོགས་སྔོན་སོང་ནས༔ ཚོགས་རྫས་ཟན་དང་ཤ་མར་ཐུད༔ འོ་ཆང་ཤིང་ཏོག་འབྲས་ཆན་སོགས༔ འབྱོར་ཚད་བསགས་ལ་བྱིན་བརླབ་ནི༔ རང་ཉིད་རལ་གཅིག་ཁྲོས་མའི་ཐུགས་ཀ་ནས༔ རྃ་ཡྃ་ཁྃ་གསུམ་དམར་ལྗང་དཀར་པོའི་མདངས༔ རབ་འཕྲོས་མཆོད་རྫས་ཉེས་སྐྱོན་བསྲེགས་གཏོར་བཀྲུས༔ ཨོཾ་ཨཱཿཧཱུྃ་གིས་སྣོད་བཅུད་ཕུན་སུམ་ཚོགས༔ ཟག་མེད་འདོད་དོན་ཀུན་བཟང་མཆོད་སྤྲིན་ལྟར༔ རྩ་གསུམ་སྲུང་མ་དགྱེས་པའི་རྫས་སུ་གྱུར༔ རྃ་ཡྃ་ཁྃཿ གསུམ༔ ཨོཾ་ཨཱཿཧཱུྃ་ཧ་ཧོ་ཧྲཱིཿ གསུམ་མམ་ལྔ་བརྗོད་བདུད་རྩིའི་ཟེགས་མ་འཐོར༔ ཚོགས་ཞིང་དཀྱིལ་འཁོར་ལྷ་ཚོགས་སྤྱན་འདྲེན་ནི༔ ཧཱུྃ༔ རང་ཉིད་རྣམ་དག་དབྱིངས་ཀྱི་ཕོ་བྲང་ནས༔ ཀུན་བཟང་ཁྲོས་མ་མ་མོ་རལ་གཅིག་མའི༔ བཀའ་སྡོད་དཔལ་ལྡན་ལྷ་མོ་དུད་སོལ་མ༔ དྲེགས་ཆེན་བརྒྱད་དང་བཀའ་གཏེར་སྲུང་མའི་ཚོགས༔ གྷ་ན་ཚོགས་ཀྱི་མཆོད་པ་བཞེས་སླད་དུ༔ དད་དང་དམ་ཚིག་དབང་གིས་སྤྱན་འདྲེན་ན༔ བརྩེ་ཆེན་ཐུགས་དམ་དབང་གིས་གཤེགས་སུ་གསོལ༔ གུ་རུ་དྷེ་ཝཱ་ཌཀྐཱི་ནི་རེ་མ་ཏཱི་དྷརྨ་པཱ་ལ་སརྦ་ས་མ་ཡཱ་ཛ་ཛཿ ཚོགས་ཕུད་ལྷ་ལ་འབུལ་བ་ནི༔ ཨེ་མ་ཧོ༔ མཆོག་གསུམ་ཀུན་འདུས་བླ་མ་ཡི་དམ་ལྷ༔ ཌཱཀྐི་རྒྱ་མཚོ་བཀའ་གཏེར་སྲུང་མ་ལ༔ དངོས་འབྱོར་ཡིད་སྤྲུལ་ཚོགས་ཀྱི་མཆོད་པ་འབུལ༔ བཞེས་ནས་མཆོག་དང་ཐུན་མོང་དངོས་གྲུབ་སྩོལ༔ གྷ་ན་ཙཀྲ་པཱུ་ཛ་ཁ་ཧཱི༔ བར་བ་འབུལ་ཞིང་བཤགས་ཚིག་ནི༔ ཧོ༔ སྡིག་ལྡན་བདག་ནི་ཐོག་མེད་འཁྲུལ་དབང་གིས༔ ཇི་སྲིད་བྱང་ཆུབ་མཐོང་ལམ་མ་ཐོབ་བར༔ སྒོ་གསུམ་ལས་ཉོན་དབང་གྱུར་སྡིག་པ་ཀུན༔ བཤགས་སོ་དག་ཚངས་ཆེན་པོའི་དངོས་གྲུབ་སྩོལ༔ ཡིག་བརྒྱ་བརྗོད་ཅིང་ནོངས་པ་བཤགས༔ ཐ་མ་ཚོགས་རྫས་དགྲ་བགེགས་འགུགས༔ ཕུར་པ་འདྲིལ་ཞིང་འདི་སྐད་དོ༔ ཧཱུྃ་ཧཱུྃ༔ རང་ཉིད་ཁྲོས་མའི་ཐུགས་ཀའི་འོད་དམར་པོས༔ དགྲ་བགེགས་ཀུན་བཀུག་ཚོགས་ཀྱི་རྫས་ལ་བསྟིམ༔ ཕུར་བུ་སྲས་མཆོག་བཛྲ་ཀཱི་ལ་ཡས༔ གཟིར་བས་སྒོ་གསུམ་དབང་སྡུད་རྣམ་ཤེས་སྤར༔ ཤ་ཁྲག་དྭངས་མ་བདུད་རྩིར་བྱིན་བརླབས་ནས༔ དཀྱིལ་འཁོར་ལྷ་ཚོགས་དགྱེས་པའི་རྫས་སུ་བསྒྱུར༔ བསྟབ་བོ་བཞེས་ཤིག་ལོག་འདྲེན་དབྱིངས་སུ་སྒྲོལ༔ ཨོཾ་བཛྲ་མ་ཧཱ་ཀ་ལཱི་རེ་མ་ཏཱི་ས་མ་ཡཱ་ཙིཏྟ་ཧྲིང་ཛ་སིདྡྷི་ཧཱུྃ༔ རྩ་སྔགས་ཤམ་བུར༔ སརྦ་ཤ་ཏྲུཾ་མཱ་ར་ཡ་མཾ་ས་ཙིཏྟ་ཀོ་རོ་ཙ་ན་བཱ་སུ་ཏ་ཁཱ་ཧི༔ སྔགས་སྲུང་མཐུ་ཆེན་རྒྱལ་མོ༴སོགས། ཚོགས་ལ་རོལ་ཞིང་སྤྱོད་ལམ་བསྐྱངས༔ བསྐང་བ་རྒྱས་བསྡུས་གང་མོས་གཏོང་༔ ས་མ་ཡཱ༔ དེ་ནས་ཚོགས་ལྷག་གཏོང་བ་ནི༔ ཚོགས་ཀྱི་ཐ་མར་བདུད་རྩིས་བྲན༔ ཨོཾ་ཨཱཿཧཱུྃ༔ འདོད་ཡོན་བཟའ་བཏུང་ལྷག་མའི་དམ་ཚིག་རྫས༔ བཀའ་ཡི་སྲུང་མ་ཕྲ་མེན་ཌཀྐཱི་ཚོགས༔ ཟག་མེད་བདུད་རྩིའི་ལྷག་མ་འདི་བཞེས་ལ༔ ནད་གདོན་ཞི་ཞིང་ཚེ་བསོད་དཔལ་འབྱོར་རྒྱས༔ གང་འདོད་དབང་འདུས་དགྲ་བགེགས་ལོག་འདྲེན་སྒྲོལ༔ རྣམ་བཞིའི་ཕྲིན་ལས་ཐོགས་མེད་མྱུར་འགྲུབ་མཛོད༔ ཨུ་ཙུཥྚ་བྷ་ལིང་ཏ་ཁཱ་ཧི༔ དྲག་པོའི་ལས་ལ་བསྐུལ་བ་ནི༔ ཧཱུྃ་བྷྱོ༔ དཔལ་ཆེན་བཀའ་སྡོད་མ་མོ་རལ་གཅིག་མ༔ དེ་ཡི་ཕོ་ཉ་དུད་སོལ་དཔལ་ལྷ་མོ༔ སྡེ་བརྒྱད་སྤྲུལ་བསྒྱུར་སྣ་ཚོགས་དབྱིངས་ནས་བཞེངས༔ ལོག་འདྲེན་དགྲ་བགེགས་སྒྲོལ་བའི་དུས་ལ་བབས༔ ད་ལྟ་དུས་ངན་ལྔ་བརྒྱའི་ཐ་མ་འདིར༔ གཟུགས་ཅན་སྡང་དགྲ་དངོས་བརྒྱུད་གང་རུང་ནས༔ བསམ་ངན་སྦྱོར་རྩུབ་ཤོམ་པ་ཐམས་ཅད་དང་༔ གཟུགས་མེད་འབྱུང་པོ་བསྟན་དང་འགྲོ་ལ་གནོད༔ ཡུལ་འདྲེ་དམ་སྲིའི་དཔུང་ཚོགས་ཆམ་ལ་ཕོབ༔ དྲག་པོའི་ཕྲིན་ལས་བསྐལ་པའི་མེ་ལྕེའི་དབལ༔ སྲིད་གསུམ་བསྟན་འགྲོར་གནོད་རྣམས་རྡུལ་བརླགས་ནས༔ ཕན་བདེའི་སྣང་བ་རྒྱས་པའི་དགའ་སྟོན་གྱིས༔ བསྟན་དང་བསྟན་འཛིན་སྐྱོང་བའི་ལས་མཛོད་ཅིག༔ གཏོར་མ་ཟོར་འཕངས་དམིགས་མེད་བཞག༔ ཆད་མདོའི་གཏོར་མ་སྨན་རཀ་སྦྲན༔ ཧཱུྃ་བྷྱོ༔ སྔོན་ཚེ་བསྐལ་པ་ཐོག་མའི་དུས་ཀྱི་ཚེ༔ འོག་མིན་རང་སྣང་ཆོས་དབྱིངས་ཕོ་བྲང་དུ༔ བརྗོད་བྲལ་ཆོས་སྐུའི་སྟོན་པ་ཀུན་བཟང་དངོས༔ རྒྱུད་གསུངས་རྡོ་རྗེའི་གླུ་ཡིས་བསྐུལ་བའི་ཚེ༔ ཐབས་མཆོག་སྟོན་པ་ཀུན་བཟང་ཧེ་རུ་ཀས༔ ཁྲོ་རྒྱལ་ཡབ་ཡུམ་ཀོ་སེང་དབང་མོ་སོགས༔ རང་སྣང་ཕྱིར་གསལ་འཁོར་ཚོགས་དབང་བསྡུས་ནས༔ ཟབ་གསང་རྒྱུད་སྡེའི་གསང་མཛོད་གནད་བསྟན་པས༔ ཟག་མེད་བདེ་སྟོང་བརྗོད་བྲལ་དམ་བཅས་བཞིན༔ འཁོར་འདས་གདོད་མའི་གཞི་ལ་གྲོལ་བ་དང་༔ ལོག་རྟོག་འཁྲུལ་སྣང་འཁོར་བ་དོང་སྤྲུགས་མཛོད༔ ཧཱུྃ་བྷྱོ༔ དེ་འོག་གསང་ཆེན་སྟོན་པ་གཙོ་འཁོར་གྱིས༔ རྨད་བྱུང་གསང་ཆེན་སྦྱོར་སྒྲོལ་གནད་བཀྲོལ་ནས༔ ལོག་པར་རྟོག་པའི་སློབ་བུ་དམ་ལོག་ནས༔ སྦས་པའི་གསང་བ་མཚན་འཛིན་བརྟུལ་ཞུགས་ཀྱིས༔ འགྲོ་རྣམས་སྡུག་བསྔལ་དྲག་པོས་ནོན་པ་ལ༔ ཕྱོགས་བཅུའི་རྒྱལ་བའི་ཕྲིན་ལས་གཅིག་བསྡུས་པ༔ རྟ་ཕག་ཡབ་ཡུམ་ཁྲོས་པའི་ང་རོ་ཡིས༔ དྲེགས་པ་རཱུ་ཏྲ་སྡེར་བཅས་ཚར་བཅད་ཚེ༔ དབང་ཕྱུག་ལ་སོགས་ལྷ་ཀླུ་སྡེ་བརྒྱད་ཀྱིས༔ གསང་ཆེན་བསྟན་པ་སྲུང་བའི་རྣལ་འབྱོར་གྱི༔ བར་དུ་གཅོད་པའི་དགྲ་བགེགས་སྒྲོལ་བ་དང་༔ གང་བཅོལ་ལས་ཀུན་བྲན་བཞིན་བསྒྲུབ་པོ་ཞེས༔ ཇི་ལྟར་དམ་བཅས་བཞིན་དུ་ཕྲིན་ལས་མཛོད༔ ཧཱུྃ་བྷྱོ༔ དེ་འོག་སྤྲུལ་སྐུ་མཚོ་སྐྱེས་རྡོ་རྗེ་ཡིས༔ བོད་ཡུལ་བསམ་ཡས་མཆིམས་ཕུའི་དབེན་རྩ་རུ༔ མཚོ་རྒྱལ་ལ་སོགས་རྗེ་འབངས་གྲོགས་རྣམས་ལ༔ ཟབ་ཆོས་པདྨའི་ཐུགས་བཅུད་ཞལ་ཕྱེ་ནས༔ བཀའ་སྲུང་རལ་གཅིག་དུད་སོལ་མ་མགོན་གཟའ༔ དམ་ཅན་རྒྱ་མཚོས་སྤེལ་ཞིང་བསྲུང་ངོ་ཞེས༔ ཇི་ལྟར་དམ་བཅས་བཞིན་དུ་ཕྲིན་ལས་མཛོད༔ ས་མ་ཡཱ་བྷ་ལིང་ཏ་ཁཱ་ཧི༔ དེ་ནས་བསྟན་མའི་གཏོར་མ་ལ༔ བསང་ཆུས་བྲན་ཅིང་འདི་སྐད་དོ༔ ཧཱུྃ་བྷྱོ༔ སྔོན་ཚེ་རྒྱལ་དབང་པདྨ་ཀཱ་ར་ཡིས༔ དམ་ལ་བཏགས་པའི་བསྟན་མ་བཅུ་གཉིས་ཀྱིས༔ གངས་ཅན་བོད་འདིར་ཐུབ་བསྟན་བསྲུང་བའི་ཕྱིར༔ ལྟ་ལོག་མུ་སྟེགས་དྲུངས་ནས་ཕྱུང་ངོ་ཞེས༔ ཇི་ལྟར་དམ་བཅའ་གཉན་པོའི་ཡལ་གམ་བཞིན༔ བཤལ་ཆུའི་གཏོར་མ་བཞེས་ལ་ཕྲིན་ལས་མཛོད༔ མ་མ་ཧྲིང་ཧྲིང་བྷ་ལིང་ཏ་ཁཱ་ཧི༔ དེ་ནས་བྲོ་བརྡུང་བྱ་བ་ནི༔ ཧཱུྃ་ཧཱུྃ༔ སྟོང་གསུམ་སྟོང་གི་གཏོར་གཞོང་རི་རབ་འོག༔ བདུད་དང་ལོག་འདྲེན་དགྲ་བགེགས་འབྱུང་པོ་མནན༔ ཇི་སྲིད་བྱང་ཆུབ་སེམས་མཆོག་མ་སྐྱེས་བར༔ སྲིད་མཐའི་བར་དུ་ནམ་ཡང་ལྡང་མེད་གྱུར༔ ཨོཾ་ལཾ༔ ཨཱཿལཾ༔ ཧཱུྃ་ལཾ༔ སྟྭཾ་བྷ་ཡ་ནན་ནན༔ རྗེས་ལ་མཆོད་ཅིང་བསྟོད་པ་ནི༔ གཞུང་ལྟར་བྱ་ཞིང་སྒྲུབ་པའི་རྫས༔ དངོས་གྲུབ་ལེན་པ་འདི་སྐད་དོ༔ ཧཱུྃ་ཧྲཱིཿ སྐུ་གསུམ་བདག་ཉིད་དཔལ་ལྡན་དུད་སོལ་མའི༔ འགྱུར་མེད་སྐུ་གསུང་ཐུགས་ཡོན་ཕྲིན་ལས་ཀྱི༔ དངོས་གྲུབ་མ་ལུས་རྣལ་འབྱོར་བདག་ཅག་ལ༔ ཐོགས་མེད་དུས་འདིར་མྱུར་དུ་ཐོབ་ནས་ཀྱང་༔ ཞི་རྒྱས་དབང་དྲག་རབ་འབྱམས་ལས་རྣམས་ཀུན༔ གང་བརྩམ་ཡིད་བཞིན་འགྲུབ་པའི་དངོས་གྲུབ་སྩོལ༔ རྫས་ལ་རོལ་ཞིང་དགའ་སྟོན་བྱ༔ དེ་ནས་གཏོར་གཞོང་སྨན་འབྲུས་བཀང་༔ རྗེས་ལ་བསྡུ་རིམ་བྱ་བ་ནི༔ ཧོ༔ སྣང་བའི་ངོ་བོ་དཔལ་ལྡན་དུད་སོལ་མ༔ སྟོང་པའི་རང་བཞིན་ཆོས་དབྱིངས་སྐྱེ་མེད་ཀློང་༔ གཤེགས་བཞུད་མཚན་མའི་སྐྱོན་དང་བྲལ་བའི་ངང་༔ བསྐྱེད་པའི་ལྷ་སྐུ་དམིགས་མེད་བརྗོད་བྲལ་བཞག༔ ཨ་ཨཿ སླར་ཡང་རང་ཉིད་སྔགས་སྲུང་རལ་གཅིག་སྐུ༔ གནས་གསུམ་ཡི་གེ་གསུམ་གྱིས་སྤྲས་པ་ལས༔ རྡོ་རྗེའི་གོ་ཆས་ལུས་ཀུན་རབ་གཏམས་ནས༔ བར་ཆད་འབྱུང་པོས་ནམ་ཡང་གླགས་མི་རྙེད༔ བཛྲ་རཀྵ་རཀྵ་བྷྲཱུྃ༔ དེ་ནས་བསྔོ་བ་རྒྱས་འདེབས་ནི༔ ཨེ་མ་ཧོ༔ བདག་གཞན་འགྲོ་བ་ཀུན་གྱི་དོན་ཆེད་དུ༔ བཀའ་སྲུང་མཆོད་བསྟོད་རྩ་གསུམ་སྒྲུབ་ལ་སོགས༔ དགེ་རྩ་འདིས་མཚོན་སྐྱེ་འཕགས་དགེ་བ་ཀུན༔ མཐའ་ཡས་འགྲོ་ཀུན་བྱང་ཆུབ་ཐོབ་ཕྱིར་བསྔོ༔ དེ་མཐུས་ཕན་བདེའི་འབྱུང་གནས་རྒྱལ་བསྟན་དར༔ བསྟན་འཛིན་ཞབས་བརྟན་ཆོས་མཐུན་ཐུགས་བཞེད་འགྲུབ༔ འགྲོ་བའི་གེགས་ཞི་བདེ་སྐྱིད་འཕེལ་ཞིང་རྒྱས༔ རྫོགས་ལྡན་དཔལ་ཡོན་ནུབ་མེད་རྟག་བརྟན་ཤོག༔ བཀྲ་ཤིས་བརྗོད་ཅིང་མེ་ཏོག་སིལ་མ་འཐོར༔ ཨེ་མ་ཧོ༔ རྩ་གསུམ་བདག་ཉིད་དབྱངས་ཅན་ངག་གི་ལྷ༔ གང་འདུལ་བསྟན་སྲུང་ཚུལ་འཛིན་དུད་སོལ་མ༔ བྱང་ཆུབ་བར་དུ་ལུས་དང་གྲིབ་བཞིན་འགྲོགས༔ ཅི་བསམ་ཆོས་བཞིན་འགྲུབ་པའི་བཀྲ་ཤིས་ཤོག༔ ས་མ་ཡཱ༔ རྒྱ་རྒྱ་རྒྱ༔ དེ་ལྟར་ཚོགས་མཆོད་ཟབ་མོ་འདི་ཉིད་ལ༔ ནན་ཏན་བརྩོན་པས་ཚོགས་གཉིས་རབ་རྫོགས་ཏེ༔ རྣམ་མཁྱེན་སངས་རྒྱས་ཐོབ་པ་སོམ་ཉི་བྲལ༔ དེ་བས་འདི་ལ་བརྩོན་པ་མཆོག་ཏུ་བསྐྱེད༔ གུ་ཧྱ༔ ལུང་རིག་གླིང་པའི་དགོངས་གཏེར་རོ༔