འཁྲུགས་བསྐང་ཉེས་སྐྱོན་ཀུན་སེལ།
དུད་སོལ་ལྷ་མོའི་འཁྲུགས་བསྐང་ཉེས་སྐྱོན་ཀུན་སེལ་བཞུགས༔ གཏོར་མ་སྔགས་དྲུག་ཕྱག་དྲུག་གིས་བྱིན་གྱིས་བརླབས་ལ༔ བྷྱོ༔ སྣང་སྲིད་སྣོད་བཅུད་འབྱུང་བ་ལྔ་ཡི་དབྱིངས༔ ས་ཁམས་སྤྱན་མ་ཆུ་ཁམས་མ་མཱ་ཀི༔ མེ་ཁམས་གོས་དཀར་རླུང་ཁམས་དམ་ཚིག་སྒྲོལ༔ ནམ་མཁའི་དབྱིངས་ཕྱུག་ཀུན་ཏུ་བཟང་མོའི་ཀློང་༔ རང་བཞིན་རྣམ་དག་རྒྱལ་བ་ཀུན་གྱི་ཡུམ༔ འཕོ་འགྱུར་དགའ་སྡུག་སྤྲོས་པ་ལས་འདས་ཀྱང་༔ གདུལ་བྱའི་དོན་དུ་གནས་ཡུལ་ཌཀྐཱིའི་ཚོགས༔ ལེགས་ཉེས་སྟངས་འཛིན་དམ་ཚིག་རྗེས་གཅོད་པའི༔ མ་སྲིང་མཁའ་འགྲོའི་རྣམ་ཐར་སྟོན་པ་རྣམས༔ དམ་ལྡན་སྲུང་ཞིང་ཉམས་ལ་ཆད་པ་གཅོད༔ དེ་ཕྱིར་ཉམས་ཆག་ཉེས་པའི་སྐྱོན་རྣམས་ཀུན༔ མི་འཆབ་སྙིང་ནས་བཤགས་སོ་ཚངས་པར་སྩོལ༔ བྷྱོ༔ བདག་ནི་ཉོན་མོངས་ཞེ་སྡང་དབང་དུ་གྱུར༔ རྡོ་རྗེ་རིགས་ཀྱི་དམ་ཚིག་དང་འགལ་ཏེ༔ སྲོག་གཅོད་ལ་སོགས་གཞན་ལ་འཚེ་བ་བྱས༔ རྡོ་རྗེ་དྲིལ་བུ་སྨོན་འཇུག་སེམས་དང་བྲལ༔ བཛྲ་ཌཀྐཱི་སྤྲུལ་པར་བཅས་པ་ལ༔ མཐོལ་ལོ་བཤགས་སོ་ཚངས་པར་བསྩལ་དུ་གསོལ༔ བདག་ནི་ཉོན་མོངས་ང་རྒྱལ་དབང་དུ་གྱུར༔ རིན་ཆེན་རིགས་ཀྱི་དམ་ཚིག་དང་འགལ་ཏེ༔ མ་བྱིན་ལེན་དང་དཀོན་མཆོག་མཆོད་པ་གཡེལ༔ སེར་སྣས་བསྡམས་ཤིང་སྦྱིན་པ་རྣམ་བཞི་སྤངས༔ རཏྣ་ཌཀྐཱི་སྤྲུལ་པར་བཅས་པ་ལ༔ མཐོལ་ལོ་བཤགས་སོ་ཚངས་པར་བསྩལ་དུ་གསོལ༔ བདག་ནི་ཉོན་མོངས་འདོད་ཆགས་དབང་དུ་གྱུར༔ པདྨ་རིགས་ཀྱི་དམ་ཚིག་དང་འགལ་ཏེ༔ ལོག་པར་གཡེམ་སོགས་ཚངས་སྤྱོད་ཆོས་ལས་ཉམས༔ ཐེག་གསུམ་བཀའ་ལ་རས་གཅོད་གཟུ་ལུམ་བྱས༔ པདྨ་ཌཀྐཱི་སྤྲུལ་པར་བཅས་པ་ལ༔ མཐོལ་ལོ་བཤགས་སོ་ཚངས་པར་བསྩལ་དུ་གསོལ༔ བདག་ནི་ཉོན་མོངས་ཕྲག་དོག་དབང་དུ་གྱུར༔ ལས་ཀྱི་རིགས་ཀྱི་དམ་ཚིག་དང་འགལ་ཏེ༔ ཕྲག་དོག་དབང་གིས་འཕགས་པར་གཤེ་ཞིང་སྐུར༔ འགྲོ་ལ་གཡོ་སྒྱུའི་སྒྲོ་སྐུར་ལོག་པར་བལྟས༔ ཀརྨ་ཌཀྐཱི་སྤྲུལ་པར་བཅས་པ་ལ༔ མཐོལ་ལོ་བཤགས་སོ་ཚངས་པར་བསྩལ་དུ་གསོལ༔ བདག་ནི་ཉོན་མོངས་གཏི་མུག་དབང་གྱུར་ཏེ༔ དེ་བཞིན་རིགས་ཀྱི་དམ་ཚིག་དང་འགལ་ཏེ༔ བདག་གཞན་གཉིས་གཟུང་རྟག་ཆད་མཐའ་རུ་ལྷུང་༔ བསྐྱེད་རིམ་ཏིང་འཛིན་རྫོགས་རིམ་དགོངས་པ་འཁྲུལ༔ བྷུདྡྷ་ཌཀྐཱི་སྤྲུལ་འཁོར་བཅས་པ་ལ༔ མཐོལ་ལོ་བཤགས་སོ་ཚངས་པར་བསྩལ་དུ་གསོལ༔ གཞན་ཡང་འདུལ་བའི་ཆོས་སྒོར་ལེགས་ཞུགས་ཏེ༔ དགེ་བསྙེན་དགེ་ཚུལ་དགེ་སློང་བསླབ་ཁྲིམས་མནོས༔ རྩ་བཞི་ལྷག་མ་སྤང་ལྟུང་ལྟུང་བྱེད་དང་༔ སོར་བཤགས་ཉེས་བྱས་ལྟུང་བ་སྡེ་ལྔ་ལས༔ མ་ཤེས་མ་གུས་བག་མེད་ཉོན་མོངས་མང་༔ ལས་ངན་དབང་གིས་ཉམས་ཆག་ཅི་བསགས་པ༔ མཁན་པོ་ལས་སློབ་དངོས་བརྒྱུད་མཆོག་གསུམ་ལ༔ མི་འཆབ་འགྱོད་སེམས་དྲག་པོས་མཐོལ་ལོ་བཤགས༔ བྱང་ཞིང་དག་ནས་ཚངས་པར་བསྩལ་དུ་གསོལ༔ རྒྱལ་བའི་གཤེགས་ཤུལ་རྒྱལ་སྲས་ལམ་བཟང་ལས༔ སྨོན་འཇུག་བྱང་ཆུབ་སེམས་ཀྱི་སྡོམ་པ་བླངས༔ དཀར་ནག་ཆོས་བརྒྱད་རྩ་ལྟུང་ཉི་ཤུ་སོགས༔ གཞན་ལ་ཕན་པའི་སྤྱོད་པ་ལྷུར་མ་བླང་༔ གཡོ་དང་སྒྱུས་བསླད་རང་དོན་དང་བླངས་ནས༔ བྱང་ཆུབ་ལམ་ལས་རིང་དུ་གྱུར་པ་ཀུན༔ རྒྱལ་དང་དེ་སྲས་ཐེག་ཆེན་དགེ་བའི་བཤེས༔ ཕ་མ་ལ་སོགས་བཤགས་ཡུལ་ཐམས་ཅད་ལ༔ མི་འཆབ་བཤགས་སོ་དག་ཚངས་དངོས་གྲུབ་སྩོལ༔ བྱ་སྤྱོད་རྣལ་འབྱོར་བླ་མེད་རྒྱུད་སྡེ་ལས༔ སྤྱི་དང་བྱེ་བྲག་དབང་བསྐུར་ལེགས་མནོས་ཏེ༔ གསང་བ་སྔགས་ཀྱི་དམ་སྡོམ་མཐའ་དག་ལ༔ ལས་ཉོན་དབང་གིས་ཉམས་ཆག་ཅི་བསགས་པ༔ དམ་ཚིག་དབང་དང་ཤེས་རབ་རྒྱུད་དོན་བཤགས༔ མན་ངག་ལུང་སྦྱིན་ཉམས་ཆག་སྐོང་མཛད་པ༔ རྡོ་རྗེ་སློབ་དཔོན་མཆེད་དང་ལྕམ་དྲལ་ལ༔ མཐོལ་ལོ་བཤགས་སོ་དག་ཚངས་དངོས་གྲུབ་སྩོལ༔ ཉ་སྟོང་བརྒྱད་གསུམ་དུས་ཀྱི་མཆོད་པ་ཆག༔ ཡི་དམ་སྤང་བླང་མཁའ་འགྲོ་ཆོས་སྐྱོང་ལ༔ ཚོགས་གཏོར་ཆུང་ཞིང་དུས་མིན་ལས་ལ་བསྐུལ༔ རང་འདོད་གྲུབ་མཐའ་རྩ་གསུམ་སྲུང་མ་ལ༔ འགལ་འཁྲུལ་ཉེས་པའི་བག་ཆགས་ཅི་བསགས་པ༔ མཐོལ་ལོ་བཤགས་སོ་དག་ཚངས་མཆོག་སྩོལ་ཅིག༔ བྷྱོ༔ ཁྱད་པར་མ་ཅིག་དཔལ་ལྡན་དུད་སོལ་མ༔ བརྩེ་བའི་ཐུགས་ཀྱིས་དགྱེས་ཤིང་དགོངས་སུ་གསོལ༔ འཛུམ་པའི་སྤྱན་གྱིས་གཟིགས་ཤིང་གསན་དུ་གསོལ༔ ཉམས་ཆག་སྒྲིབ་པའི་བག་ཆགས་མ་ལུས་པ༔ ཁྱོད་ཀྱི་སྤྱན་སྔར་བདག་གིས་བཤགས་བགྱིད་ན༔ མ་ཡིས་བུ་ལ་རྗེས་སུ་གདུང་བ་ལྟར༔ མཐོལ་བཤགས་བཟོད་གསོལ་དང་དུ་བཞེས་ནས་ཀྱང་༔ ཉམས་ཆག་རྟོག་སྒྲིབ་དབྱིངས་སུ་བསལ་དུ་གསོལ༔ ཅེས་དང་གཞན་ཡང་བཤགས་ཚིག་ཅི་རིགས་བརྗོད༔ ཡི་གེ་བརྒྱ་པས་ནོངས་པ་བཤགས་པར་བྱའོ༔ ཞེས་པའང་དད་ལྡན་མོས་གུས་ཀྱི་སྤྱན་དཀྱུས་རྣམ་པར་འཛུམ་ཞིང་༔ ཐོས་བསམ་སྒོམ་པའི་ལང་ཚོ་རབ་ཏུ་མཛེས་པ༔ ཤེས་རབ་མཆོག་གི་ལུས་རྩལ་སྒེག་པའི་གཞོན་ནུ་ས་ར་ཧི་ཏ་བྷ་དྲས་ཡང་ཡང་བསྐུལ་ངོར༔ རང་བྱུང་པདྨ་རྒྱལ་པོ་དང་གྲུབ་དབང་ཀུན་བཟང་གཞན་ཕན་གྱི་བྱིན་རླབས་ལས་རང་རྩལ་ཌཀྐཱིའི་གཏེར་ལ་དབང་བསྒྱུར་བའི་སྤྲང་བན་ལུང་རིག་གླིང་པས་གཏེར་ཚིག་ཉུང་ངུ་ཞིག་འདུག་པ་ལ་རང་བློས་ཁ་སབ་སྟེ་སྤེལ་བའི་མཐུས་དམ་ལྡན་ཆོས་བརྒྱུད་འཛིན་པ་རྣམས་ལ་སྲུང་མས་འགོ་ཞིང་སྡོང་གྲོགས་མཛད་པའི་རྒྱུར་གྱུར་ཅིག༔ དགེའོ།།