གཡང་འགུགས་བདེ་སྐྱིད་དཔལ་འབྱུང་།

༄༅༔ རྩ་གསུམ་སྤྱི་དང་ཁྱད་པར་དུད་སོལ་ལྷ་མོ་ལ་སྦྱར་རྒྱུའི་གཡང་འགུགས་བདེ་སྐྱིད་དཔལ་འབྱུང་ཞེས་བྱ་བ་བཞུགས་སོ༔

༄༅༔ དངོས་གྲུབ་རྒྱ་མཚོའི་གཏེར་འཆང་བ༔ རྩ་གསུམ་ནོར་ལྷ་སྲུང་མ་ལ༔ ཕྱག་འཚལ་བདེ་སྐྱིད་འབྱུང་བའི་གནས༔ བྱང་ཆུབ་སེམས་ཀྱིས་འདི་བཞིན་བརྩམས༔ དེ་ཡང་ཆོ་ག་གང་རུང་གི་ཚོགས་ལྷག་ཡན་གྲུབ་པའམ༔ མིན་ཀྱང་གཞི་གཙང་དཀར་པོའི་སྟེང་དུ་འབྲུས་གཡུང་དྲུང་བྲིས་པའི་ཁར་གཏེར་བུམ་ཡོད་ན་དེ་དང་ཡང་ན་གཡང་བཤོས་ནོར་བུའི་རྒྱན་ཅན༔ ཕྱེ་མར༔ མར་ཐུད་ཀྱི་རི་བོ༔ ཇ་ཆང་འོ་ཞོའི་བཏུང་བ་སོགས་ཟས་སྣ་རོལ་མོའི་རིགས་བྱེད༔ གོ་མཚོན་ཅི་ཡོད༔ བུད་མེད་ཀྱི་རྒྱན་ཆ་གསེར་དངུལ་སོགས་རིན་པོ་ཆེའི་རིགས་ཁྱད་པར་དུ་སྐུ་གསུང་ཐུགས་རྟེན་སོགས་བཤམས་ལ༔ དྲི་ཞིམ་སྤོས་དུད་གཏོང་༔ མདའ་དར་གཡབ་སྟེ༔ རང་ཉིད་ཨོ་རྒྱན་ཆེན་པོའམ་ནོར་རྒྱུན་མའམ་རྣམ་སྲས་ཛམ་ལྷ་སོགས་གང་རུང་དུ་བསྒོམས་ལ༔ མདུན་མཁར་པདྨ་འབྱུང་གནས་ལ་ནོར་ལྷ་མ་ཚང་བ་མེད་པས་བསྐོར་བ་ལ་གདུང་བས་གསོལ་འདེབས་བསམ་ལྷུན་སྤྱི་དང་ཁྱད་པར་མཁའ་འགྲོ་ནོར་ལྷའི་གསོལ་འདེབས་ཚིག་དྲུག་པོ་བརྒྱ་རྩ་སོགས་ཐུན་བཟུང་ནས༔ དེ་ལྟར་གསོལ་བ་བཏབ་པས་ཨོ་རྒྱན་ཆེན་པོ་འཁོར་ནོར་ལྷ་རྒྱལ་མཚོའི་ཚོགས་ཀྱི་སྐུའི་འོད་ཟེར་ཁ་དོག་ལྔ་ལྡན་ཕྱོགས་བཅུར་འཕྲོས་པས་འབྱུང་ལྔའི་དྭངས་བཅུད་སོགས་ཕྱི་སྣོད་ཀྱི་ཕྱྭ་གཡང་དང་༔ ནང་བཅུད་སྐྱེ་འགྲོའི་ཚོགས་ཀྱི་ཚེ་དཔལ་བསོད་ནམས་མངའ་ཐང་ཕྱྭ་གཡང་ཐམས་ཅད་སྦྱིན་བདག་གི་གནས་ཁང་སྦྲ་ཁྱིམ་དང་༔ མི་ནོར་ཡོ་བྱད་གཡང་འགུགས་པའི་རྫས་ལ་བཀུག་ནས་ཐིམ་པར་བསམ་ལ༔ ཀྱཻ༔ དེ་རིང་བཀྲ་ཤིས་དགེ་བའི་གནས་མཆོག་འདིར༔ རྩ་གསུམ་སྲུང་མ་ནོར་ལྷ་རྒྱ་མཚོ་ལ༔ གསོལ་བཏབ་བདག་ལུས་ལོངས་སྤྱོད་དགེ་བའི་ཚོགས༔ མཆོད་པའི་མཎྜལ་ཉིད་དུ་དམིགས་ཏེ་འབུལ༔ ཚེ་རབས་ཐོག་མེད་དུས་ནས་ད་བར་དུ༔ མ་བྱིན་ལེན་དང་འཕྲོག་བཅོམ་སེར་སྣའི་མཐུས༔ མཆོད་སྦྱིན་གཡེལ་སོགས་མི་དགེའི་ལས་བསགས་ལ༔ ཐམས་ཅད་སྙིང་ནས་བཤགས་སོ་ཚངས་པར་སྩོལ༔ ཕྱི་ནང་སྣོད་བཅུད་ཕྱྭ་གཡང་དངོས་གྲུབ་ཀུན༔ ད་ལྟ་ཉིད་དུ་འགུགས་ཕྱིར་གསོལ་འདེབས་ན༔ མཁྱེན་བརྩེ་ནུས་གསུམ་ཐུགས་རྗེའི་འོད་ཟེར་གྱིས༔ ཐོགས་མེད་མྱུར་དུ་འགུགས་པར་མཛད་དུ་གསོལ༔ ཀྱཻ༔ བསླུ་མེད་སྟོན་པ་རྫོགས་པའི་སངས་རྒྱས་དང་༔ ཆགས་བྲལ་ལམ་མཆོག་ལུང་རྟོགས་དམ་པའི་ཆོས༔ རྣམ་འདྲེན་ཚོགས་ཀྱི་ཞིང་མཆོག་དགེ་འདུན་སྡེ༔ སྲིད་ཞིའི་བདེ་སྐྱིད་ཕྱྭ་གཡང་འདིར་ཁུག་ཅིག༔ བྱིན་རླབས་རྩ་བ་བཀའ་བརྒྱུད་བླ་མ་དང་༔ དངོས་གྲུབ་རྩ་བ་ཡི་དམ་དཀྱིལ་འཁོར་ལྷ༔ ཕྲིན་ལས་རྩ་བ་གནས་གསུམ་མཁའ་འགྲོའི་ཚོགས༔ དུས་གསུམ་དགེ་བའི་ཕྱྭ་གཡང་འདིར་ཁུག་ཅིག༔ དཔལ་མགོན་ལ་སོགས་ཕོ་རྒྱུད་མགོན་པོའི་ཚོགས༔ དཔལ་ལྡན་དུད་སོལ་མོ་རྒྱུད་མ་མོའི་སྡེ༔ དཔལ་གཡང་ཀུན་སྩོལ་ནོར་བདག་རྒྱལ་མོའི་དཔུང་༔ དེ་རིང་གནས་འདིར་ཁམས་གསུམ་ཕྱྭ་གཡང་ཁུག༔ ཅེས་དང་༔ ཀ་དག་བདེ་སྟོང་འགྱུར་མེད་ཐུགས་ཀྱི་གཡང་༔ ཁ་དོག་གསལ་འཚེར་མཚན་དཔེའི་སྐུ་ཡི་གཡང་༔ ག་དར་དྲི་མེད་ཚངས་དབྱངས་གསུང་གི་གཡང་༔ ང་བདག་འཛིན་བྲལ་གསང་གསུམ་ཕྱྭ་གཡང་ཁུག༔ ཅ་རེ་ལ་སོགས་དབང་པོ་སྒོ་ལྔའི་གཡང་༔ ཆ་རོགས་མཐུན་གཉིས་ཟུང་སྡེབ་གྲོགས་ཀྱི་གཡང་༔ ཇ་དར་གསེར་དངུལ་ཡོ་བྱད་ནོར་གྱི་གཡང་༔ ཉ་གནས་ཆུ་བོའི་རྒྱུན་བཞིན་གནས་འདིར་ཁུག༔ ཏ་ཐཱ་ག་ཏའི་ལུང་རྟོགས་བསྟན་པའི་གཡང་༔ ཐ་དད་རྒྱ་བོད་ཧོར་གསུམ་རྟ་ཕྱུགས་གཡང་༔ ད་ལྟ་མངོན་མཐོ་འབྱོར་པའི་དྲག་ལྡན་གཡང་༔ ན་བུན་མཁའ་ལ་འདུས་བཞིན་གནས་འདིར་ཁུག༔ པ་སངས་ལ་སོགས་གཟའ་སྐར་ལེགས་པའི་གཡང་༔ ཕ་རོལ་དགྲ་འཇོམས་དཔའ་བོ་སྟོབས་ཀྱི་གཡང་༔ བ་གམ་རྫོང་མཁར་སྦྲ་ཁང་ཁྱིམ་གྱི་གཡང་༔ མ་ལུས་ལུས་པ་མེད་པར་ཕྱྭ་གཡང་ཁུག༔ ཙ་རི་ལ་སོགས་གནས་ཡུལ་བྱིན་ཅན་གཡང་༔ ཚ་ཟེར་ཅན་སོགས་གསལ་བྱེད་སྒྲོན་མེའི་གཡང་༔ ཛ་ཡས་བྱིན་བརླབས་བཀྲ་ཤིས་རྫས་རྟགས་གཡང་༔ ཝ་ཆུ་ཁྲིད་བཞིན་དགེ་བའི་གནས་འདིར་ཁུག༔ ཞྭ་གོས་ལྷམ་སོགས་མཁོ་བའི་ཡོ་བྱད་གཡང་༔ ཟ་ར་ཚག་བཞིན་མི་རབས་རྒྱུན་འབྲེལ་གཡང་༔ འ་ཅག་ཚེ་འདིར་བདེ་སྐྱིད་འབྱོར་བའི་གཡང་༔ ཡ་མཚན་གཏན་འདུན་ཐར་པའི་ཕྱྭ་གཡང་ཁུག༔ རྭ་ཆགས་དུད་འགྲོ་སྟོབས་ལྡན་ཆེ་ཕྲའི་གཡང་༔ ལ་ལུང་སྐད་ཅིག་བགྲོད་བྱེད་རྟ་ཡི་གཡང་༔ ཤ་བ་རིས་སོགས་གོས་ཕྲུག་དར་ཟབ་གཡང༔ ས་རྡུལ་རླུང་གིས་བསྡུས་བཞིན་གནས་འདིར་ཁུག༔ ཧ་ལ་རྣམ་རྟོག་ཞི་བྱེད་གདམས་པའི་གཡང་༔ ཨ་ཏི་རྩོལ་བྲལ་ལྟ་སྒོམ་སྤྱོད་པའི་གཡང་༔ ཨ་མི་དྷེ་ཝའི་དགོངས་དོན་འབྲས་བུའི་གཡང་༔ ཨ་ཧོ་གསོལ་འདེབས་བརྩོན་པའི་གནས་འདིར་ཁུག༔ ཅེས་སོགས་དང་མཐར༔ ཨེ་མ་ཧོ༔ ཇི་ལྟར་དཔག་བསམ་ཤིང་ལས་དགོས་འདོད་ཀུན༔ ཀུན་ནས་འབྲལ་མེད་འབྱུང་བཞིན་གསོལ་བཏབ་འབྲས༔ འབྲས་བུ་བསླུ་མེད་འདི་ཕྱིའི་འདོད་པའི་དོན༔ དོན་གྲུབ་ལེགས་ཚོགས་འཕེལ་བའི་གཡང་བརྟན་ཤོག༔ ཅེས་བརྗོད་ཅིང་གཡང་སྒམ་སོགས་སུ་འཇུག་པར་བྱའོ༔ ཞེས་པའང་དད་པ་དང་ལྡན་པའི་སྦྱིན་བདག་བན་རྒན་ཨོ་རྒྱན་རིག་འཛིན་ངོར་དཀོར་རྒན་བླུན་པོ་རྒྱ་སྤྲུལ་གྱིས་སྨྲས་པ་དགེའོ༔