དུད་སོལ་ལྷ་མོའི་བསྐུལ་བ་མེའི་སྤུ་གྲི།
སྔགས་སྲུང་ཁྲོས་མའི་ཐུགས་སྒྲུབ་ལས༔ དུད་སོལ་ལྷ་མོའི་བསྐུལ་བ་མེའི་སྤུ་གྲི་བཞུགས༔
རང་བྱུང་དབྱིངས་ཀྱི་ལྷ་ལ་འདུད༔ ཞིང་བཅུ་སྒྲོལ་བའི་ལས་བརྩམ་ཚེ༔ དམར་གཏོར་ལྷ་གྲངས་ཤ་ཁྲག་བརྒྱན༔ དགྲ་བགེགས་འགུགས་ཤིང་རང་ཉིད་ནི༔ རལ་གཅིག་མ་མོའི་ཏིང་འཛིན་གྱིས༔ སྤྲུལ་བའི་ཕོ་ཉས་བསྒྲལ་བ་ཡི༔ ཤ་ཁྲག་ཟག་མེད་བདུད་རྩིར་དམིགས༔ གཙོ་འཁོར་རྣམས་ལ་སྔགས་འདི་འབུལ༔ མ་མ་རུ་ལུ་རུ་ལུ་རེ་མ་ཏི་ཨ་ཡ་མ་དུ་རུ་ཤ་ཤ་ན་དགྲ་བགེགས་ཆྒཻ་མོ་ཞེས་བྱ་བའི་ཤ་ཁྲག་རུས་གསུམ་ལ་ཁཱ་ཧི༔ ས་མ་ཡཱ་པུ་ཛ་ཧོ༔ ཚིལ་ཆེན་དུད་པ་སྤོས་དང་སྦྱར༔ རྐང་གླིང་འབུད་ཅིང་རོལ་མོ་འཁྲོལ༔ རྔམས་པའི་དབྱངས་ཀྱིས་འདི་སྐད་དོ༔ ཧཱུྃ་བྷྱོ༔ སྐྱེ་མེད་ཆོས་དབྱིངས་ཡུམ་གྱི་མཁའ་ཀློང་ལས༔ གསང་ཆེན་བཀའ་ཡི་བསྟན་པ་བསྲུང་བ་དང་༔ ཞིང་བཅུ་དགྲ་བོ་རྨིང་མེད་བརླག་པའི་ཕྱིར༔ འཇིགས་རུང་རྔམས་པའི་དུར་ཁྲོད་བརྒྱད་རྣམས་སུ༔ མི་བཟད་གཏུམ་པོའི་དགྲ་བོའི་སྐུ་སྤྲུལ་པ༔ དཔལ་ལྡན་དུད་སོལ་ལྷ་མོའི་ཐུགས་དམ་བསྐུལ༔ ཧཱུྃ་བྷྱོ༔ ཤར་ཕྱོགས་དགའ་བའི་ཚལ་གྱི་དུར་ཁྲོད་ནས༔ བཅོམ་ལྡན་རྡོ་རྗེ་ཁྲག་འཐུང་ཡབ་ཡུམ་གྱི༔ བཀའ་ཡི་གཉེར་བྱང་གཏད་པའི་ཌཱཀྐི་མ༔ དཀར་མོ་ཟླ་བའི་འོད་ཅན་དབྱིངས་ནས་བཞེངས༔ ཐུགས་ཀྱི་རིགས་ཀྱི་ཁྲོ་བོ་ཁྲོ་མོ་དང་༔ ཤར་ཕྱོགས་དྲི་ཟ་ཕོ་མོའི་བཀའ་བསྒྱུར་ལ༔ དམ་ཉམས་དགྲ་ལ་སྨྱོ་འབོགས་བརྒྱལ་ནད་ཐོངས༔ ཧཱུྃ་བྷྱོ༔ ལྷོ་ཕྱོགས་སྣ་ཚོགས་འདྲེས་པའི་དུར་ཁྲོད་ནས༔ བཅོམ་ལྡན་རིན་ཆེན་ཁྲག་འཐུང་ཡབ་ཡུམ་གྱི༔ བཀའ་ཡི་ཐ་ཚིག་འཆང་བའི་ཌཱཀྐི་མ༔ སེར་མོ་ཉི་མའི་གདོང་ཅན་དབྱིངས་ནས་བཞེངས༔ ཡོན་ཏན་རིགས་ཀྱི་ཁྲོ་བོ་ཁྲོ་མོ་དང་༔ ལྷོ་ཕྱོགས་གཤིན་རྗེ་ཕོ་མོའི་བཀའ་བསྒྱུར་ལ༔ བསྟན་པའི་དགྲ་བོ་འཆི་བདག་ཁྲམ་ལ་ཐོབ༔ ཧཱུྃ་བྷྱོ༔ ནུབ་ཕྱོགས་གསང་ཆེན་རོལ་པའི་དུར་ཁྲོད་ནས༔ བཅོམ་ལྡན་པདྨ་ཁྲག་འཐུང་ཡབ་ཡུམ་གྱིས༔ དྲག་པོའི་ལས་ལ་བསྔགས་པའི་ཌཱཀྐི་མ༔ དམར་མོ་ཟངས་ཀྱི་རལ་ཅན་དབྱིངས་ནས་བཞེངས༔ གསུང་གི་རིགས་ཀྱི་ཁྲོ་བོ་ཁྲོ་མོ་དང་༔ ནུབ་ཕྱོགས་ཀླུ་གདོན་ཕོ་མོའི་བཀའ་བསྒྱུར་ལ༔ མཛེ་ནད་སྣ་དགུས་ཞིང་བཅུ་རྡུལ་དུ་རློགས༔ ཧཱུྃ་བྷྱོ༔ བྱང་ཕྱོགས་གད་རྒྱངས་སྒྲོགས་པའི་དུར་ཁྲོད་ནས༔ བཅོམ་ལྡན་ཀརྨ་ཁྲག་འཐུང་ཡབ་ཡུམ་གྱིས༔ བསྟན་དགྲ་སྒྲོལ་ལ་མངགས་པའི་ཌཱཀྐི་མ༔ ལྗང་མོ་གཡུ་ཡི་ཟུར་ཕུད་དབྱིངས་ནས་བཞེངས༔ ཕྲིན་ལས་རིགས་ཀྱི་ཁྲོ་བོ་ཁྲོ་མོ་དང་༔ བྱང་ཕྱོགས་གནོད་སྦྱིན་ཕོ་མོའི་བཀའ་བསྒྱུར་ལ༔ ཉམས་པ་བདུན་ལྡན་ཞིང་བཅུ་ཕྱགས་མས་ཐོབ༔ ཧཱུྃ་བྷྱོ༔ དབུས་ཕྱོགས་མེ་རི་འབར་བའི་དུར་ཁྲོད་ནས༔ སྔགས་སྲུང་ནམ་མཁའི་རལ་གཅིག་བཀའ་སྡོད་མ༔ དཔལ་ལྡན་དུད་སོལ་ལྷ་མོ་དབྱིངས་ནས་བཞེངས༔ གསང་སྔགས་རིག་སྔགས་ཁྲོ་བོ་ཁྲོ་མོ་དང་༔ སྔགས་སྲུང་དམ་ཅན་རྒྱ་མཚོའི་བཀའ་བསྒྱུར་ལ༔ ཐོགས་མེད་ཕྲིན་ལས་གནམ་ལྕགས་འཁྲུལ་འཁོར་གྱིས༔ གསང་ཆེན་བསྟན་དགྲ་སྒྲོལ་བའི་ཕྲིན་ལས་མཛོད༔ ཧཱུྃ་བྷྱོ༔ སྟེང་ཕྱོགས་སུམ་ཅུ་རྩ་གསུམ་ལྷ་གནས་ནས༔འཆི་མེད་དབང་མོའི་སྲས་མོ་དུང་སྐྱོང་མ༔ དཀར་ཕྱོགས་ལྷ་ཁམས་རྒྱ་མཚོའི་བཀའ་བསྒྱུར་ལ༔ ལྷ་ཡི་དལ་ཁ་དམ་ཉམས་དགྲ་ལ་ཐོངས༔ ཧཱུྃ་བྷྱོ༔ འོག་ཕྱོགས་རྒྱ་མཚོ་ཆེན་པོའི་གཏིང་རུམ་ནས༔ ཀླུ་རྒྱལ་འཇོག་པོའི་སྲས་མོ་གཟི་འབར་མ༔ གདུག་པ་ཀླུ་རིགས་ཕོ་མོའི་བཀའ་བསྒྱུར་ལ༔ ཀླུ་ནད་གདུག་པ་ཞིང་བཅུ་དབྱིངས་སུ་སྒྲོལ༔ ཧཱུྃ་བྷྱོ༔ བར་སྣང་བཅུ་གཉིས་ཁྱིམ་གྱི་གོ་ལ་ནས༔ མཁའ་རྒྱུའི་གཙོ་མོ་མ་མོ་ཁ་འབར་མ༔ གཏུམ་པའི་གཟའ་དང་རྒྱུ་སྐར་བཀའ་བསྒྱུར་ལ༔ སྡེ་བརྒྱད་གདུག་རྩུབ་དམ་ཉམས་དགྲ་ལ་ཐོངས༔ ཧཱུྃ་བྷྱོ༔ འཛམ་གླིང་ཆོས་འཁོར་གཙུག་ལག་གཞལ་ཡས་ནས༔ རྒྱལ་བའི་བསྟན་སྲུང་རྡོ་རྗེ་རབ་བརྟན་མ༔ བསྟན་སྲུང་དམ་ཅན་རྒྱ་མཚོའི་བཀའ་བསྒྱུར་ལ༔ བསྟན་བཤིག་དགྲ་ལ་བཀའ་ཡིས་ཆད་པ་ཆོད༔ ཧཱུྃ་བྷྱོ༔ ཟབ་གསང་རྫོགས་ཆེན་འཆད་ཉན་སྤེལ་བའི་ཚེ༔ སྙིང་ཐིག་སྲུང་མ་རྡོ་རྗེ་གཡུ་སྒྲོན་མ༔ སྐྱེ་མེད་དབྱིངས་ནས་ཐུགས་རྗེའི་སྐུར་བཞེངས་ལ༔ སྣང་བཞི་མཐའ་རུ་ཕྱིན་པའི་ཕྲིན་ལས་མཛོད༔ ཧཱུྃ་བྷྱོ༔ མིང་བརྒྱ་མཚན་སྟོང་ལྷ་མོ་དུད་སོལ་མ༔ ཞི་བའི་ལས་མཛད་དཀར་སེར་མཛེས་པའི་སྐུ༔ མདའ་དར་བསྣམས་ནས་འཆི་མེད་ཚེ་གཡང་སྩོལ༔ རྣལ་འབྱོར་ཚེ་སྲོག་བསྲིང་ཕྱིར་ལས་ལ་བསྐུལ༔ ཚེ་ཡི་བར་ཆད་ཞི་བའི་ཕྲིན་ལས་མཛོད༔ རྒྱས་པའི་ལས་མཛད་གསེར་མདོག་འཛུམ་པའི་མདངས༔ རིན་ཆེན་གཏེར་བུམ་བསྣམས་ནས་ཕྱྭ་གཡང་སྡུད༔ ལོངས་སྤྱོད་འབྱོར་བ་འཕེལ་ཕྱིར་ལས་ལ་བསྐུལ༔ སྣོད་བཅུད་ཕྱྭ་གཡང་ཉམས་པའི་རྒུད་པ་སོལ༔ ཚེ་བསོད་འབྱོར་དྲུག་རྒྱས་པའི་ཕྲིན་ལས་མཛོད༔ དབང་གི་ལས་མཛད་དམར་མོ་ཆགས་པའི་ཉམས༔ ལྕགས་ཀྱུ་ཞགས་པས་སྣང་སྲིད་དབང་དུ་སྡུད༔ སྐྱེ་འགྲོའི་བླ་ཡིད་དགུགས་ཕྱིར་ལས་ལ་བསྐུལ༔ ལྷ་འདྲེ་མི་གསུམ་ཟས་ནོར་དབང་བསྡུས་ལ༔ བསྟན་འགྲོའི་དོན་ཀུན་འགྲུབ་པའི་ཕྲིན་ལས་མཛོད༔ དྲག་པོའི་ལས་མཛད་དུར་ཁྲོད་གནས་ཀུན་ཉུལ༔འཇིགས་རུང་སྲོག་ཆགས་སྣ་ཚོགས་ཆིབས་རོལ་ཁྲིད༔ སྡེ་བརྒྱད་སྡོང་ཟླ་སྤྲུལ་པ་ཡང་སྤྲུལ་འགྱེད༔ བསྟན་ལ་སྡང་བར་འགྲོ་བའི་བདེ་སྐྱིད་བཅོམ༔ རྣལ་འབྱོར་བདག་དང་བསྲུང་བྱ་འཁོར་བཅས་ལ༔ དུས་གསུམ་ཀུན་ཏུ་སྡང་སེམས་གདུག་རྩུབ་འཆང་༔ ཁ་དཀར་སྙིང་གནག་ཞེ་ནས་དམོད་པའི་རིགས༔ བསྟན་དགྲ་དམ་ཉམས་སྒྲོལ་ཕྱིར་ཐུགས་དམ་བསྐུལ༔ ཁྱོད་ཐུགས་ཞི་བའི་དབྱིངས་ནས་མ་གཡོས་ཀྱང་༔ མགོན་མེད་རྣལ་འབྱོར་བརྩེ་བས་རྗེས་དགོངས་ལ༔ འགུག་བསྒྲལ་སྤར་བ་དྲག་པོའི་ཕྲིན་ལས་ཀྱིས༔ ལོག་འདྲེན་རྡུལ་དུ་བརླག་པའི་མཐུ་དཔུང་བསྐྱེད༔ རྐྱེན་ངན་བར་ཆད་བཟློག་པའི་དྲག་རྩལ་སྟོན༔ བྱད་མ་ལྷ་སྲུང་གཞོམ་པའི་དཔའ་རྩལ་ཕྱུང་༔ ཐུགས་དམ་དུས་ལ་བབ་བོ་ས་མ་ཡཱ༔ ཞེས་བརྗོད་དམར་གཏོར་དགྲ་ཕྱོགས་འཕངས༔ རིག་སྔགས་དམོད་ཚིག་གཞན་ཡང་བྱ༔ ཐལ་མོ་རྡེབ་ཅིང་སྟོང་ཉིད་བསྒོམ༔ དགུ་མཚམས་དུས་དང་བསྟུན་ཏེ་བྱ༔ གུ་ཧྱ༔ ཞེས་པའང་ཟབ་གསང་དགོངས་པའི་གཏེར་ཁ་ལས་བྱུང་བ་བཞིན་རྒྱལ་བའི་སྲས་ཀྱི་འཇུག་ངོགས་ལ་ངང་པ་པད་མའི་མཚོ་ལ་བརྩེ་བ་བཞིན་སྤྲོས་པའི་བརྟུལ་ཞུགས་ཅན་གཞན་ཕན་བཟང་པོས་བསྐུལ་ངོར། གྲུབ་དབང་རྫོགས་ཆེན་པའི་སློབ་འབངས་ལུང་རིག་གླིང་པས་སྨྲས་པ་དུས་གསུམ་དགེ་བའི་དཔལ་དང་རྒྱལ་བསྟན་རིན་པོ་ཆེ་མི་ཉམས་ཤིང་གོང་དུ་འཕེལ་བའི་གཞི་རུ་ཚུགས་ཤིག སརྦ་ཛ་ཡནྟུ། དགེའོ། །དགེའོ། །དགེའོ།།