བསྒྲལ་ལས་བརྒྱ་བྱིན་མཚོན་རྣོན།

དུད་སོལ་ལྷ་མོའི་ཐུགས་སྒྲུབ་ལས༔ བསྒྲལ་ལས་བརྒྱ་བྱིན་མཚོན་རྣོན་བཞུགས་སོ༔

དབྱིངས་ཀྱི་མ་མོར་གུས་བཏུད་ནས༔ དུད་སོལ་ལྷ་མོའི་རྣལ་འབྱོར་པས༔ དགྲ་བགེགས་སྒྲོལ་བའི་ལས་བརྩམས་ཚེ༔ བསྙེན་སྒྲུབ་ལས་སྦྱོར་སྔགས་དམིགས་འབད༔ མདུན་དུ་དགྲ་གཟུགས་ལིང་ག་བཤམས༔ གསེར་སྐྱེམས་ཕུད་རྒོད་ཕྱོགས་བཅུར་གཏོར༔ བདེན་པའི་དཔང་དུ་མཆོག་གསུམ་ལྷ༔ སྲུང་མ་དང་བཅས་མདུན་མཁར་བསམ༔ གཟུ་དཔང་ཚིག་འདིས་སྙན་གསན་དབབ༔ རང་ཉིད་རལ་གཅིག་ང་རྒྱལ་ངང་༔ རྔ་བརྡུང་དུང་འབུད་རུ་མཚོན་ཕྱར༔ གདུང་བའི་ཡུས་ཀྱིས་འདི་སྐད་དོ༔ ཧཱུྃ་བྷྱོ༔ མི་མངོན་སྐུ་གསུམ་དབྱིངས་ཀྱི་ཕོ་བྲང་ནས༔ བརྒྱུད་གསུམ་རིག་འཛིན་བླ་མ་གཟུ་དང་དཔང་༔ ལོག་རྟོག་བློ་ངན་འཁྲུལ་བའི་སེམས་ཅན་རྣམས༔ སྣང་སྲིད་དག་པ་རབ་འབྱམས་ཀློང་དུ་སྒྲོལ༔ ཚེ་གཅིག་གྲོལ་བྱེད་རྒྱུད་སྡེའི་གསང་མཛོད་ནས༔ དངོས་གྲུབ་མཆོག་སྩོལ་ཡི་དམ་གཟུ་དང་དཔང་༔ སྒོ་གསུམ་འཁྲུལ་བས་བསླུས་པའི་ཞིང་བཅུའི་དགྲ༔ ལྷ་སྔགས་ཆོས་ཉིད་རྣམ་དག་ཀློང་དུ་སྒྲོལ༔ བདེ་སྟོང་རང་གཟུགས་གནས་ཡུལ་རྣམ་དག་ནས༔ ཡེ་ཤེས་མ་སྲིང་ཌཀྐཱིའི་གཟུ་དང་དཔང་༔ དུག་གསུམ་རང་རྒྱུད་ཞེན་པའི་དམ་ཉམས་རྣམས༔ བདེ་ཆེན་འགྱུར་མེད་ཡེ་ཤེས་ཀློང་དུ་སྒྲོལ༔ བཀའ་དང་དམ་ཚིག་གཉན་པོའི་ཕོ་བྲང་ནས༔ བརྒྱུད་གསུམ་དྲེགས་པ་སྡེ་བརྒྱད་གཟུ་དང་དཔང་༔ བསྟན་འགྲོར་དུས་གསུམ་གནོད་པའི་དགྲ་དང་བགེགས༔ དྲག་ཤུལ་ལས་སྦྱོར་མཚོན་ཆས་རྡུལ་དུ་རློགས༔ ད་དུས་སྙིགས་མ་ལྔ་བདོའི་མར་གཤམ་འདིར༔ རྒྱལ་བསྟན་འཛིན་པའི་སྐྱེས་བུ་ཉམས་དམའ་ཞིང༔ སྡིག་སྤྱོད་སྐྱེ་བོས་གཤེ་ཞིང་སྡང་བའི་ཚེ༔ རྒྱལ་བའི་བསྟན་སྲུང་ཞི་བར་མནལ་ལམ་ཅི༔ དེ་ཕྱིར་ཞིང་བཅུའི་དགྲ་དང་དམ་སྲིའི་དཔུང་༔ མཐུ་སྟོབས་དབང་པོའི་མཚོན་ཆས་རྡུལ་དུ་རློགས༔ ལུང་རྟོགས་བསྟན་ལ་སྡང་བའི་དམ་ཉམས་ཀྱིས༔ གསང་ཆེན་ཆོས་སྨད་གཙུག་ལག་རྟེན་གསུམ་བཤིག༔ འདུས་སྡེའི་ཡོ་བྱད་བཅོམ་ཞིང་བརླག་བྱེད་ན༔ སྲུང་མར་བསྐོས་ཤིང་གཉེར་གཏད་མ་དགོངས་སམ༔ དེ་ཕྱིར་ཞིང་བཅུའི་དགྲ་དང་དམ་སྲིའི་དཔུང་༔ མཐུ་སྟོབས་དབང་པོའི་མཚོན་ཆས་རྡུལ་དུ་རློགས༔ རྒྱལ་བའི་བྱིན་རླབས་ལ་རེ་སྦྱིན་བདག་གིས༔ དགེ་འདུན་སྡེ་མཆོད་སྲུང་མར་བརྔན་སྦྱིན་ནས༔ བསླུ་མེད་རྒྱུ་འབྲས་ཟབ་མོར་ཡིད་ཆེས་ཚེ༔ འགལ་རྐྱེན་བདུད་སྡེའི་ལོག་སྦྱོར་འཕྲུལ་ཤོམ་ན༔ བརྩེ་ཆེན་སྲུང་མས་བྱ་ར་མི་བྱེད་དམ༔ དེ་ཕྱིར་ཞིང་བཅུའི་དགྲ་དང་དམ་སྲིའི་དཔུང་༔ མཐུ་སྟོབས་དབང་པོའི་མཚོན་ཆས་རྡུལ་དུ་རློགས༔ ཤ་ཁྲག་གཏོར་མ་གསེར་སྐྱེམས་མཆོད་པ་བཞེས༔ དྲག་པོས་སྒྲོལ་བའི་ལས་ཀྱི་གྲོགས་མཛོད་ཅིག༔ དེ་ནས་ཉ་བོ་ཧོམ་དུ་གཞུག་༔ རཀྟས་བྲན་ཅིང་བསྐྱེད་པ་ནི༔ རང་ཉིད་རལ་གཅིག་གསལ་བའི་མདུན་དེ་རུ༔ བསད་ཁང་གྲུ་གསུམ་ཁ་དོག་མཐིལ་ཡངས་པ༔ ཕྱི་ནག་ཞེ་སྡང་མེ་དཔུང་དམར་ནག་འབར༔ ནང་དམར་འདོད་ཆགས་ཁྲག་མཚོའི་རྦ་རླབས་འཁྲུགས༔ ལོགས་ན་ང་རྒྱལ་བྲག་རི་རྦབ་ཏུ་འདྲིལ༔ ཕོ་རྒྱུད་སྲུང་མ་གཡས་ནས་བསྭོ་སྒྲ་སྒྲོག༔ མོ་རྒྱུད་སྲུང་མས་གཡོན་ནས་བཤུད་གླུ་ལེན༔ ནང་དུ་ནྲྀ་དང་ཏྲིཿལས་དགྲ་དང་བགེགས༔ མདོག་ངན་མདངས་ཉམས་སྐྲ་གཟེངས་འདར་ཅིང་དངངས༔ ཡན་ལག་ལྕགས་སྒྲོག་དམ་པོས་རབ་ཏུ་བསྡམས༔ གན་རྐྱལ་མགོ་བོ་ཚུར་བསྟན་གཡོ་འགུལ་བྲལ༔ དེ་ཡི་སྙིང་གའི་ནྲྀ་འམ་ཏྲི་ནག་ལས༔ འོད་འཕྲོས་གང་དམིགས་དེ་དང་དབྱེར་མེད་གསལ༔ དེ་ནས་བདེན་པ་བརྗོད་དེ་འགུགས་པ་ནི༔ ལྕགས་ཀྱུས་ཕྱག་རྒྱ་བཅའ་ཞིང་འདི་སྐད་དོ༔ ན་མོ༔ འཇིག་རྟེན་གསུམ་ན་བསླུ་མེད་སངས་རྒྱས་དང་༔ དེས་གསུང་དམ་ཆོས་སྤངས་རྟོགས་འཕགས་པའི་ལམ༔ དགེ་བཅུས་རྒྱུད་བསྡམས་ཚོགས་མཆོག་རྣམ་གསུམ་དང་༔ དབྱེར་མེད་བརྒྱུད་གསུམ་བླ་མ་ཡི་དམ་ལྷ༔ མཁའ་འགྲོ་ཆོས་སྐྱོང་དམ་ཅན་ཚོགས་སྤྱི་དང་༔ ཁྱད་པར་ཐུབ་དབང་མཆོག་དང་སྨོན་ལམ་གཅིག༔ གཏེར་སྲུང་དུད་སོལ་ལྷ་མོ་འཁོར་བཅས་ཀྱི༔ སྐུ་གསུང་ཐུགས་ཡོན་ཕྲིན་ལས་བདེན་པའི་མཐུས༔ བསྟན་འགྲོའི་སྡང་དགྲ་བླ་མའི་སྐུ་དགྲ་དང་༔ ཁྱད་པར་བདག་ཅག་རྣལ་འབྱོར་མི་ནོར་ལ༔ སྔ་དགྲ་ལག་བརྡར་ཕྱི་དགྲ་ཞེ་ལ་བརྣག༔ ད་དགྲ་དོ་བསྡོ་ཕོད་བཙུགས་སྲོག་ལ་རྒོལ༔ ནོར་རྫས་རྐུ་ཕྲོག་ངན་སྒྲོག་དུག་སྦྱོར་ཤོམ༔ སྡང་དགྲ་གཟུགས་ཅན་གཟུགས་མེད་བགེགས་ཀྱི་སྡེ༔ དམིགས་རྟེན་ལིང་ག་གཟུགས་ཀྱི་རྟེན་འདི་ལ༔ ཁུག་ཅིག་ཆིངས་ཤིག་དབྱེར་མེད་རོ་གཅིག་གྱུར༔ ཅེས་པ་ལན་གསུམ་ལྔ་བདུན་དགུ་སོགས་བརྗོད༔ དེ་ནས་ཕྱག་རྒྱ་བཞི་ཡིས་འཆིང་བ་ནི༔ རང་ཉིད་ཐུགས་ལས་ཛཿཧཱུྃ་བྃ་ཧོ་བཞི༔ འཕྲོས་པས་དགྲ་བགེགས་གང་དམིགས་རྣམ་ཤེས་ནི༔ སྦུར་མ་སྐམ་པོ་རླུང་གིས་དེད་པ་ལྟར༔ ལྕགས་ཀྱུས་སྙིང་བཟུང་ཞགས་པས་སྐེ་ནས་ཆིངས༔ ལྕགས་སྒྲོག་ཀྱིས་བསྡམས་དྲིལ་བུས་མྱོས་སུ་བཅུག༔ སྒོ་མ་བཞི་ཡིས་ཕྱོགས་བཞི་ནས་བསྐོར་ཏེ༔ སྤྲུལ་པའི་ཕོ་ཉས་དགྲ་བགེགས་གང་ཡིན་པ༔ བྲོས་དབང་མེད་པར་བཙོན་ལྟར་གནས་པར་གྱུར༔ ཅེས་བསམ་སྔགས་འདི་བརྗོད་པར་བྱ༔ བཛྲ་ཨངྐུ་ཤ་ཡ་ཛ༔ བཛྲ་པ་ཤ་ཧཱུྃ༔ བཛྲ་སྥོ་ཊ་བཾ༔ བཛྲ་གྷནྡྷེ་ཧོ༔ ཞེས་བརྗོད་ཕྱག་རྒྱ་བཞི་ཡིས་བཅིངས༔ དེ་ནས་ལྷ་དང་དབྱེ་བར་བྱེད་པ་ནི༔ རྣལ་འབྱོར་ལག་གཉིས་བྱ་འུག་སྒྲོ་ཐོགས་ཏེ༔ རང་ཉིད་ཁྲོས་མའི་ཐུགས་ཀའི་འོད་ཟེར་རྩེར༔ བྱ་རོག་མགོ་དང་ལྟས་ངན་འུག་པའི་གདོང་༔ རེ་བའི་བ་དན་དགྲ་འདྲེའི་སྟེང་དུ་བྱབ༔ ཕ་ལྷ་མ་ལྷ་ཞང་ལྷ་ཡུལ་གྱི་ལྷ༔ སྲོག་ལྷ་ལ་སོགས་སྐྱོབ་བྱེད་ལྷ་ཀུན་དབྱེ༔ དེ་ནས་ཉེས་པ་བསྒྲགས་པ་ནི༔ ཧོ༔ དམ་ཉམས་ཞིང་བཅུ་ཚང་བའི་གདུག་ཅན་འདིས༔ ཕན་བདེའི་འབྱུང་གནས་རྒྱལ་བའི་བསྟན་པ་བཤིག༔ འགྲོ་བའི་སྐྱབས་མཆོག་བླ་མའི་སྐུ་ལ་བསྡོས༔ ཚེ་གཅིག་གྲོལ་བྱེད་གསང་སྔགས་ཉེ་ལམ་སྨད༔ ཕ་མ་དྲིན་ཅན་སེམས་ཅན་སྲོག་ལ་རྒོལ༔ སྡིག་བཅུ་དང་ལེན་དགེ་བཅུ་ཁྱད་དུ་གསོད༔ དེ་ཕྱིར་ཡེ་ཤེས་འཇིག་རྟེན་ལྷ་རྣམས་ཀུན༔ དམ་ཉམས་འདི་ཡི་སྐྱབས་མགོན་མ་བྱེད་པར༔ ཡེ་ཤེས་ལྷ་ཚོགས་ཆོས་ཀྱི་དབྱིངས་སུ་གཤེགས༔ འཇིག་རྟེན་ལྷ་ཀུན་བདག་གི་གྲོགས་མཛོད་ཅིག༔ དྷེ་ཝ་པྲ་བེ་ཤ་ཡ་ཕཊ༔ དེ་ནས་ཕུར་པ་གདབ་པ་ནི༔ ཕུར་བུ་མི་དམིགས་སྟོང་པའི་ངང་ཉིད་ལས༔ རང་གི་ལག་སོར་རིགས་ལྔ་ཡབ་ཡུམ་བཅུ༔ སྦྱོར་བ་མཛད་པའི་སྦྱོར་མཚམས་ནས་ཐོན་པ༔ སྲས་མཆོག་རྡོ་རྗེ་གཞོན་ནུ་ཁྲོ་བོའི་ཞལ༔ སྐུ་སྟོད་ཁྲོ་བོ་ཕྱག་གཉིས་ཕུར་བུ་འདྲིལ༔ སྐུ་སྨད་ལྕགས་ཕུར་ཟུར་གསུམ་མེ་སྟག་མཆེད༔ མགར་གྱི་སོལ་མལ་ནས་བྱུང་ལྟར་དུ་དམར༔ དགྲ་བགེགས་སྙིང་གར་གཟིར་བས་ཚེ་བསོད་ཀུན༔ མ་ལུས་བསྡུས་ཏེ་རང་ལ་ཐིམ་པ་ཡིས༔ རྣལ་འབྱོར་བླ་ཚེ་ཉམས་པའི་གསོས་སུ་གྱུར༔ སླར་ཡང་ཕུར་རྩེས་དགྲ་བགེགས་ལས་ཉོན་སྦྱངས༔ རྣམ་ཤེས་ཨ་དཀར་རྣམ་པས་དབྱིངས་སུ་སྤར༔ ཁྲོས་མའི་མཁར་ཐིམ་རྒྱལ་བའི་སྲས་སུ་གྱུར༔ ཨོཾ་བཛྲ་ཀཱི་ལ་ཡ་དགྲ་བགེགས་ཤ་ཏྲུཾ་མཱ་ར་ཡ་ཧཱུྃ་ཕཊ༔ ཅེས་བརྗོད་རྫས་ཀྱི་ཕུར་བུ་ནི༔ གཟུགས་ཀྱི་སྙིང་གར་གདབ་བྱ་ཞིང་༔ ལྟ་དགོངས་ལྡན་པས་ཚེ་ཁྲུས་ཀྱི༔ དམིགས་པ་ཟབ་མོས་གནད་དུ་བརྡེག༔ དེ་ནས་ཉོན་མོངས་ལྔ་ཕུང་ལ༔ ཡུངས་དཀར་ཐུན་གྱིས་བྲབ་པ་ནི༔ ཧཱུྃ༔ ཡུངས་དཀར་རྒྱལ་པོ་ཁྲོ་བོའི་ཚོགས་ཀྱི་མཚོན༔ དྲག་པོའི་རླུང་གིས་སེར་ཆེན་བསྐྱོད་པ་བཞིན༔ ཉམས་པའི་ལྔ་ཕུང་གཟུགས་ལ་རབ་བརྡེག་པས༔ སྲུང་མ་ཕོ་རྒྱུད་ཀུན་གྱིས་མཚོན་ཆའི་ཆར༔ རབ་ཏུ་ཕབ་པས་ཐལ་བའི་རྡུལ་བརླག་གྱུར༔ སརྦ་ཤ་རཱི་རཾ་དུཥྚཾ་དགྲ་བགེགས་མཱ་ར་ཡ་ཕཊ༔ དེ་ནས་ཁྲག་ཐུན་དབབ་པ་ནི༔ དུག་གིས་ངར་བཏབ་ཁྲག་གིས་གཏོར༔ བྷྱོ༔ དམར་ཆེན་ཁྲག་གི་སེར་བས་དགྲ་བགེགས་ཀྱི༔ དབང་པོ་སྒོ་ལྔའི་རྟེན་དང་བརྟེན་པ་ཀུན༔ དམར་ནག་རཀྟའི་རྦ་རླབས་ཆེར་གཡོས་ཕྱིར༔ སྲུང་མ་མོ་རྒྱུད་ཀུན་གྱིས་དུག་ཁྲག་ཆར༔ ཆེར་ཕབ་དགྲ་བགེགས་དབང་ལྔའི་རྟེན་བཅོམ་གྱུར༔ སརྦ་རཀྟ་དགྲ་བགེགས་མཱ་ར་ཡ་རྦད་ཕཊ༔ སླར་ཡང་ཕུར་བུ་རབ་བསྒྲིལ་ཏེ༔ གཟུགས་ཀྱི་མགོ་ལུས་ཡན་ལག་ལ༔ སོ་སོར་གདབ་སྟེ་དམིགས་པས་གཟིར༔ ཧཱུྃ་ཧཱུྃ༔ ལྕགས་སམ་གདུག་པའི་ཤིང་ལས་གྲུབ་པ་ཡི༔ དཔལ་ལྡན་དམག་ཟོར་རྒྱལ་མོ་དུད་སོལ་མའི༔ ལས་སྦྱོར་དྲག་པོའི་རྣོ་ངར་རབ་ལྡན་པའི༔ སྲུང་མ་རྒྱ་མཚོའི་རྟེན་རྫས་ཕུར་བུ་འདི༔ དམ་ཉམས་གཟུགས་ཀྱི་ཕུང་པོའི་མིག་ལ་གདབ༔ ལོག་རྟོག་འཁྲུལ་བའི་མིག་ཤེས་རྩད་ནས་ཆོད༔ བཟང་ངན་སྒྲ་ཐོས་ཉན་བྱེད་རྩ་ལ་གདབ༔ བསྟོད་སྨད་ལོག་འཛིན་ཤེས་པ་དྲུངས་ནས་ཕྱུང་༔ མ་རིག་དྲིར་འཛིན་སྣོམ་བྱེད་རྩ་ལ་གདབ༔ འཆལ་ཚུལ་དྲི་རུ་གཟུང་བྱེད་ཡུལ་ནས་ཐོན༔ ལོག་པའི་ལས་ཀྱིས་ཟས་སྐོམ་མྱོང་བྱེད་རྩར༔ གདབ་པས་ཡུལ་ལ་ཞེན་པ་རྨིང་མེད་རློགས༔ འཇམ་རྩུབ་རེག་བྱ་ཀུན་འཛིན་རྩ་ལ་གདབ༔ རེག་ཤེས་ཉོན་མོངས་སྲེད་ལེན་རྨིང་ནས་རློགས༔ དུག་ལྔའི་འབྱུང་གནས་སྒོ་གསུམ་རྟེན་ལ་གདབ༔ ལས་ཉོན་བག་ཆགས་ཀུན་གཞོམ་ལྡང་མེད་གྱུར༔ སརྦ་ཤ་ཏྲུཾ་དམ་སྲི་མཱ་ར་ཡ་རྦད་རྦད༔ དེ་ནས་སྒྲོལ་གྲིས་དགྲ་ཡི་གཟུགས༔ གཏུབས་ཏེ་རྔམ་སྨྲས་འདི་སྐད་དོ༔ ཧཱུྃ་བྷྱོ༔ མ་མོ་མཁའ་འགྲོའི་སྤྲུལ་པ་ཤན་པའི་ཚོགས༔ འཇིགས་གཟུགས་རྔམ་པའི་ངར་སྒྲ་དི་རི་རི༔ རྣོ་དབལ་སྤུ་གྲིའི་སོ་བརྡར་ཁྲིགས་སེ་ཁྲིག༔ དགྲ་བགེགས་ཉོན་མོངས་དྲུག་གི་ས་བོན་གྱི༔ རྟེན་ཡུལ་ལུས་ཀྱི་རྐང་གཡོན་ནས་བཟུང་སྟེ༔ གསལ་བ་གསུམ་གྱི་དགོངས་པས་དུམ་བུར་གཏུབས༔ དྲག་སྔགས་སོ་ལྔའི་ཤམ་བུ་རུ༔ དམ་ཉམས་དགྲ་བགེགས་འབྱུང་པོ་ཐམས་ཅད་མཱ་ར་ཡ་རྦད་རྦད༔ དེ་ནས་ཤ་ཁྲག་བདུད་རྩིས་རབ་བྲན་ཏེ༔ ཧཱུྃ༔ གདུག་པའི་དམ་ཉམས་བསྒྲལ་བའི་ཤ་ཁྲག་རུས༔ གཏི་མུག་འདོད་ཆགས་ཞེ་སྡང་རང་བཞིན་ཏེ༔ མར་དང་ཟན་དང་ཆང་བས་རོ་བཅུད་ལྡན༔ ཉོན་མོངས་རྟེན་དང་བརྟེན་པ་ཞལ་དུ་སྟོབས༔ དཔལ་ལྡན་དུད་སོལ་ལྷ་མོ་གཙོ་འཁོར་བཅས༔ དགྱེས་པའི་རྐན་སྒྲ་དང་བཅས་ཁྲུམ་ཁྲུམ་གསོལ༔ ལས་ཉོན་བག་ཆགས་སྐྱེ་མེད་དབྱིངས་སུ་རོལ༔ རྩ་སྔགས་ཤམ་བུར༔ དམ་ཉམས་དགྲ་བགེགས་བསྒྲལ་བའི་མ་ཧཱ་མཾ་ས་ཁཱ་ཧི༔ མ་ཧཱ་རཀྟ་ཁཱ་ཧི༔ མ་ཧཱ་ཀེང་ནི་རི་ཏི་ཁཱ་ཧི༔ ཞེས་བརྗོད་གཏོར་མ་འབུལ་ཞིང་བརྗོད་བྲལ་ངང་༔ བསྒྲལ་བྱ་སྒྲོལ་བྱེད་གཉིས་མེད་མཉམ་པར་བལྟ༔ ས་མ་ཡཱ༔ རྒྱ་རྒྱ་རྒྱ༔ ཞེས་པ་འདི་ཆོས་ཀྱི་བདག་པོ་ས་ར་ཧི་ཏས་བསྐུལ་ངོར༔ རིག་པ་འཛིན་པ་ལུང་རིག་གླིང་པའི་དག་སྣང་དགོངས་གཏེར་ལས་བྱུང་བའོ༔