ཟློག་པ་གཉིས་འཐུང་མཚོན་འཁོར།
དུད་སོལ་ལྷ་མོའི་ཐུགས་སྒྲུབ་ལས༔ ཟློག་པ་གཉིས་འཐུང་མཚོན་འཁོར་བཞུགས༔
དབྱིངས་ཀྱི་མཁའ་འགྲོ་ཀུན་ཏུ་བཟང་༔ རལ་གཅིག་མ་མོའི་སྐུ་ལ་འདུད༔ བཀའ་སྡོད་དུད་སོལ་ལྷ་མོ་ཡི༔ སྒྲོལ་ལས་སྐབས་སུ་བཟློག་པ་བཤད༔ དེ་ཡང་སྙིགས་མའི་དུས་དེ་རུ༔ ནད་གདོན་ལྟས་ངན་བྱད་ཕུར་ནི༔ ཆོས་སྒྲུབ་སྐྱེས་བུའི་གེགས་སུ་ལྡང་༔ དེ་ཟློག་ལྕགས་སམ་ཐོད་ངན་དུ༔ དུག་ཁྲག་གིས་སྦྲུས་དམར་གཏོར་ནི༔ རུ་ཏྲའི་སྙིང་གཟུགས་ཟུར་བརྒྱད་པ༔ མེ་དང་ཐོད་སྐམ་རྡོ་རྗེའི་ཏོག༔ རྩངས་དང་ཡུངས་དཀར་སྙིང་རུ་མཚོན༔ རྒྱན་བཀོད་ལྷ་གྲངས་འཁོར་གྱིས་བསྐོར༔ ལས་ཀྱི་གཞུང་བསྲིངས་བསྙེན་པ་བསྐྱལ༔ ཚོགས་ཀྱི་འཁོར་ལོས་ཉམས་ཆག་བསྐང་༔ ཉ་བོར་དགྲ་བགེགས་དགུག་ཅིང་བསྒྲལ༔ གཏང་རག་ཞལ་བསྟབས་བསྟོད་པ་ནི༔ ཧཱུྃ་བྷྱོ༔ ཆོས་སྐུ་སྐྱེ་བ་མེད་པའི་ངང་ཉིད་ལས༔ སེམས་ཅན་དོན་དུ་གང་འདུལ་ཐུགས་རྗེའི་འཕྲུལ༔ སངས་རྒྱས་བསྟན་སྲུང་རྣལ་འབྱོར་གྲོགས་མཛད་པའི༔ དཔལ་ལྡན་དུད་སོལ་རྒྱལ་མོར་ཕྱག་འཚལ་བསྟོད༔ དེ་ནས་བཟློག་པའི་ལས་བཅོལ་ཕྱིར༔ དམར་གཏོར་ཁྲག་སྐྱེམས་དང་བཅས་པ༔ དགྲ་བགེགས་དགུག་གཞུག་རྩ་སྔགས་མཐར༔ ཁ་ཧཱི་བཏགས་ལ་ལན་བདུན་འབུལ༔ རྔ་རོལ་དྲག་པོའི་དབྱངས་དང་བཅས༔ རང་ཉིད་རལ་གཅིག་སྐུར་གསལ་ནས༔ ཟློག་པའི་ལས་བཅོལ་འདི་སྐད་དོ༔ ཧཱུྃ་བྷྱོ༔ གྲུ་གསུམ་མཐིང་ནག་ཡུམ་གྱི་མཁའ་དབྱིངས་ནས༔ འཇིགས་རུང་བྱ་གཅན་རོ་ལངས་ཀེང་རུས་སོགས༔ མི་བསྲུན་གདུག་ཅན་འཚོགས་པའི་དུར་ཁྲོད་ཆེ༔ ཁྲག་མཚོ་དམར་ནག་ཆལ་ཆིལ་འཁྲུགས་ཀློང་ནས༔ རྫུ་འཕྲུལ་རླུང་གཤོག་རྒྱ་བོང་དམར་གྭའི་སྟེང༔ རྒྱལ་བའི་བཀའ་སྡོད་དཔལ་ལྡན་དུད་སོལ་མ༔ དཔལ་ལྡན་དམག་ཟོར་རྒྱལ་མོ་སྐུར་བཞེངས་ཤིག༔ བྱད་ཕུར་དགྲ་གདོན་ལྟས་ངན་ལ་སོགས་པ༔ མི་མཐུན་བར་ཆད་བཟློག་པའི་ལས་མཛོད་ཅིག༔ ཧཱུྃ་བྷྱོ༔ དཔལ་ལྡན་ལྷ་མོ་ཆེན་མོ་དུད་སོལ་མ༔ སྐུ་མདོག་ནག་མོ་འཇིགས་གཟུགས་བསྟན་པ་ནི༔ ཆོས་སྐུའི་མཁའ་འགྲོ་རྣམས་དང་གཉིས་སུ་མེད༔ གཏི་མུག་ལས་བྱུང་ནད་གདོན་བྱད་ཕུར་དགྲ༔ ལྟས་ངན་ཡེ་འདྲོག་ཐམས་ཅད་བཟློག་ཏུ་གསོལ༔ ཞལ་གདངས་མཆེ་གཙིགས་སྤྱན་གསུམ་སྡང་མིག་བགྲད༔ དར་དང་རུས་རྒྱན་རྒྱན་ཆས་རབ་ཏུ་སྤྲས༔ ལོངས་སྐུའི་མཁའ་འགྲོ་རྣམས་དང་གཉིས་སུ་མེད༔ འདོད་ཆགས་ལས་བྱུང་ནད་གདོན་བྱད་ཕུར་དགྲ༔ ལྟས་ངན་ཡེ་འདྲོག་ཐམས་ཅད་བཟློག་ཏུ་གསོལ༔ ཐབས་ཤེས་ཟུང་འཇུག་ཉི་ཟླས་སྐུ་ལ་བརྒྱན༔ གང་འདུལ་ཐུགས་རྗེས་འཛིན་ཕྱིར་སྤྲུལ་བསྒྱུར་འགྱེད༔ སྤྲུལ་སྐུའི་མཁའ་འགྲོ་རྣམས་དང་གཉིས་སུ་མེད༔ ཞེ་སྡང་ལས་བྱུང་ནད་གདོན་བྱད་ཕུར་དགྲ༔ ལྟས་ངན་ཡེ་འདྲོག་ཐམས་ཅད་བཟློག་ཏུ་གསོལ༔ ཧཱུྃ་བྷྱོ༔ ཕྱག་བཞིའི་དང་པོ་གཡས་པས་གྲི་ཁུག་ཕྱར༔ རྡོ་རྗེ་མཁའ་འགྲོའི་ཚོགས་རྣམས་ལས་ལ་འགྱེད༔ ཤར་ཕྱོགས་རྒྱལ་པོའི་ཚོགས་ཀྱི་དལ་ཡམས་ནད༔ ལྟས་ངན་རྦོད་གཏོང་དགྲ་གདོན་འབྱུང་པོའི་ཚོགས༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་བསྒྱུར༔ གཡས་ཀྱི་འོག་མས་རྨ་བྱའི་རྒྱལ་མཚན་ཕྱར༔ རིན་ཆེན་མཁའ་འགྲོའི་ཚོགས་དང་གཉིས་སུ་མེད༔ ལྷོ་ཕྱོགས་གཤིན་རྗེའི་ཚོགས་ཀྱི་དལ་ཡམས་ནད༔ ལྟས་ངན་རྦོད་གཏོང་དགྲ་གདོན་འབྱུང་པོའི་ཚོགས༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་བསྒྱུར༔ གཡོན་གྱི་དང་པོས་ཐོད་པ་ཁྲག་བཀང་གསོལ༔ པདྨ་མཁའ་འགྲོའི་ཚོགས་རྣམས་བྲན་དུ་འཁོལ༔ ནུབ་ཕྱོགས་ཀླུ་ཡི་ཚོགས་ཀྱི་དལ་ཡམས་ནད༔ ལྟས་ངན་རྦོད་གཏོང་དགྲ་གདོན་འབྱུང་པོའི་ཚོགས༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་བསྒྱུར༔ གཡོན་གྱི་འོག་མས་ནོར་གྱི་རྐྱལ་པ་བསྣམས༔ ཀརྨ་མཁའ་འགྲོའི་ཚོགས་རྣམས་ལས་ལ་འགྱེད༔ བྱང་ཕྱོགས་གནོད་སྦྱིན་ཚོགས་ཀྱི་དལ་ཡམས་ནད༔ ལྟས་ངན་རྦོད་གཏོང་དགྲ་གདོན་འབྱུང་པོའི་ཚོགས༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་བསྒྱུར༔ རིགས་བདག་མི་བསྐྱོད་རྡོ་རྗེས་དབུ་ལ་བརྒྱན༔ སངས་རྒྱས་མཁའ་འགྲོའི་ཐུགས་དང་ཐ་མི་དད༔ དབུས་ཕྱོགས་ཚངས་པ་གཟའ་སྐར་དལ་ཡམས་ནད༔ ལྟས་ངན་རྦོད་གཏོང་དགྲ་གདོན་འབྱུང་པོའི་ཚོགས༔ སྡང་བར་བྱེད་པའི་དགྲ་བོའི་སྟེང་དུ་ཟློག༔ གནོད་པར་བྱེད་པའི་བགེགས་ཀྱི་སྟེང་དུ་བསྒྱུར༔ ཧཱུྃ་བྷྱོ༔ རྒྱ་བོང་དམར་གྭའི་སྟེང་དུ་འགྱིང་ཚུལ་བརྗིད༔ སྲིན་པོའི་ཐོད་སྒ་སྦྲུལ་དང་རྒྱུ་མས་སྤྲས༔ སྡེ་བརྒྱད་མ་ལུས་དབང་བསྡུས་ཟིལ་གྱིས་གནོན༔ སྡེ་བརྒྱད་ཡོངས་ཀྱི་བཀའ་ཆད་དགྲ་ལ་ཟློག༔ གསེར་སྲབ་གཡུ་མཐུར་ཁ་ཁྲིད་ཆུ་སྲིན་གདོང་༔ མུ་ལེ་མཐིང་མཚོའི་གནས་བདག་ཀླུ་སྲིན་བུ༔ མཛེ་རིགས་བཅོ་བརྒྱད་ལ་སོགས་ཀླུ་ཡི་ནད༔ དམ་ཉམས་སྡང་དགྲ་བགེགས་ཀྱི་སྟེང་དུ་ཟློག༔ ཤར་ཕྱོགས་སྲོག་བདག་ཚངས་པ་དཀར་པོ་ཁྲོ༔ དཀོར་བདག་རྒྱལ་འགོང་བྲན་དང་ལས་ལ་འགྱེད༔ སྨྱོ་འབོགས་རྒྱལ་འགོང་ནད་དང་ལྟས་ངན་རྣམས༔ སྡང་དགྲ་གདོན་བགེགས་བྱད་མའི་སྟེང་དུ་ཟློག༔ ལྷོ་ཕྱོགས་གཤིན་རྗེ་ཡ་མ་རཱ་ཛ་ཁྲོ༔ འཆི་བདག་གཤིན་རྗེའི་མ་ལུས་ཕོ་ཉར་འགྱེད༔ དུས་མིན་འཆི་བའི་ནད་དང་སྲོག་ལ་རྒོལ༔ སྡང་དགྲ་གདོན་བགེགས་རྦོད་གཏོང་སྟེང་དུ་ཟློག༔ ནུབ་ཏུ་བཙན་རྒོད་རྡོ་རྗེ་དྲག་རྩལ་ཁྲོ༔ ལྷ་ཀླུ་བདུད་བཙན་ཆེ་ཕྲས་ལས་ཀུན་སྒྲུབ༔ གཟེར་ནད་ཧུར་ཐུམ་རྦབ་དང་གཡང་གྲི་སོགས༔ སྡང་དགྲ་གདོན་བགེགས་བྱད་མའི་སྟེང་དུ་ཟློག༔ བྱང་དུ་བདུད་ནག་རལ་པ་ཚར་དགུ་ཁྲོ༔ གཏི་མུག་བདུད་སྡེའི་དམག་ཚོགས་དགྲ་ལ་གཏོང་༔ འཐིབས་ནད་བདུད་ཀྱི་ཆོ་འཕྲུལ་ཐན་ལྟས་ངན༔ སྡང་དགྲ་གདོན་བགེགས་བྱད་མ་མཁན་སྟེང་ཟློག༔ མ་མོ་ཆེན་མོ་བ་ལམ་དྲེལ་སྣ་མ༔ རབ་ཁྲོས་མུན་པའི་མདོག་ཅན་ལྟས་ངན་གཏོང་༔ ནད་བདག་སྲིན་མོའི་ཚོགས་ཀུན་ལས་ལ་འགྱེད༔ ཉོན་མོངས་སེམས་བྱུང་རྣམ་རྟོག་ལས་བྱུང་ཚོགས༔ ཡུལ་མེད་སྟོང་པ་ཆེན་པོའི་ངང་དུ་ཟློག༔ སྟག་སྨན་གཟེར་འདེབས་ཆེན་མོ་སྟག་ལ་ཆིབས༔ གློ་བུར་ནད་གདོན་ལྟས་ངན་དགྲ་ལ་འགྱེད༔ བར་ཆད་བགེགས་རིགས་སྟོང་ཕྲག་བརྒྱད་ཅུའི་ཚོགས༔ སྐྱེ་མེད་སྟོང་ཉིད་བདེ་ཆེན་ངང་དུ་ཟློག༔ ཁྲི་སྨན་སི་ལི་བྱ་རོག་འཕུར་ཤེས་ཆིབས༔ དམར་ནག་ཁྲོ་རྔམ་དགྲ་བོའི་སྐེ་ནས་འཁྲིད༔ འཁྲུལ་སྣང་འཁོར་བའི་བྱ་བྱེད་བདེ་སྡུག་ཀུན༔ གཏད་མེད་ཡེ་སྟོང་ཆེན་པོའི་ངང་དུ་ཟློག༔ རྡོ་རྗེ་བ་ལམ་དྲེལ་ནག་རྐང་གསུམ་བཅིབས༔ མི་བཟད་ཆོ་འཕྲུལ་ལྟས་ངན་བྱད་ཕུར་གཏོང་༔ ཚོགས་དྲུག་ཡུལ་གྱི་འཁྲུལ་སྣང་ནད་གདོན་དགྲ༔ བདག་མེད་སྟོང་པ་ཡེ་ཤེས་ཆེན་པོར་ཟློག༔ ཧཱུྃ་བྷྱོ༔ གཞན་ཡང་བཟློག་པའི་ཕྲིན་ལས་བཅོལ་བ་ནི༔ དཔལ་ལྡན་དུད་སོལ་རྒྱལ་མོ་གཙོ་འཁོར་གྱིས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ མི་མཐུན་ལྟས་ངན་བར་ཆད་ཐམས་ཅད་ཟློག༔ ཚངས་པ་བརྒྱ་བྱིན་ལ་སོགས་ལྷ་ཡི་གདོན༔ ཚད་མེད་མཁྱེན་བརྩེ་ནུས་པས་ཟློག་ཏུ་གསོལ༔ དགའ་བོ་འཇོག་པོ་ལ་སོགས་ཀླུ་ཡི་གདོན༔ དྲག་རྩལ་མཐུ་དང་ནུས་པས་བཟློག་ཏུ་གསོལ༔ དྲི་ཟ་གཤིན་རྗེ་ཀླུ་དང་གནོད་སྦྱིན་གདོན༔ རང་རང་མཐུ་དང་ནུས་པས་བཟློག་ཏུ་གསོལ༔ མེ་ལྷ་སྲིན་པོ་རླུང་ལྷ་དབང་ལྡན་གདོན༔ འཁོར་གྱི་ཕྲ་མེན་མཁའ་འགྲོས་བཟློག་ཏུ་གསོལ༔ རྒྱ་བོང་དམར་གྭའི་ཆིབས་ལ་རོལ་བ་ཡིས༔ སྲོག་ཆགས་ཆེ་རྒུའི་ལྟས་ངན་དགྲ་ལ་ཟློག༔ དྲག་མེ་དམར་ནག་ཀློང་དུ་བཞུགས་པ་ཡི༔ གཞན་གྱི་བསམ་ངན་བསྲེག་པའི་ལས་སྦྱོར་ཀུན༔ རང་གཤེད་རང་ཕོབ་དགྲ་གདོན་ལྟས་ངན་ཟློག༔ དུར་རླུང་ཁམ་ནག་རབ་ཏུ་འཚུབས་པ་ཡིས༔ གཞན་གྱི་བསམ་ངན་རླུང་གི་ལས་སྦྱོར་ཀུན༔ རང་གཤེད་རང་ཕོབ་དགྲ་གདོན་ལྟས་ངན་ཟློག༔ མུ་ལེ་མཐིང་མཚོའི་རྦ་རླབས་འཁྲུགས་ཀློང་འགྱིང་༔ གཞན་གྱི་སྦྱོར་གཏུམ་ཆུ་ལ་གཏད་པ་ཀུན༔ རང་གཤེད་རང་ཕོབ་དགྲ་གདོན་ལྟས་ངན་ཟློག༔ དབང་ཆེན་རི་རྒྱལ་སྐུ་ཡི་བརྟེན་ཡུལ་མཛད༔ གཞན་གྱི་ས་ལ་གཏད་པའི་བྱད་ཕུར་ཀུན༔ རང་གཤེད་རང་ཕོབ་བར་ཆད་ཐམས་ཅད་ཟློག༔ མདོར་ན་སེམས་དང་སེམས་བྱུང་ལས་བྱུང་བའི༔ དུས་གསུམ་ཀུན་ཏུ་བསྟན་དང་འགྲོ་ལ་འཚེ༔ རྣལ་འབྱོར་བདག་དང་སྦྱིན་བདག་ལྟོས་བཅས་ལ༔ སྔ་དགྲ་ལག་བརྡར་ཕྱི་དགྲ་ཞེ་ལ་བརྣག༔ ད་དགྲ་ཐད་དུ་ལངས་པའི་བསམ་སྦྱོར་ཟློག༔ ཚེ་རབས་ལས་ཀྱིས་འབྲེལ་ཞིང་སྲོག་ལ་རྒོལ༔ ཚེ་ལ་རྐུ་ཞིང་བླ་ལ་འཇབ་པ་ཡི༔ གནོད་བྱེད་བགེགས་རིགས་ཆོས་སྲིད་ཉམས་བྱེད་སྲི༔ འཕྲལ་རྐྱེན་ངན་པས་བསླངས་པ་ཐམས་ཅད་ཀུན༔ བཟློག་གོ་དམར་ཆེན་གཏོར་མ་འདི་ཡིས་ཟློག༔ བསྒྱུར་རོ་བགེགས་རིགས་འབྱུང་པོའི་འཚེ་བ་ཟློག༔ བཟློག་བསྒྱུར་བཅོལ་བའི་ཕྲིན་ལས་གྲུབ་པར་མཛོད༔ ཅེས་པས་དམར་གཏོར་ཟོར་དུ་བརྡེག༔ ས་མ་ཡཱ༔ དེས་ནི་བྱད་ཕུར་ཐན་ལྟས་ངན༔ མི་བཟློག་གང་ཡང་ཡོད་མི་སྲིད༔ དམིགས་པའི་འཁྲུལ་འཁོར་ཟབ་མོ་དང་༔ ཐེ་ཚོམ་མེད་པའི་བསྙེན་སྒྲུབ་གཉིས༔ ཟུང་འབྲེལ་རྣལ་འབྱོར་ལས་གང་ཡང་༔ འགྲུབ་ངེས་སྔགས་ཀྱི་ཁྱད་ཆོས་ཡིན༔ གཞན་གྱིས་བརྟགས་དཀའ་བྱིས་པའམ༔ འཆོལ་པོའི་བརྟུལ་ཞུགས་འཆང་བ་ལ༔ ལྷ་སྲས་སྤྲུལ་པའི་རྣལ་འབྱོར་གྱིས༔ བྱིན་རླབས་དག་སྣང་ཆོས་མཛོད་རྡོལ༔ ཟོལ་མེད་དགོངས་གཏེར་ཌཀྐཱིའི་སྲོག༔ པདྨས་གཏད་དོ་ལོག་ལྟ་སྤོངས༔ གུ་ཧྱ༔ ཆོས་དབང་སྐྱེས་ཐོབ་ཀྱི་བློ་ལྡན་ས་ར་ཧི་ཏས་བསྐུལ་ངོར༔ སྐལ་ལྡན་ལུང་རིག་གླིང་པས་དག་པར་བྲིས་པའོ༔ དགེའོ༔ སརྦ་མངྒ་ལཾ༔