དཔལ་ལྡན་ལྷ་མོའི་མངའ་གསོལ།
དག་སྣང་གསལ་བའི་ཆོས་སྡེ་ལས༔ སྔགས་བདག་འབར་མའི་ཕྲིན་ལས་ལས་བཞི་ལྷུན་གྲུབ་བཞུགས༔ ན་མོ་བཛྲ་ཀྲོ་དྷ་ཡ༔ དཔལ་ལྡན་སྔགས་ཀྱི་བསྲུང་མ་ལ༔ གསོལ་མཆོད་འདོད་པའི་རྣལ་འབྱོར་བས༔ ཚེས་བཅུའམ་ནི་ཚེས་བརྒྱད་སོགས༔ གཟའ་སྐར་བཟང་བའི་དུས་དག་ཏུ༔ སྟེགས་བུའི་སྟེང་དུ་བཀྲ་ཤིས་པའི༔ འབྲས་སམ་ནས་ཀྱི་ཚོམ་བུ་ནི༔ ལྷ་གྲངས་མཉམ་པར་བཀོད་བྱས་ནས༔ དེ་སྟེང་དམར་གཏོར་ཟུར་གསུམ་དང་༔ མཐའ་མར་བཤོས་བུ་བདུན་དང་ནི༔ འཐེབ་ཀྱུ་ཉེར་ལྔ་སོགས་བཤམས་པར༔ བསང་སྦྱང་སྔོན་དུ་འགྲོ་བཞིན་དུ༔ གསལ་འདེབས་མ་ཡེངས་མི་དམིགས་པས༔ ཧཱུྃ༔ སྐད་ཅིག་པད་ཉི་བདུད་བཞིའི་སྟེང་༔ རང་རིག་ཧཱུྃ་མཐིང་ཡོངས་གྱུར་པ༔ དཔལ་ཆེན་བཛྲ་ཧེ་རུ་ཀ༔ མཐིང་ནག་ཞལ་གཅིག་ཕྱག་གཉིས་ཀྱིས༔ རྡོ་རྗེ་དྲིལ་བུ་བསྣོལ་ཐབས་འཛིན༔ ཡུམ་མཆོག་ཀྲོ་དྷི་གྲི་ཐོད་ཅན༔ མཉམ་སྦྱོར་ཡབ་ཡུམ་གཉིས་ཀའང་༔ ཁྲོ་ཆས་རྫོགས་པའི་སྐུར་གྱུར་པ༔ འོག་མིན་གནས་ནས་ཡེ་ཤེས་པ༔ སྤྱན་དྲངས་གཉིས་སུ་མེད་པ་ཡི༔ ཐུགས་ཀར་ཧཱུྃ་ཡིག་གསལ་བའི་མཐར༔ སྔགས་ཕྲེང་གཡས་སུ་འཁོར་བར་གྱུར༔ མ་ཡེངས་ཡིད་ཀྱིས་བཟླས་པ་བྱ༔ ཨོཾ་བཛྲ་ཤྲཱི་ཧེ་རུ་ཀ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ དེ་ནས་མཆོད་གཏོར་ལྷར་གསལ་ནས༔ བདག་མདུན་ཁྲག་མཚོ་འཁྱིལ་བའི་དབུས༔ ཐོད་པ་སྐམ་རློན་སྐུ་མཁར་དང་༔ པད་ཉི་ཏི་ར་གན་རྐྱལ་སྟེང་༔ བདག་གི་ཐུགས་ཀའི་ཧཱུྃ་ཡིག་ལས༔ འོད་ཟེར་མ་ཡིག་མཐིང་ནག་བབས༔ དེ་ཉིད་གནས་གྱུར་དཔལ་ལྷ་མོ༔ བོང་བུ་དམར་གྭ་དྲག་རྩལ་དང་༔ མྱུར་མགྱོགས་ལྡན་པ་འཇིགས་རུང་བའི༔ ཆས་ལྡན་སྟེང་དུ་ཁྲོ་མོ་མཐིང་༔ ཞལ་གཅིག་ཕྱག་གཉིས་སྤྱན་གསུམ་འབར༔ སྙན་གཡས་སེང་གེ་གཡོན་སྦྲུལ་ནག༔ གཡས་ཕྱག་ཁ་ཊཱཾ་གཡོན་པ་ཡིས༔ ནད་རྐྱལ་འཛིན་པའི་སྤྱི་བོ་རུ༔ ཟླ་བ་ཚེས་ཤིང་ལྟེ་བར་ཉི༔ འོད་འབར་ལོག་འདྲེན་མུན་ཚོགས་འཇོམས༔ བསྒོམས་པའི་ལྷ་ལས་འོད་འཕྲོས་པས༔ མུ་ལེ་མཐིང་མཚོའི་ཕོ་བྲང་སོགས༔ པདྨའི་སྒྲུབ་གནས་ཐམས་ཅད་ནས༔ ཡེ་ཤེས་ལྷ་མོ་སྤྱན་དྲངས་གྱུར༔ བཛྲ་ས་མ་ཡཱ་ཛཿ ཛ་ཧཱུྃ་བཾ་ཧོ༔ བཛྲ་ཌཱཀྐི་ནི་ཨརྒྷཾ༴སོགས་ནས། ཤཔྟ་པཉྩ་རཀྟ་བྷ་ལིང་ཏ་མ་ཧཱ་སུ་ཁ་ཧོ༔ སྤྲོས་བྲལ་ངང་ལས་མ་གཡོས་ཀྱང༔ གསང་ཆེན་བསྟན་པའི་བཀའ་བསྲུང་ཕྱིར༔ སྣ་ཚོགས་གཟུགས་སྟོན་ཁྲག་འཐུང་ཡུམ༔ དཔལ་སྔགས་བདག་མོར་ཕྱག་འཚལ་བསྟོད༔ བཛྲ་དྷཀྐི་མ་ཧཱ་ཀ་ལི་རེ་མ་ཏི་ཧཱུྃ་བྷྱོ་ཧཱུྃ་ཕཊ༔ མཆོད་ཅིང་བསྟོད་ནས་འདི་སྐད་དོ༔ ཧཱུྃ༔ སྔོན་ཚེ་བར་དང་ཐ་མ་རུ༔ དཔལ་ཆེན་དྷ་ན་སང་ཀྲྀ་ཏ༔ པདྨ་ཐོད་ཕྲེང་རྩལ་སོགས་ཀྱི༔ སྤྱན་སྔར་ཁས་བླངས་དམ་བཅས་བཞིན༔ གསེར་སྐྱེམས་གཏོར་ཚོགས་འདི་བཞེས་ནས༔ དཔལ་ལྡན་ལྷ་མོ་འཁོར་བཅས་ཀྱིས༔ བདག་ཅག་ནད་གདོན་ཞི་བ་དང་༔ ཚེ་བསོད་དཔལ་རྒྱས་མི་ནོར་ཟས༔ དབང་འདུས་དགྲ་བགེགས་བརླག་པར་མཛོད༔ དེ་སྐད་བློ་ལྡན་འཇམ་དཔལ་བཟང་༔ གང་དེས་བསྐུལ་ངོར་སྤྲུལ་མིང་པ༔ ཆེ་མཆོག་ཡོན་ཏན་རྩལ་དེ་ཡིས༔ ཐོལ་བྱུང་བྲིས་པ་དགེ་གྱུར་ཅིག༔ ས་མ་ཡཱ༔ རྒྱ་རྒྱ་རྒྱ༔ དམ་མེད་ལོག་ལྟ་ཅན་དག་ལ༔ བསྟན་པར་མི་བྱ་ས་མ་ཡཱ༔ རིག་འཛིན་ཆེན་པོ་སུརྱ་ཀིརྟི་ཡི༔ ཐུགས་ཀྱི་སྤྲུལ་པ་ལུང་རིག་གླིང་པ་ཡིས༔ ཟབ་གསང་མཁའ་འགྲོའི་བརྡ་ལས་ལེགས་ཕབ་ཏེ༔ བཀའ་རྒྱས་བཏབ་ཏེ་མི་ལོ་ཉེར་བརྒྱད་དུ༔ གསང་རྒྱ་བྱས་པ་སླར་ཡང་ཡོས་ཀྱི་ལོར༔ རྒྱ་བཀྲོལ་སྤེལ་བ་དུས་ཀུན་དགེ་ལེགས་འཕེལ༔ དགེའོ། །དགེའོ། །དགེའོ།།