དཔལ་ལྡན་ལྷ་མོ་ལ་དྲག་ཏུ་བསྐུལ་བ་ཕྲིན་ལས་ཀྱི་ཕོ་ཉ།
༄༅།། དཔལ་ལྡན་ལྷ་མོ་ལ་དྲག་ཏུ་བསྐུལ་བ་ཕྲིན་ལས་ཀྱི་ཕོ་ཉ་ཞེས་བྱ་བ་བཞུགས། བྷྱོཿ དཔལ་ལྡན་གཉན་གྱི་རེ་མ་ཏི༔ འདོད་པའི་ཁམས་ཀྱི་དབང་ཕྱུག་མ༔ དམག་ཟོར་རྒྱལ་མོ་མཐུ་རྩལ་ཅན༔ དམ་ཉམས་དགྲ་བོའི་ཤ་ཟ་མ༔ སངས་རྒྱས་བསྟན་པའི་བྱ་ར་མཁན༔ འཁོར་ཚོགས་རྒྱ་མཚོ་བཅས་པ་ལ༔ ཤ་ཆེན་གཏོར་མ་རི་ལྟར་སྤུངས༔ དམ་ཉམས་སྙིང་ཁྲག་མཚོ་ལྟར་འཁྱིལ༔ དགྱེས་པའི་དམ་རྫས་སྤྱན་གཟིགས་སོགས༔ མ་ཉམས་ཁྱད་པར་འཕགས་པ་འབུལ༔ དེ་རིང་འཁོར་དང་བཅས་རྣམས་ཀྱིས༔ བཅོལ་བའི་ལས་འདི་མྱུར་ཏུ་སྒྲུབས༔ གཅིག་ཏུ་སངས་རྒྱས་བསྟན་པ་དང་༔ དཀོན་མཆོག་གསུམ་གྱི་དཀོར་འཕྲོག་ཅིང་༔ བླ་མ་དམ་པའི་སྐུ་ཡི་དགྲ༔ དགེ་འདུན་སྡེ་རྣམས་དཀྲུག་བྱེད་ཅིང་༔ ཁྱད་པར་རྣལ་འབྱོར་བདག་ཅག་ལ༔ སྡང་ཞིང་གདུག་པའི་བསམ་པ་ཅན༔ སྲུང་མ་ཁྱེད་ལ་ཐོ་བརྩམས་པ༔ གདུག་ཅན་མི་ནོར་འཁོར་བཅས་འདི༔ ད་ལྟ་ཉིད་དུ་སྒྲོལ་བར་མཛོད༔ སྟེང་ན་སྐྱོབ་པའི་ལྷ་རྣམས་དང་༔ བྱམས་ཀྱིས་སྐྱོང་བའི་དཔོན་པོ་དང་༔ ཀུན་དང་རྣམ་པར་ཕྱེས་ལ་ཤོག༔ རིགས་རྒྱུད་རྩད་ནས་ཆོད་ལ་ཤོག༔ སྙིང་ཁྲག་ཐང་ལ་ཕོས་ལ་ཤོག༔ སད་དང་སེར་བ་མུ་གེ་དང་༔ ལྟས་ངན་ཐམས་ཅད་དགྲ་ལ་ཐོངས༔ ནད་ཀྱི་རྐྱལ་པ་དགྲ་ལ་བྷྱོ༔ བདུད་ཀྱི་ཁྲམ་ཁ་དགྲ་ལ་སྒྱུར༔ ཚོན་གྱི་གྲུ་གུ་དགྲ་ལ་ཐོངས༔ ཤྭ་རྡེའུ་ནག་པོ་དགྲ་ལ་ཁྱེ༔ དུས་ཀྱི་འཁྲུག་པ་དགྲ་ལ་ཐོངས༔ ཚེ་དང་བསོད་ནམས་དཔལ་འབྱོར་རྣམས༔ ལྷག་མ་ཙམ་ཡང་མེད་པར་མཛོད༔ མི་ཟད་མཚོན་གྱི་ཆར་པ་ཕོབ༔ འཇིགས་རུང་བདུད་ཀྱི་དམག་དཔུང་དྲོངས༔ མྱུར་མགྱོགས་གཤིན་རྗེའི་ཕོ་ཉ་ཁྱེ༔ ལེགས་ཚོགས་ཀུན་དང་རྣམ་པར་ཕྲོལ༔ མི་འདོད་སྡུག་བསྔལ་ཆར་བཞིན་ཕོབ༔ མ་གཡེལ་མ་གཡེལ་འཁོར་དང་བཅས༔ བསྟན་བཤིག་དམ་ཉམས་སྡིག་ཅན་འདི༔ ལོ་དང་ཟླ་བར་མ་བཞག་ཅིག༔ ད་ལྟ་ཐལ་བར་བརླག་པར་གྱིས༔ བཅོལ་བའི་ཕྲིན་ལས་མ་བསྒྲུབ་ན༔ རྡོ་རྗེ་འཆང་གི་བཀའ་དང་འགལ༔ རང་གི་དམ་ཚིག་གཉན་པོ་རྣམས༔ རྣལ་འབྱོར་པ་ཡི་ཁོ་ཐག་ཆད༔ དེ་བས་དམ་ལ་མ་འདའ་བར༔ མ་གཡེལ་སྤྲུལ་པའི་ཕོ་ཉ་དག༔ དགྲ་བོའི་ཡུལ་ཁམས་ཀུན་ལ་ཁྱེ༔ བདུད་ཞགས་ནག་པོས་མགུལ་ནས་ཆིངས༔ ལས་རླུང་ནག་པོས་རྒྱབ་ནས་དེད༔ འཇིགས་པའི་མུན་པས་མདུན་ནས་བསུས༔ བོང་བུར་བསྐྱོན་ཞིང་ལྕགས་ཀྱིས་སྡོམས༔ འབར་བའི་ཕུར་བུས་དྲག་ཏུ་ཐོབ༔ མཚོན་ཆ་རྣོན་པོས་ལུས་ཕུག་ནས༔ དོན་སྙིང་ལྔ་པོ་རྒྱབ་ནས་ཕྱུང་༔ སྙིང་ཁྲག་དྲོད་མོ་མྱུར་དུ་འཐུང་༔ ས་ཡི་རྟིང་ཕུར་ཐོན་ལ་ཤོག༔ གནམ་གྱི་འཇུ་ཐག་ཆོད་ལ་ཤོག༔ དམག་ཟོར་རྒྱལ་མོའི་ར་མདའ་ཟློག༔ དགྲ་བོའི་ཡུལ་ཁམས་སྟོངས་བར་གྱིས༔ ཁྱོད་ཀྱི་ཐུགས་དམ་དུས་ལ་བབས༔ བདག་གི་བཅོལ་པའི་ཕྲིན་ལས་འདི༔ མ་ཐོགས་མྱུར་དུ་འགྲུབ་པར་མཛོད༔