རྩ་གསུམ་སྲུང་མའི་བསྐང་བསྡུས་ཡིད་བཞིན་འདོད་འཇོ།
དག་སྣང་མཚོ་རྒྱལ་དགོངས་པའི་གསང་མཛོད་ལས༔ རྩ་གསུམ་སྲུང་མའི་བསྐང་བསྡུས་ཡིད་བཞིན་འདོད་འཇོ་བཞུགས༔ གུ་རུ་རིན་པོ་ཆེ་ལ་ཕྱག་འཚལ་ལོ༔ གྲོགས་མཆོག་ཌཀྐཱི་ས་མུ་དྲ༔ ལས་ཅན་སྙིང་ལ་ཡིད་བཞིན་གདམས༔ བསྐང་རྫས་ཕྱི་ནང་གསང་མཆོད་སོགས༔ ནམ་མཁའ་མཛོད་ཀྱི་སྔགས་རྒྱས་བརླབས༔ རོལ་མོ་དབྱངས་དང་གདུང་བའི་བློས༔ ཨོཾ་ཨཱཿཧཱུྃ་ཧྲཱིཿ དབང་བསྐུར་རྒྱུད་བཤད་ལུང་སྦྱིན་ཉམས་ཆག་སྐོང་༔ དྲིན་ཆེན་རྡོ་རྗེ་སློབ་དཔོན་ཐུགས་དམ་བསྐང་༔ ཞི་ཁྲོ་ཆགས་པའི་གར་གྱིས་དངོས་གྲུབ་སྟེར༔ ཡི་དམ་རྒྱུད་སྡེའི་ལྷ་ཚོགས་ཐུགས་དམ་བསྐང་༔ མ་དང་བུ་བཞིན་བརྩེ་གདུང་བར་ཆད་སེལ༔ གནས་ཡུལ་མཁའ་འགྲོ་རྒྱ་མཚོའི་ཐུགས་དམ་བསྐང་༔ སངས་རྒྱས་བསྟན་སྲུང་བརྒྱུད་གསུམ་དྲེགས་པའི་གཟུགས༔ ཕྱི་ནང་ཆོས་སྐྱོང་སྲུང་མའི་ཐུགས་དམ་བསྐང་༔ རྩ་གསུམ་ཀུན་འདུས་ཁམས་གསུམ་ཡོངས་ཀྱི་མགོན༔ གུ་རུ་པདྨ་ཐོད་ཕྲེང་ཐུགས་དམ་བསྐང་༔ གཞན་ཡང་འགྲོ་བའི་ཕན་བདེའི་འབྱུང་གནས་མཆོག༔ མཆོག་གསུམ་རྟེན་དང་བརྟེན་པའི་ཐུགས་དམ་བསྐང་༔ ཚེ་རབས་སྔོན་འབྲེལ་ཆོས་དང་བླ་མ་གཅིག༔ ནང་འདྲེས་མཆེད་དང་ལྕམ་དྲལ་ཐུགས་དམ་བསྐང་༔ ཧཱུྃ་ཧྲཱིཿ ཐུགས་དམ་གཉན་པོ་བསྐང་བའི་དམ་རྫས་ནི༔ ཕྱི་མཆོད་མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་སྙན་པའི་དབྱངས་ཀྱིས་བསྐང་༔ ནང་མཆོད་སྨན་དང་རཀྟ་བྷ་ལིང་ཏ༔ གཙང་རྨེ་གཉིས་འཛིན་བྲལ་བའི་རྫས་ཀྱིས་བསྐང་༔ གསང་མཆོད་སྦྱོར་སྒྲོལ་བློ་འདས་ལྟ་སྒོམ་སྤྱོད༔ འབྲས་བུ་རེ་དོགས་དངོས་འཛིན་བྲལ་བས་བསྐང་༔ མདོར་ན་སྲིད་དང་ཞི་བའི་ཁམས་རྣམས་ཀུན༔ བདེ་གཤེགས་སྙིང་པོར་རོ་མཉམ་ཀློང་དུ་བསྐང་༔ དེ་མཐུས་ཉམས་ཆག་རྟོག་སྒྲིབ་དབྱིངས་སུ་དག༔ རང་བྱུང་ཆོས་སྐུའི་རང་ཞལ་མཇལ་བར་ཤོག༔ དེས་ནི་ཉམས་ཆག་དབྱིངས་སུ་བསྐངས༔ འབྲས་བུ་ཚོགས་ཆེན་རྣམ་གཉིས་རྫོགས༔ ཚེ་འདིར་སྐུ་དང་ཡེ་ཤེས་འགྲུབ༔ དགོངས་གསང་ཌཀྐཱིའི་བརྡའ་ལས་ཤར༔ ས་མ་ཡཱ༔ རྒྱ་རྒྱ་རྒྱ༔ ཞེས་རིག་འཛིན་ལུང་རིག་གླིང་པས་དག་སྣང་ཟོལ་མེད་ཀྱི་ཆ་ལག་ཏུ་ཕབ་པ་སརྦ་ཤུ་བྷཾ༔