རྗེ་བཙུན་འཕགས་མ་སྒྲོལ་མའི་བསང་མཆོད་ཡེ་ཤེས་བདུད་རྩིའི་བུམ་བཟང་།
༄༅།། རྗེ་བཙུན་འཕགས་མ་སྒྲོལ་མ་ལ་བརྟེན་པའི་བསང་མཆོད་ཡེ་ཤེས་བདུད་རྩིའི་བུམ་བཟང་བཞུགས་སོ།།
༄༅། ན་མཿཏཱ་རེ་སརྦ་བྷུདྡྷ་བོ་དྷི་ས་ཏྭ་ཡ། རྣལ་འབྱོར་པས་ལྷག་པའི་ལྷ་འཇིགས་པ་བརྒྱད་སྐྱོབ་རྗེ་བཙུན་མ་ལ་བརྟེན་པའི་བསང་མཆོད་བྱ་བར་འདོད་པས་ཁྲུས་དང་གཙང་སྦྲ་ལྡན་པས་མེ་ཐབ་ཞི་རྒྱས་དབང་དྲག་གི་དབྱིབས་གང་ཡང་རུང་བར། ལྷ་ཤིང་བདུད་རྩི་ཅན་ལྔ་སོགས་དང་། སྨན་སྣ་འབྲུ་སྣ་རིན་པོ་ཆེ་སྣ་ཚོགས་ཕྱེ་མ་སོགས་བསང་རྫས་རྣམས་གཙང་མའི་ཁྱིམ་ནས་བྱུང་བའི་མེ་ལ་བསྲེགས་པའི་དུད་པ་རྒྱ་ཆེན་པོ་བཏང་ལ། རང་ཉིད་ལྷག་པའི་ལྷ་སྤྱན་རས་གཟིགས་སུ་གསལ་བའི་ཐུགས་ཀ་ནས་རྃ་ཡྃ་ཁྃ་འཕྲོས་པས་མ་དག་པའི་ཉེས་སྐྱོན་ཐམས་ཅད་བསྲེགས་གཏོར་བཀྲུས། ཨོཾ་ཨཱཿཧཱུྃ་འཕྲོས་པས་དུ་བའི་ཟེགས་མ་རེ་རེ་ལས་མཆོད་པའི་ལྷ་མོ་མཆོད་རྫས་སྣ་ཚོགས་ཐོགས་པ་བསམ་གྱིས་མི་ཁྱབ་པ་སྤྲོས་ནས་ཕྱོགས་བཅུའི་ཞིང་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཉན་རང་སོགས་མཆོད་ཡུལ་མ་ལུས་པ་རྣམས་དང་ཁྱད་པར་སེང་ལྡེང་ནགས་ཀྱི་སྒྲོལ་མ་འཁོར་ཉི་ཤུ་རྩ་གཅིག་དང་བཅས་པ་མཆོད་ཅིང་མཉེས་ནས་བདག་དང་བསྲུང་བྱ་ལ་ཐུགས་རྗེའི་ཤུགས་ལྷག་པར་ཕྱུང་ནས་སྲུང་ཞིང་སྐྱོབ་པར་བསམ་ལ། རོལ་མོ་དབྱངས་དང་བཅས་པས་འདི་སྐད་དོ། ཨེ་མ་ཧོ། ངོ་མཚར་རྨད་བྱུང་ཐུགས་བསྐྱེད་གཞལ་དཀའ་བས། །རྒྱལ་བ་ཀུན་གྱི་ཕྲིན་ལས་གཅིག་བསྡུས་པའི། །དཔལ་ཡོན་ཕུན་ཚོགས་ལྷ་མོ་སྒྲོལ་མ་ཡུམ། །འཁོར་དང་ཡང་སྤྲུལ་གནས་འདིར་སྤྱན་འདྲེན་གཤེགས། །མདུན་མཁར་པདྨ་ཉི་ཟླའི་གདན་ལ་བཞུགས། །སྤྲུལ་པའི་ལྷ་མོ་འཕྲུལ་དགའི་ཚུལ་གྱིས་བཏུད། །ཕྱི་མཆོད་མེ་ཏོག་བདུག་སྤོས་མར་མེ་དང་། །དྲི་ཆབ་ཞལ་ཟས་རོལ་མོ་གདུགས་དང་འཕན། །རྒྱལ་མཚན་བླ་བྲེ་བ་དན་ཚོགས་རྣམས་དང་། །ཉེར་སྤྱོད་ལྷ་མིའི་ཡོ་བྱད་ཀུན་གྱིས་མཆོད། །ནང་མཆོད་རྩ་བརྒྱད་ཡན་ལག་སྟོང་སྦྱར་སྨན། །དུག་གསུམ་དབྱིངས་བསྒྲལ་ཞིང་བཅུའི་སྲོག་གི་ཁྲག །དངོས་འཛིན་རབ་གཏོར་རྩི་བཅུད་ཚོགས་པའི་ཟས། །བླང་དོར་མེད་པའི་དམ་རྫས་རྣམས་ཀྱིས་མཆོད། །གསང་བ་བདེ་སྟོང་སྐྱེད་བྱེད་སྦྱོར་མཆོད་དང་། །རྟོག་ངན་རྒྱུན་གཅོད་ཐུགས་རྗེས་བསྒྲལ་མཆོད་རྣམས། །དོན་དམ་རང་རིག་སྐྱེ་མེད་དག་པའི་ཀློང་། །ཤེས་རབ་ཕ་རོལ་ཕྱིན་པའི་དབྱིངས་སུ་བསྐང་། །ས་ཐབ་ལས་བཞིའི་མཚོན་བྱེད་སྤྱན་མའི་མཁར། །ཟག་མེད་བདེ་བསྐྱེད་བདུད་རྩི་ཤིང་ལྔ་དང་། །ཕྱི་ནང་བསང་རྫས་ཕྱེ་མར་གསེར་སྐྱེམས་སོགས། །གོས་དཀར་བྱིན་ཟས་བཞུས་པའི་དུད་སྤྲིན་འཁྲིགས། །དམ་ཚིག་སྒྲོལ་མས་ཕྱོགས་བཅུར་བསྐྱོད་པ་འདི། །ཏིང་འཛིན་སྔགས་རྒྱས་བྱིན་བརླབས་སྦྱངས་སྤེལ་བསྒྱུར། །ཕུན་ཚོགས་འདོད་ཡོན་ལྔ་ལྡན་བསང་མཆོད་འདིས། །བྱ་དཀའི་སྤྱོད་པ་རྒྱ་མཚོའི་མཐར་སོན་པས། །འབད་མེད་གཞན་དོན་མ་ལུས་ལྷུན་གྲུབ་པའི། །ཐུབ་དབང་རྒྱལ་སྲས་སློབ་མར་བཅས་རྣམས་དང་། །དཀོན་མཆོག་རྟེན་གྱུར་ཕན་བདེའི་འབྱུང་གནས་བསང་། །ཁྱད་པར་བདེ་གཤེགས་རྔ་སྒྲའི་བསྟན་པ་ལ། །རྒྱལ་པོའི་བུ་མོ་ཡེ་ཤེས་ཟླ་བ་ཡིས། །ཐུགས་བསྐྱེད་རླབས་ཆེན་སྤྱོད་པས་རྒྱལ་ཀུན་གྱི། །ཕྲིན་ལས་ལྷར་གྱུར་འཕགས་མ་སྒྲོལ་མ་བསང་། །བྱང་ཆུབ་སེམས་མཆོག་རྒྱུད་ལ་སྩོལ་མཛད་པའི། །རྗེ་བཙུན་མྱུར་མ་དཔའ་མོའི་སྐུ་གསུང་ཐུགས། །ཡོན་ཏན་ཕྲིན་ལས་མཛད་པ་རྨད་བྱུང་འཕྲུལ། །གསང་སྔགས་རིག་སྔགས་གཟུངས་སྔགས་ལྷ་རྣམས་བསང་། །རྒྱལ་ཀུན་ཡུམ་གཅིག་མྱུར་མ་དཔའ་མོ་བསང་། །རྩོལ་མེད་བྱང་སེམས་རྒྱུད་ལ་སྐྱེ་བར་མཛོད། །ཤེས་རབ་མཆོག་སྦྱིིན་དབྱངས་ཅན་ལྷ་མོ་བསང་། །གནས་ལྔ་རིག་པའི་དངོས་གྲུབ་མཆོག་སྩོལ་ཅིག། །རླབས་ཆེན་སྤྱོད་མཆོག་བསོད་ནམས་མཆོག་སྟེར་བསང་། །ཚོགས་གཉིས་བསོད་ནམས་དཔལ་ལ་རྟག་ཏུ་སྦྱོར། །འཆི་མེད་དཔལ་མོ་གཙུག་ཏོར་རྣམ་རྒྱལ་བསང་། །ཚེ་ཡི་བར་ཆད་དུས་མིན་འཆི་བ་ཟློག །ཁམས་གསུམ་དབང་སྡུད་ཀུ་རུ་ཀུལླེ་བསང་། །སྲིད་ཞིའི་ཕུན་ཚོགས་མ་ལུས་འགྲུབ་པར་མཛོད། །ཕྱོགས་བཅུའི་གདོན་འཇོམས་འཇིགས་བྱེད་ཆེན་མོ་བསང་། །ལྷ་ཀླུ་གནོད་སྦྱིན་གདོན་གྱི་གནོད་པ་སྲུངས། །བདུད་སྡེའི་གཡུལ་འཇོམས་གཞན་གྱིས་མི་ཐུབ་བསང་། །གཟུགས་ཅན་གཟུགས་མེད་གཡུལ་ངོ་ཆམ་ལ་ཕོབ། །རྒོལ་ངན་ཚར་གཅོད་གཞན་མི་རྒྱལ་མཛད་བསང་། །ལོག་སྨྲའི་ངག་གི་སྤྲིན་ཕུང་དབྱིངས་སུ་གཏོར། །འཇིག་རྟེན་དབང་སྡུད་ས་གསུམ་ལས་རྒྱལ་བསང་། །ལྷ་ཀླུ་མི་ཡི་སྣང་བ་བདག་དབང་བསྡུས། །ཟས་ནོར་ཆར་འབེབས་ནོར་སྟེར་དམར་མོ་བསང་། །དབུལ་ཕོངས་བཀྲེས་སྐོམ་འཇིགས་པ་ཀུན་ལས་བསྲུང་། །བུ་དཔལ་མཆོག་སྦྱིན་བཀྲ་ཤིས་དོན་བྱེད་བསང་། །ལུགས་ཟུང་དཔལ་སྡུད་རིགས་ཀྱི་དངོས་གྲུབ་སྩོལ། །དགྲ་དཔུང་འཇོམས་མ་རྡོ་རྗེ་སྡེར་མོ་བསང་། །སྙིགས་དུས་གཡུལ་འཁྲུག་ཞེ་སྡང་མེ་ལྕེ་སོད། །སྡེ་བརྒྱད་གདོན་འཇོམས་ཁྲོ་གཉེར་ཅན་མཛད་བསང་། །དམ་མེད་སྡེ་བརྒྱད་འབྱུང་པོ་སྤ་བཀོང་ཞིག །ལས་སྒྲིབ་ཀུན་སྦྱང་རབ་ཏུ་ཞི་བ་བསང་། །བདག་གཞན་སྡིག་ལྟུང་བག་ཆགས་དྲུངས་ནས་ཕྱུང་། །རིག་སྔགས་དམོད་འཇོམས་འབར་བའི་འོད་ཅན་བསང་། །བདེན་པའི་མཐུ་གྲུབ་གཞན་རྒོལ་འཇོམས་པར་མཛོད། །ཇག་རྐུན་འདོད་བསྲུང་དཔག་མེད་གནོན་མ་བསང་། །ཙོ་ར་མི་རྒོད་དགྲ་སྡེའི་སྒོ་གསུམ་ཆིངས། །གཟའ་ཀླུའི་དུག་སེལ་རྨ་བྱ་ཆེན་མོ་བསང་། །བརྟན་གཡོ་སྣོད་བཅུད་དུག་ཀུན་སྨན་དུ་བསྒྱུར། །བྱད་ཕུར་ཀུན་འཇོམས་མི་ཕམ་རྒྱལ་མོ་བསང་། །བདག་གི་སྒོ་གསུམ་མནན་གཏད་བཅིང་བ་ཁྲོལ། །འགོ་བའི་ནད་སེལ་རི་ཁྲོད་ལྷ་མོ་བསང་། །མི་ཕྱུགས་ནད་རིམས་དུས་མིན་འཆི་བ་སྲུངས། །བདུད་ལས་རྣམ་རྒྱལ་འོད་ཟེར་ཅན་མ་བསང་། །བླ་ཚེ་རྐུ་འཕྲོག་གནོད་པའི་རྐྱེན་ཀུན་སོལ། །དེ་ལྟར་བསང་མཆོད་ཕུལ་བའི་ནུས་པ་ཡིས། །འཇིགས་པ་བཅུ་དྲུག་ལ་སོགས་མི་མཐུན་ཕྱོགས། །ཐམས་ཅད་འོད་སྟོང་ཟེར་གྱིས་མུན་པ་བཞིན། །མིང་གི་ལྷག་མ་ཙམ་དུ་ཞི་བར་མཛོད། །ཚེ་དང་དཔལ་འབྱོར་ལུང་རྟོགས་ཡོན་ཏན་ཚོགས། །དབྱར་གྱི་ཆར་རྒྱུན་འབབ་པས་རྒྱ་མཚོ་བཞིན། །རྟག་ཏུ་བྲི་བ་མེད་པར་གོང་འཕེལ་དུ། །མཐར་ཐུག་རྣམ་མཁྱེན་ཡོན་ཏན་མཆོག་ལ་སྦྱོར། །ལྷ་འདྲེ་མི་གསུམ་ཁྱད་པར་བསྟན་འགྲོ་ལ། །ཕན་པའི་བྱེད་པོ་བུ་སློབ་སྦྱིན་བདག་སོགས། །མ་ལུས་ཁབ་ལེན་རྡོ་ཡིས་ལྕགས་ཕྱེ་བཞིན། །རང་དབང་བརྟན་པ་བྲལ་བར་དབང་སྡུས་ཤིག །ཕྱི་རྐྱེན་དགྲ་གདོན་ནང་རྐྱེན་དུག་ལྔའི་བདུད། །སྒོ་གསུམ་བར་ཆད་ལོག་འདྲེན་མ་ལུས་ཀུན། །ཁང་རུལ་གནམ་ལྕགས་འབར་བས་གཞོམས་པ་ལྟར། །སྲིད་པའི་མཐར་ཡང་ལྡང་མེད་ཚར་ཆོད་ཅིག །མདོར་ན་གནས་སྐབས་མི་མཐུན་བར་ཆད་ཞི། །འདོད་པའི་དོན་ཀུན་གེགས་མེད་ཆོས་མཐུན་འགྲུབ། །མཐར་ཐུག་གང་འབྲེལ་ཐར་པའི་ལམ་ཞུགས་ཏེ། །པོ་ཊ་ལ་རུ་འཕགས་མས་རྗེས་འཛིན་ཤོག །ཅེས་པའང་དད་ལྡན་མནྟྲ་གུ་ཧྱའི་མིང་གིས་བསྐུལ་ངོར་བན་རྒན་སྙོམ་ལས་པ་རྒྱ་སྤྲུལ་མིང་གིས་བྲིས་པ་དགེ་བར་གྱུར་ཅིག དགེའོ། །དགེའོ། །དགེའོ། །མངྒ་ལཾ།།