མགོན་པོ་ཚོགས་ཀྱི་བདག་པོའི་བསང་མཆོད་བསྡུས་པ་བདུད་རྩིའི་སྤྲིན་ཕུང་།
༄༅།། མགོན་པོ་ཚོགས་ཀྱི་བདག་པོའི་བསང་མཆོད་བསྡུས་པ་བདུད་རྩིའི་སྤྲིན་ཕུང་བཞུགས་སོ།། ན་མོ་མ་ཧཱ་ཀཱ་ལ་ཡེ། བསང་རྫས་དང་བདུད་རྩིའི་ཤིང་གི་དུད་སྤྲིན་སོགས་མཐོང་བརྒྱུད་ལྟར་བྱ་ཞིང་། རང་ཉིད་ཡི་དམ་གང་རུང་གི་སྙེམས་པས་རོལ་མོ་འཁྲོལ་བཞིན་འདི་སྐད་དོ། རྃ་ཡྃ་ཁྃ་གིས་བསང་ཤིང་སྦྱངས་ལ། ཨོཾ་ཨཱཿཧཱུྃ་གིས་སྤེལ་ནས། ཀྱེ་ཆོས་དབྱིངས་ངང་ནས་འགྲོ་བ་ཀུན། །འདུལ་ཕྱིར་ལྷ་མིའི་དགྲ་བླ་རུ། །སྐུར་བཞེངས་ས་བཅུའི་སེམས་དཔའ་མཆོག །ཚོགས་བདག་མ་ཧཱ་ཀཱ་ལ་ཆེ། །ཡུམ་སྲས་སྤྲུལ་འཁོར་གནས་འདིར་གཤེགས། །སྐྱོན་བྲལ་པདྨ་གེ་སར་དབུས། །ཐབས་ཤེས་ཉི་ཟླ་གསལ་བའི་སྟེང་། །རྟོག་བྲལ་བམ་གྱི་གདན་ཁྲི་ལ། །བརྩེ་བའི་ཐུགས་ཀྱིས་བཞུགས་སུ་གསོལ། །ཕྱི་མཆོད་ཉེར་སྤྱོད་རྣམ་ལྔ་དང་། །ནང་མཆོད་འདོད་ཡོན་ལོངས་སྤྱོད་ཚོགས། །གསང་བ་དགའ་བཞིའི་བདེ་སྟོང་གི། །ངོ་བོ་རྣམ་རིག་དབྱིངས་སུ་མཆོད། །ཁྱད་པར་ལྷ་ཤིང་བདུད་རྩིའི་བཅུད། །ཕྱེ་མར་དམ་རྫས་གོས་དཀར་མོས། །བཞུས་པའི་དུད་སྤྲིན་ཆ་ཤས་ལ། །རྒྱལ་སྲིད་བདུན་དང་བཀྲ་ཤིས་རྟགས། །གཟུགས་འགྲོས་སྣ་ཚོགས་མཚར་སྡུག་སྒེག །མདོར་ན་དངོས་འབྱོར་ཡིད་སྤྲུལ་གྱི། །མཆོད་སྤྲིན་ཀུན་བཟང་རོལ་མོ་འདིས། །མགོན་པོ་ཚོགས་ཀྱི་བདག་པོ་བསང་། །ཡུམ་ཆེན་གནོད་སྦྱིན་དབང་མོ་བསང་། །ཕྱོགས་བཅུ་སྐྱོང་མཛད་མགོན་པོ་བསང་། །སྡེ་བརྒྱད་སྤྲུལ་འཁོར་དམ་ཅན་སོགས། །བསང་ངོ་བརྔན་ནོ་ཐུགས་དམ་བསྐང་། །དེ་ལྟར་བསང་ཞིང་མཆོད་ནས་ཀྱང་། །ཕྲིན་ལས་གཉན་པོ་བཅོལ་བ་ནི། །རྒྱལ་བའི་བསྟན་དང་འགྲོ་རྣམས་ཀྱི། །བདེ་སྐྱིད་ལེགས་ཚོགས་རྒྱས་པར་མཛོད། །ཁྱད་པར་ཞི་རྒྱས་དབང་དྲག་གི། །ཕྲིན་ལས་ཆར་རྒྱུན་ལེགས་བབས་མཐུས། །བདག་ཅག་མི་ནོར་འཁོར་བཅས་ཀྱི། །ཉམས་ཆག་དྲི་མ་འཁྲུད་པ་དང་། །ཚེ་བསོད་ལོ་འབྲས་རབ་སྨིན་ཞིང་། །མོས་ཚོགས་གདུལ་བྱའི་བུང་བ་འདུས། །གནོད་བྱེད་སྡང་དགྲའི་མེ་དཔུང་དབལ། །གཞིལ་ནས་འདོད་དོན་འགྲུབ་མཛད་གསོལ། །ཡང་དགོས་སྒྲུབ་པོའི་རྣལ་འབྱོར་གྱི། །ཐོས་བསམ་ཡངས་པའི་ཁང་མཛེས་ལ། །བསླབ་གསུམ་དོན་གྱི་ཀ་བ་ཚུགས། །ཞི་མཐོང་གསལ་བའི་འཆར་སྒོ་ཕྱེ། །ས་བཅུ་ལམ་ལྔའི་ཐེམ་སྐས་ལ། །བགྲོད་བཞིན་ཐར་པའི་གོ་འཕང་མཆོག །མངོན་དུ་གྱུར་ལ་གེགས་མེད་པར། །མཛོད་ཅིག་རྩ་གསུམ་སྲུང་མའི་མཐུས། །བདག་གི་འདོད་དོན་མ་ལུས་པ། །ཡིད་བཞིན་དབང་གི་རྒྱལ་པོ་ལ། །གསོལ་བ་བཏབ་བཞིན་འགྲུབ་ནས་ཀྱང་། །རང་གཞན་དོན་གཉིས་འགྲུབ་པར་སྨོན། །བཀྲ་ཤིས་རྣམ་དཀར་ཞིང་ས་ལ། །བཀྲ་ཤིས་སྐུ་བཞིའི་འབྲས་སྨིན་ནས། །བཀྲ་ཤིས་བདེ་ལེགས་ཕུན་ཚོགས་ཀྱིས། །བཀྲ་ཤིས་བསྟན་འགྲོའི་དཔལ་དུ་ཤོག །ཅེས་འདི་རང་སློབ་དམ་པ་ཡི། །བསྐུལ་ཚིག་ཟླ་ཟེར་ཕོག་པ་ལྟར། །བློ་གྲོས་བཟང་པོའི་ཀུན་དྷ་ལས། །བྱུང་འདི་སྤྲུལ་མིང་གིས་སྨྲས་དགེ། །