རྡོ་རྗེ་གཡུ་སྒྲོན་མའི་བསང་མཆོད་བདུད་རྩིའི་ཆར་རྒྱུན།
༄༅།། རྡོ་རྗེ་གཡུ་སྒྲོན་མའི་བསང་མཆོད་བདུད་རྩིའི་ཆར་རྒྱུན་བཞུགས། ན་མོ་པདྨ་ཀཱ་ར་ཡེ། བསང་རྫས་དཀར་དམར་ཟས་ཕུད་སྐྱེམས། །བདུད་རྩི་ཤིང་ལྔའི་དུད་པ་གཏོང་། །རང་ཉིད་པད་འབྱུང་སྐུར་གསལ་བའི། །ཐུགས་ཀའི་འོད་ཀྱིས་བསང་མགྲོན་བཀུག །བསང་རྫས་སྔགས་དང་ཕྱག་རྒྱ་ཡིས། །ཟག་མེད་བདུད་རྩིར་སྤེལ་ཏེ་འབུལ།། ཀྱཻ། སྐྱེ་མེད་ཆོས་དབྱིངས་མཐའ་བྲལ་ནམ་མཁའ་ནས། །མ་འགགས་རང་རྩལ་སྙིང་རྗེའི་ཉི་གཞོན་གྱིས། །བསྟན་འགྲོའི་ལེགས་ཚོགས་པད་ཚལ་བཞད་མཛད་པའི། །བསྟན་སྐྱོང་དབང་མོ་རྡོ་རྗེ་གཡུ་སྒྲོན་མ། །སྨན་བཙུན་མཆེད་ལྔ་རྡུལ་སྙེད་སྤྲུལ་པའི་འཁོར། །རྣལ་འབྱོར་དད་དམ་གདུང་བས་སྤྱན་འདྲེན་ན། །བརྩེ་ཆེན་ཐུགས་རྗེའི་ཤུགས་ཀྱིས་གནས་འདིར་གཤེགས། །རང་སྣང་དག་པའི་དབྱིངས་སུ་དགྱེས་པར་བཞུགས། །བསྟན་འགྲོར་སྲུང་སྐྱོབ་མཛད་ཕྱིར་གུས་ཕྱག་འཚལ། །ལྷ་ཚོགས་དབང་པོ་དྲུག་ལ་དགྱེས་བསྐྱེད་པའི། །ཕྱི་ནང་གསང་བའི་མཆོད་སྤྲིན་རབ་འབྱམས་དང་། །ཁྱད་པར་ས་ཐབ་སངས་རྒྱས་སྤྱན་མའི་མཁར། །བདུད་རྩི་ཤིང་ལྔ་བཟའ་བཏུང་དར་གོས་སྨན། །རིན་ཆེན་འབྲུ་ལྔ་གོས་དཀར་མོས་སྦྱངས་ཤིང་། །བདག་ཉིད་ཆེན་མོས་བྲན་པས་དུད་པའི་སྤྲིན། །དམ་ཚིག་སྒྲོལ་མས་ལྷ་ལམ་ཀུན་ཁྱབ་པའི། །ཟག་མེད་བདུད་རྩི་སྤྲིན་གྱི་ཕུང་པོར་འཁྲིགས། །ཀུན་བཟང་མཆོད་པར་འགྲན་པའི་བསང་དུད་འདིས། །ཐེག་དགུའི་ཡང་རྩེ་རྫོགས་ཆེན་བསྟན་སྲུང་མ། །སྨན་བཙུན་རྡོ་རྗེ་གཡུ་ཡི་སྒྲོལ་མ་བསང་། །བསྟན་མ་བཅུ་གཉིས་ཡང་འཁོར་སྤྲུལ་པ་བསང་། །གཞན་ཡང་ཕྱག་རྫོགས་དབུ་གསུམ་སྲུང་མ་བསང་། །བདག་ཅག་སྒོ་གསུམ་བག་མེད་ཉོན་མོངས་མཐུས། །སྡོམ་གསུམ་ཉམས་ཆག་དམ་གྲིབ་ཉེས་པའི་སྐྱོན། །ལྷ་དང་སྲུང་མར་གྲིབ་ཀྱིས་ཕོག་པ་བསང་། །ཐུགས་རྒྱུད་མཉེས་ནས་དུས་རྣམས་ཐམས་ཅད་དུ། །བརྩེ་བའི་སྤྱན་གྱིས་གཟིགས་པ་མི་འདོར་བར། །ཕན་བདེའི་འབྱུང་གནས་རྒྱལ་བསྟན་རིན་པོ་ཆེ། །བཤད་སྒྲུབ་གཉིས་ཀྱིས་འཛིན་སྐྱོང་སྤེལ་བ་ཡི། །དགེ་འདུན་སྡེ་གཉིས་དབྱར་མཚོ་ལྟར་འཕེལ་ཞིང་། །བསྟན་པའི་སྦྱིན་བདག་སྡེར་བཅས་རྒྱས་པར་མཛོད། །ཁྱོད་ནི་སྲིད་ཞིའི་ཁམས་ལ་དབང་བསྒྱུར་བས། །འཆི་མེད་ཚེ་དང་འཛད་མེད་ཟས་དང་ནོར། །རིགས་རྒྱུད་སྲིད་སོགས་ལེགས་དགུའི་དངོས་པོ་ཡིས། །དུས་ཀུན་བདག་ཅག་བདེ་སྐྱིད་ལ་རོལ་མཛོད། །གཞན་ལ་ཤྭོ་དང་རྒྱན་འགྱེད་སྟོབས་རྩལ་འགྲན། །ཀུན་ལས་རྣམ་པར་རྒྱལ་བའི་རུ་མཚོན་ཕྱོར། །མི་མཐུན་དགྲ་བགེགས་ལོག་འདྲེན་དཔུང་དང་བཅས། །མཐུ་སྟོབས་བསྐལ་མེ་འབར་བས་རྡུལ་དུ་རློགས། །མཐོ་ལ་ཞུ་དང་དམའ་ལ་བཀའ་བསྒོ་དང་། །མཉམ་དང་འགྲན་འོས་མགྲོན་དང་ཚོང་ལ་སོགས། །ལུགས་ཟུང་ཆོས་མཐུན་བྱ་བ་གང་བརྩམས་ཀྱང་། །ཡིད་ལ་སྨོན་བཞིན་འགྲུབ་པའི་སྡོང་གྲོགས་མཛོད། །ཁྱད་པར་ཐེག་བརྒྱད་གྲུབ་མཐའི་ཝ་སྐྱེས་ཁྱུ། །ཟིལ་གནོན་རྫོགས་པ་ཆེན་པོ་གདོང་ལྔའི་སྒྲས། །ཡིད་དཔྱོད་སྟོང་ལྟའི་ལམ་དུ་མི་གོལ་བར། །ཚེ་འདིར་འཇའ་ལུས་གངས་རིའི་རྩེར་འགྱིང་མཛོད། །མདོར་ན་འདི་དང་ཕྱི་མར་སྒྲིབ་པའི་རྐྱེན། །མ་ལུས་ཞི་ཞིང་ས་ལམ་ཡོན་ཏན་ཀུན། །རང་རྒྱུད་ཡེ་གནས་དབྱིངས་ཀྱི་རང་མདངས་ཉིད། །མངོན་དུ་བྱེད་པའི་གཉེར་ཁ་ཁྱོད་ཀྱིས་ལོངས། །གང་བཅོལ་ཕྲིན་ལས་ཡིད་བཞིན་མྱུར་འགྲུབ་མཛོད། །ཅེས་པའང་ལྷ་གྲོགས་སྙིང་གི་ཐིག་ལེ་གང་གི་བཀའ་ཕེབས་བཞིན་ཀུ་སུ་ལུ་བ་རྒྱ་སྤྲུལ་མིང་གིས་བྲིས་པ་དགེ་ལེགས་འཕེལ།།