ཡུལ་ལྷའི་མནོལ་བསང་བདུད་རྩིའི་རྒྱུན་འབེབས།
༄༅།། ཡུལ་ལྷའི་མནོལ་བསང་བདུད་རྩིའི་རྒྱུན་འབེབས་བཞུགས། ཀྱཻ། འཁོར་འདས་ཆོས་ཀུན་ཡེ་གནས་སྟོང་པའི་གཤིས། །མ་སྐྱེས་མི་འགག་སྨྲ་བསམ་བརྗོད་ལས་འདས། །གཙང་དང་མི་གཙང་རྡུལ་ཙམ་མ་མཆིས་པས། །མནོལ་གྲིབ་བག་ཆགས་མིང་ཡང་མ་གྲུབ་ཀྱང་། །རྟེན་འབྲེལ་སྣང་ཚུལ་རྨི་ལམ་སྒྱུ་མ་ལྟར། །ནམ་ཡང་བསླུ་མེད་ཀུན་རྫོབ་སྣང་ངོར་བདེན། །དེ་ཕྱིར་ཡུལ་ལྷ་མཐོན་པོ་སྤྲུལ་འཁོར་གྱི། །མི་གཙང་དྲི་མའི་རྙོག་མ་དབྱིངས་སུ་བསང་། །རང་ཉིད་རྩ་གསུམ་ཀུན་འདུས་པདྨ་འབྱུང་། །དཀར་དམར་ཁྲོ་འཛུམ་ཟ་ཧོར་རྒྱལ་པོའི་ཆས། །རྡོ་རྗེ་ཐོད་བུམ་ཁ་ཊཱཾ་ཕྱག་རྒྱ་མཛེས། །པད་ཞྭ་རྒོད་ལྡེམ་རྒྱལ་པོ་རོལ་སྟབས་ཀྱིས། །པད་ཟླའི་གདན་ལ་འགྱིང་ཞིང་བདུད་དཔུང་འཇོམས། །ཐུགས་ཀའི་འོད་ཀྱིས་ཡུལ་འདིའི་གཞི་བདག་ཚོགས། །མ་ལུས་གནས་འདིར་སྤྱན་དྲངས་དགྱེས་བཞིན་བཞུགས། །དུ་བའི་སྟེང་དུ་ཡི་གེ་དྷུ་ཡིག་ལས། །བདུག་སྤོས་ལྷ་མོ་བདུད་རྩིའི་ཁྲུས་བུམ་གྱིས། །ལྷ་ཚོགས་མི་གཙང་མནོལ་གྲིབ་བཀྲུ་བ་དང་། །འདོད་ཡོན་ལྔ་དང་རྒྱལ་སྲིད་རིན་ཆེན་བདུན། །བཀྲ་ཤིས་རྫས་རྟགས་སྤྲིན་ལས་ཆར་བཞིན་འབབས། །ཡུལ་ལྷ་མ་ལུས་བྱིང་རྨུགས་འཐིབས་པ་སེལ། །དབང་པོ་དྲུག་ལ་ཟག་མེད་བདེ་བསྐྱེད་གྱུར། །བཛྲ་དྷུཔྤེ་པཱུ་ཙ་ཧཱུྃ་བརྗོད་པས། །བྱིན་རླབས་ཡོན་ཏན་སྲིད་མཐར་ཟད་མེད་བསམ། །ལུས་ལ་ལྷན་ཅིག་སྐྱེས་པའི་ཕྲག་ལྷ་ལ། །མནོལ་གྲིབ་སེལ་བའི་བསང་མཆོད་འདི་ཕུལ་བས། །དམེ་ནལ་ཡུགས་སས་ཕོག་དང་ཟས་གོས་རྒྱན། །མི་གཙང་སྐྱོན་གྱིས་གོས་པ་བསང་གྱུར་ཅིག །ཡུལ་འདིར་གཏན་དུ་ཆགས་པའི་ཡུལ་ལྷ་ལ། །དག་བྱེད་བདུད་རྩིའི་བསང་མཆོད་འདི་ཕུལ་བས། །མཛེ་གྲིབ་རོ་གྲིབ་བྱད་ཕུར་གཏད་ཁྲམ་གྱིས། །དབུ་འཕང་སྨད་དང་དབང་པོ་ཉམས་པ་ཀུན། །ཆོས་དབྱིངས་དྲི་མེད་ངང་དུ་བསང་གྱུར་ཅིག །དཔའ་རྩལ་སྐྱེན་གསུམ་འཛོམས་པའི་མི་རྒྱུད་རིགས། །རྟག་ཏུ་སྲུང་སྐྱོབ་མཛད་པ་ཕ་ལྷ་ལ། །རྣམ་དག་གཙང་མའི་མནོལ་བསང་འདི་ཕུལ་བས། །གླེན་ལྐུགས་ཞ་གྲུམ་འོན་ལོང་ཉེས་སྐྱོན་གྲིབ། །བརྗོད་མེད་དོན་དམ་ཀློང་དུ་བསང་གྱུར་ཅིག །མཛེས་སྡུག་མཛངས་འཕྲུལ་བུད་མེད་རིགས་རྣམས་ལ། །ཕན་གྲོགས་སྟོངས་མཛད་མ་ལྷ་མ་སྨན་ལ། །དམེ་མནོལ་དམ་ཉམས་གྲིབ་ཀྱིས་ཕོག་པ་ཀུན། །ཟག་མེད་བདེ་སྟེར་བསང་མཆོད་འདི་ཕུལ་བས། །དམིགས་མེད་ཡང་དག་ཀློང་དུ་བསང་གྱུར་ཅིག །སྔོན་ལས་དང་འབྲེལ་ཡུན་དུ་འཚོ་མཛད་པའི། །ཕུང་ལྔ་བརྟན་པར་བྱེད་པའི་སྲོག་ལྷ་ལ། །གཞན་གྱིས་བརྐུས་འཕྲོག་ཟད་དང་འཐོར་འཁྱམས་གྲིབ། །གཙང་བྱེད་བདུད་རྩིའི་བསང་མཆོད་འདི་ཕུལ་བས། །མི་ཤིགས་འགྱུར་མེད་ཀློང་དུ་བསང་གྱུར་ཅིག །ཁྱད་པར་ཡུལ་ལྷ་གཉན་པོ་འཁོར་དང་བཅས། །འབྱུང་པོ་ཡུལ་ཕུད་གཞན་དུ་འཁྱམས་སྲིད་ན། །རིག་འཛིན་བརྒྱུད་པའི་བཀའ་དམ་བྱིན་ནུས་མཐུས། །རང་ཡུལ་བརྟན་ཆགས་དབུ་འཕང་དགུང་ལས་མཐོ། །མི་ཕྱུགས་སྲུང་སྐྱོབ་རྡོ་རྗེའི་ར་གུར་བཙན། །བཀྲག་མདངས་གཟི་བརྗིད་ཉི་ཟླའི་འོད་ལྟར་གསལ། །ཉམས་ཆག་ཕོག་གྲིབ་ཉེས་པ་སོར་ཆུད་ནས། །དེ་མཐུས་ཕྱི་སྣོད་ཆར་ཆུ་དུས་སུ་འབེབས། །ལོ་འབྲས་བཅུད་སྨིན་ཕྱུགས་ཀྱི་གཡང་མཛོད་འཁྱིལ། །ནང་བཅུད་སེམས་ཅན་བདེ་སྐྱིད་དཔལ་གྱིས་འཚོ། །རྣམ་དཀར་དགེ་བཅུའི་མཛད་པ་མཐར་ཕྱིན་ནས། །བསྟན་འཛིན་སྐྱེས་བུ་ཐུགས་མཐུན་བཞེད་དོན་འགྲུབ། །བསྟན་པའི་ཞབས་ཏོག་སྦྱིན་བདག་དར་ཞིང་རྒྱས། །ཅི་བསམ་ཆོས་བཞིན་འགྲུབ་པའི་བཀྲ་ཤིས་ཤོག །བསྐྱེད་རིམ་ལྷར་སྣང་སྟོང་པའི་ངང་དུ་བཞག །དགེ་བས་འགྲོ་ཀུན་གནས་སྐབས་བདེ་ཞིང་སྐྱིད། །མཐར་ཐུག་དོན་གཉིས་ལྷུན་གྱིས་འགྲུབ་པར་ཤོག །ཅེས་འགོ་བའི་ལྷ་ལྔའི་མནོལ་བསང་བསྡུས་པ་འདི། དད་ལྡན་སྦྱིན་བདག་རྣམས་ཀྱིས་བསྐུལ་ངོར་བན་རྒན་རྒྱ་སྤྲུལ་མིང་གིས་བྲིས་ཏེ་ཕུལ་བས་ཡུལ་ལྷའི་ཚོགས་རྣམས་བྱིང་རྨུགས་དབྱིངས་སུ་བྱང་ནས་དབུ་འཕང་མཁའ་ལ་སྙེགས་པའི་རྒྱུར་གྱུར་ཅིག །