ཡུལ་ལྷ་རྡོ་རྗེ་དབྱི་ཕྲོམ་གྱི་བསང་མཆོད་ཉུང་ངུར་བསྡུས་པ་བདུད་རྩིའི་སྤྲིན་ཕུང་།

༄༅།། ཡུལ་ལྷ་རྡོ་རྗེ་དབྱི་ཕྲོམ་གྱི་བསང་མཆོད་ཉུང་ངུར་བསྡུས་པ་བདུད་རྩིའི་སྤྲིན་ཕུང་བཞུགས་སོ།། ན་མོ་གུ་རུ་པདྨ་ཀཱ་ར་ཡེཿ ཕྱེ་མར་སྐྱེམས་ཕུད་དར་སྣ་འབྲུ་སྨན་སོགས། །བསང་རྫས་སྣ་ཚོགས་བདུད་རྩི་ཤིང་ལྔ་ཡི། །དུད་སྤྲིན་ལྷ་ལམ་ཁྱབ་པའི་སྟ་གོན་དང་། །རང་ཉིད་ཡི་དམ་གང་ཡིན་ང་རྒྱལ་གྱིས། །རོལ་མོ་སྒྲོག་བཞིན་གདུང་བའི་དབྱངས་དང་བཅས། ། རྃ་ཡྃ་ཁྃ་གིས་བསང་རྫས་དངོས་འཛིན་སྦྱངས། །ཨོཾ་ཨཱཿཧཱུྃ་གིས་གང་འདོད་མཆོད་སྤྲིན་སྤེལ། །ཀྱེ། རྣམ་དག་ཆོས་སྐུའི་མཁའ་དབྱིངས་ལས། །རྣམ་མང་ལོངས་སྤྲུལ་ཆུ་ཟླའི་གར། །རྩ་གསུམ་སྲུང་མ་ཡུལ་ལྷར་ཤར། །ཁྱད་པར་མདོ་ཁམས་སྒང་དྲུག་གི། །གཞི་བདག་ཡུལ་ལྷ་ཆེ་ཕྲའི་གཙོ། །གཏེར་སྲུང་རྡོ་རྗེ་དབྱི་ཕྲོམ་རྩལ། །སྔོན་ཚེ་བསྐལ་པའི་དང་པོ་ལ། །གཤེན་རབ་བོན་ལ་ཐ་ཚིག་སྔ། །བར་དུ་རྣམ་སྣང་ལོ་ཙཱ་བ། །རོང་ཆེན་བཞི་ཡི་གདུལ་བྱ་རྣམས། །གསང་ཆེན་ཐེག་པའི་ཉེ་ལམ་ལ།།འགོད་ཕྱིར་རྒྱལ་མོ་རོང་དུ་ཕེབས། །དེ་ཚེ་ནག་ཕྱོགས་ལྷ་སྲིན་ཀུན། །གནོད་འཚེའི་བར་ཆད་ལ་ཞུགས་ཚེ། །སྟོན་འཁོར་དགོངས་པ་གཅིག་པ་ཡི། །ཐུགས་དམ་གསོལ་འདེབས་ཀྱིས་བསྐུལ་བས། །འཆི་མེད་པདྨ་ཐོད་ཕྲེང་རྩལ། །གུ་རུ་དྲག་པོའི་བརྟུལ་ཞུགས་ཀྱིས། །སྟག་ཞོན་མཁའ་ལ་རླུང་ལྟར་བསྐྱོད། །བོད་ཁམས་ལྷ་སྲིན་མ་ལུས་པ། །བསྟན་འགྲོར་ཕན་བདེ་སྤེལ་བའི་ཆེད། །འགྱུར་མེད་བཀའ་དང་དམ་ལ་བཏགས། །ཐ་མ་འོ་བྲན་དབང་ཕྱུག་གི། །ཟློས་གར་འགྱུར་མེད་རྒྱལ་མཚན་སོགས། །གསུམ་ལྡན་རྩ་བརྒྱུད་བླ་མ་ཡིས། །སྨིན་གྲོལ་བདུད་རྩིས་དབུགས་དབྱུང་མཛད། །དོན་ལ་འཕགས་མཆོག་མིག་མི་འཛུམ། །གདུལ་བྱའི་དབང་གིས་ཡུལ་ལྷའི་ཚུལ། །ལྷ་ཡི་དགེ་བསྙེན་མཐུ་རྩལ་ཅན། །རྡོ་རྗེ་དབྱི་ཕྲོམ་ཡུམ་སྤྲུལ་འཁོར། །སངས་རྒྱས་བསྟན་པའི་ཆོས་སྒོར་བཙུད། །ཆོས་ནོར་ཟབ་གཏེར་སྲུང་མར་བསྐོས། །དེ་ཚེ་ཁས་བླངས་དམ་བཅས་བཞིན། །འགྲོ་བའི་བདེ་སྐྱིད་སྤེལ་བ་དང་། །རྒྱལ་བསྟན་མི་ནུབ་དར་རྒྱས་ཕྱིར། །རྣལ་འབྱོར་ཕྲིན་ལས་སྒྲུབ་པའི་སླད། །མཁའ་ལ་སྤྲིན་གྱི་ལྕུག་མ་ལྟར། །དད་དམ་དྲག་པོས་རྒྱུད་བསྐུལ་ཏེ། །འདིར་གཤེགས་བསང་གི་མཆོད་པ་བཞེས། །ས་ཐབ་སངས་རྒྱས་སྤྱན་མའི་མཁར། །བདུད་རྩི་ཤིང་ལྔ་ཕྱེ་མར་ཕུད། །སྨན་སྤོས་འབྲུ་སྣ་དར་ཟབ་གོས། །ཟག་མེད་སྨན་རཀ་གཏོར་གསུམ་སོགས། །ཡེ་ཤེས་མེ་ཡིས་བསྲེགས་པ་ལས། །དུད་པས་ས་གསུམ་གནས་ཀུན་ཁྱབ། །རྣལ་འབྱོར་ལྷ་སྔགས་ཕྱག་རྒྱའི་མཐུས། །ངོ་བོ་ཟག་མེད་བདུད་རྩི་ལ། །རྣམ་པ་གཟུགས་སྒྲ་དྲི་རོ་རེག །རྨད་བྱུང་འདོད་པའི་ཡོན་ཏན་ལྔ། །རྩ་གསུམ་དམ་ཅན་སྲུང་མ་དང་། །ཁྱད་པར་ཡུལ་ལྷ་གཞི་བདག་གི། །དབང་པོ་དྲུག་གི་སྤྱོད་ཡུལ་དུ། །བདེ་སྟོང་ཡེ་ཤེས་བསྐྱེད་ནུས་པའི། །ངོ་མཚར་འདོད་རྒུའི་བསང་མཆོད་འདིས། །བཀའ་དྲིན་གསུམ་ལྡན་བླ་མ་སོགས། །རྩ་བ་བརྒྱུད་པ་ཐམས་ཅད་བསང་། །མཆོག་ཐུན་དངོས་གྲུབ་འདོད་འཇོའི་གཏེར། །ཡི་དམ་ཞི་ཁྲོའི་ཚོགས་ཀུན་བསང་། །ལེགས་ཉེས་སྟངས་འཛིན་བར་ཆད་སེལ། །གནས་གསུམ་མཁའ་འགྲོ་རྒྱ་མཚོ་བསང་། །རྣལ་འབྱོར་དམ་ལྡན་སྲུང་བའི་ལྷ། །དམ་ཉམས་ཞིང་བཅུ་སྒྲོལ་བའི་བདུད། །དྲག་རྩལ་མྱུར་མགྱོགས་ཆེ་བའི་བཙན། །མ་ངེས་སྤྲུལ་པའི་སྒྱུ་འཕྲུལ་ཅན། །ཡུལ་ལྷ་རྡོ་རྗེ་དབྱི་ཕྲོམ་བསང་། །དགྱེས་སྡེ་བཙུན་མོའི་ཚོགས་ཀུན་བསང་། །བཀའ་སྡོད་བློན་འབངས་སྤྲུལ་འཁོར་བསང་། །ཞི་རྒྱས་དབང་དྲག་ལས་མཛད་ཕྱིར། །དཀར་གསལ་དུང་མདངས་བཙོ་མ་གསེར། །བསེ་ལྕགས་སྨུག་པོའི་ཁ་དོག་ངོམ། །རྩལ་ཆེན་ཅང་ཤེས་གདོང་ལྔའི་དབང་། །གཡུ་འབྲུག་འཇིགས་རུང་སྟག་ཆུ་སྲིན། །སྣ་ཚོགས་ཞོན་པའི་རྫུ་འཕྲུལ་སྟོན། །ཕྱག་མཚན་བ་དན་གཏེར་སྒྲོམ་དང་། །ནོར་བུ་ལྕགས་ཀྱུ་གནམ་ལྕགས་མདའ། །མ་ངེས་སྣ་ཚོགས་ཆོ་རོལ་འགྱེད། །དོན་ལ་ས་བརྒྱད་བྱང་ཆུབ་སེམས། །རྒྱལ་བསྟན་སྐྱོང་དང་འགྲོ་ཀུན་གྱི། །བདེ་སྐྱིད་སྤེལ་མཛད་ཁྱོད་ལ་བསྟོད། །རྣལ་འབྱོར་ཕྲིན་ལས་བཅོལ་བ་ནི། །ཕན་བདེའི་འབྱུང་གནས་རྒྱལ་བསྟན་སྲུངས། །དེ་འཛིན་བཤེས་གཉེན་སྐུ་ཚེ་སྲིངས། །མཛད་ཕྲིན་ཡར་ཟླ་ལྟར་འཕེལ་མཛོད། །ཡངས་པའི་རྒྱལ་ཁམས་སྤྱི་དང་ནི། །ཁྱད་པར་བོད་ཁམས་སྐྱེ་འགྲོ་ཡི། །ནད་གདོན་འཇིགས་བརྒྱད་ཀུན་ཞི་ཞིང་། །ཚེ་བསོད་ལེགས་ཚོགས་ཡོན་ཏན་རྒྱས། །གང་འདོད་སྣང་བ་དབང་དུ་འདུས། །དུས་གསུམ་གནོད་པའི་དགྲ་དང་བགེགས། །ཕྲིན་ལས་དྲག་པོས་ཚར་གཅོད་ཅིང་། །ཡང་དགོས་ཡུལ་འདིའི་མི་དབང་དང་། །ཆོས་གྲྭ་སྡེ་སྲིད་བཅས་པ་ལ། །དངོས་སུ་འཚེ་ཞིང་མི་མངོན་པའི། །ལོག་པའི་བསམ་སྦྱོར་དང་ལེན་པ། །དམིགས་པའི་ཡུལ་དུ་གྱུར་པ་ལ། །དཀར་ཕྱོགས་ལྷ་དང་སྲུང་མ་དང་། །ཡུལ་ལྷའི་བཀའ་ཆད་གནམ་ལྕགས་མདས། །ལོག་འདྲེན་མི་ནོར་ཁང་རུལ་རྫོངས། །རྡུལ་ཕྲན་མིང་གི་ལྷག་མ་རུ། །མྱུར་དུ་བརླག་པའི་ཕྲིན་ལས་མཛོད། །བཀྲ་ཤིས་བདུད་རྩིའི་ཆར་ཆེན་པོས། །བསྟན་འགྲོའི་ཕན་བདེའི་ལོ་འབྲས་སྨིན། །ཀུན་ཀྱང་བདེ་སྐྱིད་དཔལ་ཡོན་ལ། །རྟག་པར་སྤྱོད་པའི་དགེ་ལེགས་སྩོལ། །ཅེས་འདི་དད་དང་དམ་ཚིག་གིས། །བྱང་ཆུབ་བར་དུ་འབྲེལ་བའི་སྤུན། །ཟབ་གཏེར་མཁའ་འགྲོའི་ལུང་བྱང་ལས། །བྱུང་བའི་ལྷ་གྲོགས་ཀྱིས་བསྐུལ་ངོར། །ཙི་ནའི་སྤྲུལ་མིང་རྒན་པོ་ཡིས། །གང་ཤར་ཐོགས་པ་མེད་པར་སྨྲས། །གང་འབྲེལ་དོན་གཉིས་ལྷུན་འགྲུབ་ཤོག །དགེའོ།།