གནས་ལུང་དཔལ་གྱི་རི་བོའི་ཡུལ་བདག་དབང་སྡུད་ལྷ་རྩེའི་བསང་མཆོད་བདུད་རྩིའི་ཆར་སྤྲིན།

༄༅།། ཁམས་ཀྱི་ཙ་རི་ཏྲའི་གནས་ལག་གནས་ལུང་དཔལ་གྱི་རི་བོའི་ཡུལ་བདག་དབང་སྡུད་ལྷ་རྩེའི་བསང་མཆོད་བདུད་རྩིའི་ཆར་སྤྲིན་ཞེས་བྱ་བ་བཞུགས། བདུད་རྩི་ཤིང་ལྔའི་བསང་དུད་དང་ཕྱེ་མར་གསེར་སྐྱེམས་སོགས་མཐོང་བརྒྱུད་ལྟར་གཙང་སྦྲ་དང་ལྡན་པས་རང་ཉིད་པད་འབྱུང་ཞི་བའི་ཏིང་འཛིན་གྱིས་ངང་ནས་རོལ་མོ་དང་བཅས་ཏེ་འདི་སྐད་དོ།། ཀྱེ་འཁོར་འདས་ཡེ་ནས་སྤྲོས་པའི་མཐའ་བྲལ་ཡང་། །གཞི་རྩལ་ལྷུན་གྲུབ་སྒོ་བརྒྱད་ཕྱིར་ཤར་ཚེ། །ཐུགས་རྗེ་ལྟར་ཤར་སྐུ་གསུམ་སྟོན་པ་དང་། །འཁོར་བ་ལྟར་ཤར་རླུང་རིག་སེམས་ཅན་སྲིད། །དེ་ཚེ་དགེ་དང་མི་དགེའི་རྟེན་འབྲེལ་ལས། །ཕན་གནོད་བྱེད་པོ་སྣང་སྲིད་ལྷ་འདྲེར་སྣང་། །དེ་ལས་འཛམ་གླིང་ལས་ཀྱི་ས་པ་འདིར། །སྐུ་གསུམ་གཅིག་བསྡུས་པདྨ་ཐོད་ཕྲེང་གི། །ངོ་མཚར་རྨད་བྱུང་ཐུགས་རྗེའི་བྱིན་རླབས་ལས། །རྒྱ་བོད་ཀུན་ཏུ་སྒྲུབ་གནས་བྱིན་ཅན་དང་། །ཡུལ་ལྷ་གནས་བདག་དུ་མ་སྲུང་མར་བསྐོས། །ཡུལ་ཆེན་ཉེར་བཞིའི་ཡ་གྱལ་ཙ་རི་ཏྲའི། །གནས་ཀྱི་བྱིན་རླབས་བདུད་རྩིས་ལེགས་བྲན་པའི། །གནས་ལུང་དཔལ་གྱི་རི་བོར་ཆེར་གྲགས་པའི། །ཆོས་ནོར་གཏེར་གྱི་སྲུང་མ་ཁྱད་པར་ཅན། །ཕྱི་ལྟར་ཡུལ་སྐྱོང་དབང་སྡུད་ལྷ་རྩེ་ལ། །ནང་ལྟར་བྲག་བཙན་གནོད་སྦྱིན་ཙི་འུ་དམར། །གསང་བ་དབང་གི་རྒྱལ་པོ་རྟ་མཆོག་རྒྱལ། །སྔོན་ཚེ་གུ་རུ་པདྨ་འབྱུང་གནས་དང་། །བར་དུ་གྲུབ་དབང་ཆོས་རྗེ་ཀརྨ་པ། །ཐ་མ་གསུམ་ལྡན་རྡོ་རྗེ་འཛིན་པའི་མཆོག །རིག་འཛིན་ཆེན་པོ་མཐུ་སྟོབས་རྡོ་རྗེ་ཡིས། །བཀའ་བསྒོས་དམ་བཞག་མངའ་གསོལ་མཛད་པ་བཞིན། །ཐོགས་མེད་རྫུ་འཕྲུལ་ཤུགས་ཀྱིས་འདིར་སྤྱོན་ཅིག །རང་མཐུན་ཡིད་འོང་མཛེས་པའི་སྟན་ལ་བཞུགས། །དངོས་འབྱོར་ཡིད་སྤྲུལ་ཏིང་འཛིན་ནམ་མཁའི་མཛོད། །སྟོང་ཉིད་རང་གདངས་འགག་མེད་སྒྱུ་མའི་འཕྲུལ། །རྩོལ་མེད་མཆོད་སྤྲིན་རྒྱ་མཚོའི་སྤྲིན་ཕུང་ལས། །མཛེས་པའི་གཟུགས་སྣང་སྙན་པའི་རོལ་མོའི་སྒྲས། །གདུང་སེལ་དྲི་བསུང་རོ་བརྒྱ་ལྡན་པའི་ཟས། །སྲབ་འཇམ་ཁ་དོག་མཛེས་པའི་དར་ཟབ་གོས། །སྲ་བརྟན་གོ་ཁྲབ་རྣོ་ངར་ལྡན་པའི་མཚོན། །རྒྱལ་སྲིད་འབྱོར་བ་ཉེ་བའི་རིན་ཆེན་བདུན། །བཀྲ་ཤིས་རྫས་རྟགས་ས་ཐབ་སྤྱན་མའི་མཁར། །བདུད་རྩི་ཤིང་ལྔ་ཕྱེ་མར་བཏུང་བའི་རིགས། །འབྲུ་སྨན་དར་སྣ་གོས་དཀར་ལྷ་མོ་ཡི། །འབར་བའི་ཤུགས་ཀྱིས་བཞུས་པའི་དུད་པའི་སྤྲིན། །ལས་རབ་དཔའ་མོས་རབ་བསྐྱེད་ས་གསུམ་ཁྱབ། །དུད་པའི་ཟེགས་མ་རེ་རེའི་གསེབ་ལས་ཀྱང་། །དབང་པོ་དྲུག་ལ་ཟག་མེད་བདེ་བསྐྱེད་པའི། །ངོ་མཚར་འདོད་རྒུར་འཆར་བའི་བསང་མཆོད་འདིས། །བྱིན་རླབས་རྩ་བ་བརྒྱུད་གསུམ་བླ་མ་བསང་། །དངོས་གྲུབ་རྩ་བ་ཡི་དམ་ལྷ་ཚོགས་བསང་། །ཕྲིན་ལས་རྩ་བ་མ་རྒྱུད་མཁའ་འགྲོ་བསང་། །འདོད་དགུའི་གྲོགས་མཛད་ཆོས་སྐྱོང་སྲུང་མ་བསང་། །ཕན་བདེའི་དཔལ་སྟེར་ཡུལ་ལྷ་གཞི་བདག་སོགས། །འགོ་བའི་ལྷ་ལྔ་སྐྱོབས་པའི་ལྷ་དགུ་བསང་། །ཁྱད་པར་ཡུལ་སྐྱོང་དབང་སྡུད་ལྷ་རྩེ་བསང་། །གསང་ཡུམ་བློན་འབངས་སྤྲུལ་པ་ཡང་སྤྲུལ་བསང་། །ཁྱོད་ཀྱི་སྐུ་མདོག་ཕྱག་མཚན་སྤྲུལ་བསྒྱུར་སོགས། །གཅིག་ཏུ་མ་ངེས་ལས་བཞིའི་སྒྱུ་འཕྲུལ་ངོམ། །འདོད་དོན་ཕྲིན་ལས་གཉན་པོ་བཅོལ་བ་ནི། །ཕན་བདེའི་འབྱུང་གནས་སངས་རྒྱས་བསྟན་པ་སྲུངས། །འགྲོ་བའི་སྐྱབས་མཆོག་བླ་མའི་སྐུ་ཚེ་སྲིངས། །བསྟན་པ་འཛིན་པའི་དགེ་འདུན་སྡེ་གཉིས་རྒྱས། །བསྟན་ལ་གུས་མཆོད་སྦྱིན་བདག་བར་ཆད་སྲུངས། །བསྟན་འགྲོར་གནོད་པའི་དགྲ་འདྲེའི་དཔུང་ཚོགས་ཆོམ། །གནས་སྐབས་ཚོང་མགྲོན་རྙེད་འཚོལ་བསམ་ཀུན་སྒྲུབས། །མཐར་ཐུག་རྒྱལ་བའི་བསྟན་ལ་ཞུགས་པའི་མཐུས། །རང་གཞན་དོན་གཉིས་འགྲུབ་པའི་ཕྲིན་ལས་མཛོད། །ཅེས་པའང་ཆུང་ནས་ཆོས་ཀྱིས་འབྲེལ་ཞིང་བརྩེ་བའི་ལྷ་གྲོགས་སྭ་ར་ཛ་ཡས་བསྐུལ་ངོར་དགེ་སྦྱོང་རྒན་པོ་རྒྱ་སྤྲུལ་པས་སོ།།