མཚོ་སྨན་རྒྱལ་མོའི་བསང་ཡིག་བདུད་རྩིའི་ཟེགས་མ།

༄༅།། མཚོ་སྨན་རྒྱལ་མོའི་བསང་ཡིག་བདུད་རྩིའི་ཟེགས་མ་ཞེས་བྱ་བ་བཞུགས་སོ།། ན་མོ་གུ་རུ་པདྨ་ཀཱ་ར་ཡ། འདིར་ཡུལ་ལྷ་མཚོ་སྨན་རྒྱལ་མོ་ལ་བསང་མཆོད་འབུལ་བར་འདོད་པས་བསངས་གཞུང་གང་རུང་ལ་བརྟེན་པའི་མཚམས་སུ་བསངས་རྫས་རྣམས་རྃ་ཡྃ་ཁྃ་དང་ཨོཾ་ཨཱཿཧཱུྃ་གིས་བྱིན་གྱིས་བརླབས་ལ་འདི་སྐད་དོ།། ཀྱཻ། ངོ་མཚར་གནས་མཆོག་མདོ་ཁམས་སྒང་གི་ཆར། །ཡུལ་ལྷ་གཉན་པོ་རྡོ་རྗེ་དབྱི་ཕྲོམ་གྱི། །བཀའ་ཡི་ཅོད་པན་འཆང་བའི་དཀར་ཕྱོགས་སྐྱོང་། །མཚོ་སྨན་རྒྱལ་མོ་འཁོར་བཅས་འདིར་གཤེགས་ཤིག །སྔོན་ཚེ་ཐུབ་པའི་ཞལ་སྐྱིན་ཨོ་རྒྱན་རྗེ། །བོད་ཡུལ་ཆོས་རྒྱལ་ཚངས་པའི་མེ་ཏོག་གིས། །སྤྱན་དྲངས་བསྟན་པའི་སྒྲོན་མེ་སྦར་བའི་ཚེ། །སྐབས་སུ་ལོ་པཎ་བཻ་རོ་ཙ་ན་དང་། །རྒྱལ་མོ་གཡུ་སྒྲ་སྙིང་པོ་རྣམ་གཉིས་ཀྱིས། །རོང་ཆེན་ཆོས་ལ་བཀོད་པའི་རྟེན་འབྲེལ་བསྒྲིགས། །གདུག་ཅན་ལྷ་འདྲེས་གླགས་བལྟས་བར་དུ་བཅད། །དཔོན་སློབ་གཉིས་ཀྱིས་ཨོ་རྒྱན་ཆེན་པོ་ལ། །གསོལ་བཏབ་སྤྱན་དྲངས་ཐུགས་རྗེའི་རྒྱུད་བསྐུལ་ནས། །རྫུ་འཕྲུལ་སྟག་ལ་ཆིབས་ཏེ་མཁའ་ལ་གཤེགས། །ཝ་སེང་བྲག་དང་སེང་གེ་ཡང་རྫོང་དང་། །ལྷ་གཉན་རྒྱལ་མོ་མུ་རྡོའི་གནས་རྣམས་སུ། །ཟལ་མོ་སྒང་གི་ཆར་གཏོགས་དབྱི་གཙང་དང་། །རྒྱལ་རོང་གཞི་བདག་མ་ལུས་དམ་ལ་བཏགས། །དེ་ཚེ་བཀའ་ཉན་མདོ་སྔགས་བསྟན་པ་ལ། །གུས་ཤིང་བསྲུང་བར་ཁས་བླངས་ཡུལ་ལྷའི་གཙོ། །མཚོ་སྨན་རྒྱལ་མོ་འཁོར་བཅས་འདིར་གཤེགས་ཤིག །དྭངས་གསལ་མཁའ་དབྱིངས་དོག་པོར་བྱེད་པ་ཡི། །བདུད་རྩི་ཤིང་ལྔའི་བསང་དུད་སྤྲིན་ལྟར་གཏིབས། །རྣལ་འབྱོར་ཏིང་འཛིན་སྔགས་དང་ཕྱག་རྒྱ་ཡིས། །བྱིན་རླབས་ནམ་མཁའ་མཛོད་ཀྱིི་ལོངས་སྤྱོད་ལྟར། །ཟག་མེད་འཇིག་རྟེན་གང་བར་གྱུར་པ་ལས། །རྒྱལ་སྲིད་བདུན་དང་བཀྲ་ཤིས་རྫས་རྟགས་བརྒྱད། །ཁང་བཟང་སྐྱེད་ཚལ་ཟས་གོས་སྨན་སྤོས་འབྲུ། །སྲོག་ཆགས་སྣ་ཚོགས་མཛེས་སྡུག་ཆེ་ཚོ་བརྗིད། །གང་འདོད་ལོངས་སྤྱོད་སྣ་ཚོགས་ཆར་དུ་འབེབས། །དེ་འདྲའི་ངོ་མཚར་བསངས་ཀྱི་མཆོད་པ་འདིས། །ཡུལ་ལྷ་གཉན་པོ་མཚོ་སྨན་རྒྱལ་མོ་བསང་། །བཀའ་ཡི་གཉེར་འཛིན་ལྷ་ཀླུ་གཉན་ལ་སོགས། །མ་ཚང་མེད་པའི་འཁོར་ཚོགས་ཐམས་ཅད་བསང་། །ཁྱེད་རྣམས་དབང་པོ་དྲུག་གི་སྤྱོད་ཡུལ་དུ། །ཟག་པ་མེད་པའི་བདེ་བས་ཤེས་རྒྱུད་ཚིམ། །བདེན་བཞིའི་ཆོས་ཀྱི་རྒྱུད་གྲོལ་ཕན་བདེ་ཡི། །འབྱུང་གནས་མཆོག་གྱུར་རྒྱལ་བའི་བསྟན་པ་ལ། །མི་ཕྱེད་དད་པས་རྟག་ཏུ་བསྲུང་བ་དང་། །སྨོན་འཇུག་བྱང་ཆུབ་སེམས་ཀྱི་སྡོམ་བཟུང་ནས། །མི་ཉམས་འཕགས་པའི་དགེ་འདུན་དཔོན་སློབ་ལ། །མ་སྲིང་བརྩེ་ལྟར་རྟག་ཏུ་གྲོགས་མཛོད་ཅིག །རྒྱལ་ཁམས་སྤྱི་དང་ཁྱད་པར་ཡུལ་འདི་ཡི། །མི་མཐུན་རྒུད་པ་ནད་མུག་མཚོན་འཁྲུག་སོལ། །ས་དབང་ཆོས་ཀྱི་རྒྱལ་པོའི་ཆབ་སྲིད་སྤེལ། །དགེ་འདུན་སྡེ་ཚོགས་མཚོ་ལ་ངང་པ་ལྟར། །ཐུགས་མཐུན་ཁྲིམས་གཙང་ཆོས་གྲྭ་འདི་རུ་འདུས། །བཤད་དང་སྒྲུབ་པས་རྒྱལ་བསྟན་བླ་རུ་འདེགས། །ཚེ་བསོད་དཔལ་འབྱོར་ཡར་ངོའི་ཟླ་ལྟར་རྒྱས། །ལྷ་འདྲེ་མི་གསུམ་ཚོགས་ཀུན་དབང་དུ་འདུས། །ཟས་ནོར་ལོངས་སྤྱོད་མཐུན་རྐྱེན་ཆར་ལྟར་འབེབས། །མི་མཐུན་ཉེར་འཚེ་སློང་བའི་གདུག་པ་ཅན། །སྡང་བའི་དགྲ་དང་གནོད་བྱེད་བགེགས་ཀྱི་རིགས། །རྩ་གསུམ་སྲུང་མ་ཡུལ་ལྷའི་བདེན་སྟོབས་ཀྱིས། །མིང་གི་ལྷག་མར་རྡུལ་དུ་བརླགས་ནས་ཀྱང་། །ཕྱོགས་ལས་རྣམ་པར་རྒྱལ་བའི་ཕྲིན་ལས་ཀྱིས། །བདག་ཅག་དུས་རྣམས་ཀུན་ཏུ་སྐྱོང་བར་མཛོད། ཀྱཻ། སྣ་ཚོགས་རྫུ་འཕྲུལ་ངོམས་པའི་སྤྲུལ་བསྒྱུར་ཅན། །རེས་འགའ་སྐུ་མདོག་དཀར་གསལ་ཞི་འཛུམ་བཞད།།མདའ་དར་གཏེར་བུམ་བསྣམས་ནས་ཚེ་གཡང་སྡུད། །རིན་ཆེན་རྒྱན་དང་དར་གོས་ལྷབ་ལྷུབ་གསོལ། །ཤ་བ་ཡུ་མོ་ཞོན་ནས་སྨན་ཕྲན་དང་། །ལྷ་ཀླུའི་ཚོགས་ཀྱི་དབུས་སུ་རྩེད་འཇོར་རོལ། །ཞི་བའི་ཕྲིན་ལས་སྣ་ཚོགས་སྒྲུབ་ལ་དགྱེས། །དེ་བཞིན་གསེར་དང་པད་རག་ཨིནྡྲའི་མདངས། །འཇའ་ཚོན་མདངས་འདྲའི་གོས་དང་ངང་སེར་རྟ། །གཅན་གཟན་སྣ་ཚོགས་ཆིབས་པའི་ཚུལ་ཡང་སྟོན། །སྲས་དང་བློན་པོ་བཀའ་སྡོད་སྣ་ཚོགས་བསྐོར། །ཚེ་བསོད་རྒྱས་དང་དབང་དྲག་ལས་ལ་དགྱེས། །རྣལ་འབྱོར་སེམས་ཀྱི་རང་མདངས་དྲེགས་པའི་གཟུགས། །དེ་བཞིན་ཕྲིན་ལས་རྣམ་བཞིའི་དངོས་གྲུབ་ཀུན། །ཐོགས་མེད་ཡིད་བཞིན་འགྲུབ་པའི་ཤིས་པ་སྩོལ།། ཅེས་པའང་དད་ལྡན་ཀརྨ་དོན་འགྲུབ་ཀྱིས་བསྐུལ་ངོར། རྒྱལ་ཁམས་ཉུལ་བའི་དཱ་རི་དྲ་རྒྱ་སྤྲུལ་མིང་བས་སྨྲས་པ་ཤེས་བྱའི་གནས་ལ་བློ་གྲོས་ཀྱི་འཇུག་སྒོ་ཡངས་པར་འདོད་པའི་བཙུན་ཆུང་བིདྱཱ་དྷ་རས་ཡི་གེར་བྲིས་པས་དུས་གསུམ་ཀུན་ཏུ་དགེ་བའི་རྒྱུར་གྱུར་ཅིག་མངྒ་ལཾ།