ཡུལ་ལྷ་རྙི་བོ་སྤུན་གསུམ་གྱི་བསང་བསྡུས་བདུད་རྩིའི་ཟེགས་མ།

༄༅།། ཡུལ་ལྷ་རྙི་བོ་སྤུན་གསུམ་གྱི་བསང་བསྡུས་བདུད་རྩིའི་ཟེགས་མ་བཞུགས།། བསང་རྫས་བདུད་རྩི་ཤིང་ལྔའི་དུད་པ་སོགས་སྤྱི་ལྟར་ལ་རང་ཉིད་ལྷའི་རྣལ་འབྱོར་སྔོན་དུ་འགྲོ། རྃ་ཡྃ་ཁྃ་གིས་བསྲེགས་གཏོར་བཀྲུས། ཨོཾ་ཨཱཿཧཱུྃ་གིས་སྣོད་བཅུད་ཕུན་སུམ་ཚོགས་པ་འདོད་རྒུའི་འབྱུང་གནས་སུ་སྤེལ་ལ། ཀྱཻ། ཀུན་གཞི་གདོད་ནས་ཆོས་དབྱིངས་དྲི་བྲལ་ཀྱང་། །ལྷན་སྐྱེས་ཀུན་བརྟགས་གཟུང་འཛིན་རྒྱུ་རྐྱེན་གྱིས། །ལས་དང་ཉོན་མོངས་འཁོར་བའི་འཁྲུལ་སྣང་ལས། །ཕན་དང་གནོད་བྱེད་ལྷ་དང་འདྲེ་རུ་སྣང་། །ཁྱད་པར་ཕ་ལྷ་མ་ལྷ་ཞང་ལྷ་དང་། །སྲོག་སྐྱོབ་ལྷ་དང་ཡུལ་གྱི་ལྷ་དང་ལྔ། །རྟག་ཏུ་གྲོགས་བྱེད་འགོ་བའི་ལྷ་ལྔར་གྲགས། །འཛམ་གླིང་ལས་ཀྱི་ས་པ་འདི་ཉིད་དུ། །གཞི་བདག་ཆེ་ཕྲ་མ་ལུས་ཐམས་ཅད་ཀུན། །སྔོན་ཚེ་རྒྱལ་དབང་པདྨ་ཐོད་ཕྲེང་དང་། །བར་དུ་གྲུབ་བརྒྱའི་གཙུག་རྒྱན་རྒྭ་ལོའི་མཚན། །ཐ་མ་གཏེར་སྟོན་ལུང་ཟིན་སྐྱེས་བུ་ཡིས། །བཀའ་དང་དམ་ལ་བཞག་པའི་ཡལ་གམ་ཅན། །ཁྱད་པར་ཡུལ་ལྷ་རྡོ་རྗེ་དབྱི་ཕྲོམ་དང་། །ཆོས་འཁོར་སྐྱོང་བའི་སྐུ་ལྷ་དུང་རྩེ་ཡི། །དགྱེས་སྡེ་དྲག་ཤུལ་མཚོ་སྨན་རྒྱལ་མོའི་འཁོར། །བཀའ་ཡི་ལས་བྱེད་རྙི་བོ་སྤུན་གསུམ་ནི། །ལྷ་བཙན་ནོར་བུ་དུང་རྩེ་སྐུ་མདོག་དཀར། །རྟ་དཀར་བ་དན་དཀར་པོ་ཁྲབ་རྨོག་མཛེས། །ཀླུ་བཙན་གདུག་པའི་དུག་ཅན་སྐུ་མདོག་སྔོ། །སྦྲུལ་གྱི་རྒྱན་དང་ཀླུ་རྟ་སྔོན་པོ་ཆིབས། །བ་དན་སྔོན་པོ་གཡུ་ཁྲབ་གཡུ་རྨོག་གསོལ། །བྲག་བཙན་དམར་པོ་ཁྲག་མདོག་བསེ་ཁྲབ་དང་། །བསེ་རྨོག་རྒོད་འཕྲུ་དར་གྱི་ཅོད་པཎ་མཛེས། །བ་དན་དམར་པོ་བཙན་ཞགས་གྲུ་ལ་བསྐོན། །རྟ་དམར་བསེ་གདོང་གསེར་སྲབ་གཡུ་མཐུར་རྔམས། །རང་རང་དགྱེས་སྡེ་མཚོ་སྨན་སྤུན་གསུམ་དང་། །ལས་ཀྱིས་སྤྲུལ་པའི་འཁོར་གཡོག་སྣ་ཚོགས་འགྱེད། །དགེ་དང་མི་དགེ་སྣ་ཚོགས་ལས་ལ་སྤྱོད། །ཕན་དང་གནོད་པའི་ཆོ་འཕྲུལ་མ་ངེས་སྟོན། །དེང་འདིར་བརྩེ་བས་བསང་གི་མགྲོན་དུ་འབོད། །མོས་འདུན་སེམས་ཀྱིས་འདིར་སྤྱོན་བག་ཕེབ་བཞུགས། །བདུད་རྩི་ཤིང་ལྔ་བསྲེགས་པའི་དུད་སྤྲིན་འཁྲིགས། །མཆོག་གསུམ་ཐུགས་རྗེའི་མཐུ་དང་སྔགས་ཏིང་འཛིན། །ལྷག་བསམ་དག་པས་སྦྱངས་སྤེལ་བསྒྱུར་བ་ལས། །ཉེར་སྤྱོད་ལྔ་དང་གཟུགས་སྒྲ་དྲི་རོ་དང་། །གཡག་ལུག་ར་གསུམ་རི་དྭགས་གཡུང་དྭགས་དང་། །མཁའ་ལ་ལྡིང་དང་ཆུ་གནས་སྲོག་ཆགས་ཚོགས། །ཆེ་ཚོ་བརྗིད་ལྡན་རྩལ་སྟོབས་མྱུར་བའི་ཤུགས། །ཡིད་འོང་འདོད་རྒུ་གར་རྩེད་བསྒྱུར་བ་འདིས། །ཡུལ་ལྷའི་གཙོ་བོ་རྡོ་རྗེ་དབྱི་ཕྲོམ་བསང་། །ཆོས་འཁོར་སྲུང་མ་སྐུ་བླ་དུང་རྩེ་བསང་། །དྲག་ཤུལ་རྩལ་འཆང་མཚོ་སྨན་རྒྱལ་མོ་བསང་། །ལྷ་ཡི་བཙན་རྒོད་ནོར་བུ་དུང་རྩེ་བསང་། །ཀླུ་ཡི་བཙན་རྒོད་གདུག་པའི་དུག་ཅན་བསང་། །བྲག་གནས་བཙན་རྒོད་ཁྲག་མདོག་དམར་པོ་བསང་། །རྙི་བོ་སྤྲུལ་པའི་འཁོར་ཚོགས་ཐམས་ཅད་བསང་། །དབང་པོའི་ཡུལ་ལ་འདོད་དགུའི་ལོངས་སྤྱོད་ཚོགས། །གང་ཡང་མ་ཚང་མེད་པ་འབྱུང་གྱུར་ཅིག། །བདག་གི་འདོད་དོན་ཕྲིན་ལས་བཅོལ་བ་ནི། །ཕན་བདེའི་འབྱུང་གནས་རྒྱལ་བསྟན་དར་ཞིང་རྒྱས། །འགྲོ་བ་མ་ལུས་བདེ་སྐྱིད་དཔལ་གྱིས་འཚོ། །ཁྱད་པར་ཡུལ་འདིའི་ནད་མུག་མཚོན་འཁྲུག་སོལ། །ཡང་དགོས་བདག་ཅག་མི་ནོར་འཁོར་བཅས་ལ། །ཕྱི་རྐྱེན་དགྲ་ཇག་ཆོམ་རྐུན་འཚེ་བ་ཟློག །ནང་རྐྱེན་ནད་མུག་ནང་འཁྲུག་མི་མཐུན་སོལ། །ཚེ་དཔལ་ལོངས་སྤྱོད་ཡར་ངོའི་ཟླ་བ་ལྟར། །མི་ཉམས་གོང་དུ་འཕེལ་ཞིང་རྒྱས་པ་དང་། །སྣང་བ་དབང་འདུས་དགྲ་བགེགས་ལོག་འདྲེན་ཀུན། །ཐམས་ཅད་མིང་གི་ལྷག་མར་ཚར་ཆོད་ལ། །ལེགས་ཚོགས་དབྱར་གྱི་མཚོ་ལྟར་རྒྱས་པར་མཛོད། །མདོར་ན་མི་མཐུན་རྒུད་པའི་ཚོགས་ཞི་ཞིང་། །མཐུན་རྐྱེན་བསམ་དོན་ཡིད་བཞིན་འགྲུབ་པ་ཡི། །བདེ་སྐྱིད་དཔལ་གྱི་ཉི་མ་རྟག་འཆར་ཞིང་། །ཆོས་མཐུན་དགེ་བའི་ལས་ཀུན་མྱུར་འགྲུབ་མཛོད། །རྒྱལ་དང་དེ་སྲས་རིག་འཛིན་བླ་མ་དང་། །ཡི་དམ་ཞི་ཁྲོ་གནས་གསུམ་མཁའ་འགྲོའི་ཚོགས། །དམ་ཅན་སྲུང་མ་འགོ་བའི་ལྷ་སྲུང་གིས། །རྟག་ཏུ་སྲུང་སྐྱོབ་འབྲལ་མེད་བདེ་ལེགས་སྩོལ།། ཅེས་པའང་སྙིང་ནས་བརྩེ་བའི་ལྷ་གྲོགས་དམ་པ་བསྟན་འཕེལ་གྱིས་བསྐུལ་ངོར་རྒྱ་སྤྲུལ་མིང་པས་གང་ཤར་བཅོས་མེད་དུ་བྲིས་པའོ།།