འཆི་མེད་རྔ་སྒྲའི་གནས་བདག་གི་བསང་མཆོད་ཕན་བདེའི་སྤྲིན་ཕུང་།
༄༅།། འཆི་མེད་རྔ་སྒྲའི་གནས་བདག་གི་བསང་མཆོད་ཕན་བདེའི་སྤྲིན་ཕུང་བཞུགས། ན་མ་པདྨ་ཀཱ་ར་ཡེ། འདིར་ཡུལ་སྐྱོང་ལ་བསང་མཆོད་བྱ་བར་འདོད་པས་ལྷ་ཤིང་བདུད་རྩི་ཅན་དང་དཀར་དམར་ཇ་ཆང་མེ་ལ་བསྲེག་ཅིང་། རང་ཉིད་རྩ་བའི་ཡི་དམ་གྱི་སྐུར་གསལ་བས། རྃ་ཡྃ་ཁྃ་དང་ནམ་མཁའ་མཛོད་ཀྱི་སྔགས་རྒྱས་བྱིན་གྱིས་བརླབས་ནས། ཀྱཻ། ངོ་མཚར་རྨད་བྱུང་འཛམ་གླིང་སོག་ཁའི་དབྱིབས། །མདོ་སྨད་རྒྱལ་མོ་རོང་དང་ཉེ་བའི་ཆར། །སྔོན་དུས་སློབ་དཔོན་པདྨ་ཐོད་ཕྲེང་རྩལ། །སྐལ་ལྡན་རྗེ་འབངས་ཉི་ཤུ་རྩ་ལྔ་དང་། །སྤྲུལ་པའི་གཏེར་སྟོན་རིག་འཛིན་ཚོགས་རྣམས་ཀྱིས། །རི་བྲག་ཐམས་ཅད་སྒྲུབ་གནས་བྱིན་གྱིས་བརླབས། །དེ་ཡི་གནས་བདག་ཡེ་ཤེས་འཇིག་རྟེན་ལྷ། །ཀུན་ཀྱང་བསྟན་འགྲོར་ཕན་བདེ་སྤེལ་བའི་མགོན། །ཁྱད་པར་རྒྱལ་འཕགས་ཡང་དབེན་རྔ་སྒྲའི་རིར། །པཎ་ཆེན་བཻ་རོས་བྱིན་བརླབས་གནས་ཀྱི་བདག །ལྷ་བཙན་ཆེན་པོ་རྡོ་རྗེ་ཞལ་དཀར་རྩལ། །སྐུ་མདོག་དཀར་གསལ་རྟ་དཀར་ཆིབས་པའི་ཚུལ། །ཕྱག་གཡས་རྒྱལ་མཚན་སྣ་ཚོགས་ཅོད་པཎ་འཕུར། །གཡོན་པས་རིན་ཆེན་སྒྲོམ་བུར་འདོད་རྒུ་འབྱུང་། །སྐུ་ལ་དར་བེར་དེ་སྟེང་དངུལ་ཁྲབ་དང་། །དབུ་ལ་རྨོག་ཞྭ་རྒོད་སྒྲོ་དར་རྒྱན་གསོལ། །བློན་འབངས་ལྷ་ཀླུ་བདུད་སྲིན་ཕོ་ཉར་འགྱེད། །དམ་ལྡན་སྒྲུབ་པ་པོ་ཡི་གྲོགས་མཛད་ཅིང་། །སྡིག་སྤྱོད་སྐྱེ་བོ་སྒྲོལ་བའི་དཔའ་རྟགས་ཅན། །ཞི་རྒྱས་དབང་དྲག་ལས་བཞིའི་སྤྲུལ་བསྒྱུར་ངོམས༔ རྣལ་འབྱོར་དགའ་གུས་དངས་བས་སྤྱན་འདྲེན་གཤེགས། །རང་སྣང་མཁའ་ལ་དངོས་མེད་དབང་གཞུའི་ཚུལ། །ཏིང་འཛིན་ཡིད་སྤྲུལ་བཤམས་པའི་གདན་ལ་བཞུགས། །དབང་པོ་དྲུག་ལ་དགྱེས་པའི་མཆོད་རྫས་དང་། །ཁྱད་པར་ས་ཐབ་སངས་རྒྱས་སྤྱན་མའི་ཀློང་། །བདུད་རྩི་ཤིང་ལྔ་དཀར་མངར་བཟའ་བཏུང་རིགས། །གོས་དཀར་ལྷ་མོས་བཞུས་པའི་དུད་པའི་སྤྲིན། །དམ་ཚིག་སྒྲོལ་མས་ས་གསུམ་ཡོངས་གང་སྤེལ། །སྟོང་ཆེན་ནམ་མཁའི་དཔལ་མོར་བཀྲམ་པ་ཡི། །དུད་པའི་ཆ་ཤས་ཟེགས་མ་རེ་རེ་ལས། །རྒྱལ་སྲིད་བདུན་དང་བཀྲ་ཤིས་རྫས་རྟགས་སོགས། །མཆོད་པའི་སྤྲིན་ཕུང་ཀུན་བཟང་རོལ་པར་ཤར། །ཁྱད་པར་ཡུལ་སྐྱོང་ཚིམ་བྱེད་སྲོག་ཆགས་རིགས། །གོ་ཁྲབ་མཚོན་ཆ་རྟེན་མཆོད་ཡོ་བྱད་རྫས། །མ་ཚང་མེད་པའི་ལོངས་སྤྱོད་དཔག་ཡས་འདིས། །བསླུ་མེད་སྐྱབས་མཆོག་རིན་ཆེན་རྣམ་གསུམ་བསང་། །རྩ་གསུམ་སྲུང་མ་དམ་ཅན་རྒྱ་མཚོ་བསང་། །ཁྱད་པར་ཡང་དབེན་འཆི་མེད་རྔ་སྒྲའི་བྲག །གང་ལ་རྟེན་བཅས་དཔའ་བོ་མཁའ་འགྲོ་བསང་། །སྤྲུལ་གཞི་ཚངས་པ་དུང་གི་ཐོར་ཚུགས་བསང་། །སྤྲུལ་བ་ལྷ་བཙན་རྡོ་རྗེ་ཞལ་དཀར་བསང་། །ཞི་བའི་ལས་མཛད་ཟླ་འོད་བསིལ་སྦྱིན་བསང་། །རྒྱས་པའི་ལས་མཛད་བསོད་ནམས་དཔལ་འཕེལ་བསང་། །དབང་གི་ལས་མཛད་སྣང་བ་དབང་སྡུད་བསང་། །དྲག་པོའི་ལས་མཛད་གནོད་སྦྱིན་བསེ་གདོང་བསང་། །གཞན་ཡང་སྤྲུལ་པ་ཡང་སྤྲུལ་ཐམས་ཅད་བསང་། །དེ་ལྟར་བསངས་ཤིང་འདོད་དོན་གསོལ་བ་ནི། །ཕན་བདེའི་འབྱུང་གནས་རྒྱལ་བསྟན་རིན་པོ་ཆེ། །མི་ནུབ་ཡུན་དུ་རྒྱས་པའི་ཕྲིན་ལས་མཛོད། །བསྟན་པའི་རྩ་ལག་བླ་མ་དགེ་བའི་བཤེས། །སྐུ་ཚེ་ཞབས་པད་བརྟན་པའི་ཕྲིན་ལས་མཛོད། །བདག་ཅག་སྒྲུབ་ལ་བརྩོན་པའི་གང་ཟག་གི། །བསླབ་གསུམ་བཤད་སྒྲུབ་དབྱར་མཚོ་ལྟར་འཕེལ་ཞིང་། །གནས་སྐབས་ཚེ་བསོད་བདེ་སྐྱིད་ཕུན་སུམ་ཚོགས། །མཐར་ཐུག་རང་གཞན་དོན་གཉིས་ལྷུན་གྲུབ་ནས། །གང་འབྲེལ་ཐར་ལམ་འགོད་པའི་ཕྲིན་ལས་མཛོད།། ཅེས་འདི་སྐྱབས་མཆོག་དཔལ་ལྡན་བླ་མ་ཡི། །ཟློས་གར་མཆོག་གིས་བཀའ་བསྩལ་མ་ཎི་ཀ །དད་དང་གུས་པས་སྤྱི་བོར་ལེགས་མཆོད་ནས། །རྒྱ་སྤྲུལ་བླུན་པོས་གང་དྲན་འཕེལ་བྲིས་ཕུལ། །དགེ་བས་བསྟན་འགྲོའི་ཕན་བདེའི་འབྱུང་གནས་ཆེ། །དམ་པའི་མཛད་ཕྲིན་ས་གསུམ་ཡོངས་ཁྱབ་ཤོག །སརྦ་མངྒ་ལཾ།།