ཆུ་དཀར་དུང་ཕྲེང་ནོར་བུའི་སྐ་རགས་ཅན་གྱི་བསང་མཆོད་ཕན་བདེའི་དྲི་བསུང་།
༄༅།། ཆུ་དཀར་དུང་ཕྲེང་ནོར་བུའི་སྐ་རགས་ཅན་གྱི་བསང་མཆོད་ཕན་བདེའི་དྲི་བསུང་བཞུགས། ན་མོ་གུ་རུ་པདྨ་ཀཱ་ར་ཡ། དཀར་མངར་ཤ་ཁྲག་སྐྱེམས་ཕུད་དང་། །བདུད་རྩི་ཤིང་ལྔའི་དུད་སྤྲིན་གཏོང་། །རང་ཉིད་པདྨ་ཧེ་རུ་ཀའི། །བསྐྱེད་རིམ་ངང་ནས་འདི་སྐད་དོ།། ཨེ་མ་ཧོ། ཀ་དག་དབྱིངས་ལ་གྲོལ་འཁྲུལ་མིང་མེད་ཀྱང་། །ཁ་དོག་འོད་ལྔར་འཛིན་པ་ཞུགས་སྐྱོན་གྱིས། །ག་ནས་གང་དུ་བརྒྱུད་མར་འཁོར་བའི་འགྲོ། །ང་བདག་གཟུང་འཛིན་འཇིག་རྟེན་ལྷ་འདྲེ་སྣང་། །ཅ་ཅོའི་རང་སྐད་དུང་གི་སྐ་རགས་ཅན། །ཆ་ཤས་ཡིད་ངོར་མོས་པའི་གནས་འདིར་སྤྱོན། །ཇ་ཆང་སྐྱེམས་ཕུད་དཀར་མངར་བདུད་རྩིའི་ཤིང་། །ཉ་རྒྱས་ཟླ་འདྲའི་ཐབ་ཏུ་བསྲེགས་པ་ལས། །ཏ་ལ་ལྗོན་པའི་ཤིང་ལས་འདོད་འབྱུང་ལྟར། །ཐ་མལ་མ་ཡིན་རྒྱལ་སྲིད་རྟགས་རྫས་དང་། །ད་ལྟ་ཉེར་སྤྱོད་གཟུགས་སྒྲ་དྲི་རོ་རེག །ན་བུན་མཁའ་ལ་འཁྲིགས་བཞིན་གུས་པས་ཕུལ། །པ་ར་མི་ཏའི་དོན་གཟིགས་ཨོ་རྒྱན་དང་། །ཕ་རོལ་བདུད་འདུལ་དཔལ་ཆེན་བཻ་རོའི་བཀའ། །བ་ལང་ལྟ་བུའི་བསམ་སྤྱོད་གནོད་འཚེ་སྤོངས། །མ་ནོར་དང་དུ་ལོངས་ལ་ཕྲིན་ལས་བསྒྲུབ། །ཙ་རི་ཏྲ་སོགས་གནས་ཡུལ་བསྲུང་བའི་འཁོར། །ཚ་གྲང་གདུག་པའི་ནད་གཏོང་བསེན་མོའི་གཟུགས། །ཛ་ཡ་རྒྱལ་བའི་བསྟན་པ་སྲུང་ལ་མོས། །ཝ་ལེར་རང་གཟུགས་བུད་མེད་ཁྲོས་པའི་མདོག། །ཞྭ་ཐོད་མུ་ཏིག་གཡུ་ཕྲེང་དར་གོས་བཀླུབས། །ཟ་བྱེད་མི་བསྲུན་དྲེད་མོ་ཁམ་ནག་ཞོན། །འ་འུར་བདུད་སྲིན་དྲེགས་པའི་འཁོར་གྱིས་བསྐོར། །ཡ་མཚན་བསང་མཆོད་བཞེས་ལ་དགྲ་རྐུན་ཟློག །རྭ་ཅོ་གཟེངས་བའི་ལྷ་གཡག་དཀར་པོ་དང་། །ལ་ལུང་མྱུར་བགྲོད་རྟ་ནག་འཕུར་ཤེས་མཛེས། །ཤ་བ་ལ་སོགས་ཞོན་པ་མ་ངེས་ཆིབས། །ས་འདིར་ཤི་འདྲེ་ཕོ་མོའི་རྒྱུ་འགྲུལ་ཆོད། །ཧ་ལ་དུག་སེལ་བདུད་རྩིའི་བསང་དུད་འདིས། །ཨ་ཧོ་ཡུལ་སྐྱོང་གཞི་བདག་བསང་ངོ་བརྔན། །རྒྱལ་བསྟན་སྲུང་ལ་འགྲོ་བའི་བདེ་སྐྱིད་སྤེལ། །ཁྱད་པར་བདག་ཅག་མི་ནོར་སྲུང་སྐྱོབ་མཛོད། །ཅེས་པའང་སེང་ཚང་ཆོས་གྲགས་སོགས་བསྟན་པའི་སྦྱིན་བདག་རྣམས་དང་བསྟན་འཛིན་སོགས་བཙུན་པ་འགས་བསྐུལ་ངོར་སྤྲང་རྒན་རྒྱ་སྤྲུལ་བས་སྨྲས་སོ།།