ཡུལ་སྐྱོང་དངུལ་རྫིའི་བསང་གསོལ་ཕྲིན་ལས་མྱུར་འགྲུབ།

༄༅།། ཡུལ་སྐྱོང་དངུལ་རྫིའི་བསང་གསོལ་ཕྲིན་ལས་མྱུར་འགྲུབ་བཞུགས་སོ།། ན་མོ་བཛྲ་དྷ་ར་ཡ། །རྡོ་རྗེ་འཛིན་པའི་སྒྱུ་འཕྲུལ་གར། །དྲེགས་པའི་སྡེ་དཔོན་རྡོ་རྗེ་ལེགས། །གང་དེའི་བཀའ་སྡོད་ཡུལ་སྐྱོང་མཆོག །གཡུ་མཚོ་གཉན་པོའི་བསང་མཆོད་དང་། །གསོལ་མཆོད་གསེར་སྐྱེམས་བྱེད་འདོད་པས། །ཡབ་ཡུམ་བཤོས་བུ་རིན་ཆེན་དབྱིབས། །ལྷུན་ཆགས་དཀར་གཏོར་སྦྲུལ་དཀྲིས་སོགས། །ལེགས་པར་བཤམས་ལ་རང་ཉིད་ནི། །ཡི་དམ་ལྷ་ཡི་ང་རྒྱལ་དང་། །རོལ་མོ་དང་བཅས་འདི་སྐད་དོ། །རྃ་ཡྃ་ཁྃཿགིས་མཆོད་རྫས་ཀྱི། །དངོས་འཛིན་འབག་བཙོག་བསྲེགས་གཏོར་བཀྲུས། །ཨོཾ་ཨཱཿཧཱུྃ༔གིས་མཆོད་པའི་སྤྲིན། །ཟག་མེད་གཏེར་དུ་བྱིན་བརླབས་ཏེ། །ཀྱཻ། སྐྱེ་འགག་གནས་གསུམ་བྲལ་བའི་དབྱིངས། །ཆོས་དབྱིངས་ཀུན་ཁྱབ་སྟོང་པ་ལ། །རིག་དང་མ་རིག་ཆོ་འཕྲུལ་གྱིས། །ཡེ་ཤེས་འཇིག་རྟེན་དྲེགས་པའི་སྡེ། །བསམ་གྱིས་མི་ཁྱབ་ཅིར་ཡང་སྣང་། །དེ་ཚེ་བཅོམ་ལྡན་དཔལ་ཆེན་པོའི། །ཐུགས་སྤྲུལ་གསང་བདག་རྡོ་རྗེ་འཛིན། །འཇིག་རྟེན་དྲེགས་པའི་འཁོར་ལོས་སྒྱུར། །སྤྲུལ་དང་ཡང་སྤྲུལ་གྲངས་མེད་པ། །ལྷ་དང་ཀླུ་དང་གནོད་སྦྱིན་གཟུགས། །འགྲོ་ལ་ཕན་པའི་སྒྱུ་འཕྲུལ་ངོམས། །ཁྱད་པར་འཛམ་གླིང་སོག་ཁའི་དབྱིབས། །བྱང་ཕྱོགས་གངས་ཅན་ཤར་གྱི་ཕྱོགས། །རྒྱལ་མོ་རོང་གི་ཟོ་དོར་གཙོ། །སྐུ་བླ་དངུལ་རྫི་གཡུ་མཚོ་ཞེས། །ལྷ་དང་བཙན་ལས་མཆེད་པའི་སྲས། །ཡབ་ཡུམ་འཁོར་བཅས་གཤེགས་སུ་གསོལ། །སྐུ་ཡི་ཆ་ལུགས་རྣམ་འགྱུར་ནི། །ཞི་རྒྱས་དབང་དྲག་ཕྲིན་ལས་བཞིའི། །རང་གཟུགས་འགགས་པ་མེད་པའི་རྩལ། །རེས་འགའ་སྐུ་མདོག་དུང་ལྟར་དཀར། །ལྷ་རྟ་དཀར་པོ་ཆིབས་སུ་བཅིབས། །དར་གྱི་ན་བཟའ་ཤེལ་ཁྲབ་གསོལ། །རྨོག་མོ་རྒོད་འཕྲུ་ཅོད་པཎ་འཕུར། །འཁོར་དུ་རང་འདྲ་འབུམ་གྱིས་བསྐོར། །ལྷ་ཡི་དགེ་བསྙེན་དམ་ཚིག་ཅན། །རྣལ་འབྱོར་ཕྲིན་ལས་སྒྲུབ་པ་དང་། །མཆོད་པ་བཞེས་ཕྱིར་གཤེགས་སུ་གསོལ། །རེས་འགའ་གནོད་སྦྱིན་གསེར་མདོག་ཅན། །སེང་སྟག་ལ་སོགས་གཅན་གཟན་ཞོན། །རཏྣའི་བུམ་པ་མདའ་དར་བསྣམས། །རྒྱས་མཛད་དགེ་བསྙེན་དམ་ཚིག་ཅན། །རྣལ་འབྱོར་ཕྲིན་ལས་སྒྲུབ་པ་དང་། །མཆོད་པ་བཞེས་ཕྱིར་གཤེགས་སུ་གསོལ། །ལན་རེ་སྤྲུལ་བ་མཛད་ཙམ་ན། །རྒྱལ་པོའི་ཆ་ལུགས་དམར་ལ་རྔམ། །དར་གྱི་བེར་དང་དར་ཐོད་གསོལ། །འཁོར་དུ་མདངས་ལྡན་ལྷ་མོ་ཡུམ། །དྲི་ཟའི་ན་ཆུང་གླུ་གར་བྱེད། །དབང་མཛད་དགེ་བསྙེན་དམ་ཚིག་ཅན། །རྣལ་འབྱོར་ཕྲིན་ལས་སྒྲུབ་པ་དང་། །མཆོད་པ་བཞེས་ཕྱིར་གཤེགས་སུ་གསོལ། །རང་གཟུགས་དམག་དཔོན་དཔའ་རྔམ་ཅན། །རལ་གྲི་ཕྱར་ཞིང་ཐོག་སེར་འབེབས། །གཡུ་འབྲུག་ཆིབས་ནས་གློག་དམར་འཁྱུག །འཁོར་དུ་རང་འདྲ་མང་པོས་བསྐོར། །ཀི་བསྭོ་ཆ་སྒྲ་དི་རི་རི། །དྲག་རྩལ་ཐོགས་མེད་དམ་ཚིག་ཅན། །རྣལ་འབྱོར་ཕྲིན་ལས་སྒྲུབ་པ་དང་། །བསང་མཆོད་བཞེས་ཕྱིར་གཤེགས་སུ་གསོལ། །ཡུམ་མཆོག་ཀླུ་སྨན་རྒྱལ་མོ་དང་། །སྲས་མཆོག་ལྷ་ཡི་བཙན་རྒོད་སོགས། །མ་ལུས་འཁོར་དང་བཅས་པ་རྣམས། །བསང་མཆོད་བཞེས་ཕྱིར་གཤེགས་སུ་གསོལ། །རོལ་མོ་འཁྲོལ། དེ་ནས་བཞུགས་སུ་གསོལ་བ་དང་བསང་མཆོད་དངོས་ནི་རོལ་མོ་དང་བཅས་ཏེ་འདི་སྐད་དོ། ཀྱཻ། ངོ་མཚར་རྨད་བྱུང་རང་སྣང་གཞལ་ཡས་ཁང་། །རྒྱ་ཆེ་ལྷུན་སྡུག་རྒྱན་བཀོད་ཕུན་སུམ་ཚོགས། །ཡིད་འོང་རིན་ཆེན་དར་ཟབ་བརྩེགས་པའི་ཁྲིར། །དངུལ་རྫི་གཡུ་མཚོ་འཁོར་བཅས་བཞུགས་སུ་གསོལ། །ཁྱེད་ཀྱི་རྟེན་ཡུལ་ནོར་འཛིན་ལྷུན་པོའི་དབྱིབས། །མཛེས་པར་བྱེད་ཕྱིར་རཏྣའི་བྲག་རི་ལ། །ཤར་གྱི་ཐིག་ལེས་བཟུང་བས་བཻ་ཌཱུརྱའི། །གཟི་མདངས་ཕྲོག་པའི་གནས་ལ་བརྟན་པར་བཞུགས། །རྟ་བདུན་དབང་པོས་འཆི་མེད་ལམ་གྱི་མདངས། །ལན་བརྒྱར་བཞུས་པའི་དྭངས་མ་འཁྱིལ་འདྲ་བའི། །གཡུ་མཚོ་ཟླུམ་པོ་གསེར་འཛིན་ལྟོ་བ་ནས། །རླབས་ཕྲེང་ཟློས་གར་གཡོ་བས་ཅིར་ཡང་མཛེས། །སྣོད་བཅུད་བཀྲག་མདངས་མཛེས་པས་མེ་ལོང་ལ། །དངོས་མེད་དྲེགས་པའི་གཟུགས་བརྙན་བརྟན་བཞུགས་ནས། །འགྲོ་བ་ཡོངས་ཀྱི་བདེ་སྐྱིད་གསེར་རིའི་མདངས། །བདག་དང་བསྲུང་བྱའི་དཔལ་དུ་གསལ་བར་མཛོད། །ཀྱཻ། །ཡུལ་ལྷ་འཁོར་བཅས་བརྟན་བཞུགས་ནས། །དགྱེས་འཛུམ་ཐུགས་ཀྱིས་དགོངས་བཞིན་དུ། །བདུད་རྩི་བསང་དང་གསེར་སྐྱེམས་ཕུད། །དམ་རྫས་གཏོར་མ་བཞེས་སུ་གསོལ། །ཡུམ་ཆེན་ནམ་མཁའི་དཔལ་མོ་ལ། །དགྱེས་པར་འཁྲིལ་བའི་ཆུ་འཛིན་ལས། །སྙན་འགྱུར་དབྱར་རྔ་སྒྲོག་པ་དང་། །ཆབས་ཅིག་ལྷ་མོ་མ་མཱ་ཀིས། །སྦྲང་ཆར་བདུད་རྩིའི་རྒྱུན་བཟང་པོའི། །གསེར་འཛིན་དགའ་མའི་ལང་ཚོའི་མདངས། །ཡང་ཡང་བཀྲུས་ཚེ་སངས་རྒྱས་སྤྱན། །དགྱེས་པའི་བྱིན་བརླབས་དྲི་བཟང་གིས། །ཡོངས་སུ་འཁྱུད་པའི་འཆི་མེད་ལྗོན། །བརྒྱ་བྱིན་རྐང་འཐུང་གཡུ་འོད་འབར། །དུང་གི་མདངས་འཛིན་སུར་དཀར་དང་། །གསེར་གྱི་ཏོག་ཅན་སྟག་པའི་ཤིང་། །གོས་དཀར་མོ་ཡིས་མཉམ་སྦྱོར་བས། །ཕྱེ་མར་དམ་རྫས་གསེར་སྐྱེམས་སོགས། །ལྷན་ཅིག་བཞུས་པའི་དུད་སྤྲིན་ལ། །འབྲུ་གསུམ་སྔགས་ཀྱིས་ངར་བཏབ་པས། །ཀུན་ཏུ་བཟང་པོའི་རྣམ་རོལ་ལས། །བྱུང་བའི་མཆོད་སྤྲིན་རྒྱ་མཚོ་ཡིས། །དངུལ་རྫི་གཡུ་མཚོ་འཁོར་བཅས་རྣམས། །བསང་ངོ་མཆོད་དོ་མངའ་གསོལ་ལོ། །གཞན་ཡང་མཆོད་ཡོན་གང་གའི་རྒྱུན། །དཀར་སེར་དམར་ལྗང་མེ་ཏོག་སྤྲིན། །ཉི་ཟླའི་དཔལ་ཕྲོག་ཨ་ལོ་ཀེ། །དྲི་ཆབ་རོལ་མཛོད་བདུན་ལྟ་བུ། །ཐོགས་མེད་འཆར་བའི་བསང་མཆོད་འདིས། །དངུལ་རྫི་གཡུ་མཚོ་འཁོར་བཅས་རྣམས། །བསང་ངོ་མཆོད་དོ་མངའ་གསོལ་ལོ། །མཛེས་སྡུག་གཟུགས་དང་དབྱངས་སྙན་སྒྲ། །ཡིད་འོང་དྲི་དང་རོ་མངར་བཅུད། །འཇམ་མཉེན་རེག་བྱ་བདེ་སྟོང་ཆོས། །འདོད་ཡོན་ལྔ་ཡི་དཔལ་ཡོན་འདི། །ཡུལ་སྐྱོང་དངུལ་རྫི་འཁོར་བཅས་ཀྱི། །དབང་པོ་དྲུག་གི་ཉམས་གྲིབ་བསང་། །དགྱེས་པའི་ལོངས་སྤྱོད་ཕུན་སུམ་ཚོགས། །མ་ཚང་མེད་པ་འབྱུང་གྱུར་ཅིག། །བསང་མཆོད་གཙང་མ་འདི་བཞེས་ལ། །རྣལ་འབྱོར་འདོད་པའི་ཕྲིན་ལས་སྒྲུབས། །སངས་རྒྱས་བསྟན་དང་དེར་འཛིན་སྡེ། །བསྲུང་ཞིང་སྐྱོབ་པར་མཛད་དུ་གསོལ། །ཞི་བའི་ཕྲིན་ལས་འོད་སྟོང་གཟིས། །འཇིགས་བརྒྱད་མུན་པ་རབ་བསལ་ནས། །རྫོགས་ལྡན་འཆི་མེད་ལམ་གྱི་མདངས། །བདེ་སྐྱིད་སྣང་བས་ཁྱབ་པར་མཛོད། །རྒྱས་པའི་ཕྲིན་ལས་ཆུ་གཏེར་ཆེ། །ཚེ་དང་བསོད་ནམས་རིན་ཆེན་གཏེར། །འཛད་པ་མེད་པའི་ཡིད་བཞིན་ནོར། །བསྟན་འགྲོའི་རྒྱལ་མཚན་རྩེར་མངོན་མཛོད། །དབང་གི་ཕྲིན་ལས་མེ་ན་ཀས། །ཁམས་གསུམ་སྲིད་གསུམ་སྐལ་བཟང་གྲོགས། །མོས་པ་རྣམ་བཞིའི་ཟུར་མིག་གིས། །མྱུར་དུ་ཡིད་དབང་དགུག་པར་མཛོད། །དྲག་པོའི་ཕྲིན་ལས་བསྐལ་པའི་མེ། །མངོན་སྤྱོད་དྲི་བཞོན་གྱིས་བསྐྱོད་པས། །དགྲ་བགེགས་ལོག་འདྲེན་རྩི་སྦུར་རྣམས། །རྡུལ་ཕྲན་མིང་གི་ལྷག་མར་མཛོད། །མདོར་ན་བདག་དང་བསྲུང་བྱ་ཡིས། །ཅི་བསམ་འདོད་པའི་ལས་རྣམས་ཀུན། །ཐོགས་པ་མེད་པར་སྒྲུབ་པ་དང་། །ཁྱད་པར་བཅོལ་བའི་ཕྲིན་ལས་ཀུན། །མྱུར་དུ་འགྲུབ་པར་མཛད་དུ་གསོལ། །ཅེས་པ་འདི་ཡང་རྗེ་དབོན་དམ་པའི་རིགས། །གང་དང་དོན་གཉེར་ཅན་འགའི་བཀའ་བཞིན་དུ། ཨོ་རྒྱན་ཆེན་པོའི་སྐུ་གསུང་ཐུགས་ཡོན་གྱིས། །བྱིན་བརླབས་སྤྲུལ་མིང་པདྨ་དོན་ལྡན་རྩལ། །ཀུན་གཞིའི་སྒྲོམ་ནས་ཐོལ་བྱུང་ཐོགས་མེད་དུ། །བྲིས་པའི་དགེ་བས་ཡུལ་ལྷ་འཁོར་བཅས་ཀྱིས། བདག་ཅག་དཔོན་སློབ་བུ་བཞིན་སྐྱོང་བ་དང་། །ཅི་བསམ་མ་ལུས་ལྷུན་གྱིས་འགྲུབ་པར་ཤོག །དགེའོ།། དགེའོ།། དགེའོ།།