ཡུལ་ལྷ་ཁྲབ་གྱོན་གྱི་བསང་མཆོད་བདུད་རྩིའི་སྤྲིན་ཕུང་།
༄༅།། ཡུལ་ལྷ་ཁྲབ་གྱོན་གྱི་བསང་མཆོད་བདུད་རྩིའི་སྤྲིན་ཕུང་བཞུགས་སོ།། བསང་རྫས་སོགས་མཐོང་བརྒྱུད་ལྟར་བཤམས། རྃ་ཡྃ་ཁྃ་གིས་བསངས་སྦྱངས་བསྒྱུར། ཨོཾ་ཨཱཿཧཱུྃ་གིས་སྦྱངས་སྤེལ་བསྔོ། །རང་ཉིད་ཡི་དམ་གང་ཡིན་གྱི། །ང་རྒྱལ་བརྟན་པོས་འདི་སྐད་དོ།། ཀྱཻ། སྔོན་ཚེ་པད་འབྱུང་ལོ་ཆེན་བཻ་རོ་ཡིས། །རྩུབ་འགྱུར་རྒྱལ་མོ་རོང་གི་གཞི་བདག་རྣམས། །བཀའ་རྟགས་དམ་འོག་ཟིལ་གྱིས་མནན་པའི་ཚེ། །བསྟན་དང་འགྲོ་ལ་ཕན་བདེ་སྤེལ་བ་དང་། །རྣལ་འབྱོར་སྒྲུབ་པོའི་བར་ཆད་བསལ་ལོ་ཞེས། །ཇི་ལྟར་ཁས་བླངས་ཞལ་གྱིས་བཞེས་པ་ལྟར། །ཡུལ་སྐྱོང་གཙོ་བོ་སྐུ་བླ་ར་ཁང་གི། །བཀའ་བློན་ཆེ་བཙན་གཡུལ་རྒྱལ་ཁྲབ་གྱོན་རྩལ། །མཆོད་པའི་གནས་འདིར་གཤེགས་ཤིང་བརྟན་པར་བཞུགས། །དངོས་འབྱོར་ཡིད་སྤྲུལ་ཕྱི་ནང་མཆོད་པའི་སྤྲིན། །ཁྱད་པར་ཡུམ་ལྔའི་ཀློང་ལས་ལེགས་བསྐྱེད་པའི། །བདུད་རྩི་ཤིང་ལྔ་དཀར་མངར་ཤ་ཁྲག་ཕུད། །ཇ་ཆང་བཏུང་བ་གསེར་སྐྱེམས་གཡུ་སྐྱེམས་སོགས། །བསྲེགས་པའི་དུད་སྤྲིན་དུ་བའི་ཟེགས་མ་ལས། །རྒྱལ་སྲིད་བདུན་དང་ཉེར་སྤྱོད་འདོད་ཡོན་ལྔ། །བཀྲ་ཤིས་རྫས་རྟགས་མཆོད་པའི་ལྷ་མོ་སོགས། །མ་ཚང་མེད་པར་ཀུན་བཟང་མཆོད་སྤྲིན་འདི། །ཅིར་ཡང་འཆར་བའི་བསང་མཆོད་དམ་པ་འདིས། །རྩ་བརྒྱུད་བླ་མ་ཡི་དམ་རྒྱུད་སྡེ་དྲུག །དཔའ་བོ་མཁའ་འགྲོ་ཆོས་སྐྱོང་སྲུང་མ་དང་། །མངའ་རིས་སྐོར་གསུམ་དབུས་གཙང་རུ་བཞི་དང་། །མདོ་ཁམས་སྒང་དྲུག་ཡུལ་ལྷ་གཉན་པོ་བསང་། །ཁྱད་པར་ཡུལ་སྐྱོང་སྐུ་བླ་ཁྲབ་གྱོན་རྩལ། །དཀར་ནག་ལྷ་འདྲེ་ཕན་གནོད་བྱེད་པོ་བསང་། །དབང་པོ་དྲུག་ལ་ཉམས་གྲིབ་ཕོག་པ་དང་། །ཡུལ་མིའི་འཁོན་འཛིང་ཐབ་གཞོབ་དམེ་མནོལ་དང་། །ཉེས་པའི་སྐྱོན་ཀུན་ཆོས་དབྱིངས་ཀློང་དུ་བཤགས། །འདིར་གནས་རྣལ་འབྱོར་མི་ནོར་ལྟོས་བཅས་ལ། །མི་མཐུན་འཇིགས་བརྒྱད་བར་ཆད་ཞི་བ་དང་། །ཚེ་བསོད་དཔལ་འབྱོར་ཡར་ངོའི་ཟླ་བཞིན་རྒྱས། །ཟས་ནོར་ལོངས་སྤྱོད་སྦུར་ལེན་རྡུལ་བཞིན་འདུས། །ལོག་འདྲེན་དགྲ་རྐུན་བྲག་རིར་ཐོག་ཕོག་བཞིན། །ཐམས་ཅད་མིང་གི་ལྷག་མར་ཚར་བཅད་ནས། །བདེ་སྐྱིད་སྣང་བ་གོང་འཕེལ་ཕྲིན་ལས་མཛོད།། ཅེས་པའང་ཀརྨ་ཡེ་ཤེས་དང་བསོད་ནམས་མཐུ་སྟོབས་ལྷ་གྲོགས་ཟུང་གིས་བསྐུལ་ངོར་རྒྱ་སྤྲུལ་རྒན་པོས་སྨྲས་པ་དགེའོ།།