དགྲ་བླ་དུང་ཁྱུང་ཤེལ་གྱི་ཕྲེང་མཛེས་ཀྱི་བསང་མཆོད་འདོད་དོན་དཔལ་སྟེར།

༄༅།། དགྲ་བླ་དུང་ཁྱུང་ཤེལ་གྱི་ཕྲེང་མཛེས་ཀྱི་བསང་མཆོད་འདོད་དོན་དཔལ་སྟེར་ཞེས་བྱ་བ་བཞུགས་སོ།། ན་མོ་གུ་རུ་པདྨ་ཀཱ་ར་ཡ། འདིར་བསྟན་སྲུང་དགྲ་བླའི་བསང་མཆོད་བྱ་བར་འདོད་པས་བདུད་རྩི་ཤིང་ལྔའི་དུད་སྤྲིན་དང་། ཕྱེ་མར་ཇ་ཆང་འོ་ཞོའི་ཕུད་བཅས་བཤམས་ལ། རང་ཉིད་པད་འབྱུང་ཞི་བའི་སྐུ་རུ་བསྒོམ། ཐུགས་ལས་ཡི་གེ་རྃ་ཡྃ་ཁྃ་གསུམ་འཕྲོས། །བསང་རྫས་མི་གཙང་དྲི་མ་བསྲེགས་གཏོར་བཀྲུས། ཨོཾ་གྱིས་དངོས་འཛིན་མི་དམིགས་སྟོང་པའི་ངང་། །ཨཱཿཡིས་ཟག་མེད་བདུད་རྩིར་བྱིན་གྱིས་བརླབས། །ཧཱུྃ་གིས་ཀུན་བཟང་མཆོད་སྤྲིན་ལྟ་བུར་གྱུར༔ ནམ་མཁའ་མཛོད་ཀྱི་སྔགས་རྒྱས་བྱིན་བརླབས་སྤེལ། །ཨེ་མ་ངོ་མཚར་རྨད་བྱུང་འཛམ་བུའི་གླིང་། །ཨོ་རྒྱན་སྦས་ཡུལ་རྒྱལ་མོ་རོང་གི་ཆར། །ཡུལ་སྐྱོང་གཙོ་བོ་ཤེལ་རི་སྟག་གསུམ་གྱི། །བཀའ་སྡོད་དགྲ་བླ་དུང་ཁྱུང་ཤེལ་ཕྲེང་ཞེས། །ཆོས་ཀྱི་བསྟན་སྲུང་བོན་གྱི་རྐྱེན་སེལ་མཁན། །བཻ་རོ་གཡུ་སྒྲའི་བཀའ་རྟགས་ཕྱག་རྒྱ་ཡིས། །དམ་འོག་བཅུག་པའི་དམ་བཅའ་འདིར་དགོངས་ལ། །རྣལ་འབྱོར་སྒྲུབ་པོའི་བསང་གི་མགྲོན་ལ་གཤེགས། །རང་མཐུན་དར་ཟབ་གདན་ཁྲི་བརྩེགས་སྟེང་བཞུགས། །རྒྱལ་བའི་བཀའ་ཡིས་སྦྲེལ་བའི་མོས་འདུན་གྱིས། །གུས་པས་བཏུད་དེ་མཆོད་པའི་སྤྲིན་ཕུང་འབུལ། །དྭངས་བསིལ་མཆོད་ཡོན་མཚར་སྡུག་མེ་ཏོག་བཞད། །དྲི་ཞིམ་སྤོས་མཆོག་བདུད་རྩི་ཤིང་ལྔ་དང་། །ཕྱེ་མར་དཀར་མངར་ཟས་ཕུད་བསྲེགས་པ་ཡི། །དུད་པའི་སྤྲིན་གྱི་ཕུང་པོས་ལྷ་ལམ་ཁྱབ། །དུད་པའི་ཟེགས་མ་རེ་རེའི་ཆ་ཤས་ལས། །རྒྱལ་སྲིད་བདུན་དང་བཀྲ་ཤིས་རྫས་རྟགས་དང་། །སྲོག་ཆགས་སྣ་ཚོགས་ཡིད་འོང་སྒྱུ་རྩལ་ངོམས། །སྲིད་མཐའི་བར་དུ་ཟད་མེད་ཡུལ་བདག་གི། །དབང་པོ་དྲུག་གིས་མྱོང་རེག་ཟག་མེད་ཀྱི། །བདེ་ཆེན་ཡེ་ཤེས་འཆར་བའི་བསང་མཆོད་འདིས། །ལྷ་ཡི་སྲས་པོ་དུང་ཁྱུང་དཀར་པོ་བསང་། །དགྱེས་སྡེ་བཙུན་མོ་ཀླུ་ཡི་ལྕམ་གཅིག་བསང་། །སྤྲུལ་པ་ལྷ་དང་བཙན་ཀླུ་གནོད་སྦྱིན་སོགས། །སྡེ་བརྒྱད་ཡང་འཁོར་ཉིང་སྤྲུལ་མ་ལུས་བསང་། །སྐུ་ཡི་རྣམ་འགྱུར་གཅིག་ཏུ་མ་ངེས་ཀྱང་། །སྐུ་མདོག་དཀར་པོ་དུང་ལ་ཉི་ཤར་བཞིན། །བཀྲག་སྣུམ་མདངས་འཚེར་ཤེལ་ཁྲབ་རྟ་དཀར་ཆིབས། །དུང་རྨོག་རྒོད་འཕྲུ་དར་ཚོན་ཅོད་པན་འཕུར། །ཕྱག་གཡས་བ་དན་ཁྲ་བོ་ལྷབ་ལྷུབ་གཡོ། །གཡོན་པས་རིན་ཆེན་དངུལ་གྱི་ལྡེ་མིག་བསྣམས། །བཀའ་བློན་ཡུམ་སྲས་སྤྲུལ་པ་སྣ་ཚོགས་འགྱེད། །ཁྱེད་ལ་འདོད་དོན་ཕྲིན་ལས་བཅོལ་བ་ནི། །ནད་གདོན་འཇིགས་བརྒྱད་མུན་པའི་སྨག་རུམ་ཀུན། །ཞི་བའི་འོད་སྟོང་འབར་བས་ཕྱིར་བསྐྲད་མཛོད། །བདག་ཅག་ཚེ་བསོད་དཔལ་འབྱོར་ཡིད་བཞིན་མཚོ། །ཚོགས་གཉིས་རྒྱལ་བའི་ཆར་གྱིས་འཕེལ་བར་མཛོད། །དབང་གི་ཕྲིན་ལས་བཅུ་དྲུག་ལང་ཚོ་མས། །གདུལ་བྱ་གཞོན་ནུའི་བླ་ཡིད་འགུགས་པར་མཛོད། །ལོག་འདྲེན་དགྲ་འདྲེ་ཚེར་མ་རྣོན་པོའི་དཔལ། །དྲག་ཤུལ་ལས་ཀྱི་མེ་ལྕེས་གཞིལ་བར་མཛོད། །སངས་རྒྱས་བསྟན་དང་བསྟན་འཛིན་སྐྱེས་བུའི་ཚོགས། །རྟག་ཏུ་བསྲུང་སྐྱབས་གཡེལ་བ་མེད་པར་མཛོད། །མདོར་ན་འདོད་པའི་དོན་དང་གཉེར་བའི་ལས། །འཇིག་རྟེན་མེས་པོ་ཚངས་པ་ཆེན་པོ་དང་། །ལྷ་ཡི་དབང་པོ་ཇི་ལྟར་སྨན་པ་བཞིན། །ཡིད་བཞིན་ནོར་བུའི་དཔལ་དང་མཚུངས་པར་མཛོད། །བཀྲ་ཤིས་བྱང་ཆུབ་སེམས་ཀྱི་ས་གཞི་ལ། །བཀྲ་ཤིས་ཚོགས་གཉིས་མྱུ་གུ་རབ་སྨིན་ནས། །བཀྲ་ཤིས་སྐུ་བཞིའི་འབྲས་བུ་གཡུར་ཟ་ཞིང་། །བཀྲ་ཤིས་སྣོད་བཅུད་དགེ་བའི་དཔལ་འབར་ཤོག །ཅེས་པའང་སྐྱབས་རྗེ་རྒྱལ་བའི་སྲས་པོའི་ཞབས་ཀྱི་འཁོར་ལོའི་བཀྲ་ཤིས་དགེ་བའི་རི་མོས་ངོ་མཚར་ཅིར་ཡང་བཀྲ་བའི་གདན་སར་རྨི་ལྟས་དང་མཚུངས་པར་སྤྲུལ་པའི་སྐུ་ཐུབ་བསྟན་ནས་བསྐུལ་ངོར་རྒྱ་སྤྲུལ་དགེ་སྦྱོང་ལུང་རྟོགས་མིང་གིས་བྲིས་ནས་ཕུལ་བ་ཛ་ཡནྟུ།།